𑁧𑁨. 𑀛𑀸𑀦𑀯𑀺𑀪𑀗𑁆𑀕𑁄

𑁧. 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁

𑀫𑀸𑀢𑀺𑀓𑀸𑀯𑀡𑁆𑀡𑀦𑀸

𑁫𑁦𑁮. 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀓𑀭𑀡𑀻𑀬𑀲𑀫𑁆𑀧𑀤𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺. 𑀅𑀲𑀼𑀪𑀸𑀦𑀼𑀲𑁆𑀲𑀢𑀺𑀬𑁄 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀸𑀦𑀺 𑀘 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭-𑀕𑁆𑀕𑀳𑀡𑀁 𑀓𑀭𑁄𑀢𑀺, 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀻𑀢𑀺 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧) 𑀯𑀘𑀦𑁂𑀦 𑀲𑀫𑀡𑀪𑀸𑀯𑀓𑀭𑀧𑀼𑀩𑁆𑀩𑀪𑀸𑀕𑀓𑀭𑀡𑀻𑀬𑀲𑀫𑁆𑀧𑀤𑀸𑀲𑀫𑁆𑀧𑀦𑁆𑀦𑀲𑁆𑀲𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀺𑀓𑁆𑀔𑀸𑀧𑀤𑁂𑀲𑀼 𑀦𑀸𑀫𑀓𑀸𑀬𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀯𑀘𑀦𑀸𑀦𑀢𑀺𑀓𑁆𑀓𑀫𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑁂𑀲𑀼, 𑀅𑀯𑀻𑀢𑀺𑀓𑁆𑀓𑀫𑀦𑀯𑀺𑀭𑀢𑀺𑀘𑁂𑀢𑀦𑀸𑀲𑀗𑁆𑀔𑀸𑀢𑁂𑀲𑀼 𑀯𑀸 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀽𑀭𑀡𑀯𑀲𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑁂𑀲𑀼 𑀲𑀸 𑀲𑀸 𑀪𑀺𑀓𑁆𑀔𑀼𑀲𑀺𑀓𑁆𑀔𑀸𑀤𑀺𑀓𑀸 𑀲𑀺𑀓𑁆𑀔𑀸𑀧𑀤𑁂𑀓𑀤𑁂𑀲𑀪𑀽𑀢𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀇𑀤𑀫𑀲𑁆𑀲 𑀲𑀺𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀧𑀭𑀺𑀤𑀻𑀧𑀦’’𑀦𑁆𑀢𑀺.

𑀲𑀦𑁆𑀢𑁄𑀲𑀸𑀤𑀺𑀯𑀲𑁂𑀦 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀁, 𑀢𑀲𑁆𑀲 𑀘 𑀯𑀡𑁆𑀡𑀯𑀸𑀤𑀺𑀢𑀁, 𑀅𑀮𑀤𑁆𑀥𑀸 𑀘 𑀅𑀧𑀭𑀺𑀢𑀲𑁆𑀲𑀦𑀁, 𑀮𑀤𑁆𑀥𑀸 𑀘 𑀅𑀕𑀥𑀺𑀢𑀧𑀭𑀺𑀪𑁄𑀕𑀦𑁆𑀢𑀺 𑀏𑀢𑁂 𑀕𑀼𑀡𑁂 𑀤𑀲𑁆𑀲𑁂𑀢𑀺. 𑀛𑀸𑀦𑀪𑀸𑀯𑀦𑀸𑀬 𑀓𑀸𑀭𑀓𑁄𑀢𑀺 𑀧𑀭𑀺𑀤𑀻𑀧𑀦𑀁 𑀓𑀸𑀭𑀓𑀪𑀸𑀯𑀧𑀭𑀺𑀤𑀻𑀧𑀦𑀁. 𑀅𑀭𑀜𑁆𑀜𑀦𑁆𑀢𑀺𑀆𑀤𑀺𑀦𑀸 𑀲𑁂𑀦𑀸𑀲𑀦𑀲𑁆𑀲 𑀧𑀪𑁂𑀤𑀁, 𑀅𑀧𑁆𑀧𑀲𑀤𑁆𑀤𑀦𑁆𑀢𑀺𑀆𑀤𑀺𑀦𑀸 𑀦𑀺𑀭𑀸𑀤𑀻𑀦𑀯𑀢𑀁, 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀦𑁆𑀢𑀺 𑀆𑀦𑀺𑀲𑀁𑀲𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀲𑁂𑀦𑀸𑀲𑀦𑀧𑁆𑀧𑀪𑁂𑀤𑁂…𑀧𑁂… 𑀧𑀭𑀺𑀤𑀻𑀧𑀦’’𑀦𑁆𑀢𑀺.

𑀫𑀸𑀢𑀺𑀓𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁦𑁯. 𑀓𑀫𑁆𑀫𑀢𑁆𑀣𑁂𑀳𑀺 𑀤𑀺𑀝𑁆𑀞𑀺-𑀲𑀤𑁆𑀤𑀸𑀤𑀻𑀳𑀺 𑀲𑀸𑀲𑀦𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀤𑀺𑀝𑁆𑀞𑀢𑁆𑀢𑀸 𑀤𑀺𑀝𑁆𑀞𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀝𑁆𑀞𑁂𑀦𑀸𑀢𑀺 𑀅𑀯𑀺𑀧𑀭𑀻𑀢𑀝𑁆𑀞𑁂𑀦. 𑀲𑀺𑀓𑁆𑀔𑀺𑀬𑀫𑀸𑀦𑁄 𑀓𑀸𑀬𑀸𑀤𑀻𑀦𑀺 𑀯𑀺𑀦𑁂𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀆𑀳 ‘‘𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀯𑀺𑀦𑀬𑁄’’𑀢𑀺, 𑀯𑀺𑀦𑀬𑁄 𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀔𑀦𑁆𑀥𑀢𑁆𑀢𑀬𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀯𑀺𑀦𑀬𑁄 𑀯𑀺𑀬𑀸𑀢𑀺 𑀯𑀺𑀦𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀼 𑀅𑀦𑀼𑀲𑀸𑀲𑀦𑀤𑀸𑀦𑀪𑀽𑀢𑀁 𑀲𑀺𑀓𑁆𑀔𑀢𑁆𑀢𑀬𑀦𑁆𑀢𑀺 𑀆𑀳 ‘‘𑀅𑀦𑀼𑀲𑀺𑀝𑁆𑀞𑀺𑀤𑀸𑀦𑀯𑀲𑁂𑀦𑀸’’𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀢𑁆𑀢𑀸. 𑀢𑀺𑀲𑁆𑀲𑁄 𑀳𑀺 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀧𑀽𑀭𑀢𑀻𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁬𑁯) 𑀯𑀘𑀦𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀗𑁆𑀕𑀫𑀁 𑀲𑀺𑀓𑁆𑀔𑀢𑁆𑀢𑀬𑀁. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀤𑁆𑀯𑀬𑁂 𑀨𑀮𑀓𑀸𑀭𑀡𑁄𑀧𑀘𑀸𑀭𑁂𑀳𑀺 𑀲𑀺𑀓𑁆𑀔𑀢𑁆𑀢𑀬𑀁 ‘‘𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀁, 𑀓𑀼𑀲𑀮𑀥𑀫𑁆𑀫𑁂𑀳𑀺 𑀯𑀸 𑀅𑀢𑁆𑀢𑀦𑁄 𑀏𑀓𑀤𑁂𑀲𑀪𑀽𑀢𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀢𑁄 𑀯𑀺𑀦𑀬𑀦𑀓𑀺𑀭𑀺𑀬𑀢𑁆𑀢𑀸 𑀯𑀺𑀦𑀬𑁄 𑀲𑀺𑀓𑁆𑀔𑀢𑁆𑀢𑀬𑀁, 𑀢𑀁 𑀧𑀦 𑀯𑀺𑀦𑀬𑀦𑀁 𑀥𑀫𑁆𑀫𑁂𑀦𑁂𑀯 𑀅𑀯𑀺𑀲𑀫𑀲𑀪𑀸𑀯𑁂𑀦, 𑀤𑁂𑀲𑀦𑀸𑀥𑀫𑁆𑀫𑁂𑀦 𑀯𑀸 𑀧𑀯𑀢𑁆𑀢𑀁, 𑀦 𑀤𑀡𑁆𑀟𑀸𑀤𑀺𑀦𑀸𑀢𑀺 ‘‘𑀥𑀫𑁆𑀫𑀯𑀺𑀦𑀬𑁄’’𑀢𑀺 𑀯𑀼𑀢𑁆𑀢𑀁.

