𑁧𑁬. 𑀜𑀸𑀡𑀯𑀺𑀪𑀗𑁆𑀕𑁄

𑁧. 𑀏𑀓𑀓𑀫𑀸𑀢𑀺𑀓𑀸𑀤𑀺𑀯𑀡𑁆𑀡𑀦𑀸

𑁭𑁫𑁧. 𑀑𑀓𑀸𑀲𑀝𑁆𑀞𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀭𑀫𑁆𑀫𑀡𑀜𑁆𑀘𑀸𑀧𑀺 𑀜𑀸𑀡𑀲𑁆𑀲 𑀯𑀢𑁆𑀣𑀼. 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸𑀢𑀺 𑀦𑀳𑁂𑀢𑀸𑀤𑀺𑀅𑀯𑀺𑀢𑀣𑁂𑀓𑀧𑁆𑀧𑀓𑀸𑀭𑀯𑀢𑁆𑀣𑀼𑀯𑀺𑀪𑀸𑀯𑀦𑀸. 𑀬𑀣𑀸 𑀏𑀓𑀁 𑀦𑀳𑁂𑀢𑀼, 𑀢𑀣𑀸 𑀏𑀓𑀁 𑀅𑀜𑁆𑀜𑀫𑁆𑀧𑀻𑀢𑀺 𑀳𑀺 𑀕𑀳𑁂𑀢𑀩𑁆𑀩𑀁 𑀅𑀯𑀺𑀢𑀣𑀲𑀸𑀫𑀜𑁆𑀜𑀬𑀼𑀢𑁆𑀢𑀁 𑀜𑀸𑀡𑀸𑀭𑀫𑁆𑀫𑀡𑀁 𑀬𑀸𑀣𑀸𑀯𑀓𑀯𑀢𑁆𑀣𑀼. 𑀬𑀸𑀣𑀸𑀯𑀓𑁂𑀦 𑀯𑀸 𑀅𑀯𑀺𑀢𑀣𑀲𑀸𑀫𑀜𑁆𑀜𑁂𑀦 𑀯𑀢𑁆𑀣𑀼𑀯𑀺𑀪𑀸𑀯𑀦𑀸 𑀬𑀸𑀣𑀸𑀯𑀓𑀯𑀢𑁆𑀣𑀼𑀯𑀺𑀪𑀸𑀯𑀦𑀸.

𑀤𑀼𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀤𑀼𑀓𑀫𑀸𑀢𑀺𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀯𑀤𑀦𑁆𑀢𑀺. 𑀑𑀲𑀸𑀦𑀤𑀼𑀓𑀲𑁆𑀲 𑀧𑀦 𑀤𑀼𑀓𑀫𑀸𑀢𑀺𑀓𑀁 𑀅𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀢𑁆𑀢𑀸 𑀤𑀼𑀓𑀪𑀸𑀯𑀸𑀦𑀼𑀭𑀽𑀧𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀢𑀺𑀓𑀸𑀦𑀼𑀭𑀽𑀧𑁂𑀳𑀻𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑀁. 𑀑𑀲𑀸𑀦𑀤𑀼𑀓𑁂 𑀧𑀦 𑀅𑀢𑁆𑀣𑁄𑀢𑀺 𑀨𑀮𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀢𑀁 𑀚𑀦𑁂𑀢𑀻𑀢𑀺 𑀅𑀢𑁆𑀣𑀚𑀸𑀧𑀺𑀓𑀸, 𑀓𑀸𑀭𑀡𑀕𑀢𑀸 𑀧𑀜𑁆𑀜𑀸. 𑀚𑀸𑀧𑀺𑀢𑁄 𑀚𑀦𑀺𑀢𑁄 𑀅𑀢𑁆𑀣𑁄 𑀏𑀢𑀺𑀲𑁆𑀲𑀸𑀢𑀺 𑀚𑀸𑀧𑀺𑀢𑀢𑁆𑀣𑀸, 𑀓𑀸𑀭𑀡𑀧𑀜𑁆𑀜𑀸𑀲𑀤𑀺𑀲𑀻 𑀨𑀮𑀧𑁆𑀧𑀓𑀸𑀲𑀦𑀪𑀽𑀢𑀸 𑀨𑀮𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸.

𑁧𑁦. 𑀤𑀲𑀓𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁭𑁬𑁦. ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀬𑁄𑀦𑀺𑀬𑁄. 𑀓𑀢𑀫𑀸…𑀧𑁂… 𑀬𑁄 𑀔𑁄 𑀫𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀚𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁨) 𑀯𑀘𑀦𑁂𑀦 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀯𑀼𑀢𑁆𑀢𑀁, ‘‘𑀦𑀺𑀭𑀬𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀚𑀸𑀦𑀸𑀫𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁩) 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀁. ‘‘𑀲𑀁𑀬𑀼𑀢𑁆𑀢𑀓𑁂 𑀆𑀕𑀢𑀸𑀦𑀺 𑀢𑁂𑀲𑀢𑁆𑀢𑀢𑀺 𑀜𑀸𑀡𑀸𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀦 𑀦𑀺𑀤𑀸𑀦𑀯𑀕𑁆𑀕𑁂 𑀲𑀢𑁆𑀢𑀲𑀢𑁆𑀢𑀢𑀺 𑀆𑀕𑀢𑀸𑀦𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀜𑁆𑀘, 𑀢𑁂𑀲𑀢𑁆𑀢𑀢𑀺 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀲𑀼𑀢𑀫𑀬𑀸𑀤𑀻𑀦𑀺 𑀆𑀕𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀦 𑀲𑀁𑀬𑀼𑀢𑁆𑀢𑀓𑁂𑀢𑀺. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀏𑀢𑁂𑀦 𑀇𑀥 𑀏𑀓𑀓𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀜𑁆𑀜𑀢𑁆𑀣 𑀘 ‘‘𑀧𑀼𑀩𑁆𑀩𑀦𑁆𑀢𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸, 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀘 ‘‘𑀢𑀬𑀺𑀤𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 ‘𑀇𑀫𑀸𑀦𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺 𑀏𑀯𑀁 𑀕𑀳𑀺𑀢𑀸𑀦𑀻’𑀢𑀺’’𑀆𑀤𑀺𑀦𑀸 𑀯𑀼𑀢𑁆𑀢𑀁 𑀅𑀦𑁂𑀓𑀜𑀸𑀡𑀧𑁆𑀧𑀪𑁂𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀸𑀣𑀸𑀯𑀧𑀝𑀺𑀯𑁂𑀥𑀢𑁄 𑀲𑀬𑀜𑁆𑀘 𑀅𑀓𑀫𑁆𑀧𑀺𑀬𑀁 𑀧𑀼𑀕𑁆𑀕𑀮𑀜𑁆𑀘 𑀢𑀁𑀲𑀫𑀗𑁆𑀕𑀺𑀁 𑀜𑁂𑀬𑁆𑀬𑁂𑀲𑀼 𑀅𑀥𑀺𑀩𑀮𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀘𑀸’’𑀢𑀺.

𑀲𑁂𑀝𑁆𑀞𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀁. 𑀧𑀝𑀺𑀚𑀸𑀦𑀦𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀅𑀪𑀺𑀫𑀼𑀔𑀁 𑀕𑀘𑁆𑀙𑀦𑁆𑀢𑀺, 𑀅𑀝𑁆𑀞 𑀯𑀸 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀆𑀲𑀪𑀸, 𑀩𑀼𑀤𑁆𑀥𑀸. 𑀇𑀤𑀁 𑀧𑀦𑀸𑀢𑀺 𑀩𑀼𑀤𑁆𑀥𑀸𑀦𑀁 𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀫𑁂𑀯 𑀯𑀤𑀢𑀺. 𑀢𑀺𑀝𑁆𑀞𑀫𑀸𑀦𑁄𑀯𑀸𑀢𑀺 𑀅𑀯𑀤𑀦𑁆𑀢𑁄𑀧𑀺 𑀢𑀺𑀝𑁆𑀞𑀫𑀸𑀦𑁄𑀯 𑀧𑀝𑀺𑀚𑀸𑀦𑀸𑀢𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁…𑀧𑁂… 𑀢𑀢𑁆𑀭 𑀯𑀢 𑀫𑀁 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁫𑁧) 𑀯𑀘𑀦𑁂𑀦 𑀤𑀲𑁆𑀲𑀺𑀢𑀅𑀓𑀫𑁆𑀧𑀺𑀬𑀜𑀸𑀡𑀬𑀼𑀢𑁆𑀢𑁄 𑀤𑀲𑀩𑀮𑁄𑀳𑀦𑁆𑀢𑀺 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀔𑀦𑁆𑀥𑀓𑀯𑀕𑁆𑀕𑁂 𑀆𑀕𑀢𑁂𑀦.

‘‘𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀲𑀼𑀢𑁆𑀢𑀲𑁂𑀲𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀻𑀦𑀁 𑀨𑀮𑀲𑀫𑁆𑀧𑀢𑁆𑀢𑀺 𑀧𑀯𑀢𑁆𑀢𑀺, 𑀧𑀼𑀭𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀺𑀁 𑀉𑀧𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺 𑀧𑀯𑀢𑁆𑀢𑀺 𑀯𑀸 𑀯𑀼𑀢𑁆𑀢𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀢𑁆𑀣 𑀘 𑀘𑀓𑁆𑀓-𑀲𑀤𑁆𑀤𑀲𑁆𑀲 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀯𑁂𑀥𑀦𑀺𑀝𑁆𑀞𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀧𑀝𑀺𑀯𑁂𑀥𑁄𑀢𑀺 ‘‘𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀧𑀺 𑀤𑁂𑀲𑀦𑀸𑀜𑀸𑀡𑀲𑁆𑀲 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀧𑀭𑀲𑁆𑀲 𑀩𑀼𑀚𑁆𑀛𑀦𑀫𑀢𑁆𑀢𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀭𑀁 𑀧𑀦 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀤𑁂𑀲𑀦𑀸𑀜𑀸𑀡𑀧𑁆𑀧𑀯𑀢𑁆𑀢𑀺 𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀞𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀧𑀯𑀢𑁆𑀢𑀺𑀢𑀘𑀓𑁆𑀓𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀓𑁆𑀓𑀭𑀢𑀦𑀝𑁆𑀞𑀸𑀦𑀁 𑀯𑀺𑀬.

𑀲𑀫𑀸𑀤𑀻𑀬𑀦𑁆𑀢𑀻𑀢𑀺 𑀲𑀫𑀸𑀤𑀸𑀦𑀸𑀦𑀺, 𑀢𑀸𑀦𑀺 𑀧𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀸𑀦’’𑀦𑁆𑀢𑀺. 𑀓𑀫𑁆𑀫𑀫𑁂𑀯 𑀯𑀸 𑀓𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀏𑀢𑁂𑀦 𑀲𑀫𑀸𑀤𑀸𑀦-𑀲𑀤𑁆𑀤𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀫𑀼𑀢𑁆𑀢𑀕𑀢-𑀲𑀤𑁆𑀤𑁂 𑀕𑀢-𑀲𑀤𑁆𑀤𑀲𑁆𑀲 𑀯𑀺𑀬.

𑀅𑀕𑀢𑀺𑀕𑀸𑀫𑀺𑀦𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀦𑀺𑀩𑁆𑀩𑀸𑀦𑀜𑁆𑀘𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀚𑀸𑀦𑀸𑀫𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺 (𑀫. 𑀦𑀺. 𑁧.𑁧𑁫𑁩).

𑀳𑀸𑀦𑀪𑀸𑀕𑀺𑀬𑀥𑀫𑁆𑀫𑀦𑁆𑀢𑀺 𑀳𑀸𑀦𑀪𑀸𑀕𑀺𑀬𑀲𑀪𑀸𑀯𑀁, 𑀓𑀸𑀫𑀲𑀳𑀕𑀢𑀲𑀜𑁆𑀜𑀸𑀤𑀺𑀥𑀫𑁆𑀫𑀁 𑀯𑀸. 𑀢𑀁 𑀓𑀸𑀭𑀡𑀦𑁆𑀢𑀺 𑀧𑀼𑀩𑁆𑀩𑁂𑀯 𑀓𑀢𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀁.

