𑁨. 𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸

𑁬𑁬-𑁧𑁩𑁧. 𑀲𑀸𑀦𑀼𑀲𑀬𑀧𑀚𑀳𑀦𑀧𑀭𑀺𑀜𑁆𑀜𑀸𑀯𑀸𑀭𑁂𑀲𑀼 ‘‘𑀲𑀸𑀦𑀼𑀲𑀬𑁄, 𑀧𑀚𑀳𑀢𑀺, 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄. 𑀧𑀼𑀕𑁆𑀕𑀮𑀲𑁆𑀲 𑀘 𑀇𑀫𑀲𑁆𑀫𑀺𑀁 𑀪𑀯𑁂 𑀲𑀸𑀦𑀼𑀲𑀬𑁄𑀢𑀺 𑀏𑀯𑀁 𑀪𑀯𑀯𑀺𑀲𑁂𑀲𑁂𑀦 𑀯𑀸, 𑀇𑀫𑀲𑁆𑀫𑀺𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄 𑀇𑀫𑀲𑁆𑀫𑀺𑀁 𑀇𑀢𑀭𑁂𑀲𑀼 𑀓𑁂𑀦𑀘𑀻𑀢𑀺 𑀏𑀯𑀁 𑀪𑀯𑀸𑀦𑀼𑀲𑀬𑀯𑀺𑀲𑁂𑀲𑁂𑀦 𑀯𑀸 𑀲𑀸𑀦𑀼𑀲𑀬𑀢𑀸𑀦𑀺𑀭𑀦𑀼𑀲𑀬𑀢𑀸𑀤𑀺𑀓𑀸 𑀦𑀢𑁆𑀣𑀺. 𑀢𑀣𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑀦𑀼𑀲𑀬𑁄𑀢𑀺 𑀇𑀤𑀫𑁆𑀧𑀺 𑀦𑀢𑁆𑀣𑀺. 𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀯𑁂𑀤𑀦𑀸 𑀑𑀓𑀸𑀲𑁄, 𑀅𑀣 𑀔𑁄 𑀅𑀦𑀼𑀲𑀬𑀸𑀦𑀦𑁆𑀢𑀺. 𑀅𑀦𑀼𑀲𑀬𑀲𑁆𑀲 𑀧𑀦 𑀢𑀲𑁆𑀲 𑀢𑀲𑁆𑀲 𑀲𑁄 𑀲𑁄 𑀅𑀦𑀼𑀲𑀬𑀦𑁄𑀓𑀸𑀲𑁄 𑀧𑀼𑀕𑁆𑀕𑀮𑀲𑁆𑀲 𑀢𑁂𑀦 𑀢𑁂𑀦 𑀅𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑀢𑀸𑀬, 𑀢𑀲𑁆𑀲 𑀢𑀲𑁆𑀲 𑀧𑀚𑀳𑀦𑀧𑀭𑀺𑀚𑀸𑀦𑀦𑀸𑀦𑀜𑁆𑀘 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺, 𑀅𑀦𑀦𑀼𑀲𑀬𑀦𑁄𑀓𑀸𑀲𑁄 𑀘 𑀦𑀺𑀭𑀦𑀼𑀲𑀬𑀢𑀸𑀤𑀻𑀦𑀁, 𑀢𑀲𑁆𑀫𑀸 𑀑𑀓𑀸𑀲𑀯𑀸𑀭𑁂𑀲𑀼 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 ‘‘𑀬𑀢𑁄 𑀢𑀢𑁄’’𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀁, 𑀧𑀚𑀳𑀦𑀧𑀭𑀺𑀜𑁆𑀜𑀸𑀯𑀸𑀭𑁂𑀲𑀼 𑀅𑀧𑀸𑀤𑀸𑀦𑀢𑁆𑀣𑁂 𑀏𑀯 𑀯𑀸. 𑀢𑀢𑁄 𑀢𑀢𑁄 𑀳𑀺 𑀑𑀓𑀸𑀲𑀢𑁄 𑀅𑀧𑀕𑀫𑀓𑀭𑀡𑀁 𑀯𑀺𑀦𑀸𑀲𑀦𑀁 𑀧𑀚𑀳𑀦𑀁 𑀧𑀭𑀺𑀚𑀸𑀦𑀦𑀜𑁆𑀘𑀸𑀢𑀺.