𑀅𑀦𑀯𑀚𑁆𑀚𑀥𑀫𑁆𑀫𑀢𑁆𑀣𑀦𑁆𑀢𑀺 𑀧𑀭𑀫𑀸𑀦𑀯𑀚𑁆𑀚𑀦𑀺𑀩𑁆𑀩𑀸𑀦𑀢𑁆𑀣𑀁, 𑀅𑀓𑀼𑀧𑁆𑀧𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀅𑀢𑁆𑀣𑀁 𑀯𑀸. 𑀥𑀫𑁆𑀫𑁂𑀲𑀼 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀅𑀪𑀺𑀚𑀸𑀦𑀦𑀸𑀤𑀺𑀓𑀸𑀭𑀡𑀁 𑀲𑀺𑀓𑁆𑀔𑀢𑁆𑀢𑀬𑀦𑁆𑀢𑀺 𑀢𑀁 ‘‘𑀥𑀫𑁆𑀫𑀯𑀺𑀦𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀺𑀲𑁆𑀲𑀸 𑀇𑀫𑀲𑁆𑀫𑀺’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀁 𑀦𑀺𑀬𑀫𑀓𑀭𑀡𑀁 𑀳𑁄𑀢𑀺, 𑀏𑀯-𑀲𑀤𑁆𑀤𑀮𑁄𑀧𑁄 𑀯𑀸 𑀓𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀦𑀺𑀬𑀫𑁄 𑀓𑀢𑁄’’𑀢𑀺.

𑁫𑁧𑁦. 𑀪𑀺𑀓𑁆𑀔𑀼𑀓𑁄𑀢𑀺 𑀅𑀦𑀜𑁆𑀜𑀢𑁆𑀣𑁂𑀦 𑀓-𑀓𑀸𑀭𑁂𑀦 𑀧𑀤𑀁 𑀯𑀟𑁆𑀠𑀺𑀢𑀦𑁆𑀢𑀺 ‘‘𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀬𑀸’’𑀢𑀺 𑀅𑀢𑁆𑀣𑀫𑀸𑀳. 𑀪𑀺𑀓𑁆𑀔𑀓𑁄𑀢𑀺 𑀧𑀦 𑀧𑀸𑀞𑁂 𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀓𑁄𑀢𑀺 𑀅𑀢𑁆𑀣𑁄. 𑀚𑀮𑁆𑀮𑀺𑀓𑀁 𑀭𑀚𑀫𑀺𑀲𑁆𑀲𑀁 𑀫𑀮𑀁, 𑀅𑀫𑀺𑀲𑁆𑀲𑀁 𑀫𑀮𑀫𑁂𑀯. 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀦𑀺𑀩𑁆𑀩𑀘𑀦𑀁 𑀪𑀺𑀦𑁆𑀦𑀧𑀝𑀥𑀭𑁂 𑀪𑀺𑀓𑁆𑀔𑀼-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸 𑀯𑀼𑀢𑁆𑀢𑀁.

𑀬𑀲𑁆𑀲 𑀪𑀸𑀯𑁂𑀢𑀩𑁆𑀩𑁄 𑀧𑀳𑀸𑀢𑀩𑁆𑀩𑁄 𑀘 𑀑𑀥𑀺 𑀅𑀯𑀲𑀺𑀝𑁆𑀞𑁄 𑀅𑀢𑁆𑀣𑀺, 𑀲𑁄 𑀑𑀥𑀺𑀲𑁄, 𑀅𑀭𑀳𑀸 𑀧𑀦 𑀢𑀤𑀪𑀸𑀯𑀸 𑀑𑀥𑀺𑀭𑀳𑀺𑀢𑁄𑀢𑀺 ‘‘𑀅𑀦𑁄𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸 𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑁄. 𑀑𑀥𑀺-𑀲𑀤𑁆𑀤𑁄 𑀯𑀸 𑀏𑀓𑀤𑁂𑀲𑁂 𑀦𑀺𑀭𑀼𑀴𑁆𑀳𑁄𑀢𑀺 𑀲𑀩𑁆𑀩𑀫𑀕𑁆𑀕𑀸 𑀲𑀩𑁆𑀩𑀓𑀺𑀮𑁂𑀲𑀸 𑀘 𑀅𑀭𑀳𑀢𑀸 𑀪𑀸𑀯𑀺𑀢𑀸 𑀧𑀳𑀻𑀦𑀸 𑀘 ‘‘𑀑𑀥𑀻’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀧𑀳𑀸𑀦𑀸𑀢𑀺 𑀇𑀤𑀜𑁆𑀘 𑀦𑀺𑀩𑁆𑀩𑀘𑀦𑀁 𑀪𑁂𑀤𑀦𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁂𑀓𑁆𑀔𑁄𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑁆𑀣𑀁 𑀕𑀼𑀡𑀯𑀲𑁂𑀦 𑀤𑀲𑁆𑀲𑁂𑀢𑀺, 𑀳𑁂𑀝𑁆𑀞𑀸 𑀧𑀦 ‘‘𑀲𑀫𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀧𑀜𑁆𑀜𑀸𑀬𑀦𑀯𑀲𑁂𑀦, ‘‘𑀪𑀺𑀓𑁆𑀔𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀩𑁆𑀩𑀘𑀦𑀯𑀲𑁂𑀦 𑀤𑀲𑁆𑀲𑀺𑀢𑁄.

𑀲𑁂𑀓𑁆𑀔𑁄 𑀪𑀺𑀓𑁆𑀔𑀽𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸 𑀓𑀣𑀺𑀢𑀸, 𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦𑀁…𑀧𑁂… 𑀪𑀺𑀓𑁆𑀔𑀽𑀢𑀺 𑀔𑀻𑀡𑀸𑀲𑀯𑁄𑀯 𑀓𑀣𑀺𑀢𑁄𑀢𑀺 𑀇𑀤𑀁 𑀤𑁆𑀯𑀬𑀁 ‘‘𑀲𑁂𑀓𑁆𑀔𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢 𑀅𑀭𑀺𑀬𑀸, 𑀪𑀺𑀦𑁆𑀦𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀦 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸’’𑀢𑀺 𑀇𑀫𑀺𑀦𑀸 𑀤𑁆𑀯𑀬𑁂𑀦 𑀦 𑀲𑀫𑁂𑀢𑀺, 𑀢𑀤𑀺𑀤𑀁 𑀦𑀺𑀧𑁆𑀧𑀭𑀺𑀬𑀸𑀬𑀤𑀲𑁆𑀲𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑁂𑀲𑀝𑁆𑀞𑀸𑀦𑁂𑀲𑀼 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀼𑀲𑀻𑀮𑁄𑀧𑀺 𑀯𑀼𑀢𑁆𑀢𑁄𑀢𑀺? 𑀯𑀼𑀢𑁆𑀢𑁄, 𑀦 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀪𑀕𑀯𑀢𑁄 𑀯𑀘𑀦𑀁 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀓𑀭𑀡𑀲𑁆𑀲 𑀓𑀸𑀭𑀡𑀢𑁆𑀢𑀸 𑀞𑀸𑀦𑀁, 𑀢𑀤𑀦𑀼𑀭𑀽𑀧𑀁 𑀞𑀸𑀦𑀸𑀭𑀳𑀁, 𑀅𑀦𑀽𑀦𑀜𑀢𑁆𑀢𑀺𑀅𑀦𑀼𑀲𑁆𑀲𑀸𑀯𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀘 𑀅𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑁫𑁧𑁧. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀻𑀮𑀁 𑀲𑀫𑀸𑀤𑀸𑀦𑀯𑀺𑀭𑀢𑀺𑀅𑀯𑀻𑀢𑀺𑀓𑁆𑀓𑀫𑀦𑀯𑀺𑀭𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀪𑀺𑀚𑁆𑀛𑀸𑀤𑀻𑀦𑀺 𑀲𑀦𑁆𑀥𑀸𑀬 𑀘𑁂𑀢𑀲𑀺𑀓𑀲𑀻𑀮𑀲𑁆𑀲 𑀧𑀭𑀺𑀬𑀸𑀬𑀲𑀻𑀮𑀢𑀸 𑀯𑀼𑀢𑁆𑀢𑀸. 𑀦𑀕𑀭𑀯𑀟𑁆𑀠𑀓𑀻 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄𑀢𑀺 𑀯𑀤𑀦𑁆𑀢𑀺. 𑀘𑀢𑀼𑀩𑁆𑀩𑀺𑀥𑁄 𑀆𑀳𑀸𑀭𑁄 𑀅𑀲𑀺𑀢𑀸𑀤𑀻𑀦𑀺, 𑀪𑀓𑁆𑀔𑀺𑀢𑀩𑁆𑀩𑀪𑀼𑀜𑁆𑀚𑀺𑀢𑀩𑁆𑀩𑀮𑁂𑀳𑀺𑀢𑀩𑁆𑀩𑀘𑀼𑀩𑀺𑀢𑀩𑁆𑀩𑀸𑀦𑀺 𑀯𑀸.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀳𑀸𑀭𑀢𑁆𑀢𑀸, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀇𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑁄 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀁𑀯𑀼𑀢𑁄’’𑀢𑀺 𑀏𑀢𑀲𑁆𑀲 𑀧𑀺𑀳𑀺𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀅𑀢𑁆𑀣𑀫𑀸𑀳. 𑀧𑀸𑀢𑀺𑀫𑁄𑀓𑁆𑀔𑁂𑀦 𑀘 𑀲𑀁𑀯𑀭𑁂𑀦 𑀘𑀸𑀢𑀺 𑀇𑀤𑀁 𑀧𑀸𑀢𑀺𑀫𑁄𑀓𑁆𑀔𑀢𑁄 𑀅𑀜𑁆𑀜𑀁 𑀲𑀻𑀮𑀁 𑀓𑀸𑀬𑀺𑀓𑀅𑀯𑀻𑀢𑀺𑀓𑁆𑀓𑀫𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀢𑀺𑀬𑁄 𑀧𑀦𑀢𑁆𑀣𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀏𑀓𑀢𑁆𑀣𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄.

