𑁧. 𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧. 𑀬𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄, 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀢𑁂𑀦 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀗𑁆𑀔𑀸𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺. 𑀬𑁄 𑀧𑀦 𑀳𑁂𑀢𑀼𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑁄 𑀧𑀘𑁆𑀘𑀬𑀥𑀫𑁆𑀫𑁄 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀪𑀬𑀣𑀸𑀧𑀺 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑁄𑀢𑀺 𑀉𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺. 𑀉𑀧𑀓𑀸𑀭𑀓𑀢𑀸 𑀧𑀦 𑀥𑀫𑁆𑀫𑀲𑀪𑀸𑀯𑁄 𑀏𑀯, 𑀦 𑀥𑀫𑁆𑀫𑀢𑁄 𑀅𑀜𑁆𑀜𑀸 𑀅𑀢𑁆𑀣𑀻𑀢𑀺. 𑀢𑀣𑀸 𑀢𑀣𑀸 𑀉𑀧𑀓𑀸𑀭𑀓𑀁 𑀢𑀁 𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀳𑀺 𑀪𑀕𑀯𑀸 𑀢𑀁 𑀢𑀁 𑀉𑀧𑀓𑀸𑀭𑀓𑀢𑀁 𑀤𑀲𑁆𑀲𑁂𑀢𑀻𑀢𑀺.

𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀧𑀞𑀫𑁄 𑀳𑁂𑀢𑀼-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀏𑀢𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀉𑀧𑀓𑀸𑀭𑀓𑀢𑀸 𑀳𑁂𑀢𑀼𑀧𑀘𑁆𑀘𑀬𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀦𑀁. 𑀢𑁂𑀦 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀔𑁄 𑀳𑁂𑀢𑀼𑀦𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀢𑁆𑀢𑀸 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀅𑀜𑁆𑀜𑀲𑁆𑀲 𑀅𑀧𑁂𑀓𑁆𑀔𑀺𑀢𑀩𑁆𑀩𑀲𑁆𑀲 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑀸𑀯 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦𑀸𑀬𑀁 𑀏𑀓𑀦𑁆𑀢𑁄. 𑀳𑁂𑀢𑀼𑀲𑀤𑁆𑀤𑁄 𑀳𑀺 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣𑁂𑀯 𑀩𑁆𑀬𑀸𑀯𑀝𑁄 𑀬𑀤𑀸 𑀕𑀬𑁆𑀳𑀢𑀺, 𑀢𑀤𑀸 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀁 𑀦 𑀳𑁄𑀢𑀻𑀢𑀺 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀲𑀺𑀝𑁆𑀞𑀸 𑀬𑁂 𑀓𑁂𑀘𑀺 𑀕𑀳𑀺𑀢𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦 𑀅𑀢𑁆𑀢𑀦𑀺 𑀏𑀯 𑀩𑁆𑀬𑀸𑀯𑀝𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑁂𑀦 𑀯𑀺𑀦𑀸 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀕𑀳𑀡𑀁 𑀳𑁄𑀢𑀻𑀢𑀺 𑀢𑀁 𑀲𑀦𑁆𑀥𑀸𑀬 ‘‘𑀅𑀣𑀸𑀧𑀺…𑀧𑁂… 𑀅𑀢𑁆𑀣𑁄 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀦𑀦𑀼 𑀬𑀣𑀸 ‘‘𑀅𑀭𑀽𑀧𑀺𑀦𑁄 𑀆𑀳𑀸𑀭𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫), ‘‘𑀅𑀭𑀽𑀧𑀺𑀦𑁄 𑀇𑀦𑁆𑀤𑁆𑀭𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧𑁬) 𑀘 𑀯𑀼𑀢𑁆𑀢𑁂 𑀤𑀼𑀢𑀺𑀬𑁂𑀦 𑀆𑀳𑀸𑀭𑀕𑁆𑀕𑀳𑀡𑁂𑀦 𑀇𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀘 𑀯𑀺𑀦𑀸𑀧𑀺 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀲𑀺𑀬𑀸𑀢𑀺? 𑀦, 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀯𑀚𑁆𑀚𑁂𑀢𑀩𑁆𑀩𑀸𑀪𑀸𑀯𑀢𑁄 𑀳𑀺 𑀢𑀢𑁆𑀣 𑀤𑀼𑀢𑀺𑀬𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂 𑀅𑀲𑀢𑀺𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀯 𑀕𑀬𑁆𑀳𑀦𑁆𑀢𑀻𑀢𑀺 𑀢𑀁 𑀦 𑀓𑀢𑀁, 𑀇𑀥 𑀧𑀦 𑀯𑀚𑁆𑀚𑁂𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀁 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀦𑁆𑀢𑀺.