‘‘𑀇𑀤𑀸𑀦𑀻’’𑀢𑀺 𑀏𑀢𑀲𑁆𑀲 ‘‘𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀇𑀫𑀺𑀦𑀸 𑀲𑀳 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑀺𑀮𑁂𑀲𑀸𑀯𑀭𑀡𑀁 𑀢𑀤𑀪𑀸𑀯𑀜𑁆𑀘𑀸𑀢𑀺 𑀓𑀺𑀮𑁂𑀲𑀸𑀯𑀭𑀡𑀸𑀪𑀸𑀯𑀁. 𑀓𑀺𑀮𑁂𑀲𑀓𑁆𑀔𑀬𑀸𑀥𑀺𑀕𑀫𑀲𑁆𑀲 𑀳𑀺 𑀓𑀺𑀮𑁂𑀲𑀸𑀯𑀭𑀡𑀁 𑀅𑀝𑁆𑀞𑀸𑀦𑀁, 𑀢𑀤𑀪𑀸𑀯𑁄 𑀞𑀸𑀦𑀁. 𑀅𑀦𑀥𑀺𑀕𑀫𑀲𑁆𑀲 𑀓𑀺𑀮𑁂𑀲𑀸𑀯𑀭𑀡𑀁 𑀞𑀸𑀦𑀁, 𑀢𑀤𑀪𑀸𑀯𑁄 𑀅𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀢𑀤𑀪𑀸𑀯𑀕𑁆𑀕𑀳𑀡𑁂𑀦 𑀕𑀳𑀺𑀢𑀁 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀞𑀺𑀢𑀺𑀁 𑀢𑀩𑁆𑀩𑀺𑀧𑀭𑀻𑀢𑀸𑀬 𑀞𑀸𑀦𑀸𑀪𑀸𑀯𑀜𑁆𑀘 𑀅𑀥𑀺𑀕𑀫𑀲𑁆𑀲 𑀞𑀸𑀦𑀁 𑀧𑀲𑁆𑀲𑀦𑁆𑀢𑁂𑀦 𑀇𑀫𑀺𑀦𑀸 𑀜𑀸𑀡𑁂𑀦 𑀅𑀥𑀺𑀕𑀫𑀸𑀦𑀥𑀺𑀕𑀫𑀸𑀦𑀁 𑀞𑀸𑀦𑀸𑀝𑁆𑀞𑀸𑀦𑀪𑀽𑀢𑁂 𑀓𑀺𑀮𑁂𑀲𑀸𑀯𑀭𑀡𑀢𑀤𑀪𑀸𑀯𑁂 𑀧𑀲𑁆𑀲𑀢𑀺 𑀪𑀕𑀯𑀸𑀢𑀺 𑀇𑀫𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀞𑀺𑀢𑀺𑀤𑀲𑁆𑀲𑀦𑀢𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀞𑀸𑀦𑀸𑀪𑀸𑀯𑀤𑀲𑁆𑀲𑀦𑀢𑁄 𑀘𑀸’’𑀢𑀺. 𑀏𑀢𑁆𑀣 𑀘 𑀅𑀥𑀺𑀕𑀫𑀝𑁆𑀞𑀸𑀦𑀤𑀲𑁆𑀲𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀉𑀧𑀭𑀺 𑀪𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀯𑀺𑀧𑀸𑀓𑀸𑀯𑀭𑀡𑀸𑀪𑀸𑀯𑀤𑀲𑁆𑀲𑀦𑀸𑀤𑀺𑀓𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀇𑀫𑀺𑀦𑀸 𑀧𑀦 𑀜𑀸𑀡𑁂𑀦 𑀲𑀺𑀚𑁆𑀛𑀦𑀢𑁄 𑀧𑀲𑀗𑁆𑀕𑁂𑀦 𑀇𑀢𑀭𑀫𑁆𑀧𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀸𑀢𑀼𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀭𑀸𑀕𑀸𑀤𑀻𑀦𑀁 𑀅𑀥𑀺𑀫𑀢𑁆𑀢𑀢𑀸𑀤𑀺𑀯𑀲𑁂𑀦 𑀢𑀁𑀲𑀳𑀺𑀢𑀸𑀦𑀁 𑀥𑀸𑀢𑀽𑀦𑀁 𑀯𑁂𑀫𑀢𑁆𑀢𑀢𑀸𑀤𑀲𑁆𑀲𑀦𑀢𑁄, ‘‘𑀅𑀬𑀁 𑀇𑀫𑀺𑀲𑁆𑀲𑀸 𑀥𑀸𑀢𑀼𑀬𑀸 𑀅𑀥𑀺𑀫𑀢𑁆𑀢𑀢𑁆𑀢𑀸 𑀭𑀸𑀕𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸 𑀘𑀭𑀺𑀬𑀸𑀳𑁂𑀢𑀽𑀦𑀁 𑀯𑀸, 𑀭𑀸𑀕𑀸𑀤𑀬𑁄 𑀏𑀯 𑀯𑀸 𑀧𑀓𑀢𑀺𑀪𑀸𑀯𑀢𑁄 𑀥𑀸𑀢𑀽𑀢𑀺 𑀭𑀸𑀕𑀸𑀤𑀺𑀯𑁂𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀢𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀻𑀦𑀁 𑀯𑀺𑀬 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀺𑀯𑀲𑁂𑀦 𑀧𑀬𑁄𑀕𑀁 𑀅𑀦𑀸𑀤𑀺𑀬𑀺𑀢𑁆𑀯𑀸.

(𑁧.) 𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁧. 𑀦 𑀳𑁂𑀢𑀼𑀫𑁂𑀯𑀸𑀢𑀺 𑀏𑀢𑁆𑀣 𑀘 𑀦 𑀳𑁂𑀢𑀽 𑀏𑀯𑀸𑀢𑀺 𑀅𑀢𑁆𑀣𑁄, 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀧𑀦 𑀭𑀲𑁆𑀲𑀢𑁆𑀢𑀁 𑀫-𑀓𑀸𑀭𑁄 𑀘 𑀓𑀢𑁄 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸’’𑀢𑀺 𑀏𑀢𑁆𑀣 𑀯𑀺𑀬. 𑀇𑀫𑀺𑀦𑀸𑀧𑀺 𑀦𑀬𑁂𑀦𑀸𑀢𑀺 𑀏𑀢𑁆𑀣 𑀧𑀼𑀭𑀺𑀫𑀦𑀬𑁂𑀦 𑀳𑁂𑀢𑀼𑀪𑀸𑀯𑀸𑀤𑀺𑀧𑀝𑀺𑀓𑁆𑀔𑁂𑀧𑁄, 𑀧𑀘𑁆𑀙𑀺𑀫𑀦𑀬𑁂𑀦 𑀦𑀳𑁂𑀢𑀼𑀥𑀫𑁆𑀫𑀸𑀤𑀺𑀓𑁄𑀝𑁆𑀞𑀸𑀲𑀲𑀗𑁆𑀕𑀳𑁄𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀼𑀢𑀺𑀕𑁆𑀕𑀳𑀡𑁂𑀦 𑀘𑀼𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀏𑀓𑀸𑀬 𑀚𑀸𑀢𑀺𑀬𑀸 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀪𑀯𑀕𑁆𑀕𑀳𑀡𑁂𑀦 𑀦𑀯𑀥𑀸 𑀯𑀼𑀢𑁆𑀢𑀪𑀯𑀲𑁆𑀲. 𑀢𑀤𑀦𑁆𑀢𑁄𑀕𑀥𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀢𑀸 𑀯𑀼𑀢𑁆𑀢𑀸. 𑀉𑀧𑁆𑀧𑀦𑁆𑀦𑀁 𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 ‘‘𑀦 𑀭𑀽𑀧𑀁 𑀯𑀺𑀬 𑀉𑀧𑁆𑀧𑀦𑁆𑀦𑀸 𑀙𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀭𑀽𑀧𑀢𑁄 𑀏𑀢𑁂𑀲𑀁 𑀯𑀺𑀲𑁂𑀲𑀦𑀁 𑀓𑀭𑁄𑀢𑀺.

𑁭𑁬𑁨. 𑀓𑀧𑁆𑀧𑀢𑁄 𑀓𑀧𑁆𑀧𑀁 𑀕𑀦𑁆𑀢𑁆𑀯𑀸𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀓𑀤𑀸𑀘𑀺 𑀢𑀣𑀸 𑀉𑀧𑁆𑀧𑀚𑁆𑀚𑀢𑀺. 𑀦 𑀳𑀺 𑀔𑀻𑀭𑀸𑀤𑀻𑀦𑀁 𑀯𑀺𑀬 𑀏𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀯𑀺𑀮𑀓𑁆𑀔𑀡𑀢𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑁭𑁬𑁩. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀁 𑀲𑀩𑁆𑀩𑀁 𑀭𑀽𑀧𑀁 𑀲𑀫𑁄𑀥𑀸𑀦𑁂𑀢𑁆𑀯𑀸. 𑀏𑀢𑁂𑀦 𑀫𑀳𑀢𑁆𑀢𑁂𑀧𑀺 𑀅𑀯𑀺𑀪𑀸𑀯𑀓𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀼𑀔𑀼𑀫𑀢𑁆𑀢𑀸 𑀦 𑀯𑀺𑀪𑀸𑀯𑁂𑀲𑁆𑀲𑀢𑀻𑀢𑀺 𑀯𑀸𑀤𑀧𑀣𑀁 𑀙𑀺𑀦𑁆𑀤𑀢𑀺. 𑀘𑀓𑁆𑀔𑀼𑀧𑀲𑀸𑀤𑁂 𑀫𑀫 𑀯𑀢𑁆𑀣𑀼𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀬𑁄𑀢𑀺 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁬𑁪. 𑀅𑀩𑁆𑀩𑁄𑀓𑀺𑀡𑁆𑀡𑀸𑀢𑀺 𑀅𑀩𑁆𑀬𑀯𑀳𑀺𑀢𑀸, 𑀅𑀦𑀦𑁆𑀢𑀭𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀯𑀢𑁆𑀣𑀺𑀢𑀸𑀦𑀫𑁆𑀧𑀺 𑀧𑀝𑀺𑀧𑀸𑀝𑀺𑀦𑀺𑀬𑀫𑁄 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀢𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀏𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁭𑁬𑁫. 𑀲𑀫𑀦𑀦𑁆𑀢𑀭𑀢𑀸𑀢𑀺 𑀘 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀢𑀸.

𑁭𑁬𑁬. 𑀆𑀪𑀼𑀚𑀦𑀢𑁄𑀢𑀺 𑀆𑀪𑀼𑀕𑁆𑀕𑀓𑀭𑀡𑀢𑁄, 𑀦𑀺𑀯𑀢𑁆𑀢𑀦𑀢𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀜𑁆𑀘 𑀯𑀺𑀜𑁆𑀜𑀸𑀡𑀸 𑀅𑀦𑀸𑀪𑁄𑀕𑀸’’𑀢𑀺 𑀆𑀪𑁄𑀕𑀲𑀪𑀸𑀯𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄, ‘‘𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀦𑀢𑁆𑀣𑀺 𑀆𑀯𑀝𑁆𑀝𑀦𑀸 𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀆𑀯𑀝𑁆𑀝𑀦𑀪𑀸𑀯𑁄 𑀯𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀦 𑀲𑀩𑁆𑀩𑁂 𑀭𑀽𑀧𑀸𑀤𑀺𑀥𑀫𑁆𑀫𑀸 𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀳.

𑀭𑀽𑀧𑀸𑀤𑀻𑀲𑀼 𑀅𑀪𑀺𑀦𑀺𑀧𑀢𑀦𑀁 𑀢𑁂𑀳𑀺 𑀲𑀫𑀸𑀕𑀫𑁄 𑀢𑁂𑀲𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀻𑀢𑀺 𑀆𑀳 ‘‘𑀭𑀽𑀧𑀸𑀤𑀻𑀦𑀁 𑀅𑀪𑀺𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺. 𑀓𑀫𑁆𑀫𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀯𑀺𑀜𑁆𑀜𑀸𑀡𑁂𑀳𑀺 𑀅𑀪𑀺𑀦𑀺𑀧𑀢𑀺𑀢𑀩𑁆𑀩𑀸𑀦𑀺 𑀳𑀺 𑀭𑀽𑀧𑀸𑀤𑀻𑀦𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀻𑀲𑀼 𑀳𑀺 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀆𑀭𑀫𑁆𑀫𑀡𑀓𑀭𑀡𑁂𑀦 𑀧𑀝𑀺𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀺 𑀭𑀽𑀧𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀳𑀚𑀧𑀼𑀩𑁆𑀩𑀗𑁆𑀕𑀫𑀥𑀫𑁆𑀫𑁂𑀦 𑀧𑀝𑀺𑀯𑀺𑀚𑀸𑀦𑀺𑀢𑀩𑁆𑀩𑀸𑀦𑀁 𑀧𑀝𑀺𑀯𑀺𑀚𑀸𑀦𑀦𑀁 𑀏𑀢𑁂𑀲𑀁 𑀦𑀢𑁆𑀣𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑀢𑁄 𑀧𑀦 𑀫𑀼𑀢𑁆𑀢𑀸 𑀅𑀜𑁆𑀜𑀸 𑀏𑀢𑁂𑀲𑀁 𑀓𑀼𑀲𑀮𑀸𑀤𑀺𑀧𑀝𑀺𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻’’𑀢𑀺 𑀓𑀺𑀘𑁆𑀘𑀦𑁆𑀢𑀭𑀁 𑀧𑀝𑀺𑀲𑁂𑀥𑁂𑀢𑀺.

𑀅𑀯𑀺𑀧𑀸𑀓𑀪𑀸𑀯𑁂𑀦 𑀅𑀜𑁆𑀜𑀁 𑀅𑀩𑁆𑀬𑀸𑀓𑀢𑀲𑀸𑀫𑀜𑁆𑀜𑀁 𑀅𑀦𑀺𑀯𑀸𑀭𑁂𑀦𑁆𑀢𑁄 𑀓𑀼𑀲𑀮𑀸𑀓𑀼𑀲𑀮𑀕𑁆𑀕𑀳𑀡𑀜𑁆𑀘 𑀓𑀭𑁄𑀢𑀻𑀢𑀺 𑀘𑀯𑀦𑀧𑀭𑀺𑀬𑁄𑀲𑀸𑀦𑀜𑁆𑀘 𑀓𑀺𑀘𑁆𑀘𑀁. 𑀧𑀺-𑀲𑀤𑁆𑀤𑁂𑀦 𑀲𑀳𑀚𑀯𑀦𑀓𑀸𑀦𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀧𑀜𑁆𑀘𑀤𑁆𑀯𑀸𑀭𑁂 𑀧𑀝𑀺𑀲𑁂𑀥𑀦𑁂 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 ‘‘𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦…𑀧𑁂… 𑀧𑀲𑀦𑁆𑀦𑁂𑀦 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸’’𑀢𑀺 (𑀥. 𑀧. 𑁧-𑁨) 𑀏𑀯𑀁 𑀯𑀼𑀢𑁆𑀢𑀸 𑀪𑀸𑀲𑀦𑀓𑀭𑀡𑀓𑀭𑀸, 𑀢𑀁𑀲𑀤𑀺𑀲𑀸 𑀘 𑀲𑀼𑀔𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑀸 𑀩𑀮𑀯𑀦𑁆𑀢𑁄 𑀙𑀝𑁆𑀞𑀤𑁆𑀯𑀸𑀭𑀺𑀓𑀸 𑀏𑀯 𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀦 𑀢𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀧𑀝𑀺𑀯𑀺𑀚𑀸𑀦𑀦𑀁 𑀅𑀢𑁆𑀣𑀺, 𑀤𑀼𑀩𑁆𑀩𑀮𑀸𑀦𑀁 𑀧𑀦 𑀧𑀼𑀩𑁆𑀩𑀗𑁆𑀕𑀫𑀧𑀝𑀺𑀯𑀺𑀚𑀸𑀦𑀦𑀁 𑀢𑀢𑁆𑀣 𑀦 𑀧𑀝𑀺𑀲𑀺𑀤𑁆𑀥𑀁 ‘‘𑀦 𑀓𑀸𑀬𑀓𑀫𑁆𑀫𑀁 𑀦 𑀯𑀘𑀻𑀓𑀫𑁆𑀫𑀁 𑀧𑀝𑁆𑀞𑀧𑁂𑀢𑀻’’𑀢𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀚𑀦𑀓𑀲𑁆𑀲𑁂𑀯 𑀧𑀝𑁆𑀞𑀧𑀦𑀧𑀝𑀺𑀓𑁆𑀔𑁂𑀧𑁂𑀦 𑀤𑀼𑀩𑁆𑀩𑀮𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀢𑀣𑀸 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀓𑀼𑀲𑀮𑀓𑀫𑁆𑀫𑀁 𑀓𑀭𑁄𑀫𑀻𑀢𑀺, 𑀢𑀩𑁆𑀩𑀺𑀧𑀭𑀻𑀢𑀁 𑀅𑀓𑀼𑀲𑀮𑀁 𑀓𑀫𑁆𑀫𑀁 𑀓𑀭𑁄𑀫𑀻𑀢𑀺 𑀘 𑀓𑀼𑀲𑀮𑀸𑀓𑀼𑀲𑀮𑀲𑀫𑀸𑀤𑀸𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀦 𑀳𑁄𑀢𑀺. 𑀢𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀸 ‘‘𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀼𑀢𑀺 𑀘 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀳𑀺 𑀳𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀅𑀢𑀁𑀤𑁆𑀯𑀸𑀭𑀺𑀓𑀢𑁆𑀢𑀸’’𑀢𑀺. 𑀬𑀸 𑀧𑀦𑀸𑀬𑀁 𑀧𑀸𑀴𑀺 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺, 𑀢𑀲𑁆𑀲𑀸 𑀭𑀽𑀧𑀸𑀤𑀻𑀦𑀁 𑀆𑀧𑀸𑀣𑀫𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀓𑀜𑁆𑀘𑀺 𑀥𑀫𑁆𑀫𑀲𑀪𑀸𑀯𑀁 𑀦 𑀧𑀝𑀺𑀯𑀺𑀚𑀸𑀦𑀸𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀺𑀲𑁆𑀲𑀢𑀺. 𑀦 𑀳𑀺 𑀭𑀽𑀧𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀦𑁆𑀢𑀺 𑀘 𑀕𑀡𑁆𑀳𑀸𑀢𑀻𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀲𑁆𑀲𑀧𑀺 𑀭𑀽𑀧𑀦𑀻𑀮𑀸𑀤𑀺𑀆𑀓𑀸𑀭𑀧𑀝𑀺𑀯𑀺𑀚𑀸𑀦𑀦𑀁 𑀦𑀢𑁆𑀣𑀻𑀢𑀺 𑀓𑀺𑀜𑁆𑀘𑀺 𑀥𑀫𑁆𑀫𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀧𑀜𑁆𑀘𑀳𑀺 𑀧𑀦 𑀯𑀺𑀜𑁆𑀜𑀸𑀡𑁂𑀳𑀺 𑀲𑀸𑀢𑀺𑀲𑀬𑀁 𑀢𑀲𑁆𑀲 𑀯𑀺𑀚𑀸𑀦𑀦𑀦𑁆𑀢𑀺 ‘‘𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺 𑀦 𑀯𑀼𑀢𑁆𑀢𑀁. 𑀬𑀲𑁆𑀲 𑀧𑀸𑀴𑀺𑀬𑀁 𑀩𑀳𑀺𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸, 𑀢𑀢𑁄 𑀅𑀜𑁆𑀜𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀁 𑀇𑀘𑁆𑀙𑀦𑁆𑀢𑁂𑀳𑀺 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀲𑁆𑀲 𑀲𑀳𑀼𑀧𑁆𑀧𑀢𑁆𑀢𑀺 𑀧𑀝𑀺𑀲𑀺𑀤𑁆𑀥𑀸. 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀦 𑀧𑀝𑀺𑀩𑀼𑀚𑁆𑀛𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀭𑀽𑀧𑀸𑀤𑀻𑀦𑀁 𑀆𑀧𑀸𑀣𑀕𑀫𑀦𑁂 𑀦𑀺𑀤𑁆𑀤𑀸𑀧𑀝𑀺𑀩𑁄𑀥𑁄 𑀳𑁄𑀢𑀻𑀢𑀺? 𑀦, 𑀧𑀞𑀫𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀧𑀮𑁄𑀪𑁂𑀢𑁆𑀯𑀸 𑀲𑀘𑁆𑀘𑀲𑀼𑀧𑀺𑀦𑁂𑀦.