𑁫𑁧𑁩. 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀚𑁆𑀛𑀸𑀤𑀬𑁄 𑀘 𑀕𑀳𑀺𑀢𑀸𑀢𑀺 𑀲𑀦𑁆𑀥𑀸𑀬𑀸𑀳 ‘‘𑀫𑀦𑀲𑀸𑀧𑀺 𑀆𑀘𑀭𑀢𑀺 𑀏𑀯, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀓𑀸𑀬𑀺𑀓𑀯𑀻𑀢𑀺𑀓𑁆𑀓𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀅𑀦𑀸𑀘𑀸𑀭𑁂𑀲𑀼. 𑀕𑀭𑀼𑀪𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀫𑀸𑀧𑀚𑁆𑀚𑀢𑀻𑀢𑀺 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀅𑀭𑁄𑀧𑀺𑀫𑁄𑀢𑀺 𑀲𑀗𑁆𑀖𑀺𑀓𑀪𑀽𑀫𑀺𑀬𑀁 𑀉𑀝𑁆𑀞𑀺𑀢𑁄 𑀯𑀼𑀢𑁆𑀢𑁄. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀕𑀭𑀼𑀪𑀡𑁆𑀟𑀦𑁆𑀢𑀭𑀪𑀽𑀢𑀁 𑀓𑀫𑁆𑀫𑀁. 𑀤𑀡𑁆𑀟𑀓𑀫𑁆𑀫𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀳𑀢𑁆𑀣𑀓𑀫𑁆𑀫𑀫𑀸𑀳. 𑀲𑀺𑀦𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀺𑀦𑀸𑀦𑀁, 𑀘𑀼𑀡𑁆𑀡𑀸𑀤𑀺.

𑀲𑀘𑁆𑀘𑀸𑀮𑀻𑀓𑁂𑀦 𑀧𑀺𑀬𑀯𑀸𑀤𑀻 ‘‘𑀘𑀸𑀝𑀽’’𑀢𑀺 𑀯𑀼𑀘𑁆𑀘𑀢𑀺, 𑀘𑀸𑀝𑀼𑀁 𑀅𑀢𑁆𑀢𑀸𑀦𑀁 𑀇𑀘𑁆𑀙𑀢𑀻𑀢𑀺 𑀘𑀸𑀝𑀼𑀓𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀘𑀸𑀝𑀼𑀓𑀫𑁆𑀬𑀢𑀸. 𑀫𑀼𑀕𑁆𑀕𑀲𑀽𑀧𑀲𑁆𑀲 𑀅𑀧𑁆𑀧𑀯𑀺𑀲𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺 𑀲𑀩𑁆𑀩𑀸𑀳𑀸𑀭𑁂𑀳𑀺 𑀅𑀯𑀺𑀭𑀼𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀪𑀝𑀢𑀺 𑀥𑀸𑀭𑁂𑀢𑀺, 𑀧𑁄𑀲𑁂𑀢𑀺 𑀯𑀸𑀢𑀺 𑀧𑀭𑀺𑀪𑀝𑁄, 𑀅𑀣 𑀯𑀸 𑀧𑀭𑀺𑀯𑀸𑀭𑀪𑀽𑀢𑁄 𑀪𑀝𑁄 𑀲𑁂𑀯𑀓𑁄 𑀧𑀭𑀺𑀪𑀝𑁄.

𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀁 𑀕𑀺𑀳𑀻𑀦𑀁 𑀓𑀭𑀺𑀬𑀫𑀸𑀦𑀁 𑀯𑀼𑀢𑁆𑀢𑀁. 𑀧𑀺𑀡𑁆𑀟𑀢𑁆𑀣𑀁 𑀧𑀝𑀺𑀧𑀺𑀡𑁆𑀟𑀤𑀸𑀦𑀁, 𑀧𑀺𑀡𑁆𑀟𑀁 𑀤𑀢𑁆𑀯𑀸 𑀧𑀝𑀺𑀧𑀺𑀡𑁆𑀟𑀕𑁆𑀕𑀳𑀡𑀁 𑀯𑀸 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀁. 𑀲𑀗𑁆𑀖𑀪𑁄𑀕𑀘𑁂𑀢𑀺𑀬𑀪𑁄𑀕𑀸𑀦𑀁 𑀅𑀬𑁄𑀦𑀺𑀲𑁄 𑀯𑀺𑀘𑀸𑀭𑀡𑀁 𑀲𑀗𑁆𑀖𑀼𑀧𑁆𑀧𑀸𑀤𑀘𑁂𑀢𑀺𑀬𑀼𑀧𑁆𑀧𑀸𑀤𑀧𑀝𑁆𑀞𑀧𑀦𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀯𑀺𑀬 𑀧𑀝𑀺𑀧𑀚𑁆𑀚𑀦𑀦𑁆𑀢𑀺 𑀓𑁂𑀘𑀺.

𑁫𑁧𑁪. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄, 𑀅𑀪𑀺𑀡𑁆𑀳𑀁 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀕𑀸𑀯𑁄 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀳𑀺 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁 𑀕𑁄𑀘𑀭𑁄. 𑀅𑀬𑀼𑀢𑁆𑀢𑁄 𑀕𑁄𑀘𑀭𑁄 𑀅𑀕𑁄𑀘𑀭𑁄𑀢𑀺 𑀢𑀤𑀜𑁆𑀜𑁄 𑀬𑀼𑀢𑁆𑀢𑁄 ‘‘𑀕𑁄𑀘𑀭𑁄’’𑀢𑀺 𑀯𑀼𑀢𑁆𑀢𑁄.

𑀯𑀸-𑀲𑀤𑁆𑀤𑁄 𑀯𑀺𑀥𑀼𑀦𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀦𑀺𑀤𑁆𑀥𑀼𑀢𑀓𑀺𑀩𑁆𑀩𑀺𑀲𑀸𑀦𑀺 𑀯𑀸’’𑀢𑀺.

𑁫𑁧𑁫. 𑀅𑀯𑀭𑀸 𑀧𑀘𑁆𑀙𑀺𑀫𑀸 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀑𑀭𑀫𑀢𑁆𑀢𑀓𑀸𑀦𑀺. 𑀲𑀁𑀬𑀫𑀓𑀭𑀡𑀻𑀬𑀸𑀦𑀻𑀢𑀺 𑀓𑀸𑀬𑀯𑀸𑀘𑀸𑀲𑀁𑀬𑀫𑀫𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀧𑀝𑀺𑀓𑀫𑁆𑀫𑀸𑀦𑀺, 𑀯𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺 𑀯𑀸. ‘‘𑀧𑀼𑀦 𑀦 𑀏𑀯𑀁 𑀓𑀭𑁄𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦𑁂𑀯 𑀯𑀸 𑀓𑀭𑀡𑀻𑀬𑀸𑀦𑀺 𑀲𑀁𑀯𑀭𑀓𑀭𑀡𑀻𑀬𑀸𑀦𑀺. 𑀤𑀺𑀯𑀺𑀯𑀺𑀳𑀸𑀭𑀚𑀦𑀧𑀤𑀯𑀸𑀲𑀻 𑀤𑀺𑀯𑀺𑀯𑀺𑀳𑀸𑀭𑀯𑀸𑀲𑀻. 𑀫𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀫𑁂𑀯 𑀅𑀥𑀺𑀝𑁆𑀞𑀸𑀦𑀸𑀯𑀺𑀓𑀫𑁆𑀫𑀁. 𑀤𑁂𑀲𑀦𑀸 𑀇𑀥 ‘‘𑀯𑀼𑀝𑁆𑀞𑀸𑀦𑀸𑀯𑀺𑀓𑀫𑁆𑀫’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀢𑁆𑀣 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀸𑀦𑀺 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸𑀦𑀻’’𑀢𑀺 𑀯𑀘𑀦𑀢𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀺𑀲𑀼𑀤𑁆𑀥𑀢𑁆𑀣𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸𑀦𑀺 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑀸𑀦𑀺 𑀯𑀚𑁆𑀚𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀆𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀲𑁆𑀲.

