𑁭. 𑀅𑀦𑀼𑀲𑀬𑀬𑀫𑀓𑀁

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀧𑀭𑀺𑀬𑁄𑀲𑀸𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀢𑀺 𑀧𑀘𑁆𑀘𑀬𑀤𑀻𑀧𑀓𑁂𑀦 𑀫𑀽𑀮𑀬𑀫𑀓𑁂𑀦 𑀜𑀸𑀢𑀧𑀭𑀺𑀜𑁆𑀜𑀁, 𑀔𑀦𑁆𑀥𑀸𑀤𑀻𑀲𑀼 𑀢𑀻𑀭𑀡𑀩𑀸𑀳𑀼𑀮𑁆𑀮𑀢𑁄 𑀔𑀦𑁆𑀥𑀸𑀤𑀺𑀬𑀫𑀓𑁂𑀳𑀺 𑀢𑀻𑀭𑀡𑀧𑀭𑀺𑀜𑁆𑀜𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸 𑀅𑀦𑀼𑀲𑀬𑀧𑀳𑀸𑀦𑀦𑁆𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀧𑀳𑀸𑀢𑀩𑁆𑀩𑀫𑀼𑀤𑁆𑀥𑀪𑀽𑀢𑁂𑀳𑀺 𑀅𑀦𑀼𑀲𑀬𑁂𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀁 𑀯𑀺𑀪𑀸𑀯𑁂𑀢𑀼𑀁 𑀅𑀦𑀼𑀲𑀬𑀬𑀫𑀓𑀁 𑀆𑀭𑀤𑁆𑀥𑀁. 𑀮𑀩𑁆𑀪𑀫𑀸𑀦𑀯𑀲𑁂𑀦𑀸𑀢𑀺 𑀅𑀦𑀼𑀲𑀬𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀸𑀦𑀁 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀻𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑀬𑀸𑀦𑀁 𑀕𑀸𑀳𑀸𑀧𑀦𑀁 𑀢𑁂𑀲𑀼 𑀢𑀣𑀸 𑀅𑀕𑁆𑀕𑀳𑀺𑀢𑁂𑀲𑀼 𑀅𑀦𑀼𑀲𑀬𑀯𑀸𑀭𑀸𑀤𑀺𑀧𑀸𑀴𑀺𑀬𑀸 𑀤𑀼𑀭𑀯𑀩𑁄𑀥𑀢𑁆𑀢𑀸.

𑀅𑀬𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑁂𑀲𑀽𑀢𑀺 𑀏𑀢𑁂𑀲𑀼 𑀲𑀸𑀦𑀼𑀲𑀬𑀯𑀸𑀭𑀸𑀤𑀻𑀲𑀼 𑀧𑀼𑀭𑀺𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 ‘‘𑀓𑀸𑀫𑀥𑀸𑀢𑀼𑀁 𑀯𑀸 𑀧𑀦 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲, 𑀭𑀽𑀧𑀥𑀸𑀢𑀼𑀁 𑀯𑀸 𑀧𑀦 𑀉𑀧𑀧𑀚𑁆𑀚𑀦𑁆𑀢𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀅𑀯𑀼𑀘𑁆𑀘𑀫𑀸𑀦𑁂 𑀓𑀣𑀫𑀬𑀁 𑀬𑀫𑀓𑀤𑁂𑀲𑀦𑀸 𑀲𑀺𑀬𑀸𑀢𑀺? 𑀦𑀸𑀬𑀁 𑀬𑀫𑀓𑀤𑁂𑀲𑀦𑀸, 𑀧𑀼𑀭𑀺𑀫𑀯𑀸𑀭𑁂𑀳𑀺 𑀧𑀦 𑀬𑀫𑀓𑀯𑀲𑁂𑀦 𑀤𑁂𑀲𑀺𑀢𑀸𑀦𑀁 𑀅𑀦𑀼𑀲𑀬𑀸𑀦𑀁 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦 𑀅𑀦𑀼𑀲𑀬𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀬𑀫𑀓𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄 𑀧𑀦 𑀲𑀩𑁆𑀩𑀯𑀸𑀭𑀲𑀫𑀼𑀤𑀸𑀬𑀲𑁆𑀲 𑀅𑀦𑀼𑀲𑀬𑀬𑀫𑀓𑀦𑁆𑀢𑀺 𑀦𑀸𑀫𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀧𑀺 𑀅𑀢𑁆𑀣𑀯𑀲𑁂𑀦 𑀮𑀩𑁆𑀪𑀦𑁆𑀢𑀺, 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀦 𑀦 𑀯𑀼𑀢𑁆𑀢𑀸𑀢𑀺 𑀮𑀩𑁆𑀪𑀫𑀸𑀦𑀢𑀸𑀯𑀲𑁂𑀦 𑀏𑀢𑀺𑀲𑁆𑀲𑀸𑀧𑀺 𑀤𑁂𑀲𑀦𑀸𑀬 𑀬𑀫𑀓𑀤𑁂𑀲𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁂𑀦 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀳𑀻𑀦𑀸 𑀳𑀺 𑀅𑀦𑀼𑀲𑀬𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸𑀯 𑀘 𑀫𑀕𑁆𑀕𑁂𑀦 