𑁧𑁮. 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁄

𑁧. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑀯𑀡𑁆𑀡𑀦𑀸

𑁯𑁭𑁮. ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀤𑀻𑀦𑀁 𑀥𑀸𑀢𑀼𑀲𑀫𑁆𑀪𑀯𑀧𑀭𑀺𑀬𑀸𑀧𑀦𑁆𑀦𑀧𑀸𑀢𑀼𑀪𑀸𑀯 𑀪𑀽𑀫𑀦𑁆𑀢𑀭𑀢𑀻𑀲𑀼 𑀥𑀸𑀢𑀽𑀲𑀼𑀉𑀧𑁆𑀧𑀸𑀤𑀓𑀤𑀸𑀦𑀸𑀤𑀺𑀓𑀼𑀲𑀮 𑀓𑀫𑁆𑀫𑀢𑀩𑁆𑀩𑀺𑀧𑀸𑀓𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀆𑀭𑀫𑁆𑀫𑀡𑀤𑀼𑀓𑀤𑁆𑀯𑀬𑀤𑀺𑀝𑁆𑀞𑀸𑀤𑀺𑀓𑀼𑀲𑀮𑀢𑁆𑀢𑀺𑀓𑀸𑀤𑀺𑀢𑀺𑀓𑀧𑀜𑁆𑀘𑀓𑀭𑀽𑀧𑀮𑁄𑀓𑀺𑀬𑀤𑀼𑀓𑀤𑁆𑀯𑀬𑀪𑁂𑀤𑀪𑀺𑀦𑁆𑀦𑀸𑀦𑀁 𑀦𑀺𑀭𑀯𑀲𑁂𑀲𑀢𑁄 𑀲𑀗𑁆𑀕𑀳𑀺𑀢𑀢𑁆𑀢𑀸 𑀤𑀼𑀢𑀺𑀬𑀯𑀸𑀭𑀸𑀤𑀻𑀦𑀜𑁆𑀘 𑀏𑀢𑁆𑀣 𑀅𑀦𑀼𑀧𑁆𑀧𑀯𑁂𑀲𑀢𑁄 𑀲𑀩𑁆𑀩𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁄 𑀧𑀞𑀫𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀸𑀭𑁄 𑀦𑀸𑀫, 𑀤𑀼𑀢𑀺𑀬𑁄 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀸𑀭𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀦 ‘‘𑀓𑀸𑀫𑀥𑀸𑀢𑀼𑀬𑀸 𑀓𑀢𑀺 𑀔𑀦𑁆𑀥𑀸 𑀓𑀢𑀺 𑀆𑀬𑀢𑀦𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁯𑁯𑁧) 𑀢𑁂𑀲𑀁 𑀅𑀢𑁆𑀣𑀺𑀢𑀸 𑀏𑀯 𑀯𑀼𑀢𑁆𑀢𑀸, 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀅𑀧𑁆𑀧𑀬𑁄𑀕𑁄 ‘‘𑀅𑀢𑁆𑀣𑀺 𑀪𑀯𑀢𑀺 𑀲𑀁𑀯𑀺𑀚𑁆𑀚𑀢𑀻’’𑀢𑀺 𑀲𑀸𑀫𑀜𑁆𑀜𑀓𑀺𑀭𑀺𑀬𑀸𑀬 𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄, 𑀢𑁂𑀦𑀸𑀬𑀁 ‘‘𑀲𑀫𑁆𑀪𑀯𑀸𑀲𑀫𑁆𑀪𑀯𑀤𑀲𑁆𑀲𑀦𑀯𑀸𑀭𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑁄, 𑀘𑀢𑀼𑀢𑁆𑀣𑁄 𑀘 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀯𑀸𑀭𑁄𑀢𑀺 𑀢𑀢𑁆𑀣 𑀧𑀸𑀢𑀼𑀪𑀸𑀯𑀸𑀧𑀸𑀢𑀼𑀪𑀸𑀯𑀯𑀘𑀦𑀢𑁄.