𑀅𑀩𑁆𑀬𑀸𑀓𑀢𑁄𑀬𑁂𑀯 𑀆𑀯𑀚𑁆𑀚𑀦𑀫𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀯𑀤𑀦𑁆𑀢𑁂𑀳𑀺 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀯𑀚𑁆𑀚𑀦𑀁 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲𑀸 𑀏𑀯 𑀯𑀲𑁂𑀦𑀸𑀢𑀺 𑀢𑀲𑁆𑀲𑀸 𑀯𑀲𑁂𑀦 𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼 𑀳𑁄𑀢𑀻𑀢𑀺 𑀘, 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀘 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁨.) 𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁭. 𑀅𑀢𑁆𑀣-𑀲𑀤𑁆𑀤𑁄 𑀅𑀜𑁆𑀜𑀢𑁆𑀭 𑀲𑀪𑀸𑀯𑀁 𑀕𑀳𑁂𑀢𑁆𑀯𑀸 𑀅𑀥𑀺𑀓𑀭𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑁄 𑀅𑀥𑀺𑀓𑀭𑀡𑀯𑀲𑁂𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀚𑀸𑀧𑀺𑀢𑀸 𑀘 𑀲𑀸 𑀅𑀢𑁆𑀣𑀸 𑀘𑀸𑀢𑀺 𑀚𑀸𑀧𑀺𑀢𑀢𑁆𑀣𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁩.) 𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁬𑁮. 𑀧𑀜𑁆𑀜𑀸𑀧𑀭𑀺𑀡𑀸𑀫𑀺𑀢𑁂𑀲𑀽𑀢𑀺 𑀧𑀜𑁆𑀜𑀸𑀬 𑀧𑀭𑀺𑀧𑀸𑀘𑀺𑀢𑁂𑀲𑀼. ‘‘𑀬𑁄𑀕𑀯𑀺𑀳𑀺𑀢𑁂𑀲𑀽𑀢𑀺 𑀇𑀤𑀜𑁆𑀘 𑀯𑀺𑀲𑀬𑀯𑀺𑀲𑁂𑀲𑀦𑀫𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀬𑀸𑀦𑀺 𑀧𑀜𑁆𑀜𑀸𑀬 𑀯𑀺𑀳𑀺𑀢𑀸𑀦𑀺 𑀅𑀳𑁂𑀲𑀼𑀁 𑀳𑁄𑀦𑁆𑀢𑀺 𑀪𑀯𑀺𑀲𑁆𑀲𑀦𑁆𑀢𑀺 𑀘, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀬𑁄𑀕𑀯𑀺𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑀺𑀓𑁆𑀔𑀺𑀢𑁆𑀯𑀸 𑀓𑀸𑀢𑀩𑁆𑀩𑀁 𑀲𑀺𑀧𑁆𑀧𑀁, 𑀇𑀢𑀭𑀁 𑀓𑀫𑁆𑀫𑀁. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀯𑀟𑁆𑀠𑀓𑀻𑀓𑀫𑁆𑀫𑀦𑁆𑀢𑀺 𑀘 𑀅𑀲𑀺𑀓𑁆𑀔𑀺𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁 𑀣𑀽𑀮𑀓𑀫𑁆𑀫𑀁 ‘‘𑀓𑀫𑁆𑀫’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀧𑀜𑁆𑀜𑀸 𑀏𑀯 𑀯𑀸 𑀢𑀢𑁆𑀣 𑀢𑀢𑁆𑀣 ‘‘𑀓𑀫𑁆𑀫𑀁 𑀲𑀺𑀧𑁆𑀧’’𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀦𑀸𑀕𑀫𑀡𑁆𑀟𑀮𑀁 𑀦𑀸𑀫 𑀫𑀡𑁆𑀟𑀮𑀁 𑀓𑀢𑁆𑀯𑀸 𑀲𑀧𑁆𑀧𑁂 𑀯𑀺𑀚𑁆𑀚𑀸𑀬 𑀧𑀓𑁆𑀓𑁄𑀲𑀺𑀢𑁆𑀯𑀸 𑀩𑀮𑀺𑀁 𑀤𑀢𑁆𑀯𑀸 𑀯𑀺𑀲𑀸𑀧𑀦𑀬𑀦𑀁. 𑀧𑀭𑀺𑀢𑁆𑀢𑀁 𑀭𑀓𑁆𑀔𑀸, 𑀬𑁂𑀦 ‘‘𑀨𑀽’’𑀢𑀺 𑀫𑀼𑀔𑀯𑀸𑀢𑀁 𑀤𑀢𑁆𑀯𑀸 𑀯𑀺𑀲𑀁 𑀅𑀧𑀦𑀬𑀦𑁆𑀢𑀺, 𑀲𑁄 𑀉𑀡𑁆𑀡𑀦𑀸𑀪𑀺𑀆𑀤𑀺𑀫𑀦𑁆𑀢𑁄 𑀨𑀼𑀥𑀫𑀦𑀓𑀫𑀦𑁆𑀢𑁄. ‘‘𑀅 𑀆’’𑀢𑀺𑀆𑀤𑀺𑀓𑀸 𑀫𑀸𑀢𑀺𑀓𑀸 ‘‘𑀓 𑀓𑀸’’𑀢𑀺𑀆𑀤𑀺𑀓𑁄 𑀢𑀧𑁆𑀧𑀪𑁂𑀤𑁄 𑀘 𑀮𑁂𑀔𑀸.

𑀓𑀼𑀲𑀮𑀁 𑀥𑀫𑁆𑀫𑀁 𑀲𑀓𑀁, 𑀇𑀢𑀭𑀁 𑀦𑁄𑀲𑀓𑀁. 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀸𑀦𑀁 𑀢𑀧𑁆𑀧𑀝𑀺𑀯𑁂𑀥𑀧𑀘𑁆𑀘𑀬𑀪𑀸𑀯𑁂𑀦 𑀅𑀦𑀼𑀮𑁄𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀼𑀩𑁆𑀩𑁂 ‘‘𑀬𑁄𑀕𑀯𑀺𑀳𑀺𑀢𑁂𑀲𑀼 𑀯𑀸 𑀓𑀫𑁆𑀫𑀸𑀬𑀢𑀦𑁂𑀲𑀽’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀸 𑀯𑀼𑀢𑁆𑀢𑀸, 𑀧𑀼𑀦 𑀢𑀲𑁆𑀲𑀸 𑀯𑁂𑀯𑀘𑀦𑀯𑀲𑁂𑀦 ‘‘𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀦𑀼…𑀧𑁂… 𑀧𑀜𑁆𑀜𑀸𑀯𑁂𑀯𑀘𑀦𑀸𑀦𑀻’’𑀢𑀺 𑀆𑀳. 𑀏𑀢𑁆𑀣 𑀘 𑀏𑀯𑀭𑀽𑀧𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀸𑀬𑀢𑀦𑀸𑀤𑀺𑀯𑀺𑀲𑀬𑀁 𑀓𑀫𑁆𑀫𑀲𑁆𑀲𑀓𑀢𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀲𑀪𑀸𑀯𑀁 𑀅𑀦𑀺𑀘𑁆𑀘𑀸𑀤𑀺𑀧𑀯𑀢𑁆𑀢𑀺𑀆𑀓𑀸𑀭𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀸 𑀘 𑀪𑀽𑀫𑀺𑀲𑀪𑀸𑀯𑀧𑀯𑀢𑁆𑀢𑀺𑀆𑀓𑀸𑀭𑀦𑀺𑀤𑁆𑀤𑁂𑀲𑀸 𑀔𑀦𑁆𑀢𑀺𑀆𑀤𑀻𑀳𑀺 𑀬𑁄𑀚𑁂𑀢𑀩𑁆𑀩𑀸. 𑀬𑀲𑁆𑀲𑀸 𑀧𑀜𑁆𑀜𑀸𑀬 𑀥𑀫𑁆𑀫𑀸 𑀦𑀺𑀚𑁆𑀛𑀸𑀦𑀧𑀚𑀸𑀦𑀦𑀓𑀺𑀘𑁆𑀘𑀲𑀗𑁆𑀔𑀸𑀢𑀁 𑀑𑀮𑁄𑀓𑀦𑀁 𑀔𑀫𑀦𑁆𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸, 𑀲𑀸 𑀧𑀜𑁆𑀜𑀸 𑀥𑀫𑁆𑀫𑀸𑀦𑀁 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁭𑁬𑁯. 𑀅𑀲𑀁𑀯𑀭𑀁 𑀫𑀼𑀜𑁆𑀘𑀢𑀻𑀢𑀺 𑀲𑀫𑀸𑀤𑀸𑀦𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸 ‘‘𑀲𑀻𑀮𑀁 𑀧𑀽𑀭𑁂𑀦𑁆𑀢𑀲𑁆𑀲 𑀫𑀼𑀜𑁆𑀘𑀘𑁂𑀢𑀦𑀸’’𑀢𑀺 𑀯𑀼𑀢𑁆𑀢𑀸. 𑀧𑀼𑀩𑁆𑀩𑀸𑀧𑀭𑀧𑀜𑁆𑀜𑀸𑀬 𑀘 𑀤𑀸𑀦𑀲𑀻𑀮𑀫𑀬𑀢𑀸𑀯𑀘𑀦𑀢𑁄 𑀫𑀼𑀜𑁆𑀘𑀅𑀧𑀭𑀘𑁂𑀢𑀦𑀸𑀯𑀲𑁂𑀦 ‘‘𑀆𑀭𑀩𑁆𑀪𑀸’’𑀢𑀺, 𑀧𑀼𑀩𑁆𑀩𑀘𑁂𑀢𑀦𑀸𑀯𑀲𑁂𑀦 ‘‘𑀅𑀥𑀺𑀓𑀺𑀘𑁆𑀘𑀸’’𑀢𑀺 𑀘 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 ‘‘𑀅𑀥𑀺𑀓𑀺𑀘𑁆𑀘𑀸’’𑀢𑀺𑀧𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺.

𑁭𑁭𑁦. 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀦𑀺 𑀯𑀺𑀜𑁆𑀜𑀸𑀡𑀲𑁆𑀲 𑀚𑀸𑀢𑀺𑀬𑀸 𑀘 𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀗𑁆𑀔𑀸𑀭𑀪𑀯𑁂𑀲𑀼 𑀅𑀦𑁆𑀢𑁄𑀕𑀥𑀸𑀦𑀻𑀢𑀺 ‘‘𑀉𑀧𑁆𑀧𑀸𑀤𑀸 𑀯𑀸’’𑀢𑀺𑀆𑀤𑀺𑀓𑀸𑀬 𑀥𑀫𑁆𑀫𑀝𑁆𑀞𑀺𑀢𑀺𑀧𑀸𑀴𑀺𑀬𑀸 𑀲𑀗𑁆𑀕𑀳𑀺𑀢𑀸𑀦𑀺. 𑀪𑀯𑀦𑀺𑀩𑁆𑀩𑀢𑁆𑀢𑀓𑀲𑀻𑀮𑀲𑁆𑀲 𑀧𑀜𑁆𑀜𑀸𑀧𑀦𑀁 𑀲𑀢𑀺𑀧𑀺 𑀲𑀯𑀦𑁂 𑀦 𑀢𑀣𑀸𑀕𑀢𑀤𑁂𑀲𑀦𑀸𑀬𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀆𑀤𑀻𑀦𑀫𑁆𑀧𑀺 𑀢𑀁 𑀯𑀼𑀢𑁆𑀢𑀁.