𑀢𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺𑀅𑀭𑀳𑀢𑀸 𑀦 𑀓𑀢𑀸 𑀳𑁄𑀢𑀺, 𑀢𑀸𑀯 𑀢𑁂 𑀏𑀯𑀁𑀧𑀓𑀸𑀭𑀸 𑀏𑀯𑀸𑀢𑀺 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀏𑀯𑀁𑀧𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀕𑀳𑀺𑀢𑁄, 𑀦 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀯𑀺𑀬 𑀉𑀧𑁆𑀧𑀚𑁆𑀚𑀫𑀸𑀦𑀢𑀸. 𑀢𑁂𑀦𑁂𑀯 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀅𑀦𑀼𑀲𑀬𑀯𑀸𑀭𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑁄 𑀯𑀺𑀪𑀢𑁆𑀢𑁄. 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀧𑀦 𑀮𑀪𑀺𑀢𑁆𑀯𑀸 𑀬𑁂 𑀉𑀧𑁆𑀧𑀚𑁆𑀚𑀺𑀁𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘, 𑀢𑁂𑀧𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀅𑀳𑁂𑀲𑀼𑀁 𑀪𑀯𑀦𑁆𑀢𑀺 𑀘. 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀬 𑀏𑀯 𑀘 𑀢𑁂 𑀉𑀧𑁆𑀧𑀚𑁆𑀚𑀺𑀁𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘, 𑀦 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁄 𑀅𑀜𑁆𑀜𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀸 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀓𑀸𑀫𑀭𑀸𑀕𑀸𑀤𑀬𑁄 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦𑁂𑀯 𑀳𑀺 𑀅𑀦𑀼𑀲𑀬𑀸, 𑀅𑀧𑁆𑀧𑀳𑀻𑀦𑀸 𑀘 𑀅𑀢𑀻𑀢𑀸𑀤𑀬𑁄 𑀏𑀯, 𑀫𑀕𑁆𑀕𑀲𑁆𑀲 𑀧𑀦 𑀢𑀸𑀤𑀺𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀧𑀸𑀤𑀦𑁂𑀦 𑀅𑀦𑀼𑀲𑀬𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺. 𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀦𑀸𑀫 𑀥𑀫𑁆𑀫𑀸𑀓𑀸𑀭𑁄, 𑀦 𑀥𑀫𑁆𑀫𑁄, 𑀥𑀫𑁆𑀫𑁄 𑀏𑀯 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀻’’𑀢𑀺. 𑀲𑀢𑁆𑀢𑀸𑀦𑀼𑀲𑀬𑀸𑀢𑀺 𑀏𑀢𑁆𑀣 𑀬𑀤𑀺 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀣 𑀓𑀲𑁆𑀫𑀸 𑀲𑀢𑁆𑀢𑁂𑀯 𑀯𑀼𑀢𑁆𑀢𑀸, 𑀦𑀦𑀼 𑀲𑀢𑁆𑀢𑀸𑀦𑀼𑀲𑀬𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸 𑀅𑀦𑀼𑀲𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺, 𑀅𑀧𑁆𑀧𑀳𑀻𑀦𑀫𑀢𑁆𑀢𑀲𑁆𑀲𑁂𑀯 𑀅𑀦𑀼𑀲𑀬𑀪𑀸𑀯𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀦𑀼𑀲𑀬𑁄𑀢𑀺 𑀧𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀻’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁧), 𑀢𑀲𑁆𑀫𑀸 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑁄 𑀓𑀺𑀮𑁂𑀲𑁄𑀬𑁂𑀯 𑀅𑀦𑀼𑀲𑀬𑁄 𑀦𑀸𑀫𑀸𑀢𑀺 𑀬𑀼𑀢𑁆𑀢𑀁. 