𑁮. 𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀯𑀁𑀲-𑀲𑀤𑁆𑀤𑁄 ‘‘𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀢𑀻’’𑀢𑀺𑀆𑀤𑀻𑀲𑀼 𑀤𑁆𑀯𑀺𑀦𑁆𑀦𑀁 𑀕𑁄𑀧𑀸𑀦𑀲𑀻𑀦𑀁 𑀲𑀦𑁆𑀥𑀸𑀦𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑀤𑀡𑁆𑀟𑀓𑁂 𑀆𑀕𑀢𑁄.

‘‘𑀯𑀁𑀲𑁄 𑀯𑀺𑀲𑀸𑀮𑁄 𑀘 𑀬𑀣𑀸 𑀯𑀺𑀲𑀢𑁆𑀢𑁄,

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸;

𑀯𑀁𑀲𑀓𑁆𑀓𑀴𑀻𑀭𑁄𑀯 𑀅𑀲𑀚𑁆𑀚𑀫𑀸𑀦𑁄,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. 𑁋

𑀆𑀤𑀻𑀲𑀼 𑀓𑀝𑁆𑀞𑀓𑁂. ‘‘𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀯𑀁𑀲𑀢𑀸𑀮𑀲𑀤𑁆𑀤𑁄’’𑀢𑀺𑀆𑀤𑀻𑀲𑀼 𑀢𑀽𑀭𑀺𑀬𑀯𑀺𑀲𑁂𑀲𑁂, 𑀯𑁂𑀡𑀽𑀢𑀺𑀧𑀺 𑀯𑀼𑀘𑁆𑀘𑀢𑀺. ‘‘𑀪𑀺𑀦𑁆𑀦𑁂𑀦 𑀧𑀺𑀝𑁆𑀞𑀺𑀯𑀁𑀲𑁂𑀦 𑀫𑀢𑁄 𑀳𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀳𑀢𑁆𑀣𑀺𑀆𑀤𑀻𑀦𑀁 𑀧𑀺𑀝𑁆𑀞𑀺𑀯𑁂𑀫𑀚𑁆𑀛𑁂 𑀧𑀤𑁂𑀲𑁂. ‘‘𑀓𑀼𑀮𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀓𑀼𑀮𑀦𑁆𑀯𑀬𑁂. ‘‘𑀯𑀁𑀲𑀸𑀦𑀼𑀭𑀓𑁆𑀔𑀓𑁄 𑀧𑀯𑁂𑀡𑀻𑀧𑀸𑀮𑀓𑁄’’𑀢𑀺𑀆𑀤𑀻𑀲𑀼 𑀕𑀼𑀡𑀸𑀦𑀼𑀧𑀼𑀩𑁆𑀩𑀺𑀬𑀁 𑀕𑀼𑀡𑀸𑀦𑀁 𑀧𑀩𑀦𑁆𑀥𑀧𑁆𑀧𑀯𑀢𑁆𑀢𑀺𑀬𑀁. 𑀇𑀥 𑀧𑀦 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀢𑀸𑀲𑀗𑁆𑀔𑀸𑀢𑀕𑀼𑀡𑀸𑀦𑀁 𑀧𑀩𑀦𑁆𑀥𑁂 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀲 𑀧𑀦 𑀯𑀁𑀲𑀲𑁆𑀲 𑀓𑀼𑀮𑀦𑁆𑀯𑀬𑀁 𑀕𑀼𑀡𑀦𑁆𑀯𑀬𑀜𑁆𑀘 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀢𑁆𑀢𑀺𑀬𑀯𑀁𑀲𑁄𑀢𑀺 𑀔𑀢𑁆𑀢𑀺𑀬𑀓𑀼𑀮𑀯𑀁𑀲𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀲𑀫𑀡𑀯𑀁𑀲𑁄 𑀧𑀦 𑀲𑀫𑀡𑀢𑀦𑁆𑀢𑀺 𑀲𑀫𑀡𑀧𑀯𑁂𑀡𑀻. 𑀫𑀽𑀮𑀕𑀦𑁆𑀥𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸 𑀲𑀸𑀭𑀕𑀦𑁆𑀥𑀸𑀤𑀻𑀦𑀁 𑀲𑀗𑁆𑀕𑀳𑁄, 𑀏𑀯𑀫𑁂𑀢𑁆𑀣 𑀕𑁄𑀭𑀲𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀤𑀼𑀢𑀺𑀬𑁂𑀦 𑀧𑀦 𑀆𑀤𑀺-𑀲𑀤𑁂𑀦 𑀓𑀸𑀲𑀺𑀓𑀯𑀢𑁆𑀣𑀲𑀧𑁆𑀧𑀺𑀫𑀡𑁆𑀟𑀸𑀤𑀻𑀦𑀁.

𑀅𑀭𑀺𑀬-𑀲𑀤𑁆𑀤𑁄 𑀅𑀫𑀺𑀮𑀓𑁆𑀔𑁂𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀧𑀯𑀢𑁆𑀢𑀢𑀺, 𑀬𑁂𑀲𑀁 𑀦𑀺𑀯𑀲𑀦𑀝𑁆𑀞𑀸𑀦𑀁 𑀅𑀭𑀺𑀬𑀁 𑀆𑀬𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁫𑁨; 𑀉𑀤𑀸. 𑁭𑁬). 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀲𑀼𑀧𑀺 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸, 𑀢𑁂𑀲𑀁 𑀅𑀳𑀁 𑀅𑀜𑁆𑀜𑀢𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫). 𑀇𑀥 𑀧𑀦 𑀬𑁂 ‘‘𑀆𑀭𑀓𑀸 𑀓𑀺𑀮𑁂𑀲𑁂𑀳𑀻’’𑀢𑀺𑀆𑀤𑀺𑀦𑀸 𑀮𑀤𑁆𑀥𑀦𑀺𑀩𑁆𑀩𑀘𑀦𑀸 𑀧𑀝𑀺𑀯𑀺𑀤𑁆𑀥𑀅𑀭𑀺𑀬𑀲𑀘𑁆𑀘𑀸, 𑀢𑁂 𑀏𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂 𑀧𑀦 𑀢𑁂 𑀅𑀭𑀺𑀬𑀸’’𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘‘𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁂 𑀫𑀳𑀸𑀧𑀡𑀺𑀥𑀸𑀦𑀓𑀧𑁆𑀧𑀢𑁄 𑀧𑀝𑁆𑀞𑀸𑀬 𑀬𑀸𑀯𑀸𑀬𑀁 𑀓𑀧𑁆𑀧𑁄, 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸. 𑀢𑁂 𑀢𑀸𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀢𑀤𑀜𑁆𑀜𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀩𑀼𑀤𑁆𑀥𑀲𑀸𑀯𑀓𑁂 𑀘 𑀲𑀗𑁆𑀕𑀳𑁂𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀅𑀭𑀺𑀬𑁂 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯 𑀲𑀸𑀲𑀦𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀸𑀯 𑀲𑀢𑁆𑀣𑀸 𑀥𑀭𑀢𑀺 𑀏𑀯 𑀦𑀸𑀫𑀸𑀢𑀺 𑀇𑀫𑀫𑁂𑀯 𑀪𑀕𑀯𑀦𑁆𑀢𑀁. 𑀬𑁂 𑀘𑁂𑀢𑀭𑀳𑀺 𑀩𑀼𑀤𑁆𑀥𑀲𑀸𑀯𑀓𑀸, 𑀢𑁂 𑀘 𑀲𑀦𑁆𑀥𑀸𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀕𑁆𑀕𑀳𑀡𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀢𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺 𑀘𑁂, 𑀅𑀢𑀻𑀢𑀸𑀦𑀸𑀕𑀢𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀇𑀤𑀸𑀦𑀺 𑀬𑀣𑀸 𑀪𑀕𑀯𑀸 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀺, 𑀬𑀤𑀺𑀤𑀁 𑀙 𑀙𑀓𑁆𑀓𑀸𑀦𑀻’’𑀢𑀺 𑀙𑀙𑀓𑁆𑀓𑀤𑁂𑀲𑀦𑀸𑀬 (𑀫. 𑀦𑀺. 𑁩.𑁪𑁨𑁦) 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀅𑀪𑀸𑀲𑀺. 𑀏𑀯𑀁 𑀫𑀳𑀸𑀅𑀭𑀺𑀬𑀯𑀁𑀲𑀤𑁂𑀲𑀦𑀸𑀬 𑀅𑀭𑀺𑀬𑀸𑀦𑀁 𑀯𑀁𑀲𑀁 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀁𑀲𑀸 𑀅𑀕𑁆𑀕𑀜𑁆𑀜𑀸 𑀭𑀢𑁆𑀢𑀜𑁆𑀜𑀸 𑀯𑀁𑀲𑀜𑁆𑀜𑀸 𑀧𑁄𑀭𑀸𑀡𑀸, 𑀅𑀲𑀁𑀓𑀺𑀡𑁆𑀡𑀸 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸 𑀦 𑀲𑀁𑀓𑀻𑀬𑀦𑁆𑀢𑀺 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻’’𑀢𑀺 𑀬𑁂𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀅𑀪𑀸𑀲𑀺, 𑀢𑀸𑀦𑀺 𑀢𑀸𑀯 𑀆𑀦𑁂𑀢𑁆𑀯𑀸 𑀣𑁄𑀫𑀦𑀸𑀯𑀲𑁂𑀦𑁂𑀯 𑀯𑀡𑁆𑀡𑁂𑀦𑁆𑀢𑁄 ‘‘𑀢𑁂 𑀔𑁄 𑀧𑀦𑁂𑀢𑁂’’𑀢𑀺𑀆𑀤𑀺𑀫𑀸𑀳. 𑀅𑀕𑁆𑀕𑀸𑀢𑀺 𑀚𑀸𑀦𑀺𑀢𑀩𑁆𑀩𑀸 𑀲𑀩𑁆𑀩𑀯𑀁𑀲𑁂𑀳𑀺 𑀲𑁂𑀝𑁆𑀞𑀪𑀸𑀯𑀢𑁄 𑀲𑁂𑀝𑁆𑀞𑀪𑀸𑀯𑀲𑀸𑀥𑀦𑀢𑁄 𑀘.

