𑁧𑁫. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑁧. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸

𑁭𑁧𑁮. 𑀏𑀲𑁂𑀯 𑀦𑀬𑁄𑀢𑀺 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 𑀢𑀫𑁂𑀯 𑀦𑀬𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀸 𑀢𑀩𑁆𑀩𑀺𑀲𑀬𑀸𑀦𑀁 𑀅𑀢𑁆𑀣𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑁂𑀳𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀢𑁂𑀦 𑀲𑀘𑁆𑀘𑀳𑁂𑀢𑀼𑀥𑀫𑁆𑀫𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀆𑀕𑀢𑀸𑀦𑀺 𑀤𑀼𑀓𑁆𑀔𑀸𑀤𑀻𑀦𑀺 𑀕𑀳𑀺𑀢𑀸𑀦𑀺. 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀯𑀸𑀭𑁂𑀲𑀼 𑀦𑀺𑀩𑁆𑀩𑀸𑀦𑀁, 𑀧𑀭𑀺𑀬𑀢𑁆𑀢𑀺𑀯𑀸𑀭𑁂 𑀪𑀸𑀲𑀺𑀢𑀢𑁆𑀣𑁄, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀯𑀺𑀧𑀸𑀓𑁄 𑀓𑀺𑀭𑀺𑀬𑀜𑁆𑀘𑀸𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀫𑁂𑀯 𑀯𑀲𑁂𑀦 𑀧𑀜𑁆𑀘 𑀅𑀢𑁆𑀣𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀥𑀫𑁆𑀫𑀸 𑀘.

𑀯𑀺𑀤𑀳𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀓𑀳𑁂𑀢𑀼𑀆𑀤𑀻𑀦𑀁 𑀲𑀸𑀥𑀸𑀭𑀡𑀁 𑀦𑀺𑀩𑁆𑀩𑀘𑀦𑀁, 𑀢𑀤𑀢𑁆𑀣𑀁 𑀧𑀦 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀧𑀯𑀢𑁆𑀢𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘𑀸’’𑀢𑀺. 𑀢𑁂𑀲𑀼 𑀧𑀼𑀭𑀺𑀫𑁄 𑀅𑀢𑁆𑀣𑁄 𑀫𑀕𑁆𑀕𑀯𑀚𑁆𑀚𑁂𑀲𑀼 𑀤𑀝𑁆𑀞𑀩𑁆𑀩𑁄. 𑀪𑀸𑀲𑀺𑀢𑀫𑁆𑀧𑀺 𑀳𑀺 𑀅𑀯𑀩𑁄𑀥𑀦𑀯𑀲𑁂𑀦 𑀅𑀢𑁆𑀣𑀁 𑀧𑀯𑀢𑁆𑀢𑁂𑀢𑀻𑀢𑀺. 𑀫𑀕𑁆𑀕𑁄 𑀧𑀦 𑀦𑀺𑀩𑁆𑀩𑀸𑀦𑀁 𑀧𑀸𑀧𑁂𑀢𑀻𑀢𑀺 𑀢𑀲𑁆𑀫𑀺𑀁 𑀧𑀘𑁆𑀙𑀺𑀫𑁄.

𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀲𑀪𑀸𑀯𑀯𑀸𑀘𑀓𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺, 𑀅𑀯𑀺𑀧𑀭𑀻𑀢𑀦𑀺𑀭𑀼𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸 𑀅𑀪𑀺𑀮𑀸𑀧𑁂𑀢𑀺 𑀢𑀲𑁆𑀲𑀸 𑀦𑀺𑀭𑀼𑀢𑁆𑀢𑀺𑀬𑀸 𑀅𑀯𑀘𑀦𑀪𑀽𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑁂𑀢𑀺 𑀓𑁂𑀘𑀺 𑀯𑀡𑁆𑀡𑀬𑀦𑁆𑀢𑀺. 𑀏𑀯𑀁 𑀲𑀢𑀺 𑀧𑀜𑁆𑀜𑀢𑁆𑀢𑀺 𑀅𑀪𑀺𑀮𑀧𑀺𑀢𑀩𑁆𑀩𑀸, 𑀦 𑀯𑀘𑀦𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀯𑀘𑀦𑀢𑁄 𑀅𑀜𑁆𑀜𑀁 𑀅𑀪𑀺𑀮𑀧𑀺𑀢𑀩𑁆𑀩𑀁 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀢𑁆𑀣𑀺, 𑀅𑀣𑀸𑀧𑀺 𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀩𑁄𑀥𑁂𑀢𑀩𑁆𑀩𑀁 𑀅𑀪𑀺𑀮𑀧𑀺𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀅𑀢𑁆𑀣𑀥𑀫𑁆𑀫𑀯𑀚𑁆𑀚𑀁 𑀢𑁂𑀳𑀺 𑀩𑁄𑀥𑁂𑀢𑀩𑁆𑀩𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀲𑀁 𑀦𑀺𑀭𑀼𑀢𑁆𑀢𑀺𑀪𑀸𑀯𑁄 𑀆𑀧𑀚𑁆𑀚𑀢𑀺. ‘‘𑀨𑀲𑁆𑀲𑁄𑀢𑀺 𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀨𑀲𑁆𑀲𑀁 𑀨𑀲𑁆𑀲𑀸𑀢𑀺 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀤𑀲𑁆𑀲𑀺𑀢𑁄𑀯𑀸𑀬𑀫𑀢𑁆𑀣𑁄, 𑀦 𑀘 𑀅𑀯𑀘𑀦𑀁 𑀏𑀯𑀁𑀧𑀓𑀸𑀭𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀘𑀦𑀪𑀽𑀢𑀸𑀬 𑀏𑀯 𑀢𑀲𑁆𑀲𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑁂 𑀉𑀘𑁆𑀘𑀸𑀭𑀡𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀸𑀬 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀫𑀦𑁄𑀤𑁆𑀯𑀸𑀭𑁂 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀘 𑀯𑀘𑀦𑀁 𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁂 𑀅𑀜𑁆𑀜𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀬𑀣𑀸 𑀧𑀦 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀸𑀤𑀺𑀲𑀤𑁆𑀤𑀧𑁆𑀧𑀪𑁂𑀤𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀢𑀁 𑀢𑀁 𑀲𑀤𑁆𑀤𑀯𑀺𑀪𑀸𑀯𑀓𑀁, 𑀏𑀯𑀁 𑀲𑀪𑀸𑀯𑀸𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀦𑀺𑀘𑁆𑀙𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀸𑀭𑀫𑁆𑀫𑀡𑀁 𑀢𑀁𑀯𑀺𑀪𑀸𑀯𑀓𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀧𑀸𑀴𑀺𑀯𑀺𑀭𑁄𑀥𑁄 𑀳𑁄𑀢𑀺. 𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀤𑁆𑀤𑀸𑀭𑀫𑁆𑀫𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀯𑀢𑁆𑀢𑀬𑀦𑁆𑀢𑀲𑁆𑀲𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀫𑁆𑀧𑀺 𑀳𑀺 𑀜𑀸𑀡𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀯𑀺𑀪𑀸𑀯𑁂𑀦𑁆𑀢𑀁𑀬𑁂𑀯 𑀢𑀁𑀢𑀁𑀲𑀤𑁆𑀤𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀦𑁆𑀢𑀭𑀁 𑀢𑀁𑀢𑀁𑀧𑀪𑁂𑀤𑀦𑀺𑀘𑁆𑀙𑀬𑀳𑁂𑀢𑀼𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀁 𑀪𑀺𑀦𑁆𑀤𑀦𑁆𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘 𑀧𑀪𑁂𑀤𑀕𑀢𑀫𑁆𑀧𑀺 𑀳𑁄𑀢𑀻𑀢𑀺. 𑀲𑀪𑀸𑀯𑀦𑀺𑀭𑀼𑀢𑁆𑀢𑀻𑀢𑀺 𑀫𑀸𑀕𑀥𑀪𑀸𑀲𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀢𑀢𑁄 𑀅𑀜𑁆𑀜𑀁 𑀲𑀓𑁆𑀓𑀝𑀦𑀸𑀫𑀸𑀤𑀺𑀲𑀤𑁆𑀤𑀁 𑀲𑀦𑁆𑀥𑀸𑀬 ‘‘𑀅𑀜𑁆𑀜𑀁 𑀧𑀦𑀸’’𑀢𑀺 𑀆𑀳. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀺𑀧𑀸𑀢𑀧𑀤𑀫𑀸𑀳.