𑁯𑁭𑁯. 𑀬𑀣𑀸𑀧𑀼𑀘𑁆𑀙𑀦𑁆𑀢𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀅𑀯𑀺𑀢𑀣𑀩𑁆𑀬𑀸𑀓𑀭𑀡𑀁 𑀧𑀭𑁂𑀳𑀺 𑀓𑀢𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀯𑀘𑀦𑀁 𑀯𑀺𑀜𑁆𑀜𑀸𑀬 𑀓𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀩𑁆𑀬𑀸𑀓𑀭𑀡𑀫𑁂𑀯 𑀦𑀸𑀫 𑀳𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀲𑀩𑁆𑀩𑀜𑁆𑀜𑀼𑀦𑀸 𑀏𑀯 𑀓𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨. 𑀉𑀧𑁆𑀧𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁯𑁯𑁧. 𑀓𑀸𑀫𑀥𑀸𑀢𑀼𑀲𑀫𑁆𑀪𑀽𑀢𑀸𑀦𑀜𑁆𑀘𑀸𑀢𑀺 𑀇𑀤𑁆𑀥𑀺𑀬𑀸 𑀭𑀽𑀧𑀥𑀸𑀢𑀼𑀕𑀢𑀸𑀦𑀁 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀖𑀸𑀦𑀸𑀬𑀢𑀦𑀸𑀤𑀻𑀦𑀁 𑀅𑀪𑀸𑀯𑁂𑀦𑀸𑀢𑀺 𑀏𑀢𑁆𑀣 𑀬𑀤𑀺 𑀢𑀤𑀪𑀸𑀯𑁂𑀦 𑀕𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀘𑀓𑁆𑀔𑀸𑀬𑀢𑀦𑀲𑁆𑀲 𑀅𑀪𑀸𑀯𑁂𑀦 𑀭𑀽𑀧𑀸𑀬𑀢𑀦𑀁 𑀆𑀬𑀢𑀦𑀸𑀤𑀺𑀓𑀺𑀘𑁆𑀘𑀁 𑀦 𑀓𑀭𑁂𑀬𑁆𑀬. 𑀢𑀢𑁄 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀤𑁂𑀯𑀸𑀦𑀁 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀤𑁆𑀯𑀸𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀲𑀢𑁆𑀢𑀸𑀦𑀁, 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀸𑀦𑀁 𑀯𑀸 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 ‘‘𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀣𑀸 𑀬𑁂𑀲𑀼 𑀓𑀸𑀫𑀸𑀯𑀘𑀭𑀸𑀤𑀺𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀓𑀸𑀫𑀸𑀯𑀘𑀭𑀸𑀤𑀺𑀲𑀢𑁆𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺 𑀏𑀢𑁆𑀣𑀸𑀢𑀺 𑀲𑀢𑁆𑀢𑀼𑀧𑁆𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀫𑀸𑀦𑀸 𑀢𑁂 𑀲𑀢𑁆𑀢𑀦𑀺𑀓𑀸𑀬𑀸 𑀘, 𑀦 𑀧𑀦𑁂𑀢𑁆𑀣 𑀅𑀧𑀭𑀺𑀬𑀸𑀧𑀦𑁆𑀦𑁄𑀓𑀸𑀲𑁄 𑀅𑀧𑀭𑀺𑀬𑀸𑀧𑀦𑁆𑀦𑀲𑀢𑁆𑀢𑀦𑀺𑀓𑀸𑀬𑁄 𑀘 𑀅𑀢𑁆𑀣𑀺, 𑀬𑁄 ‘‘𑀥𑀸𑀢𑀽’’𑀢𑀺 𑀯𑀼𑀘𑁆𑀘𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀓𑀸𑀲𑀯𑀲𑁂𑀦 𑀯𑀸 𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀸 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼 𑀦𑀸𑀫 𑀦𑀢𑁆𑀣𑀻’’𑀢𑀺 𑀆𑀳. 𑀲𑀢𑁆𑀢𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀇𑀫𑀺𑀦𑀸 𑀯𑀸 𑀑𑀓𑀸𑀲𑀲𑀢𑁆𑀢𑀮𑁄𑀓𑀤𑁆𑀯𑀬𑀁 𑀲𑀳 𑀕𑀳𑁂𑀢𑁆𑀯𑀸 𑀢𑀸𑀤𑀺𑀲𑀸𑀬 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑀢𑁆𑀢𑀪𑀸𑀯𑁂𑀦 𑀯𑀸 𑀉𑀧𑁆𑀧𑀢𑁆𑀢𑀺 𑀲𑀢𑁆𑀢𑀼𑀧𑁆𑀧𑀢𑁆𑀢𑀺, 𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀢𑀁𑀢𑀁𑀪𑀯𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸 𑀢𑀁𑀢𑀁𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀲𑀤𑀺𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀥𑀸𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀏𑀯𑀁 𑀅𑀧𑀭𑀺𑀬𑀸𑀧𑀦𑁆𑀦𑀥𑀸𑀢𑀼 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁩. 𑀧𑀭𑀺𑀬𑀸𑀧𑀦𑁆𑀦𑀸𑀧𑀭𑀺𑀬𑀸𑀧𑀦𑁆𑀦𑀯𑀸𑀭𑀯𑀡𑁆𑀡𑀦𑀸