𑀭𑀢𑁆𑀢𑀜𑁆𑀜𑀸 𑀘𑀺𑀭𑀭𑀢𑁆𑀢𑀸𑀢𑀺 𑀚𑀸𑀦𑀺𑀢𑀩𑁆𑀩𑀸 𑀭𑀢𑁆𑀢𑀜𑁆𑀜𑀽𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀢𑁂𑀳𑀺 𑀘 𑀢𑀣𑀸 𑀅𑀦𑀼𑀝𑁆𑀞𑀺𑀢𑀢𑁆𑀢𑀸. 𑀯𑀁𑀲𑀸𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀯𑀁𑀲𑀸𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑁄𑀭𑀸𑀡𑀸𑀢𑀺 𑀧𑀼𑀭𑀸𑀢𑀦𑀸. 𑀦 𑀅𑀥𑀼𑀦𑀧𑁆𑀧𑀢𑁆𑀢𑀺𑀓𑀸𑀢𑀺 𑀦 𑀅𑀥𑀼𑀦𑀸𑀢𑀦𑀸. 𑀅𑀯𑀺𑀓𑀺𑀡𑁆𑀡𑀸𑀢𑀺 𑀦 𑀔𑀺𑀢𑁆𑀢𑀸 𑀦 𑀙𑀟𑁆𑀟𑀺𑀢𑀸. 𑀢𑁂𑀦𑀸𑀳 ‘‘𑀅𑀦𑀧𑀦𑀻𑀢𑀸’’𑀢𑀺. 𑀦 𑀅𑀧𑀦𑀻𑀢𑀧𑀼𑀩𑁆𑀩𑀸𑀢𑀺 𑀦 𑀙𑀟𑁆𑀟𑀺𑀢𑀧𑀼𑀩𑁆𑀩𑀸, 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀲𑀺𑀓𑁆𑀔𑀸𑀦𑀁 𑀧𑀭𑀺𑀧𑀽𑀭𑀡𑀽𑀧𑀸𑀬𑀪𑀸𑀯𑀢𑁄 𑀦 𑀧𑀭𑀺𑀘𑁆𑀘𑀢𑁆𑀢𑀧𑀼𑀩𑁆𑀩𑀸. 𑀢𑀢𑁄 𑀏𑀯 𑀇𑀤𑀸𑀦𑀺𑀧𑀺 𑀦 𑀅𑀧𑀦𑀻𑀬𑀦𑁆𑀢𑀺, 𑀅𑀦𑀸𑀕𑀢𑁂𑀧𑀺 𑀦 𑀅𑀧𑀦𑀻𑀬𑀺𑀲𑁆𑀲𑀦𑁆𑀢𑀺𑀬𑁂𑀯. 𑀥𑀫𑁆𑀫𑀲𑀪𑀸𑀯𑀲𑁆𑀲 𑀯𑀺𑀚𑀸𑀦𑀦𑁂𑀦 𑀯𑀺𑀜𑁆𑀜𑀽. 𑀲𑀫𑀺𑀢𑀧𑀸𑀧𑀸 𑀲𑀫𑀡𑀸 𑀘𑁂𑀯 𑀩𑀸𑀳𑀺𑀢𑀧𑀸𑀧𑀸 𑀩𑁆𑀭𑀸𑀳𑁆𑀫𑀡𑀸 𑀘. 𑀢𑁂𑀳𑀺 𑀅𑀧𑁆𑀧𑀝𑀺𑀓𑀼𑀝𑁆𑀞𑀸 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀸. 𑀬𑁂 𑀳𑀺 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀸, 𑀢𑁂 𑀅𑀦𑀺𑀦𑁆𑀤𑀺𑀢𑀩𑁆𑀩𑀸. 𑀅𑀕𑀭𑀳𑀺𑀢𑀩𑁆𑀩𑀸 𑀅𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀢𑀸𑀬 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺.

𑀲𑀦𑁆𑀢𑀼𑀝𑁆𑀞𑁄𑀢𑀺 𑀏𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀲𑀦𑁆𑀢𑁄𑀲𑀫𑁂𑀯 𑀤𑀲𑁆𑀲𑁂𑀦𑁆𑀢𑁂𑀦 𑀧𑀘𑁆𑀘𑀬𑀲𑀦𑁆𑀢𑁄𑀲𑀯𑀲𑁂𑀦 𑀲𑀦𑁆𑀢𑀼𑀝𑁆𑀞𑁄𑀢𑀺 𑀯𑀼𑀢𑁆𑀢𑀁, 𑀛𑀸𑀦𑀯𑀺𑀧𑀲𑁆𑀲𑀦𑀸𑀤𑀺𑀯𑀲𑁂𑀦𑀧𑀺 𑀇𑀥 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀼𑀝𑁆𑀞𑀢𑀸 𑀳𑁄𑀢𑀻𑀢𑀺. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀇𑀢𑀭𑁂𑀦 𑀇𑀢𑀭𑁂𑀦. 𑀇𑀢𑀭𑀲𑀤𑁆𑀤𑁄 𑀅𑀦𑀺𑀬𑀫𑀯𑀘𑀦𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄 𑀬𑀁-𑀓𑀺𑀜𑁆𑀘𑀺𑀲𑀤𑁆𑀤𑁂𑀳𑀺 𑀲𑀫𑀸𑀦𑀢𑁆𑀣𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀓𑁂𑀦𑀘𑀻’’𑀢𑀺. 𑀲𑁆𑀯𑀸𑀬𑀁 𑀅𑀦𑀺𑀬𑀫𑀯𑀸𑀘𑀺𑀢𑀸𑀬 𑀏𑀯 𑀬𑀣𑀸 𑀣𑀽𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀘𑀦𑁄, 𑀏𑀯𑀁 𑀬𑀣𑀸𑀮𑀤𑁆𑀥𑀸𑀤𑀻𑀦𑀫𑁆𑀧𑀺 𑀅𑀜𑁆𑀜𑀢𑀭𑀯𑀘𑀦𑁄𑀢𑀺. 𑀢𑀢𑁆𑀣 𑀤𑀼𑀢𑀺𑀬𑀧𑀓𑁆𑀔𑀲𑁆𑀲𑁂𑀯 𑀇𑀥 𑀇𑀘𑁆𑀙𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀔𑁄’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀬𑀣𑀸𑀮𑀤𑁆𑀥𑀸𑀤𑀬𑁄𑀧𑀺 𑀣𑀽𑀮𑀸𑀤𑀬𑁄 𑀏𑀯? 𑀲𑀘𑁆𑀘𑀫𑁂𑀢𑀁, 𑀢𑀣𑀸𑀧𑀺 𑀅𑀢𑁆𑀣𑀺 𑀯𑀺𑀲𑁂𑀲𑁄. 𑀬𑁄 𑀳𑀺 𑀬𑀣𑀸𑀮𑀤𑁆𑀥𑁂𑀲𑀼 𑀣𑀽𑀮𑀸𑀤𑀻𑀲𑀼 𑀲𑀦𑁆𑀢𑁄𑀲𑁄, 𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄𑀯, 𑀦 𑀇𑀢𑀭𑁄. 𑀦 𑀳𑀺 𑀲𑁄 𑀧𑀘𑁆𑀘𑀬𑀫𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀇𑀘𑁆𑀙𑀺𑀢𑁄, 𑀅𑀣 𑀔𑁄 𑀅𑀢𑁆𑀢𑀦𑁄 𑀓𑀸𑀬𑀩𑀮𑀲𑀸𑀭𑀼𑀧𑁆𑀧𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑁄𑀧𑀺. 𑀣𑀽𑀮𑀤𑀼𑀓𑀸𑀤𑀬𑁄 𑀢𑀬𑁄𑀧𑀺 𑀘𑀻𑀯𑀭𑁂 𑀮𑀩𑁆𑀪𑀦𑁆𑀢𑀺, 𑀫𑀚𑁆𑀛𑀺𑀫𑁄 𑀘𑀢𑀼𑀧𑀘𑁆𑀘𑀬𑀲𑀸𑀥𑀸𑀭𑀡𑁄, 𑀧𑀘𑁆𑀙𑀺𑀫𑁄 𑀧𑀦 𑀘𑀻𑀯𑀭𑁂 𑀲𑁂𑀦𑀸𑀲𑀦𑁂 𑀘 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑁂 𑀢𑀬𑁄 𑀲𑀦𑁆𑀢𑁄𑀲𑁂𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁂𑀦 𑀯𑀼𑀢𑁆𑀢𑀁. 𑀬𑁂 𑀳𑀺 𑀧𑀭𑀢𑁄 𑀕𑀺𑀮𑀸𑀦𑀧𑀘𑁆𑀘𑀬𑀁 𑀧𑀺𑀡𑁆𑀟𑀧𑀸𑀢𑁂 𑀏𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀻𑀯𑀭𑁂 𑀯𑀻𑀲𑀢𑀺, 𑀧𑀺𑀡𑁆𑀟𑀧𑀸𑀢𑁂 𑀧𑀦𑁆𑀦𑀭𑀲, 𑀲𑁂𑀦𑀸𑀲𑀦𑁂 𑀧𑀦𑁆𑀦𑀭𑀲𑀸𑀢𑀺 𑀲𑀫𑀧𑀜𑁆𑀜𑀸𑀲 𑀲𑀦𑁆𑀢𑁄𑀲𑀸 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀬𑀣𑀸𑀭𑀳𑀁 𑀇𑀫𑁂𑀲𑀼 𑀏𑀯 𑀢𑀻𑀲𑀼 𑀲𑀦𑁆𑀢𑁄𑀲𑁂𑀲𑀼 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀻𑀢𑀺.

𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 ‘‘𑀇𑀤𑀁 𑀦𑀸𑀫 𑀘𑀻𑀯𑀭𑀁 𑀓𑀧𑁆𑀧𑀺𑀬’’𑀦𑁆𑀢𑀺 𑀚𑀸𑀢𑀺𑀢𑁄 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀁. 𑀘𑀻𑀯𑀭𑀔𑁂𑀢𑁆𑀢𑀦𑁆𑀢𑀺 𑀘𑀻𑀯𑀭𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑁆𑀔𑁂𑀢𑁆𑀢𑀁. 𑀧𑀁𑀲𑀼𑀓𑀽𑀮𑀦𑁆𑀢𑀺 𑀧𑀁𑀲𑀼𑀓𑀽𑀮𑀘𑀻𑀯𑀭𑀁, 𑀧𑀁𑀲𑀼𑀓𑀽𑀮𑀮𑀓𑁆𑀔𑀡𑀧𑁆𑀧𑀢𑁆𑀢𑀁 𑀘𑀻𑀯𑀭𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑀦𑁆𑀢𑁄𑀲𑁄𑀢𑀺 𑀘𑀻𑀯𑀭𑁂 𑀮𑀩𑁆𑀪𑀫𑀸𑀦𑁄 𑀲𑀩𑁆𑀩𑁄 𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄. 𑀘𑀻𑀯𑀭𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀕𑁄𑀧𑁂𑀦𑁆𑀢𑁄 𑀘𑀻𑀯𑀭𑀲𑀦𑁆𑀢𑁄𑀲𑁂𑀦 𑀲𑀫𑁆𑀫𑀤𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺. 𑀔𑁄𑀫𑀓𑀧𑁆𑀧𑀸𑀲𑀺𑀓𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀲𑀸𑀡𑀪𑀗𑁆𑀕𑀸𑀦𑀺 𑀔𑁄𑀫𑀸𑀤𑀻𑀦𑀺. 𑀢𑀢𑁆𑀣 𑀔𑁄𑀫𑀁 𑀦𑀸𑀫 𑀔𑁄𑀫𑀲𑀼𑀢𑁆𑀢𑁂𑀳𑀺 𑀯𑀸𑀬𑀺𑀢𑀁 𑀔𑁄𑀫𑀧𑀝𑁆𑀝𑀘𑀻𑀯𑀭𑀁. 𑀢𑀣𑀸 𑀲𑁂𑀲𑀸𑀦𑀺𑀧𑀺. 𑀲𑀸𑀡𑀦𑁆𑀢𑀺 𑀲𑀸𑀡𑀯𑀸𑀓𑀲𑀼𑀢𑁆𑀢𑁂𑀳𑀺 𑀓𑀢𑀘𑀻𑀯𑀭𑀁. 𑀪𑀗𑁆𑀕𑀦𑁆𑀢𑀺 𑀧𑀦 𑀔𑁄𑀫𑀲𑀼𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀸𑀦𑀺, 𑀏𑀓𑀘𑁆𑀘𑀸𑀦𑀺 𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀘𑀻𑀯𑀭𑀁. 𑀪𑀗𑁆𑀕𑀫𑁆𑀧𑀺 𑀯𑀸𑀓𑀫𑀬𑀫𑁂𑀯𑀸𑀢𑀺 𑀓𑁂𑀘𑀺. 𑀙𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀬𑀤𑀺 𑀏𑀯𑀁 𑀇𑀢𑁄 𑀅𑀜𑁆𑀜𑀸 𑀯𑀢𑁆𑀣𑀚𑀸𑀢𑀺 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀲𑀸 𑀧𑀦 𑀏𑀢𑁂𑀲𑀁 𑀅𑀦𑀼𑀮𑁄𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑀽𑀮𑀸𑀤𑀻𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀧𑀢𑁆𑀢𑀼𑀡𑁆𑀡𑀁, 𑀲𑁄𑀫𑀸𑀭𑀧𑀝𑁆𑀝𑀁, 𑀘𑀻𑀦𑀧𑀝𑁆𑀝𑀁, 𑀇𑀤𑁆𑀥𑀺𑀚𑀁, 𑀤𑁂𑀯𑀤𑀺𑀦𑁆𑀦𑀦𑁆𑀢𑀺 𑀢𑁂𑀲𑀁 𑀲𑀗𑁆𑀕𑀳𑁄. 𑀢𑀢𑁆𑀣 𑀤𑀼𑀓𑀽𑀮𑀁 𑀲𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀯𑀸𑀓𑀫𑀬𑀢𑁆𑀢𑀸. 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀲𑀜𑁆𑀚𑀸𑀢𑀯𑀢𑁆𑀣𑀁 𑀧𑀢𑁆𑀢𑀼𑀡𑁆𑀡𑀁. ‘‘𑀓𑁄𑀲𑁂𑀬𑁆𑀬𑀯𑀺𑀲𑁂𑀲𑁄’’𑀢𑀺 𑀳𑀺 𑀅𑀪𑀺𑀥𑀸𑀦𑀓𑁄𑀲𑁂 𑀯𑀼𑀢𑁆𑀢𑀁. 𑀲𑁄𑀫𑀸𑀭𑀤𑁂𑀲𑁂 𑀘𑀻𑀦𑀤𑁂𑀲𑁂 𑀘 𑀚𑀸𑀢𑀯𑀢𑁆𑀣𑀸𑀦𑀺 𑀲𑁄𑀫𑀸𑀭𑀘𑀻𑀦𑀧𑀝𑁆𑀝𑀸𑀦𑀺. 𑀧𑀢𑁆𑀢𑀼𑀡𑁆𑀡𑀸𑀤𑀻𑀦𑀺 𑀢𑀻𑀡𑀺 𑀓𑁄𑀲𑁂𑀬𑁆𑀬𑀲𑁆𑀲 𑀅𑀦𑀼𑀮𑁄𑀫𑀸𑀦𑀺 𑀧𑀸𑀡𑀓𑁂𑀳𑀺 𑀓𑀢𑀲𑀼𑀢𑁆𑀢𑀫𑀬𑀢𑁆𑀢𑀸. 𑀇𑀤𑁆𑀥𑀺𑀚𑀁 𑀏𑀳𑀺𑀪𑀺𑀓𑁆𑀔𑀽𑀦𑀁 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀘𑀻𑀯𑀭𑀁, 𑀢𑀁 𑀔𑁄𑀫𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀏𑀯 𑀅𑀦𑀼𑀮𑁄𑀫𑀁. 𑀤𑁂𑀯𑀢𑀸𑀳𑀺 𑀤𑀺𑀦𑁆𑀦𑀘𑀻𑀯𑀭𑀁 𑀤𑁂𑀯𑀤𑀺𑀦𑁆𑀦𑀁, 𑀢𑀁 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀁 𑀚𑀸𑀮𑀺𑀦𑀺𑀬𑀸 𑀤𑁂𑀯𑀓𑀜𑁆𑀜𑀸𑀬 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀯𑀢𑁆𑀣𑀲𑀤𑀺𑀲𑀁, 𑀢𑀫𑁆𑀧𑀺 𑀔𑁄𑀫𑀸𑀤𑀻𑀦𑀁𑀬𑁂𑀯 𑀅𑀦𑀼𑀮𑁄𑀫𑀁 𑀳𑁄𑀢𑀺 𑀢𑁂𑀲𑀼 𑀅𑀜𑁆𑀜𑀢𑀭𑀪𑀸𑀯𑀢𑁄.

