𑁧. 𑀫𑀽𑀮𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀬𑀫𑀓𑀸𑀦𑀁 𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀤𑀲𑀲𑀼 𑀏𑀓𑁂𑀓𑀲𑁆𑀲 𑀬𑀫𑀓𑀲𑀫𑀽𑀳𑀲𑁆𑀲 𑀢𑀁𑀲𑀫𑀽𑀳𑀲𑁆𑀲 𑀘 𑀲𑀓𑀮𑀲𑁆𑀲 𑀧𑀓𑀭𑀡𑀲𑁆𑀲 𑀬𑀫𑀓𑀸𑀦𑀁 𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑀢𑀁 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀦𑁆𑀢𑀺 𑀏𑀢𑁂𑀦 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺 𑀏𑀢𑀲𑁆𑀲𑁂𑀯 𑀬𑀫𑀓𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀤𑀼𑀢𑀺𑀬𑀧𑀞𑀫𑀧𑀼𑀘𑁆𑀙𑀸𑀲𑀼 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀁, 𑀓𑀼𑀲𑀮𑀫𑀽𑀮𑀓𑀼𑀲𑀮𑀯𑀺𑀲𑁂𑀲𑁂𑀳𑀺 𑀯𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀧𑀞𑀫𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀦𑀁 𑀯𑀲𑁂𑀦 𑀅𑀢𑁆𑀣𑀬𑀫𑀓𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀜𑁆𑀳𑀺 𑀯𑀺𑀲𑁂𑀲𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀸𑀦𑀁, 𑀢𑀁𑀯𑀺𑀲𑁂𑀲𑀯𑀢𑀁 𑀯𑀸 𑀥𑀫𑁆𑀫𑀸𑀦𑀜𑁆𑀘 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀦𑀁 𑀏𑀢𑁆𑀣 𑀧𑀥𑀸𑀦𑀪𑀸𑀯𑁄𑀢𑀺 𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀏𑀓𑁂𑀓𑁄 𑀏𑀯 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻𑀢𑀺. 𑀅𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀦 𑀥𑀫𑁆𑀫𑀯𑀸𑀘𑀓𑁄 𑀳𑁂𑀢𑀼𑀨𑀮𑀸𑀤𑀺𑀯𑀸𑀘𑀓𑁄 𑀯𑀸, 𑀅𑀣 𑀔𑁄 𑀧𑀸𑀴𑀺𑀅𑀢𑁆𑀣𑀯𑀸𑀘𑀓𑁄. 𑀢𑁂𑀦𑁂𑀯𑀸𑀳 ‘‘𑀢𑁂𑀲𑀜𑁆𑀜𑁂𑀯 𑀅𑀢𑁆𑀣𑀸𑀦’’𑀦𑁆𑀢𑀺𑀆𑀤𑀺.

𑀢𑀻𑀡𑀺𑀧𑀺 𑀧𑀤𑀸𑀦𑀺 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀇𑀤𑀁 𑀦𑀸𑀫𑀧𑀤𑀲𑁆𑀲 𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀦𑀺𑀭𑀯𑀲𑁂𑀲𑀲𑀗𑁆𑀕𑀸𑀳𑀓𑀢𑁆𑀢𑀁. 𑀲𑀩𑁆𑀩𑀓𑀼𑀲𑀮𑀸𑀤𑀺𑀲𑀗𑁆𑀕𑀡𑁆𑀳𑀦𑀢𑁆𑀣𑀫𑁂𑀯 𑀘 𑀦𑀸𑀫𑀧𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀬 𑀘𑀢𑀽𑀲𑀼 𑀧𑀤𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁫𑁨. 𑀅𑀜𑁆𑀜𑀫𑀜𑁆𑀜𑀬𑀫𑀓𑁂 𑀬𑁂 𑀓𑁂𑀘𑀺 𑀓𑀼𑀲𑀮𑀸𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀏𑀢𑁆𑀣 𑀬𑀣𑀸 𑀤𑀼𑀢𑀺𑀬𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸, 𑀏𑀯𑀫𑀺𑀥𑀸𑀧𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀸𑀢𑀩𑁆𑀩𑀸 𑀲𑀺𑀬𑀸 𑀧𑀼𑀭𑀺𑀫𑀬𑀫𑀓𑀯𑀺𑀲𑀺𑀝𑁆𑀞𑀁 𑀅𑀧𑀼𑀩𑁆𑀩𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀫𑀓𑀲𑁆𑀲 𑀅𑀧𑁆𑀧𑀯𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀪𑀸𑀯𑀢𑁄’’𑀢𑀺 𑀓𑁂𑀘𑀺. 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀧𑀦 𑀅𑀢𑁆𑀣𑀯𑀲𑁂𑀦 𑀓𑀢𑀸𑀬 𑀢𑀤𑀦𑀼𑀭𑀽𑀧𑀸𑀬 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀁 𑀅𑀦𑀼𑀮𑁄𑀫𑁂 𑀯𑀺𑀕𑀢𑀲𑀁𑀲𑀬𑀲𑁆𑀲 𑀧𑀝𑀺𑀮𑁄𑀫𑁂 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀢𑁄. 