𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 𑀯𑀺𑀪𑀗𑁆𑀕𑁂 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀁 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁨) 𑀲𑀼𑀢𑁆𑀢𑁂 𑀤𑁂𑀲𑀺𑀢𑀓𑁆𑀓𑀫𑁂𑀦. 𑀧𑀯𑀢𑁆𑀢𑀺𑀯𑀸𑀭𑁂 𑀳𑀺 𑀏𑀓𑀦𑁆𑀢𑀁 𑀧𑀯𑀢𑁆𑀢𑀺𑀬𑀁 𑀏𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀓𑀫𑁆𑀫𑀚𑀸𑀦𑀁 𑀅𑀓𑀫𑁆𑀫𑀚𑀸𑀦𑀜𑁆𑀘 𑀅𑀦𑀼𑀧𑀸𑀮𑀓𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀫𑁆𑀫𑀚𑀸𑀦𑀦𑁆𑀢𑀺 𑀢𑀁𑀫𑀽𑀮𑀓𑀸𑀦𑀺 𑀬𑀫𑀓𑀸𑀦𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀯𑀲𑀸𑀦𑁂𑀲𑀼 𑀬𑀁 𑀫𑀽𑀮𑀓𑀫𑁂𑀯 𑀦 𑀳𑁄𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀫𑀽𑀮𑀓𑀸𑀦𑀺 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀸𑀦𑀺 𑀆𑀬𑀢𑀦𑀬𑀫𑀓𑁂 𑀯𑀺𑀬, 𑀢𑀲𑁆𑀫𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀫𑀚𑁆𑀛𑁂 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀅𑀦𑁆𑀢𑁂 𑀉𑀤𑁆𑀤𑀺𑀝𑁆𑀞𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁯𑁪. 𑀇𑀢𑁆𑀣𑀻 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀇𑀢𑁆𑀣𑀻𑀢𑀺 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀺, 𑀦 𑀘 𑀭𑀽𑀧𑀸𑀤𑀺𑀥𑀫𑁆𑀫𑁂 𑀉𑀧𑀸𑀤𑀸𑀬 𑀇𑀢𑁆𑀣𑀺𑀕𑁆𑀕𑀳𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀺𑀕𑁆𑀕𑀳𑀡𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀫𑀺𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀢𑀣𑀸𑀕𑀳𑀺𑀢𑀲𑁆𑀲 𑀯𑀲𑁂𑀦 ‘‘𑀦𑀢𑁆𑀣𑀻’’𑀢𑀺 𑀅𑀯𑀢𑁆𑀯𑀸 ‘‘𑀦𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀲𑁆𑀲 𑀘 𑀪𑁂𑀤𑀁 𑀓𑀢𑁆𑀯𑀸 ‘‘𑀲𑀼𑀔𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺, 𑀤𑀼𑀓𑁆𑀔𑀲𑁆𑀲 𑀘 ‘‘𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀘𑀦𑁂𑀦𑁂𑀯 𑀲𑁄𑀫𑀦𑀲𑁆𑀲𑀢𑁄 𑀅𑀜𑁆𑀜𑀸 𑀲𑀼𑀔𑀸 𑀯𑁂𑀤𑀦𑀸 𑀲𑀼𑀔𑀁, 𑀤𑁄𑀫𑀦𑀲𑁆𑀲𑀢𑁄 𑀘 𑀅𑀜𑁆𑀜𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀕𑀳𑀺𑀢𑁄𑀬𑁂𑀯𑀸𑀢𑀺 ‘‘𑀲𑀼𑀔𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀢𑁆𑀣 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑁧𑁪𑁦. 𑀲𑀼𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀸𑀭𑁂 𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀏𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁂𑀲𑀁 𑀲𑁄𑀢𑀦𑁆𑀢𑀺 𑀢𑀡𑁆𑀳𑀸𑀲𑁄𑀢𑀫𑁂𑀯𑀸𑀳.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨.𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁮𑁬. 𑀧𑀯𑀢𑁆𑀢𑀺𑀯𑀸𑀭𑁂 ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀙? 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁…𑀧𑁂… 𑀓𑀸𑀬𑀺𑀦𑁆𑀤𑁆𑀭𑀺𑀬𑀁 𑀫𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁯𑁫) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀇𑀥 𑀉𑀤𑁆𑀤𑀺𑀝𑁆𑀞𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀧𑀯𑀢𑁆𑀢𑀫𑀸𑀦𑁂𑀳𑀺 𑀓𑀫𑁆𑀫𑀚𑀸𑀓𑀫𑁆𑀫𑀚𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀬𑁄𑀕𑀁 𑀕𑀘𑁆𑀙𑀢𑀺, 𑀦 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀕𑀳𑁂𑀢𑀩𑁆𑀩𑀁, 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸𑀯 𑀧𑀥𑀸𑀦𑀁, 𑀢𑀲𑁆𑀫𑀸 𑀓𑀽𑀝𑀁 𑀯𑀺𑀬 𑀕𑁄𑀧𑀸𑀦𑀲𑀻𑀦𑀁 𑀲𑀩𑁆𑀩𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑀁 𑀅𑀦𑁆𑀢𑁂 𑀞𑀧𑁂𑀢𑁆𑀯𑀸 𑀬𑁄𑀚𑀺𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼 𑀧𑀯𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀕𑀢𑁂𑀲𑀼 ‘‘𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑀺 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑁂𑀳𑀺 𑀘 𑀬𑁄𑀚𑀦𑀸 𑀮𑀩𑁆𑀪𑀢𑀺, 𑀢𑀣𑀸 ‘‘𑀬𑀲𑁆𑀲 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’’𑀢𑀺𑀆𑀤𑀺𑀦𑀸 𑀢𑀁𑀫𑀽𑀮𑀓𑀸 𑀘 𑀦𑀬𑀸. 𑀢𑁂𑀳𑀺 𑀧𑀦 𑀧𑀯𑀢𑁆𑀢𑀺𑀬𑀁𑀬𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀬𑁄𑀚𑀦𑀸 𑀢𑀁𑀫𑀽𑀮𑀓𑀸 𑀘 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀧𑀯𑀢𑁆𑀢𑀫𑀸𑀦𑁂𑀳𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀬𑁄𑀚𑀦𑀸𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂𑀳𑀺 𑀘 𑀦𑀬𑁂𑀳𑀺 𑀧𑀸𑀓𑀝𑀸𑀬𑁂𑀯𑀸𑀢𑀺 𑀓𑀢𑁆𑀯𑀸 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

‘‘𑀲𑀘𑀓𑁆𑀔𑀼𑀓𑀸𑀦𑀁 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑁄𑀫𑀦𑀲𑁆𑀲𑀯𑀺𑀭𑀳𑀺𑀢𑀲𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 ‘‘𑀘𑀢𑀼𑀦𑁆𑀦𑀁𑀬𑁂𑀯𑀸’’𑀢𑀺 𑀦𑀺𑀬𑀫𑁄 𑀓𑀢𑁄, 𑀢𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀸 𑀧𑀭𑀺𑀢𑁆𑀢𑀯𑀺𑀧𑀸𑀓𑀭𑀽𑀧𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀬𑁄𑀧𑀺 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑁂𑀲𑀼 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀲𑀫𑀸𑀦𑀢𑀸𑀬 𑀫𑀳𑀸𑀯𑀺𑀧𑀸𑀓𑁂𑀳𑀺 𑀘𑀢𑀽𑀳𑀺 𑀦𑀺𑀤𑀲𑁆𑀲𑀦𑀁 𑀓𑀢𑀁, 𑀢𑁂𑀦 𑀬𑀣𑀸 𑀲𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀸 𑀅𑀘𑀓𑁆𑀔𑀼𑀓𑀸 𑀦 𑀳𑁄𑀦𑁆𑀢𑀺, 𑀏𑀯𑀁 𑀇𑀢𑀭𑀫𑀳𑀸𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺𑀓𑀸𑀧𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀘 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀘𑀯𑀦𑁆𑀢𑀸𑀦𑀁 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀢𑀸 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀦𑀺𑀬𑀫𑀢𑁄 𑀲𑀘𑀓𑁆𑀔𑀼𑀓𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑁂𑀧𑀺 𑀳𑀺 𑀲𑀦𑁆𑀥𑀸𑀬 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀇𑀤𑀁 𑀯𑀘𑀦𑀁 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀣𑀸 𑀆𑀬𑀢𑀦𑀬𑀫𑀓𑁂 𑀤𑀲𑁆𑀲𑀺𑀢𑀁. 𑀦 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀚𑁆𑀚𑀦𑁂 𑀓𑀸𑀭𑀡𑀁 𑀅𑀢𑁆𑀣𑀺, ‘‘𑀇𑀢𑁆𑀣𑀻𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦’’𑀦𑁆𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁭) 𑀘 𑀢𑁂 𑀏𑀯 𑀯𑀼𑀢𑁆𑀢𑀸𑀢𑀺.

𑀉𑀧𑁂𑀓𑁆𑀔𑀸𑀬 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘 𑀓𑀸𑀫𑀸𑀯𑀘𑀭𑁂 𑀲𑁄𑀧𑁂𑀓𑁆𑀔𑀅𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀢𑀁𑀲𑀫𑀸𑀦𑀮𑀓𑁆𑀔𑀡𑀁 𑀅𑀭𑀽𑀧𑀧𑀝𑀺𑀲𑀦𑁆𑀥𑀺𑀜𑁆𑀘 𑀦𑀺𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀲𑀼𑀘𑀺 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀅𑀳𑁂𑀢𑀼𑀓𑀸𑀭𑀽𑀧𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑁂𑀬𑁆𑀬𑁄.