𑀓𑀣𑀺𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀩𑁄𑀥𑀺𑀫𑀡𑁆𑀟-𑀲𑀤𑁆𑀤𑁄 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀝𑁆𑀞𑀸𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄, 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂. 𑀲𑀼𑀯𑀡𑁆𑀡𑀲𑀮𑀸𑀓𑀦𑁆𑀢𑀺 𑀲𑁂𑀝𑁆𑀞𑀲𑀮𑀸𑀓𑀁, 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀞𑀺𑀢𑁂𑀦 𑀧𑀯𑀸𑀭𑀺𑀢𑀁, 𑀢𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀢𑁄 𑀅𑀜𑁆𑀜𑁂𑀦𑁂𑀯 𑀧𑀓𑀸𑀭𑁂𑀦 𑀚𑀸𑀦𑀺𑀢𑀩𑁆𑀩𑀢𑁄 𑀦 𑀲𑀓𑁆𑀓𑀝𑀪𑀸𑀲𑀸𑀚𑀸𑀦𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀓𑀺𑀘𑁆𑀘𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀁 𑀓𑀣𑀺𑀢𑀦𑁆𑀢𑀺 𑀫𑀸𑀕𑀥𑀪𑀸𑀲𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀢𑀸𑀜𑀸𑀧𑀦𑀢𑁆𑀣𑀁 𑀇𑀤𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀙𑀤𑁆𑀤𑀦𑁆𑀢𑀯𑀸𑀭𑀡 (𑀚𑀸. 𑁧.𑁧𑁬.𑁯𑁭 𑀆𑀤𑀬𑁄) -𑀢𑀺𑀢𑁆𑀢𑀺𑀭𑀚𑀸𑀢𑀓𑀸𑀤𑀻𑀲𑀼 (𑀚𑀸. 𑁧.𑁪.𑁭𑁩 𑀆𑀤𑀬𑁄) 𑀢𑀺𑀭𑀘𑁆𑀙𑀸𑀦𑁂𑀲𑀼 𑀘 𑀫𑀸𑀕𑀥𑀪𑀸𑀲𑀸 𑀉𑀲𑁆𑀲𑀦𑁆𑀦𑀸, 𑀦 𑀑𑀝𑁆𑀝𑀓𑀸𑀤𑀺𑀪𑀸𑀲𑀸 𑀲𑀓𑁆𑀓𑀝𑀁 𑀯𑀸.

𑀢𑀢𑁆𑀣𑀸𑀢𑀺 𑀫𑀸𑀕𑀥𑀲𑁂𑀲𑀪𑀸𑀲𑀸𑀲𑀼. 𑀲𑁂𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 𑀏𑀓𑀦𑁆𑀢𑁂𑀦 𑀓𑀸𑀮𑀦𑁆𑀢𑀭𑁂 𑀅𑀜𑁆𑀜𑀣𑀸 𑀳𑁄𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺 𑀘. 𑀫𑀸𑀕𑀥𑀸 𑀧𑀦 𑀓𑀢𑁆𑀣𑀘𑀺 𑀓𑀤𑀸𑀘𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀧𑀺 𑀦 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑀣𑀸 𑀘 𑀧𑀭𑀺𑀯𑀢𑁆𑀢𑀢𑀺, 𑀓𑀧𑁆𑀧𑀯𑀺𑀦𑀸𑀲𑁂𑀧𑀺 𑀢𑀺𑀝𑁆𑀞𑀢𑀺𑀬𑁂𑀯𑀸𑀢𑀺 ‘‘𑀅𑀬𑀫𑁂𑀯𑁂𑀓𑀸 𑀦 𑀧𑀭𑀺𑀯𑀢𑁆𑀢𑀢𑀻’’𑀢𑀺 𑀆𑀳. 𑀧𑀧𑀜𑁆𑀘𑁄𑀢𑀺 𑀘𑀺𑀭𑀸𑀬𑀦𑀦𑁆𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀯𑀘𑀦𑀫𑁂𑀯 𑀘𑁂𑀢𑀲𑁆𑀲 𑀯𑀺𑀲𑀬𑁄, 𑀢𑁂𑀦𑁂𑀯 ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 𑀕𑀸𑀣𑀁 𑀧𑀼𑀘𑁆𑀙𑀺𑀢𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘‘‘𑀓𑀺𑀁 𑀦𑀼 𑀔𑁄 𑀏𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀪𑀸𑀲𑀺𑀢’𑀦𑁆𑀢𑀺? ‘𑀏𑀯𑀁 𑀕𑀳𑀧𑀢𑀻’𑀢𑀺. ‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀣, 𑀬𑀸𑀯𑀲𑁆𑀲 𑀅𑀢𑁆𑀣𑀁 𑀧𑁂𑀓𑁆𑀔𑀸𑀫𑀻’’’𑀢𑀺 (𑀲𑀁. 𑀦𑀺. 𑁪.𑁩𑁪𑁭) 𑀆𑀳𑀸𑀢𑀺 𑀯𑀤𑀦𑁆𑀢𑀺.