𑁯𑁯𑁯. 𑀪𑀯𑀯𑀲𑁂𑀦 𑀑𑀓𑀸𑀲𑀯𑀲𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀢𑀢𑁆𑀣 𑀅𑀜𑁆𑀜𑀢𑁆𑀣 𑀘 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸 𑀢𑀁𑀢𑀁𑀧𑀭𑀺𑀬𑀸𑀧𑀦𑁆𑀦𑀸 𑀲𑀩𑁆𑀩𑁂 𑀤𑀝𑁆𑀞𑀩𑁆𑀩𑀸.

𑁬. 𑀉𑀧𑁆𑀧𑀸𑀤𑀓𑀓𑀫𑁆𑀫𑀆𑀬𑀼𑀧𑁆𑀧𑀫𑀸𑀡𑀯𑀸𑀭𑁄

(𑁧.) 𑀉𑀧𑁆𑀧𑀸𑀤𑀓𑀓𑀫𑁆𑀫𑀯𑀡𑁆𑀡𑀦𑀸

𑁧𑁦𑁨𑁧. 𑀔𑀦𑁆𑀥𑀸𑀤𑀻𑀦𑀁 𑀥𑀸𑀢𑀼𑀲𑀫𑁆𑀪𑀯𑀸𑀤𑀺𑀯𑀲𑁂𑀦 𑀧𑀪𑁂𑀤𑀁 𑀯𑀢𑁆𑀯𑀸 𑀬𑁂 𑀲𑀢𑁆𑀢𑀸 𑀥𑀸𑀢𑀼𑀧𑁆𑀧𑀪𑁂𑀤𑀯𑀦𑁆𑀢𑁄, 𑀬𑀜𑁆𑀘 𑀢𑁂𑀲𑀁 𑀉𑀧𑁆𑀧𑀸𑀤𑀓𑀓𑀫𑁆𑀫𑀁, 𑀬𑁄 𑀘 𑀢𑀲𑁆𑀲 𑀯𑀺𑀧𑀸𑀓𑁄, 𑀢𑁂𑀲𑀁 𑀯𑀲𑁂𑀦 𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀤𑁂𑀯𑀸’’𑀢𑀺𑀆𑀤𑀺𑀓𑁄 𑀙𑀝𑁆𑀞𑀯𑀸𑀭𑁄 𑀆𑀭𑀤𑁆𑀥𑁄. 𑀔𑀦𑁆𑀥𑀸𑀤𑀬𑁄 𑀏𑀯 𑀳𑀺 𑀥𑀸𑀢𑀼𑀢𑁆𑀢𑀬𑀪𑀽𑀢𑀤𑁂𑀯𑀯𑀲𑁂𑀦 𑀤𑀸𑀦𑀸𑀤𑀺𑀓𑀫𑁆𑀫𑀯𑀲𑁂𑀦 𑀢𑀁𑀢𑀁𑀆𑀬𑀼𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑀺𑀦𑁆𑀦𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀯𑀲𑁂𑀦 𑀘 𑀪𑀺𑀦𑁆𑀦𑀸𑀢𑀺. 𑀘𑀢𑀼𑀤𑁄𑀡𑀁 𑀅𑀫𑁆𑀩𑀡𑀁, 𑀙𑀤𑁄𑀡𑀦𑁆𑀢𑀺 𑀏𑀓𑁂.

