𑁧𑁬. 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁬. 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀦𑁆𑀢𑀺 𑀫𑀺𑀲𑁆𑀲𑀓𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀯𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀭𑀽𑀧𑀸𑀭𑀽𑀧𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀯𑁄𑀳𑀸𑀭𑁄 𑀦𑀢𑁆𑀣𑀻𑀢𑀺 𑀅𑀭𑀽𑀧𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀽𑀢𑀸𑀦𑀺 𑀧𑀘𑁆𑀘𑀬𑀦𑁆𑀢𑀭𑀸𑀧𑁂𑀓𑁆𑀔𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀅𑀨𑀭𑀦𑁆𑀢𑀸𑀦𑀺𑀧𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀲𑀺𑀬𑀼𑀁. 𑀬𑁄 𑀧𑀦 𑀦𑀺𑀭𑀧𑁂𑀓𑁆𑀔𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀥𑀫𑁆𑀫𑀸𑀦𑀁 𑀳𑁄𑀢𑀺, 𑀲𑁄 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑁂 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀅𑀨𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀬𑀤𑀺 𑀘 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀮𑀺𑀗𑁆𑀕𑀸𑀤𑀻𑀦𑀁 𑀲𑀺𑀬𑀼𑀁, 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀢𑁂𑀲𑀫𑁆𑀧𑀺 𑀲𑀺𑀬𑀼𑀁. 𑀦 𑀳𑀺 𑀭𑀽𑀧𑀁 𑀭𑀽𑀧𑀲𑁆𑀲, 𑀅𑀭𑀽𑀧𑀁 𑀯𑀸 𑀅𑀭𑀽𑀧𑀲𑁆𑀲 𑀯𑀺𑀦𑀺𑀩𑁆𑀪𑀼𑀢𑁆𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀣𑀻𑀢𑀺. 𑀲𑀢𑀺 𑀘𑁂𑀯𑀁 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀢𑁆𑀢𑀸 𑀓𑀮𑀮𑀸𑀤𑀺𑀓𑀸𑀮𑁂 𑀘 𑀮𑀺𑀗𑁆𑀕𑀸𑀤𑀻𑀦𑀺 𑀲𑀺𑀬𑀼𑀁, 𑀬𑁂𑀲𑀁 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀨𑀭𑁂𑀬𑁆𑀬𑀼𑀁, 𑀦 𑀘 𑀨𑀭𑀦𑁆𑀢𑀺. 𑀢𑀲𑁆𑀫𑀸 𑀦 𑀢𑁂𑀳𑀺 𑀢𑀸𑀦𑀺 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀓𑀸𑀦𑀺, 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀢𑁆𑀢𑀸𑀪𑀸𑀯𑀢𑁄 𑀘 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀁 𑀦 𑀨𑀭𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀧𑀦 𑀬𑁂𑀳𑀺 𑀢𑀸𑀦𑀺 𑀲𑀳𑀚𑀸𑀢𑀸𑀦𑀺, 𑀢𑁂𑀲𑀁 𑀅𑀩𑀻𑀚𑀪𑀸𑀯𑀢𑁄𑀬𑁂𑀯 𑀦 𑀨𑀭𑀦𑁆𑀢𑀺, 𑀢𑀲𑁆𑀫𑀸 𑀆𑀧𑀦𑁆𑀦𑀯𑀺𑀦𑀺𑀩𑁆𑀪𑀼𑀢𑁆𑀢𑀪𑀸𑀯𑀸𑀦𑀁 𑀢𑁂𑀲𑀁 𑀮𑀺𑀗𑁆𑀕𑀸𑀤𑀻𑀦𑀁 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀲𑀫𑀸𑀦𑀓𑀮𑀸𑀧𑀥𑀫𑁆𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸𑀬 𑀅𑀨𑀭𑀡𑀢𑁄 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀦 𑀳𑁄𑀦𑁆𑀢𑀻𑀢𑀺. 𑀬𑁂𑀲𑀁 𑀩𑀻𑀚𑀪𑀽𑀢𑀸𑀦𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑁂𑀲𑀁 𑀮𑀺𑀗𑁆𑀕𑀸𑀤𑀻𑀦𑀁 𑀅𑀧𑀭𑀫𑀢𑁆𑀣𑀪𑀸𑀯𑀢𑁄𑀢𑀺 𑀓𑁂𑀘𑀺, 𑀢𑁂 𑀧𑀦 𑀓𑀮𑀮𑀸𑀤𑀺𑀓𑀸𑀮𑁂𑀧𑀺 𑀮𑀺𑀗𑁆𑀕𑀸𑀤𑀻𑀦𑀁 𑀢𑀤𑀦𑀼𑀭𑀽𑀧𑀸𑀦𑀁 𑀅𑀢𑁆𑀣𑀺𑀢𑀁 𑀇𑀘𑁆𑀙𑀦𑁆𑀢𑀺.

