(𑁧𑁮) 𑁩. 𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑁄

𑁧. 𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀽𑀢𑀺 𑀓𑀸𑀬𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀓𑀸𑀬𑀺𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑀲𑀜𑁆𑀘𑁂𑀢𑀦𑀸𑀤𑁆𑀯𑀬𑁂𑀧𑀺. 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑁂𑀢𑀦𑀸 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀤𑁂𑀢𑀺𑀬𑁂𑀯𑀸𑀢𑀺 ‘‘𑀯𑀻𑀲𑀢𑀺𑀯𑀺𑀥𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀯𑀘𑀻𑀲𑀜𑁆𑀘𑁂𑀢𑀦𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀏𑀢𑁆𑀣 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀯𑀻𑀲𑀢𑀺 𑀘𑁂𑀢𑀦𑀸 𑀮𑀩𑁆𑀪𑀦𑁆𑀢𑀺. 𑀇𑀤𑀁 𑀢𑀣𑀸-𑀲𑀤𑁆𑀤𑁂𑀦 𑀉𑀧𑀲𑀁𑀳𑀭𑀢𑀺. 𑀅𑀧𑀺𑀘𑁂𑀢𑁆𑀣 𑀦𑀯 𑀫𑀳𑀕𑁆𑀕𑀢𑀘𑁂𑀢𑀦𑀸𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀇𑀫𑀺𑀦𑀸 𑀦𑀯𑀳𑀺 𑀭𑀽𑀧𑀸𑀭𑀽𑀧𑀓𑀼𑀲𑀮𑀘𑁂𑀢𑀦𑀸𑀳𑀺 𑀲𑀤𑁆𑀥𑀺𑀁 𑀫𑀦𑁄𑀤𑁆𑀯𑀸𑀭𑁂 𑀏𑀓𑀽𑀦𑀢𑀺𑀁𑀲𑀸𑀢𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑀽𑀦𑀲𑀢𑁆𑀢𑀢𑀺 𑀘𑁂𑀢𑀦𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯𑀸𑀢𑀺 𑀇𑀤𑀁 𑀢𑀸𑀧𑀺 𑀘𑁂𑀢𑀦𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸𑀯𑀼𑀢𑁆𑀢𑀸 𑀳𑀺 𑀏𑀓𑀽𑀦𑀲𑀢𑁆𑀢𑀢𑀺 𑀘𑁂𑀢𑀦𑀸 𑀓𑀼𑀲𑀮𑀸𑀧𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀧𑀕𑁂𑀯 𑀇𑀢𑀭𑀸 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀧𑀳𑀻𑀦𑀸𑀯𑀺𑀚𑁆𑀚𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄.

𑀬𑀲𑁆𑀫𑀸 𑀬𑀁 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀘𑁂𑀢𑀦𑀸𑀪𑁂𑀤𑀁 𑀓𑀸𑀬𑀲𑀗𑁆𑀔𑀸𑀭𑀜𑁆𑀘𑁂𑀯 𑀯𑀘𑀻𑀲𑀗𑁆𑀔𑀸𑀭𑀜𑁆𑀘 𑀫𑀦𑁄𑀲𑀗𑁆𑀔𑀸𑀭𑀜𑁆𑀘 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀲𑀸𑀫𑀫𑁆𑀧𑀺 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀓𑀭𑁄𑀢𑀺, 𑀧𑀭𑁂𑀳𑀺 𑀓𑀸𑀭𑀺𑀬𑀫𑀸𑀦𑁄 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦𑀧𑀺 𑀓𑀭𑁄𑀢𑀺, ‘‘𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀢𑀲𑁆𑀲 𑀏𑀯𑀭𑀽𑀧𑁄 𑀦𑀸𑀫 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑀫𑁆𑀫𑀁 𑀯𑀺𑀧𑀸𑀓𑀜𑁆𑀘 𑀚𑀸𑀦𑀦𑁆𑀢𑁄𑀧𑀺 𑀓𑀭𑁄𑀢𑀺, 𑀫𑀸𑀢𑀸𑀧𑀺𑀢𑀽𑀲𑀼 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼 𑀅𑀦𑀼𑀓𑀭𑁄𑀦𑁆𑀢𑁄 𑀤𑀸𑀭𑀓𑁄 𑀯𑀺𑀬 𑀓𑁂𑀯𑀮𑀁 𑀓𑀫𑁆𑀫𑀜𑁆𑀜𑁂𑀯 𑀯𑀺𑀚𑁆𑀚𑀸𑀦𑀦𑁆𑀢𑁄 ‘‘𑀇𑀫𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺 𑀯𑀺𑀧𑀸𑀓𑀁 𑀅𑀚𑀸𑀦𑀦𑁆𑀢𑁄𑀧𑀺 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀫𑀁 𑀯𑀸 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑁂𑀳𑀺 𑀅𑀦𑀸𑀡𑀢𑁆𑀢𑁄𑀢𑀺 𑀲𑀭𑀲𑁂𑀦𑁂𑀯 𑀯𑀢𑁆𑀢𑀫𑀸𑀦𑁄. 𑀚𑀸𑀦𑀦𑁆𑀢𑁄𑀢𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀚𑀸𑀦𑀦𑁆𑀢𑁄.