𑀉𑀧𑁆𑀧𑀸𑀤𑀓𑀓𑀫𑁆𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨.) 𑀆𑀬𑀼𑀧𑁆𑀧𑀫𑀸𑀡𑀯𑀡𑁆𑀡𑀦𑀸

𑁧𑁦𑁨𑁪. 𑀢𑀬𑁄𑀧𑀺 𑀚𑀦𑀸𑀢𑀺 𑀢𑀬𑁄 𑀚𑀦𑀲𑀫𑀽𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦𑁨𑁫. 𑀆𑀪𑀸𑀢𑀺 𑀲𑁄𑀪𑀦𑀸 𑀧𑀪𑀸.

𑁧𑁦𑁨𑁬. 𑀓𑀜𑁆𑀘𑀦𑀧𑀺𑀡𑁆𑀟𑁄 𑀯𑀺𑀬 𑀲𑀲𑁆𑀲𑀺𑀭𑀺𑀓𑀸 𑀓𑀜𑁆𑀘𑀦𑀧𑀺𑀡𑁆𑀟𑀲𑀲𑁆𑀲𑀺𑀭𑀺𑀓𑀸. 𑀢𑀢𑁆𑀣 𑀧𑀦 𑀲𑁄𑀪𑀦𑀧𑀪𑀸𑀬 𑀓𑀺𑀡𑁆𑀡𑀸 𑀲𑀼𑀪𑀸𑀓𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑁂 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀅𑀦𑁆𑀢𑀺𑀫𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀸, 𑀅𑀣 𑀧𑀦 𑀲𑀼𑀪𑁂𑀦 𑀓𑀺𑀡𑁆𑀡𑀸 𑀲𑀼𑀪𑀓𑀺𑀡𑁆𑀡𑀸. 𑀧𑀼𑀭𑀺𑀫𑀧𑀤𑁂𑀲𑀼𑀧𑀺 𑀧𑀭𑀺𑀢𑁆𑀢𑀁 𑀲𑀼𑀪𑀁 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀁 𑀲𑀼𑀪𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸𑀢𑀺 𑀲𑀼𑀪-𑀲𑀤𑁆𑀤𑁂𑀦 𑀲𑀫𑀸𑀲𑁄 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺.