𑁫𑁧𑁬. ‘‘𑀇𑀥 𑀪𑀺𑀓𑁆𑀔𑀽’’𑀢𑀺 𑀪𑀺𑀓𑁆𑀔𑀼 𑀏𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀲𑀦𑁆𑀥𑀸𑀬 ‘‘𑀲𑁂𑀲𑀲𑀺𑀓𑁆𑀔𑀸 𑀧𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀺𑀓𑁆𑀔𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸’’𑀢𑀺 𑀆𑀳. 𑀪𑀺𑀓𑁆𑀔𑀼𑀕𑁆𑀕𑀳𑀡𑀁 𑀧𑀦 𑀅𑀕𑁆𑀕𑀧𑀭𑀺𑀲𑀸𑀫𑀼𑀔𑁂𑀦 𑀲𑀩𑁆𑀩𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀓𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀕𑀼𑀡𑀢𑁄 𑀯𑀸 𑀪𑀺𑀓𑁆𑀔𑀼 𑀅𑀥𑀺𑀧𑁆𑀧𑁂𑀢𑁄𑀢𑀺 𑀲𑀩𑁆𑀩𑀸𑀧𑀺 𑀲𑀺𑀓𑁆𑀔𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀩𑁆𑀩𑁂𑀦 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀬𑁂𑀦 𑀲𑀫𑀸𑀤𑀸𑀦𑁂𑀦 𑀲𑀩𑁆𑀩𑀸𑀧𑀺 𑀲𑀺𑀓𑁆𑀔𑀸 𑀲𑀫𑀸𑀤𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀁 𑀏𑀓𑀫𑁆𑀧𑀺 𑀲𑀩𑁆𑀩𑀲𑀫𑀸𑀤𑀸𑀦𑀓𑀺𑀘𑁆𑀘𑀓𑀭𑀢𑁆𑀢𑀸 𑀲𑀩𑁆𑀩𑀲𑀫𑀸𑀤𑀸𑀦𑀁 𑀦𑀸𑀫 𑀳𑁄𑀢𑀺, 𑀅𑀦𑁂𑀓𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀩𑁆𑀩𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀅𑀯𑀻𑀢𑀺𑀓𑁆𑀓𑀫𑀤𑁂𑀲𑀦𑀸𑀯𑀼𑀝𑁆𑀞𑀸𑀦𑀯𑀢𑁆𑀢𑀘𑀭𑀡𑀸𑀤𑀺𑀆𑀓𑀸𑀭𑁂𑀦. 𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀲𑁂𑀲𑀲𑁆𑀲𑀧𑀺 𑀦𑀺𑀲𑁆𑀲𑁂𑀲𑀢𑀸𑀓𑀭𑀡𑀁 𑀲𑀦𑁆𑀥𑀸𑀬 ‘‘𑀪𑀺𑀦𑁆𑀦𑀲𑁆𑀲𑀧𑀻’’𑀢𑀺𑀆𑀤𑀺𑀫𑀸𑀳.

𑁫𑁧𑁯. 𑀆𑀯𑀭𑀡𑀻𑀬𑁂𑀳𑀺 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑀪𑀸𑀯𑀦𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀪𑀸𑀯𑀦’’𑀦𑁆𑀢𑀺. 𑀲𑀼𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑀦𑁆𑀢𑀺 ‘‘𑀲𑀼𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑀁 𑀦𑀸𑀫 𑀇𑀤𑀁 𑀇𑀢𑁄 𑀧𑀼𑀩𑁆𑀩𑁂 𑀇𑀢𑁄 𑀧𑀭𑀜𑁆𑀘 𑀦𑀢𑁆𑀣𑀺, 𑀅𑀬𑀫𑁂𑀢𑀲𑁆𑀲 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀧𑀭𑀺𑀕𑁆𑀕𑀸𑀳𑀓𑀁.

𑁫𑁨𑁦-𑁫𑁨𑁧. 𑀬𑀼𑀢𑁆𑀢𑁄𑀢𑀺 𑀆𑀭𑀫𑁆𑀪𑀫𑀸𑀦𑁄. 𑀲𑀸𑀢𑀘𑁆𑀘𑀁 𑀦𑁂𑀧𑀓𑁆𑀓𑀜𑁆𑀘 𑀧𑀯𑀢𑁆𑀢𑀬𑀫𑀸𑀦𑁄 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺.

𑁫𑁨𑁨. 𑀮𑁄𑀓𑀺𑀬𑀸𑀬𑀧𑀺…𑀧𑁂… 𑀆𑀳𑀸𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀳 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺 𑀇𑀦𑁆𑀤𑁆𑀭𑀺𑀬𑀩𑀮𑀸𑀦𑀺 𑀩𑁄𑀚𑁆𑀛𑀗𑁆𑀕𑁂𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸𑀦𑀺 𑀳𑁄𑀦𑁆𑀢𑀺. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀕𑁆𑀕𑀳𑀡𑁂𑀦 𑀳𑀺 𑀢𑀤𑀼𑀧𑀦𑀺𑀲𑁆𑀲𑀬𑀪𑀽𑀢𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀤𑁆𑀥𑀸𑀩𑀮𑀜𑁆𑀘 𑀕𑀳𑀺𑀢𑀫𑁂𑀯 𑀳𑁄𑀢𑀺 ‘‘𑀲𑀤𑁆𑀥𑀽𑀧𑀦𑀺𑀲𑀁 𑀧𑀸𑀫𑁄𑀚𑁆𑀚’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁩) 𑀯𑀼𑀢𑁆𑀢𑀢𑁆𑀢𑀸. 𑀫𑀕𑁆𑀕𑀗𑁆𑀕𑀸𑀦𑀺 𑀧𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁫𑁨𑁩. 𑀲𑀫𑀦𑁆𑀢𑀢𑁄, 𑀲𑀫𑁆𑀫𑀸, 𑀲𑀫𑀁 𑀯𑀸 𑀲𑀸𑀢𑁆𑀣𑀓𑀸𑀤𑀺𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑀤𑁂𑀯 𑀲𑀫𑁆𑀧𑀚𑀜𑁆𑀜𑀁. 𑀢𑁂𑀦𑀸𑀢𑀺 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀏𑀯 𑀉𑀤𑁆𑀤𑁂𑀲𑁂 𑀅𑀯𑀼𑀢𑁆𑀢𑀸𑀧𑀺 𑀲𑀢𑀺 𑀦𑀺𑀤𑁆𑀤𑁂𑀲𑁂 ‘‘𑀲𑀢𑁄’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀢𑁆𑀣𑀓𑀸𑀦𑀁 𑀅𑀪𑀺𑀓𑁆𑀓𑀫𑀸𑀤𑀻𑀦𑀁 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀏𑀯𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀦 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁.

𑀤𑁆𑀯𑁂 𑀓𑀣𑀸𑀢𑀺 𑀯𑀘𑀦𑀓𑀭𑀡𑀸𑀓𑀭𑀡𑀓𑀣𑀸 𑀦 𑀓𑀣𑀺𑀢𑀧𑀼𑀩𑁆𑀩𑀸. 𑀯𑀘𑀦𑀁 𑀓𑀭𑁄𑀫𑀺 𑀏𑀯, 𑀢𑀲𑁆𑀫𑀸 𑀲𑀼𑀩𑁆𑀩𑀘𑀢𑁆𑀢𑀸 𑀧𑀝𑀺𑀯𑀘𑀦𑀁 𑀤𑁂𑀫𑀻𑀢𑀺 𑀅𑀢𑁆𑀣𑁄.

𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑁂𑀦𑁂𑀯, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀧𑀢𑁆𑀢𑀫𑁆𑀧𑀺 𑀅𑀘𑁂𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺 𑀏𑀢𑀲𑁆𑀲 ‘‘𑀥𑀫𑁆𑀫𑀓𑀣𑀸 𑀓𑀣𑁂𑀢𑀩𑁆𑀩𑀸𑀬𑁂𑀯𑀸𑀢𑀺 𑀯𑀤𑀦𑁆𑀢𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂.

𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀞𑀸𑀦𑀘𑀗𑁆𑀓𑀫𑀦𑀫𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀺𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀸𑀤𑀺𑀓𑀸𑀮𑁂 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑀺𑀲𑀚𑁆𑀚𑀸𑀬𑀧𑀺 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀣𑁂𑀭𑁄 𑀤𑀸𑀭𑀼𑀘𑀻𑀭𑀺𑀬𑁄 𑁋

‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂 𑀫𑀼𑀢𑁂 𑀯𑀺𑀜𑁆𑀜𑀸𑀢𑁂. 𑀬𑀢𑁄 𑀔𑁄 𑀢𑁂, 𑀩𑀸𑀳𑀺𑀬, 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂 𑀫𑀼𑀢𑁂 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦, 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦. 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣, 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣. 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀉𑀤𑀸. 𑁧𑁦) 𑁋

𑀏𑀢𑁆𑀢𑀓𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺.

𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀆𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀅𑀬𑀁 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄. 𑀅𑀯𑀻𑀘𑀺𑀦𑁆𑀢𑀺 𑀦𑀺𑀭𑀦𑁆𑀢𑀭𑀁.

𑀧𑀞𑀫𑀚𑀯𑀦𑁂𑀧𑀺…𑀧𑁂… 𑀦 𑀳𑁄𑀢𑀻𑀢𑀺 𑀇𑀤𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑁄𑀢𑀺 𑀭𑀚𑁆𑀚𑀦𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀘 𑀧𑀝𑀺𑀖𑁄 𑀉𑀧𑁆𑀧𑀚𑁆𑀚𑀢𑀺. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀇𑀢𑁆𑀣𑀺𑀧𑀼𑀭𑀺𑀲𑁄𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺, 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀪𑀯𑀗𑁆𑀕𑀸𑀤𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀯𑀲𑁂𑀦 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀢𑀺𑀢𑁆𑀢𑀭𑀢𑀸𑀯𑀲𑁂𑀦. 𑀫𑀡𑀺𑀲𑀧𑁆𑀧𑁄 𑀲𑀻𑀳𑀴𑀤𑀻𑀧𑁂 𑀯𑀺𑀚𑁆𑀚𑀫𑀸𑀦𑀸 𑀏𑀓𑀸 𑀲𑀧𑁆𑀧𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀘𑀮𑀦𑀦𑁆𑀢𑀺 𑀓𑀫𑁆𑀧𑀦𑀁.

𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀆𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀬𑀸𑀯 𑀓𑀼𑀘𑁆𑀙𑀺, 𑀢𑀸𑀯 𑀳𑀭𑀢𑀺, 𑀓𑀼𑀘𑁆𑀙𑀺𑀕𑀢𑀁 𑀯𑀸 𑀧𑀲𑁆𑀲𑀢𑁄 𑀳𑀭𑀢𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀯𑀸𑀬𑀼𑀆𑀤𑀻𑀳𑀺 𑀅𑀢𑀺𑀯𑀺𑀲𑁄𑀲𑀦𑀁 𑀬𑀣𑀸 𑀦 𑀳𑁄𑀢𑀺, 𑀢𑀣𑀸 𑀧𑀸𑀮𑁂𑀢𑀺. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀁 𑀆𑀯𑀚𑁆𑀚𑁂𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀯𑀺𑀚𑀸𑀦𑀦𑀦𑀺𑀧𑁆𑀨𑀸𑀤𑀓𑁄𑀬𑁂𑀯 𑀳𑀺 𑀧𑀬𑁄𑀕𑁄 ‘‘𑀲𑀫𑁆𑀫𑀸𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑁄𑀢𑀺. 𑀅𑀣 𑀯𑀸 ‘‘𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀸𑀕𑀫𑁆𑀫 𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀪𑀼𑀚𑀦𑀓𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀺𑀚𑀸𑀦𑀦𑀁 𑀆𑀪𑀼𑀚𑀦𑀁.

𑀅𑀝𑁆𑀞𑀸𑀦𑁂𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀅𑀬𑀼𑀢𑁆𑀢𑁂 𑀞𑀸𑀦𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂. 𑀢𑀼𑀫𑁆𑀩𑀢𑁄 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀢𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀁 𑀉𑀤𑀓𑀁.

𑀕𑀢𑁂𑀢𑀺 𑀕𑀫𑀦𑁂𑀢𑀺 𑀧𑀼𑀩𑁆𑀩𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀕𑁆𑀕𑀳𑀡𑁂𑀦 𑀕𑀫𑀦𑁂𑀧𑀺 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀢𑀺𑀳𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀕𑀫𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀯𑀓𑁆𑀔𑀫𑀸𑀦𑁄 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄.

𑀏𑀢𑁆𑀢𑀓𑁂𑀦𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀧𑀯𑀢𑁆𑀢𑀦𑀯𑀘𑀦𑀫𑀢𑁆𑀢𑁂𑀦 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦 𑀲𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀸𑀲𑀼 𑀏𑀯 𑀧𑀯𑀢𑁆𑀢𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀲𑀼𑀢𑁆𑀢𑁂 𑀧𑀯𑀢𑁆𑀢𑀸 𑀅𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀬𑀸𑀤𑀺𑀓𑀺𑀭𑀺𑀬𑀸𑀫𑀬𑀢𑁆𑀢𑀸 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀁 𑀦𑀸𑀫, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀯𑀺𑀭𑀳𑀸 ‘‘𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 𑀯𑀼𑀘𑁆𑀘𑀢𑀺.

𑁫𑁨𑁬. 𑀉𑀧𑀸𑀲𑀦𑀝𑁆𑀞𑀸𑀦𑀦𑁆𑀢𑀺 𑀇𑀲𑁆𑀲𑀸𑀲𑀸𑀦𑀁 𑀯𑀺𑀬 𑀉𑀧𑀸𑀲𑀦𑀲𑁆𑀲 𑀲𑀺𑀓𑁆𑀔𑀸𑀬𑁄𑀕𑀓𑀭𑀡𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀉𑀧𑀸𑀲𑀦𑀲𑁆𑀲 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀕𑀧𑀣’’𑀦𑁆𑀢𑀺 𑀆𑀳𑀸𑀢𑀺. 𑀲𑀻𑀲𑀁 𑀥𑁄𑀯𑀢𑀻𑀢𑀺 𑀇𑀘𑁆𑀙𑀸𑀤𑀸𑀲𑀩𑁆𑀬𑀸 𑀪𑀼𑀚𑀺𑀲𑁆𑀲𑀢𑀁 𑀜𑀸𑀧𑀬𑀢𑀺, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂𑀳𑀺 𑀯𑀸 𑀧𑀓𑁆𑀔𑀺𑀢𑁆𑀢𑀁 𑀅𑀬𑀲𑀭𑀚𑀁 𑀥𑁄𑀯𑀢𑀺.

𑁫𑁨𑁯. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑁂 𑀆𑀕𑀢𑀁. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑁂 ‘‘𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀆𑀕𑀢𑀁 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬. 𑀦 𑀳𑀺 𑀲𑁄 𑀯𑀺𑀦𑀬𑀧𑀭𑀺𑀬𑀸𑀬𑀺𑀓𑁂 𑀅𑀭𑀜𑁆𑀜𑁂 𑀯𑀲𑀦𑀢𑁄 ‘‘𑀆𑀭𑀜𑁆𑀜𑀓𑁄 𑀧𑀦𑁆𑀢𑀲𑁂𑀦𑀸𑀲𑀦𑁄’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄𑀢𑀺.

𑁫𑁩𑁦. ‘‘𑀦𑀺𑀢𑀼𑀫𑁆𑀩’’𑀦𑁆𑀢𑀺𑀧𑀺 ‘‘𑀦𑀤𑀻𑀓𑀼𑀜𑁆𑀚’’𑀦𑁆𑀢𑀺𑀧𑀺 𑀬𑀁 𑀯𑀤𑀦𑁆𑀢𑀺, 𑀢𑀁 𑀓𑀦𑁆𑀤𑀭𑀦𑁆𑀢𑀺 𑀅𑀧𑀩𑁆𑀩𑀢𑀧𑀤𑁂𑀲𑁂𑀧𑀺 𑀯𑀺𑀤𑀼𑀕𑁆𑀕𑀦𑀤𑀻𑀦𑀺𑀯𑀢𑁆𑀢𑀦𑀧𑀤𑁂𑀲𑀁 𑀓𑀦𑁆𑀤𑀭𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁫𑁩𑁧. 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀏𑀢𑁂𑀦 𑀪𑀸𑀚𑁂𑀢𑀩𑁆𑀩𑀢𑀁 𑀅𑀦𑁆𑀢𑁂 𑀦𑀺𑀤𑁆𑀤𑁂𑀲𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺.