𑀣𑀸𑀫𑀕𑀢𑀦𑁆𑀢𑀺 𑀘 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀥𑀫𑁆𑀫𑀲𑀪𑀸𑀯𑀩𑁄𑀥𑀺𑀦𑀸 𑀢𑀣𑀸𑀕𑀢𑁂𑀦 𑀇𑀫𑁂𑀬𑁂𑀯 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀢𑁆𑀢𑀸. 𑀣𑀸𑀫𑀕𑀢𑁄𑀢𑀺 𑀅𑀦𑀼𑀲𑀬𑀲𑀫𑀗𑁆𑀕𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀲𑀬𑀉𑀧𑁆𑀧𑀚𑁆𑀚𑀦𑀯𑀸𑀭𑀸𑀦𑀁 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀬𑀣𑀸 ‘‘𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀁 𑀅𑀧𑁆𑀧𑀳𑀻𑀦𑀸𑀓𑀸𑀭𑀤𑀻𑀧𑀓𑀁, 𑀏𑀯𑀁 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀲𑀺𑀬𑀸𑀢𑀺 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀦 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀲𑁆𑀲 𑀅𑀯𑀼𑀢𑁆𑀢𑀢𑀸 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀘𑁂? 𑀢𑀁 𑀦, 𑀯𑀘𑀦𑀢𑁆𑀣𑀯𑀺𑀲𑁂𑀲𑁂𑀦 𑀢𑀁𑀤𑁆𑀯𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀳𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀯𑀺𑀲𑀺𑀝𑁆𑀞𑁂𑀧𑀺 ‘‘𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀁 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀺𑀢𑀢𑀁 𑀣𑀸𑀫𑀕𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀬𑀤𑀺 𑀢𑀫𑁂𑀯 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀤𑀻𑀧𑁂𑀬𑁆𑀬, 𑀓𑀲𑁆𑀲𑀘𑀺 𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀧𑀦 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀁 𑀤𑀻𑀧𑁂𑀢𑀺. 𑀓𑀲𑁆𑀫𑀸? 𑀉𑀧𑁆𑀧𑀚𑁆𑀚𑀦𑀯𑀸𑀭𑁂𑀦 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸, 𑀅𑀦𑀼𑀲𑀬𑀲𑀤𑁆𑀤𑀲𑁆𑀲 𑀲𑀩𑁆𑀩𑀤𑀸 𑀯𑀺𑀚𑁆𑀚𑀫𑀸𑀦𑀸𑀦𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀲𑀬𑀦𑀢𑁆𑀣𑀢𑀸𑀬 𑀦𑀺𑀯𑀸𑀭𑀡𑀢𑁆𑀣𑀁 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸𑀬 𑀣𑀸𑀫𑀕𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀲𑀬𑀦𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀬𑀁 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯 𑀇𑀫𑀺𑀦𑀸 𑀢𑀦𑁆𑀢𑀺𑀧𑁆𑀧𑀫𑀸𑀡𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺𑀢𑁆𑀢𑀬𑁂𑀦𑀧𑀺 𑀳𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁨. 