𑁧𑁪. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁄

𑁧. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁭𑁦𑁩. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘 𑀑𑀓𑀸𑀲𑀪𑀸𑀯𑁂𑀦. 𑀧𑀺𑀝𑁆𑀞𑀧𑀽𑀯𑀑𑀤𑀦𑀓𑀺𑀡𑁆𑀡𑀦𑀸𑀦𑀸𑀲𑀫𑁆𑀪𑀸𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀤𑁆𑀤𑀺𑀢𑁆𑀯𑀸 𑀓𑀢𑀸 𑀲𑀼𑀭𑀸 𑀦𑀸𑀫. 𑀫𑀥𑀼𑀓𑀸𑀤𑀺𑀧𑀼𑀧𑁆𑀨𑀧𑀦𑀲𑀸𑀤𑀺𑀨𑀮𑀉𑀘𑁆𑀙𑀼𑀫𑀼𑀤𑁆𑀤𑀺𑀓𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀁 𑀭𑀲𑀸 𑀘𑀺𑀭𑀧𑀭𑀺𑀯𑀸𑀲𑀺𑀢𑀸 𑀫𑁂𑀭𑀬𑀁 𑀦𑀸𑀫, 𑀆𑀲𑀯𑁄𑀢𑀺 𑀅𑀢𑁆𑀣𑁄.

𑁭𑁦𑁪. 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀢𑀺 𑀯𑀺𑀭𑀢𑀺𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸, 𑀯𑀺𑀭𑀢𑀺𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀯𑀸.

𑀓𑀫𑁆𑀫𑀧𑀣𑀸 𑀏𑀯𑀸𑀢𑀺 𑀅𑀲𑀩𑁆𑀩𑀲𑀸𑀥𑀸𑀭𑀡𑁂𑀲𑀼 𑀛𑀸𑀦𑀸𑀤𑀺𑀓𑁄𑀝𑁆𑀞𑀸𑀲𑁂𑀲𑀼 𑀓𑀫𑁆𑀫𑀧𑀣𑀓𑁄𑀝𑁆𑀞𑀸𑀲𑀺𑀓𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑀼𑀭𑀸𑀧𑀸𑀦𑀫𑁆𑀧𑀺 ‘‘𑀲𑀼𑀭𑀸𑀧𑀸𑀦𑀁, 𑀪𑀺𑀓𑁆𑀔𑀯𑁂, 𑀆𑀲𑁂𑀯𑀺𑀢𑀁…𑀧𑁂… 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺 (𑀅. 𑀦𑀺. 𑁮.𑁪𑁦) 𑀯𑀺𑀲𑀼𑀁 𑀓𑀫𑁆𑀫𑀧𑀣𑀪𑀸𑀯𑁂𑀦 𑀆𑀕𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀏𑀓𑀸𑀤𑀲 𑀓𑀫𑁆𑀫𑀧𑀣𑀸 𑀲𑀺𑀬𑀼𑀁, 𑀢𑀲𑁆𑀫𑀸𑀲𑁆𑀲 𑀬𑀣𑀸𑀯𑀼𑀢𑁆𑀢𑁂𑀲𑁆𑀯𑁂𑀯 𑀓𑀫𑁆𑀫𑀧𑀣𑁂𑀲𑀼 𑀉𑀧𑀓𑀸𑀭𑀓𑀢𑁆𑀢𑀲𑀪𑀸𑀕𑀢𑁆𑀢𑀯𑀲𑁂𑀦 𑀅𑀦𑀼𑀧𑀯𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀲𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀭𑀫𑁆𑀫𑀡𑀢𑀸 𑀢𑀣𑀸𑀕𑀳𑀺𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸𑀬 𑀤𑀝𑁆𑀞𑀩𑁆𑀩𑀸. ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀸𑀧𑀺 𑀳𑀺 𑀏𑀢𑀸 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀭𑀘𑁂𑀢𑀦𑀸𑀳𑀺 𑀏𑀯 𑀯𑀺𑀭𑀫𑀦𑁆𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁭𑁦𑁪) 𑀘 𑀯𑀓𑁆𑀔𑀢𑀻𑀢𑀺.

𑀕𑁄𑀭𑀽𑀧𑀲𑀻𑀮𑀓𑁄 𑀧𑀓𑀢𑀺𑀪𑀤𑁆𑀤𑁄. 𑀓𑀸𑀓𑀡𑀺𑀓𑀫𑀢𑁆𑀢𑀲𑁆𑀲 𑀅𑀢𑁆𑀣𑀸𑀬𑀸𑀢𑀺𑀆𑀤𑀺 𑀮𑁄𑀪𑀯𑀲𑁂𑀦 𑀫𑀼𑀲𑀸𑀓𑀣𑀦𑁂 𑀯𑀼𑀢𑁆𑀢𑀁. 𑀤𑁄𑀲𑀯𑀲𑁂𑀦 𑀫𑀼𑀲𑀸𑀓𑀣𑀦𑁂 𑀘 𑀦𑀺𑀝𑁆𑀞𑀧𑁆𑀧𑀢𑁆𑀢𑁄 𑀲𑀗𑁆𑀖𑀪𑁂𑀤𑁄 𑀕𑀳𑀺𑀢𑁄. 𑀤𑁄𑀲𑀯𑀲𑁂𑀦 𑀧𑀭𑀲𑁆𑀲 𑀩𑁆𑀬𑀲𑀦𑀢𑁆𑀣𑀸𑀬 𑀫𑀼𑀲𑀸𑀓𑀣𑀦𑁂 𑀧𑀦 𑀢𑀲𑁆𑀲 𑀢𑀲𑁆𑀲 𑀕𑀼𑀡𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀬𑁄𑀚𑁂𑀢𑀩𑁆𑀩𑀸, 𑀫𑀦𑁆𑀤𑀸𑀥𑀺𑀫𑀢𑁆𑀢𑀩𑁆𑀬𑀲𑀦𑀺𑀘𑁆𑀙𑀸𑀯𑀲𑁂𑀦 𑀘. 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀫𑀬𑀸 𑀲𑀸𑀳𑀢𑁆𑀣𑀺𑀓𑀸𑀡𑀢𑁆𑀢𑀺𑀓𑁂𑀲𑁆𑀯𑁂𑀯 𑀧𑀯𑀺𑀲𑀦𑁆𑀢𑀻𑀢𑀺 𑀤𑁆𑀯𑁂 𑀏𑀯 𑀕𑀳𑀺𑀢𑀸.