𑀲𑀩𑁆𑀩𑀢𑁆𑀣𑀓𑀜𑀸𑀡𑀦𑁆𑀢𑀺 𑀅𑀢𑁆𑀣𑀸𑀤𑀻𑀲𑀼 𑀜𑀸𑀡𑀁. 𑀢𑀜𑁆𑀳𑀺 𑀲𑀩𑁆𑀩𑁂𑀲𑀼 𑀢𑁂𑀲𑀼 𑀢𑀻𑀲𑀼 𑀘𑀢𑀽𑀲𑀼𑀧𑀺 𑀯𑀸 𑀧𑀯𑀢𑁆𑀢𑀢𑁆𑀢𑀸, 𑀓𑀼𑀲𑀮𑀓𑀺𑀭𑀺𑀬𑀪𑀽𑀢𑀸𑀬 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀥𑀫𑁆𑀫𑀢𑁆𑀣𑀪𑀸𑀯𑀢𑁄 𑀢𑀻𑀲𑀼 𑀏𑀯 𑀯𑀸 𑀧𑀯𑀢𑁆𑀢𑀢𑁆𑀢𑀸 ‘‘𑀲𑀩𑁆𑀩𑀢𑁆𑀣𑀓𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀲𑀸𑀢𑁆𑀣𑀓𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑁄 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺𑀧𑀺 𑀲𑀩𑁆𑀩𑀢𑁆𑀣𑀓𑀁, 𑀲𑀩𑁆𑀩𑀲𑁆𑀫𑀺𑀁 𑀔𑀺𑀢𑁆𑀢𑀦𑁆𑀢𑀺 𑀯𑀸. 𑀲𑁂𑀓𑁆𑀔𑁂 𑀧𑀯𑀢𑁆𑀢𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀯𑀺𑀬 𑀧𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀅𑀭𑀳𑀢𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑀸𑀬 𑀧𑀘𑁆𑀘𑀬𑁄 𑀦 𑀦 𑀳𑁄𑀢𑀻𑀢𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀬𑀣𑀸𑀬𑁄𑀕𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀤𑀢𑁆𑀢𑀓𑀸𑀭𑀡𑀢𑀸 𑀬𑁄𑀚𑁂𑀢𑀩𑁆𑀩𑀸.

𑀧𑀼𑀘𑁆𑀙𑀸𑀬 𑀧𑀭𑀢𑁄 𑀧𑀯𑀢𑁆𑀢𑀸 𑀓𑀣𑀸𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸 ‘‘𑀧𑀭𑀺𑀧𑀼𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀕𑀭𑀼𑀢𑀸𑀬 𑀮𑀸𑀪𑀁 𑀳𑀻𑀴𑁂𑀦𑁆𑀢𑁂𑀦 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀫𑁆𑀧𑀺 𑀓𑀫𑁆𑀩𑀮𑀁 𑀯𑀸𑀲𑀺𑀬𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀡𑁆𑀟𑀓𑀭𑀡𑀁 𑀫𑀬𑀸 𑀓𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀮𑀸𑀪𑀕𑀭𑀼𑀦𑁄 𑀧𑀭𑀺𑀬𑀢𑁆𑀢𑀺𑀥𑀭𑀸 𑀥𑀫𑁆𑀫𑀓𑀣𑀺𑀓𑀸𑀯 𑀪𑀯𑀺𑀢𑀼𑀁 𑀦 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀣𑁂𑀭𑀲𑁆𑀲 𑀓𑀗𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀅𑀯𑀺𑀲𑀤𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀤𑀢𑀸 𑀤𑀲𑁆𑀲𑀺𑀢𑀸. 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀏𑀯𑀸𑀢𑀺 𑀯𑀤𑀦𑁆𑀢𑀺.

