𑁯. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯. 𑀢𑁂 𑀢𑀬𑁄𑀧𑀺 𑀭𑀸𑀲𑀬𑁄𑀢𑀺 𑀉𑀧𑀦𑀺𑀲𑁆𑀲𑀬𑁂 𑀢𑀬𑁄 𑀅𑀦𑁂𑀓𑀲𑀗𑁆𑀕𑀸𑀳𑀓𑀢𑀸𑀬 𑀭𑀸𑀲𑀬𑁄𑀢𑀺 𑀯𑀤𑀢𑀺. 𑀏𑀢𑀲𑁆𑀫𑀺𑀁 𑀧𑀦 𑀉𑀧𑀦𑀺𑀲𑁆𑀲𑀬𑀦𑀺𑀤𑁆𑀤𑁂𑀲𑁂 𑀬𑁂 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑁂𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑁂𑀲𑀜𑁆𑀘𑀺 𑀓𑀤𑀸𑀘𑀺, 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀲𑀗𑁆𑀕𑀳𑀺𑀢𑁄, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀬𑁂 𑀧𑀦 𑀧𑀼𑀭𑀺𑀫𑀸 𑀬𑁂𑀲𑀁 𑀧𑀘𑁆𑀙𑀺𑀫𑀸𑀦𑀁 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀢𑁂𑀲𑀁 𑀦 𑀲𑀩𑁆𑀩𑁂𑀲𑀁 𑀏𑀓𑀦𑁆𑀢𑁂𑀦 𑀳𑁄𑀦𑁆𑀢𑀺, 𑀬𑁂𑀲𑀁 𑀉𑀧𑁆𑀧𑀢𑁆𑀢𑀺𑀧𑀝𑀺𑀩𑀸𑀳𑀺𑀓𑀸 𑀧𑀘𑁆𑀘𑀬𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀢𑁂𑀲𑀁 𑀦 𑀳𑁄𑀦𑁆𑀢𑀺, 𑀇𑀢𑀭𑁂𑀲𑀁 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑁂𑀲𑀼 𑀧𑀤𑁂𑀲𑀼 𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁄 𑀦 𑀮𑀩𑁆𑀪𑀢𑀺, 𑀢𑁂𑀲𑀼 ‘‘𑀓𑁂𑀲𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀁. 𑀲𑀺𑀤𑁆𑀥𑀸𑀦𑀁 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀬𑁂𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀳𑀺 𑀅𑀓𑀼𑀲𑀮𑀸𑀤𑀻𑀳𑀺 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀓𑁂𑀲𑀜𑁆𑀘𑀻𑀢𑀺 𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄, 𑀦 𑀧𑀦 𑀅𑀯𑀺𑀲𑁂𑀲𑁂𑀦 𑀅𑀓𑀼𑀲𑀮𑀸𑀤𑀻𑀲𑀼 𑀓𑁂𑀲𑀜𑁆𑀘𑀻𑀢𑀺.

𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸…𑀧𑁂… 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂𑀲𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀅𑀩𑁆𑀬𑀸𑀓𑀢𑀸𑀦𑀁 𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀭𑀽𑀧𑀸𑀩𑁆𑀬𑀸𑀓𑀢𑀁 𑀉𑀧𑀦𑀺𑀲𑁆𑀲𑀬𑀁 𑀮𑀪𑀢𑀻𑀢𑀺. 𑀓𑀣𑀁? 𑀆𑀭𑀫𑁆𑀫𑀡𑀸𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑁂 𑀢𑀸𑀯 𑀦 𑀮𑀪𑀢𑀺 𑀅𑀦𑀸𑀭𑀫𑁆𑀫𑀡𑀢𑁆𑀢𑀸 𑀧𑀼𑀩𑁆𑀩𑀸𑀧𑀭𑀦𑀺𑀬𑀫𑁂𑀦 𑀅𑀧𑁆𑀧𑀯𑀢𑁆𑀢𑀺𑀢𑁄 𑀘, 𑀧𑀓𑀢𑀽𑀧𑀦𑀺𑀲𑁆𑀲𑀬𑀜𑁆𑀘 𑀦 𑀮𑀪𑀢𑀺 𑀅𑀘𑁂𑀢𑀦𑁂𑀦 𑀭𑀽𑀧𑀲𑀦𑁆𑀢𑀸𑀦𑁂𑀦 𑀧𑀓𑀢𑀲𑁆𑀲 𑀅𑀪𑀸𑀯𑀢𑁄. 𑀬𑀣𑀸 𑀳𑀺 𑀅𑀭𑀽𑀧𑀲𑀦𑁆𑀢𑀸𑀦𑁂𑀦 𑀲𑀤𑁆𑀥𑀸𑀤𑀬𑁄 𑀦𑀺𑀧𑁆𑀨𑀸𑀤𑀺𑀢𑀸 𑀉𑀢𑀼𑀪𑁄𑀚𑀦𑀸𑀤𑀬𑁄 𑀘 𑀉𑀧𑀲𑁂𑀯𑀺𑀢𑀸, 𑀦 𑀏𑀯𑀁 𑀭𑀽𑀧𑀲𑀦𑁆𑀢𑀸𑀦𑁂𑀦. 𑀬𑀲𑁆𑀫𑀺𑀜𑁆𑀘 𑀉𑀢𑀼𑀩𑀻𑀚𑀸𑀤𑀺𑀓𑁂 𑀓𑀫𑁆𑀫𑀸𑀤𑀺𑀓𑁂 𑀘 𑀲𑀢𑀺 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀦 𑀢𑀁 𑀢𑁂𑀦 𑀧𑀓𑀢𑀁 𑀳𑁄𑀢𑀺. 𑀲𑀘𑁂𑀢𑀦𑀲𑁆𑀲𑁂𑀯 𑀳𑀺 𑀉𑀧𑁆𑀧𑀸𑀤𑀦𑀼𑀧𑀢𑁆𑀣𑀫𑁆𑀪𑀦𑀼𑀧𑀬𑁄𑀕𑀸𑀤𑀺𑀯𑀲𑁂𑀦 𑀘𑁂𑀢𑀦𑀁 𑀧𑀓𑀧𑁆𑀧𑀦𑀁 𑀧𑀓𑀭𑀡𑀁, 𑀭𑀽𑀧𑀜𑁆𑀘 𑀅𑀘𑁂𑀢𑀦𑀦𑁆𑀢𑀺. 𑀬𑀣𑀸 𑀘 𑀦𑀺𑀭𑀻𑀳𑀓𑁂𑀲𑀼 𑀧𑀘𑁆𑀘𑀬𑀸𑀬𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑁂𑀲𑀜𑁆𑀘𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀢𑀸 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀦, 𑀏𑀯𑀁 𑀲𑀧𑁆𑀧𑀓𑀭𑀡𑀲𑀪𑀸𑀯𑀢𑀸 𑀦𑀺𑀧𑁆𑀧𑀓𑀭𑀡𑀲𑀪𑀸𑀯𑀢𑀸 𑀘 𑀤𑀝𑁆𑀞𑀩𑁆𑀩𑀸. 𑀉𑀢𑀼𑀩𑀻𑀚𑀸𑀤𑀬𑁄 𑀧𑀦 𑀅𑀗𑁆𑀓𑀼𑀭𑀸𑀤𑀻𑀦𑀁 𑀢𑁂𑀲𑀼 𑀅𑀲𑀦𑁆𑀢𑁂𑀲𑀼 𑀅𑀪𑀸𑀯𑀢𑁄 𑀏𑀯 𑀧𑀘𑁆𑀘𑀬𑀸, 𑀦 𑀧𑀦 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀢𑁄𑀢𑀺. 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁𑀬𑁂𑀯 𑀧𑀦𑁂𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄 𑀩𑀸𑀳𑀼𑀮𑁆𑀮𑀯𑀲𑁂𑀦 𑀧𑀸𑀓𑀝𑀯𑀲𑁂𑀦 𑀘 𑀯𑀼𑀢𑁆𑀢𑁄. ‘‘𑀅𑀦𑀸𑀕𑀢𑁂 𑀔𑀦𑁆𑀥𑁂 𑀧𑀢𑁆𑀣𑀬𑀫𑀸𑀦𑁄 𑀤𑀸𑀦𑀁 𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁨.𑁧𑁮.