𑀇𑀫𑀸𑀦𑀻𑀢𑀺 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀯𑀘𑀦𑀁, 𑀇𑀫𑀸𑀦𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀤𑀻𑀦𑀁 𑀧𑀭𑀺𑀪𑁄𑀕𑀬𑁄𑀕𑁆𑀕𑀢𑀸𑀬 𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺. 𑀇𑀤𑀸𑀦𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀸𑀦𑀺 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀲𑀘𑀻𑀭’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀲𑀢𑀺𑀡𑁂𑀳𑀺 𑀅𑀜𑁆𑀜𑁂𑀳𑀺 𑀯𑀸 𑀢𑀸𑀤𑀺𑀲𑁂𑀳𑀺 𑀢𑀺𑀡𑁂𑀳𑀺 𑀓𑀢𑀘𑀻𑀯𑀭𑀁 𑀓𑀼𑀲𑀘𑀻𑀭𑀁. 𑀅𑀓𑁆𑀓𑀯𑀸𑀓𑀸𑀤𑀻𑀳𑀺 𑀯𑀸𑀓𑁂𑀳𑀺 𑀓𑀢𑀘𑀻𑀯𑀭𑀁 𑀯𑀸𑀓𑀘𑀻𑀭𑀁. 𑀘𑀢𑀼𑀓𑁆𑀓𑁄𑀡𑁂𑀳𑀺 𑀢𑀺𑀓𑁄𑀡𑁂𑀳𑀺 𑀯𑀸 𑀨𑀮𑀓𑁂𑀳𑀺 𑀓𑀢𑀘𑀻𑀯𑀭𑀁 𑀨𑀮𑀓𑀘𑀻𑀭𑀁. 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑀁 𑀓𑁂𑀲𑀓𑀫𑁆𑀩𑀮𑀁. 𑀘𑀸𑀫𑀭𑀺𑀯𑀸𑀮𑀅𑀲𑁆𑀲𑀯𑀸𑀮𑀸𑀤𑀻𑀳𑀺 𑀓𑀢𑀁 𑀯𑀸𑀮𑀓𑀫𑁆𑀩𑀮𑀁. 𑀫𑀓𑀘𑀺𑀢𑀦𑁆𑀢𑀽𑀳𑀺 𑀯𑀸𑀬𑀺𑀢𑁄 𑀧𑁄𑀢𑁆𑀣𑀓𑁄. 𑀘𑀫𑁆𑀫𑀦𑁆𑀢𑀺 𑀫𑀺𑀕𑀘𑀫𑁆𑀫𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀘𑀫𑁆𑀫𑀁. 𑀉𑀮𑀽𑀓𑀧𑀓𑁆𑀔𑁂𑀳𑀺 𑀕𑀦𑁆𑀣𑀺𑀢𑁆𑀯𑀸 𑀓𑀢𑀘𑀻𑀯𑀭𑀁 𑀉𑀮𑀽𑀓𑀧𑀓𑁆𑀔𑀁. 𑀪𑀼𑀚𑀧𑀢𑁆𑀢𑀢𑀘𑀸𑀤𑀺𑀫𑀬𑀁 𑀭𑀼𑀓𑁆𑀔𑀤𑀼𑀲𑁆𑀲𑀁. 𑀢𑀺𑀭𑀻𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑀼𑀫𑀢𑀭𑀸𑀳𑀺 𑀮𑀢𑀸𑀳𑀺 𑀮𑀢𑀸𑀯𑀸𑀓𑁂𑀳𑀺 𑀯𑀸 𑀯𑀸𑀬𑀺𑀢𑀁 𑀮𑀢𑀸𑀤𑀼𑀲𑁆𑀲𑀁. 𑀏𑀭𑀓𑀯𑀸𑀓𑁂𑀳𑀺 𑀓𑀢𑀁 𑀏𑀭𑀓𑀤𑀼𑀲𑁆𑀲𑀁. 𑀢𑀣𑀸 𑀓𑀤𑀮𑀺𑀤𑀼𑀲𑁆𑀲𑀁. 𑀲𑀼𑀔𑀼𑀫𑁂𑀳𑀺 𑀯𑁂𑀴𑀼𑀯𑀺𑀮𑀻𑀯𑁂𑀳𑀺 𑀓𑀢𑀁 𑀯𑁂𑀴𑀼𑀤𑀼𑀲𑁆𑀲𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀓𑁆𑀓𑀮𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀓𑀧𑁆𑀧𑀺𑀬𑀘𑀻𑀯𑀭𑀸𑀦𑀺 𑀢𑀺𑀢𑁆𑀣𑀺𑀬𑀤𑁆𑀥𑀚𑀪𑀸𑀯𑀢𑁄.

𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀯𑀲𑁂𑀦𑀸𑀢𑀺 ‘‘𑀲𑀻𑀫𑀸𑀬 𑀤𑁂𑀢𑀺, 𑀓𑀢𑀺𑀓𑀸𑀬 𑀤𑁂𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁭𑁯) 𑀆𑀕𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀘𑀻𑀯𑀭𑀼𑀧𑁆𑀧𑀢𑁆𑀢𑀺𑀫𑀸𑀢𑀺𑀓𑀸𑀦𑀁 𑀯𑀲𑁂𑀦. 𑀘𑀻𑀯𑀭𑀸𑀦𑀁 𑀧𑀝𑀺𑀮𑀸𑀪𑀓𑁆𑀔𑁂𑀢𑁆𑀢𑀤𑀲𑁆𑀲𑀦𑀢𑁆𑀣𑀜𑁆𑀳𑀺 𑀪𑀕𑀯𑀢𑀸 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸’’𑀢𑀺𑀆𑀤𑀺𑀦𑀸 𑀫𑀸𑀢𑀺𑀓𑀸 𑀞𑀧𑀺𑀢𑀸. 𑀫𑀸𑀢𑀺𑀓𑀸𑀢𑀺 𑀳𑀺 𑀫𑀸𑀢𑀭𑁄 𑀘𑀻𑀯𑀭𑀼𑀧𑁆𑀧𑀢𑁆𑀢𑀺𑀚𑀦𑀺𑀓𑀸𑀢𑀺.