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀓𑀸𑀫𑀸𑀯𑀘𑀭𑀪𑀽𑀫𑀺𑀬𑀁 𑀲𑀼𑀔𑀸𑀬 𑀘 𑀉𑀧𑁂𑀓𑁆𑀔𑀸𑀬 𑀘𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑀁 𑀤𑁆𑀯𑀺𑀦𑁆𑀦𑀁 𑀯𑁂𑀤𑀦𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀦 𑀯𑀼𑀢𑁆𑀢𑀸 𑀳𑁄𑀢𑀺. 𑀤𑁆𑀯𑀻𑀲𑀼 𑀧𑀦 𑀭𑀸𑀕𑁂𑀲𑀼 𑀪𑀯𑀭𑀸𑀕𑀲𑁆𑀲 𑀢𑀻𑀲𑀼 𑀥𑀸𑀢𑀽𑀲𑀼 𑀭𑀽𑀧𑀸𑀭𑀽𑀧𑀥𑀸𑀢𑀽𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸𑀢𑀺 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀯𑀢𑁆𑀢𑀩𑁆𑀩𑀸. 𑀥𑀸𑀢𑀼𑀯𑁂𑀤𑀦𑀸𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀯𑀲𑁂𑀦 𑀳𑀺 𑀢𑀺𑀧𑁆𑀧𑀓𑀸𑀭𑀁 𑀅𑀦𑀼𑀲𑀬𑀸𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑀻𑀲𑀼 𑀥𑀸𑀢𑀽𑀲𑀼 𑀓𑀸𑀫𑀥𑀸𑀢𑀼𑀬𑀸 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀏𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀯𑀺𑀲𑀼𑀁 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀥𑀸𑀢𑀼𑀬𑀸 𑀯𑁂𑀤𑀦𑀸𑀦𑀜𑁆𑀘 𑀬𑁄𑀚𑁂𑀢𑀩𑁆𑀩𑀸. 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀇𑀤𑀜𑁆𑀘 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀫𑀸𑀦𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀤𑁆𑀯𑀻𑀲𑁆𑀯𑁂𑀯 𑀅𑀦𑀼𑀲𑁂𑀢𑀺, 𑀦 𑀢𑀻𑀲𑀽𑀢𑀺 𑀢𑀺𑀡𑁆𑀡𑀫𑁆𑀧𑀺 𑀞𑀸𑀦𑀢𑀸𑀦𑀺𑀯𑀸𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀦 𑀲𑀩𑁆𑀩𑀸𑀲𑀼 𑀤𑁆𑀯𑀻𑀲𑀼 𑀅𑀦𑀼𑀲𑀬𑀦𑀧𑁆𑀧𑀢𑁆𑀢𑁄 𑀅𑀢𑁆𑀣𑀺, 𑀢𑁂𑀦 𑀯𑁂𑀤𑀦𑀸𑀯𑀺𑀲𑁂𑀲𑀦𑀢𑁆𑀣𑀁 𑀦 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑁂𑀦 𑀓𑁄𑀘𑀺 𑀅𑀢𑁆𑀣𑁄. 𑀪𑀯𑀭𑀸𑀕𑀸𑀦𑀼𑀲𑀬𑀦𑀝𑁆𑀞𑀸𑀦𑀜𑁆𑀳𑀺 𑀅𑀝𑁆𑀞𑀸𑀦𑀜𑁆𑀘 𑀅𑀦𑀼𑀲𑀬𑀸𑀦𑀁 𑀅𑀧𑀭𑀺𑀬𑀸𑀧𑀦𑁆𑀦𑀁 𑀲𑀓𑁆𑀓𑀸𑀬𑁂 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀧𑀸𑀓𑀝𑀫𑁂𑀢𑀁. 𑀬𑀣𑀸 𑀘 ‘‘𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀖𑀸𑀦𑀼𑀲𑀬𑀸𑀦𑀼𑀲𑀬𑀝𑁆𑀞𑀸𑀦𑀢𑁄 𑀅𑀜𑁆𑀜𑀸 𑀤𑁆𑀯𑁂 𑀯𑁂𑀤𑀦𑀸 𑀕𑀬𑁆𑀳𑀦𑁆𑀢𑀺, 𑀏𑀯𑀁 𑀪𑀯𑀭𑀸𑀕𑀸𑀦𑀼𑀲𑀬𑀸𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀘 𑀅𑀜𑁆𑀜𑀸 𑀢𑀸 𑀕𑀬𑁆𑀳𑀦𑁆𑀢𑀻𑀢𑀺.