𑀅𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀸𑀢𑀺 𑀅𑀥𑀺𑀧𑀜𑁆𑀜𑀸𑀬 𑀅𑀦𑁆𑀢𑁄𑀕𑀥𑀸 𑀧𑀜𑁆𑀜𑀸. 𑀅𑀣 𑀯𑀸 𑀅𑀥𑀺𑀧𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑁂𑀲𑀼, 𑀢𑀤𑀥𑀺𑀝𑁆𑀞𑀸𑀦𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀅𑀥𑀺𑀧𑀜𑁆𑀜𑀸-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀢𑀢𑁆𑀣 𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀸.

𑁭𑁭𑁧. 𑀅𑀧𑀸𑀬𑀼𑀧𑁆𑀧𑀸𑀤𑀦𑀓𑀼𑀲𑀮𑀢𑀸 𑀅𑀧𑀸𑀬𑀓𑁄𑀲𑀮𑁆𑀮𑀁 𑀲𑀺𑀬𑀸𑀢𑀺 𑀫𑀜𑁆𑀜𑀫𑀸𑀦𑁄 𑀧𑀼𑀘𑁆𑀙𑀢𑀺 ‘‘𑀅𑀧𑀸𑀬𑀓𑁄𑀲𑀮𑁆𑀮𑀁 𑀓𑀣𑀁 𑀧𑀜𑁆𑀜𑀸 𑀦𑀸𑀫 𑀚𑀸𑀢𑀸’’𑀢𑀺. 𑀢𑀁 𑀧𑀦 𑀧𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀧𑀜𑁆𑀜𑀯𑀸𑀬𑁂𑀯 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀼𑀧𑀸𑀬𑀸𑀢𑀺 𑀢𑀢𑁆𑀭 𑀢𑀢𑁆𑀭 𑀉𑀧𑀸𑀬𑀪𑀽𑀢𑀸. 𑀞𑀸𑀦𑁂 𑀉𑀧𑁆𑀧𑀢𑁆𑀢𑀺 𑀏𑀢𑀲𑁆𑀲𑀸𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀁. 𑀓𑀺𑀁 𑀢𑀁? 𑀓𑀸𑀭𑀡𑀚𑀸𑀦𑀦𑀁, 𑀪𑀬𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀔𑀡𑁂 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀮𑀳𑀼𑀉𑀧𑁆𑀧𑀚𑁆𑀚𑀦𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀺𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁪.) 𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁭𑁯𑁩. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 ‘‘𑀅𑀧𑀺 𑀦𑀸𑀫 𑀫𑁂 𑀢𑀡𑁆𑀟𑀼𑀮𑀸𑀤𑀻𑀦𑀺 𑀲𑀺𑀬𑀼’’𑀦𑁆𑀢𑀺 𑀦 𑀧𑀢𑁆𑀣𑁂𑀢𑀺, 𑀢𑀤𑀪𑀸𑀯𑁂𑀦 𑀯𑀸 𑀦 𑀉𑀢𑁆𑀢𑀲𑀢𑀺.

𑁭𑁯𑁬. 𑀅𑀧𑀭𑀧𑁆𑀧𑀘𑁆𑀘𑀬𑁂𑀢𑀺 𑀧𑀭𑁂𑀦 𑀦𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑁂. 𑀥𑀫𑁆𑀫𑁂 𑀜𑀸𑀡𑀦𑁆𑀢𑀺 𑀲𑀘𑁆𑀘𑀯𑀺𑀲𑀬𑀁 𑀜𑀸𑀡𑀁. 𑀅𑀭𑀺𑀬𑀲𑀘𑁆𑀘𑁂𑀲𑀼 𑀳𑀺 𑀥𑀫𑁆𑀫-𑀲𑀤𑁆𑀤𑁄 𑀢𑁂𑀲𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸𑀢𑀺. 𑀲𑀗𑁆𑀔𑀢𑀧𑀯𑀭𑁄 𑀯𑀸 𑀅𑀭𑀺𑀬𑀫𑀕𑁆𑀕𑁄 𑀢𑀲𑁆𑀲 𑀘 𑀨𑀮𑀁 𑀥𑀫𑁆𑀫𑁄, 𑀢𑀢𑁆𑀣 𑀧𑀜𑁆𑀜𑀸 𑀢𑀁𑀲𑀳𑀕𑀢𑀸 𑀥𑀫𑁆𑀫𑁂 𑀜𑀸𑀡𑀁. 𑀦 𑀅𑀜𑁆𑀜𑀜𑀸𑀡𑀼𑀧𑁆𑀧𑀸𑀤𑀦𑀁 𑀦𑀬𑀦𑀬𑀦𑀁, 𑀜𑀸𑀡𑀲𑁆𑀲𑁂𑀯 𑀧𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀓𑀺𑀘𑁆𑀘’’𑀦𑁆𑀢𑀺. 𑀏𑀢𑁆𑀣 𑀘 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀤𑀼𑀯𑀺𑀥𑀫𑁆𑀧𑀺 𑀧𑀦 𑀫𑀕𑁆𑀕𑀨𑀮𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀘 𑀫𑀽𑀮𑀁, 𑀓𑀸𑀭𑀡𑀜𑁆𑀘 𑀦𑀬𑀦𑀬𑀦𑀲𑁆𑀲𑀸𑀢𑀺 𑀤𑀼𑀯𑀺𑀥𑁂𑀦𑀧𑀺 𑀢𑁂𑀦 𑀥𑀫𑁆𑀫𑁂𑀦𑀸𑀢𑀺 𑀦 𑀦 𑀬𑀼𑀚𑁆𑀚𑀢𑀺, 𑀢𑀣𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀢𑀢𑁆𑀢𑀸, 𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀲𑀘𑁆𑀘𑀧𑀝𑀺𑀯𑁂𑀥𑀲𑀫𑁆𑀧𑀬𑁄𑀕𑀁 𑀕𑀢𑀢𑁆𑀢𑀸 𑀦𑀬𑀦𑀁 𑀳𑁄𑀢𑀻𑀢𑀺 𑀢𑁂𑀦 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀜𑀸𑀡𑀯𑀺𑀲𑀬𑀪𑀸𑀯𑁂𑀦, 𑀜𑀸𑀡𑀲𑀫𑁆𑀧𑀬𑁄𑀕𑁂𑀦 𑀯𑀸 𑀜𑀸𑀢𑁂𑀦𑀸𑀢𑀺 𑀘 𑀅𑀢𑁆𑀣𑁄 𑀦 𑀦 𑀬𑀼𑀚𑁆𑀚𑀢𑀺.

𑀬𑀤𑀺𑀧𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀪𑀺𑀚𑀸𑀦𑀦𑁆𑀢𑀺, 𑀢𑀣𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀲𑀯𑀺𑀲𑁂𑀲𑁂 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀦 𑀢𑀜𑁆𑀜𑁂𑀯 𑀇𑀫’’𑀦𑁆𑀢𑀺. 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑁂𑀦 𑀦𑀬𑀢𑁄 𑀦𑀬𑀦𑀜𑀸𑀡𑀁, 𑀅𑀤𑀺𑀝𑁆𑀞𑀲𑁆𑀲 𑀤𑀺𑀝𑁆𑀞𑀢𑀸𑀬 𑀓𑀸𑀭𑀡𑀪𑀽𑀢𑀢𑁆𑀢𑀸 𑀓𑀸𑀭𑀡𑀜𑀸𑀡𑀁, 𑀅𑀦𑀼𑀭𑀽𑀧𑀢𑁆𑀣𑀯𑀸𑀘𑀓𑁄 𑀯𑀸 𑀓𑀸𑀭𑀡-𑀲𑀤𑁆𑀤𑁄𑀢𑀺 𑀥𑀫𑁆𑀫𑁂 𑀜𑀸𑀡𑀲𑁆𑀲 𑀅𑀦𑀼𑀭𑀽𑀧𑀜𑀸𑀡𑀦𑁆𑀢𑀺 𑀅𑀢𑁆𑀣𑁄.

𑀲𑀫𑁆𑀫𑀼𑀢𑀺𑀫𑁆𑀳𑀺 𑀜𑀸𑀡𑀦𑁆𑀢𑀺 𑀥𑀫𑁆𑀫𑁂 𑀜𑀸𑀡𑀸𑀤𑀻𑀦𑀁 𑀯𑀺𑀬 𑀲𑀸𑀢𑀺𑀲𑀬𑀲𑁆𑀲 𑀧𑀝𑀺𑀯𑁂𑀥𑀓𑀺𑀘𑁆𑀘𑀲𑁆𑀲 𑀅𑀪𑀸𑀯𑀸 𑀯𑀺𑀲𑀬𑁄𑀪𑀸𑀲𑀦𑀫𑀢𑁆𑀢𑀚𑀸𑀦𑀦𑀲𑀸𑀫𑀜𑁆𑀜𑁂𑀦 𑀜𑀸𑀡𑀦𑁆𑀢𑀺 𑀲𑀫𑁆𑀫𑀢𑁂𑀲𑀼 𑀅𑀦𑁆𑀢𑁄𑀕𑀥𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀧𑀯𑀢𑁆𑀢𑀁 𑀲𑀫𑁆𑀫𑀼𑀢𑀺𑀫𑁆𑀳𑀺 𑀜𑀸𑀡𑀁, 𑀅𑀯𑀲𑁂𑀲𑀁 𑀧𑀦 𑀇𑀢𑀭𑀜𑀸𑀡𑀢𑁆𑀢𑀬𑀯𑀺𑀲𑀪𑀸𑀕𑀁 𑀜𑀸𑀡𑀁 𑀢𑀩𑁆𑀩𑀺𑀲𑀪𑀸𑀕𑀲𑀸𑀫𑀜𑁆𑀜𑁂𑀦 𑀲𑀫𑁆𑀫𑀼𑀢𑀺𑀜𑀸𑀡𑀫𑁆𑀳𑀺 𑀧𑀯𑀺𑀝𑁆𑀞𑀢𑁆𑀢𑀸 𑀲𑀫𑁆𑀫𑀼𑀢𑀺𑀜𑀸𑀡𑀁 𑀦𑀸𑀫 𑀳𑁄𑀢𑀻𑀢𑀺.

𑁭𑁯𑁭. 𑀓𑀺𑀮𑁂𑀲𑀫𑀽𑀮𑀓𑁂 𑀘𑀸𑀢𑀺 𑀦𑀻𑀯𑀭𑀡𑀫𑀽𑀮𑀓𑁂 𑀘 𑀓𑀸𑀫𑀪𑀯𑀥𑀫𑁆𑀫𑁂.

𑁭𑁯𑁮. 𑀲𑀸 𑀳𑀺𑀲𑁆𑀲𑀸𑀢𑀺 𑀏𑀢𑁆𑀣 𑀅𑀲𑁆𑀲𑀸𑀢𑀺 𑀬𑁄 ‘‘𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀳𑁄𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁄, 𑀅𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁆𑀯𑁂𑀯𑀸𑀢𑀺 𑀏𑀢𑁂𑀦 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑀪𑀸𑀯𑀦𑀸𑀯𑀢𑁆𑀣𑀲𑁆𑀲𑁂𑀯 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀺𑀲𑁆𑀲 𑀕𑀳𑀡𑁂 𑀧𑀯𑀢𑁆𑀢𑁂 𑀢𑀲𑁆𑀲 𑀢𑀢𑁄 𑀧𑀭𑀁 𑀅𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁄 𑀲𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀸 𑀙𑀝𑁆𑀞𑀸𑀪𑀺𑀜𑁆𑀜𑀸𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀁 𑀧𑀝𑀺𑀯𑀺𑀚𑁆𑀛𑀢𑀺 𑀦𑀸𑀫, 𑀇𑀢𑀭𑀸 𑀢𑀤𑀼𑀧𑀦𑀺𑀲𑁆𑀲𑀬𑀢𑁆𑀢𑀸. 𑀬𑀣𑀸𑀦𑀼𑀭𑀽𑀧𑀁 𑀯𑀸 𑀆𑀲𑀯𑀓𑁆𑀔𑀬𑀪𑀸𑀯𑀢𑁄, 𑀨𑀮𑁂 𑀯𑀸 𑀆𑀲𑀯𑀓𑁆𑀔𑀬𑁂 𑀲𑀢𑀺 𑀬𑀣𑀸𑀦𑀼𑀭𑀽𑀧𑀁 𑀢𑀁𑀦𑀺𑀩𑁆𑀩𑀢𑁆𑀢𑀦𑀢𑁄 𑀘𑀢𑀽𑀲𑀼𑀧𑀺 𑀫𑀕𑁆𑀕𑁂𑀲𑀼 𑀧𑀜𑁆𑀜𑀸 𑀙𑀝𑁆𑀞𑀁 𑀅𑀪𑀺𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑁭𑁯𑁯. 𑀓𑀸𑀫𑀲𑀳𑀕𑀢𑀸𑀢𑀺 𑀯𑀢𑁆𑀣𑀼𑀓𑀸𑀫𑀸𑀭𑀫𑁆𑀫𑀡𑀸. 𑀘𑁄𑀤𑁂𑀦𑁆𑀢𑀻𑀢𑀺 𑀓𑀸𑀫𑀸𑀪𑀺𑀫𑀼𑀔𑀁 𑀢𑀦𑁆𑀦𑀺𑀦𑁆𑀦𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀥𑀫𑁆𑀫𑀸 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸-𑀲𑀤𑁆𑀤𑀲𑁆𑀲 𑀅𑀧𑀼𑀩𑁆𑀩𑀢𑁆𑀣𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀢𑀤𑀦𑀼𑀭𑀽𑀧𑀲𑀪𑀸𑀯𑀸’’𑀢𑀺. 𑀦𑀺𑀓𑀦𑁆𑀢𑀺𑀁, 𑀦𑀺𑀓𑀦𑁆𑀢𑀺𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀯𑀸 ‘‘𑀫𑀺𑀘𑁆𑀙𑀸𑀲𑀢𑀻’’𑀢𑀺 𑀯𑀤𑀢𑀺. ‘‘𑀅𑀳𑁄 𑀯𑀢 𑀫𑁂 𑀅𑀯𑀺𑀢𑀓𑁆𑀓𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀯𑀺𑀢𑀓𑁆𑀓𑀸𑀭𑀫𑁆𑀫𑀡𑀸 𑀅𑀯𑀺𑀢𑀓𑁆𑀓𑀲𑀳𑀕𑀢𑀸.