‘‘𑀢𑀢𑁆𑀣 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀤𑀺 𑀧𑀦 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀲𑀦𑁆𑀢𑀺, ‘‘𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀲𑀫𑀸𑀥𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁧𑁩) ‘‘𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁧𑁧) 𑀯𑀘𑀦𑀢𑁄. 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂 𑀘 𑀬𑀣𑀸 𑀲𑀫𑀸𑀥𑀺𑀮𑁂𑀲𑁄 𑀏𑀓𑀕𑁆𑀕𑀢𑀸 𑀅𑀢𑁆𑀣𑀺, 𑀦 𑀏𑀯𑀁 𑀯𑀻𑀭𑀺𑀬𑀮𑁂𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀢𑀢𑁆𑀣 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀏𑀓𑀕𑁆𑀕𑀢𑀸 𑀧𑀦 𑀲𑀫𑀸𑀥𑀺𑀮𑁂𑀲𑁄 𑀏𑀯 𑀳𑁄𑀢𑀻’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑀣𑀸 𑀅𑀜𑁆𑀜𑁂𑀲𑀼 𑀓𑁂𑀲𑀼𑀘𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑁂𑀲𑀼 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀳𑁄𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀘, 𑀏𑀯𑀫𑀺𑀥 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺. 𑀲𑀫𑀸𑀥𑀺𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀦𑀫𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀳𑁂𑀢𑀼𑀓𑀦𑁆𑀢𑀭𑀢𑁄 𑀯𑀺𑀲𑁂𑀲𑁂𑀢𑀺. 𑀢𑀢𑁆𑀣 ‘‘𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀧𑀦 𑀦 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀻’’𑀢𑀺 𑀲𑀫𑀸𑀥𑀺𑀮𑁂𑀲𑀲𑁆𑀲 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀪𑀸𑀯𑀁 𑀅𑀧𑁆𑀧𑀢𑁆𑀢𑀲𑁆𑀲 𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀦 𑀯𑀻𑀭𑀺𑀬𑀮𑁂𑀲𑀲𑁆𑀲. 𑀯𑀺𑀲𑁂𑀲𑀦𑀜𑁆𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑁂 𑀧𑀯𑀢𑁆𑀢𑀢𑀺. 𑀬𑁂𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀢𑁆𑀣 𑀏𑀓𑀦𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀬𑁄 𑀦𑀢𑁆𑀣𑀻’’𑀢𑀺 𑀧𑀸𑀞𑁄, 𑀲𑁄 𑀏𑀯 𑀲𑀼𑀦𑁆𑀤𑀭𑀢𑀭𑁄.

𑀬𑀸𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀕𑀩𑁆𑀪𑀕𑀢𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀪𑀸𑀯𑁄 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀲𑀳𑁂𑀢𑀼𑀓𑀸𑀦𑀁 𑀅𑀘𑀓𑁆𑀔𑀼𑀓𑀸𑀦𑀦𑁆𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀘𑁂𑀯 𑀅𑀭𑀽𑀧𑀻𑀯𑀲𑁂𑀦 𑀘 𑀯𑀼𑀢𑁆𑀢’’𑀦𑁆𑀢𑀺. 𑀕𑀩𑁆𑀪𑀲𑁂𑀬𑁆𑀬𑀓𑀸𑀧𑀺 𑀧𑀦 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑀓𑀘𑀓𑁆𑀔𑀼𑀓𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀘𑀓𑁆𑀔𑀼𑀓𑀸𑀦𑀁 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀓𑀸𑀫𑀥𑀸𑀢𑀼𑀬𑀁 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥𑀸𑀧𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸 𑀘 𑀅𑀘𑀓𑁆𑀔𑀼𑀓𑀸 𑀮𑀩𑁆𑀪𑀦𑁆𑀢𑁂𑀯. 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀸𑀦𑀫𑁆𑀧𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀸𑀤𑁄, 𑀘𑀼𑀢𑀺𑀯𑀲𑁂𑀦 𑀦𑀺𑀭𑁄𑀥𑁄 𑀩𑀸𑀳𑀼𑀮𑁆𑀮𑀯𑀲𑁂𑀦 𑀤𑀲𑁆𑀲𑀺𑀢𑁄. 