𑀧𑀪𑁂𑀤𑁄 𑀦𑀸𑀫 𑀫𑀕𑁆𑀕𑁂𑀳𑀺 𑀅𑀥𑀺𑀕𑀢𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀪𑁂𑀤𑀕𑀫𑀦𑀁. 𑀅𑀥𑀺𑀕𑀫𑁄 𑀢𑁂𑀳𑀺 𑀧𑀝𑀺𑀮𑀸𑀪𑁄, 𑀢𑀲𑁆𑀫𑀸 𑀲𑁄 𑀮𑁄𑀓𑀼𑀢𑁆𑀢𑀭𑁄, 𑀧𑀪𑁂𑀤𑁄 𑀓𑀸𑀫𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀦 𑀧𑀦 𑀢𑀣𑀸𑀢𑀺 𑀬𑀣𑀸 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀢𑀣𑀸 𑀧𑀪𑁂𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀧𑀭𑀺𑀬𑀢𑁆𑀢𑀺𑀬𑀸𑀤𑀻𑀦𑀁 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁, 𑀧𑀼𑀩𑁆𑀩𑀬𑁄𑀕𑀲𑁆𑀲 𑀘 𑀩𑀮𑀯𑀧𑀘𑁆𑀘𑀬𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀬𑀢𑁆𑀢𑀺𑀲𑀯𑀦𑀧𑀭𑀺𑀧𑀼𑀘𑁆𑀙𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀬𑁄𑀕𑀸𑀥𑀺𑀕𑀫𑀸 𑀳𑀺 𑀤𑁆𑀯𑁂𑀧𑀺 𑀯𑀺𑀲𑀤𑀓𑀸𑀭𑀡𑀸𑀢𑀺 ‘‘𑀧𑀼𑀩𑁆𑀩𑀬𑁄𑀕𑁄 𑀧𑀪𑁂𑀤𑀲𑁆𑀲 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀘𑁆𑀘𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁭𑁧𑁯. 𑀳𑁂𑀢𑀼𑀯𑀸𑀭𑁂 𑀓𑀸𑀮𑀢𑁆𑀢𑀬𑁂𑀧𑀺 𑀳𑁂𑀢𑀼𑀨𑀮𑀥𑀫𑁆𑀫𑀸 ‘‘𑀅𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀜𑁆𑀘 𑀳𑁂𑀢𑀼𑀥𑀫𑁆𑀫𑀸 ‘‘𑀥𑀫𑁆𑀫𑀸’’𑀢𑀺, 𑀥𑀫𑁆𑀫𑀯𑀸𑀭𑁂 𑀯𑁂𑀦𑁂𑀬𑁆𑀬𑀯𑀲𑁂𑀦 𑀅𑀢𑀻𑀢𑀸𑀦𑀜𑁆𑀘 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀉𑀧𑁆𑀧𑀦𑁆𑀦𑀸 𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 ‘‘𑀅𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀸, 𑀢𑀁𑀦𑀺𑀩𑁆𑀩𑀢𑁆𑀢𑀓𑀸 𑀘 ‘‘𑀥𑀫𑁆𑀫𑀸’’𑀢𑀺 𑀇𑀤𑀫𑁂𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸𑀭𑀸𑀦𑀁 𑀦𑀸𑀦𑀢𑁆𑀢𑀁.

𑀲𑀘𑁆𑀘𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁨𑁫. 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀢𑁆𑀯𑀸 𑀯𑀺𑀲𑁂𑀲𑁂𑀦 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀓𑀺𑀭𑀺𑀬𑀸𑀦𑀁 𑀅𑀯𑀺𑀧𑀸𑀓𑀢𑁆𑀢𑀸 𑀥𑀫𑁆𑀫𑀪𑀸𑀯𑁄 𑀦 𑀯𑀼𑀢𑁆𑀢𑁄𑀢𑀺. 𑀬𑀤𑀺 𑀏𑀯𑀁 𑀯𑀺𑀧𑀸𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑀪𑀸𑀯𑁄 𑀘 𑀦 𑀯𑀢𑁆𑀢𑀩𑁆𑀩𑁄𑀢𑀺? 𑀦, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸. 𑀏𑀯𑀜𑁆𑀘𑁂 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀅𑀢𑁆𑀣𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺. 