𑀏𑀯𑀫𑁆𑀧𑀺 𑀳𑁂𑀢𑀽 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀲𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀓𑀳𑁂𑀢𑀽𑀢𑀺 𑀯𑀺𑀲𑁂𑀲𑀦𑀲𑁆𑀲 𑀅𑀓𑀢𑀢𑁆𑀢𑀸 𑀬𑁄 𑀓𑁄𑀘𑀺 𑀳𑁂𑀢𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑁂𑀯 𑀳𑁂𑀢𑀼𑀲𑁆𑀲 𑀧𑀼𑀦 𑀲𑀫𑁆𑀧𑀬𑀼𑀢𑁆𑀢𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀏𑀢𑀤𑀢𑁆𑀣𑀫𑁂𑀯 𑀘 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑁂 𑀲𑀺𑀤𑁆𑀥𑁂𑀧𑀺 𑀢𑀲𑁆𑀲 𑀕𑀳𑀡𑀁 𑀓𑀢𑀁. 𑀅𑀣 𑀯𑀸 𑀅𑀲𑀢𑀺 𑀤𑀼𑀢𑀺𑀬𑁂 𑀳𑁂𑀢𑀼𑀲𑀤𑁆𑀤𑁂 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦 𑀧𑀦 𑀳𑁂𑀢𑀽𑀦𑀦𑁆𑀢𑀺 𑀏𑀯𑀫𑁆𑀧𑀺 𑀕𑀳𑀡𑀁 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 𑀲𑁄 𑀯𑀼𑀢𑁆𑀢𑁄, 𑀢𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀁 𑀬𑁂 𑀮𑀪𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀳𑁂𑀢𑀽𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀳𑁂𑀢𑀼𑀛𑀸𑀦𑀫𑀕𑁆𑀕𑀸 𑀧𑀢𑀺𑀝𑁆𑀞𑀸𑀫𑀢𑁆𑀢𑀸𑀤𑀺𑀪𑀸𑀯𑁂𑀦 𑀦𑀺𑀭𑀧𑁂𑀓𑁆𑀔𑀸, 𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀯𑀺𑀬 𑀲𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 𑀏𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀁 𑀳𑁂𑀢𑀸𑀤𑀺𑀕𑁆𑀕𑀳𑀡𑀁 𑀓𑀢𑀁. 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀸 𑀧𑀦 𑀆𑀳𑀭𑀺𑀢𑀩𑁆𑀩𑀇𑀲𑀺𑀢𑀩𑁆𑀩𑀸𑀧𑁂𑀓𑁆𑀔𑀸 𑀏𑀯, 𑀢𑀲𑁆𑀫𑀸 𑀢𑁂 𑀯𑀺𑀦𑀸𑀧𑀺 𑀤𑀼𑀢𑀺𑀬𑁂𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸 𑀏𑀯 𑀆𑀳𑀭𑀺𑀢𑀩𑁆𑀩𑁂 𑀘 𑀇𑀲𑀺𑀢𑀩𑁆𑀩𑁂 𑀘 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀪𑀽𑀢𑁂 𑀅𑀜𑁆𑀜𑁂 𑀘 𑀲𑀫𑁆𑀧𑀬𑀼𑀢𑁆𑀢𑀓𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀻𑀢𑀺 𑀢𑀁 𑀢𑀢𑁆𑀣 𑀦 𑀓𑀢𑀁, 𑀇𑀥 𑀘 𑀤𑀼𑀢𑀺𑀬𑁂𑀦 𑀳𑁂𑀢𑀼𑀕𑁆𑀕𑀳𑀡𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀳𑁂𑀢𑀼𑀦𑀸 𑀧𑀘𑁆𑀘𑀬𑀪𑀽𑀢𑁂𑀦𑁂𑀯 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀽𑀦𑀁 𑀅𑀜𑁆𑀜𑁂𑀲𑀜𑁆𑀘 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀧𑀼𑀦 𑀯𑀺𑀲𑁂𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀜𑁆𑀳𑀸𑀯𑀸𑀭𑁂 ‘‘𑀓𑀼𑀲𑀮𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁪𑁦𑁧) 𑀤𑀼𑀢𑀺𑀬𑀁 𑀳𑁂𑀢𑀼𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸𑀢𑀺 𑀢𑀁-𑀲𑀤𑁆𑀤𑁄 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑁄 𑀯𑀼𑀢𑁆𑀢𑀲𑁆𑀲𑁂𑀯 𑀦𑀺𑀤𑁆𑀤𑁂𑀲𑁄 ‘‘𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑁧.𑁧.𑁨) 𑀧𑀼𑀭𑀺𑀫𑀯𑀘𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂 𑀧𑀸𑀓𑀝𑀻𑀪𑀽𑀢𑁂 𑀏𑀯 𑀧𑀯𑀢𑁆𑀢𑀢𑀺. 𑀏𑀢𑁆𑀣 𑀘 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀳𑁂𑀢𑀼𑀲𑀤𑁆𑀤𑁄 ‘‘𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀩𑁆𑀬𑀸𑀯𑀝𑁄 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀤𑁂𑀦 𑀯𑀺𑀬 𑀢𑀁-𑀲𑀤𑁆𑀤𑁂𑀦𑀧𑀺 𑀅𑀦𑀧𑁂𑀓𑁆𑀔𑀦𑀻𑀬𑁄 𑀅𑀜𑁆𑀜𑁄 𑀘 𑀓𑁄𑀘𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀓𑁄 𑀯𑀼𑀢𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀘 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑁂𑀦 𑀅𑀲𑀫𑀢𑁆𑀢𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀦𑁆𑀢𑀭𑀸𑀧𑁂𑀓𑁆𑀔𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀦 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀧𑀸𑀓𑀝𑀻𑀓𑀢𑀁, 𑀢𑁂𑀦 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀢𑀁𑀕𑀳𑀡𑀁 𑀓𑀢𑀦𑁆𑀢𑀺. 𑀓𑀺𑀁 𑀧𑀦 𑀢𑀲𑁆𑀫𑀺𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀲𑀤𑁆𑀤𑁂 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀁 𑀧𑀸𑀓𑀝𑀻𑀪𑀽𑀢𑀦𑁆𑀢𑀺? 𑀬𑁂𑀳𑀺 𑀳𑁂𑀢𑀽𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 ‘‘𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸’’𑀢𑀺 𑀯𑀼𑀢𑁆𑀢𑀸, 𑀢𑁂 𑀳𑁂𑀢𑀽 𑀘𑁂𑀯 𑀲𑀫𑁆𑀧𑀬𑀼𑀢𑁆𑀢𑀓𑀯𑀺𑀲𑁂𑀲𑀦𑀪𑀽𑀢𑀸 𑀢𑀩𑁆𑀩𑀺𑀲𑁂𑀲𑀺𑀢𑀸 𑀘 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸. 𑀢𑁂𑀦𑀸𑀳 ‘‘𑀢𑁂 𑀳𑁂𑀢𑀽 𑀘𑁂𑀯𑀸’’𑀢𑀺𑀆𑀤𑀺. 