𑁫𑁩𑁩. 𑀭𑀳𑀲𑁆𑀲 𑀓𑀺𑀭𑀺𑀬𑀸 𑀭𑀳𑀲𑁆𑀲𑀁, 𑀢𑀁 𑀅𑀭𑀳𑀢𑀺 𑀢𑀲𑁆𑀲 𑀬𑁄𑀕𑁆𑀕𑀦𑁆𑀢𑀺 𑀭𑀸𑀳𑀲𑁆𑀲𑁂𑀬𑁆𑀬𑀓𑀁. 𑀯𑀺𑀘𑀺𑀢𑁆𑀢𑀸 𑀳𑀺 𑀢𑀤𑁆𑀥𑀺𑀢𑀸𑀢𑀺. 𑀭𑀳𑀲𑀺 𑀯𑀸 𑀲𑀸𑀥𑀼 𑀭𑀳𑀲𑁆𑀲𑀁, 𑀢𑀲𑁆𑀲 𑀬𑁄𑀕𑁆𑀕𑀁 𑀭𑀸𑀳𑀲𑁆𑀲𑁂𑀬𑁆𑀬𑀓𑀁.

𑁫𑁩𑁬. 𑀧𑀡𑀺𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑁄.

𑁫𑁩𑁭. 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀲𑀪𑀸𑀯𑀁, 𑀓𑀸𑀬𑀸𑀤𑀻𑀲𑀼 𑀲𑀼𑀝𑁆𑀞𑀼 𑀧𑀯𑀢𑁆𑀢𑀺𑀬𑀸 𑀦𑀺𑀬𑁆𑀬𑀸𑀦𑀲𑀪𑀸𑀯𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀸𑀤𑀺𑀧𑀭𑀺𑀕𑁆𑀕𑀳𑀡𑀁 𑀜𑀸𑀡𑀁 𑀯𑀸 𑀧𑀭𑀺𑀕𑁆𑀕𑀳𑁄, 𑀢𑀁-𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀦𑀺𑀬𑁆𑀬𑀸𑀦𑀪𑀽𑀢𑀁 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁫𑁪𑁨-𑁫𑁪𑁩. 𑀯𑀺𑀓𑀸𑀭𑀧𑁆𑀧𑀢𑁆𑀢𑀺𑀬𑀸𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀸𑀧𑀢𑁆𑀢𑀺𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑀸𑀢𑀺 𑀲𑀢𑁆𑀢𑀲𑀗𑁆𑀔𑀸𑀭𑀕𑀢𑀲𑀩𑁆𑀩𑀓𑁄𑀥𑀲𑀗𑁆𑀕𑀸𑀳𑀺𑀓𑀯𑀲𑁂𑀦. 𑀲𑀩𑁆𑀩𑀲𑀗𑁆𑀕𑀳𑀡𑀜𑁆𑀘 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀲𑁆𑀲𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁪𑁬. 𑀇𑀤𑀁 𑀲𑀦𑁆𑀥𑀸𑀬𑀸𑀢𑀺 ‘‘𑀤𑁆𑀯𑁂 𑀥𑀫𑁆𑀫𑀸’’𑀢𑀺 𑀲𑀦𑁆𑀥𑀸𑀬. 𑀏𑀓𑀯𑀘𑀦𑁂𑀦 ‘‘𑀣𑀺𑀦𑀫𑀺𑀤𑁆𑀥’’𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀦𑀺𑀤𑁆𑀤𑁂𑀲𑁂 ‘‘𑀲𑀦𑁆𑀢𑀸’’𑀢𑀺 𑀯𑀘𑀦𑀪𑁂𑀤𑁄, 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀲𑀦𑁆𑀢𑀢𑀸𑀬𑀸𑀢𑀺 𑀯𑀘𑀦𑀁 𑀅𑀗𑁆𑀕𑀲𑀦𑁆𑀢𑀢𑀸𑀬, 𑀲𑀪𑀸𑀯𑀲𑀦𑁆𑀢𑀢𑀸𑀬 𑀯𑀸 𑀲𑀦𑁆𑀢𑀢𑀸𑀦𑀺𑀯𑀸𑀭𑀡𑀢𑁆𑀣𑀁.

𑁫𑁫𑁦. 𑀣𑀺𑀦𑀫𑀺𑀤𑁆𑀥𑀯𑀺𑀓𑀸𑀭𑀯𑀺𑀭𑀳𑀸 𑀢𑀧𑁆𑀧𑀝𑀺𑀧𑀓𑁆𑀔𑀲𑀜𑁆𑀜𑀸 𑀆𑀮𑁄𑀓𑀲𑀜𑁆𑀜𑀸 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀅𑀬𑀁 𑀲𑀜𑁆𑀜𑀸 𑀆𑀮𑁄𑀓𑀸 𑀳𑁄𑀢𑀻’’𑀢𑀺.

𑁫𑁫𑁩. ‘‘𑀯𑀦𑁆𑀢𑀢𑁆𑀢𑀸 𑀫𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀻𑀦𑀺, ‘‘𑀆𑀮𑁄𑀓𑀸 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀘 ‘‘𑀘𑀢𑁆𑀢𑀢𑁆𑀢𑀸𑀢𑀺𑀆𑀤𑀻𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀤𑁆𑀤𑁂𑀲𑀧𑀤𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀬𑀸𑀦𑀺 𑀬𑁂𑀲𑀁 𑀯𑁂𑀯𑀘𑀦𑀸𑀦𑀺, 𑀢𑀸𑀦𑁂𑀯 𑀲𑀦𑁆𑀥𑀸𑀬 ‘‘𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀝𑀺𑀫𑀼𑀜𑁆𑀘𑀢𑁄𑀢𑀺 𑀏𑀢𑁂𑀦 𑀲𑀸𑀭𑀫𑁆𑀪𑀁 𑀅𑀪𑀺𑀪𑀯𑀁 𑀤𑀲𑁆𑀲𑁂𑀢𑀺. 𑀦𑀺𑀭𑀸𑀯𑀭𑀡𑀸 𑀳𑀼𑀢𑁆𑀯𑀸 𑀆𑀪𑀼𑀚𑀢𑀺 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀦𑀺𑀭𑀸𑀯𑀭𑀡𑀸𑀪𑁄𑀕𑀸, 𑀢𑀁𑀲𑀪𑀸𑀯𑀢𑁆𑀢𑀸 𑀯𑀺𑀯𑀝𑀸.

𑁫𑁫𑁬. ‘‘𑀯𑀺𑀓𑀸𑀮𑁄 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀅𑀦𑀺𑀘𑁆𑀙𑀬𑀢𑀸𑀬 𑀓𑀢𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀫𑀽𑀮𑀓𑁄 𑀯𑀺𑀧𑁆𑀧𑀝𑀺𑀲𑀸𑀭𑁄 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑁄 𑀓𑀸𑀭𑀡𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑁫𑁬𑁨. 𑀓𑀺𑀮𑀺𑀲𑁆𑀲𑀦𑁆𑀢𑀻𑀢𑀺 𑀓𑀺𑀮𑁂𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀲𑀤𑀭𑀣𑀪𑀸𑀯𑁂𑀦 𑀲𑀬𑀫𑁂𑀯 𑀯𑀸 𑀓𑀺𑀮𑀺𑀲𑁆𑀲𑀦𑁆𑀢𑀺. 𑀦 𑀳𑀺 𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀓𑀺𑀮𑁂𑀲𑀭𑀳𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑁫𑁬𑁪. 𑀇𑀥𑁂𑀯 𑀘 𑀯𑀺𑀪𑀗𑁆𑀕𑁂 ‘‘𑀉𑀧𑁂𑀢𑁄 𑀳𑁄𑀢𑀻’’𑀢𑀺𑀆𑀤𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯.