𑀦𑀧𑁆𑀧𑀝𑀺𑀲𑀺𑀤𑁆𑀥𑁄, 𑀯𑀺𑀧𑀸𑀓𑀲𑁆𑀲 𑀧𑀦 𑀧𑀥𑀸𑀦𑀳𑁂𑀢𑀼𑀢𑀸𑀬 𑀧𑀸𑀓𑀝𑀢𑁆𑀢𑀸 𑀥𑀫𑁆𑀫𑀪𑀸𑀯𑁄𑀯 𑀢𑁂𑀲𑀁 𑀯𑀼𑀢𑁆𑀢𑁄. 𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑀬𑀢𑁆𑀢𑀸 𑀥𑀫𑁆𑀫𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀬𑀁 𑀤𑁄𑀲𑁄 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸, 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀲𑁆𑀲 𑀧𑀦 𑀅𑀳𑁂𑀢𑀼𑀢𑁆𑀢𑀸 𑀥𑀫𑁆𑀫𑀪𑀸𑀯𑁄 𑀦 𑀯𑀼𑀢𑁆𑀢𑁄. 𑀅𑀧𑀺𑀘 ‘‘𑀅𑀬𑀁 𑀇𑀫𑀲𑁆𑀲 𑀧𑀘𑁆𑀘𑀬𑁄, 𑀇𑀤𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀯𑀁 𑀪𑁂𑀤𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀓𑀼𑀲𑀮𑀸𑀓𑀼𑀲𑀮𑁂 𑀯𑀺𑀧𑀸𑀓𑀓𑀺𑀭𑀺𑀬𑀥𑀫𑁆𑀫𑁂 𑀘 𑀲𑀪𑀸𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀘 𑀳𑁄𑀢𑀻𑀢𑀺𑀧𑀺 𑀢𑁂𑀲𑀁 𑀅𑀢𑁆𑀣𑀥𑀫𑁆𑀫𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀲𑀮𑀸𑀓𑀼𑀲𑀮𑀯𑀸𑀭𑁂𑀲𑀼 𑀘 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀲𑀢𑁆𑀢𑀺𑀯𑀺𑀲𑁂𑀲𑀁 𑀲𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑀁 𑀧𑀲𑁆𑀲𑀦𑁆𑀢𑀻 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀧𑁂𑀓𑁆𑀔𑀸 𑀳𑁄𑀢𑀻𑀢𑀺 𑀢𑀁𑀲𑀫𑁆𑀩𑀦𑁆𑀥𑁂𑀦𑁂𑀯 ‘‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀧𑀦 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀓𑀺𑀘𑁆𑀘𑀁 𑀦𑀺𑀧𑁆𑀨𑀦𑁆𑀦𑀨𑀮𑀫𑀢𑁆𑀢𑀤𑀲𑁆𑀲𑀦𑀢𑁄𑀢𑀺 𑀢𑀲𑁆𑀲𑀸 𑀦𑀺𑀧𑁆𑀨𑀸𑀤𑀓𑀸𑀦𑀧𑁂𑀓𑁆𑀔𑀢𑁆𑀢𑀸 𑀯𑀺𑀧𑀸𑀓𑀯𑀸𑀭𑁂 ‘‘𑀢𑁂𑀲𑀁 𑀯𑀺𑀧𑀘𑁆𑀘𑀦𑀓𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀪𑀸𑀯𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀦 𑀲𑀢𑁆𑀢𑀸𑀤𑀺𑀧𑀜𑁆𑀜𑀢𑁆𑀢𑀺𑀬𑀸, 𑀅𑀯𑀺𑀧𑀭𑀻𑀢𑀧𑀜𑁆𑀜𑀢𑁆𑀢𑀺𑀬𑀸 𑀯𑀸. 𑀔𑁄𑀪𑁂𑀢𑁆𑀯𑀸𑀢𑀺 𑀮𑁄𑀫𑀳𑀁𑀲𑀚𑀦𑀦𑀲𑀸𑀥𑀼𑀓𑀸𑀭𑀤𑀸𑀦𑀸𑀤𑀻𑀳𑀺 𑀔𑁄𑀪𑁂𑀢𑁆𑀯𑀸. 𑀧𑀼𑀦 𑀥𑀫𑁆𑀫𑀲𑁆𑀲𑀯𑀦𑁂 𑀚𑀸𑀦𑀺𑀲𑁆𑀲𑀣𑀸𑀢𑀺 𑀅𑀧𑁆𑀧𑀲𑁆𑀲𑀼𑀢𑀢𑁆𑀢𑀸 𑀤𑀼𑀢𑀺𑀬𑀯𑀸𑀭𑀁 𑀓𑀣𑁂𑀦𑁆𑀢𑁄 𑀢𑀤𑁂𑀯 𑀓𑀣𑁂𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁭𑁪𑁬. 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀓𑀸𑀫𑀸𑀯𑀘𑀭𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀪𑀽𑀫𑀺 ‘‘𑀪𑀽𑀫𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀸𑀢𑀺.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁪𑁭. 