𑁧𑁭. 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁮𑁩𑁨. ‘‘𑀢𑁂𑀢𑁆𑀢𑀺𑀁𑀲𑀢𑀺 𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀧𑀦 𑀧𑀜𑁆𑀘𑀢𑀺𑀁𑀲. 𑀢𑀣𑀸 ‘‘𑀧𑀼𑀭𑀺𑀲𑀫𑀮𑀸𑀤𑀬𑁄 𑀅𑀝𑁆𑀞 𑀦𑀯𑀓𑀸’’𑀢𑀺 𑀯𑀼𑀢𑁆𑀢𑀁, 𑀢𑁂 𑀧𑀦 𑀆𑀖𑀸𑀢𑀯𑀢𑁆𑀣𑀼𑀆𑀤𑀬𑁄 𑀦𑀯. 𑀬𑁂 ‘‘𑀤𑁆𑀯𑁂 𑀅𑀝𑁆𑀞𑀸𑀭𑀲𑀓𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀸, 𑀢𑁂 𑀏𑀯 ‘‘𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲𑀸’’𑀢𑀺𑀆𑀤𑀺𑀦𑀸 𑀢𑀬𑁄 𑀙𑀢𑁆𑀢𑀺𑀁𑀲𑀓𑀸 𑀓𑀢𑀸𑀢𑀺 𑀆𑀳 ‘‘𑀙 𑀅𑀝𑁆𑀞𑀸𑀭𑀲𑀓𑀸’’𑀢𑀺, 𑀤𑁆𑀯𑀸𑀲𑀝𑁆𑀞𑀺 𑀧𑀦 𑀤𑀺𑀝𑁆𑀞𑀺𑀕𑀢𑀸𑀦𑀺 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀪𑀸𑀯𑁂𑀦𑁂𑀯 𑀇𑀥 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀦 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧.) 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁪𑁩-𑁮𑁪𑁪. 𑀅𑀢𑁆𑀣𑀺 𑀧𑀝𑀺𑀘𑁆𑀘𑀁 𑀦𑀸𑀫𑀸𑀢𑀺 𑀬𑀣𑀸 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀻𑀲𑀼 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀁, 𑀦 𑀢𑀣𑀸 𑀇𑀥 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀻𑀦𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀦𑀁 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀢𑁆𑀢𑀲𑁆𑀲 𑀅𑀪𑀸𑀯𑀸. 𑀬𑁂𑀲𑀼 𑀧𑀦 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼 𑀔𑀢𑁆𑀢𑀺𑀬𑀸𑀤𑀺𑀲𑀫𑁆𑀫𑀼𑀢𑀺 𑀳𑁄𑀢𑀺, 𑀢𑁂𑀲𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀢𑀸𑀯 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀬𑀸 𑀅𑀢𑁆𑀣𑀺𑀢𑀸, 𑀲𑀸 𑀇𑀥 𑀧𑀝𑀺𑀘𑁆𑀘-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀏𑀓𑀺𑀲𑁆𑀲𑀸 𑀲𑁂𑀡𑀺𑀬𑀸𑀢𑀺 𑀅𑀲𑀫𑁆𑀪𑀺𑀦𑁆𑀦𑀸𑀬𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀓𑀺𑀭𑀺𑀬𑀸𑀲𑀼 𑀧𑀼𑀭𑀢𑁄 𑀓𑀭𑀡𑀁 𑀧𑀼𑀭𑁂𑀓𑁆𑀔𑀸𑀭𑁄. 𑀦𑀺𑀓𑁆𑀔𑁂𑀧𑀭𑀸𑀲𑀻𑀢𑀺 𑀦𑀺𑀥𑀸𑀦𑀭𑀸𑀲𑀺. 𑀧𑀢𑁆𑀣𑀝𑀸𑀓𑀺𑀢𑁆𑀢𑀺𑀦𑁄𑀢𑀺 𑀯𑀺𑀢𑁆𑀣𑀺𑀡𑁆𑀡𑀸𑀓𑀺𑀢𑁆𑀢𑀺𑀦𑁄. 𑀭𑀢𑁆𑀢𑀜𑁆𑀜𑀼𑀫𑀤𑁄𑀢𑀺 𑀧𑀼𑀭𑀸𑀡𑀜𑁆𑀜𑀼𑀢𑀸𑀫𑀤𑁄𑀢𑀺 𑀯𑀤𑀦𑁆𑀢𑀺. 𑀘𑀺𑀭𑀭𑀢𑁆𑀢𑀺𑀚𑀸𑀢𑁂𑀦, 𑀘𑀺𑀭𑀭𑀢𑁆𑀢𑀺𑀧𑀩𑁆𑀩𑀚𑀺𑀢𑁂𑀦 𑀯𑀸 𑀚𑀸𑀦𑀺𑀢𑀩𑁆𑀩𑀲𑁆𑀲, 𑀭𑀢𑁆𑀢𑀻𑀦𑀫𑁂𑀯 𑀯𑀸 𑀚𑀸𑀦𑀦𑀫𑀤𑁄. 𑀉𑀧𑀝𑁆𑀞𑀸𑀧𑀓𑀫𑀸𑀦𑁄𑀢𑀺 𑀆𑀡𑀸𑀓𑀭𑀡𑀫𑀸𑀦𑁄. 𑀆𑀡𑀸𑀓𑀭𑀡𑀜𑁆𑀳𑀺 𑀯𑀺𑀘𑀸𑀭𑀡𑀁 𑀇𑀥 ‘‘𑀬𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀧𑀭𑀺𑀫𑀡𑁆𑀟𑀮𑀢𑁆𑀢𑀪𑀸𑀯𑀦𑀺𑀲𑁆𑀲𑀺𑀢𑁄 𑀫𑀸𑀦𑁄 𑀧𑀭𑀺𑀡𑀸𑀳𑀫𑀤𑁄. 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀧𑀸𑀭𑀺𑀧𑀽𑀭𑀺𑀬𑀸 𑀫𑀤𑁄 𑀧𑀸𑀭𑀺𑀧𑀽𑀭𑀺𑀫𑀤𑁄.

𑁮𑁪𑁫. 𑀯𑀢𑁆𑀣𑀼𑀦𑀸 𑀯𑀺𑀦𑀸𑀧𑀺 𑀯𑀢𑁆𑀢𑀩𑁆𑀩𑀢𑀸𑀬 𑀅𑀯𑀢𑁆𑀣𑀼𑀓𑀁, 𑀦 𑀯𑀢𑁆𑀣𑀼𑀦𑁄 𑀅𑀪𑀸𑀯𑀸.

𑁮𑁪𑁬. 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀲𑀢𑀺𑀢𑁄 𑀫𑀼𑀘𑁆𑀘𑀦𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀲𑀼 𑀧𑀓𑁆𑀔𑀦𑁆𑀤𑀦𑀁 𑀯𑀸 𑀯𑁄𑀲𑁆𑀲𑀕𑁆𑀕𑁄. 𑀧𑀢𑀺𑀝𑁆𑀞𑀸𑀪𑀸𑀯𑁄𑀢𑀺 𑀓𑀼𑀲𑀮𑀓𑀭𑀡𑁂 𑀅𑀝𑁆𑀞𑀸𑀦𑀁, 𑀅𑀦𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀫𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑁂 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀧𑀸𑀡𑀸𑀢𑀺𑀧𑀸𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀁 𑀓𑁄𑀥𑁂 𑀉𑀧𑀦𑀸𑀳𑁂𑀢𑀺 𑀏𑀯𑀫𑀸𑀤𑀺𑀓𑁄 𑀧𑀭𑀺𑀬𑀸𑀬𑁄 𑀅𑀧𑀭𑀺𑀬𑀦𑁆𑀢𑁄, 𑀢𑀤𑀢𑁆𑀣𑀢𑀧𑁆𑀧𑀭𑀺𑀬𑀸𑀬𑀧𑁆𑀧𑀓𑀸𑀲𑀓𑁄 𑀯𑁄𑀲𑁆𑀲𑀕𑁆𑀕𑀦𑀺𑀲𑁆𑀲𑀕𑁆𑀕𑀸𑀤𑀺𑀓𑁄 𑀩𑁆𑀬𑀜𑁆𑀚𑀦𑀧𑀭𑀺𑀬𑀸𑀬𑁄 𑀘𑀸𑀢𑀺 𑀲𑀩𑁆𑀩𑀁 𑀢𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀏𑀯𑀭𑀽𑀧𑁄𑀢𑀺 𑀇𑀤𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀁 𑀲𑀩𑁆𑀩𑀧𑀭𑀺𑀬𑀸𑀬𑀲𑁆𑀲 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀬𑀦𑁆𑀢𑀸𑀪𑀸𑀯𑀢𑁄’’𑀢𑀺. 𑀯𑀺𑀲𑁆𑀲𑀝𑁆𑀞𑀸𑀓𑀸𑀭𑁄𑀢𑀺 𑀲𑀢𑀺𑀬𑀸 𑀧𑀘𑁆𑀘𑀦𑀻𑀓𑀪𑀽𑀢𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀤𑀲𑁆𑀲𑁂𑀢𑀺.

𑁮𑁪𑁭. 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀢𑀸 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀫𑀸𑀦𑀯𑀺𑀲𑁂𑀲𑁄 𑀯𑀸 𑀤𑀝𑁆𑀞𑀩𑁆𑀩𑁄. 𑀉𑀧𑀲𑀗𑁆𑀓𑀫𑀦𑁂 𑀯𑀦𑁆𑀤𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀧𑀭𑀺𑀬𑀦𑁆𑀢𑁂𑀦𑁂𑀯 𑀘𑀭𑀢𑀺.

𑁮𑁪𑁮. ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀆𑀯𑀼𑀲𑁄, 𑀢𑁆𑀯𑀁 𑀆𑀧𑀦𑁆𑀦𑁄𑀲𑀻’’𑀢𑀺𑀆𑀤𑀺𑀦𑀸 𑀢𑁂𑀦 𑀯𑀼𑀢𑁆𑀢𑀁 𑀢𑀲𑁆𑀲𑁂𑀯 𑀉𑀧𑀭𑀺 𑀔𑀺𑀧𑀦𑀯𑀲𑁂𑀦 ‘‘𑀧𑀝𑀺𑀧𑁆𑀨𑀭𑀺𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺. ‘‘𑀢𑀲𑁆𑀫𑀺𑀁 𑀦𑀸𑀫 𑀤𑀮𑀺𑀤𑁆𑀤𑁂, 𑀅𑀓𑀼𑀲𑀮𑁂 𑀯𑀸 𑀇𑀤𑀁 𑀓𑀭𑁄𑀦𑁆𑀢𑁂 𑀅𑀳𑀁 𑀓𑀲𑁆𑀫𑀸 𑀦 𑀓𑀭𑁄𑀫𑀻’’𑀢𑀺 𑀏𑀯𑀁 𑀇𑀥 𑀧𑀝𑀺𑀧𑁆𑀨𑀭𑀡𑀁 𑀬𑀼𑀢𑁆𑀢𑀁. 𑀓𑀭𑀡𑀲𑁆𑀲 𑀉𑀢𑁆𑀢𑀭𑀓𑀺𑀭𑀺𑀬𑀸 𑀓𑀭𑀡𑀼𑀢𑁆𑀢𑀭𑀺𑀬𑀁. 𑀅𑀓𑀼𑀲𑀮𑀧𑀓𑁆𑀔𑁄 𑀏𑀲𑀸𑀢𑀺 𑀲𑀸𑀭𑀫𑁆𑀪𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁪𑁯. 𑀅𑀢𑀺𑀘𑁆𑀘 𑀇𑀘𑁆𑀙𑀢𑀻𑀢𑀺 𑀅𑀢𑀺𑀘𑁆𑀘𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑀺𑀘𑁆𑀘𑀺𑀘𑁆𑀙𑀢𑀸𑀢𑀺 𑀯𑀢𑁆𑀢𑀩𑁆𑀩𑁂 𑀘𑁆𑀘𑀺-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀢𑀺𑀘𑁆𑀙𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀭𑀺𑀘𑁆𑀙𑀢𑀸𑀢𑀺 𑀘 𑀲𑀸 𑀏𑀯 𑀯𑀼𑀘𑁆𑀘𑀢𑀻𑀢𑀺. 𑀢𑀢𑁆𑀭𑀸𑀧𑀺 𑀦𑁂𑀭𑀼𑀢𑁆𑀢𑀺𑀓𑀯𑀺𑀥𑀸𑀦𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀮𑀤𑁆𑀥𑀁 𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀦𑀁 𑀅𑀢𑁆𑀭𑀺𑀘𑁆𑀙𑀢𑀸, 𑀲𑀸 𑀏𑀯 𑀭-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀅𑀢𑀺𑀘𑁆𑀙𑀢𑀸’’𑀢𑀺 𑀯𑀼𑀢𑁆𑀢𑀸.