𑁮𑁦𑁧. 𑀅𑀥𑀺𑀕𑀫𑀪𑀸𑀯𑁂𑀦 𑀅𑀪𑀺𑀫𑀼𑀔𑀁 𑀚𑀸𑀦𑀦𑁆𑀢𑀲𑁆𑀲 𑀅𑀪𑀺𑀚𑀸𑀦𑀦𑁆𑀢𑀲𑁆𑀲, 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀯𑀸 𑀜𑀸𑀡𑁂𑀦 𑀚𑀸𑀦𑀦𑁆𑀢𑀲𑁆𑀲, 𑀅𑀦𑀸𑀭𑀫𑁆𑀫𑀡𑀪𑀽𑀢𑀜𑁆𑀘 𑀢𑀁 𑀞𑀸𑀦𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁮𑁦𑁨. 𑀯𑀲𑀺𑀢𑀸𑀧𑀜𑁆𑀘𑀓𑀭𑀳𑀺𑀢𑀁 𑀛𑀸𑀦𑀁 𑀅𑀧𑁆𑀧𑀕𑀼𑀡𑀁. 𑀏𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸 𑀘𑀢𑁆𑀢𑀸𑀭𑀺 𑀆𑀭𑀫𑁆𑀫𑀡𑀸𑀦𑀻𑀢𑀺 𑀧𑀜𑁆𑀜𑀸𑀬 𑀧𑀝𑀺𑀧𑀤𑀸𑀭𑀫𑁆𑀫𑀡𑀼𑀤𑁆𑀤𑁂𑀲𑁂𑀦 𑀧𑀜𑁆𑀜𑀸 𑀏𑀯 𑀉𑀤𑁆𑀤𑀺𑀝𑁆𑀞𑀸𑀢𑀺 𑀲𑀸 𑀏𑀯 𑀯𑀺𑀪𑀢𑁆𑀢𑀸𑀢𑀺.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁫.) 𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁪. 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀲𑀫𑀸𑀥𑀺𑀅𑀗𑁆𑀕𑀪𑀸𑀯𑁂𑀦 𑀧𑀜𑁆𑀜𑀸 𑀉𑀤𑁆𑀤𑀺𑀝𑁆𑀞𑀸𑀢𑀺. 𑀧𑀻𑀢𑀺𑀨𑀭𑀡𑀢𑀸𑀤𑀺𑀯𑀘𑀦𑁂𑀦 𑀳𑀺 𑀢𑀫𑁂𑀯 𑀯𑀺𑀪𑀚𑀢𑀺, ‘‘𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁪𑁨𑁭) 𑀦𑀬𑁂𑀦 𑀧𑀻𑀢𑀺𑀬𑀸 𑀲𑀼𑀔𑀲𑁆𑀲 𑀘 𑀨𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀻𑀢𑀺𑀨𑀭𑀡𑀢𑀸𑀲𑀼𑀔𑀨𑀭𑀡𑀢𑀸𑀳𑀺 𑀆𑀭𑀫𑁆𑀫𑀡𑁂 𑀞𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀸𑀤𑀦𑀢𑁄 ‘‘𑀧𑀸𑀤𑀸 𑀯𑀺𑀬𑀸’’𑀢𑀺 𑀢𑀸 𑀯𑀼𑀢𑁆𑀢𑀸.

𑀤𑀼𑀢𑀺𑀬𑀧𑀜𑁆𑀘𑀓𑁂 𑀘 ‘‘𑀧𑀜𑁆𑀘𑀜𑀸𑀡𑀺𑀓𑁄’’𑀢𑀺 𑀲𑀫𑀸𑀥𑀺𑀫𑀼𑀔𑁂𑀦 𑀧𑀜𑁆𑀘𑀜𑀸𑀡𑀸𑀦𑁂𑀯 𑀉𑀤𑁆𑀤𑀺𑀝𑁆𑀞𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺 𑀘𑀸𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀮𑁄𑀓𑀺𑀬𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀦𑀻𑀓𑀸𑀦𑀺 𑀦𑀻𑀯𑀭𑀡𑀧𑀞𑀫𑀚𑁆𑀛𑀸𑀦𑀦𑀺𑀓𑀦𑁆𑀢𑀺𑀆𑀤𑀻𑀦𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀅𑀜𑁆𑀜𑁂 𑀓𑀺𑀮𑁂𑀲𑀸 𑀯𑀸𑀭𑁂𑀢𑀩𑁆𑀩𑀸, 𑀇𑀫𑀲𑁆𑀲 𑀧𑀦 𑀅𑀭𑀳𑀢𑁆𑀢𑀲𑀫𑀸𑀥𑀺𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑀁 𑀯𑀸𑀭𑁂𑀢𑀩𑁆𑀩𑀜𑁆𑀘 𑀅𑀢𑁆𑀣𑀻𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀘 𑀅𑀧𑁆𑀧𑀬𑁄𑀕𑁂𑀦𑁂𑀯 𑀅𑀥𑀺𑀕𑀢𑀢𑁆𑀢𑀸 𑀘 𑀞𑀧𑀺𑀢𑀢𑁆𑀢𑀸 𑀘, 𑀅𑀧𑀭𑀺𑀳𑀸𑀦𑀺𑀯𑀲𑁂𑀦 𑀞𑀧𑀺𑀢𑀢𑁆𑀢𑀸 𑀯𑀸 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄. 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑁆𑀢𑀸𑀢𑀺 𑀏𑀢𑁂𑀦 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀬𑀧𑀺 𑀲𑀢𑀺𑀬𑀸 𑀲𑀢𑀺𑀩𑀳𑀼𑀮𑀢𑀸𑀬 𑀲𑀢𑁄 𑀏𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑀸𑀢𑀺 𑀏𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀢𑀺𑀬𑀸 𑀲𑀢𑁄𑀢𑀺.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁬.) 𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁫. 𑀯𑀺𑀲𑀼𑀤𑁆𑀥𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀽𑀭…𑀧𑁂… 𑀭𑀫𑁆𑀫𑀡𑀸𑀬𑀸’’𑀢𑀺 𑀆𑀳. 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀻𑀢𑀺 𑀘 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀢𑀢𑁆𑀣 𑀜𑀸𑀡𑀁 𑀲𑁄𑀢𑀥𑀸𑀢𑀼𑀯𑀺𑀲𑀼𑀤𑁆𑀥𑀺𑀬𑀸 𑀜𑀸𑀡𑀁. ‘‘𑀘𑁂𑀢𑁄𑀧𑀭𑀺𑀬𑀜𑀸𑀡’’𑀦𑁆𑀢𑀺 𑀇𑀤𑀫𑁂𑀯 𑀅𑀢𑁆𑀣𑀯𑀲𑁂𑀦 ‘‘𑀧𑀭𑀘𑀺𑀢𑁆𑀢𑁂 𑀜𑀸𑀡’’𑀦𑁆𑀢𑀺 𑀉𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀓𑀤𑁂𑀲𑀢𑁆𑀢𑀸 ‘‘𑀯𑀡𑁆𑀡𑀥𑀸𑀢𑀼𑀆𑀭𑀫𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀁. 𑀫𑀼𑀤𑁆𑀥𑀧𑁆𑀧𑀢𑁆𑀢𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑀗𑁆𑀔𑀸𑀢𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀲𑀩𑁆𑀩𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀙𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁭.) 𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁬. 𑀢𑀤𑁂𑀯 𑀜𑀸𑀡𑀦𑁆𑀢𑀺 𑀙𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀭𑀫𑁆𑀫𑀡𑀪𑀸𑀯𑁂𑀦 𑀲𑀳 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦𑀸𑀢𑀺 𑀙𑀧𑀺 𑀜𑀸𑀡𑀸𑀦𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑁂𑀦 𑀜𑀸𑀡𑁂𑀦. 𑀔𑀬𑀥𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀳𑀺 𑀧𑀓𑀸𑀭𑁂𑀦 𑀧𑀯𑀢𑁆𑀢𑀜𑀸𑀡𑀲𑁆𑀲 𑀤𑀲𑁆𑀲𑀦𑀁, 𑀜𑀸𑀡𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑀸𑀢𑀺 𑀦 𑀢𑀁 𑀅𑀗𑁆𑀕𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 𑀧𑀦 𑀲𑀩𑁆𑀩𑀢𑁆𑀣 𑀜𑀸𑀡𑀯𑀘𑀦𑁂𑀦 𑀅𑀗𑁆𑀕𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡𑀦𑁆𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀧𑀓𑀸𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀢𑁆𑀢𑀫𑀁 𑀜𑀸𑀡𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀺𑀲𑁆𑀲𑀢𑀺. 𑀦 𑀳𑀺 𑀬𑀫𑁆𑀧𑀺 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀜𑀸𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺 𑀢𑀁𑀜𑀸𑀡𑀕𑁆𑀕𑀳𑀡𑁂 𑀏𑀢𑀲𑁆𑀫𑀺𑀁 𑀜𑀸𑀡𑀪𑀸𑀯𑀤𑀲𑁆𑀲𑀦𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, ‘‘𑀔𑀬𑀥𑀫𑁆𑀫𑀁…𑀧𑁂… 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀏𑀢𑁂𑀲𑀁 𑀲𑀫𑁆𑀩𑀦𑁆𑀥𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘𑀸𑀢𑀺.

𑀲𑀢𑁆𑀢𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁮.) 𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁮. 𑀯𑀺𑀳𑀸𑀭𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂, 𑀤𑀼𑀓𑁆𑀔𑀁 𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀝𑁆𑀞𑁂𑀦.

𑀅𑀝𑁆𑀞𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

(𑁧𑁦.) 𑀤𑀲𑀓𑀦𑀺𑀤𑁆𑀤𑁂𑀲𑁄

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁦𑁯. 𑀅𑀯𑀺𑀚𑁆𑀚𑀫𑀸𑀦𑀁 𑀞𑀸𑀦𑀁 𑀅𑀝𑁆𑀞𑀸𑀦𑀁, 𑀦𑀢𑁆𑀣𑀺 𑀞𑀸𑀦𑀦𑁆𑀢𑀺 𑀯𑀸 𑀅𑀝𑁆𑀞𑀸𑀦𑀁. 𑀏𑀲 ‘‘𑀅𑀦𑀯𑀓𑀸𑀲𑁄’’𑀢𑀺 𑀏𑀢𑁆𑀣𑀸𑀧𑀺 𑀦𑀬𑁄. 𑀢𑀤𑀢𑁆𑀣𑀦𑀺𑀕𑀫𑀦𑀫𑀢𑁆𑀢𑀫𑁂𑀯 𑀳𑀺 ‘‘𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀦𑁆𑀢𑀺. 𑀅𑀲𑀼𑀔𑁂 𑀲𑀼𑀔𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀯 𑀇𑀥 𑀲𑀼𑀔𑀢𑁄 𑀉𑀧𑀕𑀫𑀦𑀲𑁆𑀲 𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀦𑁆𑀢…𑀧𑁂… 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺 𑀧𑀥𑀸𑀦𑀤𑀺𑀝𑁆𑀞𑀺𑀫𑀸𑀳. 𑀪𑁂𑀤𑀸𑀦𑀼𑀭𑀽𑀧𑀲𑁆𑀲 𑀲𑀸𑀯𑀦𑀁 𑀅𑀦𑀼𑀲𑁆𑀲𑀸𑀯𑀦𑀁, 𑀪𑁂𑀤𑀸𑀦𑀼𑀭𑀽𑀧𑁂𑀦 𑀯𑀸 𑀯𑀘𑀦𑁂𑀦 𑀯𑀺𑀜𑁆𑀜𑀸𑀧𑀦𑀁.

𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀘 𑀲𑁄 𑀏𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀢𑁄 𑀪𑀯𑀗𑁆𑀕𑀧𑁆𑀧𑀩𑀦𑁆𑀥𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑁄 𑀘, 𑀦𑀸𑀜𑁆𑀜𑁄𑀢𑀺 𑀆𑀳 ‘‘𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕’’𑀦𑁆𑀢𑀺. 𑀅𑀬𑀁 𑀧𑀜𑁆𑀳𑁄𑀢𑀺 𑀜𑀸𑀧𑀦𑀺𑀘𑁆𑀙𑀸𑀦𑀺𑀩𑁆𑀩𑀢𑁆𑀢𑀸 𑀓𑀣𑀸.

𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁 𑀲𑀧𑀢𑁆𑀢𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀘 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁, 𑀯𑀥𑀓𑀘𑀺𑀢𑁆𑀢𑀁 𑀧𑀦 𑀢𑀤𑀸𑀭𑀫𑁆𑀫𑀡𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀦𑀦𑁆𑀢𑀭𑀺𑀬𑀸𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀺. 𑀓𑀲𑁆𑀫𑀸? 𑀬𑀣𑀸 𑀯𑀥𑀓𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀯𑀲𑁂𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦 𑀏𑀯𑀁 𑀘𑀸𑀕𑀘𑁂𑀢𑀦𑀸. 𑀲𑀸 𑀳𑀺 𑀘𑀚𑀺𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀚𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀲𑀓𑀓𑀭𑀡𑀜𑁆𑀘 𑀢𑀲𑁆𑀲 𑀘𑀚𑀦𑀁, 𑀢𑀲𑁆𑀫𑀸 𑀬𑀲𑁆𑀲 𑀢𑀁 𑀲𑀓𑀁 𑀓𑀢𑀁, 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺.

𑀲𑀡𑁆𑀞…𑀧𑁂… 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀓𑀧𑁆𑀧𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁬𑁫𑁪-𑁬𑁫𑁭) 𑀯𑀼𑀢𑁆𑀢𑀁 ‘‘𑀆𑀧𑀸𑀬𑀺𑀓𑁄𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀬𑀁 𑀲𑁄 𑀏𑀓𑀁 𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀢𑀺𑀝𑁆𑀞𑁂𑀬𑁆𑀬, 𑀢𑀁 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀧𑀦 𑀆𑀬𑀼𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀏𑀢𑁆𑀣 𑀘 𑀲𑀡𑁆𑀞𑀳𑀦𑁆𑀢𑁂𑀢𑀺 𑀇𑀤𑀁 𑀲𑁆𑀯𑁂 𑀯𑀺𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀯𑀺𑀬 𑀅𑀪𑀽𑀢𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀤𑀺𑀯𑀲𑀫𑁂𑀯 𑀧𑀘𑁆𑀘𑀢𑀺 𑀢𑀢𑁄 𑀧𑀭𑀁 𑀓𑀧𑁆𑀧𑀸𑀪𑀸𑀯𑁂𑀦 𑀆𑀬𑀼𑀓𑀧𑁆𑀧𑀲𑁆𑀲𑀧𑀺 𑀅𑀪𑀸𑀯𑀢𑁄𑀢𑀺 𑀅𑀯𑀺𑀭𑁄𑀥𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀧𑀓𑀢𑀢𑁆𑀢𑁄𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄𑀢𑀺 𑀅𑀧𑀸𑀭𑀸𑀚𑀺𑀓𑁄.