𑀦𑀦𑀼 𑀘 𑀔𑀻𑀡𑀸𑀲𑀯𑁄 𑀘𑁂𑀢𑀺𑀬𑀁 𑀯𑀦𑁆𑀤𑀢𑀺, 𑀥𑀫𑁆𑀫𑀁 𑀪𑀡𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀣𑀫𑀲𑁆𑀲 𑀓𑀸𑀬𑀓𑀫𑁆𑀫𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺? 𑀅𑀯𑀺𑀧𑀸𑀓𑀢𑁆𑀢𑀸. 𑀔𑀻𑀡𑀸𑀲𑀯𑁂𑀦 𑀳𑀺 𑀓𑀢𑀓𑀫𑁆𑀫𑀁 𑀦𑁂𑀯 𑀓𑀼𑀲𑀮𑀁 𑀳𑁄𑀢𑀺 𑀦𑀸𑀓𑀼𑀲𑀮𑀁, 𑀅𑀯𑀺𑀧𑀸𑀓𑀁 𑀳𑀼𑀢𑁆𑀯𑀸 𑀓𑀺𑀭𑀺𑀬𑀸𑀫𑀢𑁆𑀢𑁂 𑀢𑀺𑀝𑁆𑀞𑀢𑀺. 𑀢𑁂𑀦𑀲𑁆𑀲 𑀢𑁂 𑀓𑀸𑀬𑀸𑀤𑀬𑁄 𑀦 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀔𑀻𑀡𑀸𑀲𑀯𑀲𑁆𑀲 𑀓𑀸𑀬𑁂𑀦 𑀓𑀭𑀡𑀓𑀫𑁆𑀫𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺. 𑀢𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀁.

𑀔𑀺𑀟𑁆𑀟𑀸𑀬 𑀧𑀤𑀼𑀲𑁆𑀲𑀦𑁆𑀢𑀻𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀦𑁄, 𑀔𑀺𑀟𑁆𑀟𑀸𑀧𑀤𑁄𑀲𑀺𑀦𑁄 𑀏𑀯 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸. 𑀔𑀺𑀟𑁆𑀟𑀸𑀧𑀤𑁄𑀲𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸. 𑀢𑁂 𑀓𑀺𑀭 𑀧𑀼𑀜𑁆𑀜𑀯𑀺𑀲𑁂𑀲𑀸𑀥𑀺𑀕𑀢𑁂𑀦 𑀫𑀳𑀦𑁆𑀢𑁂𑀦 𑀅𑀢𑁆𑀢𑀦𑁄 𑀲𑀺𑀭𑀺𑀯𑀺𑀪𑀯𑁂𑀦 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑀸 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀦𑁆𑀢𑀢𑀸𑀬 ‘‘𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸 𑀦 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺𑀧𑀺 𑀦 𑀚𑀸𑀦𑀦𑁆𑀢𑀺. 𑀅𑀣 𑀏𑀓𑀸𑀳𑀸𑀭𑀸𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀔𑀸𑀤𑀦𑁆𑀢𑀸𑀧𑀺 𑀧𑀺𑀯𑀦𑁆𑀢𑀸𑀧𑀺 𑀘𑀯𑀦𑁆𑀢𑀺𑀬𑁂𑀯 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀲𑁆𑀫𑀸? 𑀓𑀫𑁆𑀫𑀚𑀢𑁂𑀚𑀲𑁆𑀲 𑀩𑀮𑀯𑀢𑀸𑀬 𑀓𑀭𑀚𑀓𑀸𑀬𑀲𑁆𑀲 𑀫𑀦𑁆𑀤𑀢𑀸𑀬. 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀓𑀫𑁆𑀫𑀚𑀢𑁂𑀚𑁄 𑀫𑀦𑁆𑀤𑁄, 𑀓𑀭𑀚𑀓𑀸𑀬𑁄 𑀩𑀮𑀯𑀸. 𑀢𑁂𑀲𑀁 𑀢𑁂𑀚𑀲𑁆𑀲 𑀫𑀦𑁆𑀤𑀢𑀸𑀬 𑀓𑀸𑀬𑀲𑁆𑀲 𑀩𑀮𑀯𑀢𑀸𑀬 𑀲𑀢𑁆𑀢𑀸𑀳𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀡𑁆𑀳𑁄𑀤𑀓𑀅𑀘𑁆𑀙𑀬𑀸𑀕𑀼𑀆𑀤𑀻𑀳𑀺 𑀲𑀓𑁆𑀓𑀸 𑀓𑀭𑀚𑀓𑀸𑀬𑀁 𑀉𑀧𑀢𑁆𑀣𑀫𑁆𑀪𑁂𑀢𑀼𑀁. 𑀤𑁂𑀯𑀸𑀦𑀁 𑀧𑀦 𑀢𑁂𑀚𑁄 𑀩𑀮𑀯𑀸 𑀳𑁄𑀢𑀺 𑀉𑀴𑀸𑀭𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀉𑀴𑀸𑀭𑀕𑀭𑀼𑀲𑀺𑀦𑀺𑀤𑁆𑀥𑀲𑀼𑀥𑀸𑀳𑀸𑀭𑀚𑀻𑀭𑀡𑀢𑁄 𑀘. 𑀓𑀭𑀚𑀁 𑀫𑀦𑁆𑀤𑀁 𑀫𑀼𑀤𑀼𑀲𑀼𑀔𑀼𑀫𑀸𑀮𑀪𑀸𑀯𑀢𑁄. 𑀢𑁂 𑀏𑀓𑀁 𑀆𑀳𑀸𑀭𑀯𑁂𑀮𑀁 𑀅𑀓𑁆𑀓𑀫𑀺𑀢𑁆𑀯𑀸𑀯 𑀲𑀡𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀣𑀸 𑀦𑀸𑀫 𑀕𑀺𑀫𑁆𑀳𑀸𑀦𑀁 𑀫𑀚𑁆𑀛𑀦𑁆𑀳𑀺𑀓𑁂 𑀢𑀢𑁆𑀢𑀧𑀸𑀲𑀸𑀡𑁂 𑀞𑀧𑀺𑀢𑀁 𑀧𑀤𑀼𑀫𑀁 𑀯𑀸 𑀉𑀧𑁆𑀧𑀮𑀁 𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀖𑀝𑀲𑀢𑁂𑀦𑀧𑀺 𑀲𑀺𑀜𑁆𑀘𑀺𑀬𑀫𑀸𑀦𑀁 𑀧𑀸𑀓𑀢𑀺𑀓𑀁 𑀦 𑀳𑁄𑀢𑀺 𑀯𑀺𑀦𑀲𑁆𑀲𑀢𑀺𑀬𑁂𑀯, 𑀏𑀯𑀫𑁂𑀯 𑀧𑀘𑁆𑀙𑀸 𑀦𑀺𑀭𑀦𑁆𑀢𑀭𑀁 𑀔𑀸𑀤𑀦𑁆𑀢𑀸𑀧𑀺 𑀧𑀺𑀯𑀦𑁆𑀢𑀸𑀧𑀺 𑀘𑀯𑀦𑁆𑀢𑀺𑀬𑁂𑀯 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀢𑀫𑁂 𑀧𑀦 𑀢𑁂 𑀤𑁂𑀯𑀸𑀢𑀺? ‘‘𑀇𑀫𑁂 𑀦𑀸𑀫𑀸’’𑀢𑀺 𑀅𑀝𑁆𑀞𑀓𑀣𑀸𑀬 