𑁧𑁦-𑁧𑁧. 𑀲𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁪𑁧-𑁨. 𑀤𑀲𑀫𑁂 𑀲𑁂𑀲𑀧𑀤𑁂𑀲𑀼𑀧𑀻𑀢𑀺 ‘‘𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺𑀆𑀤𑀻𑀲𑀼 𑀲𑁂𑀲𑀧𑀤𑁂𑀲𑀼𑀧𑀺. 𑀬𑀣𑀸 𑀳𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁨𑁭𑁧, 𑁨𑁮𑁭, 𑁨𑁯𑁭; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀏𑀢𑁆𑀣 𑀓𑀢𑁄 𑀦𑀺𑀬𑀫𑁄 ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻’’𑀢𑀺 𑀏𑀢𑁆𑀣𑀸𑀧𑀺 𑀓𑀢𑁄𑀬𑁂𑀯 𑀳𑁄𑀢𑀺 𑀲𑀸𑀯𑀥𑀸𑀭𑀡𑀅𑀢𑁆𑀣𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺. 𑀢𑁂𑀦𑀸𑀳 ‘‘𑀤𑀼𑀢𑀺𑀬𑀸𑀤𑀬𑁄𑀧𑀺 𑀳𑀻’’𑀢𑀺𑀆𑀤𑀺. 𑀲𑀸𑀫𑀜𑁆𑀜𑀨𑀮𑀸𑀥𑀺𑀕𑀫𑀯𑀲𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀫𑀡𑀪𑀸𑀯𑁄𑀢𑀺 𑀢𑁂𑀲𑀁 𑀯𑀲𑁂𑀦𑁂𑀢𑁆𑀣 𑀘𑀢𑁆𑀢𑀸𑀭𑁄 𑀲𑀫𑀡𑀸 𑀤𑁂𑀲𑀺𑀢𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀓𑀲𑀫𑀡𑀸𑀯 𑀅𑀥𑀺𑀧𑁆𑀧𑁂𑀢𑀸 𑀲𑀫𑀺𑀢𑀧𑀸𑀧𑀲𑀫𑀡𑀕𑁆𑀕𑀳𑀡𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀺𑀬 𑀫𑀕𑁆𑀕𑀝𑁆𑀞𑀸 𑀢𑀤𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀸𑀧𑀺 𑀦 𑀕𑀳𑀺𑀢𑀸𑀢𑀺? 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄. 𑀢𑀢𑁆𑀣 𑀳𑀺 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀸𑀧𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀦𑀢𑁆𑀣𑀺, 𑀓𑀼𑀢𑁄 𑀫𑀕𑁆𑀕𑀨𑀮𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑁂𑀲𑀯𑀢𑁆𑀢𑀻, 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄𑀧𑀺 𑀦𑀢𑁆𑀣𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪) 𑀯𑀼𑀢𑁆𑀢𑀁. 𑀇𑀥 𑀧𑀦 𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀫𑁂𑀯 𑀢𑀁𑀢𑀁𑀲𑀫𑀡𑀪𑀸𑀯𑀁 𑀕𑀡𑁆𑀳𑀦𑁆𑀢𑁂𑀦 𑀨𑀮𑀝𑁆𑀞𑀓𑀲𑀫𑀡𑀸𑀯 𑀕𑀳𑀺𑀢𑀸, 𑀫𑀕𑁆𑀕𑀝𑁆𑀞𑀢𑁄 𑀨𑀮𑀝𑁆𑀞𑁄 𑀲𑀯𑀺𑀲𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑁄𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀤𑁂𑀲𑀦𑀸𑀪𑁂𑀤𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀭𑀺𑀢𑁆𑀢𑀸𑀢𑀺 𑀯𑀺𑀯𑀺𑀢𑁆𑀢𑀸. 𑀢𑀼𑀘𑁆𑀙𑀸𑀢𑀺 𑀦𑀺𑀲𑁆𑀲𑀸𑀭𑀸 𑀧𑀝𑀺𑀧𑀦𑁆𑀦𑀓𑀲𑀸𑀭𑀸𑀪𑀸𑀯𑀢𑁄.

𑀧𑀯𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀧𑀯𑀸𑀤𑀸. 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀦𑀸𑀦𑀸𑀤𑀺𑀝𑁆𑀞𑀺𑀤𑀻𑀧𑀓𑀲𑀫𑀬𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸𑀢𑀺 𑀮𑀸𑀪𑀺𑀯𑀲𑁂𑀦 𑀢𑀬𑁄, 𑀢𑀓𑁆𑀓𑀺𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻 𑀢𑀺𑀢𑁆𑀣𑀺𑀬𑁄 𑀫𑀦𑁆𑀤𑀧𑀜𑁆𑀜𑁄 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀫𑀚𑁆𑀛𑀧𑀜𑁆𑀜𑁄 𑀤𑀲 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸𑀦𑀺, 𑀢𑀺𑀓𑁆𑀔𑀧𑀜𑁆𑀜𑁄 𑀘𑀢𑁆𑀢𑀸𑀮𑀻𑀲 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸𑀦𑀺, 𑀦 𑀢𑀢𑁄 𑀧𑀭𑀁. 𑀲𑁄 𑀏𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀅𑀪𑀺𑀯𑀤𑀢𑀺, 𑀢𑀓𑁆𑀓𑀻 𑀧𑀦 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀅𑀪𑀺𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀸𑀪𑀺𑀯𑀲𑁂𑀦 𑀢𑀬𑁄, 𑀢𑀓𑁆𑀓𑀺𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸’’𑀢𑀺.

𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀏𑀓𑀘𑁆𑀘𑀁 𑀲𑀲𑁆𑀲𑀢𑀦𑁆𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄. 𑀲𑁄 𑀧𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀫𑀦𑁄𑀧𑀤𑁄𑀲𑀺𑀓𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 𑀇𑀥𑀸𑀕𑀢𑀸𑀦𑀁 𑀢𑀓𑁆𑀓𑀺𑀦𑁄 𑀘 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸’’𑀢𑀺.

𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸𑀢𑀺 𑀏𑀢𑁆𑀣 𑀅𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣 𑀯𑁄𑀲𑀸𑀦𑀦𑁆𑀢𑀺 𑀅𑀦𑁆𑀢𑁄, 𑀫𑀭𑀺𑀬𑀸𑀤𑀸. 𑀢𑀧𑁆𑀧𑀝𑀺𑀲𑁂𑀥𑁂𑀦 𑀅𑀦𑀦𑁆𑀢𑁄. 𑀅𑀦𑁆𑀢𑁄 𑀘 𑀅𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀉𑀤𑀸. 𑁧) 𑀯𑀺𑀬. 𑀅𑀦𑁆𑀢𑀸𑀦𑀦𑁆𑀢𑀲𑀳𑀘𑀭𑀺𑀢𑁄 𑀯𑀸𑀤𑁄 𑀅𑀦𑁆𑀢𑀸𑀦𑀦𑁆𑀢𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀘𑀭𑀦𑁆𑀢𑀻’’𑀢𑀺. 𑀅𑀦𑁆𑀢𑀸𑀦𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀯𑀸 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺. 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀸. ‘‘𑀅𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀘𑀢𑁆𑀢𑀸𑀭𑁄. 𑀅𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲 𑀢𑀁 𑀓𑀲𑀺𑀡𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀡𑁆𑀳𑀦𑁆𑀢𑀲𑁆𑀲 𑀯𑀲𑁂𑀦 𑀧𑀞𑀫𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀢𑀢𑀺𑀬𑁄 𑀢𑀺𑀭𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀉𑀤𑁆𑀥𑀫𑀥𑁄 𑀅𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲, 𑀘𑀢𑀼𑀢𑁆𑀣𑁄 𑀢𑀓𑁆𑀓𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀏𑀢𑁆𑀣 𑀘 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸𑀤𑀸𑀦𑀁 𑀅𑀦𑁆𑀢𑀜𑁆𑀘 𑀅𑀦𑀦𑁆𑀢𑀜𑁆𑀘 𑀅𑀦𑁆𑀢𑀸𑀦𑀦𑁆𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁, 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀢𑀤𑀼𑀪𑀬𑀦𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀓𑀣𑀫𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀢𑀤𑀼𑀪𑀬𑀧𑁆𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀏𑀯. 𑀅𑀦𑁆𑀢𑀸𑀦𑀦𑁆𑀢𑀺𑀓𑀧𑁆𑀧𑀝𑀺𑀲𑁂𑀥𑀯𑀸𑀤𑁄𑀧𑀺 𑀳𑀺 𑀅𑀦𑁆𑀢𑀸𑀦𑀦𑁆𑀢𑀯𑀺𑀲𑀬𑁄 𑀏𑀯 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸.

𑀦 𑀫𑀭𑀢𑀻𑀢𑀺 𑀅𑀫𑀭𑀸. 𑀓𑀸 𑀲𑀸? ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁬𑁨) 𑀦𑀬𑁂𑀦 𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸 𑀘. 𑀯𑀺𑀯𑀺𑀥𑁄 𑀔𑁂𑀧𑁄𑀢𑀺 𑀯𑀺𑀓𑁆𑀔𑁂𑀧𑁄, 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸, 𑀯𑀸𑀘𑀸𑀬 𑀯𑀸 𑀯𑀺𑀓𑁆𑀔𑁂𑀧𑁄𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄. 𑀅𑀣 𑀯𑀸 𑀅𑀫𑀭𑀸 𑀦𑀸𑀫 𑀫𑀘𑁆𑀙𑀚𑀸𑀢𑀺, 𑀲𑀸 𑀉𑀫𑁆𑀫𑀼𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀤𑀓𑁂 𑀲𑀦𑁆𑀥𑀸𑀯𑀫𑀸𑀦𑀸 𑀕𑀸𑀳𑀁 𑀦 𑀕𑀘𑁆𑀙𑀢𑀺, 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀯𑀸𑀤𑁄 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺, 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸. 𑀲𑁆𑀯𑀸𑀬𑀁 𑀯𑀸𑀤𑁄 𑀫𑀼𑀲𑀸𑀯𑀸𑀤𑀸𑀦𑀼𑀬𑁄𑀕𑀙𑀦𑁆𑀤𑀭𑀸𑀕𑀪𑀬𑀫𑁄𑀳𑀪𑀸𑀯𑀳𑁂𑀢𑀼𑀓𑀢𑀸𑀬 𑀘𑀢𑀼𑀥𑀸 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸’’𑀢𑀺.

𑀅𑀥𑀺𑀘𑁆𑀘 𑀬𑀣𑀺𑀘𑁆𑀙𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀓𑀲𑁆𑀲𑀘𑀺 𑀩𑀼𑀤𑁆𑀥𑀺𑀧𑀼𑀩𑁆𑀩𑀁 𑀯𑀸 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀢𑁆𑀢𑀮𑁄𑀓𑀲𑀜𑁆𑀜𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀘𑁆𑀘 𑀧𑀯𑀢𑁆𑀢𑀺𑀆𑀓𑀸𑀭𑀸𑀭𑀫𑁆𑀫𑀡𑀁 𑀤𑀲𑁆𑀲𑀦𑀁 𑀢𑀤𑀸𑀓𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀺𑀢𑁄 𑀢𑀤𑀸𑀓𑀸𑀭𑀲𑀳𑀘𑀭𑀺𑀢𑀢𑀸𑀬 𑀘 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀺’’, ‘‘𑀓𑀼𑀦𑁆𑀢𑀸 𑀘𑀭𑀦𑁆𑀢𑀻’’𑀢𑀺 𑀘. 𑀢𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸. 𑀮𑀸𑀪𑀺𑀯𑀲𑁂𑀦 𑀢𑀓𑁆𑀓𑀺𑀯𑀲𑁂𑀦 𑀘 ‘‘𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀁.

𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀲𑀜𑁆𑀜𑀺𑀯𑀸𑀤𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀜𑁆𑀜𑀺𑀯𑀸𑀤𑀸. 𑀭𑀽𑀧𑀺𑀘𑀢𑀼𑀓𑁆𑀓𑀁 𑀏𑀓𑀦𑁆𑀢𑀲𑀼𑀔𑀘𑀢𑀼𑀓𑁆𑀓𑀦𑁆𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲 𑀲𑀜𑁆𑀜𑀺𑀯𑀸𑀤𑀸. 𑀇𑀫𑁂𑀲𑀼𑀬𑁂𑀯 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞 𑀲𑀜𑁆𑀜𑀺𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀯𑀸𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀦𑁆𑀢𑀸𑀦𑀁 𑀢𑀸 𑀤𑀺𑀝𑁆𑀞𑀺𑀬𑁄, 𑀇𑀥 𑀅𑀲𑀜𑁆𑀜𑀻𑀢𑀺 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀘.

𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂 𑀭𑀽𑀧𑀸𑀯𑀘𑀭𑀢𑁆𑀢𑀪𑀸𑀯𑁂 𑀘𑀢𑀼𑀩𑁆𑀩𑀺𑀥𑀸𑀭𑀽𑀧𑀢𑁆𑀢𑀪𑀸𑀯𑁂 𑀘 𑀞𑀢𑁆𑀯𑀸 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀧𑀜𑁆𑀜𑀸𑀧𑀦𑀯𑀲𑁂𑀦 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸.

𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀉𑀧𑀪𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀭𑀽𑀧𑀚𑁆𑀛𑀸𑀦𑀲𑀼𑀔𑀧𑀭𑀺𑀪𑁄𑀕𑀯𑀲𑁂𑀦 𑀘 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀽𑀢𑀺𑀧𑀜𑁆𑀜𑀸𑀧𑀦𑀯𑀸𑀤𑀸. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀯𑀤𑀦𑁆𑀢𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸.

𑀜𑀸𑀬𑀢𑀺 𑀓𑀫𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀜𑀸𑀬𑁄, 𑀲𑁄 𑀏𑀯 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀳𑁂𑀢𑀼𑀢𑀸𑀬 𑀥𑀫𑁆𑀫𑁄𑀢𑀺 𑀆𑀳 ‘‘𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲𑀸’’𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄𑀧𑀺 𑀦𑀢𑁆𑀣𑀻𑀢𑀺𑀆𑀤𑀻𑀲𑀼 𑀓𑀲𑁆𑀫𑀸 𑀧𑀦𑁂𑀢𑁂 𑀅𑀜𑁆𑀜𑀢𑁆𑀣 𑀦𑀢𑁆𑀣𑀻𑀢𑀺? 𑀅𑀓𑁆𑀔𑁂𑀢𑁆𑀢𑀢𑀸𑀬. 𑀬𑀣𑀸 𑀳𑀺 𑀦 𑀆𑀭𑀕𑁆𑀕𑁂 𑀲𑀸𑀲𑀧𑁄 𑀢𑀺𑀝𑁆𑀞𑀢𑀺, 𑀦 𑀉𑀤𑀓𑀧𑀺𑀝𑁆𑀞𑁂 𑀅𑀕𑁆𑀕𑀺 𑀚𑀮𑀢𑀺, 𑀦 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀩𑀻𑀚𑀸𑀦𑀺 𑀯𑀺𑀭𑀼𑀳𑀦𑁆𑀢𑀺, 𑀏𑀯𑀫𑁂𑀯𑀁 𑀩𑀸𑀳𑀺𑀭𑁂𑀲𑀼 𑀢𑀺𑀢𑁆𑀣𑀸𑀬𑀢𑀦𑁂𑀲𑀼 𑀦 𑀇𑀫𑁂 𑀲𑀫𑀡𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀲𑀼𑀓𑁆𑀔𑁂𑀢𑁆𑀢𑀢𑀸𑀬. 𑀲𑀸 𑀧𑀦 𑀦𑁂𑀲𑀁 𑀅𑀓𑁆𑀔𑁂𑀢𑁆𑀢𑀢𑀸 𑀲𑀼𑀓𑁆𑀔𑁂𑀢𑁆𑀢𑀢𑀸 𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄 𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀢𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺. 𑀬𑀲𑁆𑀫𑀺𑀜𑁆𑀘 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣… 𑀢𑀢𑀺𑀬𑁄𑀧𑀺 𑀢𑀢𑁆𑀣… 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀉𑀧𑀮𑀩𑁆𑀪𑀢𑀺. 𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺. 𑀇𑀥𑁂𑀯, 𑀲𑀼𑀪𑀤𑁆𑀤, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄, 𑀇𑀥 𑀢𑀢𑀺𑀬𑁄 𑀲𑀫𑀡𑁄, 𑀇𑀥 𑀘𑀢𑀼𑀢𑁆𑀣𑁄 𑀲𑀫𑀡𑁄, 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪).

𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀅𑀪𑀸𑀯𑁄 𑀪𑀸𑀯𑁄 𑀘 𑀲𑀼𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀻𑀮𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀅𑀪𑀸𑀯𑀢𑁄 𑀪𑀸𑀯𑀢𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀼𑀪𑀬𑀜𑁆𑀘 𑀤𑀼𑀭𑀓𑁆𑀔𑀸𑀢𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑀳𑁂𑀢𑀼𑀓𑀁. 𑀲𑁄 𑀘 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀢𑁆𑀢𑀸. 𑀬𑀲𑁆𑀫𑀸 𑀢𑀺𑀢𑁆𑀣𑀸𑀬𑀢𑀦𑀁 𑀅𑀓𑁆𑀔𑁂𑀢𑁆𑀢𑀁, 𑀲𑀸𑀲𑀦𑀁 𑀔𑁂𑀢𑁆𑀢𑀁, 𑀢𑀲𑁆𑀫𑀸 𑀬𑀣𑀸 𑀲𑀼𑀭𑀢𑁆𑀢𑀳𑀢𑁆𑀣𑀧𑀸𑀤𑁄 𑀪𑀸𑀲𑀼𑀭𑀓𑁂𑀲𑀭𑀪𑀸𑀭𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦 𑀲𑀼𑀲𑀸𑀦𑁂 𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀯𑀸 𑀧𑀝𑀺𑀯𑀲𑀢𑀺, 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑀁 𑀧𑀦 𑀳𑀺𑀫𑀯𑀦𑁆𑀢𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀫𑀡𑀺𑀕𑀼𑀳𑀸𑀬𑀫𑁂𑀯 𑀯𑀲𑀢𑀺, 𑀬𑀣𑀸 𑀘 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀦 𑀕𑁄𑀘𑀭𑀺𑀬𑀳𑀢𑁆𑀣𑀺𑀓𑀼𑀮𑀸𑀤𑀻𑀲𑀼 𑀦𑀯𑀲𑀼 𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸 𑀦 𑀕𑀤𑁆𑀭𑀪𑀓𑀼𑀮𑁂 𑀯𑀸 𑀖𑁄𑀝𑀓𑀓𑀼𑀮𑁂 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀦𑁆𑀥𑀼𑀢𑀻𑀭𑁂 𑀧𑀦 𑀲𑀺𑀦𑁆𑀥𑀯𑀓𑀼𑀮𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀲𑀩𑁆𑀩𑀓𑀸𑀫𑀤𑀤𑀁 𑀫𑀦𑁄𑀳𑀭𑀁 𑀫𑀡𑀺𑀭𑀢𑀦𑀁 𑀦 𑀲𑀗𑁆𑀓𑀸𑀭𑀓𑀽𑀝𑁂 𑀯𑀸 𑀧𑀁𑀲𑀼𑀧𑀩𑁆𑀩𑀢𑀸𑀤𑀻𑀲𑀼 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀧𑀼𑀮𑀧𑀩𑁆𑀩𑀢𑀩𑁆𑀪𑀦𑁆𑀢𑀭𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 𑀫𑀘𑁆𑀙𑀭𑀸𑀚𑀸 𑀦 𑀔𑀼𑀤𑁆𑀤𑀓𑀧𑁄𑀓𑁆𑀔𑀭𑀡𑀻𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁂 𑀫𑀳𑀸𑀲𑀫𑀼𑀤𑁆𑀤𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀘 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀲𑀼𑀧𑀡𑁆𑀡𑀭𑀸𑀚𑀸 𑀦 𑀕𑀸𑀫𑀤𑁆𑀯𑀸𑀭𑁂 𑀏𑀭𑀡𑁆𑀟𑀯𑀦𑀸𑀤𑀻𑀲𑀼 𑀧𑀝𑀺𑀯𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑀁 𑀧𑀦 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀲𑀺𑀫𑁆𑀩𑀮𑀺𑀤𑀳𑀯𑀦𑁂𑀬𑁂𑀯 𑀧𑀝𑀺𑀯𑀲𑀢𑀺, 𑀬𑀣𑀸 𑀘 𑀥𑀢𑀭𑀝𑁆𑀞𑁄 𑀲𑀼𑀯𑀡𑁆𑀡𑀳𑀁𑀲𑁄 𑀦 𑀕𑀸𑀫𑀤𑁆𑀯𑀸𑀭𑁂 𑀆𑀯𑀸𑀝𑀓𑀸𑀤𑀻𑀲𑀼 𑀧𑀝𑀺𑀯𑀲𑀢𑀺, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀧𑀦 𑀳𑀼𑀢𑁆𑀯𑀸 𑀘𑀺𑀢𑁆𑀢𑀓𑀽𑀝𑁂𑀬𑁂𑀯 𑀧𑀝𑀺𑀯𑀲𑀢𑀺, 𑀬𑀣𑀸 𑀘 𑀘𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀦 𑀦𑀻𑀘𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀫𑁆𑀪𑀺𑀦𑁆𑀦𑀚𑀸𑀢𑀺𑀬𑀔𑀢𑁆𑀢𑀺𑀬𑀓𑀼𑀮𑁂𑀬𑁂𑀯 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁂𑀯𑀁 𑀇𑀫𑁂𑀲𑀼 𑀲𑀫𑀡𑁂𑀲𑀼 𑀏𑀓𑀲𑀫𑀡𑁄𑀧𑀺 𑀦 𑀅𑀜𑁆𑀜𑀢𑁆𑀣 𑀢𑀺𑀢𑁆𑀣𑀸𑀬𑀢𑀦𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀭𑀺𑀬𑀫𑀕𑁆𑀕𑀧𑀭𑀺𑀓𑁆𑀔𑀢𑁂 𑀧𑀦 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯-𑁧𑁪𑁦; 𑀅. 𑀦𑀺. 𑁪.𑁨𑁪𑁧). 𑀏𑀓𑀸𑀤𑀲𑀫𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀲𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.