𑀓𑀺𑀁 𑀧𑀦 𑀢𑀦𑁆𑀢𑀺 𑀬𑁄 𑀲𑁄 ‘‘𑀦𑀺𑀬𑀢𑁄’’𑀢𑀺 𑀯𑀼𑀢𑁆𑀢𑁄, 𑀢𑀁 𑀓𑀺𑀁 𑀦𑀺𑀬𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯 𑀧𑀦 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲 𑀦𑀺𑀬𑀢𑀲𑁆𑀲 𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀦𑀁 𑀯𑀺𑀬 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀢𑀁 𑀬𑀣𑀸𑀧𑀼𑀘𑁆𑀙𑀺𑀢𑀜𑁆𑀘 𑀦𑀺𑀬𑀸𑀫𑀓𑀳𑁂𑀢𑀼𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀬𑁂𑀦 ‘‘𑀦𑀺𑀬𑀢𑁄’’𑀢𑀺 ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀁 𑀬𑀣𑀸𑀥𑀺𑀧𑁆𑀧𑁂𑀢𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀚𑀸𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀯𑀺𑀬 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀲𑁆𑀲 𑀦𑀸𑀫𑀫𑀢𑁆𑀢𑀫𑁂𑀢𑀁 𑀦𑀺𑀬𑀢𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀓𑀁, 𑀦𑀺𑀬𑀢𑀸𑀦𑀺𑀬𑀢𑀪𑁂𑀤𑀁 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀸𑀫𑀓𑁄, 𑀲𑁄𑀢𑀸𑀧𑀦𑁆𑀦𑁄 𑀘 𑀦𑀺𑀬𑀢𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁄 𑀉𑀤𑁆𑀥𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀧𑀼𑀩𑁆𑀩𑀳𑁂𑀢𑀼𑀓𑀺𑀘𑁆𑀘𑀁, 𑀢𑀢𑁄 𑀧𑀼𑀩𑁆𑀩𑁂 𑀧𑀦 𑀧𑀼𑀩𑁆𑀩𑀳𑁂𑀢𑀼𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀸𑀪𑀸𑀯𑁄 𑀆𑀧𑀚𑁆𑀚𑀢𑀺. 𑀬𑀤𑀺 𑀳𑀺 𑀢𑀲𑁆𑀲𑀧𑀺 𑀧𑀼𑀩𑁆𑀩𑀳𑁂𑀢𑀼 𑀉𑀧𑀦𑀺𑀲𑁆𑀲𑀬𑁄 𑀲𑀺𑀬𑀸, 𑀲𑁄 𑀘 𑀦𑀺𑀬𑀸𑀫𑀓𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀏𑀯 𑀦𑀺𑀬𑀢𑁄 𑀲𑀺𑀬𑀸, 𑀢𑀜𑁆𑀘 𑀅𑀦𑀺𑀝𑁆𑀞𑀁, 𑀢𑀲𑁆𑀫𑀸𑀲𑁆𑀲 𑀧𑀼𑀩𑁆𑀩𑀳𑁂𑀢𑀼𑀦𑀸 𑀅𑀳𑁂𑀢𑀼𑀓𑀢𑀸 𑀆𑀧𑀦𑁆𑀦𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀘𑁆𑀘𑀲𑁆𑀲 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀧𑀝𑀺𑀮𑀤𑁆𑀥𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄, 𑀢𑁂𑀦𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀦𑀺𑀬𑀫𑁂 𑀲𑀢𑀺 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀸 𑀓𑀺𑀮𑁂𑀲𑀸 𑀢𑁂𑀦𑁂𑀯 𑀔𑀻𑀡𑀸𑀢𑀺 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀅𑀓𑀺𑀘𑁆𑀘𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀓𑀁 𑀦𑀺𑀬𑀫𑁂𑀦𑁆𑀢𑀺, 𑀢𑀢𑁄 𑀘 𑀅𑀜𑁆𑀜𑁄 𑀲𑁄𑀢𑀸𑀧𑀦𑁆𑀦𑁄 𑀦𑀢𑁆𑀣𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀅𑀓𑀺𑀘𑁆𑀘𑀓𑀢𑀸 𑀦𑀺𑀧𑁆𑀧𑀬𑁄𑀚𑀦𑀢𑀸 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀺𑀧𑁆𑀧𑀳𑀸𑀦𑀁 𑀤𑀲𑁆𑀲𑀦𑀓𑀺𑀘𑁆𑀘𑀁, 𑀢𑁂𑀲𑀁 𑀧𑀳𑀸𑀦𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀺𑀢𑀸𑀬 𑀪𑀯𑀺𑀢𑀩𑁆𑀩𑀁. 𑀲𑀸 𑀘𑀼𑀧𑀭𑀺𑀫𑀕𑁆𑀕𑁂𑀳𑀺 𑀏𑀯 𑀳𑁄𑀢𑀻𑀢𑀺 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀺𑀢𑁄 𑀢𑁂𑀦 𑀯𑀺𑀦𑀸 𑀯𑀼𑀝𑁆𑀞𑀸𑀦𑁂 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀢𑁂𑀦 𑀯𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀞𑀫𑀫𑀕𑁆𑀕𑁂𑀦 𑀘 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸𑀯 𑀓𑀺𑀮𑁂𑀲𑀸 𑀔𑁂𑀧𑁂𑀢𑀩𑁆𑀩𑀸 𑀳𑁄𑀦𑁆𑀢𑀻’’𑀢𑀺. 𑀦 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀬𑀫𑁂𑀢𑀻𑀢𑀺 𑀦𑀸𑀫𑀓𑀭𑀡𑀦𑀺𑀫𑀺𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑀸𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀦𑀺𑀬𑀸𑀫𑀓𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀯 𑀦𑀺𑀬𑀫𑁂𑀢𑀻𑀢𑀺 𑀘 𑀦𑀸𑀫𑀓𑀭𑀡𑀦𑀺𑀫𑀺𑀢𑁆𑀢𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀇𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀕𑀳𑀺𑀢𑀦𑀸𑀫𑀫𑀢𑁆𑀢𑀫𑁂𑀯 𑀢’’𑀦𑁆𑀢𑀺.

𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺𑀁 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀕𑀯𑀢𑀸 𑀲𑀫𑀲𑀫𑀸 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑀸𑀳𑀁, 𑀪𑀦𑁆𑀢𑁂, 𑀦𑁄𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧) 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 (𑀫. 𑀦𑀺. 𑁩.𑁧𑁨𑁯) 𑀇𑀫𑀁 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀫𑀸𑀢𑀺𑀓𑀸, 𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀦𑀺𑀤𑀸𑀦𑀼𑀤𑁆𑀤𑁂𑀲𑀲𑀗𑁆𑀔𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀢𑀺𑀫𑁄𑀓𑁆𑀔𑁂 𑀯𑀸 𑀅𑀦𑁆𑀢𑁄𑀕𑀥𑀸 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘 𑀢𑀤𑀼𑀪𑀬𑀸𑀪𑀸𑀯𑁂 𑀧𑀸𑀢𑀺𑀫𑁄𑀓𑁆𑀔𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑁂, 𑀢𑀸𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁. 𑀑𑀲𑀓𑁆𑀓𑀺𑀢𑀁 𑀦𑀸𑀫𑀸𑀢𑀺 𑀧𑀘𑁆𑀙𑀺𑀫𑀧𑀝𑀺𑀯𑁂𑀥𑀲𑀻𑀮𑀪𑁂𑀤𑀤𑁆𑀯𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀸𑀢𑀺 𑀭𑀲𑁆𑀫𑀺𑀬𑁄. 𑀓𑀸𑀭𑀼𑀜𑁆𑀜𑀦𑁆𑀢𑀺 𑀧𑀭𑀺𑀤𑁂𑀯𑀦𑀓𑀸𑀭𑀼𑀜𑁆𑀜𑀁.

𑀅𑀦𑀘𑁆𑀙𑀭𑀺𑀬𑀢𑁆𑀢𑀸𑀢𑀺 𑀤𑁆𑀯𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀘𑁆𑀙𑀭𑀺𑀬𑀢𑁆𑀢𑀸𑀪𑀸𑀯𑀤𑁄𑀲𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀯𑀸𑀤𑀪𑀸𑀯𑀢𑁄𑀢𑀺 𑀯𑀺𑀯𑀸𑀤𑀸𑀪𑀸𑀯𑀢𑁆𑀣𑀁 𑀤𑁆𑀯𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀏𑀓𑀁 𑀩𑀼𑀤𑁆𑀥𑀁 𑀥𑀸𑀭𑁂𑀢𑀻𑀢𑀺 𑀏𑀓𑀩𑀼𑀤𑁆𑀥𑀥𑀸𑀭𑀡𑀻. 𑀏𑀢𑁂𑀦 𑀏𑀯𑀁𑀲𑀪𑀸𑀯𑀸 𑀏𑀢𑁂 𑀩𑀼𑀤𑁆𑀥𑀕𑀼𑀡𑀸, 𑀬𑁂𑀦 𑀤𑀼𑀢𑀺𑀬𑀩𑀼𑀤𑁆𑀥𑀕𑀼𑀡𑁂 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑀸 𑀅𑀬𑀁 𑀮𑁄𑀓𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀺𑀲𑁂𑀲𑀦𑀺𑀧𑁆𑀨𑀦𑁆𑀦𑀸𑀦𑀜𑁆𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀲𑁂𑀲𑁄 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼𑀦𑁆𑀢𑀺. 𑀲𑀫𑀁 𑀉𑀤𑁆𑀥𑀁 𑀧𑀚𑁆𑀚𑀢𑀻𑀢𑀺 𑀲𑀫𑀼𑀧𑀸𑀤𑀺𑀓𑀸, 𑀉𑀤𑀓𑀲𑁆𑀲𑁄𑀧𑀭𑀺 𑀲𑀫𑀁 𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀫𑁆𑀧𑀻𑀢𑀺 𑀤𑁆𑀯𑁂𑀧𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀲𑀭𑀻𑀭𑀪𑀸𑀭𑀁. 𑀙𑀸𑀤𑁂𑀦𑁆𑀢𑀦𑁆𑀢𑀺 𑀭𑁄𑀘𑀬𑀫𑀸𑀦𑀁. 𑀲𑀓𑀺𑀁 𑀪𑀼𑀢𑁆𑀢𑁄𑀯𑀸𑀢𑀺 𑀏𑀓𑀫𑁆𑀧𑀺 𑀆𑀮𑁄𑀧𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸𑀯 𑀫𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀢𑀺𑀥𑀫𑁆𑀫𑀪𑀸𑀭𑁂𑀦𑀸𑀢𑀺 𑀥𑀫𑁆𑀫𑁂𑀦 𑀦𑀸𑀫 𑀧𑀣𑀯𑀻 𑀢𑀺𑀝𑁆𑀞𑁂𑀬𑁆𑀬, 𑀲𑀸 𑀓𑀺𑀁 𑀢𑁂𑀦𑁂𑀯 𑀘𑀮𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀦 𑀣𑁂𑀭𑁄 ‘‘𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀓𑀼𑀝𑀼𑀫𑁆𑀩𑀁 𑀲𑀦𑁆𑀥𑀸𑀭𑁂𑀦𑁆𑀢𑀁 𑀅𑀪𑀺𑀫𑀢𑀜𑁆𑀘 𑀮𑁄𑀓𑁂𑀦 𑀅𑀢𑁆𑀢𑀦𑁄 𑀕𑀭𑀼𑀲𑀪𑀸𑀯𑀢𑀸𑀬 𑀲𑀓𑀝𑀪𑀗𑁆𑀕𑀲𑁆𑀲 𑀓𑀸𑀭𑀡𑀁 𑀅𑀢𑀺𑀪𑀸𑀭𑀪𑀽𑀢𑀁 𑀤𑀺𑀝𑁆𑀞𑀁. 𑀏𑀯𑀁 𑀥𑀫𑁆𑀫𑁄 𑀘 𑀳𑀺𑀢𑀲𑀼𑀔𑀯𑀺𑀲𑁂𑀲𑁂𑀳𑀺 𑀢𑀁𑀲𑀫𑀗𑁆𑀕𑀺𑀦𑀁 𑀥𑀸𑀭𑁂𑀦𑁆𑀢𑁄 𑀅𑀪𑀺𑀫𑀢𑁄 𑀘 𑀯𑀺𑀜𑁆𑀜𑀽𑀳𑀺 𑀕𑀫𑁆𑀪𑀻𑀭𑀸𑀧𑁆𑀧𑀫𑁂𑀬𑁆𑀬𑀪𑀸𑀯𑁂𑀦 𑀕𑀭𑀼𑀲𑀪𑀸𑀯𑀢𑁆𑀢𑀸 𑀅𑀢𑀺𑀪𑀸𑀭𑀪𑀽𑀢𑁄 𑀧𑀣𑀯𑀻𑀘𑀮𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸’’𑀢𑀺𑀆𑀤𑀺𑀫𑀸𑀳. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀫𑀸, 𑀏𑀓𑀲𑁆𑀲 𑀯𑀸 𑀲𑀓𑀝𑀲𑁆𑀲 𑀭𑀢𑀦𑀁, 𑀢𑀲𑁆𑀫𑀸 𑀲𑀓𑀝𑀢𑁄 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀑𑀲𑀸𑀭𑀺𑀢𑀦𑁆𑀢𑀺 𑀧𑀯𑁂𑀲𑀺𑀢𑀁 𑀆𑀳𑀝𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀪𑀸𑀯𑀧𑀓𑀢𑀺𑀓𑀸𑀢𑀺 𑀅𑀓𑀺𑀢𑁆𑀢𑀺𑀫𑀧𑀓𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀫𑀳𑀦𑁆𑀢𑀢𑁆𑀢𑀸𑀢𑀺 𑀫𑀳𑀦𑁆𑀢𑁂𑀳𑀺 𑀧𑀸𑀭𑀫𑀺𑀢𑀸𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻𑀆𑀤𑀬𑁄 𑀫𑀳𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁂𑀓𑀸𑀯, 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀫𑀳𑀦𑁆𑀢𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁄 𑀏𑀯. 𑀓𑁄 𑀘 𑀢𑀲𑁆𑀲 𑀯𑀺𑀲𑀬𑁄? 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀏𑀯𑀁 𑀆𑀓𑀸𑀲𑁄 𑀯𑀺𑀬 𑀅𑀦𑀦𑁆𑀢𑀯𑀺𑀲𑀬𑁄 𑀪𑀕𑀯𑀸 𑀏𑀓𑁄 𑀏𑀯 𑀳𑁄𑀢𑀻𑀢𑀺 𑀯𑀤𑀦𑁆𑀢𑁄 𑀮𑁄𑀓𑀥𑀸𑀢𑁆𑀯𑀦𑁆𑀢𑀭𑁂𑀲𑀼𑀧𑀺 𑀤𑀼𑀢𑀺𑀬𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑀪𑀸𑀕𑁂 𑀆𑀬𑀽𑀳𑀦𑀯𑀲𑁂𑀦 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸, 𑀲𑀦𑁆𑀢𑀢𑀺𑀔𑀡𑀯𑀲𑁂𑀦 𑀯𑀸. 𑀯𑀺𑀧𑀸𑀓𑀸𑀭𑀳𑀦𑁆𑀢𑀺 𑀤𑀼𑀢𑀺𑀬𑀪𑀯𑀸𑀤𑀻𑀲𑀼 𑀯𑀺𑀧𑀘𑁆𑀘𑀦𑀧𑀓𑀢𑀺𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀘𑀮𑀢𑀻𑀢𑀺 𑀧𑀭𑀺𑀯𑀢𑁆𑀢𑀢𑀺. 𑀲𑀼𑀦𑀔𑁂𑀳𑀺 𑀯𑀚𑀦𑀲𑀻𑀮𑁄 𑀲𑀼𑀦𑀔𑀯𑀸𑀚𑀺𑀓𑁄.

