𑁨𑁧. 𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧. 𑀓𑀼𑀲𑀮𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀦 𑀦𑀺𑀩𑁆𑀩𑀸𑀦𑀁. 𑀬𑁄 𑀳𑀺 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑁄 𑀅𑀢𑁆𑀣𑀺𑀪𑀸𑀯𑀁 𑀮𑀪𑀺𑀢𑁆𑀯𑀸 𑀉𑀧𑀓𑀸𑀭𑀓𑁄 𑀳𑁄𑀢𑀺, 𑀲𑁄 𑀅𑀢𑁆𑀣𑀺𑀧𑀘𑁆𑀘𑀬𑁄 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀦 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀸𑀪𑀸𑀯𑁂𑀦 𑀅𑀦𑀼𑀧𑀓𑀸𑀭𑀓𑀁 𑀳𑀼𑀢𑁆𑀯𑀸 𑀅𑀢𑁆𑀣𑀺𑀪𑀸𑀯𑀮𑀸𑀪𑁂𑀦 𑀉𑀧𑀓𑀸𑀭𑀓𑀁 𑀳𑁄𑀢𑀺. 𑀉𑀧𑁆𑀧𑀸𑀤𑀸𑀤𑀺𑀬𑀼𑀢𑁆𑀢𑀸𑀦𑀁 𑀯𑀸 𑀦𑀢𑁆𑀣𑀺𑀪𑀸𑀯𑁄𑀧𑀓𑀸𑀭𑀓𑀢𑀸𑀯𑀺𑀭𑀼𑀤𑁆𑀥𑁄 𑀉𑀧𑀓𑀸𑀭𑀓𑀪𑀸𑀯𑁄 𑀅𑀢𑁆𑀣𑀺𑀧𑀘𑁆𑀘𑀬𑀢𑀸𑀢𑀺 𑀦 𑀦𑀺𑀩𑁆𑀩𑀸𑀦𑀁 𑀅𑀢𑁆𑀣𑀺𑀧𑀘𑁆𑀘𑀬𑁄.

𑀲𑀢𑀺 𑀘 𑀬𑁂𑀲𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀏𑀓𑀢𑁄 𑀧𑀼𑀭𑁂𑀢𑀭𑀁 𑀧𑀘𑁆𑀙𑀸 𑀘 𑀉𑀧𑁆𑀧𑀦𑁆𑀦𑀢𑁆𑀢𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄 𑀆𑀳 ‘‘𑀆𑀳𑀸𑀭𑁄 𑀇𑀦𑁆𑀤𑁆𑀭𑀺𑀬𑀜𑁆𑀘 𑀲𑀳𑀚𑀸𑀢𑀸𑀤𑀺𑀪𑁂𑀤𑀁 𑀦 𑀮𑀪𑀢𑀻’’𑀢𑀺. 𑀢𑀤𑀪𑀸𑀯𑁄 𑀘 𑀏𑀢𑁂𑀲𑀁 𑀥𑀫𑁆𑀫𑀲𑀪𑀸𑀯𑀯𑀲𑁂𑀦 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀺𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.