𑀲𑁄𑀲𑀸𑀦𑀺𑀓𑀦𑁆𑀢𑀺 𑀲𑀼𑀲𑀸𑀦𑁂 𑀧𑀢𑀺𑀢𑀁. 𑀧𑀸𑀧𑀡𑀺𑀓𑀦𑁆𑀢𑀺 𑀆𑀧𑀡𑀤𑁆𑀯𑀸𑀭𑁂 𑀧𑀢𑀺𑀢𑀁. 𑀭𑀣𑀺𑀬𑀦𑁆𑀢𑀺 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀯𑀸𑀢𑀧𑀸𑀦𑀦𑁆𑀢𑀭𑁂𑀦 𑀭𑀣𑀺𑀓𑀸𑀬 𑀙𑀟𑁆𑀟𑀺𑀢𑀘𑁄𑀴𑀓𑀁. 𑀲𑀗𑁆𑀓𑀸𑀭𑀓𑀽𑀝𑀓𑀦𑁆𑀢𑀺 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀙𑀟𑁆𑀟𑀺𑀢𑀘𑁄𑀴𑀓𑀁. 𑀲𑀺𑀦𑀸𑀦𑀦𑁆𑀢𑀺 𑀦𑀳𑀸𑀦𑀘𑁄𑀴𑀓𑀁, 𑀬𑀁 𑀪𑀽𑀢𑀯𑁂𑀚𑁆𑀚𑁂𑀳𑀺 𑀲𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀓𑀸𑀮𑀓𑀡𑁆𑀡𑀺𑀘𑁄𑀴𑀦𑁆𑀢𑀺 𑀙𑀟𑁆𑀟𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀺𑀢𑁆𑀣𑀦𑁆𑀢𑀺 𑀢𑀺𑀢𑁆𑀣𑀘𑁄𑀴𑀁, 𑀲𑀺𑀦𑀸𑀦𑀢𑀺𑀢𑁆𑀣𑁂 𑀙𑀟𑁆𑀟𑀺𑀢𑀧𑀺𑀮𑁄𑀢𑀺𑀓𑀸. 𑀅𑀕𑁆𑀕𑀺𑀤𑀟𑁆𑀠𑀦𑁆𑀢𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀧𑁆𑀧𑀤𑁂𑀲𑀁. 𑀢𑀜𑁆𑀳𑀺 𑀫𑀦𑀼𑀲𑁆𑀲𑀸 𑀙𑀟𑁆𑀟𑁂𑀦𑁆𑀢𑀺. 𑀕𑁄𑀔𑀸𑀬𑀺𑀢𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯. 𑀢𑀸𑀦𑀺𑀧𑀺 𑀳𑀺 𑀫𑀦𑀼𑀲𑁆𑀲𑀸 𑀙𑀟𑁆𑀟𑁂𑀦𑁆𑀢𑀺. 𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀦𑀸𑀯𑀁 𑀆𑀭𑁄𑀳𑀦𑁆𑀢𑁂𑀳𑀺 𑀯𑀸 𑀬𑀼𑀤𑁆𑀥𑀁 𑀧𑀯𑀺𑀲𑀦𑁆𑀢𑁂𑀳𑀺 𑀯𑀸 𑀥𑀚𑀬𑀝𑁆𑀞𑀺𑀁 𑀉𑀲𑁆𑀲𑀸𑀧𑁂𑀢𑁆𑀯𑀸, 𑀢𑀢𑁆𑀣 𑀩𑀤𑁆𑀥𑀁 𑀯𑀸𑀢𑁂𑀦 𑀆𑀦𑀻𑀢𑀁 𑀢𑁂𑀳𑀺 𑀙𑀟𑁆𑀟𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀤𑀓𑀪𑀺𑀓𑁆𑀔𑀼𑀦𑀸𑀢𑀺 𑀕𑀳𑀧𑀢𑀺𑀘𑀻𑀯𑀭𑀲𑁆𑀲 𑀲𑀸𑀤𑀺𑀬𑀦𑀪𑀺𑀓𑁆𑀔𑀼𑀦𑀸. 𑀏𑀓𑀫𑀸𑀲𑀫𑀢𑁆𑀢𑀦𑁆𑀢𑀺 𑀘𑀻𑀯𑀭𑀫𑀸𑀲𑀲𑀜𑁆𑀜𑀺𑀢𑀁 𑀏𑀓𑀫𑀸𑀲𑀫𑀢𑁆𑀢𑀁 𑀯𑀺𑀢𑀓𑁆𑀓𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀢𑀢𑁄 𑀧𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀲𑁆𑀲𑀧𑀺 𑀳𑀺 𑀢𑀡𑁆𑀳𑀸𑀦𑀺𑀕𑁆𑀕𑀳𑀢𑁆𑀣𑀸 𑀲𑀸𑀲𑀦𑁂 𑀧𑀝𑀺𑀧𑀢𑁆𑀢𑀻𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄 𑀅𑀤𑁆𑀥𑀫𑀸𑀲𑁂𑀦𑁂𑀯 𑀓𑀭𑁄𑀢𑀺 𑀅𑀧𑀭𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀧𑀝𑀺𑀮𑀸𑀪𑀲𑁆𑀲, 𑀇𑀢𑀭𑀲𑁆𑀲 𑀧𑀦 𑀧𑀭𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀫𑀸𑀲𑀫𑀢𑁆𑀢𑀁 𑀅𑀦𑀼𑀜𑁆𑀜𑀸𑀢𑀁. 𑀇𑀤𑀁 𑀫𑀸𑀲𑀟𑁆𑀠𑀫𑀸𑀲𑀫𑀢𑁆𑀢𑀁…𑀧𑁂… 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀧𑀭𑀺𑀫𑀺𑀢𑀓𑀸𑀮𑀺𑀓𑀢𑁆𑀢𑀸. 𑀫𑀳𑀸𑀣𑁂𑀭𑀁 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀳𑀸𑀬𑀁 𑀇𑀘𑁆𑀙𑀦𑁆𑀢𑁄𑀧𑀺 𑀕𑀭𑀼𑀕𑀸𑀭𑀯𑁂𑀦 ‘‘𑀕𑀸𑀫𑀤𑁆𑀯𑀸𑀭𑀁, 𑀪𑀦𑁆𑀢𑁂, 𑀕𑀫𑀺𑀲𑁆𑀲𑀸𑀫𑀺’’𑀇𑀘𑁆𑀘𑁂𑀯𑀸𑀳. 𑀣𑁂𑀭𑁄𑀧𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 ‘‘𑀅𑀳𑀫𑁆𑀧𑀸𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀢𑀓𑁆𑀓𑀲𑁆𑀲 𑀅𑀯𑀲𑀭𑁄 𑀫𑀸 𑀳𑁄𑀢𑀽’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀫𑀸𑀦𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀉𑀘𑁆𑀘𑀸𑀭𑀧𑀮𑀺𑀩𑀼𑀤𑁆𑀥𑁄𑀢𑀺 𑀉𑀘𑁆𑀘𑀸𑀭𑁂𑀦 𑀧𑀻𑀴𑀺𑀢𑁄. 𑀢𑀤𑀸 𑀪𑀕𑀯𑀢𑁄 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀦𑀼𑀲𑁆𑀲𑀭𑀡𑀫𑀼𑀔𑁂𑀦 𑀢𑀣𑀸𑀕𑀢𑁂 𑀉𑀧𑁆𑀧𑀦𑁆𑀦𑀲𑁆𑀲 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑁂𑀕𑀲𑁆𑀲 𑀩𑀮𑀯𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀢𑀲𑁆𑀫𑀺𑀁𑀬𑁂𑀯…𑀧𑁂… 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑁄.

𑀓𑀢𑁆𑀣 𑀮𑀪𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑀦𑀸𑀧𑀺 𑀮𑀸𑀪𑀸𑀲𑀸𑀧𑀼𑀩𑁆𑀩𑀺𑀓𑀸𑀢𑀺 𑀢𑀣𑀸 ‘‘𑀅𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀼𑀦𑁆𑀤𑀭𑀁 𑀮𑀪𑀺𑀲𑁆𑀲𑀸𑀫𑀺, 𑀫𑀦𑀸𑀧𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺𑀏𑀯𑀫𑀸𑀤𑀺𑀘𑀺𑀦𑁆𑀢𑀦𑀸𑀬 𑀓𑀸 𑀦𑀸𑀫 𑀓𑀣𑀸, 𑀓𑀣𑀁 𑀧𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀕𑀫𑀦’’𑀦𑁆𑀢𑀺. 𑀢𑁂𑀦 𑀘𑀻𑀯𑀭𑀁 𑀧𑀝𑀺𑀘𑁆𑀘 𑀓𑀺𑀜𑁆𑀘𑀺𑀧𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁂𑀲𑀮𑁄 𑀅𑀧𑁆𑀧𑀢𑀺𑀭𑀽𑀧𑀸𑀬𑀧𑀺 𑀧𑀭𑀺𑀬𑁂𑀲𑀦𑀸𑀬 𑀧𑀘𑁆𑀘𑀬𑁄 𑀪𑀯𑁂𑀬𑁆𑀬𑀸𑀢𑀺 ‘‘𑀧𑁂𑀲𑀮𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀆𑀳𑀭𑀺𑀬𑀫𑀸𑀦𑀦𑁆𑀢𑀺 𑀲𑀼𑀲𑀸𑀦𑀸𑀤𑀻𑀲𑀼 𑀧𑀢𑀺𑀢𑀁 𑀯𑀢𑁆𑀣𑀁 ‘‘𑀇𑀫𑁂 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀢𑀢𑁄 𑀆𑀦𑀻𑀬𑀫𑀸𑀦𑀁. 𑀏𑀯𑀁 𑀮𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀻𑀢𑀺 𑀏𑀯𑀁 𑀧𑀝𑀺𑀮𑀸𑀪𑀲𑀦𑁆𑀢𑁄𑀲𑀁 𑀅𑀓𑁄𑀧𑁂𑀢𑁆𑀯𑀸 𑀮𑀤𑁆𑀥𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀺. 𑀅𑀢𑁆𑀢𑀦𑁄𑀧𑀳𑁄𑀦𑀓𑀫𑀢𑁆𑀢𑁂𑀦𑁂𑀯𑀸𑀢𑀺 𑀬𑀣𑀸𑀮𑀤𑁆𑀥𑀸𑀦𑀁 𑀧𑀁𑀲𑀼𑀓𑀽𑀮𑀸𑀦𑀁 𑀏𑀓𑀧𑀝𑁆𑀝𑀤𑀼𑀧𑀝𑁆𑀝𑀸𑀦𑀁 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀧𑀳𑁄𑀦𑀓𑀧𑁆𑀧𑀫𑀸𑀡𑁂𑀦𑁂𑀯. 𑀅𑀯𑀥𑀸𑀭𑀡𑁂𑀦 𑀉𑀧𑀭𑀺 𑀧𑀘𑁆𑀘𑀸𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀕𑀸𑀫𑁂 𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀦𑁆𑀢𑁂𑀦 𑀲𑀧𑀤𑀸𑀦𑀘𑀸𑀭𑀺𑀦𑀸 𑀯𑀺𑀬 𑀤𑁆𑀯𑀸𑀭𑀧𑁆𑀧𑀝𑀺𑀧𑀸𑀝𑀺𑀬𑀸 𑀘𑀭𑀡𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀁 𑀦𑀸𑀫 𑀮𑁄𑀮𑀼𑀧𑁆𑀧𑀲𑁆𑀲 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸.

𑀬𑀸𑀧𑁂𑀢𑀼𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀼𑀁. 𑀥𑁄𑀯𑀦𑀼𑀧𑀕𑁂𑀦𑀸𑀢𑀺 𑀥𑁄𑀯𑀦𑀬𑁄𑀕𑁆𑀕𑁂𑀦. 𑀧𑀡𑁆𑀡𑀸𑀦𑀻𑀢𑀺 𑀅𑀫𑁆𑀩𑀚𑀫𑁆𑀩𑀸𑀤𑀺𑀧𑀡𑁆𑀡𑀸𑀦𑀺. 𑀅𑀓𑁄𑀧𑁂𑀢𑁆𑀯𑀸𑀢𑀺 𑀲𑀦𑁆𑀢𑁄𑀲𑀁 𑀅𑀓𑁄𑀧𑁂𑀢𑁆𑀯𑀸. 𑀧𑀳𑁄𑀦𑀓𑀦𑀻𑀳𑀸𑀭𑁂𑀦𑁂𑀯𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀸𑀤𑀻𑀲𑀼 𑀬𑀁 𑀓𑀸𑀢𑀼𑀓𑀸𑀫𑁄, 𑀢𑀲𑁆𑀲 𑀧𑀳𑁄𑀦𑀓𑀦𑀺𑀬𑀸𑀫𑁂𑀦𑁂𑀯 𑀬𑀣𑀸𑀮𑀤𑁆𑀥𑀁 𑀣𑀽𑀮𑀲𑀼𑀔𑀼𑀫𑀸𑀤𑀺𑀁 𑀕𑀳𑁂𑀢𑁆𑀯𑀸 𑀓𑀭𑀡𑀁. 𑀢𑀺𑀫𑀡𑁆𑀟𑀮𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀲𑁆𑀲𑁂𑀯𑀸𑀢𑀺 𑀦𑀺𑀯𑀸𑀲𑀦𑀁 𑀘𑁂 𑀦𑀸𑀪𑀺𑀫𑀡𑁆𑀟𑀮𑀁, 𑀚𑀸𑀡𑀼𑀫𑀡𑁆𑀟𑀮𑀁, 𑀇𑀢𑀭𑀜𑁆𑀘𑁂 𑀕𑀮𑀯𑀸𑀝𑀫𑀡𑁆𑀟𑀮𑀁, 𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺 𑀢𑀺𑀫𑀡𑁆𑀟𑀮𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀲𑁆𑀲𑁂𑀯 𑀓𑀭𑀡𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀯𑀼𑀢𑁆𑀢𑀧𑀭𑀺𑀫𑀸𑀡𑀁𑀬𑁂𑀯 𑀳𑁄𑀢𑀺. 𑀅𑀯𑀺𑀘𑀸𑀭𑁂𑀢𑁆𑀯𑀸 𑀦 𑀯𑀺𑀘𑀸𑀭𑁂𑀢𑁆𑀯𑀸.

𑀓𑀼𑀲𑀺𑀩𑀦𑁆𑀥𑀦𑀓𑀸𑀮𑁂𑀢𑀺 𑀫𑀡𑁆𑀟𑀮𑀸𑀦𑀺 𑀬𑁄𑀚𑁂𑀢𑁆𑀯𑀸 𑀲𑀺𑀩𑁆𑀩𑀦𑀓𑀸𑀮𑁂. 𑀲𑀢𑁆𑀢 𑀯𑀸𑀭𑁂𑀢𑀺 𑀲𑀢𑁆𑀢 𑀲𑀺𑀩𑁆𑀩𑀦𑀯𑀸𑀭𑁂. 𑀓𑀧𑁆𑀧𑀩𑀺𑀦𑁆𑀤𑀼𑀅𑀧𑀤𑁂𑀲𑁂𑀦 𑀓𑀲𑁆𑀲𑀘𑀺 𑀯𑀺𑀓𑀸𑀭𑀲𑁆𑀲 𑀅𑀓𑀭𑀡𑀁 𑀓𑀧𑁆𑀧𑀲𑀦𑁆𑀢𑁄𑀲𑁄.

𑀲𑀻𑀢𑀧𑁆𑀧𑀝𑀺𑀖𑀸𑀢𑀦𑀸𑀤𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀲𑀺𑀚𑁆𑀛𑀢𑀻𑀢𑀺 𑀫𑀼𑀔𑁆𑀬𑀫𑁂𑀯 𑀘𑀻𑀯𑀭𑀧𑀭𑀺𑀪𑁄𑀕𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀺𑀭𑀺𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀸𑀯𑀤𑁂𑀯 𑀳𑀺𑀭𑀺𑀓𑁄𑀧𑀻𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁆𑀣’’𑀦𑁆𑀢𑀺 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬). 𑀯𑀝𑁆𑀝𑀢𑀺, 𑀦 𑀢𑀸𑀯𑀢𑀸 𑀲𑀦𑁆𑀢𑁄𑀲𑁄 𑀓𑀼𑀧𑁆𑀧𑀢𑀺 𑀲𑀫𑁆𑀪𑀸𑀭𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀅𑀮𑀸𑀪𑀢𑁄. 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀢𑁆𑀯𑀸𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀪𑁄𑀕𑀺𑀪𑀸𑀯𑁂 𑀞𑀢𑁆𑀯𑀸. 𑀇𑀢𑀻𑀢𑀺𑀆𑀤𑀺𑀦𑀸 𑀧𑀞𑀫𑀲𑁆𑀲𑁂𑀯 𑀅𑀭𑀺𑀬𑀯𑀁𑀲𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀢𑁂𑀘𑀻𑀯𑀭𑀺𑀓𑀗𑁆𑀕𑀸𑀦𑀁 𑀢𑁂𑀲𑀜𑁆𑀘𑀲𑁆𑀲 𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑁂 𑀥𑀫𑁆𑀫𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀫𑀼𑀝𑁆𑀞𑀸𑀧𑀓𑀸 𑀉𑀧𑀢𑁆𑀣𑀫𑁆𑀪𑀓𑀸 𑀘𑀸’’𑀢𑀺 𑀤𑀻𑀧𑁂𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼.

𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀯𑀡𑁆𑀡𑀯𑀸𑀤𑀻𑀢𑀺 𑀏𑀢𑁆𑀣 𑀘𑀢𑀼𑀓𑁆𑀓𑁄𑀝𑀺𑀓𑀁 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀘𑀢𑀼𑀢𑁆𑀣𑁄𑀬𑁂𑀯 𑀧𑀓𑁆𑀔𑁄 𑀯𑀡𑁆𑀡𑀺𑀢𑀣𑁄𑀫𑀺𑀢𑁄𑀢𑀺 𑀢𑀣𑀸 𑀤𑁂𑀲𑀦𑀸 𑀓𑀢𑀸. 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀦𑀸𑀴𑀓𑁄. 𑀏𑀓𑁄 𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄. 𑀏𑀓𑁄 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀮𑀸𑀴𑀼𑀤𑀸𑀬𑀺. 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀘𑁂𑀯 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀘 𑀯𑀡𑁆𑀡𑀁 𑀓𑀣𑁂𑀢𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄.

𑀅𑀦𑁂𑀲𑀦𑀦𑁆𑀢𑀺 𑀅𑀬𑀼𑀢𑁆𑀢𑀁 𑀏𑀲𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀢𑀺𑀭𑀽𑀧’’𑀦𑁆𑀢𑀺, 𑀲𑀸𑀲𑀦𑁂 𑀞𑀺𑀢𑀸𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀬𑁄𑀕𑁆𑀕𑀁. 𑀓𑁄𑀳𑀜𑁆𑀜𑀁 𑀓𑀭𑁄𑀦𑁆𑀢𑁄𑀢𑀺 𑀘𑀻𑀯𑀭𑀼𑀧𑁆𑀧𑀸𑀤𑀦𑀦𑀺𑀫𑀺𑀢𑁆𑀢𑀁 𑀧𑀭𑁂𑀲𑀁 𑀓𑀼𑀳𑀦𑀁 𑀯𑀺𑀫𑁆𑀳𑀸𑀧𑀦𑀁 𑀓𑀭𑁄𑀦𑁆𑀢𑁄. 𑀉𑀢𑁆𑀢𑀲𑀢𑀻𑀢𑀺 𑀢𑀡𑁆𑀳𑀸𑀲𑀦𑁆𑀢𑀸𑀲𑁂𑀦 𑀉𑀧𑀭𑀽𑀧𑀭𑀺 𑀢𑀲𑀢𑀺. 𑀧𑀭𑀺𑀢𑀲𑁆𑀲𑀢𑀻𑀢𑀺 𑀧𑀭𑀺𑀢𑁄 𑀢𑀲𑁆𑀲𑀢𑀺. 𑀬𑀣𑀸 𑀲𑀩𑁆𑀩𑁂 𑀓𑀸𑀬𑀯𑀘𑀺𑀧𑁆𑀧𑀬𑁄𑀕𑀸 𑀢𑀤𑀢𑁆𑀣𑀸 𑀏𑀯 𑀚𑀸𑀬𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀪𑀸𑀕𑁂𑀳𑀺 𑀢𑀲𑀢𑀺. 𑀕𑀥𑀺𑀢𑀁 𑀯𑀼𑀘𑁆𑀘𑀢𑀺 𑀕𑀺𑀤𑁆𑀥𑁄, 𑀲𑁄 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀮𑀓𑁆𑀔𑀡𑁄 𑀅𑀥𑀺𑀧𑁆𑀧𑁂𑀢𑁄. 𑀕𑀥𑀺𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀅𑀕𑀥𑀺𑀢𑁄𑀢𑀺 𑀆𑀳 ‘‘𑀯𑀺𑀕𑀢𑀮𑁄𑀪𑀕𑀺𑀤𑁆𑀥𑁄’’𑀢𑀺. 𑀫𑀼𑀘𑁆𑀙𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀫𑀼𑀬𑁆𑀳𑀦𑀁. 𑀢𑀲𑁆𑀲 𑀲𑀫𑀼𑀲𑁆𑀲𑀬𑀲𑁆𑀲 𑀅𑀥𑀺𑀕𑀢𑀁 𑀅𑀦𑀸𑀧𑀦𑁆𑀦𑁄 𑀅𑀦𑀼𑀧𑀕𑀢𑁄. 𑀅𑀦𑁄𑀢𑁆𑀣𑀢𑁄 𑀅𑀦𑀚𑁆𑀛𑁄𑀢𑁆𑀣𑀢𑁄. 𑀅𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀢𑀡𑁆𑀳𑀘𑁆𑀙𑀤𑀦𑁂𑀦 𑀅𑀘𑁆𑀙𑀸𑀤𑀺𑀢𑁄. 𑀆𑀤𑀻𑀦𑀯𑀁 𑀧𑀲𑁆𑀲𑀫𑀸𑀦𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀤𑁄𑀲𑀁 𑀧𑀲𑁆𑀲𑀦𑁆𑀢𑁄. 𑀕𑀥𑀺𑀢𑀧𑀭𑀺𑀪𑁄𑀕𑀢𑁄 𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀇𑀤𑀫𑀝𑁆𑀞𑀺𑀓𑀢𑀸. 𑀢𑀁 𑀧𑀚𑀸𑀦𑀸𑀢𑀻𑀢𑀺 𑀦𑀺𑀲𑁆𑀲𑀭𑀡𑀧𑀜𑁆𑀜𑁄. 𑀢𑁂𑀦𑀸𑀳 ‘‘𑀬𑀸𑀯𑀤𑁂𑀯…𑀧𑁂… 𑀚𑀸𑀦𑀦𑁆𑀢𑁄’’𑀢𑀺.

𑀦𑁂𑀯𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 𑀅𑀢𑁆𑀢𑀸𑀦𑀁 𑀦𑁂𑀯 𑀉𑀓𑁆𑀓𑀁𑀲𑁂𑀢𑀺 𑀦 𑀉𑀓𑁆𑀔𑀺𑀧𑀢𑀺 𑀦 𑀉𑀓𑁆𑀓𑀝𑁆𑀞𑀢𑁄 𑀤𑀳𑀢𑀺. 𑀅𑀳𑀦𑁆𑀢𑀺𑀆𑀤𑀺 𑀉𑀓𑁆𑀓𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀦 𑀯𑀫𑁆𑀪𑁂𑀢𑀺 𑀦 𑀳𑀻𑀴𑁂𑀢𑀺 𑀦 𑀦𑀺𑀳𑀻𑀦𑀢𑁄 𑀤𑀳𑀢𑀺. 𑀢𑀲𑁆𑀫𑀺𑀁 𑀘𑀻𑀯𑀭𑀲𑀦𑁆𑀢𑁄𑀲𑁂𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀯𑀻𑀲𑀢𑀺𑀯𑀺𑀥𑁂 𑀘𑀻𑀯𑀭𑀲𑀦𑁆𑀢𑁄𑀲𑁂. 𑀓𑀸𑀫𑀜𑁆𑀘𑁂𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀦𑁆𑀢𑁄𑀲𑀕𑁆𑀕𑀳𑀡𑁂𑀦𑁂𑀯 𑀘𑀻𑀯𑀭𑀳𑁂𑀢𑀼 𑀅𑀦𑁂𑀲𑀦𑀸𑀧𑀚𑁆𑀚𑀦𑀸𑀤𑀺𑀧𑀺 𑀕𑀳𑀺𑀢𑀫𑁂𑀯 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲 𑀪𑀸𑀯𑀢𑁄, 𑀅𑀲𑀢𑀺 𑀘 𑀅𑀪𑀸𑀯𑀢𑁄. 𑀯𑀡𑁆𑀡𑀯𑀸𑀤𑀺𑀢𑀸𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀸𑀦𑀺 𑀧𑀦 𑀕𑀳𑀺𑀢𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 ‘‘𑀯𑀡𑁆𑀡𑀯𑀸𑀤𑀸𑀤𑀻𑀲𑀼 𑀯𑀸’’𑀢𑀺 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑀤𑀓𑁆𑀔𑁄𑀢𑀺𑀆𑀤𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑀦𑁆𑀢𑁄𑀲𑀸𑀤𑀻 𑀇𑀚𑁆𑀛𑀦𑁆𑀢𑀺, 𑀢𑀁𑀤𑀲𑁆𑀲𑀦𑀁. 𑀢𑀢𑁆𑀣 𑀤𑀓𑁆𑀔𑁄𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀲𑀫𑀼𑀝𑁆𑀞𑀸𑀧𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀺. 𑀅𑀦𑀮𑀲𑁄𑀢𑀺 𑀇𑀫𑀺𑀦𑀸 𑀧𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀁, 𑀲𑀫𑁆𑀧𑀚𑀸𑀦𑁄𑀢𑀺 𑀇𑀫𑀺𑀦𑀸 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀁, 𑀧𑀝𑀺𑀲𑁆𑀲𑀢𑁄𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀅𑀲𑀫𑁆𑀫𑁄𑀲𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀧𑀺𑀡𑁆𑀟𑀧𑀸𑀢𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀪𑁂𑀤𑀢𑁄 𑀧𑀺𑀡𑁆𑀟𑀧𑀸𑀢𑁄 𑀚𑀸𑀦𑀺𑀢𑀩𑁆𑀩𑁄. 𑀧𑀺𑀡𑁆𑀟𑀧𑀸𑀢𑀓𑁆𑀔𑁂𑀢𑁆𑀢𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑀧𑁆𑀧𑀪𑁂𑀤𑁄 𑀚𑀸𑀦𑀺𑀢𑀩𑁆𑀩𑁄. 𑀇𑀥 𑀪𑁂𑀲𑀚𑁆𑀚𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀕𑀢𑀺𑀓𑀫𑁂𑀯. 𑀆𑀳𑀭𑀺𑀢𑀩𑁆𑀩𑀢𑁄 𑀳𑀺 𑀲𑀧𑁆𑀧𑀺𑀆𑀤𑀻𑀦𑀫𑁆𑀧𑀺 𑀕𑀳𑀡𑀁 𑀓𑀢𑀁.

𑀧𑀺𑀡𑁆𑀟𑀧𑀸𑀢𑀓𑁆𑀔𑁂𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀔𑁂𑀢𑁆𑀢𑀁 𑀯𑀺𑀬 𑀔𑁂𑀢𑁆𑀢𑀁. 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀘 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀲𑀗𑁆𑀖𑀢𑁄 𑀯𑀸 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀺𑀡𑁆𑀟𑀧𑀸𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀤𑁆𑀤𑀺𑀲𑁆𑀲𑀯𑀲𑁂𑀦 𑀯𑀸. 𑀢𑀢𑁆𑀣 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁. 𑀓𑀢𑀺𑀧𑀬𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀤𑁆𑀤𑁂𑀲𑁂𑀦 𑀤𑀸𑀢𑀩𑁆𑀩𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁. 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁. 𑀲𑀮𑀸𑀓𑀸𑀬 𑀤𑀸𑀢𑀩𑁆𑀩𑀪𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀤𑀺𑀯𑀲𑀁 𑀤𑀸𑀢𑀩𑁆𑀩𑀪𑀢𑁆𑀢𑀁 𑀧𑀓𑁆𑀔𑀺𑀓𑀁. 𑀉𑀧𑁄𑀲𑀣𑁂 𑀉𑀧𑁄𑀲𑀣𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀉𑀧𑁄𑀲𑀣𑀺𑀓𑀁. 𑀧𑀸𑀝𑀺𑀧𑀤𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀧𑀸𑀝𑀺𑀧𑀤𑀺𑀓𑀁. 𑀆𑀕𑀦𑁆𑀢𑀼𑀓𑀸𑀦𑀁 𑀤𑀸𑀢𑀩𑁆𑀩𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁. 𑀥𑀼𑀭𑀕𑁂𑀳𑁂 𑀏𑀯 𑀞𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁. 𑀓𑀼𑀝𑀺𑀁 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀓𑀼𑀝𑀺𑀪𑀢𑁆𑀢𑀁. 𑀕𑀸𑀫𑀯𑀸𑀲𑀺𑀆𑀤𑀻𑀳𑀺 𑀯𑀸𑀭𑁂𑀦 𑀤𑀸𑀢𑀩𑁆𑀩𑀪𑀢𑁆𑀢𑀁 𑀯𑀸𑀭𑀪𑀢𑁆𑀢𑀁. 𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑁆𑀲 𑀤𑀸𑀢𑀩𑁆𑀩𑀪𑀢𑁆𑀢𑀁 𑀯𑀺𑀳𑀸𑀭𑀪𑀢𑁆𑀢𑀁. 𑀲𑁂𑀲𑀸𑀦𑀺 𑀧𑀸𑀓𑀝𑀸𑀦𑁂𑀯.

𑀯𑀺𑀢𑀓𑁆𑀓𑁂𑀢𑀺 ‘‘𑀓𑀢𑁆𑀣 𑀦𑀼 𑀔𑁄 𑀅𑀳𑀁 𑀅𑀚𑁆𑀚 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀻’’𑀢𑀺. ‘‘𑀲𑁆𑀯𑁂 𑀓𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫𑀸’’𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑁂 ‘‘𑀅𑀲𑀼𑀓𑀕𑀸𑀫𑁂, 𑀪𑀦𑁆𑀢𑁂’’𑀢𑀺 𑀓𑀸𑀫𑀫𑁂𑀢𑀁 𑀧𑀝𑀺𑀯𑀘𑀦𑀤𑀸𑀦𑀁, 𑀬𑁂𑀦 𑀧𑀦 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀯𑀼𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀢𑀓𑀁 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀢𑁆𑀯𑀸 𑀯𑀺𑀢𑀓𑁆𑀓𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀢𑀢𑁄 𑀧𑀭𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀅𑀭𑀺𑀬𑀯𑀁𑀲𑀸 𑀘𑀼𑀢𑁄 𑀳𑁄𑀢𑀻𑀢𑀺 𑀇𑀤𑀁 𑀢𑀺𑀡𑁆𑀡𑀫𑁆𑀧𑀺 𑀅𑀭𑀺𑀬𑀯𑀁𑀲𑀺𑀓𑀸𑀦𑀁 𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀦 𑀏𑀓𑀘𑀸𑀭𑀺𑀓𑀲𑁆𑀲𑁂𑀯. 𑀲𑀩𑁆𑀩𑁄𑀧𑀺 𑀳𑀺 𑀅𑀭𑀺𑀬𑀯𑀁𑀲𑀺𑀓𑁄 𑀏𑀓𑀯𑀸𑀭𑀫𑁂𑀯 𑀯𑀺𑀢𑀓𑁆𑀓𑁂𑀢𑀼𑀁 𑀮𑀪𑀢𑀺, 𑀦 𑀢𑀢𑁄 𑀧𑀭𑀁. 𑀧𑀭𑀺𑀩𑀸𑀳𑀺𑀭𑁄𑀢𑀺 𑀅𑀭𑀺𑀬𑀯𑀁𑀲𑀺𑀓𑀪𑀸𑀯𑀢𑁄 𑀩𑀳𑀺𑀪𑀽𑀢𑁄. 𑀲𑁆𑀯𑀸𑀬𑀁 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀦 𑀓𑀼𑀧𑁆𑀧𑀢𑀺 𑀯𑀺𑀲𑀼𑀚𑁆𑀛𑀢𑀺 𑀘. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄. 𑀬𑀸𑀧𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀕𑁆𑀕𑀳𑀡𑁂. 𑀅𑀧𑁆𑀧𑀦𑁆𑀢𑀺 𑀅𑀢𑁆𑀢𑀦𑁄 𑀬𑀸𑀧𑀦𑀧𑁆𑀧𑀫𑀸𑀡𑀢𑁄𑀧𑀺 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁 𑀤𑀸𑀬𑀓𑀲𑁆𑀲 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁. 𑀧𑀫𑀸𑀡𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦𑁂𑀯 𑀅𑀧𑁆𑀧𑀁 𑀕𑀳𑁂𑀢𑀩𑁆𑀩𑀁. 𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀕𑁆𑀕𑀳𑀡𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀓𑁆𑀔𑁂𑀢𑀻𑀢𑀺 𑀯𑀺𑀤𑁆𑀥𑀁𑀲𑁂𑀢𑀺 𑀅𑀧𑀦𑁂𑀢𑀺. 𑀯𑀺𑀦𑀺𑀧𑀸𑀢𑁂𑀢𑀺 𑀯𑀺𑀦𑀸𑀲𑁂𑀢𑀺 𑀅𑀝𑁆𑀞𑀸𑀦𑀯𑀺𑀦𑀺𑀬𑁄𑀕𑁂𑀦. 𑀲𑀸𑀲𑀦𑀦𑁆𑀢𑀺 𑀲𑀢𑁆𑀣𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀦 𑀓𑀭𑁄𑀢𑀺 𑀦 𑀧𑀝𑀺𑀧𑀚𑁆𑀚𑀢𑀺. 𑀲𑀧𑀤𑀸𑀦𑀘𑀸𑀭𑀺𑀦𑀸 𑀯𑀺𑀬 𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀘𑀭𑀡𑀁 𑀮𑁄𑀮𑀼𑀧𑁆𑀧𑀯𑀺𑀯𑀚𑁆𑀚𑀦𑀲𑀦𑁆𑀢𑁄𑀲𑁄𑀢𑀺 𑀆𑀳 ‘‘𑀤𑁆𑀯𑀸𑀭𑀧𑀝𑀺𑀧𑀸𑀝𑀺𑀬𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺.

𑀳𑀭𑀸𑀧𑁂𑀢𑁆𑀯𑀸𑀢𑀺 𑀅𑀥𑀺𑀓𑀁 𑀅𑀧𑀦𑁂𑀢𑁆𑀯𑀸. 𑀆𑀳𑀸𑀭𑀕𑁂𑀥𑀢𑁄 𑀦𑀺𑀲𑁆𑀲𑀭𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁. 𑀚𑀺𑀖𑀘𑁆𑀙𑀸𑀬 𑀧𑀝𑀺𑀯𑀺𑀦𑁄𑀤𑀦𑀢𑁆𑀣𑀁 𑀓𑀢𑀸, 𑀓𑀸𑀬𑀲𑁆𑀲 𑀞𑀺𑀢𑀺𑀆𑀤𑀺𑀧𑀬𑁄𑀚𑀦𑀁 𑀧𑀦 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀆𑀕𑀢𑀫𑁂𑀯𑀸𑀢𑀺 𑀆𑀳 ‘‘𑀚𑀺𑀖𑀘𑁆𑀙𑀸𑀬…𑀧𑁂… 𑀲𑀦𑁆𑀢𑁄𑀲𑁄 𑀦𑀸𑀫𑀸’’𑀢𑀺. 𑀦𑀺𑀤𑀳𑀺𑀢𑁆𑀯𑀸 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀤𑀳𑀼𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀢𑁆𑀣 𑀧𑀦 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀯𑀸𑀭𑀺𑀢𑀁. 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀺𑀢𑁂𑀦𑀸𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀪𑁄𑀕𑀺𑀪𑀸𑀯𑁂 𑀞𑀺𑀢𑁂𑀦.

𑀲𑁂𑀦𑀸𑀲𑀦𑁂𑀦𑀸𑀢𑀺 𑀲𑀬𑀦𑁂𑀦 𑀆𑀲𑀦𑁂𑀦 𑀘. 𑀬𑀢𑁆𑀣 𑀬𑀢𑁆𑀣 𑀳𑀺 𑀫𑀜𑁆𑀘𑀸𑀤𑀺𑀓𑁂 𑀯𑀺𑀳𑀸𑀭𑀸𑀤𑀺𑀓𑁂 𑀘 𑀲𑁂𑀢𑀺, 𑀢𑀁 𑀲𑁂𑀦𑀁. 𑀬𑀢𑁆𑀣 𑀬𑀢𑁆𑀣 𑀧𑀻𑀞𑀸𑀤𑀺𑀓𑁂 𑀆𑀲𑀢𑀺, 𑀢𑀁 𑀆𑀲𑀦𑀁. 𑀢𑀤𑀼𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀲𑁂𑀦𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀫𑀜𑁆𑀘𑁄’’𑀢𑀺𑀆𑀤𑀺. 𑀢𑀢𑁆𑀣 𑀫𑀜𑁆𑀘𑁄 𑀫𑀲𑀸𑀭𑀓𑀸𑀤𑀺. 𑀢𑀣𑀸 𑀧𑀻𑀞𑀁. 𑀫𑀜𑁆𑀘𑀪𑀺𑀲𑀺, 𑀧𑀻𑀞𑀪𑀺𑀲𑀻𑀢𑀺 𑀤𑀼𑀯𑀺𑀥𑁄 𑀪𑀺𑀲𑀺. 𑀯𑀺𑀳𑀸𑀭𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀆𑀯𑀸𑀲𑁄, ‘‘𑀤𑀻𑀖𑀫𑀼𑀔𑀧𑀸𑀲𑀸𑀤𑁄’’𑀢𑀺 𑀓𑁂𑀘𑀺. 𑀅𑀟𑁆𑀠𑀬𑁄𑀕𑁄 𑀤𑀻𑀖𑀧𑀸𑀲𑀸𑀤𑁄, ‘‘𑀏𑀓𑀧𑀲𑁆𑀲𑀘𑁆𑀙𑀸𑀤𑀦𑀓𑀲𑁂𑀦𑀸𑀲𑀦’’𑀦𑁆𑀢𑀺 𑀓𑁂𑀘𑀺. 𑀧𑀸𑀲𑀸𑀤𑁄𑀢𑀺 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄, ‘‘𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄’’𑀢𑀺 𑀓𑁂𑀘𑀺. 𑀳𑀫𑁆𑀫𑀺𑀬𑀦𑁆𑀢𑀺 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀕𑀼𑀳𑀸𑀢𑀺 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀮𑁂𑀡𑀁 𑀤𑁆𑀯𑀸𑀭𑀩𑀦𑁆𑀥𑀁. 𑀅𑀝𑁆𑀝𑁄 𑀩𑀳𑀮𑀪𑀺𑀢𑁆𑀢𑀺𑀓𑀕𑁂𑀳𑀁, 𑀬𑀲𑁆𑀲 𑀕𑁄𑀧𑀸𑀦𑀲𑀺𑀬𑁄 𑀅𑀕𑁆𑀕𑀳𑁂𑀢𑁆𑀯𑀸 𑀇𑀝𑁆𑀞𑀓𑀸𑀳𑀺 𑀏𑀯 𑀙𑀤𑀦𑀁 𑀳𑁄𑀢𑀺, ‘‘𑀅𑀝𑁆𑀝𑀮𑀸𑀓𑀸𑀭𑁂𑀦 𑀓𑀭𑀻𑀬𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀅𑀦𑁂𑀓𑀓𑁄𑀡𑁄 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑁄, ‘‘𑀯𑀝𑁆𑀝𑀸𑀓𑀸𑀭𑁂𑀦 𑀓𑀢𑀲𑁂𑀦𑀸𑀲𑀦’’𑀦𑁆𑀢𑀺 𑀓𑁂𑀘𑀺.

𑀧𑀺𑀡𑁆𑀟𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀸𑀤𑀓𑁄 𑀪𑀺𑀓𑁆𑀔𑀼 ‘𑀅𑀳𑀁 𑀓𑀢𑁆𑀣 𑀯𑀲𑀺𑀲𑁆𑀲𑀸𑀫𑀻’𑀢𑀺 𑀯𑀺𑀢𑀓𑁆𑀓𑁂𑀢𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀧𑀺𑀡𑁆𑀟𑀧𑀸𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. ‘‘𑀢𑀢𑁄 𑀧𑀭𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀅𑀭𑀺𑀬𑀯𑀁𑀲𑀸 𑀘𑀼𑀢𑁄 𑀳𑁄𑀢𑀺 𑀧𑀭𑀺𑀩𑀸𑀳𑀺𑀭𑁄, 𑀲𑁂𑀦𑀸𑀲𑀦𑀁 𑀓𑀼𑀳𑀺𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀘 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀕𑀺𑀮𑀸𑀦𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀦 𑀕𑀳𑀺𑀢𑁄𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀺𑀮𑀸𑀦𑀧𑀘𑁆𑀘𑀬𑁄 𑀧𑀦 𑀧𑀺𑀡𑁆𑀟𑀧𑀸𑀢𑁂 𑀏𑀯 𑀧𑀯𑀺𑀝𑁆𑀞𑁄’’𑀢𑀺 𑀆𑀳, 𑀆𑀳𑀭𑀺𑀢𑀩𑁆𑀩𑀢𑀸𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀢𑀢𑁆𑀣𑀸𑀧𑀺 𑀧𑀺𑀡𑁆𑀟𑀧𑀸𑀢𑁂 𑀯𑀺𑀬 𑀯𑀺𑀢𑀓𑁆𑀓𑀲𑀦𑁆𑀢𑁄𑀲𑀸𑀤𑀬𑁄𑀧𑀺 𑀧𑀦𑁆𑀦𑀭𑀲 𑀲𑀦𑁆𑀢𑁄𑀲𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺? 𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀦𑀦𑀼 𑀘𑁂𑀢𑁆𑀣 𑀤𑁆𑀯𑀸𑀤𑀲𑁂𑀯 𑀥𑀼𑀢𑀗𑁆𑀕𑀸𑀦𑀺 𑀯𑀺𑀦𑀺𑀬𑁄𑀕𑀁 𑀕𑀢𑀸𑀦𑀺, 𑀏𑀓𑀁 𑀧𑀦 𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀦 𑀓𑀢𑁆𑀣𑀘𑀺 𑀯𑀺𑀦𑀺𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑀁 𑀪𑀚𑀢𑀻’’𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀭𑀼𑀴𑁆𑀳𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀣𑀯𑀺𑀁 𑀧𑀢𑁆𑀣𑀭𑀫𑀸𑀦𑁄 𑀯𑀺𑀬𑀸𑀢𑀺𑀆𑀤𑀺 𑀅𑀭𑀺𑀬𑀯𑀁𑀲𑀤𑁂𑀲𑀦𑀸𑀬 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀁 𑀫𑀳𑀸𑀯𑀺𑀲𑀬𑀢𑁆𑀢𑀸 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀬𑀲𑁆𑀫𑀸 𑀦𑀬𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀁 𑀳𑁄𑀢𑀺, 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀯𑀺𑀢𑁆𑀣𑀸𑀭𑀢𑁄 𑀧𑀯𑀢𑁆𑀢𑀺𑀬𑀫𑀸𑀦𑀸 𑀤𑁂𑀲𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀅𑀬𑀜𑁆𑀘 𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑀓𑀣𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀯𑀺𑀢𑁆𑀣𑀸𑀭𑀢𑁄 𑀧𑀯𑀢𑁆𑀢𑀺𑀬𑀫𑀸𑀦𑀸 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑀁…𑀧𑁂… 𑀤𑁂𑀲𑀦𑀁 𑀆𑀭𑀪𑀻’’𑀢𑀺.

𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀢𑁄 𑀅𑀪𑀺𑀫𑀼𑀔𑀪𑀸𑀯𑁂𑀦 𑀭𑀫𑀡𑀁 𑀆𑀭𑀫𑀡𑀁 𑀆𑀭𑀸𑀫𑁄𑀢𑀺 𑀆𑀳 ‘‘𑀅𑀪𑀺𑀭𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀧𑀤𑀸𑀦𑀁 𑀯𑀲𑁂𑀦 𑀪𑀯𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀬𑀣𑀸 ‘‘𑀉𑀭𑀲𑀺𑀮𑁄𑀫𑁄 𑀓𑀡𑁆𑀞𑁂𑀓𑀸𑀴𑁄’’𑀢𑀺 𑀆𑀳 ‘‘𑀪𑀸𑀯𑀦𑀸𑀬 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀪𑀸𑀯𑀦𑀸𑀭𑀸𑀫𑁄’’𑀢𑀺. 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀯𑀸 𑀆𑀭𑀸𑀫𑁄, 𑀪𑀸𑀯𑀦𑀸 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀪𑀸𑀯𑀦𑀸𑀭𑀸𑀫𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀲𑀫𑀸𑀲𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀸𑀯𑁂𑀦𑁆𑀢𑁄 𑀭𑀫𑀢𑀻𑀢𑀺 𑀏𑀢𑁂𑀦 𑀪𑀸𑀯𑀦𑀸𑀭𑀸𑀫𑀲𑀤𑁆𑀤𑀸𑀦𑀁 𑀓𑀢𑁆𑀢𑀼𑀲𑀸𑀥𑀦𑀢𑀁 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀢𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀧𑀚𑀳𑀦𑁆𑀢𑁄 𑀭𑀫𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀳𑀸𑀦𑀸𑀭𑀸𑀫𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀓𑀸𑀫𑀁 ‘‘𑀦𑁂𑀲𑀚𑁆𑀚𑀺𑀓𑀗𑁆𑀕𑀁 𑀪𑀸𑀯𑀦𑀸𑀭𑀸𑀫𑀅𑀭𑀺𑀬𑀯𑀁𑀲𑀁 𑀪𑀚𑀢𑀻’’𑀢𑀺 𑀯𑀼𑀢𑁆𑀢𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸, 𑀦𑁂𑀲𑀚𑁆𑀚𑀺𑀓𑀗𑁆𑀕𑀯𑀲𑁂𑀦 𑀧𑀦 𑀦𑁂𑀲𑀚𑁆𑀚𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑀘𑁆𑀘𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀺𑀪𑀸𑀯𑁄𑀢𑀺 𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 ‘‘𑀢𑁂𑀭𑀲𑀦𑁆𑀦𑀁 𑀥𑀼𑀢𑀗𑁆𑀕𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀦𑀬𑀁 𑀧𑀢𑁆𑀯𑀸 𑀕𑀭𑀼𑀓𑁂 𑀞𑀸𑀢𑀩𑁆𑀩𑀦𑁆𑀢𑀺 𑀇𑀘𑁆𑀙𑀺𑀢𑀢𑁆𑀢𑀸 𑀲𑀮𑁆𑀮𑁂𑀔𑀲𑁆𑀲 𑀅𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀯𑀺𑀦𑀬𑁂 𑀞𑀺𑀢𑀲𑁆𑀲𑁂𑀯𑀸𑀢𑀺 𑀆𑀳 ‘‘𑀢𑁂𑀭𑀲𑀦𑁆𑀦𑀁…𑀧𑁂… 𑀓𑀣𑀺𑀢𑀁 𑀳𑁄𑀢𑀻’’𑀢𑀺. 𑀓𑀸𑀫𑀁 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑁂𑀲𑀼𑀧𑀺 𑀢𑀢𑁆𑀣 𑀢𑀢𑁆𑀣 𑀲𑀻𑀮𑀓𑀣𑀸 𑀆𑀳𑀝𑀸𑀬𑁂𑀯, 𑀬𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀲𑀻𑀮𑀲𑁆𑀲 𑀯𑁄𑀤𑀸𑀦𑀁 𑀳𑁄𑀢𑀺, 𑀢𑁂𑀲𑀼 𑀓𑀣𑀺𑀢𑁂𑀲𑀼 𑀬𑀣𑀸 𑀲𑀻𑀮𑀓𑀣𑀸𑀩𑀸𑀳𑀼𑀮𑁆𑀮𑀁 𑀯𑀺𑀦𑀬𑀧𑀺𑀝𑀓𑀁 𑀓𑀣𑀺𑀢𑀁 𑀳𑁄𑀢𑀺, 𑀏𑀯𑀁 𑀪𑀸𑀯𑀦𑀸𑀓𑀣𑀸𑀩𑀸𑀳𑀼𑀮𑁆𑀮𑀁 𑀲𑀼𑀢𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀜𑁆𑀘 𑀘𑀢𑀼𑀢𑁆𑀣𑁂𑀦 𑀅𑀭𑀺𑀬𑀯𑀁𑀲𑁂𑀦 𑀓𑀣𑀺𑀢𑁂𑀦 𑀓𑀣𑀺𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀯𑀦𑀸𑀭𑀸𑀫𑁂𑀦 𑀅𑀯𑀲𑁂𑀲𑀁 𑀧𑀺𑀝𑀓𑀤𑁆𑀯𑀬𑀁 𑀓𑀣𑀺𑀢’’𑀦𑁆𑀢𑀺. ‘‘𑀲𑁄 𑀦𑁂𑀓𑁆𑀔𑀫𑁆𑀫𑀁 𑀪𑀸𑀯𑁂𑀦𑁆𑀢𑁄 𑀭𑀫𑀢𑀻’’𑀢𑀺 𑀦𑁂𑀓𑁆𑀔𑀫𑁆𑀫𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀥𑀫𑁆𑀫𑀸𑀦𑀁 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀫𑀦𑁂𑀦 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀺𑀢𑀸𑀦𑀁 𑀢𑀢𑁆𑀣 𑀆𑀕𑀢𑀢𑁆𑀢𑀸 𑀲𑁄 𑀧𑀸𑀞𑁄 𑀦𑁂𑀓𑁆𑀔𑀫𑁆𑀫𑀧𑀸𑀴𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑁂𑀓𑁆𑀔𑀫𑀧𑀸𑀴𑀺𑀬𑀸 𑀓𑀣𑁂𑀢𑀩𑁆𑀩𑁄’’𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑀸, 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀯𑀼𑀘𑁆𑀘𑀭𑁂’’𑀢𑀺. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑀥𑀫𑁆𑀫𑁂𑀦 (𑀤𑀻. 𑀦𑀺. 𑁩.𑁩𑁫𑁦 𑀆𑀤𑀬𑁄) 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑁂 𑀆𑀕𑀢𑀦𑀬𑁂𑀦𑀸𑀢𑀺 𑀯𑀸 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑁄𑀢𑀺 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼. 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀓𑀸𑀫𑁂𑀳𑀺 𑀦𑀺𑀓𑁆𑀔𑀦𑁆𑀢𑀪𑀸𑀯𑀢𑁄 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀺𑀢𑀁 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑀁, 𑀲𑁄 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀆𑀕𑀢𑁄. 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 ‘‘𑀅𑀩𑁆𑀬𑀸𑀧𑀸𑀤’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀉𑀧𑀸𑀬𑀸𑀦𑀜𑁆𑀳𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀯𑀺𑀧𑀲𑁆𑀲𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀜𑁆𑀘 𑀯𑀲𑁂𑀦𑁂𑀢𑁆𑀣 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺. 𑀢𑀢𑁆𑀣 𑀅𑀩𑁆𑀬𑀸𑀧𑀸𑀤𑀦𑁆𑀢𑀺 𑀫𑁂𑀢𑁆𑀢𑀸. 𑀆𑀮𑁄𑀓𑀲𑀜𑁆𑀜𑀦𑁆𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀚𑀸𑀦𑀦𑀁. 𑀅𑀯𑀺𑀓𑁆𑀔𑁂𑀧𑀦𑁆𑀢𑀺 𑀲𑀫𑀸𑀥𑀺𑀁. 𑀥𑀫𑁆𑀫𑀯𑀯𑀢𑁆𑀣𑀸𑀦𑀦𑁆𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀦𑀺𑀘𑁆𑀙𑀬𑀁, ‘‘𑀲𑀧𑀘𑁆𑀘𑀬𑀦𑀸𑀫𑀯𑀯𑀢𑁆𑀣𑀸𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀸𑀯𑀦𑀸𑀭𑀸𑀫𑀢𑀁 𑀧𑀳𑀸𑀦𑀸𑀭𑀸𑀫𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀉𑀧𑀸𑀬𑁂𑀦 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀘 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀡𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀜𑁆𑀳𑀺 𑀯𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺. 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀦𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦 𑀢𑀢𑁆𑀣 𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀁 𑀅𑀭𑀢𑀺𑀯𑀺𑀦𑁄𑀤𑀦𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀉𑀧𑀸𑀬𑁄. 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀧𑀦 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸𑀦𑀻𑀯𑀭𑀡𑁂𑀲𑀼 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀤𑀼𑀓𑁆𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀲𑀼𑀔𑀁 𑀧𑀳𑀻𑀬𑀢𑀺, 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀼𑀔𑀤𑀼𑀓𑁆𑀔𑁂’’𑀢𑀺.

𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀘 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀸 𑀲𑀲𑁆𑀲𑀢𑀸𑀢𑀺 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀲𑀜𑁆𑀜𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀅𑀦𑀼𑀧𑀲𑁆𑀲𑀦𑀁. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀅𑀦𑀼𑀧𑀲𑁆𑀲𑀦𑀁. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀁. ‘‘𑀢𑁂 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀲𑀫𑀼𑀤𑀬𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀻’’𑀢𑀺. 𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁. 𑀆𑀤𑀸𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀁. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀭𑀡𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀦𑁆𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀁.

𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀽𑀳𑀖𑀦𑀯𑀲𑁂𑀦, 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀢𑀁. 𑀧𑀡𑀺𑀥𑀺𑀦𑁆𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀁. 𑀲𑀸 𑀧𑀦𑀢𑁆𑀣𑀢𑁄 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀸. 𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺. 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀲𑀸𑀭𑁂 𑀲𑀸𑀭𑀦𑁆𑀢𑀺 𑀕𑀳𑀡𑀯𑀺𑀧𑀮𑁆𑀮𑀸𑀲𑀁. ‘‘𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄. 𑀓𑁂𑀘𑀺 𑀧𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀧𑀯𑀢𑁆𑀢𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀢𑀸𑀡𑀮𑁂𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁬𑁪, 𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭, 𑁮) 𑀘 𑀯𑀘𑀦𑀢𑁄 𑀆𑀮𑀬𑁄 𑀢𑀡𑁆𑀳𑀸, 𑀲𑀸𑀬𑁂𑀯 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑁂𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. 𑀏𑀯𑀁 𑀞𑀺𑀢𑀸 𑀢𑁂 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀕𑁄𑀢𑁆𑀭𑀪𑀼. 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀯𑁂𑀲𑀦𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂 𑀧𑀳𑀸𑀦𑁂𑀓𑀝𑁆𑀞𑁂 𑀘. 𑀑𑀴𑀸𑀭𑀺𑀓𑁂𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺𑀧𑀺 𑀑𑀴𑀸𑀭𑀺𑀓𑀸𑀢𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂. 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑁂𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂. 𑀦 𑀳𑀺 𑀧𑀞𑀫𑀸𑀤𑀺𑀫𑀕𑁆𑀕𑁂𑀳𑀺𑀧𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀻𑀢𑀺.

𑀏𑀯𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪𑁧, 𑁯𑁫) 𑀦𑁂𑀓𑁆𑀔𑀫𑁆𑀫𑀧𑀸𑀴𑀺𑀬𑀸 𑀬𑁄𑀚𑀦𑀁 𑀦𑀺𑀕𑀫𑁂𑀢𑁆𑀯𑀸 𑀤𑀻𑀖𑀦𑀺𑀓𑀸𑀬𑁂𑀢𑀺𑀆𑀤𑀺𑀦𑀸 𑀤𑀲𑀼𑀢𑁆𑀢𑀭𑀧𑀭𑀺𑀬𑀸𑀬𑁂𑀦 (𑀤𑀻. 𑀦𑀺. 𑁩.𑁩𑁫𑁦 𑀆𑀤𑀬𑁄) 𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀏𑀓𑀁 𑀥𑀫𑁆𑀫𑀁 𑀪𑀸𑀯𑁂𑀦𑁆𑀢𑁄 𑀭𑀫𑀢𑀺, 𑀏𑀓𑀁 𑀥𑀫𑁆𑀫𑀁 𑀧𑀚𑀳𑀦𑁆𑀢𑁄 𑀭𑀫𑀢𑀻𑀢𑀺 𑀘 𑀦𑀬𑀺𑀤𑀁 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁩𑁫𑁦 𑀆𑀤𑀬𑁄) 𑀆𑀕𑀢𑀦𑀺𑀬𑀸𑀫𑁂𑀦 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀦 ‘‘𑀏𑀓𑁄 𑀥𑀫𑁆𑀫𑁄 𑀪𑀸𑀯𑁂𑀢𑀩𑁆𑀩𑁄, 𑀏𑀓𑁄 𑀥𑀫𑁆𑀫𑁄 𑀧𑀳𑀸𑀢𑀩𑁆𑀩𑁄’’𑀢𑀺 𑀤𑁂𑀲𑀦𑀸 𑀆𑀕𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀪𑁂𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪𑁧, 𑁯𑁫) 𑀦𑁂𑀓𑁆𑀔𑀫𑁆𑀫𑀧𑀸𑀴𑀺𑀬𑀁 𑀆𑀕𑀢𑀦𑀻𑀳𑀸𑀭𑁂𑀦𑁂𑀯 ‘‘𑀏𑀓𑀁 𑀥𑀫𑁆𑀫𑀁 𑀪𑀸𑀯𑁂𑀦𑁆𑀢𑁄 𑀭𑀫𑀢𑀺, 𑀏𑀓𑀁 𑀥𑀫𑁆𑀫𑀁 𑀧𑀚𑀳𑀦𑁆𑀢𑁄 𑀭𑀫𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑀯𑀸𑀭𑁂𑀲𑀼𑀧𑀺.

𑀏𑀯𑀦𑁆𑀢𑀺𑀆𑀤𑀺𑀦𑀸 𑀤𑀲𑀼𑀢𑁆𑀢𑀭𑀧𑀭𑀺𑀬𑀸𑀬𑁂𑀦 (𑀤𑀻. 𑀦𑀺. 𑁩.𑁩𑁫𑁦 𑀆𑀤𑀬𑁄) 𑀬𑁄𑀚𑀦𑀁 𑀦𑀺𑀕𑀫𑁂𑀢𑁆𑀯𑀸 𑀇𑀤𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 (𑀫. 𑀦𑀺. 𑁧.𑁧𑁦𑁫 𑀆𑀤𑀬𑁄) 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀚𑁆𑀛𑀺𑀫𑀦𑀺𑀓𑀸𑀬𑁂’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀲𑀁𑀔𑀺𑀧𑀺𑀢𑁆𑀯𑀸 𑀬𑁄𑀚𑀦𑀸 𑀓𑀢𑀸, 𑀏𑀓𑀯𑀻𑀲𑀢𑀺𑀬𑀸 𑀧𑀦 𑀞𑀸𑀦𑀸𑀦𑀁 𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀤𑀸𑀦𑀺 𑀅𑀪𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑁂𑀲𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁬𑁯𑁮; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁬𑁯𑁮) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀉𑀓𑁆𑀓𑀡𑁆𑀞𑀺𑀢𑀦𑁆𑀢𑀺 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀘 𑀉𑀓𑁆𑀓𑀡𑁆𑀞𑀸𑀤𑀺𑀜𑁆𑀘, 𑀅𑀦𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀯𑀁𑀲𑀧𑀽𑀭𑀓𑁄 𑀥𑀻𑀭𑁄 𑀲𑀻𑀮𑀯𑀸 𑀪𑀺𑀓𑁆𑀔𑀼 𑀅𑀭𑀺𑀬𑀯𑀁𑀲𑀧𑀭𑀺𑀧𑀽𑀭𑀡𑀲𑁆𑀲 𑀪𑁂𑀤𑀁 𑀅𑀦𑀺𑀘𑁆𑀙𑀦𑁆𑀢𑁄 𑀲𑀫𑀸𑀳𑀺𑀢𑁄 𑀯𑀺𑀧𑀲𑁆𑀲𑀓𑁄 𑀘 𑀧𑀘𑁆𑀘𑀬𑀖𑀸𑀢𑁂𑀦 𑀅𑀭𑀢𑀺𑀬𑀸 𑀭𑀢𑀺𑀬𑀸 𑀘 𑀲𑀳𑀺𑀢𑀸 𑀅𑀪𑀺𑀪𑀯𑀺𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀭𑀢𑀺𑀭𑀢𑀺𑀲𑀳𑁄, 𑀪𑀺𑀓𑁆𑀔𑀯𑁂, 𑀥𑀻𑀭𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.