𑀯𑀺𑀘𑀸𑀭𑀡𑀸 𑀦𑀢𑁆𑀣𑀺, ‘‘𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀆𑀢𑀧𑁂 𑀔𑀺𑀢𑁆𑀢𑀫𑀸𑀮𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑁂 𑀓𑁂𑀘𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀺𑀦𑁄 𑀤𑁂𑀯𑀸 𑀏𑀯𑀁 𑀓𑀭𑁄𑀦𑁆𑀢𑀺, 𑀢𑁂 𑀏𑀯𑀁 𑀘𑀯𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄 𑀧𑀦𑀸𑀳𑀼 ‘‘𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄 𑀢𑁂 𑀤𑁂𑀯𑀸, 𑀔𑀺𑀟𑁆𑀟𑀸𑀬 𑀧𑀤𑀼𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀳𑁂𑀢𑁂 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸𑀢𑀺 𑀯𑀼𑀢𑁆𑀢𑀸’’𑀢𑀺. 𑀓𑁄 𑀧𑀦𑁂𑀢𑁆𑀣 𑀤𑁂𑀯𑀸𑀦𑀁 𑀆𑀳𑀸𑀭𑁄, 𑀓𑀸 𑀆𑀳𑀸𑀭𑀯𑁂𑀮𑀸𑀢𑀺? ‘‘𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀲𑀼𑀥𑀸 𑀆𑀳𑀸𑀭𑁄, 𑀲𑀸 𑀳𑁂𑀝𑁆𑀞𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑁂𑀳𑀺 𑀉𑀧𑀭𑀺𑀫𑀸𑀦𑀁 𑀉𑀧𑀭𑀺𑀫𑀸𑀦𑀁 𑀧𑀡𑀻𑀢𑀢𑀫𑀸 𑀳𑁄𑀢𑀺. 𑀢𑀁 𑀬𑀣𑀸𑀲𑀓𑀁 𑀤𑀺𑀯𑀲𑀯𑀲𑁂𑀦𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 𑀩𑀤𑀭𑀧𑁆𑀧𑀫𑀸𑀡𑀁 𑀲𑀼𑀥𑀸𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀲𑁄 𑀚𑀺𑀯𑁆𑀳𑀸𑀬𑀁 𑀞𑀧𑀺𑀢𑀫𑀢𑁆𑀢𑁄𑀬𑁂𑀯 𑀬𑀸𑀯 𑀓𑁂𑀲𑀕𑁆𑀕𑀦𑀔𑀕𑁆𑀕𑀸 𑀓𑀸𑀬𑀁 𑀨𑀭𑀢𑀺, 𑀢𑁂𑀲𑀁𑀬𑁂𑀯 𑀤𑀺𑀯𑀲𑀯𑀲𑁂𑀦 𑀲𑀢𑁆𑀢𑀤𑀺𑀯𑀲𑀁 𑀬𑀸𑀧𑀦𑀲𑀫𑀢𑁆𑀣𑁄𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀇𑀲𑁆𑀲𑀸𑀧𑀓𑀢𑀢𑁆𑀢𑀸 𑀧𑀤𑀼𑀝𑁆𑀞𑁂𑀦 𑀫𑀦𑀲𑀸 𑀧𑀤𑀼𑀲𑁆𑀲𑀦𑁆𑀢𑀻𑀢𑀺 𑀫𑀦𑁄𑀧𑀤𑁄𑀲𑀺𑀓𑀸. 𑀉𑀲𑀽𑀬𑀯𑀲𑁂𑀦 𑀯𑀸 𑀫𑀦𑀲𑁄 𑀧𑀤𑁄𑀲𑁄 𑀫𑀦𑁄𑀧𑀤𑁄𑀲𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀺 𑀯𑀺𑀦𑀸𑀲𑀳𑁂𑀢𑀼𑀪𑀽𑀢𑁄𑀢𑀺 𑀫𑀦𑁄𑀧𑀤𑁄𑀲𑀺𑀓𑀸. 𑀅𑀓𑁆𑀓𑀼𑀤𑁆𑀥𑁄 𑀭𑀓𑁆𑀔𑀢𑀻𑀢𑀺 𑀓𑀼𑀤𑁆𑀥𑀲𑁆𑀲 𑀲𑁄 𑀓𑁄𑀥𑁄 𑀇𑀢𑀭𑀲𑁆𑀫𑀺𑀁 𑀅𑀓𑁆𑀓𑀼𑀚𑁆𑀛𑀦𑁆𑀢𑁂 𑀅𑀦𑀼𑀧𑀸𑀤𑀸𑀦𑁄 𑀏𑀓𑀯𑀸𑀭𑀫𑁂𑀯 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀸𑀲𑁂𑀯𑀦𑁄 𑀘𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀉𑀤𑀓𑀦𑁆𑀢𑀁 𑀧𑀢𑁆𑀯𑀸 𑀅𑀕𑁆𑀕𑀺 𑀯𑀺𑀬 𑀦𑀺𑀩𑁆𑀩𑀸𑀬𑀢𑀺, 𑀢𑀲𑁆𑀫𑀸 𑀅𑀓𑁆𑀓𑀼𑀤𑁆𑀥𑁄 𑀢𑀁 𑀘𑀯𑀦𑀢𑁄 𑀭𑀓𑁆𑀔𑀢𑀺. 𑀉𑀪𑁄𑀲𑀼 𑀧𑀦 𑀓𑀼𑀤𑁆𑀥𑁂𑀲𑀼 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀭𑀺𑀯𑀟𑁆𑀠𑀦𑀯𑀲𑁂𑀦 𑀢𑀺𑀔𑀺𑀡𑀲𑀫𑀼𑀤𑀸𑀘𑀸𑀭𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀤𑀬𑀯𑀢𑁆𑀣𑀼𑀁 𑀦𑀺𑀤𑀳𑀦𑁆𑀢𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀁 𑀓𑀭𑀚𑀓𑀸𑀬𑀁 𑀯𑀺𑀦𑀸𑀲𑁂𑀢𑀺, 𑀢𑀢𑁄 𑀲𑀓𑀮𑁄𑀧𑀺 𑀅𑀢𑁆𑀢𑀪𑀸𑀯𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀢𑁂𑀦𑀸𑀳 ‘‘𑀉𑀪𑁄𑀲𑀼 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀘𑀸𑀳 𑀪𑀕𑀯𑀸 ‘‘𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬…𑀧𑁂… 𑀘𑀯𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁭).