𑁫𑁮𑁮. 𑀦𑀺𑀤𑁆𑀤𑁂𑀲𑀯𑀲𑁂𑀦𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀉𑀧𑁂𑀓𑁆𑀔𑀸? 𑀬𑀸 𑀉𑀧𑁂𑀓𑁆𑀔𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀯𑀲𑁂𑀦. ‘‘𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀉𑀧𑁂𑀢𑁄 𑀳𑁄𑀢𑀻’’𑀢𑀺𑀆𑀤𑀺 𑀧𑀝𑀺𑀦𑀺𑀤𑁆𑀤𑁂𑀲𑀯𑀲𑁂𑀦𑀸𑀢𑀺 𑀯𑀤𑀦𑁆𑀢𑀺. ‘‘𑀢𑀢𑁆𑀣 𑀓𑀢𑀫𑀸…𑀧𑁂… 𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀉𑀧𑁂𑀢𑁄 𑀳𑁄𑀢𑀻’’𑀢𑀺 𑀏𑀢𑁂𑀦 𑀧𑀼𑀕𑁆𑀕𑀮𑁄 𑀦𑀺𑀤𑁆𑀤𑀺𑀝𑁆𑀞𑁄 𑀳𑁄𑀢𑀺, ‘‘𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀦𑀺𑀤𑁆𑀤𑀺𑀝𑁆𑀞𑁄. 𑀬𑀸𑀯 𑀯𑀸 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀧𑀤𑀁, 𑀢𑀸𑀯 𑀦𑀺𑀤𑁆𑀤𑀺𑀝𑁆𑀞𑁄, ‘‘𑀢𑁂𑀦 𑀯𑀼𑀘𑁆𑀘𑀢𑀺 𑀉𑀧𑁂𑀓𑁆𑀔𑀓𑁄’’𑀢𑀺 𑀇𑀫𑀺𑀦𑀸 𑀧𑀝𑀺𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑁂𑀲𑀁 𑀯𑀲𑁂𑀦 𑀦𑀺𑀤𑁆𑀤𑁂𑀲𑀧𑀝𑀺𑀦𑀺𑀤𑁆𑀤𑁂𑀲𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀓𑀸𑀭𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀬 ‘‘𑀉𑀧𑁂𑀓𑁆𑀔𑀦𑀸’’𑀢𑀺𑀆𑀤𑀺𑀥𑀫𑁆𑀫𑀧𑁆𑀧𑀓𑀸𑀭𑁂𑀦 ‘‘𑀉𑀧𑁂𑀢𑁄 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀧𑀼𑀕𑁆𑀕𑀮𑀧𑁆𑀧𑀓𑀸𑀭𑁂𑀦 𑀘 𑀉𑀧𑁂𑀓𑁆𑀔𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀞𑀧𑁂𑀦𑁆𑀢𑁄 𑀧𑀝𑁆𑀞𑀧𑁂𑀦𑁆𑀢𑀺. ‘‘𑀉𑀧𑁂𑀓𑁆𑀔𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀉𑀧𑁂𑀓𑁆𑀔𑀦𑀸’’𑀢𑀺 𑀓𑀸𑀭𑀡𑀁. 𑀉𑀧𑁂𑀓𑁆𑀔𑀦𑀸𑀯𑀲𑁂𑀦 𑀳𑀺 𑀉𑀧𑁂𑀓𑁆𑀔𑀸𑀢𑀺. 𑀢𑀣𑀸 ‘‘𑀉𑀧𑁂𑀢𑁄 𑀲𑀫𑀼𑀧𑁂𑀢𑁄’’𑀢𑀺 𑀏𑀢𑁂𑀲𑀁 ‘‘𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄’’𑀢𑀺 𑀓𑀸𑀭𑀡𑀦𑁆𑀢𑀺 𑀏𑀯𑀁 𑀥𑀫𑁆𑀫𑀧𑀼𑀕𑁆𑀕𑀮𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲𑀢𑁆𑀣𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀯𑀭𑀦𑁆𑀢𑀺, ‘‘𑀉𑀧𑁂𑀓𑁆𑀔𑀓𑁄’’𑀢𑀺 𑀇𑀫𑀲𑁆𑀲𑁂𑀯 𑀯𑀸 𑀅𑀢𑁆𑀣𑀲𑁆𑀲 ‘‘𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀉𑀧𑁂𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑀸. ‘‘𑀉𑀧𑁂𑀓𑁆𑀔𑀦𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀲𑀫𑀼𑀧𑁂𑀢𑁄’’𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀸𑀦𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀪𑀚𑀦𑁆𑀢𑀺. 𑀉𑀧𑁂𑀓𑁆𑀔𑀓-𑀲𑀤𑁆𑀤𑀦𑁆𑀢𑁄𑀕𑀥𑀸𑀬 𑀯𑀸 𑀉𑀧𑁂𑀓𑁆𑀔𑀸𑀬 𑀢𑀲𑁆𑀲𑁂𑀯 𑀘 𑀉𑀧𑁂𑀓𑁆𑀔𑀓-𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑀯𑀘𑀦𑀁 ‘‘𑀬𑀸 𑀉𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀦𑀸’’𑀢𑀺𑀆𑀤𑀺𑀦𑀸, ‘‘𑀇𑀫𑀸𑀬 𑀉𑀧𑁂𑀓𑁆𑀔𑀸𑀬 𑀉𑀧𑁂𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘 𑀩𑁆𑀬𑀜𑁆𑀚𑀦𑀯𑀺𑀪𑀸𑀕𑁄. 𑀲𑀩𑁆𑀩𑀣𑀸 𑀅𑀜𑁆𑀜𑀸𑀢𑀢𑀸 𑀦𑀺𑀓𑀼𑀚𑁆𑀛𑀺𑀢𑀪𑀸𑀯𑁄, 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀯𑀺𑀜𑁆𑀜𑀸𑀢𑁂𑀧𑀺 𑀦𑀺𑀭𑀯𑀲𑁂𑀲𑀧𑀭𑀺𑀘𑁆𑀙𑀺𑀦𑁆𑀤𑀦𑀸𑀪𑀸𑀯𑁄 𑀕𑀫𑁆𑀪𑀻𑀭𑀪𑀸𑀯𑁄.

𑁬𑁦𑁨. 𑀉𑀧𑀭𑀺𑀪𑀽𑀫𑀺𑀧𑁆𑀧𑀢𑁆𑀢𑀺𑀬𑀸𑀢𑀺 𑀇𑀤𑀁 ‘‘𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸’’𑀢𑀺 𑀏𑀢𑁆𑀣𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀦𑀺𑀧𑀺 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀁 𑀉𑀧𑀭𑀺𑀪𑀽𑀫𑀺𑀬𑁄𑀢𑀺 𑀲𑀩𑁆𑀩𑀢𑁆𑀣𑀸𑀧𑀺 𑀦 𑀦 𑀬𑀼𑀚𑁆𑀚𑀢𑀺.

𑁬𑁧𑁦. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑀺𑀤𑁆𑀤𑁂𑀲𑁂 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀁𑀬𑁂𑀯 𑀆𑀓𑀸𑀲𑀁 𑀯𑀺𑀜𑁆𑀜𑀸𑀡𑁂𑀦 𑀨𑀼𑀝𑀁 𑀫𑀦𑀲𑀺 𑀓𑀭𑁄𑀢𑀺 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀢𑁆𑀣 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀏𑀢𑀁 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀢𑀁𑀬𑁂𑀯 𑀆𑀓𑀸𑀲𑀁 𑀨𑀼𑀝𑀁 𑀯𑀺𑀜𑁆𑀜𑀸𑀡𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀓𑀺𑀭 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀯𑀸 𑀏𑀢𑀲𑁆𑀲 𑀅𑀢𑁆𑀣𑁄 𑁋 𑀢𑀁𑀬𑁂𑀯 𑀆𑀓𑀸𑀲𑀁 𑀨𑀼𑀝𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑁂𑀦 𑀫𑀦𑀲𑀺 𑀓𑀭𑁄𑀢𑀻𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀬𑀼𑀢𑁆𑀢𑁄 𑁋 𑀢𑀁𑀬𑁂𑀯 𑀆𑀓𑀸𑀲𑀁 𑀯𑀺𑀜𑁆𑀜𑀸𑀡𑁂𑀦 𑀨𑀼𑀝𑀁 𑀢𑁂𑀦 𑀕𑀳𑀺𑀢𑀸𑀓𑀸𑀭𑀁 𑀫𑀦𑀲𑀺 𑀓𑀭𑁄𑀢𑀺, 𑀏𑀯𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺. 𑀬𑀜𑁆𑀳𑀺 𑀆𑀓𑀸𑀲𑀁 𑀧𑀞𑀫𑀸𑀭𑀼𑀧𑁆𑀧𑀲𑀫𑀗𑁆𑀕𑀻 𑀯𑀺𑀜𑁆𑀜𑀸𑀡𑁂𑀦 𑀅𑀦𑀦𑁆𑀢𑀁 𑀨𑀭𑀢𑀺, 𑀢𑀁 𑀨𑀭𑀡𑀸𑀓𑀸𑀭𑀲𑀳𑀺𑀢𑀫𑁂𑀯 𑀯𑀺𑀜𑁆𑀜𑀸𑀡𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀤𑀼𑀢𑀺𑀬𑀸𑀭𑀼𑀧𑁆𑀧𑀲𑀫𑀗𑁆𑀕𑀻 𑀅𑀦𑀦𑁆𑀢𑀁 𑀨𑀭𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺.