𑀧𑀞𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁦. 𑀕𑀢𑀺𑀢𑁄 𑀅𑀜𑁆𑀜𑀸 𑀕𑀢𑀺𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀦𑁆𑀦𑀸 𑀕𑀢𑀻’’𑀢𑀺 𑀆𑀳. 𑀫𑀳𑀸𑀲𑀼𑀤𑀲𑁆𑀲𑀦𑀸𑀤𑀺𑀲𑀼𑀭𑀸𑀚𑀓𑀸𑀮𑁄 𑀧𑀞𑀫𑀓𑀧𑁆𑀧𑀺𑀓𑀸𑀤𑀺𑀲𑀼𑀫𑀦𑀼𑀲𑁆𑀲𑀓𑀸𑀮𑁄 𑀘 𑀓𑀸𑀮𑀲𑀫𑁆𑀧𑀢𑁆𑀢𑀺.

𑀏𑀓𑀦𑁆𑀢𑀁 𑀓𑀼𑀲𑀮𑀲𑁆𑀲𑁂𑀯 𑀑𑀓𑀸𑀲𑁄𑀢𑀺 𑀇𑀤𑀁 𑀬𑀤𑀺𑀧𑀺 𑀓𑁄𑀘𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀞𑀺𑀢𑀁 𑀩𑀸𑀥𑁂𑀬𑁆𑀬, 𑀢𑀁 𑀧𑀦 𑀩𑀸𑀥𑀦𑀁 𑀩𑀸𑀥𑀓𑀲𑁆𑀲𑁂𑀯 𑀇𑀲𑁆𑀲𑀸𑀤𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁂𑀦 𑀚𑀸𑀢𑀁. 𑀲𑀸 𑀧𑀬𑁄𑀕𑀲𑀫𑁆𑀧𑀢𑁆𑀢𑀺 𑀲𑀪𑀸𑀯𑀢𑁄 𑀲𑀼𑀔𑀯𑀺𑀧𑀸𑀓𑀲𑁆𑀲𑁂𑀯 𑀧𑀘𑁆𑀘𑀬𑁄, 𑀦 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀓𑁆𑀓𑀝𑁄 𑀪𑀢𑁆𑀢𑀧𑀼𑀝𑀁 𑀩𑀦𑁆𑀥𑀝𑁆𑀞𑀸𑀦𑁂 𑀫𑀼𑀜𑁆𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀚𑀸𑀦𑀸𑀢𑀺, 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑀺, 𑀏𑀯𑀁 𑀅𑀦𑀼𑀧𑀸𑀬𑀜𑁆𑀜𑀽𑀧𑀺 𑀪𑁄𑀕𑁂. 𑀲𑀼𑀲𑀸𑀦𑁂 𑀙𑀟𑁆𑀟𑁂𑀢𑁆𑀯𑀸𑀢𑀺𑀆𑀤𑀺𑀦𑀸 𑀖𑀸𑀢𑁂𑀢𑁆𑀯𑀸 𑀙𑀟𑁆𑀟𑀺𑀢𑀲𑁆𑀲 𑀯𑀼𑀝𑁆𑀞𑀸𑀦𑀸𑀪𑀸𑀯𑁄 𑀯𑀺𑀬 𑀅𑀧𑀸𑀬𑀢𑁄 𑀯𑀼𑀝𑁆𑀞𑀸𑀦𑀸𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀧𑀘𑁆𑀘𑀭𑀻’’𑀢𑀺𑀧𑀺 𑀉𑀴𑀼𑀫𑁆𑀧𑀲𑁆𑀲 𑀦𑀸𑀫𑀁, 𑀢𑁂𑀦 𑀏𑀢𑁆𑀣 𑀓𑀢𑀸 ‘‘𑀫𑀳𑀸𑀧𑀘𑁆𑀘𑀭𑀻’’𑀢𑀺 𑀯𑀼𑀘𑁆𑀘𑀢𑀺. 𑀉𑀤𑀓𑁂 𑀫𑀭𑀡𑀁 𑀣𑀮𑁂 𑀫𑀭𑀡𑀜𑁆𑀘 𑀏𑀓𑀫𑁂𑀯𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀲𑀓𑁆𑀓𑁂𑀦 ‘‘𑀲𑀫𑀼𑀤𑁆𑀤𑀸𑀭𑀓𑁆𑀔𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁 𑀯𑀼𑀢𑁆𑀢𑀁, 𑀚𑀻𑀯𑀺𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀁 𑀧𑀓𑀸𑀲𑁂𑀦𑁆𑀢𑁂𑀳𑀺 𑀣𑁂𑀭𑁂𑀳𑀺 𑀏𑀯𑀁 𑀯𑀼𑀢𑁆𑀢𑀁, 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀚𑀻𑀯𑀺𑀢𑀳𑁂𑀢𑀼 𑀦 𑀕𑀫𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀉𑀤𑀓𑁂𑀢𑀺 𑀦𑀸𑀕𑀤𑀻𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀣𑀮𑁂𑀢𑀺 𑀚𑀫𑁆𑀩𑀼𑀤𑀻𑀧𑀁.

𑀣𑁂𑀭𑁄 𑀦 𑀤𑁂𑀢𑀻𑀢𑀺 𑀓𑀣𑀫𑀳𑀁 𑀏𑀢𑁂𑀦 𑀜𑀸𑀢𑁄, 𑀓𑁂𑀦𑀘𑀺 𑀓𑀺𑀜𑁆𑀘𑀺 𑀆𑀘𑀺𑀓𑁆𑀔𑀺𑀢𑀁 𑀲𑀺𑀬𑀸𑀢𑀺 𑀲𑀜𑁆𑀜𑀸𑀬 𑀦 𑀅𑀤𑀸𑀲𑀺. 𑀢𑁂𑀦𑁂𑀯 ‘‘𑀫𑀬𑀫𑁆𑀧𑀺 𑀦 𑀚𑀸𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑀲𑁆𑀲𑀸𑀢𑀺 𑀅𑀧𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀁 𑀆𑀤𑀸𑀬…𑀧𑁂… 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀻𑀢𑀺 𑀬𑁄𑀚𑀦𑀸. 𑀅𑀦𑀸𑀬𑀢𑀦𑁂𑀢𑀺 𑀦𑀺𑀓𑁆𑀓𑀸𑀭𑀡𑁂, 𑀅𑀬𑀼𑀢𑁆𑀢𑁂 𑀯𑀸 𑀦𑀲𑁆𑀲𑀦𑀝𑁆𑀞𑀸𑀦𑁂. 𑀢𑀼𑀯𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑁂𑀬𑁆𑀬𑀸𑀲𑀺, 𑀫𑀬𑀁 𑀧𑀦 𑀫𑀳𑀮𑁆𑀮𑀓𑀢𑁆𑀢𑀸 𑀓𑀺𑀁 𑀭𑀓𑁆𑀔𑀺𑀢𑁆𑀯𑀸 𑀓𑀭𑀺𑀲𑁆𑀲𑀸𑀫, 𑀫𑀳𑀮𑁆𑀮𑀓𑀢𑁆𑀢𑀸 𑀏𑀯 𑀘 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀕𑀸𑀫𑀺𑀢𑁆𑀢𑀸 𑀯𑀸 𑀣𑁂𑀭𑁄 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀑𑀯𑀤𑀢𑀺.

𑀲𑀫𑁆𑀫𑀸𑀧𑀬𑁄𑀕𑀲𑁆𑀲 𑀕𑀢𑀫𑀕𑁆𑀕𑁄𑀢𑀺 𑀲𑀫𑁆𑀫𑀸𑀧𑀬𑁄𑀕𑁂𑀦 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀢𑀲𑁆𑀲 𑀲𑀜𑁆𑀚𑀸𑀦𑀦𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸 𑀅𑀪𑀽𑀢𑁄𑀧𑀫𑀁 𑀓𑀣𑀬𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀼𑀲𑁆𑀲𑀸𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀸𑀤𑀺𑀦𑀺𑀬𑀼𑀢𑁆𑀢𑀸 𑀫𑀦𑀼𑀲𑁆𑀲𑀸 𑀫𑀳𑀦𑁆𑀢𑀢𑁆𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀤𑀼𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁧. 𑀅𑀜𑁆𑀘𑀺𑀢𑀸𑀢𑀺 𑀕𑀢𑀸. 𑀧𑁂𑀘𑁆𑀘𑀸𑀢𑀺 𑀧𑀼𑀦, 𑀫𑀭𑀺𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀯𑀺𑀢𑀓𑁆𑀓𑀩𑀳𑀼𑀮𑀢𑀸𑀬 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀯𑀤𑀦𑁆𑀢𑀺, 𑀲𑀽𑀭𑀢𑀸𑀤𑀻𑀳𑀺 𑀯𑀸 𑀉𑀲𑁆𑀲𑀦𑁆𑀦𑀢𑁆𑀢𑀸. 𑀤𑀺𑀩𑁆𑀩𑀦𑁆𑀢𑀻𑀢𑀺 𑀓𑀻𑀴𑀦𑁆𑀢𑀺.

𑀲𑀜𑁆𑀚𑀻𑀯𑀓𑀸𑀴𑀲𑀼𑀢𑁆𑀢𑀲𑀗𑁆𑀖𑀸𑀢𑀭𑁄𑀭𑀼𑀯𑀫𑀳𑀸𑀭𑁄𑀭𑀼𑀯𑀢𑀸𑀧𑀦𑀫𑀳𑀸𑀢𑀸𑀧𑀦𑀅𑀯𑀻𑀘𑀺𑀬𑁄 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸. 𑀏𑀓𑁂𑀓𑀲𑁆𑀲 𑀘𑀢𑁆𑀢𑀸𑀭𑀺 𑀤𑁆𑀯𑀸𑀭𑀸𑀦𑀺, 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀕𑀽𑀣𑀦𑀺𑀭𑀬𑀸𑀤𑀬𑁄𑀢𑀺 𑀏𑀯𑀁 𑀲𑁄𑀴𑀲 𑀉𑀲𑁆𑀲𑀤𑀦𑀺𑀭𑀬𑁂 𑀯𑀡𑁆𑀡𑀬𑀦𑁆𑀢𑀺.

𑀲𑀓𑁆𑀓𑀲𑀼𑀬𑀸𑀫𑀸𑀤𑀬𑁄 𑀯𑀺𑀬 𑀚𑁂𑀝𑁆𑀞𑀓𑀤𑁂𑀯𑀭𑀸𑀚𑀸. 𑀧𑀚𑀸𑀧𑀢𑀺𑀯𑀭𑀼𑀡𑀈𑀲𑀸𑀦𑀸𑀤𑀬𑁄 𑀯𑀺𑀬 𑀤𑀼𑀢𑀺𑀬𑀸𑀤𑀺𑀝𑁆𑀞𑀸𑀦𑀦𑁆𑀢𑀭𑀓𑀸𑀭𑀓𑁄 𑀧𑀭𑀺𑀘𑀸𑀭𑀓𑁄 𑀳𑀼𑀢𑁆𑀯𑀸.