𑁮) 𑀧𑀦 𑀅𑀦𑀸𑀕𑀢𑀸𑀧𑀺 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂 𑀧𑀼𑀭𑀺𑀫𑁂𑀳𑀺 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀳𑀺 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀇𑀥 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀼𑀕𑁆𑀕𑀮𑁄𑀧𑀺 𑀲𑁂𑀦𑀸𑀲𑀦𑀫𑁆𑀧𑀻𑀢𑀺 𑀧𑀼𑀕𑁆𑀕𑀮𑀲𑁂𑀦𑀸𑀲𑀦𑀕𑁆𑀕𑀳𑀡𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑁂 𑀥𑀫𑁆𑀫𑁂 𑀤𑀲𑁆𑀲𑁂𑀢𑀺, 𑀧𑀺-𑀲𑀤𑁆𑀤𑁂𑀦 𑀘𑀻𑀯𑀭𑀸𑀭𑀜𑁆𑀜𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀺𑀕𑁆𑀕𑀳𑀡𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑁂 𑀲𑀩𑁆𑀩𑁂 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀻𑀲𑀼 𑀳𑀺 ‘‘𑀲𑁂𑀦𑀸𑀲𑀦𑀁 𑀓𑀸𑀬𑀺𑀓𑀲𑁆𑀲 𑀲𑀼𑀔𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀁 𑀪𑀚𑀦𑁆𑀢𑀸𑀯 𑀥𑀫𑁆𑀫𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 𑀧𑀼𑀕𑁆𑀕𑀮𑀸𑀤𑀻𑀲𑀼𑀧𑀺 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀧𑀺 𑀆𑀭𑀫𑁆𑀫𑀡𑀧𑀓𑀢𑀽𑀧𑀦𑀺𑀲𑁆𑀲𑀬𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀬 𑀲𑁂𑀦𑀸𑀲𑀦𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀓𑁆𑀔𑀢𑀺 𑀳𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀢𑀼𑀁 𑀪𑁄𑀚𑀦𑀁 𑀲𑁂𑀦𑀸𑀲𑀦𑀁 𑀉𑀧𑀦𑀺𑀲𑁆𑀲𑀸𑀬 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 𑀲𑁂𑀦𑀸𑀲𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀁 𑀯𑀺𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀉𑀢𑀼𑀆𑀤𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀁, ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀁…𑀧𑁂… 𑀯𑀢𑁆𑀣𑀼𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑁂 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁨.𑁧𑁮.𑁪) 𑀘𑀓𑁆𑀔𑀸𑀤𑀻𑀦𑀁 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀪𑀸𑀯𑀜𑁆𑀘𑀸𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀘 𑀢𑀸𑀤𑀺𑀲𑀸𑀦𑀁 𑀧𑀼𑀩𑁆𑀩𑁂 𑀧𑀓𑀢𑀢𑁆𑀢𑀸 𑀧𑀓𑀢𑀽𑀧𑀦𑀺𑀲𑁆𑀲𑀬𑀢𑀸 𑀤𑀝𑁆𑀞𑀩𑁆𑀩𑀸.

𑀓𑀲𑀺𑀡𑀸𑀭𑀫𑁆𑀫𑀡𑀸𑀤𑀻𑀦𑀺 𑀆𑀭𑀫𑁆𑀫𑀡𑀫𑁂𑀯 𑀳𑁄𑀦𑁆𑀢𑀺, 𑀦 𑀉𑀧𑀦𑀺𑀲𑁆𑀲𑀬𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀓𑀘𑁆𑀘𑀸𑀬𑀸’’𑀢𑀺 𑀆𑀳.

𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀫𑁆𑀧𑀺 𑀬𑀲𑁆𑀫𑀺𑀁 𑀓𑀲𑀺𑀡𑀸𑀤𑀺𑀫𑁆𑀳𑀺 𑀛𑀸𑀦𑀁 𑀅𑀦𑀼𑀧𑁆𑀧𑀸𑀤𑀺𑀢𑀁, 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀦𑁆𑀦𑀛𑀸𑀦𑀼𑀧𑁆𑀧𑀸𑀤𑀦𑁂 𑀲𑀩𑁆𑀩𑀲𑁆𑀲 𑀘 𑀉𑀧𑁆𑀧𑀦𑁆𑀦𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑁂 𑀇𑀤𑁆𑀥𑀺𑀯𑀺𑀥𑀸𑀤𑀻𑀦𑀁 𑀅𑀪𑀺𑀜𑁆𑀜𑀸𑀦𑀜𑁆𑀘 𑀉𑀧𑀦𑀺𑀲𑁆𑀲𑀬𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀪𑀽𑀫𑀓𑀓𑀼𑀲𑀮𑁄 𑀘𑀢𑀼𑀪𑀽𑀫𑀓𑀲𑁆𑀲𑀧𑀺 𑀓𑀼𑀲𑀮𑀲𑁆𑀲𑀸’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀭𑀽𑀧𑀸𑀯𑀘𑀭𑀁 𑀲𑀤𑁆𑀥𑀁 𑀉𑀧𑀦𑀺𑀲𑁆𑀲𑀸𑀬 𑀭𑀽𑀧𑀸𑀯𑀘𑀭𑀁 𑀛𑀸𑀦𑀁 𑀯𑀺𑀧𑀲𑁆𑀲𑀦𑀁 𑀫𑀕𑁆𑀕𑀁 𑀅𑀪𑀺𑀜𑁆𑀜𑀁 𑀲𑀫𑀸𑀧𑀢𑁆𑀢𑀺𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺 (𑀧𑀝𑁆𑀞𑀸. 𑁪.𑁧𑁩.𑁨𑁮𑁫). 𑀓𑀸𑀫𑀸𑀯𑀘𑀭𑀓𑀼𑀲𑀮𑀁 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀸𑀦𑀫𑁆𑀧𑀺 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀯𑀲𑁂𑀦, 𑀧𑀝𑀺𑀲𑀦𑁆𑀥𑀺𑀦𑀺𑀬𑀸𑀫𑀓𑀲𑁆𑀲 𑀘𑀼𑀢𑀺𑀢𑁄 𑀧𑀼𑀭𑀺𑀫𑀚𑀯𑀦𑀲𑁆𑀲 𑀘 𑀯𑀲𑁂𑀦 𑀉𑀧𑀦𑀺𑀲𑁆𑀲𑀬𑁄, 𑀭𑀽𑀧𑀸𑀯𑀘𑀭𑀓𑀼𑀲𑀮𑀁 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲, 𑀅𑀭𑀽𑀧𑀸𑀯𑀘𑀭𑀓𑀼𑀲𑀮𑀜𑁆𑀘 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀲𑁆𑀲 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑁂𑀦𑀸𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀁 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀲𑁆𑀲 𑀘 𑀬𑀣𑀸𑀬𑁄𑀕𑀁 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀴𑀺𑀬𑀫𑁆𑀧𑀺 𑀳𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀦𑀬𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀧𑀜𑁆𑀳𑀸𑀯𑀸𑀭𑁂𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑁄𑀢𑀺.