𑀅𑀜𑁆𑀜𑀣𑀸 ‘‘𑀢𑁂 𑀳𑁂𑀢𑀽 𑀘𑁂𑀯𑀸’’𑀢𑀺 𑀏𑀢𑀲𑁆𑀲 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁂𑀦 𑀳𑁂𑀢𑀼𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁂 𑀲𑀢𑀺 𑀬𑀣𑀸 𑀇𑀥 𑀢𑁂𑀦𑁂𑀯 𑀢𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀧𑀸𑀓𑀝𑀸, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀪𑀯𑀺𑀢𑀼𑀁 𑀅𑀭𑀳𑀦𑁆𑀢𑀻𑀢𑀺 ‘‘𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 ‘𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸𑀦’𑀦𑁆𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀇𑀤𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀤𑀼𑀯𑀺𑀥𑀫𑁆𑀧𑀺 𑀯𑀸 𑀳𑁂𑀢𑀼𑀕𑁆𑀕𑀳𑀡𑀁 𑀅𑀧𑀦𑁂𑀢𑁆𑀯𑀸 𑀢𑀁𑀲𑀤𑁆𑀤𑀯𑀘𑀦𑀻𑀬𑀢𑀁 𑀘𑁄𑀤𑁂𑀢𑀺 𑀧𑀭𑀺𑀳𑀭𑀢𑀺 𑀘. 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀘 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸𑀦𑀦𑁆𑀢𑀺 𑀬𑀼𑀢𑁆𑀢𑀁. 𑀳𑁂𑀢𑀽 𑀳𑀺 𑀧𑀘𑁆𑀘𑀬𑀸𑀢𑀺.

𑀘𑀺𑀢𑁆𑀢𑀚𑀭𑀽𑀧𑀁 𑀅𑀚𑀦𑀬𑀫𑀸𑀦𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀚𑀦𑀬𑀫𑀸𑀦𑀸𑀧𑀺. 𑀬𑀤𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀅𑀕𑁆𑀕𑀳𑀡𑀢𑁄 𑀢𑀁 𑀦 𑀯𑀼𑀢𑁆𑀢𑀁, 𑀲𑀳𑀚𑀸𑀢𑀧𑀘𑁆𑀘𑀬𑀯𑀺𑀪𑀗𑁆𑀕𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀲𑁆𑀲 𑀓𑀝𑀢𑁆𑀢𑀸𑀭𑀽𑀧𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀦 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀬𑀤𑀺 𑀘 𑀢𑀢𑁆𑀣 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀸𑀦𑀁 𑀓𑀝𑀢𑁆𑀢𑀸𑀭𑀽𑀧𑀸𑀦𑀫𑁆𑀧𑀺 𑀧𑀘𑁆𑀘𑀬𑀪𑀸𑀯𑁄 𑀦𑀺𑀤𑀲𑁆𑀲𑀺𑀢𑁄, 𑀏𑀯𑀫𑀺𑀥𑀸𑀧𑀺 𑀪𑀯𑀺𑀢𑀩𑁆𑀩𑀁. ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀧𑀦 𑀅𑀯𑀢𑁆𑀯𑀸 ‘‘𑀢𑀁𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀫𑀼𑀝𑁆𑀞𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁𑀧𑀓𑀸𑀭𑁂𑀦 𑀳𑀺 𑀢𑀁𑀲𑀫𑀼𑀝𑁆𑀞𑀸𑀦𑀯𑀘𑀦𑁂𑀦 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀁 𑀲𑀫𑀼𑀝𑁆𑀞𑀸𑀦𑀯𑀘𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀦𑀦𑀼 ‘‘𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸𑀢𑀺? 𑀦 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀏𑀯 𑀳𑀺 𑀢𑀢𑁆𑀣 𑀯𑀼𑀢𑁆𑀢𑁄𑀢𑀺.

𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀏𑀢𑁂𑀦𑁂𑀯 𑀳𑁂𑀢𑀼𑀆𑀤𑀺𑀧𑀝𑀺𑀩𑀤𑁆𑀥𑀢𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀺, 𑀬𑀜𑁆𑀘 𑀧𑀓𑀧𑁆𑀧𑁂𑀢𑀺, 𑀬𑀜𑁆𑀘 𑀅𑀦𑀼𑀲𑁂𑀢𑀺, 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸 𑀆𑀭𑀫𑁆𑀫𑀡𑁂 𑀲𑀢𑀺 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂 𑀯𑀺𑀭𑀼𑀴𑁆𑀳𑁂 𑀦𑀸𑀫𑀭𑀽𑀧𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁩𑁯) 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂’’𑀢𑀺𑀆𑀤𑀺.

𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑀸𑀬 𑀧𑀣𑀯𑀺𑀬𑀸 𑀩𑀻𑀚𑀧𑀢𑀺𑀝𑁆𑀞𑀸𑀦𑀁 𑀯𑀺𑀬 𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑁂 𑀓𑀫𑁆𑀫𑁂 𑀢𑀦𑁆𑀦𑀺𑀩𑁆𑀩𑀢𑁆𑀢𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀩𑀻𑀚𑀲𑁆𑀲 𑀧𑀢𑀺𑀝𑁆𑀞𑀸𑀦𑀁 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑁆𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀓𑀫𑁆𑀫𑀁 𑀔𑁂𑀢𑁆𑀢𑀁, 𑀯𑀺𑀜𑁆𑀜𑀸𑀡𑀁 𑀩𑀻𑀚’’𑀦𑁆𑀢𑀺. 𑀓𑀲𑁆𑀲 𑀧𑀦 𑀢𑀁 𑀔𑁂𑀢𑁆𑀢𑀁 𑀩𑀻𑀚𑀜𑁆𑀘𑀸𑀢𑀺? 𑀦𑀸𑀫𑀭𑀽𑀧𑀗𑁆𑀓𑀼𑀭𑀲𑁆𑀲.

𑀅𑀬𑀜𑁆𑀘 𑀧𑀦𑀢𑁆𑀣𑁄𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀓𑀫𑁆𑀫𑀚𑀭𑀽𑀧𑀸𑀦𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸. 𑀑𑀓𑀸𑀲𑀯𑀲𑁂𑀦𑁂𑀯𑀸𑀢𑀺 𑀦𑀸𑀫𑀭𑀽𑀧𑁄𑀓𑀸𑀲𑀯𑀲𑁂𑀦𑁂𑀯. 𑀲𑁄 𑀳𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀑𑀓𑀸𑀲𑁄𑀢𑀺. 𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀻𑀢𑀺 𑀯𑀤𑀦𑁆𑀢𑁄 𑀯𑀢𑁆𑀣𑀼𑀭𑀽𑀧𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀸𑀦𑀁 𑀲𑁂𑀲𑀭𑀽𑀧𑀸𑀦𑀫𑁆𑀧𑀺 𑀢𑀤𑀼𑀧𑀢𑁆𑀣𑀫𑁆𑀪𑀓𑀪𑀸𑀯𑁂𑀦𑁂𑀯 𑀅𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑀳𑀪𑀯𑀦𑀫𑀢𑁆𑀢𑀁 𑀯𑀸. 𑀢𑀢𑁆𑀣 𑀓𑀸𑀬𑀪𑀸𑀯𑀸𑀤𑀺𑀓𑀮𑀸𑀧𑀸𑀦𑀁 𑀓𑀢𑁆𑀣𑀘𑀺 𑀅𑀪𑀸𑀯𑀢𑁄 𑀓𑀢𑁆𑀣𑀘𑀺 𑀅𑀪𑀸𑀯𑀸𑀪𑀸𑀯𑀢𑁄 ‘‘𑀯𑀢𑁆𑀣𑀼𑀭𑀽𑀧𑀫𑀢𑁆𑀢𑀫𑁆𑀧𑀺 𑀯𑀺𑀦𑀸’’𑀢𑀺 𑀆𑀳. 𑀲𑀲𑁆𑀲𑀸𑀫𑀺𑀓𑁂𑀢𑀺 𑀏𑀢𑀲𑁆𑀲𑁂𑀯 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀭𑀸𑀚𑀓𑁂’’𑀢𑀺 𑀯𑀼𑀢𑁆𑀢𑀁.