𑀏𑀢𑁆𑀣 𑀘 𑀤𑁆𑀯𑀻𑀳𑀺 𑀯𑁂𑀤𑀦𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀼 𑀇𑀝𑁆𑀞𑀭𑀽𑀧𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀲𑀸𑀢𑀲𑀦𑁆𑀢𑀲𑀼𑀔𑀕𑀺𑀤𑁆𑀥𑀺𑀬𑀸 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀢𑀲𑁆𑀲 𑀅𑀦𑀼𑀲𑀬𑀦𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀳𑀺 𑀲𑁄 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀺 𑀲𑀼𑀔𑀫𑀺𑀘𑁆𑀘𑁂𑀯 𑀅𑀪𑀺𑀮𑀪𑀢𑀻𑀢𑀺. 𑀏𑀯𑀁 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀜𑁆𑀜𑁂𑀲𑀼 𑀘 𑀅𑀧𑁆𑀧𑀺𑀬𑀭𑀽𑀧𑀸𑀲𑀸𑀢𑀭𑀽𑀧𑁂𑀲𑀼 𑀅𑀦𑀺𑀝𑁆𑀞𑀭𑀽𑀧𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁄 𑀤𑀼𑀓𑁆𑀔𑀧𑀝𑀺𑀓𑀽𑀮𑀢𑁄 𑀤𑀼𑀓𑁆𑀔𑀫𑀺𑀘𑁆𑀘𑁂𑀯 𑀧𑀝𑀺𑀳𑀜𑁆𑀜𑀢𑀻𑀢𑀺 𑀤𑀼𑀓𑁆𑀔𑀯𑁂𑀤𑀦𑀫𑁂𑀯 𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀺, 𑀢𑁂𑀦 𑀧𑀦 𑀢𑀲𑁆𑀫𑀺𑀁 𑀅𑀦𑀼𑀲𑀬𑀦𑀁 𑀯𑀼𑀢𑁆𑀢𑀁. 𑀏𑀯𑀁 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀁 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀯𑀘𑀦𑁂𑀦 𑀇𑀝𑁆𑀞𑀇𑀝𑁆𑀞𑀫𑀚𑁆𑀛𑀢𑁆𑀢𑀅𑀦𑀺𑀝𑁆𑀞𑁂𑀲𑀼 𑀆𑀭𑀫𑁆𑀫𑀡𑀧𑀓𑀢𑀺𑀬𑀸 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀘 𑀯𑀲𑁂𑀦 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀁 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑀺 𑀢𑁂 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀦𑁆𑀢𑀺 𑀦𑀸𑀫. 𑀯𑁂𑀤𑀦𑀸𑀢𑁆𑀢𑀬𑀫𑀼𑀔𑁂𑀦 𑀯𑀸 𑀏𑀢𑁆𑀣 𑀇𑀝𑁆𑀞𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀓𑀸𑀫𑀥𑀸𑀢𑀼𑀆𑀤𑀺𑀕𑁆𑀕𑀳𑀡𑁂𑀦 𑀓𑀸𑀫𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀪𑀽𑀢𑀸𑀦𑀁 𑀓𑀸𑀫𑀪𑀯𑀸𑀤𑀻𑀦𑀁. 𑀢𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀪𑀯𑀲𑁆𑀲𑀸𑀤𑀯𑀲𑁂𑀦 𑀅𑀦𑀼𑀲𑀬𑀫𑀸𑀦𑁄 𑀓𑀸𑀫𑀥𑀸𑀢𑀼𑀬𑀸 𑀅𑀦𑀼𑀲𑁂𑀢𑀺, 𑀓𑀸𑀫𑀲𑀼𑀔𑀲𑁆𑀲𑀸𑀤𑀯𑀲𑁂𑀦 𑀅𑀦𑀼𑀲𑀬𑀫𑀸𑀦𑁄 𑀲𑀼𑀔𑁄𑀧𑁂𑀓𑁆𑀔𑀸𑀯𑁂𑀤𑀦𑀸𑀲𑀼. 