𑀢𑀢𑀺𑀬𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁨. 𑀓𑀧𑁆𑀧𑁄𑀢𑀺 𑀤𑁆𑀯𑁂𑀥𑀸𑀪𑀽𑀢𑀕𑁆𑀕𑁄. 𑀏𑀢𑁆𑀣 𑀘 𑀩𑀻𑀚𑀸𑀤𑀺𑀥𑀸𑀢𑀼𑀦𑀸𑀦𑀢𑁆𑀢𑀯𑀲𑁂𑀦 𑀔𑀦𑁆𑀥𑀸𑀤𑀺𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀢𑀼𑀢𑁆𑀣𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁧𑁩. 𑀅𑀚𑁆𑀛𑀸𑀲𑀬𑀥𑀸𑀢𑀽𑀢𑀺 𑀅𑀚𑁆𑀛𑀸𑀲𑀬𑀲𑀪𑀸𑀯𑁄. 𑀬𑀣𑀸 𑀕𑀽𑀣𑀸𑀤𑀻𑀦𑀁 𑀥𑀸𑀢𑀼𑀲𑀪𑀸𑀯𑁄 𑀏𑀲𑁄, 𑀬𑀁 𑀕𑀽𑀣𑀸𑀤𑀻𑀳𑁂𑀯 𑀲𑀁𑀲𑀦𑁆𑀤𑀢𑀺, 𑀏𑀯𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲𑁂𑀯𑁂𑀲 𑀲𑀪𑀸𑀯𑁄, 𑀬𑀁 𑀤𑀼𑀲𑁆𑀲𑀻𑀮𑀸𑀤𑀬𑁄 𑀤𑀼𑀲𑁆𑀲𑀻𑀮𑀸𑀤𑀺𑀓𑁂𑀳𑁂𑀯 𑀲𑀁𑀲𑀦𑁆𑀤𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽𑀧𑀺 𑀆𑀳𑀁𑀲𑀽𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀳𑀁𑀲𑀼. 𑀆𑀯𑀼𑀲𑁄 𑀇𑀫𑁂 𑀫𑀦𑀼𑀲𑁆𑀲𑀸 ‘‘𑀬𑀣𑀸𑀲𑀪𑀸𑀕𑁂𑀦 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀤𑀦𑁆𑀢𑀸 𑀅𑀫𑁆𑀳𑁂 𑀲𑀪𑀸𑀕𑀸𑀲𑀪𑀸𑀕𑁂 𑀯𑀺𑀤𑀺𑀢𑁆𑀯𑀸 𑀳𑀻𑀦𑀚𑁆𑀛𑀸𑀲𑀬𑀧𑀡𑀻𑀢𑀚𑁆𑀛𑀸𑀲𑀬𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑀓𑀫𑁆𑀫𑁂 𑀉𑀧𑀦𑁂𑀦𑁆𑀢𑀺 𑀢𑀲𑁆𑀲 𑀧𑀬𑁄𑀕𑀁 𑀤𑀝𑁆𑀞𑀼𑀓𑀸𑀫𑀸𑀢𑀺 𑀅𑀢𑁆𑀣𑁄, 𑀏𑀯𑀁 𑀲𑀪𑀸𑀕𑀯𑀲𑁂𑀦𑁂𑀯 𑀅𑀚𑁆𑀛𑀸𑀲𑀬𑀥𑀸𑀢𑀼𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄 𑀅𑀚𑁆𑀛𑀸𑀲𑀬𑀥𑀸𑀢𑀼𑀲𑀪𑀸𑀕𑀯𑀲𑁂𑀦 𑀦𑀺𑀬𑀫𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀜𑁆𑀘𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑀘𑀭𑀺𑀢𑀦𑁆𑀢𑀺 𑀇𑀥 𑀤𑀼𑀘𑁆𑀘𑀭𑀺𑀢𑀁 𑀲𑀼𑀘𑀭𑀺𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀭𑀚𑀁 𑀅𑀓𑁆𑀔𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸𑀢𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄, 𑀅𑀧𑁆𑀧𑀭𑀚𑀁 𑀅𑀓𑁆𑀔𑀺𑀫𑁆𑀳𑀺 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸𑀢𑀺𑀧𑀺 𑀲𑀤𑁆𑀤𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀏𑀢𑁆𑀣 𑀘 𑀆𑀲𑀬𑀚𑀸𑀦𑀦𑀸𑀤𑀺𑀦𑀸 𑀬𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑁄𑀧𑀭𑁂𑀳𑀺 𑀲𑀢𑁆𑀢𑀸 𑀓𑀮𑁆𑀬𑀸𑀡𑀧𑀸𑀧𑀸𑀲𑀬𑀸𑀤𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀚𑀸𑀦𑀦𑀁 𑀯𑀺𑀪𑀸𑀯𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀦𑀁 𑀯𑀺𑀲𑀼𑀁 𑀅𑀲𑀸𑀥𑀸𑀭𑀡𑀢𑀸, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀸𑀦𑀁 𑀯𑀺𑀲𑀼𑀁 𑀩𑀮𑀢𑀸 𑀘 𑀲𑀺𑀤𑁆𑀥𑀸 𑀳𑁄𑀢𑀺.

𑁮𑁧𑁫. 𑀬𑀤𑀭𑀺𑀬𑀸𑀢𑀺 𑀬𑁂 𑀅𑀭𑀺𑀬𑀸. 𑀆𑀯𑀲𑀺𑀁𑀲𑀽𑀢𑀺 𑀦𑀺𑀲𑁆𑀲𑀸𑀬 𑀯𑀲𑀺𑀁𑀲𑀼. 𑀓𑁂 𑀧𑀦 𑀢𑁂? ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄’’𑀢𑀺 (𑀤𑀻. 𑀦𑀺. 𑁩.𑁩𑁪𑁮; 𑀅. 𑀦𑀺. 𑁧𑁦.𑁧𑁯) 𑀏𑀯𑀁 𑀯𑀼𑀢𑁆𑀢𑀸. 𑀏𑀢𑁂𑀲𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀧𑀘𑁆𑀘𑁂𑀓𑀲𑀘𑁆𑀘𑀧𑀦𑁄𑀤𑀦𑀏𑀲𑀦𑀸𑀲𑀫𑀯𑀬𑀲𑀚𑁆𑀚𑀦𑀸𑀦𑀺 ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀺 𑀅𑀥𑀺𑀯𑀸𑀲𑁂𑀢𑀺 𑀧𑀭𑀺𑀯𑀚𑁆𑀚𑁂𑀢𑀺 𑀯𑀺𑀦𑁄𑀤𑁂𑀢𑀻’’𑀢𑀺 (𑀫. 𑀦𑀺. 𑁨.𑁧𑁬𑁮) 𑀯𑀼𑀢𑁆𑀢𑁂𑀲𑀼 𑀅𑀧𑀲𑁆𑀲𑁂𑀦𑁂𑀲𑀼 𑀯𑀺𑀦𑁄𑀤𑀦𑀜𑁆𑀘 𑀫𑀕𑁆𑀕𑀓𑀺𑀘𑁆𑀘𑀸𑀦𑁂𑀯, 𑀇𑀢𑀭𑁂 𑀘 𑀫𑀕𑁆𑀕𑁂𑀦𑁂𑀯 𑀲𑀫𑀺𑀚𑁆𑀛𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀢𑀜𑁆𑀳𑀺 𑀲𑀼𑀢𑁆𑀢𑀁…𑀧𑁂… 𑀤𑀻𑀧𑁂𑀢𑀻’’𑀢𑀺.

𑁮𑁧𑁬. 𑀆𑀭𑀫𑁆𑀫𑀡𑀲𑀦𑁆𑀢𑀸𑀦𑀸𑀦𑀼𑀲𑀬𑀦𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀭𑀫𑁆𑀫𑀡𑀸𑀦𑀼𑀲𑀬𑀦𑁂𑀦 𑀅𑀦𑀼𑀲𑁂𑀢𑀺. 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸𑀢𑀺 𑀏𑀢𑁂𑀦 𑀲𑀫𑀦𑁆𑀢𑀢𑁄 𑀯𑁂𑀞𑁂𑀢𑁆𑀯𑀸 𑀯𑀺𑀬 𑀞𑀺𑀢𑀪𑀸𑀯𑁂𑀦 𑀅𑀦𑀼𑀲𑀬𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀪𑀯𑀲𑁆𑀲𑀧𑀺 𑀯𑀢𑁆𑀣𑀼𑀓𑀸𑀫𑀢𑁆𑀢𑀸, 𑀭𑀸𑀕𑀯𑀲𑁂𑀦 𑀯𑀸 𑀲𑀫𑀸𑀦𑀢𑁆𑀢𑀸 ‘‘𑀪𑀯𑀭𑀸𑀕𑀸𑀦𑀼𑀲𑀬𑁄…𑀧𑁂… 𑀲𑀗𑁆𑀕𑀳𑀺𑀢𑁄’’𑀢𑀺 𑀆𑀳.

𑁮𑁧𑁮. ‘‘𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸, 𑀇𑀢𑀭𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸’’𑀢𑀺 𑀏𑀯𑀁 𑀇𑀦𑁆𑀤𑁆𑀭𑀺𑀬𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀫𑁂𑀯 𑀅𑀥𑀺𑀫𑀼𑀢𑁆𑀢𑀺𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀼𑀤𑀺𑀦𑁆𑀤𑁆𑀭𑀺𑀬𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺.

𑁮𑁧𑁯. 𑀧𑀳𑀸𑀦𑀓𑁆𑀓𑀫𑀯𑀲𑁂𑀦𑀸𑀢𑀺 𑀏𑀢𑁆𑀣 𑀧𑀳𑀸𑀢𑀩𑁆𑀩𑀧𑀚𑀳𑀦𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀬𑀲𑁆𑀲 𑀧𑀳𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀁 𑀢𑁂𑀦𑁂𑀯 𑀧𑀳𑀸𑀦𑁂𑀦 𑀧𑀞𑀫𑀁 𑀯𑀼𑀘𑁆𑀘𑀢𑀺, 𑀢𑀢𑁄 𑀅𑀧𑁆𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀯𑀸 𑀧𑀳𑀸𑀦𑀓𑁆𑀓𑀫𑁄.

𑁮𑁨𑁦. 𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑀦𑀺𑀲𑁆𑀲𑀬𑀇𑀦𑁆𑀤𑁆𑀭𑀺𑀬𑀸𑀦𑀺.

𑁮𑁨𑁬. 𑀦𑀺𑀩𑁆𑀩𑀼𑀢𑀺𑀙𑀦𑁆𑀤𑀭𑀳𑀺𑀢𑀢𑁆𑀢𑀸 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀬𑀲𑁆𑀫𑀺𑀁 𑀪𑀯𑀗𑁆𑀕𑁂 𑀧𑀯𑀢𑁆𑀢𑀫𑀸𑀦𑁂 𑀢𑀁𑀲𑀦𑁆𑀢𑀢𑀺𑀬𑀁 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀢𑀲𑁆𑀲 𑀧𑀸𑀤𑀓𑀁.

𑀙𑀝𑁆𑀞𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁨𑁮. 𑀦𑀺𑀤𑁆𑀤𑀸𑀬𑀺𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀩𑀼𑀤𑁆𑀥𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄𑀫𑁆𑀳𑀻𑀢𑀺 𑀅𑀢𑁆𑀣𑁄. 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀲𑀦𑁆𑀢𑀢𑀺 𑀏𑀯 𑀘𑀺𑀢𑁆𑀢𑀫𑀜𑁆𑀚𑀽𑀲𑀸, 𑀲𑀫𑀸𑀥𑀺 𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸. 𑀘𑀺𑀢𑁆𑀢𑀁 𑀞𑀧𑁂𑀢𑀼𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀞𑀧𑁂𑀢𑀼𑀁. 𑀲𑀜𑁆𑀜𑀸𑀯𑁂𑀤𑀬𑀺𑀢𑀸𑀦𑀁 𑀅𑀧𑀕𑀫𑁄 𑀏𑀯 𑀅𑀧𑀕𑀫𑀯𑀺𑀫𑁄𑀓𑁆𑀔𑁄.

𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀓𑀸𑀫𑀸𑀤𑀺𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀧𑀓𑁆𑀔𑀦𑁆𑀤𑀦𑀸𑀦𑀺 ‘‘𑀳𑀸𑀦𑀪𑀸𑀕𑀺𑀬𑀯𑀺𑀲𑁂𑀲𑀪𑀸𑀕𑀺𑀬𑀥𑀫𑁆𑀫𑀸’’𑀢𑀺 𑀤𑀲𑁆𑀲𑀺𑀢𑀸𑀦𑀺, 𑀢𑁂𑀳𑀺 𑀧𑀦 𑀛𑀸𑀦𑀸𑀦𑀁 𑀢𑀁𑀲𑀪𑀸𑀯𑀢𑀸 𑀥𑀫𑁆𑀫-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀧𑀕𑀼𑀡𑀪𑀸𑀯𑀯𑁄𑀤𑀸𑀦𑀁 𑀧𑀕𑀼𑀡𑀯𑁄𑀤𑀸𑀦𑀁. 𑀢𑀤𑁂𑀯 𑀧𑀞𑀫𑀚𑁆𑀛𑀸𑀦𑀸𑀤𑀻𑀳𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀅𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀯𑀼𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀯𑁄𑀤𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦𑀁, 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀸𑀦𑀫𑁆𑀧𑀺 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀸𑀬 𑀯𑀼𑀝𑁆𑀞𑀸𑀦𑀧𑀸𑀴𑀺𑀬𑀸 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 ‘‘𑀧𑀸𑀴𑀺𑀫𑀼𑀢𑁆𑀢𑀓𑀯𑀼𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀬𑁂 𑀧𑀦 ‘‘𑀦𑀺𑀭𑁄𑀥𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦’’𑀦𑁆𑀢𑀺 𑀧𑀸𑀴𑀺 𑀦𑀢𑁆𑀣𑀻𑀢𑀺 𑀯𑀤𑁂𑀬𑁆𑀬𑀼𑀁, 𑀢𑁂 ‘‘𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀇𑀫𑀸𑀬 𑀧𑀸𑀴𑀺𑀬𑀸 𑀧𑀝𑀺𑀲𑁂𑀥𑁂𑀢𑀩𑁆𑀩𑀸.

𑀲𑀢𑁆𑀢𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁮𑁩𑁧. 𑀭𑀸𑀕𑀸𑀤𑀻𑀳𑀺 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀺𑀪𑀽𑀢𑁄 𑀲𑀫𑀸𑀥𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀧𑀜𑁆𑀜𑀸𑀯 𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯𑀸𑀢𑀺 𑀓𑀫𑁆𑀫𑀦𑁆𑀢𑀭𑀲𑁆𑀲 𑀯𑀺𑀧𑀸𑀓𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀥𑀫𑁆𑀫𑁂 𑀦𑀺𑀭𑀬𑀸𑀤𑀺𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀽𑀢𑁂 𑀓𑀫𑁆𑀫𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳 ‘‘𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯𑀸’’𑀢𑀺. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀝𑁆𑀞𑀫𑀦𑀯𑀫𑀩𑀮𑀸𑀦𑀺 𑀯𑀺𑀬, 𑀢𑀁𑀲𑀤𑀺𑀲𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀯𑀺𑀬 𑀯𑀺𑀓𑀼𑀩𑁆𑀩𑀺𑀢𑀼𑀁. 𑀏𑀢𑁂𑀦 𑀤𑀲𑀩𑀮𑀲𑀤𑀺𑀲𑀢𑀜𑁆𑀘 𑀯𑀸𑀭𑁂𑀢𑀺, 𑀛𑀸𑀦𑀸𑀤𑀺𑀜𑀸𑀡𑀁 𑀯𑀺𑀬 𑀯𑀸 𑀅𑀧𑁆𑀧𑁂𑀢𑀼𑀁 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘. 𑀬𑀤𑀺𑀧𑀺 𑀳𑀺 𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀢𑁆𑀢𑀫𑀩𑀮𑀦𑁆𑀢𑀺 𑀢𑀲𑁆𑀲 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀛𑀸𑀦𑀸𑀤𑀻𑀳𑀺 𑀯𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀻𑀢𑀺 𑀛𑀸𑀦𑀸𑀤𑀺𑀲𑀳𑀕𑀢𑀁 𑀜𑀸𑀡𑀁 𑀢𑀤𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀛𑀸𑀦𑀸𑀤𑀺𑀓𑀺𑀘𑁆𑀘𑀁 𑀯𑀺𑀬 𑀦 𑀲𑀩𑁆𑀩𑀁 𑀩𑀮𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀜𑁆𑀘 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀓𑀲𑁆𑀲𑀘𑀺 𑀩𑀮𑀲𑁆𑀲 𑀛𑀸𑀦𑀇𑀤𑁆𑀥𑀺𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀤𑀲𑀫𑀩𑀮𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀜𑀸𑀡𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.