𑀅𑀢𑁆𑀭𑀺𑀘𑁆𑀙𑀦𑁆𑀢𑀺 𑀅𑀢𑀺𑀘𑁆𑀙𑀁, 𑀅𑀢𑁆𑀭 𑀯𑀸 𑀇𑀘𑁆𑀙𑀦𑁆𑀢𑁄. 𑀓𑁂𑀦? 𑀅𑀢𑀺𑀮𑁄𑀪𑁂𑀦 𑀅𑀢𑀺𑀮𑁄𑀪𑀫𑀺𑀘𑁆𑀙𑀸𑀲𑀗𑁆𑀔𑀸𑀢𑁂𑀦 𑀅𑀢𑀺𑀮𑁄𑀪𑀫𑀤𑁂𑀦 𑀘. 𑀅𑀢𑁆𑀢𑀦𑁄 𑀳𑀺𑀢𑀁 𑀅𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. 𑀳𑀸𑀬𑀢𑀺 𑀚𑀻𑀭𑀢𑀺, 𑀆𑀤𑀺𑀡𑁆𑀡𑁄 𑀯𑀸 𑀅𑀢𑁆𑀢𑀸, 𑀧𑀢𑁆𑀢𑁄 𑀯𑀸 𑀅𑀢𑁆𑀢𑀸, 𑀦𑀁 𑀚𑀻𑀭𑀢𑀺 𑀘𑀦𑁆𑀤𑀓𑀺𑀦𑁆𑀦𑀭𑀺𑀁 𑀧𑀢𑁆𑀣𑀬𑀺𑀢𑁆𑀯𑀸 𑀅𑀲𑀺𑀢𑀸𑀪𑀽𑀤𑁂𑀯𑀺𑀬𑀸 𑀯𑀺𑀳𑀻𑀦𑁄 𑀯𑀺𑀬.

𑀇𑀘𑁆𑀙𑀸𑀳𑀢𑀲𑁆𑀲𑀸𑀢𑀺 𑀇𑀘𑁆𑀙𑀸𑀬 𑀉𑀧𑀤𑁆𑀤𑀼𑀢𑀲𑁆𑀲, 𑀫𑀼𑀤𑁆𑀤𑀺𑀢𑀲𑁆𑀲 𑀯𑀸.

𑀅𑀢𑀺𑀳𑀻𑀴𑀬𑀸𑀦𑁄𑀢𑀺 𑀅𑀯𑀫𑀜𑁆𑀜𑀫𑀸𑀦𑁄. 𑀫𑀮𑀓𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀚𑀦𑀧𑀤𑀁, 𑀅𑀩𑁆𑀪𑁄𑀓𑀸𑀲𑀁 𑀯𑀸. 𑀓𑁄𑀤𑀡𑁆𑀟𑀓𑁂𑀦𑀸𑀢𑀺 𑀓𑀼𑀤𑀡𑁆𑀟𑀓𑁂𑀦 𑀭𑀲𑁆𑀲𑀤𑀡𑁆𑀟𑀓𑁂𑀦. 𑀕𑀤𑁆𑀤𑀼𑀮𑁂𑀦𑀸𑀢𑀺 𑀘 𑀯𑀤𑀦𑁆𑀢𑀺. 𑀭𑀼𑀳𑀺𑀭𑀫𑀓𑁆𑀔𑀺𑀢𑀗𑁆𑀕𑁄𑀢𑀺 𑀭𑀼𑀳𑀺𑀭𑀲𑀺𑀦𑁆𑀦𑀕𑀢𑁆𑀢𑁄.

𑁮𑁫𑁦. 𑀚𑀸𑀦𑀦𑁆𑀢𑀲𑁆𑀲𑁂𑀯 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀘𑁄𑀤𑁂𑀦𑁆𑀢𑁄 𑀯𑀺𑀬 𑀲𑀫𑁆𑀪𑀸𑀯𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀧𑀘𑁆𑀘𑀬𑁂𑀢𑀺 𑀉𑀧𑀸𑀤𑀸𑀦𑀸𑀤𑀺𑀧𑀘𑁆𑀘𑀬𑁂.

𑁮𑁫𑁧. 𑀬𑁂 𑀧𑀢𑀺𑀭𑀽𑀧𑁂𑀦 𑀯𑀜𑁆𑀘𑁂𑀦𑁆𑀢𑀺, 𑀢𑁂 𑀕𑀡𑁆𑀞𑀺𑀓𑀸, 𑀤𑀼𑀭𑀸𑀘𑀸𑀭𑁂𑀦 𑀯𑀸 𑀕𑀡𑁆𑀞𑀺𑀪𑀽𑀢𑀸. 𑀕𑀡𑁆𑀞𑀺𑀓𑀧𑀼𑀢𑁆𑀢𑀸 𑀦𑀸𑀫 𑀕𑀡𑁆𑀞𑀺𑀓𑀸 𑀏𑀯 𑀳𑁄𑀦𑁆𑀢𑀺, 𑀢𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀕𑀡𑁆𑀞𑀺𑀓𑀪𑀸𑀯𑁂𑀦 ‘‘𑀣𑁂𑀭𑁄…𑀧𑁂… 𑀤𑀻𑀖𑀘𑀗𑁆𑀓𑀫𑁂 𑀯𑀺𑀳𑀭𑀢𑀻’’𑀢𑀺 𑀯𑀤𑀦𑁆𑀢𑀺.

𑀯𑀝𑁆𑀝𑀢𑀺 𑀪𑀦𑁆𑀢𑁂𑀢𑀺 𑀅𑀬𑀫𑁆𑀧𑀺 𑀏𑀓𑁄 𑀧𑀓𑀸𑀭𑁄, 𑀮𑀸𑀪𑀺𑀦𑀸 𑀏𑀯 𑀧𑀦 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀁 𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀢𑁆𑀢𑀬𑀁 𑀦𑀸𑀫 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀤𑀼𑀢𑀺𑀬𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁨𑁧 𑀆𑀤𑀬𑁄). 𑀢𑀲𑁆𑀲 𑀕𑀫𑁆𑀪𑀻𑀭𑀢𑁆𑀢𑀸 𑀯𑀤𑀢𑀺 ‘‘𑀧𑀜𑁆𑀘𑀢𑁆𑀢𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲𑀸’’𑀢𑀺.

𑁮𑁫𑁨. 𑀲𑀺𑀗𑁆𑀕𑀦𑁆𑀢𑀺 𑀲𑀺𑀗𑁆𑀕𑀸𑀭𑀁. 𑀢𑀜𑁆𑀳𑀺 𑀓𑀼𑀲𑀮𑀲𑁆𑀲 𑀯𑀺𑀚𑁆𑀛𑀦𑀢𑁄 𑀲𑀫𑀸𑀲𑁂𑀯𑀺𑀢𑀢𑀸𑀬 𑀲𑀻𑀲𑁂 𑀧𑀭𑀺𑀓𑁆𑀔𑀢𑀁 𑀲𑀼𑀦𑀺𑀔𑀢𑀁 𑀯𑀺𑀲𑀸𑀡𑀁 𑀯𑀺𑀬, 𑀣𑀺𑀭𑀢𑁆𑀢𑀸 𑀘 𑀲𑀺𑀗𑁆𑀕𑀁 𑀯𑀺𑀬𑀸𑀢𑀺 𑀲𑀺𑀗𑁆𑀕𑀁, 𑀢𑀁 𑀧𑀦𑀢𑁆𑀣𑀢𑁄 𑀭𑀸𑀕𑁄.

𑁮𑁫𑁩. 𑀢𑁂𑀫𑀦𑀓𑀭𑀡𑀢𑁆𑀣𑁂 𑀢𑀺𑀦𑁆𑀢𑀺𑀡-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀔𑀻𑀬𑀦𑀦𑁆𑀢𑀺 𑀘 𑀬𑁂𑀦 𑀮𑁄𑀪𑁂𑀦 𑀧𑀭𑀁 𑀫𑀫𑀦𑁆𑀢𑀺 𑀯𑀤𑀦𑁆𑀢𑀁 𑀔𑀻𑀬𑀢𑀺, 𑀲𑁄 𑀯𑀼𑀢𑁆𑀢𑁄. 𑀔𑀻𑀬𑀦𑀁 𑀪𑀡𑁆𑀟𑀦𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀢𑀺𑀦𑁆𑀢𑀺𑀡𑀦𑁆𑀢𑀺 𑀯𑀸 𑀮𑁄𑀮𑀼𑀧𑁆𑀧𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀜𑁆𑀜𑀸-𑀲𑀤𑁆𑀤𑁄 𑀳𑀺 𑀏𑀲𑁄 𑀮𑁄𑀮𑀼𑀧𑁆𑀧𑀯𑀸𑀘𑀓𑁄𑀢𑀺.

𑁮𑁫𑁪. 𑀊𑀭𑀼𑀧𑁆𑀧𑀫𑀸𑀡𑀸𑀧𑀻𑀢𑀺 𑀏𑀢𑁂𑀦 𑀫𑀳𑀦𑁆𑀢𑀖𑀦𑀪𑀸𑀯𑁂𑀦 𑀅𑀧𑀽𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀣𑀯𑀸𑀢𑀺𑀆𑀤𑀺𑀦𑀸 𑀘𑀻𑀯𑀭𑀫𑀡𑁆𑀟𑀦𑀸𑀤𑀻𑀦𑀁 𑀯𑀺𑀲𑁂𑀲𑀦𑀸𑀦𑀺 ‘‘𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲 𑀩𑀸𑀳𑀺𑀭𑀸𑀦𑀁 𑀯𑀸 𑀧𑀭𑀺𑀓𑁆𑀔𑀸𑀭𑀸𑀦𑀁 𑀫𑀡𑁆𑀟𑀦𑀸’’𑀢𑀺𑀆𑀤𑀻𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀻𑀯𑀭𑁂𑀦 𑀳𑀺 𑀫𑀡𑁆𑀟𑀦𑀸 𑀘𑀻𑀯𑀭𑀫𑀡𑁆𑀟𑀦𑀸, 𑀘𑀻𑀯𑀭𑀲𑁆𑀲 𑀯𑀸 𑀫𑀡𑁆𑀟𑀦𑀸 𑀘𑀻𑀯𑀭𑀫𑀡𑁆𑀟𑀦𑀸, 𑀏𑀯𑀁 𑀧𑀢𑁆𑀢𑀫𑀡𑁆𑀟𑀦𑀸 𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀊𑀦𑀝𑁆𑀞𑀸𑀦𑀧𑀽𑀭𑀡𑀁 𑀙𑀯𑀺𑀭𑀸𑀕𑀲𑀼𑀲𑀡𑁆𑀞𑀸𑀦𑀸𑀤𑀺𑀓𑀭𑀡𑀜𑁆𑀘 𑀘𑀻𑀯𑀭𑀸𑀤𑀻𑀲𑀼 𑀓𑀸𑀬𑁂 𑀘 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀤𑀳𑀼𑀚𑀸𑀢𑀤𑀸𑀭𑀓𑁄 𑀯𑀺𑀬 𑀳𑁄𑀢𑀻𑀢𑀺 𑀤𑀸𑀭𑀓𑀘𑀸𑀧𑀮𑁆𑀬𑀁 𑀦 𑀫𑀼𑀜𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁮𑁫𑁫. 𑀲𑀤𑀺𑀲𑀸 𑀅𑀦𑀼𑀭𑀽𑀧𑀸 𑀪𑀢𑁆𑀢𑀺 𑀲𑀪𑀸𑀕𑁄, 𑀦 𑀲𑀪𑀸𑀕𑁄 𑀅𑀲𑀪𑀸𑀕𑁄, 𑀫𑀸𑀦𑀣𑀤𑁆𑀥𑀢𑀸, 𑀯𑀺𑀭𑁄𑀥𑁄 𑀯𑀸. 𑀢𑁂𑀦𑀲𑁆𑀲 𑀫𑀸𑀢𑀸𑀤𑀻𑀲𑀼 𑀯𑀢𑁆𑀢𑀦𑀁 𑀅𑀲𑀪𑀸𑀕𑀯𑀼𑀢𑁆𑀢𑀺𑀢𑀸. 𑀏𑀯𑀁𑀯𑀺𑀥𑀸𑀦𑀁 𑀫𑀸𑀦𑀸𑀥𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀫𑀺𑀤𑀁 𑀦𑀸𑀫𑀁.

𑁮𑁫𑁬. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀲𑀗𑁆𑀓𑀫𑁆𑀧𑀦𑀸, 𑀉𑀓𑁆𑀓𑀡𑁆𑀞𑀺𑀢𑀲𑁆𑀲 𑀯𑀸 𑀢𑀲𑁆𑀲 𑀢𑀲𑁆𑀲 𑀢𑀡𑁆𑀳𑀸𑀬𑀦𑀸.

𑁮𑁫𑁭. 𑀓𑀼𑀲𑀮𑀓𑀭𑀡𑁂 𑀓𑀸𑀬𑀲𑁆𑀲 𑀅𑀯𑀺𑀧𑁆𑀨𑀸𑀭𑀺𑀓𑀢𑀸 𑀮𑀻𑀦𑀢𑀸 𑀚𑀸𑀢𑀺𑀆𑀮𑀲𑁆𑀬𑀁, 𑀦 𑀭𑁄𑀕𑀉𑀢𑀼𑀪𑁄𑀚𑀦𑀸𑀤𑀻𑀳𑀺 𑀓𑀸𑀬𑀕𑁂𑀮𑀜𑁆𑀜𑀁 𑀢𑀦𑁆𑀤𑀻 𑀦𑀸𑀫, 𑀅𑀣 𑀔𑁄 𑀧𑀓𑀢𑀺𑀆𑀮𑀲𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀸𑀮𑀲𑀺𑀬𑀦𑁆𑀢𑀺 𑀦𑀸𑀫𑀓𑀸𑀬𑀲𑁆𑀲 𑀆𑀮𑀲𑀺𑀬𑀁, 𑀢𑀤𑁂𑀯 𑀭𑀽𑀧𑀓𑀸𑀬𑀲𑁆𑀲𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁫𑁮. 𑀅𑀘𑁆𑀘𑀲𑀦𑀸𑀤𑀻𑀳𑀺 𑀉𑀧𑁆𑀧𑀦𑁆𑀦𑀥𑀸𑀢𑀼𑀓𑁆𑀔𑁄𑀪𑀦𑀺𑀫𑀺𑀢𑁆𑀢𑀁 𑀆𑀮𑀲𑀺𑀬𑀁 𑀯𑀺𑀚𑀫𑁆𑀪𑀺𑀢𑀸.