𑀓𑀢𑀫𑁂 𑀢𑁂𑀦 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸𑀢𑀺 𑀏𑀢𑁆𑀣 𑀢𑁂𑀦𑀸𑀢𑀺 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀢𑀫𑁂 𑀦𑀸𑀫 𑀢𑁂 𑀤𑁂𑀯𑀸 𑀤𑀝𑁆𑀞𑀩𑁆𑀩𑀸’’𑀢𑀺. 𑀓𑀭𑀡𑀢𑁆𑀣𑁂𑀬𑁂𑀯 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀯𑀸 𑀅𑀢𑁆𑀢𑀪𑀸𑀯𑁂𑀦𑀸’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁨. 𑀤𑀼𑀢𑀺𑀬𑁂 𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀅𑀢𑁆𑀣𑁄𑀢𑀺 𑀘𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀁. 𑀢𑀜𑁆𑀳𑀺 𑀳𑁂𑀢𑀼𑀯𑀲𑁂𑀦 𑀅𑀭𑀡𑀻𑀬𑀁 𑀕𑀦𑁆𑀢𑀩𑁆𑀩𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 ‘‘𑀅𑀢𑁆𑀣𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀢𑁂𑀦𑀸𑀳 ‘‘𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀧𑀪𑁂𑀤𑀕𑀢𑀁 𑀜𑀸𑀡’’𑀦𑁆𑀢𑀺. 𑀆𑀘𑀺𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼 𑀆𑀤𑀺𑀢𑁄 𑀓𑀣𑁂𑀦𑁆𑀢𑁄 𑀆𑀘𑀺𑀓𑁆𑀔𑀢𑀺 𑀦𑀸𑀫, 𑀉𑀤𑁆𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀉𑀤𑁆𑀤𑁂𑀲𑀁 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄 𑀤𑁂𑀲𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀫𑀢𑁆𑀣𑀁 𑀉𑀤𑁆𑀤𑀺𑀲𑀦𑀯𑀲𑁂𑀦 𑀧𑀓𑀸𑀭𑁂𑀳𑀺 𑀜𑀸𑀧𑁂𑀦𑁆𑀢𑁄 𑀜𑀸𑀧𑁂𑀢𑀺. 𑀧𑀓𑀸𑀭𑁂𑀳𑀺 𑀏𑀯 𑀢𑀫𑀢𑁆𑀣𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀧𑀝𑁆𑀞𑀧𑁂𑀢𑀺. 𑀬𑀣𑀸𑀉𑀤𑁆𑀤𑀺𑀝𑁆𑀞𑀁 𑀧𑀝𑀺𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀯𑀺𑀯𑀭𑀢𑀺. 𑀯𑀺𑀯𑀝𑀁 𑀯𑀺𑀪𑀚𑀢𑀺. 𑀯𑀺𑀪𑀢𑁆𑀢𑀅𑀢𑁆𑀣𑀁 𑀳𑁂𑀢𑀽𑀤𑀸𑀳𑀭𑀡𑀤𑀲𑁆𑀲𑀦𑁂𑀳𑀺 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺.

𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀢𑀢𑁆𑀣 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀸𑀫 𑀥𑀫𑁆𑀫𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀜𑀸𑀡𑀁. 𑀥𑀫𑁆𑀫𑁄𑀢𑀺 𑀘 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑁄. 𑀲𑁄 𑀳𑀺 𑀬𑀲𑁆𑀫𑀸 𑀢𑀁 𑀢𑀁 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘, 𑀢𑀲𑁆𑀫𑀸 ‘‘𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼, 𑀅𑀭𑀺𑀬𑀫𑀕𑁆𑀕𑁄, 𑀪𑀸𑀲𑀺𑀢𑀁, 𑀓𑀼𑀲𑀮𑀁, 𑀅𑀓𑀼𑀲𑀮𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 ‘‘𑀥𑀫𑁆𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀬𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀢𑀺.

