𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀧𑀞𑀫𑀦𑀬𑀯𑀡𑁆𑀡𑀦𑀸

𑁪𑁬𑁬. 𑀧𑀢𑀺𑀝𑁆𑀞𑀸𑀦𑀁 𑀇𑀥 𑀲𑀁𑀲𑀸𑀭𑁂 𑀅𑀯𑀝𑁆𑀞𑀸𑀦𑀁, 𑀢𑀲𑁆𑀲 𑀫𑀽𑀮𑀁 𑀓𑀺𑀮𑁂𑀲𑀸𑀢𑀺 𑀆𑀳 ‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺. 𑀧𑀢𑀺𑀝𑁆𑀞𑀸𑀦𑀸𑀬 𑀧𑀦 𑀩𑁆𑀬𑀸𑀧𑀸𑀭𑀸𑀧𑀢𑁆𑀢𑀺 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺. 𑀬𑀲𑁆𑀫𑀸 𑀓𑀺𑀮𑁂𑀲𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀯𑀺𑀲𑁂𑀲𑀢𑁄 𑀲𑀁𑀲𑀸𑀭𑀦𑀸𑀬𑀺𑀓𑀸, 𑀓𑀺𑀮𑁂𑀲𑀲𑀳𑀺𑀢𑀫𑁂𑀯 𑀘 𑀓𑀫𑁆𑀫𑀁 𑀧𑀢𑀺𑀝𑁆𑀞𑀸𑀦𑀸𑀬 𑀳𑁄𑀢𑀺, 𑀦 𑀓𑁂𑀯𑀮𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺…𑀧𑁂… 𑀆𑀬𑀽𑀳𑀦𑀸’’𑀢𑀺. 𑀢𑀣𑀸 𑀢𑀡𑁆𑀳𑀸𑀬 𑀪𑀯𑀲𑁆𑀲𑀸𑀤𑀪𑀸𑀯𑀢𑁄, 𑀤𑀺𑀝𑁆𑀞𑀺𑀬𑀸 𑀯𑀺𑀪𑀯𑀸𑀪𑀺𑀦𑀦𑁆𑀤𑀦𑀪𑀽𑀢𑀸𑀬 𑀯𑀺𑀪𑀯𑀸𑀪𑀺𑀲𑀗𑁆𑀔𑀭𑀡𑀪𑀸𑀯𑀢𑁄 ‘‘𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀻𑀲𑀼𑀧𑀺 𑀅𑀦𑁆𑀢𑁄𑀫𑀼𑀔𑀧𑁆𑀧𑀯𑀢𑁆𑀢𑀸𑀬 𑀪𑀯𑀤𑀺𑀝𑁆𑀞𑀺𑀬𑀸 𑀯𑀺𑀲𑁂𑀲𑀢𑁄 𑀲𑀁𑀲𑀸𑀭𑁂 𑀅𑀯𑀝𑁆𑀞𑀸𑀦𑀁, 𑀬𑀢𑁄 𑀑𑀮𑀻𑀬𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺. 𑀩𑀳𑀺𑀫𑀼𑀔𑀧𑁆𑀧𑀯𑀢𑁆𑀢𑀸𑀧𑀺 𑀯𑀺𑀪𑀯𑀤𑀺𑀝𑁆𑀞𑀺 𑀪𑀯𑀸𑀪𑀺𑀲𑀗𑁆𑀔𑀭𑀡𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸’’𑀢𑀺. 𑀮𑀬𑀸𑀧𑀢𑁆𑀢𑀺 𑀬𑀣𑀸𑀭𑀤𑁆𑀥𑀲𑁆𑀲 𑀆𑀭𑀫𑁆𑀪𑀲𑁆𑀲 𑀅𑀦𑀺𑀝𑁆𑀞𑀸𑀦𑀁 𑀅𑀦𑁆𑀢𑁄𑀲𑀗𑁆𑀓𑁄𑀘𑀪𑀸𑀯𑀢𑁄𑀢𑀺 𑀆𑀳 ‘‘𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺. 𑀉𑀤𑁆𑀥𑀢𑀸𑀧𑀢𑁆𑀢𑀺 𑀅𑀦𑀼𑀧𑀸𑀬𑀪𑀽𑀢𑀸 𑀩𑁆𑀬𑀸𑀧𑀸𑀭𑀸𑀧𑀢𑁆𑀢𑀺 𑀅𑀲𑀗𑁆𑀓𑁄𑀘𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺. 𑀢𑀣𑀸 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀢𑁆𑀢𑀸 𑀘 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀢𑁆𑀢𑀸 𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑁆𑀲 𑀢𑀤𑀼𑀪𑀬𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸 𑀯𑀼𑀢𑁆𑀢𑀸, 𑀇𑀢𑀭𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸. 𑀅𑀯𑀼𑀢𑁆𑀢𑀸𑀦𑀦𑁆𑀢𑀺 ‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀢𑀺 𑀬𑁄𑀚𑀦𑀸.