𑁮𑁫𑁯. 𑀪𑀢𑁆𑀢𑀦𑀺𑀫𑀺𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀁 𑀆𑀮𑀲𑁆𑀬𑀁 𑀪𑀢𑁆𑀢𑀲𑀫𑁆𑀫𑀤𑁄.

𑁮𑁬𑁦. 𑀇𑀫𑁂𑀳𑀺 𑀧𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀤𑀻𑀳𑀺. 𑀲𑀩𑁆𑀩𑀢𑁆𑀣 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀣𑀺𑀦𑀫𑀺𑀤𑁆𑀥𑀓𑀸𑀭𑀡𑀸𑀦𑀁 𑀭𑀸𑀕𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁬𑁧. 𑀲𑀫𑁆𑀫𑀸𑀆𑀚𑀻𑀯𑀢𑁄 𑀅𑀧𑁂𑀢𑁄 𑀓𑀢𑁄𑀢𑀺 𑀅𑀧𑀓𑀢𑁄. 𑀲𑁄 𑀆𑀚𑀻𑀯𑀼𑀧𑀤𑁆𑀤𑀯𑁂𑀦 𑀉𑀧𑀤𑁆𑀤𑀼𑀢𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀉𑀧𑀤𑁆𑀤𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺.

𑀢𑀺𑀯𑀺𑀥𑀫𑁆𑀧𑀺 𑀢𑀁 𑀢𑀢𑁆𑀣 𑀆𑀕𑀢𑀁 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀬 𑀇𑀫𑀸𑀬 𑀧𑀸𑀴𑀺𑀬𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀸𑀧𑀡𑀺𑀓𑀸𑀦𑀻𑀢𑀺 𑀆𑀧𑀡𑀢𑁄 𑀙𑀟𑁆𑀟𑀺𑀢𑀸𑀦𑀺. 𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑁆𑀢𑀭𑀳𑀺𑀢𑀸𑀦𑀺, 𑀘𑀻𑀭𑀸𑀦𑀺 𑀯𑀸. 𑀕𑀺𑀮𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀪𑁂𑀲𑀚𑁆𑀚𑀲𑀗𑁆𑀔𑀸𑀢𑀸 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀧𑀼𑀭𑀸𑀡𑀲𑁆𑀲 𑀅𑀧𑀼𑀭𑀸𑀡𑀲𑁆𑀲 𑀘 𑀲𑀩𑁆𑀩𑀲𑁆𑀲 𑀕𑁄𑀫𑀼𑀢𑁆𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀽𑀢𑀺𑀪𑀸𑀯𑁂𑀦 𑀙𑀟𑁆𑀟𑀺𑀢𑁄𑀲𑀥𑀦𑁆𑀢𑀺𑀧𑀺 𑀓𑁂𑀘𑀺.

𑀅𑀕𑀩𑁆𑀪𑀺𑀓𑀸 𑀏𑀓𑀤𑁆𑀯𑀸𑀭𑀸 𑀤𑀻𑀖𑀲𑀸𑀮𑀸 𑀓𑀺𑀭 𑀉𑀤𑁆𑀤𑀡𑁆𑀟𑁄. 𑀓𑀼𑀘𑁆𑀙𑀺𑀢𑀭𑀚𑀪𑀽𑀢𑀸𑀬 𑀧𑀸𑀧𑀺𑀘𑁆𑀙𑀢𑀸𑀬 𑀦𑀺𑀭𑀢𑁆𑀣𑀓𑀓𑀸𑀬𑀯𑀘𑀻𑀯𑀺𑀧𑁆𑀨𑀦𑁆𑀤𑀦𑀺𑀕𑁆𑀕𑀳𑀡𑀁 𑀓𑁄𑀭𑀚𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑁄𑀭𑀚𑀺𑀓𑁄, 𑀅𑀢𑀺𑀯𑀺𑀬 𑀓𑁄𑀭𑀚𑀺𑀓𑁄 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄. 𑀅𑀢𑀺𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀓𑁂𑀘𑀺. 𑀫𑀼𑀔𑀲𑀫𑁆𑀪𑀸𑀯𑀺𑀢𑁄𑀢𑀺 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀯𑀘𑀦𑁂𑀳𑀺 𑀅𑀢𑁆𑀢𑀦𑁄 𑀫𑀼𑀔𑀫𑀢𑁆𑀢𑁂𑀦 𑀅𑀜𑁆𑀜𑁂𑀳𑀺 𑀲𑀫𑁆𑀪𑀸𑀯𑀺𑀢𑁄. 𑀲𑁄 𑀏𑀯𑀭𑀽𑀧𑁄 𑀏𑀯𑀭𑀽𑀧𑀢𑀸𑀬 𑀏𑀯 𑀅𑀢𑁆𑀢𑀸𑀦𑀁 𑀧𑀭𑀁 𑀯𑀺𑀬 𑀓𑀢𑁆𑀯𑀸 ‘‘𑀅𑀬𑀁 𑀲𑀫𑀡𑁄’’𑀢𑀺𑀆𑀤𑀺𑀁 𑀓𑀣𑁂𑀢𑀺.

𑀧𑀡𑀺𑀥𑀸𑀬𑀸𑀢𑀺 ‘‘𑀅𑀭𑀳𑀸𑀢𑀺 𑀫𑀁 𑀚𑀸𑀦𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀞𑀧𑁂𑀢𑁆𑀯𑀸, 𑀧𑀢𑁆𑀣𑁂𑀢𑁆𑀯𑀸 𑀯𑀸. 𑀆𑀧𑀸𑀣𑀓𑀚𑁆𑀛𑀸𑀬𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀣𑀝𑁆𑀞𑀸𑀦𑁂 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑁄 𑀯𑀺𑀬 𑀦𑀺𑀲𑀻𑀤𑀦𑁆𑀢𑁄 𑀆𑀧𑀸𑀣𑀓𑁂 𑀚𑀦𑀲𑁆𑀲 𑀧𑀸𑀓𑀝𑀝𑁆𑀞𑀸𑀦𑁂 𑀛𑀸𑀬𑀻.

𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀪𑀡𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀺𑀢𑀁. 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀅𑀞𑀧𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀳𑀦𑀁 𑀓𑀼𑀳𑁄, 𑀢𑀲𑁆𑀲 𑀅𑀬𑀦𑀸 𑀧𑀯𑀢𑁆𑀢𑀺 𑀓𑀼𑀳𑀸𑀬𑀦𑀸, 𑀓𑀼𑀳𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀬𑀦𑀸 𑀕𑀢𑀺𑀓𑀺𑀭𑀺𑀬𑀸 𑀓𑀼𑀳𑀸𑀬𑀦𑀸.

𑁮𑁬𑁨. 𑀧𑀼𑀝𑁆𑀞𑀲𑁆𑀲𑀸𑀢𑀺 ‘‘𑀓𑁄 𑀢𑀺𑀲𑁆𑀲𑁄, 𑀓𑁄 𑀭𑀸𑀚𑀧𑀽𑀚𑀺𑀢𑁄’’𑀢𑀺 𑀧𑀼𑀝𑁆𑀞𑀲𑁆𑀲. 𑀦𑀳𑀦𑀸𑀢𑀺 𑀩𑀦𑁆𑀥𑀦𑀸 𑀧𑀭𑀺𑀯𑁂𑀞𑀦𑀸.

𑁮𑁬𑁩. 𑀦𑀺𑀫𑀺𑀢𑁆𑀢𑁂𑀦 𑀘𑀭𑀦𑁆𑀢𑁄 𑀚𑀻𑀯𑀦𑁆𑀢𑁄 𑀦𑀺𑀫𑀺𑀢𑁆𑀢𑀓𑀸𑀭𑀓𑁄 𑀦𑁂𑀫𑀺𑀢𑁆𑀢𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀫𑀺𑀢𑁆𑀢𑀺𑀓𑀢𑀸. 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀧𑀓𑀸𑀲𑀦𑀁 𑀑𑀪𑀸𑀲𑁄. 𑀓𑁄 𑀧𑀦 𑀲𑁄𑀢𑀺? ‘‘𑀅𑀚𑁆𑀚 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀬𑀸 𑀤𑀼𑀮𑁆𑀮𑀪𑀸 𑀚𑀸𑀢𑀸’’𑀢𑀺𑀆𑀤𑀺𑀓𑀸 𑀧𑀘𑁆𑀘𑀬𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸. 𑀇𑀘𑁆𑀙𑀺𑀢𑀯𑀢𑁆𑀣𑀼𑀲𑁆𑀲 𑀲𑀫𑀻𑀧𑁂 𑀓𑀣𑀦𑀁 𑀲𑀸𑀫𑀦𑁆𑀢𑀚𑀧𑁆𑀧𑀸.

𑁮𑁬𑁪. 𑀩𑀳𑀺 𑀙𑀟𑁆𑀟𑀦𑀁 𑀉𑀓𑁆𑀔𑁂𑀧𑀦𑀸. 𑀧𑀭𑀧𑀺𑀝𑁆𑀞𑀺𑀫𑀁𑀲𑀔𑀸𑀤𑀦𑀲𑀻𑀮𑁄 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸.

𑁮𑁬𑁫. 𑀦𑀺𑀓𑀢𑁆𑀢𑀼𑀁 𑀅𑀧𑁆𑀧𑁂𑀦 𑀮𑀸𑀪𑁂𑀦 𑀩𑀳𑀼𑀓𑀁 𑀯𑀜𑁆𑀘𑁂𑀢𑁆𑀯𑀸 𑀕𑀳𑁂𑀢𑀼𑀁 𑀇𑀘𑁆𑀙𑀦𑀁 𑀦𑀺𑀚𑀺𑀕𑀻𑀲𑀦𑀁, 𑀢𑀲𑁆𑀲 𑀪𑀸𑀯𑁄 𑀦𑀺𑀚𑀺𑀕𑀻𑀲𑀦𑀢𑀸. 𑀢𑀲𑁆𑀲𑁂𑀯 𑀇𑀘𑁆𑀙𑀦𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄, 𑀢𑀁𑀲𑀳𑀚𑀸𑀢𑀁 𑀯𑀸 𑀕𑀯𑁂𑀲𑀦𑀓𑀫𑁆𑀫𑀁.

𑁮𑁬𑁬. 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀧𑁄𑀓𑁆𑀔𑀭𑀁 𑀯𑀡𑁆𑀡𑀧𑁄𑀓𑁆𑀔𑀭𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁄 𑀧𑀼𑀩𑁆𑀩𑀧𑀤𑀲𑁆𑀲 𑀤𑀝𑁆𑀞𑀩𑁆𑀩𑁄, 𑀯𑀡𑁆𑀡𑀧𑀸𑀭𑀺𑀧𑀽𑀭𑀻 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸. ‘‘𑀅𑀢𑁆𑀣𑀚𑀸𑀧𑀺𑀓𑀸’’𑀢𑀺 𑀏𑀢𑁆𑀣 𑀯𑀺𑀬 𑀚𑀧-𑀲𑀤𑁆𑀤𑁄 𑀉𑀧𑁆𑀧𑀢𑁆𑀢𑀺𑀯𑀸𑀘𑀓𑁄𑀢𑀺 𑀆𑀳 ‘‘𑀧𑀯𑀢𑁆𑀢𑁂𑀢𑀻’’𑀢𑀺.

𑁮𑁬𑁭. 𑀲𑁂𑀬𑁆𑀬𑀲𑀤𑀺𑀲𑀫𑀸𑀦𑀸 𑀉𑀦𑁆𑀦𑀢𑀺𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀉𑀪𑀬𑀢𑁆𑀣𑀸𑀧𑀺 ‘‘𑀫𑀸𑀦𑀁 𑀚𑀧𑁆𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁.

𑁮𑁬𑁮. 𑀳𑀻𑀦𑀫𑀸𑀦𑁄 𑀧𑀦 𑀑𑀦𑀢𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀓𑁂𑀯𑀮𑁂𑀦 𑀫𑀸𑀦𑀲𑀤𑁆𑀤𑁂𑀦 𑀦𑀺𑀤𑁆𑀤𑁂𑀲𑀁 𑀦𑀸𑀭𑀳𑀢𑀻𑀢𑀺 𑀢𑀁𑀦𑀺𑀤𑁆𑀤𑁂𑀲𑁂 ‘‘𑀑𑀫𑀸𑀦𑀁 𑀚𑀧𑁆𑀧𑁂𑀢𑀻’’𑀢𑀺 (𑀯𑀺𑀪. 𑁮𑁭𑁪) 𑀯𑀼𑀢𑁆𑀢𑀁.

𑁮𑁭𑁨. 𑀭𑀸𑀚𑀪𑁄𑀕𑁂𑀦 𑀭𑀝𑁆𑀞𑀪𑀼𑀜𑁆𑀚𑀦𑀓𑁄 𑀭𑀸𑀚𑀦𑀺𑀲𑁆𑀲𑀺𑀢𑁄 𑀭𑀝𑁆𑀞𑀺𑀬𑁄.

