𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀸𑀤𑀬𑁄 𑀯𑀺𑀬 𑀧𑀼𑀩𑁆𑀩𑁂 𑀅𑀯𑀺𑀪𑀢𑁆𑀢𑀸 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄𑀢𑀺 𑀢𑁂𑀲𑀁 𑀅𑀯𑀺𑀜𑁆𑀜𑀸𑀢𑀢𑁆𑀢𑀸 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁪𑁮) 𑀢𑀬𑁄 𑀲𑀗𑁆𑀔𑀸𑀭𑁂 𑀯𑀺𑀪𑀚𑀢𑀺. 𑀓𑀸𑀬𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀧𑀞𑀫𑁂 𑀅𑀢𑁆𑀣𑁂 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀲𑀸𑀫𑀺𑀯𑀘𑀦𑀁, 𑀤𑀼𑀢𑀺𑀬𑁂 𑀅𑀢𑁆𑀣𑁂 𑀓𑀢𑁆𑀢𑀼𑀅𑀢𑁆𑀣𑁂. 𑀯𑀘𑀺𑀬𑀸 𑀲𑀗𑁆𑀔𑀸𑀭𑁄𑀢𑀺 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑁄𑀢𑀺 𑀘 𑀓𑀢𑁆𑀢𑀼𑀅𑀢𑁆𑀣𑁂𑀬𑁂𑀯. 𑀲𑁄 𑀧𑀦 𑀓𑀭𑀡𑀯𑀘𑀦𑀲𑁆𑀲 𑀅𑀢𑁆𑀣𑁄𑀢𑀺 𑀓𑀢𑁆𑀯𑀸 ‘‘𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑁨-𑁭. 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦 𑀅𑀢𑁆𑀣𑀸𑀪𑀸𑀯𑀢𑁄𑀢𑀺 𑀧𑀤𑀲𑁄𑀥𑀦𑀢𑀁𑀫𑀽𑀮𑀓𑀘𑀓𑁆𑀓𑀯𑀸𑀭𑁂𑀳𑀺 𑀬𑁄𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀮𑀩𑁆𑀪𑀫𑀸𑀦𑁄 𑀏𑀓𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑁄, 𑀢𑀲𑁆𑀲 𑀲𑀼𑀤𑁆𑀥𑀺𑀓𑁂𑀳𑀺 𑀓𑀸𑀬𑀸𑀤𑀺𑀧𑀤𑁂𑀳𑀺 𑀲𑀼𑀤𑁆𑀥𑀺𑀓𑁂𑀦 𑀘 𑀲𑀗𑁆𑀔𑀸𑀭𑀧𑀤𑁂𑀦 𑀅𑀯𑀘𑀦𑀻𑀬𑀢𑁆𑀢𑀸 𑀬𑀣𑀸 𑀭𑀽𑀧𑀧𑀤𑀲𑁆𑀲 𑀔𑀦𑁆𑀥𑁂𑀓𑀤𑁂𑀲𑁄 𑀔𑀦𑁆𑀥𑀧𑀤𑀲𑁆𑀲 𑀔𑀦𑁆𑀥𑀲𑀫𑀼𑀤𑀸𑀬𑁄 𑀧𑀤𑀲𑁄𑀥𑀦𑁂 𑀤𑀲𑁆𑀲𑀺𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀅𑀢𑁆𑀣𑀺, 𑀏𑀯𑀁 𑀏𑀓𑁂𑀓𑀧𑀤𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺𑀆𑀤𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀬𑀤𑀺 𑀯𑀺𑀲𑀼𑀁 𑀅𑀤𑀻𑀧𑁂𑀢𑁆𑀯𑀸 𑀲𑀫𑀼𑀤𑀺𑀢𑁄 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀏𑀓𑀢𑁆𑀣 𑀤𑀻𑀧𑁂𑀢𑀺, 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀓𑀸𑀬𑀲𑀗𑁆𑀔𑀸𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀔𑀦𑁆𑀥𑀲𑀤𑁆𑀤𑁄 𑀯𑀺𑀬 𑀭𑀽𑀧𑀲𑀤𑁆𑀤𑁂𑀦 