𑀧𑀝𑀺𑀖𑁄 𑀤𑀼𑀓𑁆𑀔𑀧𑀝𑀺𑀖𑀸𑀢𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀬𑀢𑁆𑀣 𑀢𑀢𑁆𑀣 𑀧𑀝𑀺𑀳𑀜𑁆𑀜𑀫𑀸𑀦𑁄𑀧𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀏𑀯 𑀅𑀦𑀼𑀲𑁂𑀢𑀺. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀧𑀦 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑁂𑀲𑀼 𑀘 𑀓𑀸𑀫𑀲𑁆𑀲𑀸𑀤𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀢𑀢𑁆𑀣 𑀅𑀦𑀼𑀲𑀬𑀫𑀸𑀦𑁄 𑀭𑀸𑀕𑁄 𑀪𑀯𑀭𑀸𑀕𑁄𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀕𑁆𑀕𑀳𑀡𑁂𑀦 𑀘 𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀕𑀳𑀺𑀢𑀢𑁆𑀢𑀸 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁪𑁬) 𑀏𑀯𑀫𑀸𑀤𑀻𑀦𑀁 𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀝𑁆𑀞𑀸𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀧𑀺𑀳𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑁂 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀣𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀼 𑀓𑀸𑀫𑀭𑀸𑀕𑁂𑀦 𑀦𑀸𑀦𑀼𑀲𑀬𑀺𑀢𑀩𑁆𑀩𑀦𑁆𑀢𑀺 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀸𑀧𑀺 𑀤𑀺𑀝𑁆𑀞𑀸𑀦𑀼𑀲𑀬𑀸𑀦𑀼𑀲𑀬𑀦𑀝𑁆𑀞𑀸𑀦𑀪𑀽𑀢𑀸 𑀓𑀸𑀫𑀸𑀯𑀘𑀭𑀯𑁂𑀤𑀦𑀸 𑀲𑀦𑁆𑀢𑀻𑀢𑀺? 𑀳𑁄𑀦𑁆𑀢𑀼, 𑀦 𑀧𑀦 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀢𑁄 𑀅𑀜𑁆𑀜𑀁 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀘 𑀧𑀝𑀺𑀖𑀸𑀦𑀼𑀲𑀬𑁄 𑀘 𑀫𑀸𑀦𑀸𑀦𑀼𑀲𑀬𑁄 𑀘 𑀦𑀸𑀦𑀼𑀲𑁂𑀦𑁆𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁫𑁨) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀯𑀺𑀲𑁂𑀲𑁂𑀦 𑀤𑀼𑀓𑁆𑀔𑀁 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀮𑁄𑀓𑀺𑀬𑀲𑀼𑀔𑁄𑀧𑁂𑀓𑁆𑀔𑀸 𑀓𑀸𑀫𑀭𑀸𑀕𑀫𑀸𑀦𑀸𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺.