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀅𑀢𑁆𑀣𑀁 𑀧𑀘𑁆𑀘𑀬𑀥𑀫𑁆𑀫𑀜𑁆𑀘𑀸𑀢𑀺 𑀯𑀘𑀦𑁂𑀳𑀺 𑀳𑁂𑀢𑀸𑀤𑀺𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀭𑀽𑀧𑀸𑀦𑀫𑁆𑀧𑀺 𑀅𑀢𑁆𑀣𑀧𑀭𑀺𑀬𑀸𑀬𑀁, 𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑀸𑀦𑀁 𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀸𑀦𑀫𑁆𑀧𑀺 𑀥𑀫𑁆𑀫𑀧𑀭𑀺𑀬𑀸𑀬𑀜𑁆𑀘 𑀤𑀲𑁆𑀲𑁂𑀢𑀺. 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀭𑀫𑁆𑀫𑀡𑀢𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑀸 𑀘 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀭𑀫𑁆𑀫𑀡𑀢𑁆𑀢𑁂 𑀦 𑀬𑀼𑀚𑁆𑀚𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀁 𑀓𑀸𑀫𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂𑀲𑀼 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑁂𑀲𑀼 𑀘 𑀉𑀧𑁆𑀧𑀢𑁆𑀢𑀺𑀢𑁄. 𑀲𑀩𑁆𑀩𑀜𑀸𑀡𑀸𑀭𑀫𑁆𑀫𑀡𑀢𑀸𑀬 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, ‘‘𑀬𑁂𑀦 𑀜𑀸𑀡𑁂𑀦 𑀢𑀸𑀦𑀺 𑀜𑀸𑀡𑀸𑀦𑀺 𑀚𑀸𑀦𑀸𑀢𑀻’’𑀢𑀺 (𑀯𑀺𑀪. 𑁭𑁨𑁬) 𑀯𑀘𑀦𑀢𑁄 𑀧𑀦 𑀦 𑀲𑀩𑁆𑀩𑀜𑀸𑀡𑀸𑀭𑀫𑁆𑀫𑀡𑀢𑀸𑀢𑀺 𑀓𑀣𑀬𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀧𑀦 ‘‘𑀜𑀸𑀡𑁂𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀜𑀸𑀡𑀸𑀭𑀫𑁆𑀫𑀡𑀢𑀸 𑀲𑀺𑀬𑀸. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀓𑀣𑀦𑀁 𑀦𑀺𑀭𑀯𑀲𑁂𑀲𑀓𑀣𑀦𑀦𑁆𑀢𑀺 𑀬𑀣𑀸𑀤𑀲𑁆𑀲𑀺𑀢𑀯𑀺𑀲𑀬𑀯𑀘𑀦𑀯𑀲𑁂𑀦 ‘‘𑀬𑁂𑀦 𑀜𑀸𑀡𑁂𑀦 𑀢𑀸𑀦𑀺 𑀜𑀸𑀡𑀸𑀦𑀺 𑀚𑀸𑀦𑀸𑀢𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀅𑀜𑁆𑀜𑀸𑀭𑀫𑁆𑀫𑀡𑀢𑀁 𑀦 𑀧𑀝𑀺𑀲𑁂𑀥𑁂𑀢𑀻𑀢𑀺. 𑀬𑀣𑀸 𑀘 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀸𑀦𑀁 𑀦 𑀦𑀺𑀭𑀯𑀲𑁂𑀲𑁂𑀦 𑀓𑀣𑀦𑀁 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂, 𑀏𑀯𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑀲𑁆𑀲𑀧𑀻𑀢𑀺. 𑀏𑀯𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀬 𑀲𑀩𑁆𑀩𑀜𑀸𑀡𑀯𑀺𑀲𑀬𑀢𑁆𑀢𑀸 ‘‘𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀲𑀺𑀬𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀸 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁪𑁯) 𑀯𑀼𑀢𑁆𑀢𑀸.