𑁮𑁭𑁯. 𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 𑀬𑀣𑀸 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀫𑀸𑀦𑀸𑀤𑀺𑀦𑀺𑀤𑁆𑀤𑁂𑀲𑁂𑀲𑀼 ‘‘𑀧𑀭𑁂𑀳𑀺 𑀲𑁂𑀬𑁆𑀬𑀁 𑀅𑀢𑁆𑀢𑀸𑀦𑀁 𑀤𑀳𑀢𑀻’’𑀢𑀺 𑀲𑁂𑀬𑁆𑀬𑀸𑀤𑀺𑀧𑀼𑀕𑁆𑀕𑀮𑁄 𑀫𑀸𑀦𑀼𑀧𑁆𑀧𑀸𑀤𑀓𑁄 𑀆𑀫𑀝𑁆𑀞𑁄, 𑀏𑀯𑀫𑁂𑀢𑀲𑁆𑀲 𑀲𑁂𑀬𑁆𑀬𑀫𑀸𑀦𑀪𑀸𑀯𑁂𑀧𑀺 𑀫𑀸𑀦𑀼𑀧𑁆𑀧𑀸𑀤𑀓𑀧𑀼𑀕𑁆𑀕𑀮𑀯𑀺𑀲𑁂𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀧𑀭𑁂 𑀅𑀢𑀺𑀫𑀜𑁆𑀜𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀜𑁆𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑀺𑀫𑀸𑀦𑁄𑀢𑀺.

𑁮𑁮𑁦. 𑀧𑀼𑀭𑀺𑀫𑀫𑀸𑀦𑀲𑁆𑀲 𑀉𑀧𑀭𑀺𑀫𑀸𑀦𑁄 𑀫𑀸𑀦𑀸𑀢𑀺𑀫𑀸𑀦𑁄, 𑀅𑀢𑀺-𑀲𑀤𑁆𑀤𑁄 𑀉𑀧𑀭𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀭𑀺𑀫𑀫𑀸𑀦𑀁 𑀯𑀸 𑀅𑀢𑀺𑀓𑁆𑀓𑀦𑁆𑀢𑁄 𑀫𑀸𑀦𑁄 𑀫𑀸𑀦𑀸𑀢𑀺𑀫𑀸𑀦𑁄.

𑁮𑁮𑁧. 𑀧𑀓𑁆𑀔𑀺𑀚𑀸𑀢𑀻𑀲𑀼 𑀯𑀸𑀬𑀲𑁄 𑀅𑀦𑁆𑀢𑁄 𑀮𑀸𑀫𑀓𑁄𑀢𑀺 𑀓𑀢𑁆𑀯𑀸 ‘‘𑀓𑀸𑀓𑀚𑀸𑀢𑀺 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁.

𑁮𑁮𑁨. 𑀣𑁂𑀭𑁄 𑀓𑀺𑀭 𑀤𑁄𑀲𑀘𑀭𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀆𑀤𑀺𑀢𑁄𑀯 ‘‘𑀢𑀼𑀫𑁆𑀳𑁂 𑀅𑀔𑀻𑀡𑀸𑀲𑀯𑀸’’𑀢𑀺 𑀅𑀯𑀢𑁆𑀯𑀸 𑀉𑀧𑀸𑀬𑁂𑀦 𑀓𑀣𑁂𑀲𑀻𑀢𑀺 𑀯𑀤𑀦𑁆𑀢𑀺, 𑀤𑁄𑀲𑀘𑀭𑀺𑀢𑀢𑁆𑀢𑀸 𑀯𑀸 𑀔𑀺𑀧𑁆𑀧𑀁 𑀢𑀢𑀺𑀬𑀧𑀤𑀯𑀸𑀭𑁂 𑀯𑀺𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁮𑁩. 𑀫𑀸𑀦𑀁 𑀅𑀦𑀼𑀕𑀢𑀘𑁆𑀙𑀦𑁆𑀤𑁄𑀢𑀺 𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀙𑀦𑁆𑀤𑁄, 𑀫𑀸𑀦𑀲𑀪𑀸𑀯𑀁 𑀅𑀦𑀼𑀕𑀢𑁄 𑀫𑀸𑀦𑀘𑁆𑀙𑀦𑁆𑀤𑁄 𑀯𑀸.

𑁮𑁮𑁪. ‘‘𑀯𑀺𑀮𑀫𑁆𑀩𑀦’’𑀦𑁆𑀢𑀺 𑀘 𑀇𑀢𑁆𑀣𑀺𑀧𑀼𑀭𑀺𑀲𑀲𑀫𑁆𑀫𑀸𑀦𑀦𑀸𑀤𑀺𑀓𑀺𑀭𑀺𑀬𑀸𑀤𑀺𑀯𑀺𑀮𑀫𑁆𑀩𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀢𑁆𑀢𑀩𑁆𑀩𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀬𑀼𑀢𑁆𑀢𑀫𑀼𑀢𑁆𑀢𑀲𑀺𑀮𑀺𑀝𑁆𑀞𑀁 𑀧𑀝𑀺𑀪𑀸𑀦𑀁 𑀯𑀺𑀮𑀫𑁆𑀩𑀦𑀧𑀝𑀺𑀪𑀸𑀦𑀁.

𑁮𑁮𑁭. 𑀅𑀫𑀭𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀅𑀢𑁆𑀢𑀦𑁄 𑀅𑀫𑀭𑀡𑀢𑁆𑀣𑀸𑀬 𑀤𑁂𑀯𑀪𑀸𑀯𑀢𑁆𑀣𑀸𑀬 𑀯𑀸 𑀯𑀺𑀢𑀓𑁆𑀓𑁄 𑀅𑀫𑀭𑀯𑀺𑀢𑀓𑁆𑀓𑁄.

𑁮𑁮𑁮. 𑀧𑀭𑁂𑀲𑀼 𑀅𑀦𑀼𑀤𑁆𑀤𑀬𑀸 𑀭𑀸𑀕𑀯𑀲𑁂𑀦 𑀅𑀦𑀼𑀤𑁆𑀤𑀬𑀓𑀭𑀡𑀁 𑀏𑀢𑀲𑁆𑀲𑀸𑀢𑀺 𑀧𑀭𑀸𑀦𑀼𑀤𑁆𑀤𑀬𑁄, 𑀢𑀲𑁆𑀲 𑀪𑀸𑀯𑁄 𑀧𑀭𑀸𑀦𑀼𑀤𑁆𑀤𑀬𑀢𑀸, 𑀧𑀭𑁂𑀲𑀼 𑀯𑀸 𑀅𑀦𑀼𑀤𑁆𑀤𑀬𑀲𑁆𑀲𑁂𑀯 𑀲𑀳𑀦𑀦𑁆𑀤𑀺𑀢𑀸𑀤𑀺𑀓𑀲𑁆𑀲 𑀪𑀸𑀯𑁄 𑀧𑀭𑀸𑀦𑀼𑀤𑁆𑀤𑀬𑀢𑀸, 𑀢𑀸𑀤𑀺𑀲𑁄 𑀭𑀸𑀕𑁄. 𑀢𑀢𑁆𑀣𑀸𑀢𑀺 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀲𑀁𑀲𑀝𑁆𑀞𑀯𑀺𑀳𑀸𑀭𑁂𑀦 𑀤𑀲𑁆𑀲𑀺𑀢𑀸𑀬𑀸𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺.

𑁮𑁯𑁦. 𑀅𑀦𑀯𑀜𑁆𑀜𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁄 𑀅𑀦𑀯𑀜𑁆𑀜𑀢𑁆𑀢𑀢𑁆𑀣𑀫𑁂𑀯 𑀓𑀸𑀫𑀕𑀼𑀡𑁂 𑀘 𑀧𑀢𑁆𑀣𑁂𑀢𑀻𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫…𑀧𑁂… 𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸’’𑀢𑀺.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨.) 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁯𑁧. 𑀉𑀧𑀦𑀬𑁆𑀳𑀢𑀻𑀢𑀺 𑀩𑀦𑁆𑀥𑀢𑀺. 𑀅-𑀓𑀸𑀭𑁄 𑀅𑀦𑀦𑁆𑀢𑀭𑀢𑁆𑀣𑀯𑀸𑀘𑀓𑁄, 𑀫𑀭𑀺𑀬𑀸𑀤𑀯𑀸𑀘𑀓𑀲𑁆𑀲 𑀯𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀅𑀝𑁆𑀞𑀧𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀅𑀦𑀦𑁆𑀢𑀭𑀝𑁆𑀞𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀞𑀫𑀼𑀧𑁆𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀸𑀓𑀸𑀭𑁄 𑀫𑀭𑀺𑀬𑀸𑀤𑀸, 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀯𑀲𑁂𑀦 𑀞𑀧𑀦𑀸 𑀫𑀭𑀺𑀬𑀸𑀤𑀝𑁆𑀞𑀧𑀦𑀸. 𑀧𑀓𑀢𑀺𑀝𑁆𑀞𑀧𑀦𑀸𑀫𑀢𑁆𑀢𑀫𑁂𑀯, 𑀯𑀺𑀲𑁂𑀲𑀦𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑁮𑁯𑁨. 𑀦𑀺𑀝𑁆𑀞𑀼𑀭𑀺𑀬𑀁 𑀔𑁂𑀴𑀧𑀸𑀢𑀦𑀁, 𑀦𑀺𑀝𑁆𑀞𑀼𑀭𑀺𑀬𑀁 𑀯𑀺𑀬 𑀦𑀺𑀝𑁆𑀞𑀼𑀭𑀺𑀬𑀁. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀤𑀦𑁆𑀢𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀢𑁂𑀦 𑀧𑀦 𑀤𑀲𑁆𑀲𑀦𑀁 𑀧𑀴𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀴𑀸𑀲𑀲𑁆𑀲 𑀆𑀬𑀦𑀸𑀢𑀺 𑀬𑀼𑀕𑀕𑁆𑀕𑀸𑀳𑀧𑁆𑀧𑀯𑀢𑁆𑀢𑀺. 𑀲𑀫𑀪𑀸𑀯𑀤𑀳𑀦𑀁 𑀚𑀬𑁄, 𑀢𑀲𑁆𑀲 𑀆𑀳𑀭𑀡𑀢𑁄 𑀆𑀳𑀸𑀭𑁄. 𑀥𑀼𑀭𑀁 𑀦 𑀤𑁂𑀢𑀻𑀢𑀺 𑀧𑀸𑀫𑁄𑀓𑁆𑀔𑀁 𑀦 𑀤𑁂𑀢𑀺.

𑁮𑁯𑁪. 𑀓𑀸𑀬𑁂𑀦 𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀯𑀢𑁆𑀢𑀁 𑀓𑀭𑁄𑀢𑀺 ‘‘𑀏𑀯𑀁 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀲𑀤𑁆𑀥𑁄 𑀓𑀣𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀭𑁂𑀲𑀁 𑀜𑀸𑀧𑀦𑀢𑁆𑀣𑀁. 𑀅𑀢𑀺𑀘𑁆𑀘𑀸𑀢𑀺 𑀅𑀘𑁆𑀘𑀬𑀁 𑀓𑀢𑁆𑀯𑀸. 𑀆𑀲𑀭𑀦𑁆𑀢𑀻𑀢𑀺 𑀆𑀕𑀘𑁆𑀙𑀦𑁆𑀢𑀺, 𑀧𑀼𑀦 𑀧𑀝𑀺𑀘𑁆𑀙𑀸𑀤𑀦𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑁄𑀦𑀸𑀫𑁂𑀯𑀁 𑀓𑀭𑁄𑀢𑀻𑀢𑀺 𑀯𑁄𑀘𑁆𑀙𑀺𑀦𑁆𑀤𑀦𑀘𑁆𑀙𑀸𑀤𑀦𑀸 𑀯𑀸 𑀯𑁄𑀘𑁆𑀙𑀸𑀤𑀦𑀸.

𑀦 𑀲𑀫𑁆𑀫𑀸 𑀪𑀸𑀲𑀺𑀢𑀸𑀢𑀺 𑀬𑁄 𑀦 𑀲𑀫𑁆𑀫𑀸 𑀪𑀸𑀲𑀢𑀺, 𑀲𑁄 𑀲𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀘𑁆𑀙𑀺 𑀯𑀸 𑀧𑀺𑀝𑁆𑀞𑀺 𑀯𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑁂𑀦𑁂𑀯 𑀘𑀺𑀢𑁆𑀢𑀸𑀦𑀼𑀭𑀽𑀧𑀓𑀺𑀭𑀺𑀬𑀸𑀯𑀺𑀭𑀳𑀢𑁄 ‘‘𑀏𑀯𑀁𑀘𑀺𑀢𑁆𑀢𑁄 𑀏𑀯𑀁𑀓𑀺𑀭𑀺𑀬𑁄’’𑀢𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑀅𑀚𑁄 𑀏𑀯 𑀅𑀚𑀸𑀫𑀺𑀕𑁄. 𑀦𑁂𑀮𑀓𑁄𑀢𑀺 𑀢𑀭𑀼𑀡𑀯𑀘𑁆𑀙𑁄. 𑀬𑀣𑀸 𑀲𑁄 𑀬𑀓𑁆𑀔𑁄 𑀢𑀸𑀤𑀺𑀲𑀁 𑀭𑀽𑀧𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀚𑀸’’𑀢𑀺 𑀲𑀜𑁆𑀜𑀸𑀬 𑀆𑀕𑀢𑀸𑀕𑀢𑁂 𑀔𑀸𑀤𑀢𑀺, 𑀏𑀯𑀫𑀬𑀫𑁆𑀧𑀺 𑀢𑀁𑀢𑀁𑀲𑀤𑀺𑀲𑀕𑀼𑀡𑀲𑀫𑁆𑀪𑀸𑀯𑀦𑁂𑀦 𑀢𑁂 𑀢𑁂 𑀯𑀜𑁆𑀘𑁂𑀢𑀺. 𑀢𑁂𑀦𑁂𑀢𑀁 𑀲𑀸𑀞𑁂𑀬𑁆𑀬𑀁 𑀫𑀸𑀬𑀸𑀢𑁄 𑀩𑀮𑀯𑀢𑀭𑀸 𑀯𑀜𑁆𑀘𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 ‘‘𑀧𑀭𑀺𑀓𑁆𑀔𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁.