𑀏𑀯𑀫𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸 𑀦𑀸𑀫 𑀚𑀸𑀢𑀸, 𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀦𑁆𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀳𑀺 ‘‘𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, ‘‘𑀨𑀲𑁆𑀲𑀸’’𑀢𑀺 𑀯𑀸 ‘‘𑀨𑀲𑁆𑀲’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 𑀧𑀦 ‘‘𑀅𑀬𑀁 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑀁 𑀧𑀦𑁂𑀲 𑀦𑀸𑀫𑀸𑀔𑁆𑀬𑀸𑀢𑀉𑀧𑀲𑀕𑁆𑀕𑀩𑁆𑀬𑀜𑁆𑀚𑀦𑀲𑀤𑁆𑀤𑀁 𑀚𑀸𑀦𑀸𑀢𑀺 𑀦 𑀚𑀸𑀦𑀸𑀢𑀻𑀢𑀺? 𑀬𑀤𑀕𑁆𑀕𑁂𑀦 𑀲𑀤𑁆𑀤𑀁 𑀚𑀸𑀦𑀺𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, 𑀢𑀤𑀕𑁆𑀕𑁂𑀦 𑀢𑀫𑁆𑀧𑀺 𑀚𑀸𑀦𑀺𑀲𑁆𑀲𑀢𑀻𑀢𑀺. 𑀢𑀁 𑀧𑀦 ‘‘𑀦𑀬𑀺𑀤𑀁 𑀧𑀝𑀺𑀲𑀫𑁆𑀪𑀺𑀤𑀸𑀓𑀺𑀘𑁆𑀘’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀢𑁆𑀣𑀼 𑀓𑀣𑀺𑀢𑀁 𑁋

𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀩𑁄𑀥𑀺𑀫𑀡𑁆𑀟𑁂 𑀲𑀼𑀯𑀡𑁆𑀡𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲𑀲𑀼 𑀪𑀸𑀲𑀸𑀲𑀼 𑀓𑀢𑀭𑀪𑀸𑀲𑀸𑀬 𑀓𑀣𑁂𑀫𑀻’’𑀢𑀺 𑀧𑀯𑀸𑀭𑁂𑀲𑀺. 𑀢𑀁 𑀧𑀦 𑀢𑁂𑀦 𑀅𑀢𑁆𑀢𑀦𑁄 𑀉𑀕𑁆𑀕𑀳𑁂 𑀞𑀢𑁆𑀯𑀸 𑀧𑀯𑀸𑀭𑀺𑀢𑀁, 𑀦 𑀧𑀝𑀺𑀲𑀫𑁆𑀪𑀺𑀤𑀸𑀬 𑀞𑀺𑀢𑁂𑀦. 𑀲𑁄 𑀳𑀺 𑀫𑀳𑀸𑀧𑀜𑁆𑀜𑀢𑀸𑀬 𑀢𑀁 𑀢𑀁 𑀪𑀸𑀲𑀁 𑀓𑀣𑀸𑀧𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀏𑀯𑀁 𑀧𑀯𑀸𑀭𑁂𑀲𑀺. ‘‘𑀪𑀸𑀲𑀁 𑀦𑀸𑀫 𑀲𑀢𑁆𑀢𑀸 𑀉𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀧𑀦𑁂𑀢𑁆𑀣 𑀇𑀤𑀁 𑀓𑀣𑀺𑀢𑀁. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀤𑀳𑀭𑀓𑀸𑀮𑁂 𑀓𑀼𑀫𑀸𑀭𑀓𑁂 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀁 𑀢𑀁 𑀓𑀣𑀬𑀫𑀸𑀦𑀸 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺. 𑀤𑀸𑀭𑀓𑀸 𑀢𑁂𑀲𑀁 𑀢𑀁 𑀢𑀁 𑀪𑀸𑀲𑀁 𑀯𑀯𑀢𑁆𑀣𑀸𑀧𑁂𑀦𑁆𑀢𑀺 ‘‘𑀇𑀫𑀺𑀦𑀸 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀩𑁆𑀩𑀫𑁆𑀧𑀺 𑀪𑀸𑀲𑀁 𑀚𑀸𑀦𑀦𑁆𑀢𑀺. 𑀫𑀸𑀢𑀸 𑀤𑀫𑀺𑀴𑀻, 𑀧𑀺𑀢𑀸 𑀅𑀦𑁆𑀥𑀓𑁄. 𑀢𑁂𑀲𑀁 𑀚𑀸𑀢𑁄 𑀤𑀸𑀭𑀓𑁄 𑀲𑀘𑁂 𑀫𑀸𑀢𑀼𑀓𑀣𑀁 𑀧𑀞𑀫𑀁 𑀲𑀼𑀡𑀸𑀢𑀺, 𑀤𑀫𑀺𑀴𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺. 𑀲𑀘𑁂 𑀧𑀺𑀢𑀼𑀓𑀣𑀁 𑀧𑀞𑀫𑀁 𑀲𑀼𑀡𑀸𑀢𑀺, 𑀅𑀦𑁆𑀥𑀓𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀓𑀣𑀁 𑀅𑀲𑁆𑀲𑀼𑀡𑀦𑁆𑀢𑁄 𑀫𑀸𑀕𑀥𑀪𑀸𑀲𑀁 𑀪𑀸𑀲𑀺𑀲𑁆𑀲𑀢𑀺. 𑀬𑁄𑀧𑀺 𑀅𑀕𑀸𑀫𑀓𑁂 𑀫𑀳𑀸𑀅𑀭𑀜𑁆𑀜𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀅𑀜𑁆𑀜𑁄 𑀓𑀣𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑁄𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀯𑀘𑀦𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄, 𑀫𑀸𑀕𑀥𑀪𑀸𑀲𑀫𑁂𑀯 𑀪𑀸𑀲𑀺𑀲𑁆𑀲𑀢𑀺. 𑀦𑀺𑀭𑀬𑁂, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁, 𑀧𑁂𑀢𑁆𑀢𑀺𑀯𑀺𑀲𑀬𑁂, 𑀫𑀦𑀼𑀲𑁆𑀲𑀮𑁄𑀓𑁂, 𑀤𑁂𑀯𑀮𑁄𑀓𑁂𑀢𑀺 𑀲𑀩𑁆𑀩𑀢𑁆𑀣 𑀫𑀸𑀕𑀥𑀪𑀸𑀲𑀸𑀯 𑀉𑀲𑁆𑀲𑀦𑁆𑀦𑀸, 𑀲𑁂𑀲𑀸 𑀑𑀝𑁆𑀝𑀓𑀺𑀭𑀸𑀢𑀅𑀦𑁆𑀥𑀓𑀬𑁄𑀦𑀓𑀤𑀫𑀺𑀴𑀪𑀸𑀲𑀸𑀤𑀺𑀓𑀸 𑀅𑀝𑁆𑀞𑀸𑀭𑀲 𑀪𑀸𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀓𑀸𑀮𑀦𑁆𑀢𑀭𑁂𑀦 𑀅𑀜𑁆𑀜𑀣𑀸 𑀳𑁄𑀦𑁆𑀢𑀺 𑀘 𑀦𑀲𑁆𑀲𑀦𑁆𑀢𑀺 𑀘.