𑀲𑀫𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀭𑀳𑁂𑀦 𑀲𑀫𑀧𑁆𑀧𑀯𑀢𑁆𑀢𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂. 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀧𑀢𑀺𑀭𑀽𑀧𑀁 𑀲𑀗𑁆𑀓𑀮𑁂𑀢𑀺 𑀕𑀡𑁂𑀢𑀺 𑀢𑀼𑀮𑁂𑀢𑀺. 𑀢𑁂𑀦𑀸𑀳 ‘‘𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻’’𑀢𑀺. 𑀢𑀤𑀸𑀓𑀸𑀭𑁄𑀢𑀺 𑀧𑀝𑀺𑀲𑀗𑁆𑀔𑀸𑀦𑀸𑀓𑀸𑀭𑁄 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀦𑀸𑀓𑀸𑀭𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀧𑀝𑀺𑀲𑀗𑁆𑀔𑀸𑀦𑀲𑀪𑀸𑀯𑀢𑁆𑀢𑀸 𑀏𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲. 𑀧𑀘𑁆𑀙𑀺𑀫𑀧𑀘𑁆𑀙𑀺𑀫𑀓𑀸𑀭𑀡𑀪𑀸𑀯𑁄𑀢𑀺 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀓𑀸𑀭𑀡𑀪𑀸𑀯𑁄. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀜𑁆𑀳𑀺 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺.

𑁪𑁬𑁭. 𑀅𑀯𑀺𑀧𑀭𑀻𑀢𑀓𑀸𑀬𑀸𑀤𑀺𑀲𑀪𑀸𑀯𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀬 𑀩𑀮𑀯𑀢𑀻 𑀏𑀯 𑀲𑀢𑀺. 𑀧𑀜𑁆𑀜𑀸 𑀕𑀳𑀺𑀢𑀸 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀘𑀺𑀢𑁆𑀢𑁄𑀢𑀺 𑀏𑀯𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑁄. 𑀘𑀺𑀭𑀓𑀢𑀯𑀢𑁆𑀢𑀸𑀤𑀺𑀯𑀲𑁂𑀦𑀸𑀢𑀺 𑀘𑀺𑀭𑀓𑀢𑀯𑀢𑁆𑀢𑀸𑀤𑀺𑀲𑀻𑀲𑁂𑀦. ‘‘𑀯𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸𑀧𑀺 ‘‘𑀓𑀢𑁆𑀯𑀸 𑀆𑀳 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁…𑀧𑁂… 𑀓𑁄𑀝𑁆𑀞𑀸𑀲’’𑀦𑁆𑀢𑀺 𑀬𑁄𑀚𑀦𑀸.