𑀓𑀤𑀸𑀘𑀺 𑀳𑀺 𑀢𑁂𑀲𑀁 𑀧𑀞𑀫𑀓𑀧𑁆𑀧𑀺𑀓𑀸𑀤𑀻𑀦𑀁 𑀯𑀺𑀬 𑀧𑀯𑀢𑁆𑀢𑀺𑀬𑀫𑁆𑀧𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁆𑀣 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀯𑀲𑀸𑀦𑁂𑀲𑀼 𑀇𑀦𑁆𑀤𑁆𑀭𑀺𑀬𑀫𑀽𑀮𑀬𑀫𑀓𑁂𑀲𑀼 𑀧𑀞𑀫𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑁂𑀳𑀺 𑀕𑀳𑀺𑀢𑁂𑀳𑀺 𑀉𑀧𑀧𑀢𑁆𑀢𑀺𑀘𑀼𑀢𑀺𑀯𑀲𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀦𑀺𑀬𑀫𑀺𑀢𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀯𑀢𑁆𑀢𑀺𑀯𑀲𑁂𑀦𑀧𑀺 𑀮𑀩𑁆𑀪𑀫𑀸𑀦𑀸𑀦𑀁 𑀉𑀧𑀧𑀢𑁆𑀢𑀺𑀘𑀼𑀢𑀺𑀯𑀲𑁂𑀦𑁂𑀯 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑁂𑀳𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁯𑁦. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀫𑀸𑀦𑀕𑀢𑀺𑀓𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯 𑀕𑀘𑁆𑀙𑀢𑀺 𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀤𑀲𑁆𑀲𑀦𑀢𑁄𑀢𑀺 𑀆𑀳 ‘‘𑀧𑀯𑀢𑁆𑀢𑁂 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀢𑀺 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀲𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀁 𑀬𑀣𑀸𑀮𑀸𑀪𑀯𑀲𑁂𑀦𑀸𑀢𑀺 𑀏𑀢𑁆𑀣 𑀏𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼, 𑀅𑀜𑁆𑀜𑁂𑀲𑀜𑁆𑀘 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀽𑀢𑀺 𑀏𑀯𑀁 𑀬𑀣𑀸𑀮𑀸𑀪𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀙𑁂𑀤𑁂𑀬𑁂𑀯𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀧𑀭𑀺𑀧𑀼𑀡𑁆𑀡𑀧𑀜𑁆𑀳𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀭𑀽𑀧𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀲𑁆𑀲 𑀙𑁂𑀤𑁄𑀢𑀺 𑀦𑀸𑀫𑀁 𑀤𑀝𑁆𑀞𑀩𑁆𑀩𑀁.

𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀲𑁄𑀫𑀦𑀲𑁆𑀲𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦𑀁 𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀅𑀯𑀘𑀦𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀫𑀸𑀦𑀕𑀢𑀺𑀓𑀢𑀁 𑀤𑀻𑀧𑁂𑀢𑀺. 𑀢𑀲𑁆𑀲 𑀳𑀺 𑀉𑀧𑀧𑀢𑁆𑀢𑀺𑀬𑀁𑀬𑁂𑀯 𑀉𑀧𑁆𑀧𑀸𑀤𑁄 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀅𑀲𑀜𑁆𑀜𑀲𑀢𑁆𑀢𑁂 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀺𑀯𑀲𑁂𑀦 𑀢𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀘 𑀦 𑀯𑀼𑀢𑁆𑀢𑀸, 𑀅𑀦𑀼𑀧𑁆𑀧𑀸𑀤𑁄𑀧𑀺 𑀧𑀦𑁂𑀢𑀲𑁆𑀲 𑀘𑀼𑀢𑀺𑀉𑀧𑀧𑀢𑁆𑀢𑀻𑀲𑁆𑀯𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀧𑀯𑀢𑁆𑀢𑁂𑀢𑀺. 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂𑀧𑀺 ‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 ‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁆𑀣𑁂𑀯 𑀅𑀲𑀜𑁆𑀜𑀲𑀢𑁆𑀢𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀧𑀯𑀢𑁆𑀢𑀺𑀯𑀲𑁂𑀦 𑀢𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀦 𑀘 𑀯𑀼𑀢𑁆𑀢𑀸. 𑀬𑀲𑁆𑀲𑀬𑀢𑁆𑀣𑀓𑁂 𑀘 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸 𑀦 𑀤𑀲𑁆𑀲𑁂𑀢𑀩𑁆𑀩𑀸 𑀦 𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀦 𑀳𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸𑀦’’𑀦𑁆𑀢𑀺 𑀯𑀘𑀦𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸𑀦’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀑𑀓𑀸𑀲𑀤𑀻𑀧𑀓𑀁, 𑀦𑀸𑀧𑀺 ‘‘𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀓𑁆𑀔𑀡𑀤𑀻𑀧𑀓𑀁, 𑀅𑀣 𑀔𑁄 𑀧𑀼𑀕𑁆𑀕𑀮𑀤𑀻𑀧𑀓𑀫𑁂𑀯𑀸𑀢𑀺.