𑀅𑀬𑀫𑁂𑀯𑁂𑀓𑀸 𑀬𑀣𑀸𑀪𑀼𑀘𑁆𑀘𑀩𑁆𑀭𑀳𑁆𑀫𑀯𑁄𑀳𑀸𑀭𑀅𑀭𑀺𑀬𑀯𑁄𑀳𑀸𑀭𑀲𑀗𑁆𑀔𑀸𑀢𑀸 𑀫𑀸𑀕𑀥𑀪𑀸𑀲𑀸 𑀦 𑀧𑀭𑀺𑀯𑀢𑁆𑀢𑀢𑀺. 𑀲𑀸 𑀳𑀺 𑀓𑀢𑁆𑀣𑀘𑀺 𑀓𑀤𑀸𑀘𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀧𑀺 𑀦 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑀣𑀸𑀯 𑀧𑀭𑀺𑀯𑀢𑁆𑀢𑀢𑀺, 𑀓𑀧𑁆𑀧𑀯𑀺𑀦𑀸𑀲𑁂𑀧𑀺 𑀢𑀺𑀝𑁆𑀞𑀢𑀺𑀬𑁂𑀯. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀳𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀢𑀦𑁆𑀢𑀺𑀁 𑀆𑀭𑁄𑀧𑁂𑀦𑁆𑀢𑁄 𑀫𑀸𑀕𑀥𑀪𑀸𑀲𑀸𑀬 𑀏𑀯 𑀆𑀭𑁄𑀧𑁂𑀲𑀺. 𑀓𑀲𑁆𑀫𑀸? 𑀏𑀯𑀜𑁆𑀳𑀺 𑀆𑀳𑀭𑀺𑀢𑀼𑀁 𑀲𑀼𑀔𑀁 𑀳𑁄𑀢𑀺. 𑀫𑀸𑀕𑀥𑀪𑀸𑀲𑀸𑀬 𑀳𑀺 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀲𑁄𑀢𑀧𑀣𑀸𑀕𑀫𑀦𑀫𑁂𑀯 𑀧𑀧𑀜𑁆𑀘𑁄. 𑀢𑁂𑀦 𑀲𑀗𑁆𑀖𑀝𑀺𑀢𑀫𑀢𑁆𑀢𑁂𑀦𑁂𑀯 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀺. 𑀅𑀜𑁆𑀜𑀸𑀬 𑀪𑀸𑀲𑀸𑀬 𑀢𑀦𑁆𑀢𑀺𑀁 𑀆𑀭𑀼𑀴𑁆𑀳𑀓𑀁 𑀲𑁄𑀥𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀩𑀳𑀼𑀫𑁆𑀧𑀺 𑀉𑀕𑁆𑀕𑀳𑁂𑀢𑁆𑀯𑀸 𑀧𑀦 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀅𑀭𑀺𑀬𑀲𑀸𑀯𑀓𑁄 𑀦𑁄𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺.

𑀧𑀝𑀺𑀪𑀸𑀦𑀧𑁆𑀧𑀪𑁂𑀤𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀅𑀢𑁆𑀣𑀥𑀫𑁆𑀫𑀸𑀤𑀺𑀯𑀺𑀲𑀬𑁂𑀲𑀼 𑀳𑀺 𑀢𑀻𑀲𑀼 𑀜𑀸𑀡𑁂𑀲𑀼 ‘‘𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺 (𑀯𑀺𑀪. 𑁭𑁨𑁫-𑁭𑁩𑁧) 𑀏𑀯𑀁 𑀧𑀯𑀢𑁆𑀢𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀸 𑀧𑀦 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺, 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀽𑀫𑀺𑀬𑀜𑁆𑀘, 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀲𑁆𑀲 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀲𑁆𑀲𑀸𑀢𑀺 𑀅𑀲𑀻𑀢𑀺𑀬𑀸𑀧𑀺 𑀫𑀳𑀸𑀣𑁂𑀭𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸 𑀅𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀕𑀢𑀸. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄, 𑀥𑀫𑁆𑀫𑀺𑀓𑀲𑁆𑀲 𑀉𑀧𑀸𑀲𑀓𑀲𑁆𑀲, 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀦𑁄, 𑀔𑀼𑀚𑁆𑀚𑀼𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬𑀸𑀢𑀺 𑀏𑀯𑀫𑀸𑀤𑀻𑀦𑀁 𑀧𑀝𑀺𑀲𑀫𑁆𑀪𑀺𑀤𑀸 𑀲𑁂𑀓𑁆𑀔𑀪𑀽𑀫𑀺𑀬𑀁 𑀧𑀪𑁂𑀤𑀕𑀢𑀸𑀢𑀺 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺. 𑀧𑀪𑁂𑀤𑁄 𑀦𑀸𑀫 𑀫𑀕𑁆𑀕𑁂𑀳𑀺 𑀅𑀥𑀺𑀕𑀢𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀪𑁂𑀤𑀕𑀫𑀦𑀁.