𑁯𑁦𑁮. 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀅𑀪𑀸𑀯𑁂𑀧𑀺 𑀬𑀁 𑀲𑀁𑀬𑁄𑀚𑀦𑀁 𑀳𑁄𑀢𑀺, 𑀢𑀁 𑀩𑀳𑀺𑀤𑁆𑀥𑀸 𑀲𑀁𑀬𑁄𑀚𑀦𑀢𑁄 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑁂𑀲𑀦𑀪𑀽𑀢𑀁 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑀁 𑀦𑀸𑀫.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁩.) 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁦𑁯. 𑀅𑀓𑀼𑀲𑀮𑀫𑀽𑀮𑀸𑀦𑁂𑀯 𑀯𑀝𑁆𑀝𑀫𑀽𑀮𑀸𑀦𑀻𑀢𑀺 𑀢𑁂𑀳𑀺 𑀓𑀣𑀺𑀢𑁂𑀳𑀺 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑁄 𑀓𑀣𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀢𑀻𑀳𑀺…𑀧𑁂… 𑀓𑀣𑀺𑀢𑁄’’𑀢𑀺.

𑁯𑁧𑁯. 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺𑀤𑀲𑁆𑀲𑀦𑀫𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑁄𑀓𑁆𑀔𑀲𑀫𑁆𑀧𑀸𑀧𑀓𑀁 𑀉𑀢𑁆𑀢𑀫𑀘𑀭𑀺𑀬𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀲𑀫𑁆𑀫𑀢𑀦𑁆𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀕𑀢𑀺𑀓𑀲𑀫𑁆𑀫𑀢𑀲𑁆𑀲𑀸’’𑀢𑀺. 𑀭𑀽𑀧𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁂𑀲𑀼 𑀲𑀸𑀢𑀺𑀲𑀬𑁄 𑀪𑀯𑀭𑀸𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀸𑀩𑁆𑀭𑀳𑁆𑀫𑀸𑀦’’𑀦𑁆𑀢𑀺.

𑁯𑁨𑁦. 𑀓𑀣𑀁𑀯𑀺𑀥𑀦𑁆𑀢𑀺 𑀓𑁂𑀦𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀆𑀓𑀸𑀭𑀲𑀡𑁆𑀞𑀸𑀦’’𑀦𑁆𑀢𑀺. 𑀫𑀸𑀦𑀞𑀧𑀦𑀸𑀢𑀺 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀫𑀸𑀦𑁂𑀦 𑀞𑀧𑀦𑀸, 𑀫𑀸𑀦𑀲𑀗𑁆𑀔𑀸𑀢𑀸 𑀯𑀸 𑀞𑀧𑀦𑀸.

𑁯𑁨𑁧. 𑀘𑁂𑀢𑀲𑁄 𑀉𑀢𑁆𑀭𑀸𑀲𑁄 𑀤𑁄𑀫𑀦𑀲𑁆𑀲𑀁, 𑀤𑁄𑀲𑁄 𑀯𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀘𑁂𑀢𑀦𑀸𑀤𑀬𑁄.

𑁯𑁨𑁨. 𑀤𑁂𑀲𑀦𑀸𑀲𑀼𑀔𑀢𑀸𑀬𑀸𑀢𑀺 𑀢𑀺𑀡𑁆𑀡𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀤𑁂𑀲𑀦𑀸 𑀲𑀼𑀔𑀸 ‘‘𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀻’’𑀢𑀺, 𑀦 𑀧𑀦 𑀢𑀣𑀸 𑀫𑁄𑀳𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀡𑁆𑀡𑀸𑀤𑀺𑀪𑁂𑀤𑀁 𑀲𑀼𑀢𑁆𑀯𑀸𑀢𑀺 𑀓𑁂𑀘𑀺 𑀓𑀺𑀭 𑀯𑀤𑀦𑁆𑀢𑀺 ‘‘𑀔𑀢𑁆𑀢𑀺𑀬𑀚𑀻𑀯𑁄 𑀧𑀡𑁆𑀟𑀼𑀯𑀡𑁆𑀡𑁄. 𑀓𑀲𑁆𑀫𑀸? 𑀲𑁄 𑀳𑀺 𑀧𑀼𑀩𑁆𑀩𑀡𑁆𑀳𑁂 𑀭𑀫𑀢𑀺, 𑀧𑀼𑀩𑁆𑀩𑀡𑁆𑀳𑁂 𑀘 𑀙𑀸𑀬𑀸 𑀧𑀡𑁆𑀟𑀼𑀯𑀡𑁆𑀡𑀸. 𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀚𑀻𑀯𑀸 𑀑𑀤𑀸𑀢𑀧𑀻𑀢𑀓𑀸𑀴𑀯𑀡𑁆𑀡𑀸. 𑀢𑁂 𑀳𑀺 𑀫𑀚𑁆𑀛𑀦𑁆𑀳𑀲𑀸𑀬𑀦𑁆𑀳𑀭𑀢𑁆𑀢𑀻𑀲𑀼 𑀑𑀤𑀸𑀢𑀧𑀻𑀢𑀓𑀸𑀴𑀙𑀸𑀬𑀸 𑀓𑀸𑀴𑀢𑀫𑀓𑀸𑀮𑁂𑀲𑀼 𑀭𑀫𑀦𑁆𑀢𑀻’’𑀢𑀺 𑀢𑁂𑀲𑀁 𑀯𑀡𑁆𑀡𑀪𑁂𑀤𑀁, ‘‘𑀩𑁆𑀬𑀸𑀧𑀻 𑀧𑀭𑀺𑀫𑀡𑁆𑀟𑀮𑁄’’𑀢𑀺𑀆𑀤𑀺𑀦𑀸 𑀓𑀣𑁂𑀦𑁆𑀢𑀸𑀦𑀁 𑀲𑀡𑁆𑀞𑀸𑀦𑀪𑁂𑀤𑀜𑁆𑀘 𑀲𑀼𑀢𑁆𑀯𑀸.

𑁯𑁨𑁩. 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀧𑀤𑀤𑁆𑀯𑀬𑀁 𑀏𑀓𑀧𑀤𑀁 𑀓𑀢𑁆𑀯𑀸 𑀚𑀸𑀦𑀦𑁆𑀢𑀸𑀦𑀁 𑀯𑀲𑁂𑀦𑀸𑀬𑀁 𑀲𑀫𑁆𑀫𑀼𑀢𑀺𑀓𑀣𑀸 𑀧𑀯𑀢𑁆𑀢𑀸, 𑀧𑀤𑀦𑁆𑀢𑀭𑀫𑁂𑀯 𑀯𑀸 𑀇𑀤𑀁 𑀧𑀼𑀕𑁆𑀕𑀮𑀯𑀸𑀘𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑁄 𑀘 𑀧𑀼𑀕𑁆𑀕𑀮𑁄 𑀏𑀯, 𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑁄𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀫𑁆𑀧𑀺 ‘‘𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀲𑀼 𑀆𑀩𑀸𑀥𑁂𑀲𑀽𑀢𑀺 𑀧𑀺𑀢𑁆𑀢𑀲𑁂𑀫𑁆𑀳𑀯𑀸𑀢𑀲𑀫𑀼𑀝𑁆𑀞𑀸𑀦𑀉𑀢𑀼𑀯𑀺𑀧𑀭𑀺𑀡𑀸𑀫𑀚𑀑𑀧𑀓𑁆𑀓𑀫𑀺𑀓𑀯𑀺𑀲𑀫𑀧𑀭𑀺𑀳𑀸𑀭𑀚𑀲𑀦𑁆𑀦𑀺𑀧𑀸𑀢𑀚𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁂𑀲𑀼. 𑀧𑀼𑀩𑁆𑀩𑁂 𑀓𑀢𑀦𑁆𑀢𑀺 𑀧𑀼𑀭𑀸𑀡𑀢𑀭𑀓𑀫𑁆𑀫𑀁 𑀇𑀘𑁆𑀙𑀦𑁆𑀢𑀻𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀓𑀺𑀭 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀆𑀡𑀢𑁆𑀢𑀺𑀫𑀽𑀮𑀓𑁂𑀦 𑀯𑀸𑀢𑀺 𑀬𑁄𑀧𑀺 𑀆𑀡𑀸𑀧𑁂𑀢𑁆𑀯𑀸 𑀯𑀥𑀩𑀦𑁆𑀥𑀸𑀤𑀺𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀫𑁆𑀧𑀺 𑀢𑀁𑀫𑀽𑀮𑀓𑀁 𑀦 𑀳𑁄𑀢𑀺, 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀫𑀽𑀮𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯𑁨𑁪. 𑀫𑁄𑀳𑀲𑁆𑀲 𑀅𑀦𑀼𑀤𑀳𑀦𑀁 𑀤𑀸𑀳𑀓𑀸𑀭𑀡𑀢𑀸𑀬 𑀯𑀼𑀢𑁆𑀢𑀁, 𑀲𑀪𑀸𑀯𑀢𑁄𑀧𑀺 𑀧𑀦 𑀅𑀲𑀫𑁆𑀧𑀝𑀺𑀯𑁂𑀥𑁄 𑀲𑀫𑁆𑀧𑀝𑀺𑀯𑁂𑀥𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀪𑀽𑀢𑁄 𑀤𑀼𑀓𑁆𑀔𑁄 𑀏𑀯𑀸𑀢𑀺 𑀅𑀦𑀼𑀤𑀳𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀉𑀧𑁂𑀓𑁆𑀔𑀸 𑀯𑁂𑀤𑀦𑀸 𑀜𑀸𑀡𑀲𑀼𑀔𑀸 𑀅𑀜𑁆𑀜𑀸𑀡𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀯𑀼𑀢𑁆𑀢𑀸.

𑁯𑁨𑁬. 𑀧𑀼𑀣𑀼𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁂𑀲𑀽𑀢𑀺 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀧𑀼𑀣𑀼𑀦𑀺𑀫𑀺𑀢𑁆𑀢𑀲𑀪𑀸𑀯𑁂𑀲𑀼 𑀆𑀭𑀫𑁆𑀫𑀡𑁂𑀲𑀼, 𑀧𑀼𑀣𑀼𑀲𑀪𑀸𑀯𑁂𑀲𑀼 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑁂𑀲𑀼. 𑀓𑁄𑀲𑀚𑁆𑀚𑀧𑀫𑀸𑀤𑀦𑀺𑀤𑁆𑀤𑁂𑀲𑀸𑀦𑀁 𑀲𑀫𑀸𑀦𑀢𑁆𑀢𑁂𑀧𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀲𑀗𑁆𑀔𑀸𑀢𑀸 𑀮𑀻𑀦𑀯𑀼𑀢𑁆𑀢𑀺𑀢𑀸 𑀓𑁄𑀲𑀚𑁆𑀚𑀁, 𑀲𑀢𑀺𑀯𑁄𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑀁 𑀧𑀫𑀚𑁆𑀚𑀦𑀁 𑀧𑀫𑀸𑀤𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄𑀢𑀺.

𑁯𑁩𑁧. 𑀲𑀕𑀭𑀼𑀯𑀸𑀲𑀦𑁆𑀢𑀺 𑀲𑀑𑀢𑁆𑀢𑀧𑁆𑀧𑀯𑀸𑀲𑀫𑀸𑀳, 𑀲𑀚𑁂𑀝𑁆𑀞𑀓𑀯𑀸𑀲𑀦𑁆𑀢𑀺 𑀲𑀳𑀺𑀭𑀺𑀯𑀸𑀲𑀁. 𑀅𑀦𑀸𑀤𑀺𑀬𑀦𑀸 𑀅𑀦𑀤𑁆𑀤𑀸 𑀑𑀯𑀸𑀤𑀅𑀕𑁆𑀕𑀳𑀡𑀁, 𑀅𑀘𑀺𑀢𑁆𑀢𑀻𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀔𑀓𑀝𑁆𑀞𑀲𑁆𑀲 𑀯𑀺𑀬 𑀅𑀦𑀮𑁆𑀮𑀢𑀸, 𑀅𑀫𑀼𑀤𑀼𑀢𑀸 𑀯𑀸 𑀅𑀦𑀤𑁆𑀤𑀸. 𑀅𑀲𑀻𑀮𑁆𑀬𑀦𑁆𑀢𑀺 𑀅𑀲𑀼𑀔𑀲𑀻𑀮𑀢𑀸 𑀅𑀫𑀼𑀤𑀼𑀢𑀸 𑀏𑀯.

𑁯𑁩𑁪. 𑀉𑀧𑀸𑀭𑀫𑁆𑀪𑁄 𑀤𑁄𑀲𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀺𑀬𑀸.