𑀅𑀧𑀺𑀘 𑀲𑀼𑀢𑁆𑀢𑁂 ‘‘𑀇𑀥𑀸𑀯𑀼𑀲𑁄 𑀯𑀺𑀲𑀸𑀔, 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀤𑁄𑀫𑀦𑀲𑁆𑀲𑀁 𑀧𑀚𑀳𑁂𑀬𑁆𑀬’𑀦𑁆𑀢𑀺, 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀧𑀝𑀺𑀖𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀝𑀺𑀖𑀲𑁆𑀲 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀧𑁆𑀧𑀳𑀸𑀦𑀁, 𑀤𑁄𑀫𑀦𑀲𑁆𑀲𑁂𑀦 𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀁 𑀅𑀢𑁆𑀣𑀻𑀢𑀺. 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸𑀬 𑀧𑀦 𑀇𑀥 𑀲𑀩𑁆𑀩𑀁 𑀤𑀼𑀓𑁆𑀔𑀁 ‘‘𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸, 𑀲𑀸 𑀧𑀦 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 ‘‘𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀭𑀸𑀕𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀯𑀺𑀚𑁆𑀚𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀯𑀼𑀢𑁆𑀢𑀁. 𑀦 𑀳𑀺 𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀩𑁆𑀩𑀣𑀸 𑀦𑀸𑀦𑀼𑀲𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀏𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁨) 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑁆𑀲𑁂𑀯 𑀯𑀢𑁆𑀣𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸, 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀜𑁆𑀘 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀯𑀢𑁆𑀣𑀼 𑀦 𑀦 𑀳𑁄𑀢𑀻𑀢𑀺 𑀢𑀢𑁆𑀣𑀸𑀧𑀺 𑀢𑀲𑁆𑀲 𑀅𑀦𑀼𑀲𑀬𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀯𑀢𑁆𑀣𑀼𑀪𑀸𑀯𑀢𑁄 𑀳𑀺 𑀇𑀥 𑀅𑀦𑀼𑀲𑀬𑀦𑀁 𑀦 𑀯𑀼𑀘𑁆𑀘𑀢𑀺, 𑀦 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑀺𑀬 𑀯𑀼𑀢𑁆𑀢𑀦𑀬𑁂𑀦 𑀢𑀁𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀢𑀁𑀲𑀫𑀼𑀕𑁆𑀖𑀸𑀢𑀓𑀫𑀕𑁆𑀕𑀲𑁆𑀲 𑀩𑀮𑀯𑀽𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀘𑀸𑀢𑀺.

𑀏𑀢𑁆𑀣 𑀘 𑀆𑀭𑀫𑁆𑀫𑀡𑁂 𑀅𑀦𑀼𑀲𑀬𑀝𑁆𑀞𑀸𑀦𑁂 𑀲𑀢𑀺 𑀪𑀯𑀭𑀸𑀕𑀯𑀚𑁆𑀚𑁄 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀤𑀼𑀓𑁆𑀔𑀸𑀬 𑀳𑀺 𑀯𑁂𑀤𑀦𑀸𑀬 𑀭𑀽𑀧𑀸𑀭𑀽𑀧𑀥𑀸𑀢𑀽𑀲𑀼 𑀘 𑀅𑀦𑀼𑀲𑀬𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀧𑀺 𑀮𑁄𑀪𑁄 𑀮𑁄𑀪𑁄 𑀏𑀯, 𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀬𑀤𑀺 𑀲𑀺𑀬𑀸, 𑀤𑀺𑀝𑁆𑀞𑀸𑀦𑀼𑀲𑀬𑀲𑁆𑀲 𑀯𑀺𑀬 𑀏𑀢𑀲𑁆𑀲𑀧𑀺 𑀞𑀸𑀦𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀅𑀣 𑀧𑀦 𑀅𑀚𑁆𑀛𑀸𑀲𑀬𑀯𑀲𑁂𑀦 𑀢𑀦𑁆𑀦𑀺𑀦𑁆𑀦𑀢𑀸𑀬 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀬𑀣𑀸 𑀇𑀝𑁆𑀞𑀸𑀦𑀁 𑀭𑀽𑀧𑀸𑀤𑀻𑀦𑀁 𑀲𑀼𑀔𑀸𑀬 𑀘 𑀯𑁂𑀤𑀦𑀸𑀬 