𑀚𑀸𑀢𑀺𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑁂𑀲𑀼 𑀪𑁂𑀤𑁂𑀲𑀼 𑀓𑀼𑀲𑀮𑀚𑀸𑀢𑀺𑀬𑀁 𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁂𑀯 𑀆𑀭𑀼𑀧𑁆𑀧𑁂 𑀞𑀧𑁂𑀢𑀩𑁆𑀩𑀦𑁆𑀢𑀺 ‘‘𑀞𑀧𑁂𑀢𑁆𑀯𑀸 𑀧𑀦 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀯𑀲𑁂𑀲𑀸 𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀮𑁄𑀓𑀼𑀢𑁆𑀢𑀭𑀁 𑀧𑀦 𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀜𑁆𑀘 𑀯𑀺𑀲𑀼𑀁 𑀏𑀓𑀸 𑀚𑀸𑀢𑀺 𑀪𑀽𑀫𑀺 𑀯𑀸 𑀦 𑀳𑁄𑀢𑀻𑀢𑀺 𑀆𑀭𑀼𑀧𑁆𑀧𑁂 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀦 𑀞𑀧𑀺𑀢𑀁. 𑀳𑁂𑀢𑀼𑀆𑀤𑀻𑀲𑀼𑀧𑀺 ‘‘𑀢𑀣𑀸 𑀅𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀳𑁂𑀢𑀼, 𑀢𑀣𑀸 𑀅𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁧) 𑀏𑀲 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀞𑀺𑀢𑀺𑀓𑁆𑀔𑀡𑁂𑀢𑀺 𑀇𑀤𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀳𑀚𑀸𑀢𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀧𑀦 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀢𑀸 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀯𑀓𑁆𑀔𑀢𑀺 𑀳𑀺 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘…𑀧𑁂… 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘…𑀧𑁂… 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀁 𑀓𑀫𑁆𑀫𑀧𑀘𑁆𑀘𑀬𑀲𑀤𑀺𑀲’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁬𑁬). 𑀦 𑀳𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀭𑀽𑀧𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑁄 𑀅𑀜𑁆𑀜𑁄 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀧𑀜𑁆𑀘𑀯𑁄𑀓𑀸𑀭𑁂 𑀧𑀯𑀢𑁆𑀢𑁂 𑀘 𑀓𑀝𑀢𑁆𑀢𑀸𑀭𑀽𑀧𑀲𑁆𑀲. 𑀧𑀝𑀺𑀘𑁆𑀘𑀯𑀸𑀭𑀸𑀤𑀬𑁄 𑀘 𑀙 𑀉𑀧𑁆𑀧𑀸𑀤𑀓𑁆𑀔𑀡𑀫𑁂𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀏𑀢𑁂𑀲𑀼 𑀅𑀦𑀼𑀮𑁄𑀫𑀢𑁄 𑀦 𑀢𑀺𑀝𑁆𑀞𑀢𑀻𑀢𑀺.

𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.