𑀅𑀢𑀻𑀢𑀓𑀸𑀮𑀪𑁂𑀤𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑁂𑀲𑀁 𑀢𑀢𑁆𑀣 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀏𑀢𑁆𑀣 ‘‘𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀲𑀼𑀤𑁆𑀥𑀸𑀯𑀸𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁, 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁨𑁭𑁭) 𑀏𑀢𑁆𑀣 𑀯𑀺𑀬 ‘‘𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀲𑁄𑀫𑀦𑀲𑁆𑀲𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀉𑀧𑀧𑀚𑁆𑀚𑀦𑁆𑀢𑀸 𑀧𑀼𑀕𑁆𑀕𑀮𑀸 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀳𑁄𑀦𑁆𑀢𑀺, 𑀦 𑀏𑀯𑀁 𑀲𑁄𑀫𑀦𑀲𑁆𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀉𑀧𑀧𑀢𑁆𑀢𑀺𑀲𑀫𑀗𑁆𑀕𑀺𑀦𑁄𑀬𑁂𑀯 𑀳𑁄𑀦𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀳𑀺 𑀯𑀲𑁂𑀦 𑀬𑀸𑀯 𑀧𑀞𑀫𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀥𑀭𑀢𑀺, 𑀢𑀸𑀯 𑀉𑀧𑀧𑀚𑁆𑀚𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀤𑀸 𑀘 𑀤𑀼𑀢𑀺𑀬𑀘𑀺𑀢𑁆𑀢𑀢𑁄 𑀧𑀝𑁆𑀞𑀸𑀬 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀉𑀪𑀬𑀁 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀁. 𑀬𑀣𑀸 𑀳𑀺 ‘‘𑀦 𑀦𑀺𑀭𑀼𑀚𑁆𑀛𑀺𑀢𑁆𑀣𑀸’’𑀢𑀺 𑀇𑀤𑀁 𑀮𑀓𑁆𑀔𑀡𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀤𑁆𑀯𑀻𑀲𑀼 𑀔𑀡𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀧𑀞𑀫𑁂𑀦 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀁, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀁.

𑀅𑀦𑀸𑀕𑀢𑀓𑀸𑀮𑀪𑁂𑀤𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑁂 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀜𑁆𑀜𑀲𑁆𑀲 𑀘 𑀉𑀧𑁆𑀧𑀚𑁆𑀚𑀺𑀲𑁆𑀲𑀫𑀸𑀦𑀢𑀸𑀯 𑀧𑀼𑀘𑁆𑀙𑀺𑀢𑀸. 𑀢𑀢𑁆𑀣 𑀬𑀣𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀪𑁂𑀤𑁂 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀪𑁂𑀤𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑁂𑀯 𑀧𑀼𑀘𑁆𑀙𑀺𑀢𑀸𑀦𑀁 𑀉𑀧𑀧𑀢𑁆𑀢𑀺𑀬𑀁𑀬𑁂𑀯 𑀢𑁂𑀲𑀁 𑀉𑀧𑁆𑀧𑀸𑀤𑁄 𑀲𑀫𑁆𑀪𑀯𑀢𑀺, 𑀦 𑀅𑀜𑁆𑀜𑀢𑁆𑀣, 𑀦 𑀏𑀯𑀫𑀺𑀥 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑁂𑀯 𑀧𑀼𑀘𑁆𑀙𑀺𑀢𑀸𑀦𑀁 𑀢𑁂𑀲𑀁 𑀉𑀧𑀧𑀢𑁆𑀢𑀺𑀢𑁄 𑀅𑀜𑁆𑀜𑀢𑁆𑀣 𑀉𑀧𑁆𑀧𑀸𑀤𑁄 𑀦 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀭𑁄𑀥𑀯𑀸𑀭𑁂𑀧𑀺 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀅𑀧𑀺 𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀉𑀧𑁂𑀓𑁆𑀔𑀸𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲. 𑀦 𑀳𑀺 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀢𑀲𑁆𑀲 𑀘𑀼𑀢𑀺𑀢𑁄 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀦𑀺𑀭𑁄𑀥𑁄 𑀦 𑀲𑀫𑁆𑀪𑀯𑀢𑀻𑀢𑀺. 𑀏𑀢𑁆𑀣 𑀳𑀺 𑀧𑀞𑀫𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀦𑀺𑀲𑁆𑀲𑀬𑁄 𑀫𑀸𑀤𑀺𑀲𑁄𑀯 𑀉𑀧𑀧𑀢𑁆𑀢𑀺𑀉𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀉𑀪𑀬𑀼𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀅𑀢𑁆𑀣𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑁄𑀢𑀺 𑀏𑀯𑀁 𑀯𑀺𑀬 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀫𑁂𑀯 𑀦𑀺𑀬𑀫𑁂𑀢𑀺, 𑀦 𑀢𑀢𑁆𑀣𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑀁 𑀅𑀦𑀸𑀕𑀢𑀪𑀸𑀯𑀫𑀢𑁆𑀢𑁂𑀦 𑀲𑀭𑀽𑀧𑀢𑁄 𑀕𑀳𑀺𑀢𑀁 𑀉𑀧𑁆𑀧𑀸𑀤𑀁 𑀯𑀸 𑀦𑀺𑀭𑁄𑀥𑀁 𑀯𑀸 𑀲𑀁𑀲𑀬𑀢𑁆𑀣𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀯𑀁 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲 𑀦𑀺𑀬𑀫𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁨𑁮𑁧) 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀦𑀺𑀭𑁄𑀥𑀯𑀸𑀭𑁂𑀧𑀺.