𑀬𑀤𑀺𑀧𑀺 ‘‘𑀲𑀺𑀬𑀸 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀦 𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺 (𑀯𑀺𑀪. 𑁭𑁪𑁯) 𑀯𑀘𑀦𑀢𑁄 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀯𑀼𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑀸𑀲𑁆𑀯𑁂𑀯 𑀧𑀜𑁆𑀳𑀧𑀼𑀘𑁆𑀙𑀓𑀦𑀬𑁄 𑀧𑀯𑀢𑁆𑀢𑁄. 𑀦 𑀳𑀺 𑀫𑀕𑁆𑀕𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀦 𑀳𑁄𑀢𑀺, 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀘 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀯𑀺𑀲𑀬𑀸 𑀏𑀯 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀯𑀼𑀢𑁆𑀢𑀸𑀢𑀺 𑀦 𑀢𑀲𑁆𑀲𑀸 𑀫𑀳𑀕𑁆𑀕𑀢𑀸𑀭𑀫𑁆𑀫𑀡𑀢𑀸𑀢𑀺. 𑀏𑀯𑀫𑀧𑀺 𑀤𑁆𑀯𑁂𑀧𑀺 𑀏𑀢𑀸 𑀧𑀸𑀴𑀺𑀬𑁄 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀢𑀸𑀲𑀼 𑀩𑀮𑀯𑀢𑀭𑀸𑀬 𑀞𑀢𑁆𑀯𑀸 𑀇𑀢𑀭𑀸𑀬 𑀅𑀥𑀺𑀧𑁆𑀧𑀸𑀬𑁄 𑀫𑀕𑁆𑀕𑀺𑀢𑀩𑁆𑀩𑁄. 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀧𑀝𑀺𑀯𑁂𑀥𑁄𑀧𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀧𑀝𑀺𑀯𑁂𑀥𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀸 𑀢𑀢𑁆𑀣 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀏𑀓𑀦𑁆𑀢𑀥𑀫𑁆𑀫𑀯𑀺𑀲𑀬𑀢𑁆𑀢𑀸, 𑀢𑀣𑀸 𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀯𑁂𑀥𑁄𑀧𑀺 𑀯𑀺𑀧𑀸𑀓𑀓𑀺𑀭𑀺𑀬𑀪𑀸𑀯𑀧𑀝𑀺𑀯𑁂𑀥𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀸 𑀢𑀢𑁆𑀣 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀏𑀓𑀦𑁆𑀢𑀺𑀓𑀅𑀢𑁆𑀣𑀯𑀺𑀲𑀬𑀢𑁆𑀢𑀸. 𑀓𑀺𑀜𑁆𑀘𑀺 𑀧𑀦 𑀜𑀸𑀡𑀁 𑀅𑀧𑁆𑀧𑀝𑀺𑀪𑀸𑀦𑀪𑀽𑀢𑀁 𑀦𑀢𑁆𑀣𑀺 𑀜𑁂𑀬𑁆𑀬𑀧𑁆𑀧𑀓𑀸𑀲𑀦𑀢𑁄𑀢𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀜𑀸𑀡𑁂 𑀦𑀺𑀧𑁆𑀧𑀭𑀺𑀬𑀸𑀬𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀪𑀯𑀺𑀢𑀼𑀁 𑀅𑀭𑀳𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀧𑀜𑁆𑀳𑀧𑀼𑀘𑁆𑀙𑀓𑀲𑁆𑀲 𑀧𑀯𑀢𑁆𑀢𑀺𑀬𑀁 𑀤𑁆𑀯𑁂𑀧𑀺 𑀧𑀸𑀴𑀺𑀬𑁄 𑀦 𑀯𑀺𑀭𑀼𑀚𑁆𑀛𑀦𑁆𑀢𑀺.

𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺 𑀏𑀢𑁆𑀣 𑀧𑀭𑀲𑁆𑀲 𑀅𑀪𑀺𑀮𑀸𑀧𑀲𑀤𑁆𑀤𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀲𑀤𑁆𑀤𑀸𑀭𑀫𑁆𑀫𑀡𑀢𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀢𑀸𑀬 𑀓𑀸𑀭𑀡𑀁 𑀲𑀤𑁆𑀤𑀲𑁆𑀲 𑀅𑀚𑁆𑀛𑀢𑁆𑀢𑀲𑁆𑀲 𑀘 𑀲𑀩𑁆𑀪𑀸𑀯𑀸𑀢𑀺. 𑀅𑀦𑀼𑀯𑀢𑁆𑀢𑀫𑀸𑀦𑁄 𑀘 𑀲𑁄 𑀏𑀯 𑀲𑀤𑁆𑀤𑁄𑀢𑀺 𑀯𑀺𑀲𑁂𑀲𑀦𑀁 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.