𑀅𑀧𑁆𑀧𑀝𑀺𑀮𑀤𑁆𑀥𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄, 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀯𑀸 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀕𑀢𑀁 𑀧𑀭𑀺𑀡𑀢𑀁 𑀲𑀫𑀦𑀼𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀝𑀺𑀖𑁄 𑀤𑀼𑀓𑁆𑀔𑁂 𑀧𑀝𑀺𑀳𑀜𑁆𑀜𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀼𑀓𑁆𑀔𑀫𑁂𑀯 𑀢𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀦𑀸𑀮𑀫𑁆𑀩𑀺𑀢𑀁, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀲𑀼 𑀅𑀪𑀺𑀦𑀺𑀯𑁂𑀲𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀧𑀺 𑀮𑁄𑀪𑁄 𑀲𑀼𑀔𑀸𑀪𑀺𑀲𑀗𑁆𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀸𑀢𑀲𑀦𑁆𑀢𑀲𑀼𑀔𑀤𑁆𑀯𑀬𑀫𑁂𑀯𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀪𑀯𑀭𑀸𑀕𑀯𑀚𑁆𑀚𑀲𑁆𑀲 𑀲𑀩𑁆𑀩𑀮𑁄𑀪𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑀢𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀘 𑀆𑀭𑀫𑁆𑀫𑀡𑁂 𑀭𑀚𑁆𑀚𑀦𑁆𑀢𑀺 𑀤𑀼𑀲𑁆𑀲𑀦𑁆𑀢𑀺 𑀘. 𑀢𑀢𑁆𑀣 𑀭𑀸𑀕𑁄 𑀲𑀼𑀔𑀚𑁆𑀛𑀸𑀲𑀬𑁄 𑀧𑀝𑀺𑀖𑁄 𑀤𑀼𑀓𑁆𑀔𑀚𑁆𑀛𑀸𑀲𑀬𑁄𑀢𑀺 𑀢𑁂𑀲𑀁 𑀦𑀸𑀦𑀸𑀦𑀼𑀲𑀬𑀝𑁆𑀞𑀸𑀦𑀢𑀸 𑀳𑁄𑀢𑀺.

𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀦𑁄’’𑀢𑀺 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁧𑁪) 𑀯𑀼𑀢𑁆𑀢𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀘 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀁 𑀯𑀢𑁆𑀯𑀸 ‘‘𑀤𑁄𑀫𑀦𑀲𑁆𑀲𑀫𑀢𑁆𑀢𑀫𑁂𑀯 𑀧𑀦 𑀢𑀁 𑀳𑁄𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄’’𑀢𑀺 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁨) 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀢𑀢𑁆𑀣 𑀧𑀝𑀺𑀖𑁄 𑀧𑀝𑀺𑀖𑀸𑀦𑀼𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀤𑀼𑀓𑁆𑀔𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀳𑀚𑀸𑀢𑁄 𑀮𑁄𑀪𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦 𑀳𑁄𑀢𑀺𑀘𑁆𑀘𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀤𑁄𑀫𑀦𑀲𑁆𑀲𑀫𑀢𑁆𑀢𑀫𑁂𑀯 𑀧𑀦 𑀢𑀁 𑀳𑁄𑀢𑀺, 𑀦 𑀧𑀝𑀺𑀖𑀸𑀦𑀼𑀲𑀬𑁄’’𑀢𑀺, 𑀏𑀢𑁆𑀣 𑀦 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀦𑀢𑁆𑀣𑀺 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀻𑀢𑀺.

𑀤𑁂𑀲𑀦𑀸 𑀲𑀁𑀓𑀺𑀡𑁆𑀡𑀸 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀪𑀯𑀭𑀸𑀕𑀲𑁆𑀲𑀧𑀺 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀯𑀺𑀬 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀤𑁂𑀲𑀦𑀸 𑀓𑀢𑀸 𑀲𑀳𑀚𑀸𑀢𑀯𑁂𑀤𑀦𑀸𑀯𑀺𑀲𑁂𑀲𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.