𑀧𑀭𑁂𑀲𑀦𑁆𑀢𑀺 𑀦 𑀅𑀦𑀦𑁆𑀢𑀭𑀸𑀦𑀁. 𑀲𑀩𑁆𑀩𑁂𑀲𑀁…𑀧𑁂… 𑀬𑁄𑀚𑁂𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀩𑁄𑀚𑁆𑀛𑀗𑁆𑀕𑀸 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀯𑀺𑀲𑁂𑀲𑀸 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺. 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄, 𑀅𑀲𑁆𑀲𑀸𑀤𑀦𑀯𑀲𑁂𑀦 𑀆𑀫𑀲𑀢𑀻𑀢𑀺 𑀆𑀫𑀺𑀲𑀁, 𑀓𑀸𑀫𑁄𑀯 𑀆𑀫𑀺𑀲𑀦𑁆𑀢𑀺 𑀓𑀸𑀫𑀸𑀫𑀺𑀲𑀁, 𑀓𑀺𑀮𑁂𑀲𑀓𑀸𑀫𑁄. 𑀯𑀢𑁆𑀣𑀼𑀓𑀸𑀫𑁄 𑀧𑀦 𑀆𑀫𑀲𑀻𑀬𑀢𑀻𑀢𑀺 𑀆𑀫𑀺𑀲𑀁. 𑀏𑀯𑀁 𑀲𑁂𑀲𑀤𑁆𑀯𑀬𑀫𑁆𑀧𑀺. 𑀢𑁂𑀲𑀼 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀲𑀼𑀔𑀯𑀺𑀲𑁂𑀲𑀸𑀢𑀺 𑀮𑁄𑀓𑁄, 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑁄. 𑀯𑀝𑁆𑀝𑀁 𑀲𑀁𑀲𑀸𑀭𑁄. 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀪𑁄 𑀓𑀸𑀫𑀸𑀫𑀺𑀲𑀁. 𑀪𑀯𑀯𑀺𑀲𑁂𑀲𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀓𑀸𑀫𑀺𑀲𑀁. 𑀯𑀺𑀪𑀯𑁄 𑀦𑀸𑀫 𑀓𑀺𑀫𑀢𑁆𑀣𑀺𑀬𑁄, 𑀓𑁄 𑀯𑀸 𑀢𑀁 𑀅𑀪𑀺𑀧𑀢𑁆𑀣𑁂𑀬𑁆𑀬𑀸𑀢𑀺 𑀯𑀝𑁆𑀝𑀸𑀦𑀼𑀕𑁂𑀥𑀪𑀽𑀢𑁄 𑀮𑁄𑀪𑁄 𑀯𑀝𑁆𑀝𑀸𑀫𑀺𑀲𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀢𑀤𑀸𑀭𑀫𑁆𑀫𑀡𑀦𑁆𑀢𑀺 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀁, 𑀭𑀽𑀧𑀸𑀤𑀺. 𑀮𑁄𑀓𑀥𑀫𑁆𑀫𑀸 𑀮𑀸𑀪𑀸𑀤𑀬𑁄. 𑀯𑀼𑀢𑁆𑀢𑀸𑀯𑀲𑁂𑀲𑀸 𑀲𑀩𑁆𑀩𑀸𑀯 𑀢𑀡𑁆𑀳𑀸 𑀲𑀁𑀲𑀸𑀭𑀚𑀦𑀓𑁄 𑀭𑀸𑀕𑁄.