𑀧𑀝𑀺𑀮𑁄𑀫𑁂 𑀧𑀦 𑀬𑀣𑀸 𑀅𑀦𑀼𑀮𑁄𑀫𑁂 ‘‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀅𑀦𑀸𑀕𑀢𑀸 𑀲𑀭𑀽𑀧𑀯𑀲𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀅𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀢𑀢𑁆𑀣 𑀲𑀁𑀲𑀬𑀧𑀤𑁂𑀦 𑀕𑀳𑀺𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀺𑀬𑀫𑁆𑀧𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼 𑀬𑁄𑀚𑀺𑀢𑀸, 𑀦 𑀏𑀯𑀁 𑀬𑁄𑀚𑁂𑀢𑀩𑁆𑀩𑀸. 𑀬𑀣𑀸 𑀳𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀬𑁄𑀚𑁂𑀢𑀼𑀁, 𑀦 𑀏𑀯𑀁 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀅𑀪𑀽𑀢𑀸𑀪𑀸𑀯𑀲𑁆𑀲 𑀅𑀪𑀽𑀢𑀸𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀢𑁆𑀯𑀸 𑀘 𑀲𑀫𑁆𑀪𑀯𑀸𑀦𑀼𑀧𑁆𑀧𑀢𑁆𑀢𑀺𑀢𑁄, 𑀅𑀪𑀽𑀢𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁄 𑀘 𑀧𑀝𑀺𑀮𑁄𑀫𑁂 𑀧𑀼𑀘𑁆𑀙𑀺𑀢𑁄, 𑀢𑀲𑁆𑀫𑀸𑀲𑁆𑀲 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀅𑀪𑀽𑀢𑀸𑀪𑀸𑀯𑀲𑁆𑀲 𑀯𑀢𑁆𑀢𑀫𑀸𑀦𑀸𑀦𑀁 𑀉𑀧𑁆𑀧𑀸𑀤𑀲𑁆𑀲 𑀯𑀺𑀬 𑀓𑀸𑀮𑀦𑁆𑀢𑀭𑀬𑁄𑀕𑀸𑀪𑀸𑀯𑀢𑁄 𑀬𑀸𑀤𑀺𑀲𑀸𑀦𑀁 𑀘𑀓𑁆𑀔𑀸𑀤𑀻𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲 𑀦𑀺𑀲𑁆𑀲𑀬𑁄 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀦𑁆𑀦𑀺𑀘𑁆𑀙𑀺𑀢𑁄, 𑀢𑀦𑁆𑀦𑀺𑀲𑁆𑀲𑀬𑀸 𑀢𑀸𑀤𑀺𑀲𑀸𑀦𑀁𑀬𑁂𑀯 𑀉𑀧𑀧𑀢𑁆𑀢𑀺𑀘𑀼𑀢𑀺𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀚𑀻𑀯𑀺𑀢𑀸𑀤𑀻𑀦𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸 𑀲𑀁𑀲𑀬𑀧𑀤𑁂𑀦 𑀧𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀻𑀢𑀺 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁩𑁦𑁮) 𑀘, ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀬𑁂 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺.