𑀓𑀢𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺? 𑀅𑀥𑀺𑀕𑀫𑁂𑀦, 𑀧𑀭𑀺𑀬𑀢𑁆𑀢𑀺𑀬𑀸, 𑀲𑀯𑀦𑁂𑀦, 𑀧𑀭𑀺𑀧𑀼𑀘𑁆𑀙𑀸𑀬, 𑀧𑀼𑀩𑁆𑀩𑀬𑁄𑀕𑁂𑀦. 𑀢𑀢𑁆𑀣 𑀅𑀥𑀺𑀕𑀫𑁄 𑀦𑀸𑀫 𑀅𑀭𑀳𑀢𑁆𑀢𑀁. 𑀢𑀜𑁆𑀳𑀺 𑀧𑀢𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀲𑀯𑀦𑀁 𑀦𑀸𑀫 𑀥𑀫𑁆𑀫𑀲𑁆𑀲𑀯𑀦𑀁. 𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀲𑁆𑀲 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀧𑀭𑀺𑀧𑀼𑀘𑁆𑀙𑀸 𑀦𑀸𑀫 𑀅𑀝𑁆𑀞𑀓𑀣𑀸. 𑀉𑀕𑁆𑀕𑀳𑀺𑀢𑀧𑀸𑀴𑀺𑀬𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀢𑀸 𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑀬𑁂𑀦 𑀧𑀭𑀺𑀳𑀝𑀓𑀫𑁆𑀫𑀝𑁆𑀞𑀸𑀦𑀢𑀸. 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀲𑁆𑀲 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺.

𑀏𑀢𑁂𑀲𑀼 𑀧𑀦 𑀧𑀭𑀺𑀬𑀢𑁆𑀢𑀺, 𑀲𑀯𑀦𑀁, 𑀧𑀭𑀺𑀧𑀼𑀘𑁆𑀙𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀧𑀪𑁂𑀤𑀲𑁆𑀲𑁂𑀯 𑀩𑀮𑀯𑀓𑀸𑀭𑀡𑀸𑀦𑀺, 𑀧𑀼𑀩𑁆𑀩𑀬𑁄𑀕𑁄 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑁄. 𑀧𑀪𑁂𑀤𑀲𑁆𑀲 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀳𑁄𑀢𑀺, 𑀦 𑀧𑀦 𑀬𑀣𑀸 𑀅𑀥𑀺𑀕𑀫𑀲𑁆𑀲 𑀩𑀮𑀯𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀧𑀪𑁂𑀤𑀲𑁆𑀲. 𑀧𑀭𑀺𑀬𑀢𑁆𑀢𑀺𑀲𑀯𑀦𑀧𑀭𑀺𑀧𑀼𑀘𑁆𑀙𑀸 𑀳𑀺 𑀧𑀼𑀩𑁆𑀩𑁂 𑀳𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀧𑀼𑀩𑁆𑀩𑀬𑁄𑀕𑁂𑀦 𑀧𑀦 𑀧𑀼𑀩𑁆𑀩𑁂 𑀘𑁂𑀯 𑀏𑀢𑀭𑀳𑀺 𑀘 𑀲𑀗𑁆𑀔𑀸𑀭𑀲𑀫𑁆𑀫𑀲𑀦𑀁 𑀯𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑁄 𑀦𑀸𑀫 𑀦𑀢𑁆𑀣𑀺. 𑀇𑀫𑁂 𑀧𑀦 𑀤𑁆𑀯𑁂𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺.

𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀫𑀳𑀸𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁩-𑁪. 𑀢𑀢𑀺𑀬𑁂 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀆𑀓𑀭𑀝𑁆𑀞𑁄 𑀆𑀬𑀢𑀦𑀲𑀤𑁆𑀤𑁄𑀢𑀺 𑀆𑀳 ‘‘𑀨𑀲𑁆𑀲𑀸𑀓𑀭𑀸𑀦’’𑀦𑁆𑀢𑀺𑀆𑀤𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁, 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁄𑀧𑀺 ‘‘𑀆𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀸𑀤𑀺𑀯𑀲𑁂𑀦𑀧𑀺 𑀆𑀬𑀢𑀦𑀝𑁆𑀞𑁄 𑀮𑀩𑁆𑀪𑀢𑀺𑀬𑁂𑀯. 𑀫𑀸-𑀇𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀲𑁆𑀯𑀸𑀬𑀁 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀅𑀲𑁂𑀲𑀁 𑀯𑀺𑀭𑀸𑀕𑀦𑀺𑀭𑁄𑀥𑀸 𑀅𑀢𑁆𑀣𑀜𑁆𑀜𑀁 𑀯𑀘𑀦𑀁 𑀓𑀺𑀜𑁆𑀘𑀻𑀢𑀺 𑀲𑀦𑁆𑀥𑀸𑀬𑀸𑀳𑀸𑀢𑀺 𑀆𑀳 ‘‘𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄’’𑀢𑀺. 𑀧𑀜𑁆𑀘𑀨𑀲𑁆𑀲𑀸𑀬𑀢𑀦𑀸𑀦𑀺 𑀦𑀺𑀭𑀼𑀤𑁆𑀥𑀸𑀦𑀻𑀢𑀺 𑀘𑀓𑁆𑀔𑀸𑀤𑀻𑀦𑀜𑁆𑀘 𑀢𑀢𑁆𑀣 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀙𑀝𑁆𑀞𑀲𑁆𑀲𑀸𑀢𑀺 𑀫𑀦𑀸𑀬𑀢𑀦𑀲𑁆𑀲. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀫𑀳𑀸𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀉𑀧𑀯𑀸𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁫-𑁬. 𑀧𑀜𑁆𑀘𑀫𑁂 𑀯𑀺𑀚𑁆𑀚𑀸𑀬𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀆𑀲𑀯𑀓𑁆𑀔𑀬𑀜𑀸𑀡𑀲𑀗𑁆𑀔𑀸𑀢𑀸𑀬 𑀢𑀺𑀯𑀺𑀥𑀸𑀬 𑀯𑀺𑀚𑁆𑀚𑀸𑀬, 𑀅𑀝𑁆𑀞𑀯𑀺𑀥𑀸𑀬 𑀯𑀸. 