𑀇𑀫𑀺𑀦𑀸 𑀧𑀦 𑀦𑀬𑁂𑀦𑀸𑀢𑀺 𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀢𑁆𑀢𑀦𑀁 𑀉𑀧𑀦𑀺𑀲𑁆𑀲𑀸𑀬 𑀲𑀺𑀦𑁂𑀳𑀼𑀧𑁆𑀧𑀸𑀤𑀦𑀮𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀥𑀫𑁆𑀫𑀸 𑀅𑀓𑀼𑀲𑀮𑀸𑀦𑀁 𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀦𑁆𑀢𑀻𑀢𑀺 𑀦 𑀇𑀤𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀸𑀯𑀘𑀭𑀸𑀤𑀺𑀢𑀺𑀳𑁂𑀢𑀼𑀓𑀪𑀯𑀗𑁆𑀕𑀁 𑀓𑀸𑀬𑀺𑀓𑀲𑀼𑀔𑀸𑀤𑀺 𑀘 𑀭𑀽𑀧𑀸𑀯𑀘𑀭𑀸𑀤𑀺𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄, 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑁄 𑀭𑀽𑀧𑀸𑀯𑀘𑀭𑀓𑀼𑀲𑀮𑀲𑁆𑀲 𑀢𑀁 𑀧𑀢𑁆𑀣𑁂𑀢𑁆𑀯𑀸 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀓𑀼𑀲𑀮𑀼𑀧𑁆𑀧𑀸𑀤𑀦𑀢𑁆𑀣𑀁 𑀉𑀧𑁆𑀧𑀸𑀤𑀺𑀬𑀫𑀸𑀦𑀲𑁆𑀲, 𑀭𑀽𑀧𑀸𑀯𑀘𑀭𑀓𑀺𑀭𑀺𑀬𑀲𑁆𑀲 𑀘 𑀧𑀼𑀩𑁆𑀩𑁂 𑀦𑀺𑀯𑀼𑀝𑁆𑀞𑀸𑀤𑀻𑀲𑀼 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀚𑀸𑀦𑀦𑀢𑁆𑀣𑀁 𑀛𑀸𑀦𑀸𑀪𑀺𑀜𑁆𑀜𑀸𑀬𑁄 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀅𑀭𑀳𑀢𑁄, 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀸𑀦𑀁 𑀧𑀦 𑀢𑀤𑀼𑀧𑁆𑀧𑀸𑀤𑀓𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑀯𑀲𑁂𑀦 𑀲𑁄 𑀲𑁄 𑀯𑀺𑀧𑀸𑀓𑁄 𑀉𑀧𑀦𑀺𑀲𑁆𑀲𑀬𑁄. 𑀢𑁂𑀦𑀸𑀳 ‘‘𑀢𑀣𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑁄’’𑀢𑀺. 𑀬𑀤𑀺𑀧𑀺 𑀅𑀭𑀳𑀢𑁆𑀢𑀨𑀮𑀢𑁆𑀢𑀁 𑀛𑀸𑀦𑀯𑀺𑀧𑀲𑁆𑀲𑀦𑀸 𑀉𑀧𑁆𑀧𑀸𑀤𑁂𑀢𑀺 𑀅𑀦𑀸𑀕𑀸𑀫𑀻, 𑀦 𑀧𑀦 𑀢𑁂𑀦 𑀢𑀁 𑀓𑀤𑀸𑀘𑀺 𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀼𑀣𑀼𑀚𑁆𑀚𑀦𑀸𑀤𑀻𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀯𑀺𑀬, 𑀢𑀲𑁆𑀫𑀸 𑀢𑀸𑀦𑀺 𑀯𑀺𑀬 𑀢𑁂𑀲𑀁 𑀛𑀸𑀦𑀸𑀤𑀻𑀦𑀁 𑀇𑀫𑀲𑁆𑀲 𑀘 𑀅𑀕𑁆𑀕𑀨𑀮𑀁 𑀦 𑀛𑀸𑀦𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑁄. 𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑀤𑀺𑀲𑀫𑁂𑀯 𑀳𑀺 𑀅𑀦𑀸𑀕𑀢𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑁄𑀢𑀺. 𑀢𑁂𑀦𑀸𑀳 ‘‘𑀉𑀧𑀭𑀺𑀝𑁆𑀞𑀺𑀫𑀁 𑀓𑀼𑀲𑀮𑀲𑁆𑀲𑀧𑀻’’𑀢𑀺.