𑁯𑁩𑁬. ‘‘𑀇𑀥 𑀧𑀸𑀲𑀸𑀡𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀞𑀧𑀦𑀢𑁆𑀣𑁂𑀧𑀺 𑀓𑀭𑁄𑀢𑀺-𑀲𑀤𑁆𑀤𑁄 𑀬𑀼𑀚𑁆𑀚𑀢𑀻𑀢𑀺 𑀆𑀳 ‘‘𑀓𑀭𑁄𑀢𑀻𑀢𑀺 𑀞𑀧𑁂𑀢𑀻’’𑀢𑀺. 𑀏𑀢𑁆𑀣 𑀘𑀸𑀬𑀁 𑀆𑀯𑀚𑁆𑀚𑀦𑀸 𑀅𑀓𑀼𑀲𑀮𑀸𑀦𑀁 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀔𑀼𑀤𑁆𑀤𑀓𑀯𑀢𑁆𑀣𑀽𑀲𑀼 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀤𑀦𑀼𑀓𑀽𑀮𑀓𑀺𑀘𑁆𑀘𑀢𑁆𑀢𑀸 𑀯𑀸.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁪.) 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁩𑁯. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀪𑀯𑀸𑀪𑀯𑀳𑁂𑀢𑀽𑀢𑀺𑀧𑀻𑀢𑀺 𑀏𑀢𑁆𑀣 𑀪𑀯𑀦𑁆𑀢𑀺 𑀚𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀪𑀯𑁄, 𑀲𑀧𑁆𑀧𑀺𑀆𑀤𑀺𑀪𑁂𑀲𑀚𑁆𑀚𑀁. 𑀪𑀯𑁄 𑀏𑀯 𑀧𑀡𑀻𑀢𑀢𑀭𑁄 𑀅𑀪𑀺𑀯𑀼𑀤𑁆𑀥𑁄 𑀅𑀪𑀯𑁄. 𑀪𑀸𑀯𑀦𑀸𑀭𑀸𑀫𑀢𑀸𑀅𑀭𑀺𑀬𑀯𑀁𑀲𑀧𑁆𑀧𑀳𑁂𑀬𑁆𑀬𑀢𑁆𑀢𑀸 𑀯𑀸 𑀧𑀼𑀭𑀺𑀫𑀢𑀡𑁆𑀳𑀸𑀢𑁆𑀢𑀬𑀯𑀚𑁆𑀚𑀸 𑀲𑀩𑁆𑀩𑀸 𑀢𑀡𑁆𑀳𑀸 ‘‘𑀪𑀯𑀸𑀪𑀯𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑀸𑀬𑀸𑀢𑀺 𑀙𑀦𑁆𑀤𑀸𑀤𑀺𑀅𑀕𑀢𑀺𑀬𑀸. 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀢𑀁 𑀓𑀺𑀭𑀺𑀬𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀢𑀺 𑀙𑀦𑁆𑀤𑀸𑀤𑀺𑀦𑀸 𑀅𑀕𑀢𑀺𑀕𑀫𑀦𑁂𑀦. 𑀙𑀦𑁆𑀤𑀸𑀤𑀻𑀲𑀼 𑀬𑁂𑀦 𑀦𑀺𑀦𑁆𑀦𑁄, 𑀢𑁂𑀦 𑀕𑀫𑀦𑀁 𑀬𑀣𑀸𑀦𑀺𑀦𑁆𑀦𑀕𑀫𑀦𑀁.

‘‘𑀭𑀸𑀚𑀸’’𑀢𑀺𑀆𑀤𑀺𑀦𑀸 𑀭𑀸𑀚𑀸𑀤𑀺𑀦𑀺𑀫𑀺𑀢𑁆𑀢𑁄 𑀯𑀺𑀬 𑀊𑀫𑀺𑀆𑀤𑀺𑀦𑀺𑀫𑀺𑀢𑁆𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀊𑀫𑀺𑀆𑀤𑀺𑀪𑀬𑀁, ‘‘𑀊𑀫𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁨.𑁧𑁬𑁨; 𑀅. 𑀦𑀺. 𑁪.𑁧𑁨𑁨; 𑀇𑀢𑀺𑀯𑀼. 𑁧𑁦𑁯) 𑀓𑁄𑀥𑀼𑀧𑀸𑀬𑀸𑀲𑀑𑀤𑀭𑀺𑀓𑀢𑁆𑀢𑀧𑀜𑁆𑀘𑀓𑀸𑀫𑀕𑀼𑀡𑀫𑀸𑀢𑀼𑀕𑀸𑀫𑀸 𑀯𑀸. 𑀢𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑀫𑀸𑀢𑀼𑀕𑀸𑀫𑀕𑁆𑀕𑀳𑀡𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀙𑀦𑁆𑀤𑀭𑀸𑀕𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀑𑀤𑀭𑀺𑀓𑀢𑁆𑀢𑀜𑁆𑀘 𑀮𑁄𑀪𑁄𑀯. 𑀉𑀓𑁆𑀔𑁂𑀧𑀦𑀻𑀬𑀸𑀤𑀺𑀓𑀫𑁆𑀫𑀁 𑀯𑀺𑀦𑀬𑀤𑀡𑁆𑀟𑀁.

‘‘𑀅𑀣 𑀔𑁄 𑀢𑀺𑀫𑁆𑀩𑀭𑀼𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸…𑀧𑁂… 𑀏𑀢𑀤𑀯𑁄𑀘 ‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’𑀦𑁆𑀢𑀺? 𑀫𑀸 𑀳𑁂𑀯𑀁 𑀢𑀺𑀫𑁆𑀩𑀭𑀼𑀓𑀸𑀢𑀺 𑀪𑀕𑀯𑀸 𑀅𑀯𑁄𑀘𑀸’’𑀢𑀺𑀆𑀤𑀺𑀦𑀸 𑀦𑀺𑀤𑀸𑀦𑀯𑀕𑁆𑀕𑁂 (𑀲𑀁. 𑀦𑀺. 𑁨.𑁧𑁮) 𑀆𑀕𑀢𑀢𑁆𑀢𑀸 ‘‘𑀢𑀺𑀫𑁆𑀩𑀭𑀼𑀓𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁫.) 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁦. 𑀆𑀕𑀦𑁆𑀢𑀼𑀁 𑀧𑀦 𑀦 𑀤𑁂𑀦𑁆𑀢𑀻𑀢𑀺 𑀆𑀕𑀫𑀦𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁯𑁪𑁧. 𑀅𑀯𑀤𑁂𑀳𑀦𑀢𑁄𑀢𑀺 𑀧𑀽𑀭𑀡𑁂𑀦 𑀫𑀁𑀲𑀽𑀧𑀘𑀬𑀳𑁂𑀢𑀼𑀢𑀸𑀬 𑀘 𑀉𑀧𑀘𑀬𑀦𑀢𑁄. 𑀕𑀺𑀫𑁆𑀳𑀓𑀸𑀮𑁂 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀻𑀢𑀺 𑀢𑀁 𑀉𑀢𑀼𑀲𑀼𑀔𑀁 ‘‘𑀲𑁂𑀬𑁆𑀬𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀬𑀦𑀺𑀭𑀺𑀬𑀸𑀧𑀣𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀯𑀢𑀦𑁆𑀢𑀺 𑀥𑀼𑀢𑀗𑁆𑀕𑀸𑀦𑀺. 𑀢𑀧𑁄𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀯𑀻𑀭𑀺𑀬𑀁 𑀯𑀸. 𑀲𑀻𑀮𑀕𑁆𑀕𑀳𑀡𑁂𑀦 𑀔𑀦𑁆𑀥𑀓𑀯𑀢𑁆𑀢𑀫𑁂𑀣𑀼𑀦𑀯𑀺𑀭𑀢𑀻𑀦𑀁 𑀕𑀳𑀺𑀢𑀢𑁆𑀢𑀸 𑀢𑀧𑀩𑁆𑀭𑀳𑁆𑀫𑀘𑀭𑀺𑀬𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀅𑀜𑁆𑀜𑀲𑀻𑀮𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀢𑀧𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀤𑁂𑀯𑀢𑁆𑀢𑀓𑀸𑀭𑀡𑀢𑁆𑀢𑀕𑁆𑀕𑀳𑀡𑀲𑁆𑀲 𑀤𑀲𑁆𑀲𑀦𑀢𑁄, 𑀩𑀸𑀳𑀺𑀭𑀸𑀦𑀜𑁆𑀘𑀲𑁆𑀲 𑀯𑀺𑀦𑀺𑀩𑀦𑁆𑀥𑀲𑁆𑀲 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄 𑀯𑀸. 𑀢𑁂𑀲𑀜𑁆𑀳𑀺 𑀅𑀯𑀺𑀳𑀺𑀁𑀲𑀸𑀤𑀺𑀕𑁄𑀯𑀢𑀸𑀤𑀺𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀫𑁂𑀣𑀼𑀦𑀯𑀺𑀭𑀢𑀺𑀬𑁄 𑀬𑀣𑀸𑀓𑁆𑀓𑀫𑀁 𑀲𑀻𑀮𑀸𑀤𑀻𑀦𑀺, 𑀢𑀸𑀦𑀺 𑀘 𑀢𑁂 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀘𑀭𑀦𑁆𑀢𑀻𑀢𑀺. 𑀅𑀜𑁆𑀜𑀣𑀸 𑀘 𑀲𑀤𑁆𑀥𑀸𑀭𑀼𑀘𑀺𑀆𑀤𑀻𑀳𑀺 ‘‘𑀬𑀢𑁄 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁮𑁫) 𑀯𑀺𑀓𑀧𑁆𑀧𑁂𑀢𑁆𑀯𑀸.

𑁯𑁪𑁨. 𑀩𑁆𑀬𑀲𑀦𑁂𑀲𑀼 𑀜𑀸𑀢𑀺𑀪𑁄𑀕𑀭𑁄𑀕𑀩𑁆𑀬𑀲𑀦𑀕𑁆𑀕𑀳𑀡𑁂𑀦 𑀢𑀁𑀦𑀺𑀫𑀺𑀢𑁆𑀢𑀸 𑀲𑁄𑀓𑀸𑀤𑀬𑁄 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀤𑀲𑁆𑀲𑀦𑀲𑀯𑀦𑁂𑀲𑀼 𑀧𑀝𑀺𑀓𑀽𑀮𑀢𑀸 𑀤𑀲𑁆𑀲𑀦𑀲𑀯𑀦𑀧𑀝𑀺𑀓𑀽𑀮𑀢𑀸. 𑀏𑀢𑁆𑀣 𑀘 𑀆𑀤𑀻𑀦𑀯𑁂𑀳𑀺 𑀧𑀜𑁆𑀘𑀳𑀺 𑀢𑁂𑀲𑀁 𑀓𑀸𑀭𑀡𑀪𑀽𑀢𑀸 𑀅𑀓𑁆𑀔𑀦𑁆𑀢𑀺𑀬𑁂𑀯 𑀪𑀺𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀓𑁆𑀔𑀦𑁆𑀢𑀺𑀫𑀽𑀮𑀓𑀸 𑀯𑀸 𑀅𑀧𑁆𑀧𑀺𑀬𑀢𑀸𑀤𑀺𑀳𑁂𑀢𑀼𑀪𑀽𑀢𑀸 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀢𑀸𑀤𑀺𑀤𑁄𑀲𑀸.

𑀫𑀺𑀘𑁆𑀙𑀸𑀚𑀻𑀯𑀦𑀺𑀫𑀺𑀢𑁆𑀢𑀁 𑀫𑀭𑀡𑀓𑀸𑀮𑁂 𑀉𑀧𑁆𑀧𑀦𑁆𑀦𑀪𑀬𑀁 ‘‘𑀆𑀚𑀻𑀯𑀓𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀆𑀚𑀻𑀯𑀺𑀓𑀸𑀪𑀬’’𑀦𑁆𑀢𑀺 𑀧𑀦 𑀧𑀸𑀞𑁂 𑀧𑀘𑁆𑀘𑀬𑀸𑀦𑀼𑀧𑁆𑀧𑀢𑁆𑀢𑀺𑀁 𑀧𑀲𑁆𑀲𑀢𑁄 𑀆𑀚𑀻𑀯𑀺𑀓𑀦𑀺𑀫𑀺𑀢𑁆𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀺𑀢𑁆𑀢𑀺𑀲𑀤𑁆𑀤𑁄 𑀲𑀺𑀮𑁄𑀓𑀦𑁆𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀸 𑀅𑀲𑀺𑀮𑁄𑀓𑀁 𑀅𑀓𑀺𑀢𑁆𑀢𑀺. 𑀢𑁂𑀦𑀸𑀳 ‘‘𑀕𑀭𑀳𑀪𑀬’’𑀦𑁆𑀢𑀺.

𑁯𑁪𑁩. 𑀉𑀧𑁆𑀧𑀺𑀮𑀸𑀯𑀺𑀢𑀦𑁆𑀢𑀺 𑀉𑀤𑀕𑁆𑀕𑀢𑀸𑀲𑀗𑁆𑀔𑀸𑀢𑁄 𑀅𑀯𑀽𑀧𑀲𑀫𑀪𑀸𑀯𑁄, 𑀅𑀯𑀽𑀧𑀲𑀫𑀳𑁂𑀢𑀼𑀪𑀽𑀢𑁄 𑀯𑀸 𑀧𑀻𑀢𑀺𑀬𑀸 𑀆𑀓𑀸𑀭𑁄.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁬.) 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁪𑁪. ‘‘𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀓𑁄𑀥𑀸𑀤𑀺𑀳𑁂𑀢𑀼𑀓𑀸 𑀉𑀧𑀦𑀸𑀳𑀸𑀤𑀬𑁄 𑀓𑁄𑀥𑀸𑀤𑀻𑀦𑀁 𑀲𑀳𑀸𑀬𑀓𑀸𑀭𑀡𑀪𑀸𑀯𑁂𑀦 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑀸𑀢𑀺 𑀓𑁄𑀥𑀸𑀤𑀬𑁄 𑀏𑀯 𑀯𑀺𑀯𑀸𑀤𑀫𑀽𑀮𑀸𑀦𑀺, 𑀢𑁂𑀦𑁂𑀢𑁆𑀣 𑀢𑁂 𑀏𑀯 𑀯𑀼𑀢𑁆𑀢𑀸. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀲𑀺𑀢𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀁 𑀅𑀪𑀺𑀦𑀺𑀯𑀺𑀝𑁆𑀞𑀢𑀸.