𑀧𑀜𑁆𑀘𑀧𑀺 𑀓𑀫𑁆𑀫𑀧𑀣𑀸 𑀏𑀯𑀸𑀢𑀺 𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀧𑀭𑀺𑀬𑀸𑀬𑀲𑀻𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀭𑀢𑀺𑀲𑀻𑀮𑀁 𑀧𑀦 𑀫𑀕𑁆𑀕𑀓𑁄𑀝𑁆𑀞𑀸𑀲𑀺𑀓𑀦𑁆𑀢𑀺. 𑀢𑁂𑀲𑀁 𑀧𑀦𑀸𑀢𑀺 𑀲𑁂𑀲𑀲𑀻𑀮𑀸𑀦𑀁.

𑁭𑁧𑁨. ‘‘𑀓𑁄𑀝𑁆𑀞𑀸𑀲𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀣 𑀧𑀦 𑀲𑀺𑀓𑁆𑀔𑀸𑀧𑀤𑀯𑀸𑀭𑁂 𑀧𑀳𑀻𑀦𑀧𑀜𑁆𑀘𑀸𑀪𑀩𑁆𑀩𑀝𑁆𑀞𑀸𑀦𑀲𑁆𑀲 𑀅𑀭𑀳𑀢𑁄 𑀯𑀺𑀭𑀫𑀺𑀢𑀩𑁆𑀩𑀯𑁂𑀭𑀲𑁆𑀲 𑀲𑀩𑁆𑀩𑀣𑀸 𑀅𑀪𑀸𑀯𑀸 𑀓𑀺𑀭𑀺𑀬𑁂𑀲𑀼 𑀯𑀺𑀭𑀢𑀺𑀬𑁄 𑀦 𑀲𑀦𑁆𑀢𑀻𑀢𑀺 𑀦 𑀉𑀤𑁆𑀥𑀝𑀸, 𑀲𑁂𑀓𑁆𑀔𑀸𑀦𑀁 𑀧𑀦 𑀧𑀳𑀻𑀦𑀧𑀜𑁆𑀘𑀯𑁂𑀭𑀢𑁆𑀢𑁂𑀧𑀺 𑀢𑀁𑀲𑀪𑀸𑀕𑀢𑀸𑀬 𑀯𑁂𑀭𑀪𑀽𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀯𑁂𑀭𑀦𑀺𑀤𑀸𑀦𑀸𑀦𑀁 𑀮𑁄𑀪𑀸𑀤𑀻𑀦𑀜𑁆𑀘 𑀲𑀩𑁆𑀪𑀸𑀯𑀸 𑀯𑀺𑀭𑀢𑀻𑀦𑀁 𑀉𑀧𑁆𑀧𑀢𑁆𑀢𑀺 𑀦 𑀦 𑀪𑀯𑀺𑀲𑁆𑀲𑀢𑀺. 𑀅𑀓𑀼𑀲𑀮𑀲𑀫𑀼𑀝𑁆𑀞𑀺𑀢𑀸𑀦𑀺 𑀘 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀢𑁂𑀲𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀯𑁂𑀭𑀸𑀦𑁂𑀯, 𑀢𑁂𑀳𑀺 𑀘 𑀢𑁂𑀲𑀁 𑀯𑀺𑀭𑀢𑀺𑀬𑁄 𑀳𑁄𑀦𑁆𑀢𑁂𑀯, 𑀬𑀢𑁄 𑀦𑀨𑀮𑀪𑀽𑀢𑀲𑁆𑀲𑀧𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀢𑀸 𑀳𑁄𑀢𑀺. 𑀲𑀺𑀓𑁆𑀔𑀸𑀯𑀸𑀭𑁂 𑀘 𑀅𑀪𑀸𑀯𑁂𑀢𑀩𑁆𑀩𑀢𑀸𑀬 𑀨𑀮𑀥𑀫𑁆𑀫𑀸𑀧𑀺 𑀦 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀦𑀸𑀧𑀺 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀺𑀭𑀺𑀬𑀥𑀫𑁆𑀫𑀸𑀢𑀺 𑀦 𑀓𑁂𑀘𑀺 𑀅𑀩𑁆𑀬𑀸𑀓𑀢𑀸 𑀲𑀺𑀓𑁆𑀔𑀸𑀢𑀺 𑀉𑀤𑁆𑀥𑀝𑀸.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁭𑁧𑁪. 𑀲𑀫𑁆𑀧𑀢𑁆𑀢𑀯𑀺𑀭𑀢𑀺𑀯𑀲𑁂𑀦𑀸𑀢𑀺 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀭𑀫𑁆𑀫𑀡𑁂 𑀬𑀣𑀸𑀯𑀺𑀭𑀫𑀺𑀢𑀩𑁆𑀩𑀢𑁄 𑀯𑀺𑀭𑀢𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.