𑀬𑁂 𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀖𑀸𑀦𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀬𑁂 𑀲𑁄𑀧𑁂𑀓𑁆𑀔𑀧𑀝𑀺𑀲𑀦𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 ‘‘𑀬𑁂 𑀘 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀢𑁂𑀦 𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑀯𑀘𑀦𑁂𑀦 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀲𑀗𑁆𑀕𑀳𑀺𑀢𑀸𑀢𑀺 𑀬𑁂 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀝𑁆𑀞𑀓𑀣𑀸𑀬𑀁 𑀬𑁂𑀲𑀼 𑀆𑀤𑀺𑀫𑀧𑁄𑀢𑁆𑀣𑀓𑁂𑀲𑀼 ‘‘𑀅𑀢𑀻𑀢𑀸𑀦𑀸𑀕𑀢𑀯𑀸𑀭𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀥𑀫𑁆𑀫𑀬𑀫𑀓𑁂 𑀯𑀺𑀬 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀺𑀓𑁆𑀓𑀫𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁. 𑀬𑁂𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀸𑀭𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀫𑀦𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺…𑀧𑁂… 𑀢𑀲𑁆𑀫𑀺𑀁 𑀪𑀯𑁂 𑀅𑀦𑀼𑀧𑁆𑀧𑀦𑁆𑀦𑀧𑀼𑀩𑁆𑀩𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀏𑀯 𑀲𑀼𑀦𑁆𑀤𑀭𑀢𑀭𑁄𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁪𑁩𑁫-𑁪𑁮𑁨. 𑀧𑀭𑀺𑀜𑁆𑀜𑀸𑀯𑀸𑀭𑁂 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑀫𑀺𑀲𑁆𑀲𑀓𑀸𑀦𑀺 𑀘𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀏𑀓𑀦𑁆𑀢𑀧𑀭𑀺𑀜𑁆𑀜𑁂𑀬𑁆𑀬𑁂𑀳𑀺 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑁂𑀳𑀺 𑀫𑀺𑀲𑁆𑀲𑀓𑀢𑁆𑀢𑀸 𑀢𑀸𑀦𑀺 𑀉𑀧𑀸𑀤𑀸𑀬 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀘 𑀯𑀼𑀢𑁆𑀢𑀸. 𑀬𑀤𑀺 𑀧𑀭𑀺𑀜𑁆𑀜𑁂𑀬𑁆𑀬𑀫𑀺𑀲𑁆𑀲𑀓𑀢𑁆𑀢𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀳𑁄𑀢𑀺, 𑀓𑀲𑁆𑀫𑀸 𑀥𑀫𑁆𑀫𑀬𑀫𑀓𑁂 ‘‘𑀬𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀪𑀸𑀯𑁂𑀢𑀺, 𑀲𑁄 𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀅𑀩𑁆𑀬𑀸𑀓𑀢𑀧𑀤𑁂𑀦 𑀬𑁄𑀚𑁂𑀢𑁆𑀯𑀸 𑀬𑀫𑀓𑀸𑀦𑀺 𑀦 𑀯𑀼𑀢𑁆𑀢𑀸𑀦𑀻𑀢𑀺? 𑀬𑀣𑀸 ‘‘𑀓𑀼𑀲𑀮𑀁 𑀪𑀸𑀯𑁂𑀫𑀺, 𑀅𑀓𑀼𑀲𑀮𑀁 𑀧𑀚𑀳𑀸𑀫𑀻’’𑀢𑀺 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀪𑀸𑀯𑀦𑀸𑀧𑀳𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀢𑀣𑀸 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀅𑀦𑀺𑀘𑁆𑀘𑁄, 𑀥𑀫𑁆𑀫𑀸𑀬𑀢𑀦𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀤𑀻𑀲𑀼 𑀧𑀭𑀺𑀚𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀢𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀚𑀸𑀦𑀺𑀢𑀩𑁆𑀩𑀸, 𑀢𑁂 𑀘 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀧𑀭𑀺𑀚𑀸𑀦𑀺𑀢𑀩𑁆𑀩𑀸, 𑀦 𑀅𑀩𑁆𑀬𑀸𑀓𑀢𑀪𑀸𑀯𑀦𑁆𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀪𑀸𑀚𑀦𑀻𑀬𑁂 𑀆𑀕𑀢𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀧𑀳𑀸𑀢𑀩𑁆𑀩𑀢𑀸𑀯 𑀯𑀼𑀢𑁆𑀢𑀸, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀢𑀸, 𑀦𑀦𑀼 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺? 𑀲𑀘𑁆𑀘𑀁, 𑀬𑀣𑀸 𑀧𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀪𑀸𑀯𑁂𑀢𑀩𑁆𑀩𑀧𑀳𑀸𑀢𑀩𑁆𑀩𑀪𑀸𑀯𑁂𑀳𑀺 𑀯𑀺𑀦𑀸𑀧𑀺 𑀳𑁄𑀢𑀺, 𑀦 𑀏𑀯𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀪𑀸𑀯𑁄 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀦𑀸 𑀳𑁄𑀢𑀻𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀳𑀸𑀢𑀩𑁆𑀩𑀢𑀸𑀯 𑀇𑀥 𑀯𑀼𑀢𑁆𑀢𑀸, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀲𑁆𑀲 𑀅𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀓𑀼𑀲𑀮𑀁 𑀏𑀓𑀦𑁆𑀢𑀢𑁄 𑀧𑀳𑀸𑀢𑀩𑁆𑀩𑀫𑁂𑀯𑀸𑀢𑀺 𑀏𑀢𑁂𑀦 𑀧𑀳𑀸𑀢𑀩𑁆𑀩𑀫𑁂𑀯, 𑀦 𑀅𑀧𑁆𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀧𑁆𑀧𑀳𑀸𑀢𑀩𑁆𑀩𑀫𑁂𑀯 𑀦𑀺𑀯𑀸𑀭𑁂𑀢𑀺, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀩𑁆𑀩𑀦𑀺𑀝𑁆𑀞𑀁, 𑀦 𑀧𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑀺𑀝𑁆𑀞𑀦𑁆𑀢𑀺 𑀪𑀸𑀯𑁂𑀢𑀩𑁆𑀩𑀪𑀸𑀯𑁄 𑀏𑀯 𑀢𑀲𑁆𑀲 𑀕𑀳𑀺𑀢𑁄𑀢𑀺. ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀭𑀢𑁄 𑀮𑀺𑀔𑀺𑀢𑀩𑁆𑀩𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀮𑀺𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑀜𑁆𑀳𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀧𑀚𑀳𑀦𑁆𑀢𑀺 𑀦𑁄 𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀦 𑀪𑀸𑀯𑁂𑀦𑁆𑀢𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁦).