𑁧𑁦𑁨𑁭. 𑀆𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀸 𑀧𑀼𑀩𑁆𑀩𑀪𑀸𑀕𑁂𑀦 𑀓𑀣𑀺𑀢𑀸𑀢𑀺 𑀛𑀸𑀦𑀓𑁆𑀔𑀡𑁂 𑀢𑀢𑁄 𑀧𑀘𑁆𑀙𑀸 𑀯𑀸 𑀧𑀭𑀺𑀢𑁆𑀢𑀸𑀤𑀺𑀓𑀲𑀺𑀡𑀸𑀭𑀫𑁆𑀫𑀡𑀪𑀸𑀯𑀦𑀸𑀬 𑀆𑀯𑀚𑁆𑀚𑀦𑁂𑀦 𑀘 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀦𑀸𑀦𑀢𑁆𑀢𑀢𑀸 𑀦 𑀳𑁄𑀢𑀺, 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀧𑀦 𑀧𑀼𑀩𑁆𑀩𑀪𑀸𑀕𑀸𑀯𑀚𑁆𑀚𑀦𑁂𑀦 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀲𑁂𑀦 𑀳𑀺 𑀛𑀸𑀦𑀁 𑀧𑀭𑀺𑀢𑁆𑀢𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀢𑀁𑀢𑀤𑀸𑀭𑀫𑁆𑀫𑀡𑀁 𑀳𑁄𑀢𑀺, 𑀧𑀼𑀩𑁆𑀩𑀪𑀸𑀕𑁂𑀦 𑀢𑀁𑀢𑀁𑀓𑀲𑀺𑀡𑀸𑀯𑀚𑁆𑀚𑀦𑁂𑀦 𑀢𑀁𑀢𑀁𑀫𑀦𑀲𑀺𑀓𑀸𑀭𑀦𑁆𑀢𑀺. 𑀙𑀦𑁆𑀤𑀸𑀤𑀬𑁄 𑀧𑀦 𑀅𑀧𑁆𑀧𑀦𑀸𑀓𑁆𑀔𑀡𑁂𑀧𑀺 𑀯𑀺𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀧𑀡𑀺𑀥𑀻𑀢𑀺 𑀦 𑀢𑀡𑁆𑀳𑀸𑀧𑀢𑁆𑀣𑀦𑀸, 𑀅𑀣 𑀔𑁄 𑀙𑀦𑁆𑀤𑀧𑀢𑁆𑀣𑀦𑀸𑀯 𑀤𑀝𑁆𑀞𑀩𑁆𑀩𑀸. 𑀅𑀥𑀺𑀫𑁄𑀓𑁆𑀔𑁄 𑀦𑀺𑀘𑁆𑀙𑀬𑁄. 𑀅𑀪𑀺𑀦𑀻𑀳𑀸𑀭𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑁂𑀯. 𑀬𑀤𑀺 𑀧𑀦 𑀪𑀯𑀙𑀦𑁆𑀤𑀪𑀯𑀧𑀢𑁆𑀣𑀦𑀸𑀤𑀬𑁄 𑀢𑀁𑀢𑀁𑀪𑀯𑀯𑀺𑀲𑁂𑀲𑀦𑀺𑀬𑀸𑀫𑀓𑀸 𑀅𑀥𑀺𑀧𑁆𑀧𑁂𑀢𑀸. ‘‘𑀅𑀧𑁆𑀧𑀦𑀸𑀬𑀧𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀏𑀢𑀲𑁆𑀲 𑀅𑀧𑁆𑀧𑀦𑀸𑀬 𑀧𑀯𑀢𑁆𑀢𑀸𑀬 𑀢𑀢𑁄 𑀧𑀘𑁆𑀙𑀸𑀧𑀺 𑀯𑀝𑁆𑀝𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀜𑁆𑀜𑀸𑀯𑀺𑀭𑀸𑀕𑀸𑀤𑀻𑀳𑀺 𑀧𑀦 𑀯𑀺𑀲𑁂𑀲𑀺𑀬𑀫𑀸𑀦𑀁 𑀆𑀭𑀫𑁆𑀫𑀡𑀁 𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀯𑀢𑁆𑀢𑁄 𑀫𑀦𑀲𑀺𑀓𑀸𑀭𑁄 𑀘 𑀪𑀯𑀯𑀺𑀲𑁂𑀲𑀦𑀺𑀬𑀸𑀫𑀓𑁄 𑀧𑀼𑀩𑁆𑀩𑀪𑀸𑀕𑁄𑀯 𑀯𑀝𑁆𑀝𑀢𑀻𑀢𑀺 ‘‘𑀆𑀭𑀫𑁆𑀫𑀡𑀫𑀦𑀲𑀺𑀓𑀸𑀭𑀸 𑀧𑀼𑀩𑁆𑀩𑀪𑀸𑀕𑁂𑀦 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀯𑀺𑀧𑀼𑀮𑀸 𑀨𑀮𑀸𑀢𑀺 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀸𑀬𑀼𑀯𑀡𑁆𑀡𑀸𑀤𑀺𑀨𑀮𑀸. 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀫𑀁𑀲𑀤𑀺𑀩𑁆𑀩𑀘𑀓𑁆𑀔𑀽𑀳𑀺 𑀘.

𑁧𑁦𑁨𑁮. ‘‘𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦) 𑀯𑀘𑀦𑀢𑁄 ‘‘𑀓𑀫𑁆𑀫𑀫𑁂𑀯 𑀧𑀫𑀸𑀡’’𑀦𑁆𑀢𑀺 𑀆𑀳, 𑀅𑀩𑁆𑀩𑀼𑀤𑀸𑀤𑀺𑀆𑀬𑀼𑀧𑁆𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀧𑀦 𑀓𑀫𑁆𑀫𑀯𑀲𑁂𑀦𑁂𑀯 𑀓𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀮𑀻𑀬𑀦𑁄𑀓𑀸𑀲𑀲𑁆𑀲 𑀅𑀪𑀸𑀯𑀸𑀢𑀺 𑀲𑀫𑀸𑀦𑀚𑀸𑀢𑀺𑀓𑁂𑀦 𑀅𑀘𑁆𑀙𑀭𑀸𑀕𑀡𑁂𑀦 𑀲𑀩𑁆𑀩𑀤𑀸 𑀧𑀭𑀺𑀯𑀸𑀭𑀺𑀬𑀫𑀸𑀦𑀲𑁆𑀲 𑀓𑀸𑀫𑀕𑀼𑀡𑀸𑀓𑀺𑀡𑁆𑀡𑀲𑁆𑀲 𑀢𑀩𑁆𑀩𑀺𑀭𑀳𑀺𑀢𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄.