𑀧𑀯𑀢𑁆𑀢𑀺𑀬𑀁 𑀓𑀝𑀢𑁆𑀢𑀸𑀭𑀽𑀧𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑀧𑀝𑀺𑀩𑀸𑀳𑀦𑀢𑁄𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑀧𑁆𑀧𑀲𑀗𑁆𑀕𑁄𑀬𑁂𑀯 𑀦𑀢𑁆𑀣𑀺 ‘‘𑀳𑁂𑀢𑀽 𑀲𑀳𑀚𑀸𑀢𑀸𑀦’’𑀦𑁆𑀢𑀺 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧) 𑀯𑀘𑀦𑀢𑁄. 𑀦 𑀳𑀺 𑀬𑁂𑀲𑀁 𑀳𑁂𑀢𑀽 𑀲𑀳𑀚𑀸𑀢𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀺, 𑀢𑀸𑀦𑀺 𑀳𑁂𑀢𑀼𑀲𑀳𑀚𑀸𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀬𑀤𑀺 𑀲𑀺𑀬𑀼𑀁, ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀲𑀳𑀚𑀸𑀢𑁄 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀘 𑀮𑀩𑁆𑀪𑁂𑀬𑁆𑀬, 𑀦 𑀧𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀦 𑀢𑀸𑀦𑀺 𑀳𑁂𑀢𑀼𑀲𑀳𑀚𑀸𑀢𑀸𑀦𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑁄 𑀧𑀦 𑀳𑁂𑀢𑀽𑀳𑀺 𑀲𑀫𑀸𑀦𑀓𑀸𑀮𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀳𑁂𑀢𑀼𑀲𑀳𑀚𑀸𑀢𑀪𑀸𑀯𑀁 𑀫𑀜𑁆𑀜𑁂𑀬𑁆𑀬, 𑀢𑀲𑁆𑀲𑀸𑀬𑀁 𑀧𑀲𑀗𑁆𑀕𑁄 𑀅𑀢𑁆𑀣𑀻𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀪𑀕𑀯𑀸 𑀧𑀦 𑀯𑀘𑀦𑀸𑀦𑀁 𑀮𑀳𑀼𑀕𑀭𑀼𑀪𑀸𑀯𑀁 𑀦 𑀕𑀡𑁂𑀢𑀺, 𑀩𑁄𑀥𑀦𑁂𑀬𑁆𑀬𑀸𑀦𑀁 𑀧𑀦 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀢𑁄 𑀥𑀫𑁆𑀫𑀲𑀪𑀸𑀯𑀁 𑀅𑀯𑀺𑀮𑁄𑀫𑁂𑀦𑁆𑀢𑁄 𑀢𑀣𑀸 𑀢𑀣𑀸 𑀤𑁂𑀲𑀦𑀁 𑀦𑀺𑀬𑀸𑀫𑁂𑀢𑀻𑀢𑀺 𑀦 𑀓𑀢𑁆𑀣𑀘𑀺 𑀅𑀓𑁆𑀔𑀭𑀸𑀦𑀁 𑀩𑀳𑀼𑀢𑀸 𑀯𑀸 𑀅𑀧𑁆𑀧𑀢𑀸 𑀯𑀸 𑀘𑁄𑀤𑁂𑀢𑀩𑁆𑀩𑀸𑀢𑀺.

𑀳𑁂𑀢𑀼𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.