𑀏𑀢𑁆𑀣 𑀘 𑀧𑀼𑀣𑀼𑀚𑁆𑀚𑀦𑁄, 𑀅𑀝𑁆𑀞 𑀘 𑀅𑀭𑀺𑀬𑀸𑀢𑀺 𑀦𑀯 𑀧𑀼𑀕𑁆𑀕𑀮𑀸. 𑀢𑁂𑀲𑀼 𑀧𑀼𑀣𑀼𑀚𑁆𑀚𑀦𑁄 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑀼𑀯𑀺𑀥𑁄, 𑀲𑁄 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀙 𑀧𑀼𑀕𑁆𑀕𑀮𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀭𑀺𑀚𑀸𑀦𑀺𑀢𑁆𑀣 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀚𑀳𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁂 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁪𑁯, 𑁫𑁧-𑁫𑁨) 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀧𑀜𑁆𑀘 𑀧𑀼𑀕𑁆𑀕𑀮𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀚𑀳𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁫𑁧) 𑀘 𑀪𑀩𑁆𑀩𑁄 𑀏𑀯 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁫𑁧) 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀦𑀧𑁆𑀧𑀚𑀳𑀺𑀲𑁆𑀲𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁫𑁫) 𑀘 𑀅𑀪𑀩𑁆𑀩𑁄 𑀏𑀯. 𑀅𑀕𑁆𑀕𑀨𑀮𑀲𑀫𑀗𑁆𑀕𑀻 𑀘 𑀧𑀞𑀫𑀨𑀮𑀲𑀫𑀗𑁆𑀕𑀻 𑀅𑀭𑀳𑀸 𑀘𑀸𑀢𑀺 𑀤𑀼𑀯𑀺𑀥𑁄. 𑀲𑁄𑀧𑀺 ‘‘𑀅𑀭𑀳𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀪𑀸𑀯𑀺𑀢𑁆𑀣 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀚𑀳𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁪) 𑀘 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁄 𑀅𑀕𑁆𑀕𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁬) 𑀆𑀕𑀢𑀝𑁆𑀞𑀸𑀦𑁂𑀲𑀼 ‘‘𑀢𑀬𑁄 𑀧𑀼𑀕𑁆𑀕𑀮𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀚𑀳𑀺𑀢𑁆𑀣, 𑀦𑁄 𑀘 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀲𑀘𑁆𑀙𑀺𑀓𑀭𑀺𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁪) 𑀘 𑀧𑀞𑀫𑀨𑀮𑀲𑀫𑀗𑁆𑀕𑀻 𑀘 𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄. ‘‘𑀬𑁄 𑀅𑀕𑁆𑀕𑀨𑀮𑀁 𑀲𑀘𑁆𑀙𑀸𑀓𑀸𑀲𑀻’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁪𑁪𑁩, 𑁪𑁪𑁬) 𑀆𑀕𑀢𑀝𑁆𑀞𑀸𑀦𑁂𑀲𑀼 𑀇𑀢𑀭𑁄𑀯𑀸𑀢𑀺 𑀏𑀯𑀁 𑀧𑀼𑀕𑁆𑀕𑀮𑀪𑁂𑀤𑀁 𑀜𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀧𑀼𑀕𑁆𑀕𑀮𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀧𑀓𑀭𑀡-𑀫𑀽𑀮𑀝𑀻𑀓𑀸 𑀲𑀫𑀢𑁆𑀢𑀸.