𑀓𑀺𑀁 𑀦𑀺𑀬𑀫𑁂𑀢𑀻𑀢𑀺 𑀓𑀺𑀁 𑀛𑀸𑀦𑀁 𑀉𑀧𑀧𑀢𑁆𑀢𑀺𑀁 𑀦𑀺𑀬𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀬𑁄 𑀦𑀯𑀧𑀺 𑀲𑁄𑀥𑁂𑀢𑁆𑀯𑀸. 𑀫𑀢𑁆𑀣𑀓𑁂𑀢𑀺 𑀯𑁂𑀳𑀧𑁆𑀨𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀪𑀯𑀸 𑀦𑀸𑀫𑀸𑀢𑀺 𑀢𑀢𑁄 𑀧𑀭𑀁 𑀅𑀕𑀫𑀦𑀢𑁄 𑀉𑀢𑁆𑀢𑀫𑀪𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀪𑀯𑀲𑀻𑀲𑀸𑀦𑀻𑀢𑀺 𑀕𑀳𑀺𑀢𑀸. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀯𑁂𑀳𑀧𑁆𑀨𑀮𑀸𑀤𑀺𑀝𑁆𑀞𑀸𑀦𑀸𑀦𑀺 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀳𑀧𑁆𑀨𑀮𑀢𑁄 𑀧𑀦 𑀧𑀼𑀭𑀺𑀫𑁂𑀲𑀼 𑀦𑀯𑀲𑀼 𑀦𑀺𑀩𑁆𑀩𑀢𑁆𑀢𑀅𑀦𑀸𑀕𑀸𑀫𑀻 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 ‘‘𑀭𑀽𑀧𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀲𑁆𑀲𑀘𑀺 𑀲𑀢𑁆𑀢 𑀅𑀦𑀼𑀲𑀬𑀸 𑀅𑀦𑀼𑀲𑁂𑀦𑁆𑀢𑀺, 𑀓𑀲𑁆𑀲𑀘𑀺 𑀧𑀜𑁆𑀘, 𑀓𑀲𑁆𑀲𑀘𑀺 𑀢𑀬𑁄 𑀅𑀦𑀼𑀲𑁂𑀦𑁆𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩𑁧𑁧) 𑀇𑀤𑀁 𑀯𑀼𑀢𑁆𑀢𑀁, 𑀦 𑀯𑁂𑀳𑀧𑁆𑀨𑀮𑀸𑀤𑀻𑀲𑀼 𑀉𑀧𑀧𑀦𑁆𑀦𑀁 𑀲𑀦𑁆𑀥𑀸𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀭𑀺𑀬𑀲𑀸𑀯𑀓𑀸𑀦𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑁂𑀯 𑀳𑁄𑀢𑀺, 𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀻’’𑀢𑀺, 𑀏𑀢𑁂𑀦 𑀳𑁂𑀝𑁆𑀞𑀽𑀧𑀧𑀢𑁆𑀢𑀺 𑀏𑀯 𑀦𑀺𑀯𑀸𑀭𑀺𑀢𑀸, 𑀦 𑀢𑁂𑀲𑁆𑀯𑁂𑀯 𑀉𑀧𑀭𑀽𑀧𑀭𑀺 𑀯𑁂𑀳𑀧𑁆𑀨𑀮𑁂 𑀘 𑀉𑀧𑀧𑀢𑁆𑀢𑀺 𑀅𑀭𑀽𑀧𑀥𑀸𑀢𑀽𑀧𑀧𑀢𑁆𑀢𑀺 𑀘. ‘‘𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑀸𑀕𑀸𑀫𑀻 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀫𑀢𑁆𑀣𑀓𑁂 𑀞𑀺𑀢𑁄 𑀧𑀭𑀺𑀦𑀺𑀩𑁆𑀩𑀸𑀢𑀻’’𑀢𑀺 𑀇𑀤𑀫𑁆𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀆𑀭𑁄𑀳𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀦 𑀢𑁂𑀦 𑀢𑀲𑁆𑀲 𑀫𑀢𑁆𑀣𑀓𑀁 𑀅𑀧𑁆𑀧𑀢𑁆𑀢𑀲𑁆𑀲 𑀅𑀭𑀽𑀧𑀥𑀸𑀢𑀼𑀁 𑀉𑀧𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀬𑁄 𑀯𑀸 𑀅𑀜𑁆𑀜𑀢𑁆𑀣 𑀢𑀢𑁆𑀣 𑀯𑀸 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀉𑀧𑀧𑀦𑁆𑀦𑁄 𑀅𑀯𑀺𑀓𑁆𑀔𑀫𑁆𑀪𑀺𑀢𑀭𑀽𑀧𑀭𑀸𑀕𑁄 𑀅𑀭𑀺𑀬𑀲𑀸𑀯𑀓𑁄, 𑀢𑀁 𑀲𑀦𑁆𑀥𑀸𑀬 𑀅𑀬𑀁 𑀅𑀝𑁆𑀞𑀓𑀣𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯 ‘‘𑀦𑀯𑀲𑀼 𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀭𑀺𑀬𑀲𑀸𑀯𑀓𑀸𑀦’’𑀦𑁆𑀢𑀺, ‘‘𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑀸𑀕𑀸𑀫𑀻’’𑀢𑀺, ‘‘𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀅𑀦𑀸𑀕𑀸𑀫𑀺𑀦𑁄’’𑀢𑀺 𑀘 𑀲𑀩𑁆𑀩𑀢𑁆𑀣 𑀦𑀺𑀩𑁆𑀩𑀢𑁆𑀢𑀕𑁆𑀕𑀳𑀡𑀁 𑀓𑀢𑀁. 𑀢𑀲𑁆𑀲 𑀧𑀦 𑀬𑁂𑀦 𑀢𑀢𑁆𑀣 𑀉𑀧𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀭𑀽𑀧𑀭𑀸𑀕𑁂 𑀯𑀺𑀓𑁆𑀔𑀫𑁆𑀪𑀺𑀢𑁂 𑀧𑀼𑀦 𑀪𑀯𑀸𑀪𑀺𑀮𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀅𑀭𑀽𑀧𑀭𑀸𑀕𑀼𑀧𑀘𑁆𑀙𑁂𑀤𑁄 𑀘 𑀪𑀯𑀺𑀲𑁆𑀲𑀢𑀺𑀬𑁂𑀯. 𑀬𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀅𑀭𑀽𑀧𑁂𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀭𑀽𑀧𑀭𑀸𑀕𑁄 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀪𑀯𑀸𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀅𑀦𑀺𑀯𑀢𑁆𑀢𑀺𑀢𑀪𑀯𑀸𑀪𑀺𑀮𑀸𑀲𑁄, 𑀢𑀲𑁆𑀲 𑀯𑀲𑁂𑀦 𑀬𑀫𑀓𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀯𑀸 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸.

