𑁧𑁩. 𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁪𑁨. 𑀲𑀩𑁆𑀩𑀥𑀻𑀢𑀺 𑀤𑀺𑀲𑀸𑀤𑁂𑀲𑁄𑀥𑀺𑀦𑀸 𑀅𑀦𑁄𑀥𑀺𑀲𑁄𑀨𑀭𑀡𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀢𑁆𑀢𑁄𑀥𑀺𑀦𑀸. 𑀢𑁂𑀦𑀸𑀳 ‘‘𑀅𑀦𑁄𑀥𑀺𑀲𑁄 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀢𑀣𑀸-𑀲𑀤𑁆𑀤𑁄 𑀇𑀢𑀺-𑀲𑀤𑁆𑀤𑁄 𑀯𑀸 𑀦 𑀯𑀼𑀢𑁆𑀢𑁄𑀢𑀺 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀏𑀢𑀲𑁆𑀲 𑀅𑀦𑀼𑀯𑀢𑁆𑀢𑀓𑀁 𑀢𑀁 𑀤𑁆𑀯𑀬𑀁 𑀢𑀲𑁆𑀲 𑀨𑀭𑀡𑀦𑁆𑀢𑀭𑀸𑀤𑀺𑀝𑁆𑀞𑀸𑀦𑀁 𑀅𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀁, 𑀧𑀼𑀦 ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁬𑁪𑁩. 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀼𑀧𑀸𑀮𑀺𑀢𑀸 𑀫𑁂𑀢𑁆𑀢𑀸 𑀦 𑀧𑀭𑀺𑀳𑀸𑀬𑀢𑀺 𑀆𑀲𑀦𑁆𑀦𑀲𑀧𑀢𑁆𑀢𑀲𑁆𑀲 𑀭𑀸𑀕𑀲𑁆𑀲 𑀲𑀺𑀦𑁂𑀳𑀲𑁆𑀲 𑀘 𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪𑁫. 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀧𑀲𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀥𑀺𑀓𑀪𑀸𑀯𑁂𑀦𑀸’’𑀢𑀺𑀆𑀤𑀺𑀫𑀸𑀳, 𑀩𑀮𑀯𑀢𑀸 𑀯𑀸 𑀅𑀥𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸.

𑁬𑁪𑁮. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩’’𑀦𑁆𑀢𑀺 𑀏𑀢𑁂𑀲𑀁 ‘‘𑀲𑀩𑁆𑀩𑁂𑀦 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂𑀦 𑀲𑀩𑁆𑀩𑀁 𑀲𑀺𑀓𑁆𑀔𑀁, 𑀲𑀩𑁆𑀩𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀁 𑀲𑀺𑀓𑁆𑀔’’𑀦𑁆𑀢𑀺 𑀘 𑀛𑀸𑀦𑀯𑀺𑀪𑀗𑁆𑀕𑁂 (𑀯𑀺𑀪. 𑀅𑀝𑁆𑀞. 𑁫𑁧𑁬) 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀇𑀥 𑀧𑀦 𑀲𑀩𑁆𑀩𑁂𑀦 𑀅𑀯𑀥𑀺𑀦𑀸 𑀅𑀢𑁆𑀢𑀲𑀫𑀢𑀸𑀬 𑀲𑀩𑁆𑀩𑀲𑀢𑁆𑀢𑀬𑀼𑀢𑁆𑀢𑀢𑀸𑀬 𑀘 𑀲𑀩𑁆𑀩𑀁 𑀮𑁄𑀓𑀁, 𑀲𑀩𑁆𑀩𑀸𑀯𑀥𑀺𑀤𑀺𑀲𑀸𑀤𑀺𑀨𑀭𑀡𑀸𑀓𑀸𑀭𑁂𑀳𑀺 𑀲𑀩𑁆𑀩𑀁 𑀮𑁄𑀓𑀦𑁆𑀢𑀺 𑀘 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺.

𑁬𑁫𑁦. 𑀧𑀘𑁆𑀘𑀢𑁆𑀣𑀺𑀓𑀯𑀺𑀖𑀸𑀢𑀯𑀲𑁂𑀦𑀸𑀢𑀺 𑀫𑁂𑀢𑁆𑀢𑀸𑀤𑀻𑀦𑀁 𑀆𑀲𑀦𑁆𑀦𑀤𑀽𑀭𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀭𑀸𑀕𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀯𑀺𑀖𑀸𑀢𑀯𑀲𑁂𑀦. 𑀬𑀁 𑀅𑀧𑁆𑀧𑀫𑀸𑀡𑀁, 𑀲𑁄 𑀅𑀯𑁂𑀭𑁄𑀢𑀺 𑀲𑁄 𑀅𑀯𑁂𑀭𑀪𑀸𑀯𑁄𑀢𑀺 𑀅𑀬𑀁 𑀯𑀸 𑀢𑀲𑁆𑀲 𑀅𑀢𑁆𑀣𑁄𑀢𑀺.

𑁬𑁫𑁩. 𑀦𑀺𑀭𑀬𑀸𑀤𑀺 𑀕𑀢𑀺, 𑀘𑀡𑁆𑀟𑀸𑀮𑀸𑀤𑀺 𑀓𑀼𑀮𑀁, 𑀅𑀦𑁆𑀦𑀸𑀤𑀻𑀦𑀁 𑀅𑀮𑀸𑀪𑀺𑀢𑀸 𑀪𑁄𑀕𑁄. 𑀆𑀤𑀺-𑀲𑀤𑁆𑀤𑁂𑀦 𑀤𑀼𑀩𑁆𑀩𑀡𑁆𑀡𑀢𑀸𑀤𑀺 𑀕𑀳𑀺𑀢𑀁.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁬𑁯𑁯. 𑀇𑀫𑀲𑁆𑀫𑀺𑀁 𑀧𑀦…𑀧𑁂… 𑀓𑀣𑀺𑀢𑀸𑀢𑀺 𑀇𑀫𑀺𑀦𑀸 𑀇𑀫𑀲𑁆𑀫𑀺𑀁 𑀯𑀺𑀪𑀗𑁆𑀕𑁂 𑀓𑀣𑀺𑀢𑀸𑀦𑀁 𑀮𑁄𑀓𑀺𑀬𑀪𑀸𑀯𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀳𑀺 𑀯𑀺𑀲𑁂𑀲𑁂𑀢𑀻𑀢𑀺 𑀦 𑀅𑀜𑁆𑀜𑀢𑁆𑀣 𑀮𑁄𑀓𑀼𑀢𑁆𑀢𑀭𑀸𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀓𑀣𑀺𑀢𑀢𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀫𑀜𑁆𑀜𑀸𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.