𑀓𑀸𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄 𑀳𑁂𑀲𑀸𑀢𑀺 𑀏𑀢𑁂𑀦 𑀇𑀫𑀲𑁆𑀲 𑀯𑀸𑀭𑀲𑁆𑀲 𑀧𑀤𑀲𑁄𑀥𑀦𑁂𑀦 𑀤𑀲𑁆𑀲𑀺𑀢𑀸𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀫𑁂𑀯 𑀕𑀳𑀡𑀢𑁄 𑀢𑁂𑀲𑀜𑁆𑀘 𑀓𑀸𑀬𑀸𑀤𑀺𑀧𑀤𑁂𑀳𑀺 𑀅𑀕𑁆𑀕𑀳𑀺𑀢𑀢𑁆𑀢𑀸 ‘‘𑀓𑀸𑀬𑁄 𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀅𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀇𑀥 𑀧𑀦 𑀲𑀗𑁆𑀔𑀸𑀭𑀬𑀫𑀓𑁂 𑀓𑀸𑀬𑀸𑀤𑀺𑀧𑀤𑀸𑀦𑀁 𑀲𑀗𑁆𑀔𑀸𑀭𑀧𑀤𑀲𑁆𑀲 𑀘 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄, 𑀲𑀗𑁆𑀔𑀸𑀭𑀸 𑀓𑀸𑀬𑁄’’𑀢𑀺𑀆𑀤𑀺𑀫𑁆𑀳𑀺 𑀯𑀼𑀘𑁆𑀘𑀫𑀸𑀦𑁂 𑀅𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀘𑁆𑀘𑀸𑀕𑁄 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀕𑁆𑀕𑀳𑁄 𑀘 𑀓𑀢𑁄 𑀲𑀺𑀬𑀸𑀢𑀺 𑀲𑀼𑀤𑁆𑀥𑀲𑀗𑁆𑀔𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑀸 𑀦 𑀯𑀼𑀢𑁆𑀢𑀸. 𑀧𑀤𑀲𑁄𑀥𑀦𑀯𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑁂𑀳𑀺 𑀧𑀦 𑀅𑀲𑀫𑀸𑀦𑀸𑀥𑀺𑀓𑀭𑀡𑁂𑀳𑀺 𑀓𑀸𑀬𑀸𑀤𑀺𑀧𑀤𑁂𑀳𑀺 𑀲𑀗𑁆𑀔𑀸𑀭𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀻𑀬𑀢𑀸𑀬 𑀤𑀲𑁆𑀲𑀺𑀢𑀸𑀬 𑀲𑀁𑀲𑀬𑁄 𑀳𑁄𑀢𑀺 ‘‘𑀬𑁄 𑀅𑀢𑁆𑀣𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀦𑀸 𑀓𑀸𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑁄 𑀓𑀸𑀬𑀲𑀗𑁆𑀔𑀸𑀭𑁄, 𑀏𑀲𑁄 𑀅𑀢𑁆𑀣𑀦𑁆𑀢𑀭𑀧𑁆𑀧𑀯𑀢𑁆𑀢𑀻𑀳𑀺 𑀯𑀘𑀻𑀘𑀺𑀢𑁆𑀢𑁂𑀳𑀺 𑀯𑀺𑀲𑁂𑀲𑀺𑀢𑁄 𑀉𑀤𑀸𑀳𑀼 𑀅𑀜𑁆𑀜𑁄’’𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀢𑁆𑀣 𑀢𑁂𑀲𑀁 𑀅𑀜𑁆𑀜𑀢𑁆𑀣 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀯𑀲𑁂𑀦 𑀙 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑀝𑁆𑀞𑀸𑀦𑁂 𑀯𑀼𑀢𑁆𑀢𑀢𑁆𑀢𑀸 𑀅𑀬𑀁 𑀦𑀬𑁄 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑁄𑀢𑀺 𑀯𑀼𑀢𑁆𑀢𑁄.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.