𑀓𑀺𑀭𑀺𑀬𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀫𑁆𑀧𑀺 𑀧𑀢𑁆𑀣𑁂𑀢𑁆𑀯𑀸 𑀤𑀸𑀦𑀸𑀤𑀺𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀢𑁂𑀪𑀽𑀫𑀓𑀓𑀺𑀭𑀺𑀬𑀸𑀧𑀺 𑀘𑀢𑀼𑀪𑀽𑀫𑀓𑀲𑁆𑀲𑀧𑀺 𑀓𑀼𑀲𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀁 𑀉𑀧𑀦𑀺𑀲𑁆𑀲𑀸𑀬 𑀭𑀸𑀕𑀸𑀤𑀺𑀉𑀧𑁆𑀧𑀸𑀤𑀦𑁂 𑀅𑀓𑀼𑀲𑀮𑀲𑁆𑀲, 𑀓𑀼𑀲𑀮𑀸𑀓𑀼𑀲𑀮𑀽𑀧𑀦𑀺𑀲𑁆𑀲𑀬𑀪𑀸𑀯𑀫𑀼𑀔𑁂𑀦 𑀘𑀢𑀼𑀪𑀽𑀫𑀓𑀯𑀺𑀧𑀸𑀓𑀲𑁆𑀲. 𑀏𑀯𑀁 𑀓𑀺𑀭𑀺𑀬𑀲𑁆𑀲𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀓𑀺𑀭𑀺𑀬𑀲𑀗𑁆𑀔𑀸𑀢𑁄𑀧𑀺 𑀧𑀓𑀢𑀽𑀧𑀦𑀺𑀲𑁆𑀲𑀬𑁄 𑀘𑀢𑀼𑀪𑀽𑀫𑀓𑀸𑀦𑀁 𑀓𑀼𑀲𑀮𑀸𑀤𑀺𑀔𑀦𑁆𑀥𑀸𑀦𑀁 𑀳𑁄𑀢𑀺𑀬𑁂𑀯𑀸’’𑀢𑀺. 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀲𑀼 𑀧𑀦 𑀉𑀢𑀼𑀪𑁄𑀚𑀦𑀲𑁂𑀦𑀸𑀲𑀦𑀸𑀦𑀫𑁂𑀯 𑀢𑀺𑀡𑁆𑀡𑀁 𑀭𑀸𑀲𑀻𑀦𑀁 𑀧𑀓𑀢𑀽𑀧𑀦𑀺𑀲𑁆𑀲𑀬𑀪𑀸𑀯𑀤𑀲𑁆𑀲𑀦𑀁 𑀦𑀬𑀤𑀲𑁆𑀲𑀦𑀫𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡𑁂 𑀆𑀕𑀢𑀦𑀬𑁂𑀦𑀸𑀢𑀺 𑀇𑀤𑀁 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀸, 𑀓𑀼𑀲𑀮𑁂 𑀔𑀦𑁆𑀥𑁂 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁯𑁧) 𑀏𑀯𑀫𑀸𑀤𑀺𑀓𑀁 𑀉𑀧𑀦𑀺𑀲𑁆𑀲𑀬𑀧𑀝𑀺𑀓𑁆𑀔𑁂𑀧𑀁, 𑀅𑀦𑀼𑀮𑁄𑀫𑁂 𑀘 𑀅𑀦𑀸𑀕𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀯𑀺𑀜𑁆𑀜𑀸𑀡𑀽𑀧𑀦𑀺𑀲𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀦𑀺𑀲𑀁 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀺𑀓𑁂𑀦 (𑀲𑀁. 𑀦𑀺. 𑁨.𑁨𑁩),

‘‘𑀬𑀣𑀸𑀧𑀺 𑀧𑀩𑁆𑀩𑀢𑁄 𑀲𑁂𑀮𑁄, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀢𑀁 𑀭𑀼𑀓𑁆𑀔𑀸 𑀉𑀧𑀦𑀺𑀲𑁆𑀲𑀸𑀬, 𑀯𑀟𑁆𑀠𑀦𑁆𑀢𑁂 𑀢𑁂 𑀯𑀦𑀧𑁆𑀧𑀢𑀻’’𑀢𑀺 (𑀅. 𑀦𑀺. 𑁩.𑁪𑁯). 𑁋

𑀆𑀤𑀺𑀓𑁂𑀦 𑀘.

𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.