𑁯𑁪𑁫. 𑀅𑀧𑁆𑀧𑀢𑀺𑀲𑁆𑀲𑀬𑁄𑀢𑀺 𑀧𑀢𑀺𑀲𑁆𑀲𑀬𑀪𑀽𑀢𑁂𑀳𑀺 𑀕𑀭𑀽𑀳𑀺 𑀯𑀺𑀭𑀳𑀺𑀢𑁄. 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀦𑁆𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀁 𑀓𑀼𑀲𑀮𑀸𑀦𑀼𑀬𑁄𑀕𑀲𑀸𑀢𑀘𑁆𑀘𑀁 𑀯𑀸.

𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸𑀢𑀺 𑀢𑀦𑁆𑀦𑀺𑀦𑁆𑀦𑀢𑀸𑀯𑀲𑁂𑀦 𑀲𑀼𑀝𑁆𑀞𑀼 𑀬𑀼𑀢𑁆𑀢𑀢𑀸. 𑀕𑀡𑀲𑀗𑁆𑀕𑀡𑀺𑀓𑀸 𑀓𑀺𑀮𑁂𑀲𑀯𑀲𑁂𑀦 𑀧𑀯𑀢𑁆𑀢𑀸 𑀲𑀗𑁆𑀕𑀡𑀺𑀓𑀸. 𑀇𑀢𑁆𑀣𑀺𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸𑀲𑀯𑀦𑁂 𑀇𑀢𑁆𑀣𑀺𑀲𑀤𑁆𑀤𑀲𑀯𑀦𑁂 𑀘 𑀅𑀲𑁆𑀲𑀸𑀤𑁄 𑀲𑀯𑀦𑀲𑀁𑀲𑀕𑁆𑀕𑁄. 𑀇𑀢𑁆𑀣𑀺𑀬𑀸 𑀓𑀲𑁆𑀲𑀘𑀺 𑀤𑀸𑀦𑀕𑁆𑀕𑀳𑀡𑀲𑁆𑀲𑀸𑀤𑁄 𑀧𑀭𑀺𑀪𑁄𑀕𑀲𑀁𑀲𑀕𑁆𑀕𑁄.

𑁯𑁪𑁬. 𑀲𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀉𑀧𑀯𑀺𑀘𑀭𑀦𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀼𑀧𑀯𑀺𑀘𑀸𑀭𑀸𑀢𑀺 𑀅𑀓𑀼𑀲𑀮𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀭𑀽𑀧𑀯𑀺𑀘𑀸𑀭𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀉𑀧𑁂𑀓𑁆𑀔𑀼𑀧𑀯𑀺𑀘𑀸𑀭𑀸 𑀘. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀯𑀸𑀢𑀺 𑀏𑀢𑁂𑀦 𑀯𑀺𑀘𑀸𑀭𑀕𑁆𑀕𑀳𑀡𑁂𑀦 𑀯𑀺𑀢𑀓𑁆𑀓𑁄𑀧𑀺 𑀕𑀳𑀺𑀢𑁄𑀢𑀺 𑀯𑀺𑀢𑀓𑁆𑀓𑀧𑁆𑀧𑀯𑀢𑁆𑀢𑀦𑁂𑀦 ‘‘𑀉𑀧𑀯𑀺𑀢𑀓𑁆𑀓𑁂𑀢𑀻’’𑀢𑀺 𑀇𑀤𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁯𑁪𑁭. 𑀅𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀸 𑀫𑁄𑀳𑁄𑀢𑀺 𑀯𑀤𑀦𑁆𑀢𑀺, 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀼𑀧𑁂𑀓𑁆𑀔𑀸𑀧𑀺 𑀧𑀦 𑀕𑁂𑀳𑀲𑁆𑀲𑀺𑀢𑀸 𑀦 𑀦 𑀳𑁄𑀢𑀺.

𑁯𑁪𑁮. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑁄 ‘‘𑀅𑀥𑀺𑀘𑁆𑀘 𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀉𑀧𑁆𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑁄 𑀳𑁄𑀢𑀻𑀢𑀺 𑀏𑀯𑀭𑀽𑀧𑀲𑁆𑀲 𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀲𑁆𑀲𑁂𑀯𑀸’’𑀢𑀺 𑀆𑀳. 𑀦 𑀲𑁄 𑀚𑀸𑀢𑁄𑀢𑀺 𑀏𑀢𑁆𑀣 ‘‘𑀚𑀸𑀢𑀽’’𑀢𑀺 𑀅𑀬𑀁 𑀦𑀺𑀧𑀸𑀢𑁄 𑀉-𑀓𑀸𑀭𑀲𑁆𑀲 𑀑-𑀓𑀸𑀭𑀁 𑀓𑀢𑁆𑀯𑀸 𑀚𑀸𑀢𑁄𑀢𑀺 𑀯𑀼𑀢𑁆𑀢𑁄, 𑀢𑁂𑀦 𑀯𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀦𑁆𑀢𑀭𑀁 𑀏𑀢𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀸𑀲𑀯𑀤𑀺𑀝𑁆𑀞𑀻𑀢𑀺 𑀲𑀩𑁆𑀩𑀸𑀲𑀯𑀧𑀭𑀺𑀬𑀸𑀬𑁂𑀦 𑀆𑀕𑀢𑀸 𑀤𑀺𑀝𑁆𑀞𑀺.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁭.) 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁫𑁧. 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀲𑀼 𑀲𑀢𑁆𑀢𑀓𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀸 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀏𑀯 𑀇𑀥 𑀢𑀣𑀸 𑀅𑀯𑀢𑁆𑀯𑀸 ‘‘𑀲𑀢𑁆𑀢 𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁮.) 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁫𑁨. ‘‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀑𑀲𑀻𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀺, 𑀓𑁄𑀲𑀚𑁆𑀚𑀫𑁂𑀯 𑀯𑀸 𑀓𑁄𑀲𑀚𑁆𑀚𑀦𑁆𑀢𑀭𑀓𑀸𑀭𑀡𑀢𑀸𑀬 𑀓𑁄𑀲𑀚𑁆𑀚𑀓𑀸𑀭𑀡𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀆𑀘𑀺𑀢-𑀲𑀤𑁆𑀤𑁄 𑀢𑀺𑀦𑁆𑀢-𑀲𑀤𑁆𑀤𑀲𑁆𑀲, 𑀫𑀜𑁆𑀜𑁂-𑀲𑀤𑁆𑀤𑁄 𑀘 𑀯𑀺𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀺𑀦𑁆𑀢𑀫𑀸𑀲𑁄 𑀯𑀺𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄, 𑀫𑀸𑀲𑀘𑀬𑁄 𑀯𑀺𑀬𑀸𑀢𑀺 𑀯𑀸 𑀅𑀢𑁆𑀣𑁄.

𑁯𑁫𑁭. 𑀨𑀭𑀢𑀻𑀢𑀺 𑀨𑀼𑀲𑀢𑀺, 𑀖𑀝𑁆𑀝𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 ‘‘𑀅𑀚𑁆𑀚 𑀢𑀬𑀸 𑀯𑀺𑀓𑀸𑀮𑁂 𑀪𑀼𑀢𑁆𑀢𑀁, 𑀢𑁂𑀦 𑀢𑁆𑀯𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀯𑀼𑀢𑁆𑀢𑁄 ‘‘𑀳𑀺𑀬𑁆𑀬𑁄 𑀫𑀬𑀸 𑀓𑀸𑀮𑁂 𑀪𑀼𑀢𑁆𑀢𑀁, 𑀢𑁂𑀦𑀸𑀳𑀁 𑀅𑀦𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀦 𑀅𑀬𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀅𑀜𑁆𑀜𑀁 𑀬𑀼𑀢𑁆𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀺𑀢𑀢𑁆𑀣𑀢𑁄 𑀩𑀳𑀺𑀤𑁆𑀥𑀸 𑀬𑀣𑀸 𑀢𑀁 𑀦 𑀅𑀮𑁆𑀮𑀻𑀬𑀢𑀺, 𑀢𑀣𑀸 𑀓𑀣𑀸𑀬 𑀅𑀧𑀦𑀬𑀦𑀁 𑀯𑀺𑀓𑁆𑀔𑀺𑀧𑀦𑀁 𑀩𑀳𑀺𑀤𑁆𑀥𑀸 𑀅𑀧𑀦𑀸𑀫𑀦𑀸.

𑁯𑁫𑁮. 𑀅𑀲𑀜𑁆𑀜𑀻𑀯𑀸𑀤𑀸𑀢𑀺 𑀧𑀼𑀕𑁆𑀕𑀮𑁂𑀳𑀺 𑀤𑀺𑀝𑁆𑀞𑀺𑀬𑁄 𑀤𑀲𑁆𑀲𑁂𑀢𑀺. 𑀬𑁂𑀳𑀺 𑀯𑀸 𑀅𑀪𑀺𑀦𑀺𑀯𑁂𑀲𑁂𑀳𑀺 𑀅𑀲𑀜𑁆𑀜𑀻 𑀅𑀢𑁆𑀢𑀸𑀦𑀁 𑀯𑀤𑀦𑁆𑀢𑀺, 𑀢𑁂 𑀅𑀲𑀜𑁆𑀜𑀻𑀯𑀸𑀤𑀸. 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀓𑀸𑀲𑀸𑀤𑀺𑀁.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁯.) 𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁦. 𑀤𑀲𑀫𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 ‘‘𑀲𑀢𑁆𑀢𑁂𑀲𑀼 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀓𑀣𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑁯𑁬𑁩. 𑀲𑀼𑀔𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀔𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀁 𑀲𑀼𑀔𑀦𑁆𑀢𑀺 𑀲𑁂𑀯𑀺𑀢𑀩𑁆𑀩𑀁 𑀦𑁂𑀓𑁆𑀔𑀫𑁆𑀫𑀲𑀼𑀔𑀁. 𑀯𑀺𑀦𑀺𑀘𑁆𑀙𑀬𑀸𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸𑀢𑀺 𑀇𑀤𑀁 𑁋

‘‘𑀲𑀸𑀢𑀁 𑀅𑀲𑀸𑀢𑀦𑁆𑀢𑀺 𑀬𑀫𑀸𑀳𑀼 𑀮𑁄𑀓𑁂,

𑀢𑀫𑀽𑀧𑀦𑀺𑀲𑁆𑀲𑀸𑀬 𑀧𑀳𑁄𑀢𑀺 𑀙𑀦𑁆𑀤𑁄;

𑀭𑀽𑀧𑁂𑀲𑀼 𑀤𑀺𑀲𑁆𑀯𑀸 𑀯𑀺𑀪𑀯𑀁 𑀪𑀯𑀜𑁆𑀘,

𑀯𑀺𑀦𑀺𑀘𑁆𑀙𑀬𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂’’𑀢𑀺. (𑀲𑀼. 𑀦𑀺. 𑁮𑁭𑁩; 𑀫𑀳𑀸𑀦𑀺. 𑁧𑁦𑁨) 𑁋

𑀏𑀢𑀲𑁆𑀲 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁.

𑀇𑀥 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀇𑀫𑀺𑀲𑁆𑀲𑀸 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 𑀬𑁄 𑀙𑀦𑁆𑀤𑀭𑀸𑀕𑀲𑁆𑀲 𑀧𑀘𑁆𑀘𑀬𑀲𑀪𑀸𑀯𑁂𑀦 𑀯𑀺𑀦𑀺𑀘𑁆𑀙𑀬-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀲𑀓𑁆𑀓𑀧𑀜𑁆𑀳𑁂𑀧𑀺 (𑀤𑀻. 𑀦𑀺. 𑁨.𑁩𑁫𑁭) 𑀙𑀦𑁆𑀤𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀯𑀺𑀢𑀓𑁆𑀓-𑀲𑀤𑁆𑀤𑁂𑀦 𑀲𑁄 𑀏𑀯 𑀆𑀕𑀢𑁄𑀢𑀺 𑀏𑀯𑀁 𑀯𑀺𑀢𑀓𑁆𑀓𑀲𑁆𑀲 𑀯𑀺𑀦𑀺𑀘𑁆𑀙𑀬𑀪𑀸𑀯𑀁 𑀢𑀲𑁆𑀲𑁂𑀯 𑀇𑀥 𑀕𑀳𑀺𑀢𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀩𑀮𑀯𑀢𑀺𑀬𑀸 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀲𑁆𑀲 𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀁.