𑀢𑁂𑀦 𑀦 𑀘 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸𑀬 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀼𑀭𑀺𑀫𑁄𑀯𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄. 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀇𑀤𑀫𑁂𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀦 𑀳𑀺 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑁄 𑀏𑀯 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑁄, 𑀢𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀅𑀲𑀫𑀸𑀦𑀁 𑀳𑁄𑀢𑀺. 𑀓𑀼𑀲𑀮𑀩𑁆𑀬𑀜𑁆𑀚𑀦𑁂𑀦 𑀳𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀅𑀯𑀲𑁂𑀲𑀸’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀅𑀯𑀲𑁂𑀲𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀇𑀢𑀭𑀣𑀸 𑀅𑀯𑀲𑁂𑀲𑀸 𑀓𑀼𑀲𑀮𑀫𑀽𑀮𑀲𑀳𑀚𑀸𑀢𑀸 𑀥𑀫𑁆𑀫𑀸𑀢𑀺, 𑀦 𑀘 𑀢𑀸𑀦𑀺 𑀯𑀘𑀦𑀸𑀦𑀺 𑀲𑀫𑀸𑀦𑀢𑁆𑀣𑀸𑀦𑀺 𑀓𑀼𑀲𑀮𑀓𑀼𑀲𑀮𑀸𑀩𑁆𑀬𑀸𑀓𑀢𑀤𑀻𑀧𑀦𑀢𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲𑁂𑀯 𑀲𑀫𑁆𑀪𑀯𑀢𑁄 𑀤𑀼𑀢𑀺𑀬𑀬𑀫𑀓𑁂 𑀯𑀺𑀬 𑀅𑀧𑀼𑀘𑁆𑀙𑀺𑀢𑁆𑀯𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀯𑀺𑀬 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑁂𑀳𑀺 𑀅𑀜𑁆𑀜𑁂 𑀓𑀼𑀲𑀮𑀸 𑀲𑀦𑁆𑀢𑀺, 𑀓𑀼𑀲𑀮𑁂𑀳𑀺 𑀧𑀦 𑀅𑀜𑁆𑀜𑁂𑀧𑀺 𑀢𑁂 𑀲𑀦𑁆𑀢𑀻𑀢𑀺.

𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀯𑀡𑁆𑀡𑀦𑀸𑀬𑀁 ‘‘𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀳𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀘 𑀧𑀼𑀘𑁆𑀙𑀺𑀢𑁂 ‘‘𑀆𑀫𑀦𑁆𑀢𑀸’’ 𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀓𑀺𑀜𑁆𑀘𑀺 𑀏𑀓𑀫𑀽𑀮𑀁 𑀦 𑀳𑁄𑀢𑀺, 𑀬𑁂𑀦 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬 𑀯𑀺𑀬 𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀬𑀢𑁆𑀣 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀏𑀓𑀫𑀽𑀮𑀸𑀦𑀺 𑀘 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀏𑀓𑁂𑀓𑁂𑀦 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀢𑁆𑀢𑀸. 𑀬𑀢𑁆𑀣 𑀧𑀦 𑀤𑁆𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑁂𑀯, 𑀦 𑀏𑀓𑀫𑀽𑀮𑀸𑀦𑀻𑀢𑀺 𑀏𑀢𑀲𑁆𑀲 𑀕𑀳𑀡𑀲𑁆𑀲 𑀦𑀺𑀯𑀸𑀭𑀡𑀢𑁆𑀣𑀁 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘𑁂? 𑀦, ‘‘𑀆𑀫𑀦𑁆𑀢𑀸’’𑀢𑀺 𑀇𑀫𑀺𑀦𑀸𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀢𑀁𑀕𑀳𑀡𑀦𑀺𑀯𑀸𑀭𑀡𑀢𑁄 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂𑀦 𑀘 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀜𑁆𑀘 𑀫𑀽𑀮𑀸𑀦𑀁 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀜𑁆𑀳𑀺 𑀲𑀫𑀸𑀦𑀫𑀽𑀮𑀢𑀸 𑀏𑀯 𑀏𑀓𑀫𑀽𑀮𑀯𑀘𑀦𑁂𑀦 𑀧𑀼𑀘𑁆𑀙𑀻𑀬𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀫𑀽𑀮𑀢𑀸, 𑀅𑀢𑁆𑀣𑀺 𑀘 𑀤𑁆𑀯𑀺𑀦𑁆𑀦𑀁 𑀫𑀽𑀮𑀸𑀦𑀁 𑀲𑀫𑀸𑀦𑀫𑀽𑀮𑀢𑀸. 𑀢𑁂𑀲𑀼 𑀳𑀺 𑀏𑀓𑁂𑀓𑀁 𑀇𑀢𑀭𑁂𑀦 𑀫𑀽𑀮𑁂𑀦 𑀢𑀁𑀫𑀽𑀮𑁂𑀳𑀺 𑀅𑀜𑁆𑀜𑁂𑀳𑀺 𑀲𑀫𑀸𑀦𑀫𑀽𑀮𑀦𑁆𑀢𑀺.

𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀧𑀦 𑀦𑀺𑀘𑁆𑀙𑀺𑀢𑁂 𑀏𑀓𑀫𑀽𑀮𑀢𑁆𑀢𑀲𑀁𑀲𑀬𑀸𑀪𑀸𑀯𑀢𑁄 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀦 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑀸 𑀏𑀢𑁂𑀲𑀦𑁆𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀲𑀫𑀸𑀦𑀢𑁆𑀣𑁂𑀦 𑀏𑀓𑀁 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀏𑀓𑀫𑀽𑀮𑀸’’𑀢𑀺 𑀉𑀪𑀬𑀫𑁆𑀧𑀺 𑀯𑀘𑀦𑀁 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀢𑁂𑀦𑁂𑀯 𑀘 𑀉𑀪𑀬𑀢𑁆𑀣𑀸𑀧𑀺 ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂 𑀏𑀓𑀫𑀽𑀮𑀢𑁆𑀢𑁂 𑀦𑀺𑀘𑁆𑀙𑀺𑀢𑁂 𑀢𑀩𑁆𑀩𑀺𑀲𑁂𑀲𑁄 𑀅𑀜𑁆𑀜𑀫𑀜𑁆𑀜𑀫𑀽𑀮𑀪𑀸𑀯𑁄 𑀦 𑀦𑀺𑀘𑁆𑀙𑀺𑀢𑁄 𑀳𑁄𑀢𑀻𑀢𑀺 𑀅𑀦𑀼𑀮𑁄𑀫𑀧𑀼𑀘𑁆𑀙𑀸 𑀧𑀯𑀢𑁆𑀢𑀸, 𑀫𑀽𑀮𑀬𑁄𑀕𑀯𑀺𑀲𑁂𑀲𑁂 𑀧𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀦𑀺𑀘𑁆𑀙𑀺𑀢𑁂 𑀦 𑀯𑀺𑀦𑀸 𑀏𑀓𑀫𑀽𑀮𑀢𑁆𑀢𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑀁 𑀅𑀢𑁆𑀣𑀻𑀢𑀺 𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑀁 𑀏𑀓𑀫𑀽𑀮𑀢𑁆𑀢𑀁 𑀦𑀺𑀘𑁆𑀙𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸 𑀬𑀣𑀸 𑀓𑀼𑀲𑀮𑀫𑀽𑀮𑀯𑀘𑀦𑀁 𑀏𑀓𑀫𑀽𑀮𑀯𑀘𑀦𑀜𑁆𑀘 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀓𑀢𑀸, 𑀏𑀯𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀁 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸 𑀓𑀼𑀲𑀮𑀸𑀥𑀺𑀓𑀸𑀭𑀲𑁆𑀲 𑀘 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀝𑀺𑀮𑁄𑀫𑀧𑀼𑀘𑁆𑀙𑀸 𑀓𑀢𑀸𑀢𑀺.

𑁫𑁩-𑁬𑁧. 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀅𑀢𑁆𑀣𑁂 𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦 𑀲𑀫𑀸𑀦𑁂𑀦 𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀘 𑀫𑀽𑀮𑁂𑀦 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀓𑀸𑀲𑁂𑀢𑀼𑀁 𑀫𑀽𑀮𑀫𑀽𑀮𑀦𑀬𑁄 𑀯𑀼𑀢𑁆𑀢𑁄. 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀦𑁆𑀢𑁂𑀦 𑀓-𑀓𑀸𑀭𑁂𑀦 𑀢𑀻𑀲𑀼𑀧𑀺 𑀬𑀫𑀓𑁂𑀲𑀼 𑀫𑀽𑀮𑀬𑁄𑀕𑀫𑁂𑀯 𑀤𑀻𑀧𑁂𑀢𑀼𑀁 𑀫𑀽𑀮𑀓𑀦𑀬𑁄 𑀯𑀼𑀢𑁆𑀢𑁄. 𑀫𑀽𑀮𑀫𑀽𑀮𑀓𑀦𑀬𑀯𑀘𑀦𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀯.

𑁭𑁪-𑁮𑁫. 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀦 𑀏𑀓𑀫𑀽𑀮𑀪𑀸𑀯𑀁 𑀮𑀪𑀫𑀸𑀦𑁂𑀳𑀺 𑀏𑀓𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀳𑁂𑀢𑀼𑀓𑀯𑁄𑀳𑀸𑀭𑀭𑀳𑀺𑀢𑀁 𑀓𑀢𑁆𑀯𑀸. 𑀦 𑀯𑀸 𑀲𑀳𑁂𑀢𑀼𑀓𑀤𑀼𑀓𑁂 𑀯𑀺𑀬 𑀏𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑀸𑀬𑁄𑀕𑀯𑀲𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑀁, 𑀅𑀣 𑀔𑁄 𑀲𑀳𑁂𑀢𑀼𑀓𑀯𑁄𑀳𑀸𑀭𑀫𑁂𑀯 𑀮𑀪𑀢𑀺, 𑀦 𑀅𑀳𑁂𑀢𑀼𑀓𑀯𑁄𑀳𑀸𑀭𑀦𑁆𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑀁. 𑀏𑀓𑀢𑁄 𑀮𑀩𑁆𑀪𑀫𑀸𑀦𑀓𑀯𑀲𑁂𑀦𑀸𑀢𑀺 𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀺𑀩𑁆𑀩𑀸𑀦𑁂𑀳𑀺 𑀳𑁂𑀢𑀼𑀧𑀘𑁆𑀘𑀬𑀭𑀳𑀺𑀢𑁂𑀳𑀺 𑀲𑀳 𑀮𑀩𑁆𑀪𑀫𑀸𑀦𑀓𑀭𑀽𑀧𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁮𑁬-𑁯𑁭. 𑀬𑀲𑁆𑀲𑀁 𑀧𑀸𑀴𑀺𑀬𑀁 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀫𑀽𑀮𑁂𑀦 𑀦 𑀏𑀓𑀫𑀽𑀮𑀁, 𑀲𑀳𑁂𑀢𑀼𑀓𑀁 𑀦𑀸𑀫𑀫𑀽𑀮𑁂𑀦 𑀏𑀓𑀫𑀽𑀮’’𑀦𑁆𑀢𑀺 (𑀬𑀫. 𑁧.𑀫𑀽𑀮𑀬𑀫𑀓.𑁮𑁭) 𑀧𑀸𑀞𑁄 𑀆𑀕𑀢𑁄, 𑀢𑀢𑁆𑀣 ‘‘𑀬𑁂 𑀓𑁂𑀘𑀺 𑀦𑀸𑀫𑀸 𑀥𑀫𑁆𑀫𑀸’’𑀢𑀺 𑀦𑀸𑀫𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 ‘‘𑀅𑀳𑁂𑀢𑀼𑀓𑀁 𑀲𑀳𑁂𑀢𑀼𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 ‘‘𑀦𑀸𑀫’’𑀦𑁆𑀢𑀺 𑀘 𑀇𑀤𑀁 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀧𑀦 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀁, 𑀲𑀳𑁂𑀢𑀼𑀓𑀁 𑀦𑀸𑀫’’𑀦𑁆𑀢𑀺 (𑀬𑀫. 𑁧.𑀫𑀽𑀮𑀬𑀫𑀓.𑁮𑁭) 𑀘 𑀧𑀸𑀞𑁄, 𑀢𑀢𑁆𑀣 𑀲𑀼𑀧𑀸𑀓𑀝𑀪𑀸𑀯𑀢𑁆𑀣𑀁 ‘‘𑀦𑀸𑀫’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.