𑀆𑀬𑀼𑀧𑁆𑀧𑀫𑀸𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑀯𑀡𑁆𑀡𑀦𑀸

𑁧𑁦𑁩𑁦. ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁, 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑁄 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀢𑁄 𑀧𑀭𑀁 𑀬𑀸𑀯 𑀅𑀦𑀼𑀮𑁄𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀕𑁆𑀕𑀸 𑀧𑀳𑀸𑀦𑀧𑀭𑀺𑀜𑁆𑀜𑀸.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀔𑀦𑁆𑀥𑀸𑀤𑀻𑀦𑀁 𑀢𑀸𑀯 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀧𑀜𑁆𑀳𑀧𑀼𑀘𑁆𑀙𑀓𑀯𑀸𑀭𑁂 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀁, 𑀳𑁂𑀢𑀼𑀆𑀤𑀻𑀦𑀜𑁆𑀘 𑀔𑀦𑁆𑀥𑀸𑀤𑀻𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀧𑀼𑀘𑁆𑀙𑀓𑀯𑀸𑀭𑁂 𑀯𑀢𑁆𑀢𑀩𑁆𑀩𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀮𑀻𑀦𑀢𑁆𑀣𑀧𑀤𑀯𑀡𑁆𑀡𑀦𑀸

𑀯𑀺𑀪𑀗𑁆𑀕-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