𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁭𑁫𑁧. 𑀑𑀓𑀸𑀲𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀜𑁆𑀘𑀸𑀧𑀺 𑀜𑀸𑀡𑀲𑁆𑀲 𑀯𑀢𑁆𑀣𑀼. 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸𑀢𑀺 𑀦𑀳𑁂𑀢𑀸𑀤𑀺𑀅𑀯𑀺𑀢𑀣𑁂𑀓𑀧𑁆𑀧𑀓𑀸𑀭𑀯𑀢𑁆𑀣𑀼𑀯𑀺𑀪𑀸𑀯𑀦𑀸. 𑀬𑀣𑀸 𑀏𑀓𑀁 𑀦𑀳𑁂𑀢𑀼, 𑀢𑀣𑀸 𑀏𑀓𑀁 𑀅𑀜𑁆𑀜𑀫𑁆𑀧𑀻𑀢𑀺 𑀳𑀺 𑀕𑀳𑁂𑀢𑀩𑁆𑀩𑀁 𑀅𑀯𑀺𑀢𑀣𑀲𑀸𑀫𑀜𑁆𑀜𑀬𑀼𑀢𑁆𑀢𑀁 𑀜𑀸𑀡𑀸𑀭𑀫𑁆𑀫𑀡𑀁 𑀬𑀸𑀣𑀸𑀯𑀓𑀯𑀢𑁆𑀣𑀼. 𑀬𑀸𑀣𑀸𑀯𑀓𑁂𑀦 𑀯𑀸 𑀅𑀯𑀺𑀢𑀣𑀲𑀸𑀫𑀜𑁆𑀜𑁂𑀦 𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸.

𑀤𑀼𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀤𑀼𑀓𑀫𑀸𑀢𑀺𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀯𑀤𑀦𑁆𑀢𑀺. 𑀑𑀲𑀸𑀦𑀤𑀼𑀓𑀲𑁆𑀲 𑀧𑀦 𑀤𑀼𑀓𑀫𑀸𑀢𑀺𑀓𑀁 𑀅𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑀪𑀸𑀯𑀸𑀦𑀼𑀭𑀽𑀧𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀢𑀺𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀑𑀲𑀸𑀦𑀤𑀼𑀓𑁂 𑀧𑀦 𑀅𑀢𑁆𑀣𑁄𑀢𑀺 𑀨𑀮𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀢𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸, 𑀓𑀸𑀭𑀡𑀕𑀢𑀸 𑀧𑀜𑁆𑀜𑀸. 𑀚𑀸𑀧𑀺𑀢𑁄 𑀚𑀦𑀺𑀢𑁄 𑀅𑀢𑁆𑀣𑁄 𑀏𑀢𑀺𑀲𑁆𑀲𑀸𑀢𑀺 𑀚𑀸𑀧𑀺𑀢𑀢𑁆𑀣𑀸, 𑀓𑀸𑀭𑀡𑀧𑀜𑁆𑀜𑀸𑀲𑀤𑀺𑀲𑀻 𑀨𑀮𑀧𑁆𑀧𑀓𑀸𑀲𑀦𑀪𑀽𑀢𑀸 𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸.