𑁪. 𑀅𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀘𑀢𑀼𑀢𑁆𑀣𑁂 𑀲𑁄𑀘𑀢𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀲𑁄𑀘𑀢𑀺, 𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦 𑀅𑀦𑁆𑀢𑁄 𑀦𑀺𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀮𑀫𑀢𑀻𑀢𑀺 𑀢𑀲𑁆𑀲𑁂𑀯 𑀲𑁄𑀓𑀲𑁆𑀲 𑀯𑀲𑁂𑀦 𑀓𑀸𑀬𑁂 𑀘 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑁂𑀦 𑀓𑀺𑀮𑀫𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 𑀲𑁄𑀓𑀼𑀤𑁆𑀤𑁂𑀳𑀓𑀯𑀲𑁂𑀦 𑀢𑀁 𑀢𑀁 𑀯𑀺𑀧𑁆𑀧𑀮𑀧𑀦𑁆𑀢𑁄 𑀯𑀸𑀘𑀸𑀬 𑀧𑀭𑀺𑀤𑁂𑀯𑀢𑀺. 𑀉𑀭𑀢𑁆𑀢𑀸𑀴𑀺𑀦𑁆𑀢𑀺 𑀉𑀭𑀢𑁆𑀢𑀸𑀴𑀁, 𑀉𑀭𑀁 𑀢𑀸𑀴𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀭𑀁 𑀢𑀸𑀴𑁂𑀢𑁆𑀯𑀸’’𑀢𑀺. 𑀓𑀗𑁆𑀔𑀸𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀏𑀢𑁆𑀣 ‘‘𑀏𑀓𑀫𑁂𑀯𑀺𑀤𑀁 𑀧𑀜𑁆𑀘𑀫𑀁 𑀦𑀻𑀯𑀭𑀡𑀁. 𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀆𑀭𑀫𑁆𑀫𑀡𑀁 𑀓𑀗𑁆𑀔𑀦𑀢𑁄 𑀓𑀗𑁆𑀔𑀸, ‘‘𑀇𑀤𑀫𑁂𑀯 𑀯𑀭’’𑀦𑁆𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄 ‘‘𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 𑀓𑀺𑀘𑁆𑀙𑀢𑀺, 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸’’𑀢𑀺 𑀯𑀸 𑀓𑀢𑁆𑀯𑀸.

𑀅𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.