𑀧𑀞𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸

𑁪𑁬𑁮-𑁯. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀓𑀸𑀫𑀪𑀯𑀸𑀤𑀻𑀲𑀼, 𑀲𑀜𑁆𑀜𑀻𑀪𑀯𑀸𑀤𑀻𑀲𑀼, 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀼 𑀘 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸. 𑀆𑀳𑀸𑀭𑀢𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸, 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸. 𑀬𑁂𑀦 𑀧𑀘𑁆𑀘𑀬𑁂𑀦 𑀢𑁂 𑀢𑀺𑀝𑁆𑀞𑀦𑁆𑀢𑀺, 𑀲𑁄 𑀏𑀓𑁄𑀯 𑀥𑀫𑁆𑀫𑁄 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑁄. 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀸𑀢𑀼𑀬𑁄. 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄𑀢𑀺 𑀓𑀸𑀫𑀥𑀸𑀢𑀼𑀭𑀽𑀧𑀥𑀸𑀢𑀼𑀅𑀭𑀽𑀧𑀥𑀸𑀢𑀼𑀬𑁄. 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀻𑀢𑀺 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁨𑁨, 𑁩𑁫𑁫; 𑀅. 𑀦𑀺. 𑁫.𑁨𑁬) 𑀆𑀕𑀢𑀸𑀦𑀺 𑀯𑀺𑀫𑀼𑀘𑁆𑀘𑀦𑀓𑀸𑀭𑀡𑀸𑀦𑀺. 𑀅𑀦𑀼𑀢𑁆𑀢𑀭𑀺𑀬𑀸𑀦𑀻𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀸𑀤𑀻𑀦𑀺 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺. 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀻𑀢𑀺 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀤𑁆𑀤𑀲𑁄 𑀳𑁄𑀢𑀺, 𑀢𑀸𑀦𑀺 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀺 𑀦𑀸𑀫. 𑀤𑁂𑀲𑀦𑀸𑀫𑀢𑁆𑀢𑀜𑁆𑀘𑁂𑀢𑀁. 𑀔𑀻𑀡𑀸𑀲𑀯𑁄 𑀳𑀺 𑀤𑀲𑀯𑀲𑁆𑀲𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀼𑀦 𑀤𑀲𑀯𑀲𑁆𑀲𑁄 𑀦 𑀳𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑀲𑀯𑀲𑁆𑀲𑁄, 𑀦𑀯𑀯𑀲𑁆𑀲𑁄𑀧𑀺…𑀧𑁂… 𑀏𑀓𑀫𑀼𑀳𑀼𑀢𑁆𑀢𑀺𑀓𑁄𑀧𑀺 𑀦 𑀳𑁄𑀢𑀺𑀬𑁂𑀯 𑀧𑀼𑀦 𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀸, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁. 𑀢𑀸𑀦𑀺 𑀧𑀦 ‘‘𑀇𑀥, 𑀪𑀺𑀓𑁆𑀔𑀼, 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁩𑁧) 𑀲𑀼𑀢𑁆𑀢𑁂 𑀆𑀕𑀢𑀸𑀦𑀺𑀬𑁂𑀯. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻’’𑀢𑀺𑀆𑀤𑀻𑀦𑀺 (𑀤𑀻. 𑀦𑀺. 𑁩.𑁩𑁬𑁦; 𑀅. 𑀦𑀺. 𑁧𑁦.𑁧𑁦𑁬) 𑀤𑀲 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺. 𑀔𑀦𑁆𑀥𑀸𑀤𑀬𑁄𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀬𑁄. 𑀯𑀺𑀦𑀦𑁆𑀥𑀦𑀦𑁆𑀢𑀺 ‘‘𑀪𑀯𑀸𑀤𑀺𑀯𑀺𑀦𑀦𑁆𑀥𑀦𑀝𑁆𑀞𑁂𑀦 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸’’𑀢𑀺 𑀤𑀲𑁆𑀲𑁂𑀢𑀺. 𑀕𑀫𑀦𑀦𑁆𑀢𑀺 𑀅𑀲𑁆𑀲𑀸𑀤𑀦𑀯𑀲𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀽’’𑀢𑀺.

𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀸. ‘‘𑀫𑀕𑁆𑀕𑀁 𑀅𑀧𑁆𑀧𑀢𑁆𑀢𑀁 𑀓𑀸𑀬𑀺𑀓𑀁 𑀯𑀻𑀭𑀺𑀬’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀮𑁄𑀓𑀼𑀢𑁆𑀢𑀭𑀯𑀻𑀭𑀺𑀬𑀫𑁆𑀧𑀺 𑀧𑀭𑀺𑀬𑀸𑀬𑁂𑀦 𑀓𑀸𑀬𑀺𑀓𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑀭𑀽𑀧𑀸𑀯𑀘𑀭𑁂 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀭𑀽𑀧𑀸𑀯𑀘𑀭𑁂…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑀸’’𑀢𑀺. 𑀬𑀣𑀸 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸 𑀧𑀻𑀢𑀺 𑀧𑀭𑀺𑀬𑀸𑀬𑁂𑀦 ‘‘𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀭𑀽𑀧𑀸𑀯𑀘𑀭𑁂 𑀧𑀻𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀏𑀯𑀁 𑀮𑀩𑁆𑀪𑀫𑀸𑀦𑀸𑀧𑀺 𑀅𑀮𑀩𑁆𑀪𑀫𑀸𑀦𑀁 𑀉𑀧𑀸𑀤𑀸𑀬 𑀦 𑀯𑀼𑀢𑁆𑀢𑀸. ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸’’𑀢𑀺 𑀯𑀺𑀲𑁂𑀲𑀦𑀁 𑀲𑀦𑁆𑀢𑀧𑀡𑀻𑀢𑀸𑀬 𑀧𑀻𑀢𑀺𑀬𑀸 𑀤𑀲𑁆𑀲𑀦𑀢𑁆𑀣𑀁. 𑀩𑁄𑀚𑁆𑀛𑀗𑁆𑀕𑀪𑀽𑀢𑀸𑀢𑀺 𑀧𑀭𑀺𑀬𑀸𑀬𑀩𑁄𑀚𑁆𑀛𑀗𑁆𑀕𑀪𑀽𑀢𑀸. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄 𑀧𑀻𑀢𑀺…𑀧𑁂… 𑀦 𑀯𑀼𑀢𑁆𑀢𑁄 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑁆𑀢𑀸 𑀢𑀲𑁆𑀲. 𑀦 𑀳𑀺 𑀓𑀸𑀫𑀸𑀯𑀘𑀭𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀻𑀢𑀺 𑀅𑀢𑁆𑀣𑀺.