𑀢𑀢𑁆𑀣 𑀬𑀢𑁄𑀢𑀺 𑀬𑀢𑁄 𑀅𑀦𑀼𑀲𑀬𑀝𑁆𑀞𑀸𑀦𑀢𑁄 𑀅𑀦𑀼𑀮𑁄𑀫𑁂, 𑀧𑀝𑀺𑀮𑁄𑀫𑁂 𑀅𑀦𑀦𑀼𑀲𑀬𑀝𑁆𑀞𑀸𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀬𑀸𑀦𑀸𑀦𑀼𑀲𑀬𑀲𑁆𑀲𑁂𑀯 𑀳𑀺 𑀦𑀺𑀫𑀺𑀢𑁆𑀢𑀸𑀧𑀸𑀤𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀢𑀢𑁄 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄𑀢𑀺 (𑀬𑀫.𑁨.𑀅𑀦𑀼𑀲𑀬𑀬𑀫𑀓.𑁭𑁭), 𑀧𑀚𑀳𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁪𑁩) 𑀘 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁧𑁦), 𑀦 𑀧𑀚𑀳𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁭𑁪-𑁧𑁭𑁬) 𑀘 𑀏𑀯𑀫𑀸𑀤𑀻𑀲𑀼 𑀭𑀽𑀧𑀥𑀸𑀢𑀼𑀆𑀤𑀬𑁄 𑀏𑀯 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀢𑀼𑀢𑁆𑀣𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀭𑀽𑀧𑀢𑁄 𑀅𑀦𑀼𑀲𑀬𑀦𑀝𑁆𑀞𑀸𑀦𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀢𑀤𑀢𑁆𑀣𑁂 𑀆𑀤𑀺𑀧𑀜𑁆𑀳𑁂𑀧𑀺 ‘‘𑀬𑀢𑁄’’𑀢𑀺 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑁆𑀯𑀸 𑀧𑀼𑀦 ‘‘𑀬𑀢𑁄’’𑀢𑀺 𑀏𑀢𑀲𑁆𑀲 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀦𑁆𑀦𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀦 𑀳𑀺 𑀉𑀧𑁆𑀧𑀦𑁆𑀦𑁂𑀦𑁂𑀯 𑀅𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀜𑁆𑀘 𑀲𑀦𑁆𑀥𑀸𑀬𑁂𑀯 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀦𑀼𑀲𑀬𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸𑀢𑀺 𑀢𑀁 𑀢𑀣𑁂𑀯 𑀤𑀺𑀲𑁆𑀲𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀬𑀢𑁄 𑀉𑀧𑁆𑀧𑀦𑁆𑀦𑁂𑀦𑀸𑀢𑀺 𑀬𑀢𑁄 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀦𑁆𑀢𑀺. 𑀢𑀣𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑁂𑀦𑀸𑀢𑀺. 𑀉𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑁂 𑀅𑀓𑀢𑁂 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀪𑀸𑀯𑀁 𑀆𑀧𑀦𑁆𑀦𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀪𑀸𑀯𑀁 𑀅𑀧𑀦𑁂𑀢𑀺 𑀦𑀸𑀫. 𑀲𑀩𑁆𑀩𑀢𑁆𑀣𑀸𑀢𑀺 𑀏𑀢𑀲𑁆𑀲 𑀧𑀦 𑀲𑀩𑁆𑀩𑀝𑁆𑀞𑀸𑀦𑀢𑁄𑀢𑀺 𑀅𑀬𑀫𑀢𑁆𑀣𑁄 𑀦 𑀦 𑀲𑀫𑁆𑀪𑀯𑀢𑀺. 𑀢𑁆𑀣-𑀓𑀸𑀭𑀜𑁆𑀳𑀺 𑀪𑀼𑀫𑁆𑀫𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀻𑀢𑀺.

𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.