𑁬𑁧𑁫. 𑀢𑀁𑀬𑁂𑀯 𑀯𑀺𑀜𑁆𑀜𑀸𑀡𑀁 𑀅𑀪𑀸𑀯𑁂𑀢𑀻𑀢𑀺 𑀬𑀁 𑀧𑀼𑀩𑁆𑀩𑁂 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀫𑀦𑀲𑀺 𑀓𑀢𑀁, 𑀢𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯 𑀳𑀺 𑀆𑀭𑀫𑁆𑀫𑀡𑀪𑀽𑀢𑀁 𑀧𑀞𑀫𑁂𑀦 𑀯𑀺𑀬 𑀭𑀽𑀧𑀦𑀺𑀫𑀺𑀢𑁆𑀢𑀁 𑀢𑀢𑀺𑀬𑁂𑀦𑀸𑀭𑀼𑀧𑁆𑀧𑁂𑀦 𑀅𑀪𑀸𑀯𑁂𑀢𑀻𑀢𑀺.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁬𑁨𑁩. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀧𑀜𑁆𑀘𑀓𑀦𑀬𑀤𑀲𑁆𑀲𑀦𑁂 ‘‘𑀧𑀜𑁆𑀘 𑀛𑀸𑀦𑀸𑀦𑀻’’𑀢𑀺 𑀘, ‘‘𑀢𑀢𑁆𑀣 𑀓𑀢𑀫𑀁 𑀧𑀞𑀫𑀁 𑀛𑀸𑀦’’𑀦𑁆𑀢𑀺 𑀘 𑀆𑀤𑀺𑀦𑀸 𑀉𑀤𑁆𑀥𑀝𑀁. 𑀉𑀤𑁆𑀥𑀝𑀸𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀧𑀞𑀫𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀚𑁆𑀛𑀸𑀦𑀸𑀦𑀁 𑀤𑀲𑁆𑀲𑀦𑀢𑁄, 𑀤𑀼𑀢𑀺𑀬𑀲𑁆𑀲𑁂𑀯 𑀯𑀺𑀲𑁂𑀲𑀤𑀲𑁆𑀲𑀦𑀢𑁄 𑀘.

𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸

𑁬𑁪𑁦. 𑀮𑁄𑀓𑀼𑀢𑁆𑀢𑀭𑀸𑀧𑀦𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼𑀛𑀸𑀦𑁂𑀲𑀼 ‘‘𑀮𑁄𑀓𑀼𑀢𑁆𑀢𑀭𑀸 𑀲𑀺𑀬𑀸 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀸’’𑀢𑀺 𑀏𑀯𑀁 𑀓𑁄𑀝𑁆𑀞𑀸𑀲𑀺𑀓𑀸 𑀧𑀦 𑀫𑀕𑁆𑀕𑀓𑀸𑀮𑁂, 𑀨𑀮𑀓𑀸𑀮𑁂 𑀯𑀸 𑀮𑁄𑀓𑀼𑀢𑁆𑀢𑀭𑀪𑀽𑀢𑀸 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑀸𑀮𑁄𑀓𑀓𑀲𑀺𑀡𑀸𑀦𑀸𑀧𑀸𑀦𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀢𑁆𑀣𑀸𑀦𑀺 𑀲𑀩𑁆𑀩𑀢𑁆𑀣𑀧𑀸𑀤𑀓𑀘𑀢𑀼𑀢𑁆𑀣𑁂 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀫𑀕𑁆𑀕𑀁 𑀪𑀸𑀯𑀬𑀺𑀁𑀲𑀼, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀁𑀲𑀽𑀢𑀺, 𑀪𑀸𑀯𑁂𑀲𑁆𑀲𑀦𑁆𑀢𑀺 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀘 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀲𑀮𑀢𑁄 𑀢𑁂𑀭𑀲𑀲𑀼 𑀳𑀺 𑀘𑀢𑀼𑀢𑁆𑀣𑁂𑀲𑀼 𑀅𑀬𑀁 𑀓𑀣𑀸 𑀧𑀯𑀢𑁆𑀢𑀸, 𑀦 𑀘 𑀓𑀼𑀲𑀮𑀘𑀢𑀼𑀢𑁆𑀣𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀸𑀦𑀺 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺.

‘‘𑀓𑀺𑀭𑀺𑀬𑀢𑁄 𑀢𑁂𑀭𑀲𑀦𑁆𑀦’’𑀦𑁆𑀢𑀺 𑀏𑀢𑁆𑀣 𑀮𑁄𑀓𑀼𑀢𑁆𑀢𑀭𑀘𑀢𑀼𑀢𑁆𑀣𑀁 𑀓𑀺𑀭𑀺𑀬𑀁 𑀦𑀢𑁆𑀣𑀻𑀢𑀺 ‘‘𑀤𑁆𑀯𑀸𑀤𑀲𑀦𑁆𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀓𑀼𑀲𑀮𑀢𑁄 𑀯𑀸 𑀢𑁂𑀭𑀲𑀲𑀼 𑀲𑁂𑀓𑁆𑀔𑀨𑀮𑀘𑀢𑀼𑀢𑁆𑀣𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 ‘‘𑀓𑀺𑀭𑀺𑀬𑀢𑁄 𑀢𑁂𑀭𑀲𑀦𑁆𑀦’’𑀦𑁆𑀢𑀺 𑀅𑀲𑁂𑀓𑁆𑀔𑀘𑀢𑀼𑀢𑁆𑀣𑁂𑀦 𑀲𑀳 𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑀧𑀸𑀤𑀓𑀜𑁆𑀘𑁂𑀢𑁆𑀣 𑀔𑀻𑀡𑀸𑀲𑀯𑀸𑀦𑀁 𑀬𑀸𑀦𑀺 𑀅𑀪𑀺𑀜𑁆𑀜𑀸𑀤𑀻𑀦𑀺 𑀲𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀧𑀸𑀤𑀓𑀢𑁆𑀢𑀸 𑀲𑀩𑁆𑀩𑀢𑁆𑀣𑀧𑀸𑀤𑀓𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀢𑁂𑀲𑀁 𑀯𑀝𑁆𑀝𑀁 𑀅𑀢𑁆𑀣𑀻𑀢𑀺. 𑀧𑀭𑀺𑀘𑁆𑀙𑀦𑁆𑀦𑀸𑀓𑀸𑀲𑀓𑀲𑀺𑀡𑀘𑀢𑀼𑀢𑁆𑀣𑀸𑀤𑀻𑀦𑀺 𑀯𑀺𑀬 𑀯𑀸 𑀦𑀯𑀢𑁆𑀢𑀩𑁆𑀩𑀢𑀸𑀬 𑀲𑀩𑁆𑀩𑀢𑁆𑀣𑀧𑀸𑀤𑀓𑀲𑀫𑀸𑀦𑀢𑁆𑀢𑀸 𑀲𑀩𑁆𑀩𑀢𑁆𑀣𑀧𑀸𑀤𑀓𑀢𑀸 𑀤𑀝𑁆𑀞𑀩𑁆𑀩𑀸.

𑀫𑀦𑁄𑀲𑀗𑁆𑀔𑀸𑀭𑀸 𑀦𑀸𑀫 𑀲𑀜𑁆𑀜𑀸𑀯𑁂𑀤𑀦𑀸, 𑀘𑀢𑁆𑀢𑀸𑀭𑁄𑀧𑀺 𑀯𑀸 𑀔𑀦𑁆𑀥𑀸. 𑀦𑀺𑀫𑀺𑀢𑁆𑀢𑀁 𑀆𑀭𑀩𑁆𑀪𑀸𑀢𑀺 𑀏𑀢𑁆𑀣 ‘‘𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁.

‘‘𑀅𑀚𑁆𑀛𑀢𑁆𑀢𑁄 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁨𑁦.𑁨𑁮) 𑀏𑀢𑁆𑀣 ‘‘𑀅𑀚𑁆𑀛𑀢𑁆𑀢𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀯𑀺𑀬 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀧𑀭𑀲𑀦𑁆𑀢𑀸𑀦𑀕𑀢𑀫𑁂𑀯 𑀚𑀸𑀦𑀸𑀢𑀺, 𑀲𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀧𑀦 𑀅𑀧𑀸𑀓𑀝𑀁 𑀭𑀽𑀧𑀁 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀬 𑀅𑀧𑀸𑀓𑀝𑀁 𑀓𑀫𑁆𑀫𑀁 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀓𑀫𑁆𑀫𑀚𑀸𑀦𑀦𑀓𑀸𑀮𑁂’’𑀢𑀺.

𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀯𑀺𑀪𑀗𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.