𑁯𑁬𑁪. 𑀲𑀢𑀺𑀧𑀺 𑀅𑀜𑁆𑀜𑁂𑀲𑀜𑁆𑀘 𑀲𑀗𑁆𑀔𑀢𑀪𑀸𑀯𑁂 𑀅𑀳𑀦𑁆𑀢𑀺 𑀅𑀲𑁆𑀫𑀻𑀢𑀺 𑀘 𑀲𑀸𑀢𑀺𑀲𑀬𑀸 𑀫𑀸𑀦𑀲𑁆𑀲 𑀲𑀗𑁆𑀔𑀢𑀢𑀸𑀢𑀺 𑀓𑀢𑁆𑀯𑀸 ‘‘𑀲𑀗𑁆𑀔𑀢’’𑀦𑁆𑀢𑀺 𑀫𑀸𑀦𑁄 𑀯𑀼𑀢𑁆𑀢𑁄. 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 ‘‘𑀅𑀳𑀫𑀲𑁆𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀗𑁆𑀔𑀭𑀡𑀁 𑀯𑀸 𑀲𑀗𑁆𑀔𑀢𑀁. 𑀏𑀢𑁆𑀣 ‘‘𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀓𑀸 𑀧𑀯𑀢𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀯𑀺𑀲𑁂𑀲𑀯𑀢𑀻𑀢𑀺 𑀢𑀸𑀲𑀫𑁆𑀧𑀺 𑀇𑀜𑁆𑀚𑀺𑀢𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄.

𑀦𑀯𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁦.) 𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁦. 𑀚𑀸𑀮𑀓𑁆𑀔𑀺𑀧𑀲𑀁𑀯𑀺𑀥𑀸𑀦𑀸𑀤𑀺𑀓𑀼𑀲𑀮𑀢𑀸𑀲𑀗𑁆𑀓𑀧𑁆𑀧𑀦𑀁 𑀉𑀧𑀸𑀬𑀘𑀺𑀦𑁆𑀢𑀸, 𑀢𑀲𑁆𑀲𑀸 𑀫𑀺𑀘𑁆𑀙𑀸𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀪𑀸𑀯𑁂𑀦 𑀧𑀯𑀢𑁆𑀢𑁄 𑀢𑀤𑀸𑀓𑀸𑀭𑁄 𑀫𑁄𑀳𑁄 𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸𑀓𑀢𑁂 𑀧𑀦 𑀧𑀸𑀧𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀜𑁆𑀜𑀸, 𑀲𑀗𑁆𑀓𑀧𑁆𑀧𑁄 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀲𑁆𑀲𑀸𑀧𑀺 𑀫𑀺𑀘𑁆𑀙𑀸𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀁 𑀢𑀤𑀸𑀓𑀸𑀭𑀁, 𑀅𑀦𑀸𑀤𑀻𑀦𑀯𑀤𑀲𑁆𑀲𑀦𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄𑀢𑀺. 𑀯𑀺𑀫𑀼𑀢𑁆𑀢𑀲𑀜𑁆𑀜𑀺𑀢𑀸𑀢𑀺 𑀅𑀥𑀺𑀫𑀸𑀦𑀲𑀫𑁆𑀧𑀬𑀼𑀢𑁆𑀢𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀯𑀺𑀫𑀼𑀢𑁆𑀢𑀢𑀸𑀲𑀜𑁆𑀚𑀸𑀦𑀦𑀁. ‘‘𑀯𑀺𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀨𑀮𑀁 𑀯𑀺𑀬 𑀯𑀺𑀫𑀼𑀢𑁆𑀢𑀦𑁆𑀢𑀺 𑀕𑀳𑀺𑀢𑁂 𑀧𑀦 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀜𑀸𑀡𑀁, 𑀲𑀫𑀸𑀥𑀺 𑀘 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸.

𑀤𑀲𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁭𑁩. 𑀲𑀫𑀽𑀳𑀕𑀸𑀳𑀢𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀲𑀸𑀥𑀸𑀭𑀡𑀕𑁆𑀕𑀳𑀡𑀢𑁄𑀢𑀺 𑀯𑀤𑀦𑁆𑀢𑀺. ‘‘𑀇𑀢𑁆𑀣𑀁 𑀏𑀯𑀁 𑀅𑀜𑁆𑀜𑀣𑀸’’𑀢𑀺 𑀧𑀦 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀕𑀳𑀡𑀁 𑀲𑀫𑀽𑀳𑀕𑀸𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀁 𑀆𑀓𑀸𑀭𑀦𑁆𑀢𑀺 𑀧𑀭𑀲𑀦𑁆𑀢𑀸𑀦𑀕𑀢𑀁 𑀆𑀓𑀸𑀭𑀁. 𑀅𑀢𑁆𑀣𑀻𑀢𑀺 𑀲𑀤𑀸 𑀲𑀁𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀤𑀢𑀻𑀢𑀺 𑀯𑀺𑀦𑀲𑁆𑀲𑀢𑀺. 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦𑀸𑀢𑀺 ‘‘𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀺𑀬𑀁, 𑀦 𑀲𑀺𑀬’’𑀦𑁆𑀢𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦. 𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦𑀸𑀢𑀺 ‘‘𑀅𑀧𑀺 𑀦𑀸𑀫 𑀲𑀸𑀥𑀼 𑀧𑀦𑀸𑀳𑀁 𑀲𑀺𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑀦𑀸𑀬 𑀓𑀧𑁆𑀧𑀦𑀯𑀲𑁂𑀦.

𑀲𑀼𑀤𑁆𑀥𑀲𑀻𑀲𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀲𑀸𑀥𑀸𑀭𑀡𑀲𑀻𑀲𑀸 𑀯𑀺𑀲𑁂𑀲𑀲𑁆𑀲 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀲𑀼𑀤𑁆𑀥𑀲𑀻𑀲𑀸’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀻𑀲𑁂𑀳𑀺 𑀤𑀺𑀝𑁆𑀞𑀺𑀬𑀸 𑀢𑀡𑁆𑀳𑀸 𑀤𑀲𑁆𑀲𑀺𑀢𑀸, 𑀲𑀻𑀲𑀲𑀻𑀲𑀫𑀽𑀮𑀓𑁂𑀳𑀺 𑀫𑀸𑀦𑀤𑀺𑀝𑁆𑀞𑀻𑀳𑀺 𑀲𑀬𑀫𑁂𑀯 𑀘𑀸𑀢𑀺 𑀆𑀳 ‘‘𑀏𑀯𑀫𑁂𑀢𑁂…𑀧𑁂… 𑀢𑀡𑁆𑀳𑀸 𑀯𑀺𑀘𑀭𑀺𑀢𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀤𑀺𑀝𑁆𑀞𑀺𑀫𑀸𑀦𑁂𑀲𑀼𑀧𑀺 ‘‘𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺 𑀯𑀘𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑁆𑀧𑀬𑁄𑀕𑀻𑀦𑀁 𑀤𑀺𑀝𑁆𑀞𑀺𑀫𑀸𑀦𑀸𑀦𑀁 𑀢𑀡𑁆𑀳𑀸𑀬 𑀅𑀯𑀺𑀧𑁆𑀧𑀬𑁄𑀕𑀻𑀦𑀁 𑀢𑀁𑀫𑀽𑀮𑀓𑀢𑁆𑀢𑀸𑀯 𑀢𑀧𑁆𑀧𑀥𑀸𑀦𑀢𑀸𑀬 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁭𑁪. 𑀅𑀯𑀓𑁆𑀓𑀭𑀻𑀢𑀺 𑀦𑀺𑀧𑀸𑀢𑁄 𑀦𑀸𑀦𑀸𑀪𑀸𑀯𑁂 𑀯𑀢𑁆𑀢𑀢𑀻𑀢𑀺 𑀅𑀦𑀸𑀦𑀸𑀓𑀭𑀡𑀁 𑀅𑀦𑀯𑀓𑁆𑀓𑀭𑀺, 𑀢𑀁 𑀓𑀢𑁆𑀯𑀸, 𑀅𑀯𑀓𑁆𑀓𑀭𑀺 𑀯𑀸 𑀅𑀓𑀢𑁆𑀯𑀸 𑀅𑀦𑀯𑀓𑁆𑀓𑀭𑀺 𑀓𑀢𑁆𑀯𑀸𑀢𑀺 𑀏𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸’’𑀢𑀺. ‘‘𑀅𑀦𑀯𑀓𑀸𑀭𑀺𑀁 𑀓𑀭𑀺𑀢𑁆𑀯𑀸’’𑀢𑀺 𑀯𑀸 𑀧𑀸𑀞𑁄, 𑀢𑀢𑁆𑀣 𑀅𑀯𑀓𑀺𑀭𑀡𑀁 𑀯𑀺𑀓𑁆𑀔𑁂𑀧𑀦𑀁 𑀲𑀫𑀽𑀳𑀲𑁆𑀲 𑀏𑀓𑀤𑁂𑀲𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑀁 𑀅𑀯𑀓𑀸𑀭𑀺, 𑀢𑀁 𑀅𑀯𑀓𑀸𑀭𑀺𑀁 𑀯𑀺𑀦𑀺𑀩𑁆𑀪𑁄𑀕𑀁 𑀅𑀓𑀢𑁆𑀯𑀸, 𑀧𑀜𑁆𑀘𑀧𑀺 𑀔𑀦𑁆𑀥𑁂 𑀲𑀫𑀽𑀳𑀢𑁄 𑀏𑀓𑀢𑁆𑀢𑁂𑀦𑁂𑀯 𑀕𑀳𑁂𑀢𑁆𑀯𑀸 𑀅𑀢𑁆𑀢𑀢𑁄 𑀅𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀅𑀲𑁆𑀫𑀻𑀢𑀺 𑀙𑀦𑁆𑀤𑀫𑀸𑀦𑀤𑀺𑀝𑁆𑀞𑀺𑀬𑁄 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀺𑀢𑀩𑁆𑀬𑀸𑀪𑀗𑁆𑀕𑀺𑀢𑀸𑀬𑀸𑀢𑀺 𑀤𑀸𑀢𑁆𑀢𑁂𑀦 𑀓𑀸𑀚𑁂𑀦 𑀘𑀸𑀢𑀺 𑀏𑀢𑁂𑀦 𑀧𑀭𑀺𑀓𑁆𑀔𑀸𑀭𑁂𑀦, 𑀅𑀲𑀺𑀢𑀩𑁆𑀬𑀸𑀪𑀗𑁆𑀕𑀻𑀳𑀺 𑀮𑀯𑀦𑀯𑀳𑀦𑀓𑀺𑀭𑀺𑀬𑀸 𑀯𑀸 ‘‘𑀅𑀲𑀺𑀢𑀩𑁆𑀬𑀸𑀪𑀗𑁆𑀕𑀻’’𑀢𑀺 𑀯𑀼𑀢𑁆𑀢𑀸.

𑁯𑁭𑁬. 𑀅𑀯𑀓𑀸𑀭𑀺𑀁 𑀓𑀭𑀺𑀢𑁆𑀯𑀸𑀢𑀺 𑀭𑀽𑀧𑀸𑀤𑀻𑀦𑀺 𑀅𑀢𑁆𑀢𑀢𑁄 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 𑀇𑀫𑀺𑀦𑀸 𑀭𑀽𑀧𑁂𑀦…𑀧𑁂… 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑁂𑀦 𑀅𑀲𑁆𑀫𑀻𑀢𑀺 𑀙𑀦𑁆𑀤𑀁 𑀧𑀝𑀺𑀮𑀪𑀢𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀇𑀫𑀺𑀦𑀸𑀢𑀺 𑀏𑀢𑀲𑁆𑀲 𑀅𑀢𑁆𑀢𑀢𑁄 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑁂𑀦 𑀭𑀽𑀧𑀸𑀤𑀺𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀢𑀢𑁄 𑀳𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀺 𑀅𑀩𑀳𑀺𑀓𑀢𑀸𑀦𑀺 𑀅𑀳𑀫𑀺𑀘𑁆𑀘𑁂𑀯 𑀕𑀳𑀺𑀢𑀸𑀦𑀺 𑀭𑀽𑀧𑀸𑀤𑀻𑀦𑀺 𑀉𑀧𑀸𑀤𑀸𑀬 𑀉𑀧𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀸 𑀢𑀡𑁆𑀳𑀸 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬𑀸’’𑀢𑀺 𑀯𑀼𑀢𑁆𑀢𑀸, 𑀅𑀢𑁆𑀢𑀢𑁄 𑀘 𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀺 𑀩𑀳𑀺𑀓𑀢𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀸 ‘‘𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬𑀸’’𑀢𑀺. 𑀔𑀕𑁆𑀕𑁂𑀦 𑀯𑀸 𑀙𑀢𑁆𑀢𑁂𑀦 𑀯𑀸 𑀅𑀳𑀁 𑀦𑀺𑀘𑁆𑀘𑁄𑀢𑀺 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑁂𑀦 𑀔𑀕𑁆𑀕𑀸𑀤𑀺𑀦𑀸 𑀫𑀫 𑀯𑀺𑀦𑀸𑀲𑁄 𑀦𑀢𑁆𑀣𑀻𑀢𑀺 𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. 𑀏𑀓𑁂𑀓𑀲𑁆𑀲𑀸𑀢𑀺 𑀇𑀤𑀁 𑀅𑀦𑀸𑀤𑀺𑀫𑁆𑀳𑀺 𑀅𑀦𑀦𑁆𑀢𑁂 𑀘 𑀲𑀁𑀲𑀸𑀭𑁂 𑀏𑀓𑁂𑀓𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀙𑀢𑁆𑀢𑀺𑀁𑀲𑀸𑀬𑀧𑀺 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀏𑀓𑁂𑀓𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀇𑀤𑀫𑁆𑀧𑀺 𑀅𑀦𑀺𑀲𑁆𑀲𑀺𑀢𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀁 𑀓𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀲𑁆𑀲𑀘𑀺 𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁.

𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.