𑀇𑀥 𑀯𑀼𑀢𑁆𑀢𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀧𑀝𑀺𑀯𑁂𑀥𑀸𑀦𑀼𑀮𑁄𑀫𑀦𑀢𑁄 𑀯𑀺𑀧𑀲𑁆𑀲𑀦𑀸𑀬 𑀯𑀺𑀬 𑀧𑀸𑀤𑀓𑀚𑁆𑀛𑀸𑀦𑁂𑀲𑀼𑀧𑀺 𑀲𑀢𑀺𑀆𑀤𑀬𑁄 ‘‘𑀩𑁄𑀚𑁆𑀛𑀗𑁆𑀕𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺. 𑀏𑀯𑀁 𑀓𑀲𑀺𑀡𑀚𑁆𑀛𑀸𑀦𑀸𑀤𑀻𑀲𑀼 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀯𑀢𑁆𑀯𑀸 𑀅𑀦𑀼𑀤𑁆𑀥𑀭𑀦𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀯𑀢𑁆𑀢𑀼𑀁 ‘‘𑀅𑀦𑀼𑀤𑁆𑀥𑀭𑀦𑁆𑀢𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑁂 𑀳𑀺 𑀆𑀲𑀦𑁆𑀦𑁂𑀓𑀦𑁆𑀢𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀻𑀳𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺, 𑀦 𑀛𑀸𑀦𑀓𑁆𑀔𑀡𑁂 𑀢𑀤𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀲𑁆𑀲 𑀯𑀺𑀬…𑀧𑁂… 𑀦 𑀉𑀤𑁆𑀥𑀭𑀦𑁆𑀢𑀻’’𑀢𑀺. 𑀓𑀲𑀺𑀡𑀦𑀺𑀲𑁆𑀲𑀦𑁆𑀤𑁄 𑀅𑀭𑀽𑀧𑀸𑀦𑀻𑀢𑀺 𑀆𑀳 ‘‘𑀢𑀤𑀸𑀬𑀢𑁆𑀢𑀸𑀦𑀻’’𑀢𑀺.

𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀦𑀬𑀯𑀡𑁆𑀡𑀦𑀸

𑁪𑁭𑁦-𑁧. 𑀯𑁄𑀲𑁆𑀲𑀚𑁆𑀚𑀦𑀁 𑀧𑀳𑀸𑀦𑀁 𑀯𑁄𑀲𑁆𑀲𑀕𑁆𑀕𑁄, 𑀯𑁄𑀲𑁆𑀲𑀚𑁆𑀚𑀦𑀁 𑀯𑀸 𑀯𑀺𑀲𑁆𑀲𑀝𑁆𑀞𑀪𑀸𑀯𑁄 𑀦𑀺𑀭𑀸𑀲𑀗𑁆𑀓𑀸𑀦𑀼𑀧𑁆𑀧𑀯𑁂𑀲𑁄𑀢𑀺 𑀆𑀳 ‘‘𑀯𑁄𑀲𑁆𑀲𑀕𑁆𑀕𑀲𑀤𑁆𑀤𑁄…𑀧𑁂… 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀢𑀦𑁆𑀦𑀺𑀦𑁆𑀦𑀧𑁆𑀧𑀓𑀸𑀭𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀢𑀤𑀸𑀭𑀫𑁆𑀫𑀡𑀓𑀭𑀡𑀧𑁆𑀧𑀓𑀸𑀭𑁂𑀦.

𑀢𑀢𑀺𑀬𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.