𑁪. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪. 𑀬𑀣𑀸 𑀑𑀓𑀸𑀲𑀤𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀦𑀢𑁆𑀣𑀺𑀯𑀺𑀕𑀢𑀸 𑀯𑀼𑀢𑁆𑀢𑀸, 𑀦 𑀏𑀯𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸, 𑀏𑀢𑁂 𑀧𑀦 𑀘𑀺𑀢𑁆𑀢𑀦𑀺𑀬𑀸𑀫𑀳𑁂𑀢𑀼𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀘𑀺𑀢𑁆𑀢𑀦𑀺𑀬𑀸𑀫𑀳𑁂𑀢𑀼𑀯𑀺𑀲𑁂𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀥𑀸𑀢𑀼𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀘 𑀦𑀺𑀤𑁆𑀤𑁂𑀲𑀫𑀸𑀳. 𑀢𑀢𑁆𑀣 ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑁄 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀘𑁆𑀙𑀺𑀫𑀸𑀬 𑀧𑀘𑁆𑀙𑀺𑀫𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀥𑀸𑀢𑀼𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀯𑀺𑀲𑁂𑀲𑁂 𑀤𑀲𑁆𑀲𑀦𑀁 𑀬𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀢𑀁 𑀯𑁄𑀘𑁆𑀙𑀺𑀚𑁆𑀚𑁂𑀬𑁆𑀬. ‘‘𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀫𑀦𑁄𑀥𑀸𑀢𑀼𑀬𑀸’’𑀢𑀺 𑀇𑀤𑀫𑁆𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀦𑀺𑀬𑀸𑀫𑀸𑀪𑀸𑀯𑀢𑁄, ‘‘𑀫𑀦𑁄𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸’’𑀢𑀺 𑀘 𑀢𑀣𑁂𑀯 𑀦 𑀲𑀓𑁆𑀓𑀸. 𑀦 𑀳𑀺 𑀫𑀦𑁄𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀬𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑁄𑀢𑀺 𑀦𑀺𑀬𑀸𑀫𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀸𑀓𑀝𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀥𑀸𑀢𑀼𑀯𑀺𑀲𑁂𑀲𑀦𑀺𑀬𑀸𑀫𑁄 𑀅𑀢𑁆𑀣𑀺, 𑀢𑀸𑀯 𑀦𑀺𑀤𑀲𑁆𑀲𑀦𑁂𑀦 𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸’’𑀢𑀺𑀆𑀤𑀺𑀫𑀸𑀳. 𑀲𑀤𑀺𑀲𑀓𑀼𑀲𑀮𑀸𑀦𑀦𑁆𑀢𑀺 𑀯𑁂𑀤𑀦𑀸𑀬 𑀯𑀸 𑀳𑁂𑀢𑀽𑀳𑀺 𑀯𑀸 𑀲𑀤𑀺𑀲𑀓𑀼𑀲𑀮𑀸𑀦𑀁 𑀅𑀦𑀼𑀭𑀽𑀧𑀓𑀼𑀲𑀮𑀸𑀦𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀢𑁂𑀦 𑀪𑀽𑀫𑀺𑀪𑀺𑀦𑁆𑀦𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀪𑀯𑀗𑁆𑀕𑀕𑁆𑀕𑀳𑀡𑁂𑀦 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀓𑁂𑀲𑀼 𑀘𑀼𑀢𑀺𑀧𑀺 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀩𑁆𑀬𑀸𑀓𑀢𑀫𑀽𑀮𑀓𑁂 𑀢𑀤𑀸𑀭𑀫𑁆𑀫𑀡𑀫𑁆𑀧𑀺.

𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀯𑀚𑁆𑀚𑀦𑀲𑁆𑀲𑀸𑀢𑀺 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀸𑀬 𑀆𑀯𑀚𑁆𑀚𑀦𑀲𑁆𑀲𑀸𑀢𑀺 𑀆𑀯𑀚𑁆𑀚𑀦𑀕𑁆𑀕𑀳𑀡𑁂𑀦 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁄 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀭𑀸𑀲𑀺𑀲𑁆𑀲 𑀘 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀳𑁄𑀦𑁆𑀢𑁄 𑀘 𑀆𑀯𑀚𑁆𑀚𑀦𑀲𑁆𑀲𑁂𑀯𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀆𑀯𑀚𑁆𑀚𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.