𑀅𑀝𑁆𑀞𑀯𑀺𑀥𑀸𑀧𑀺 𑀳𑀺 𑀯𑀺𑀚𑁆𑀚𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀘 𑀲𑀳 𑀅𑀪𑀺𑀜𑁆𑀜𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀧𑀦𑁆𑀦𑀭𑀲𑀥𑀫𑁆𑀫𑀪𑁂𑀤𑁂𑀦 𑀘𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀤𑁆𑀥𑀸, 𑀳𑀺𑀭𑀻, 𑀑𑀢𑁆𑀢𑀧𑁆𑀧𑀁, 𑀩𑀸𑀳𑀼𑀲𑀘𑁆𑀘𑀁, 𑀯𑀻𑀭𑀺𑀬𑀁, 𑀲𑀢𑀺, 𑀧𑀜𑁆𑀜𑀸, 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀏𑀯𑀁 𑀧𑀦𑁆𑀦𑀭𑀲𑀪𑁂𑀤𑁂𑀦 𑀘𑀭𑀡𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀇𑀫𑁂𑀬𑁂𑀯 𑀳𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀬𑀲𑁆𑀫𑀸 𑀏𑀢𑁂𑀳𑀺 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁, 𑀢𑀲𑁆𑀫𑀸 ‘‘𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀙𑀝𑁆𑀞𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑀉𑀧𑀯𑀸𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀭𑀸𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀲𑀢𑁆𑀢𑀫𑁂 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸𑀢𑀺 𑀤𑀼𑀯𑀺𑀥𑀸𑀧𑁂𑀲𑀸 𑀣𑀤𑁆𑀥𑀝𑁆𑀞𑁂𑀦, 𑀓𑀓𑁆𑀔𑀴𑀝𑁆𑀞𑁂𑀦, 𑀨𑀭𑀼𑀲𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼 𑀏𑀯𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸? 𑀩𑀸𑀳𑀺𑀭𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀅𑀘𑁂𑀢𑀦𑀸𑀪𑀸𑀯𑁄 𑀧𑀸𑀓𑀝𑁄, 𑀦 𑀅𑀚𑁆𑀛𑀢𑁆𑀢𑀺𑀓𑀸𑀬, 𑀢𑀲𑁆𑀫𑀸 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀏𑀓𑀲𑀤𑀺𑀲𑀸 𑀅𑀘𑁂𑀢𑀦𑀸𑀬𑁂𑀯𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀲𑀼𑀔𑀧𑀭𑀺𑀕𑁆𑀕𑀸𑀳𑀸 𑀳𑁄𑀢𑀺, 𑀬𑀣𑀸 𑀓𑀺𑀁? 𑀤𑀦𑁆𑀢𑁂𑀦 𑀕𑁄𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑀺𑀢𑁄 𑀅𑀤𑀦𑁆𑀢𑁄 𑀓𑀢𑀺𑀧𑀸𑀳𑀫𑁂𑀯 𑀯𑀺𑀲𑀼𑀓𑀸𑀬𑀢𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀅𑀣 𑀦 𑀘𑀺𑀭𑀲𑁆𑀲𑁂𑀯 𑀤𑀫𑀣𑀁 𑀉𑀧𑁂𑀢𑀺, 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀏𑀓𑀲𑀤𑀺𑀲𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀓𑀢𑀺𑀧𑀸𑀳𑀫𑁂𑀯 𑀅𑀘𑁂𑀢𑀦𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀺, 𑀅𑀣 𑀦 𑀘𑀺𑀭𑁂𑀦𑁂𑀯𑀲𑁆𑀲𑀸 𑀅𑀘𑁂𑀢𑀦𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺 𑀥𑀸𑀢𑀼𑀫𑀢𑁆𑀢𑀢𑀸𑀬 𑀤𑀲𑁆𑀲𑀦𑀢𑁄. 𑀦𑁂𑀢𑀁 𑀫𑀫…𑀧𑁂… 𑀤𑀝𑁆𑀞𑀩𑁆𑀩𑀦𑁆𑀢𑀺 𑀢𑀁 𑀉𑀪𑀬𑀫𑁆𑀧𑀺 ‘‘𑀦 𑀏𑀢𑀁 𑀫𑀫, 𑀦 𑀏𑀲𑁄𑀳𑀫𑀲𑁆𑀫𑀺, 𑀦 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀁. 𑀢𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀧𑀲𑁆𑀲𑀦𑁆𑀢𑁄 𑀦𑁂𑀯 𑀓𑀢𑁆𑀣𑀘𑀺 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸 𑀦𑀸𑀫 𑀓𑀣𑀺𑀢𑀸’’𑀢𑀺.

𑀭𑀸𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑀫𑁆𑀩𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀅𑀝𑁆𑀞𑀫𑁂 𑀲𑀦𑁆𑀢𑀦𑁆𑀢𑀺 𑀅𑀗𑁆𑀕𑀲𑀦𑁆𑀢𑀢𑀸𑀬 𑀘𑁂𑀯 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀘 𑀓𑀫𑀦𑀻𑀬𑀁 𑀫𑀦𑁄𑀳𑀭𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀁 𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀺𑀁. 𑀢𑁂𑀦𑁂𑀯𑀸𑀳 ‘‘𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀲𑀫𑀸𑀧𑀢𑁆𑀢𑀺’’𑀦𑁆𑀢𑀺. 𑀮𑁂𑀧𑀫𑀓𑁆𑀔𑀺𑀢𑁂𑀦𑀸𑀢𑀺 𑀮𑀸𑀔𑀸𑀫𑀓𑁆𑀔𑀺𑀢𑁂𑀦. 𑀧𑀸𑀭𑀺𑀧𑀦𑁆𑀣𑀺𑀓𑁂 𑀅𑀲𑁄𑀥𑁂𑀢𑁆𑀯𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀸𑀭𑀺𑀧𑀦𑁆𑀣𑀺𑀓𑁂 𑀅𑀲𑁄𑀥𑁂𑀢𑁆𑀯𑀸. 𑀬𑁄 𑀳𑀺 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀓𑀸𑀫𑀘𑁆𑀙𑀦𑁆𑀤𑀁 𑀦 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀤𑀼𑀝𑁆𑀞𑀼𑀮𑁆𑀮𑀁 𑀲𑀼𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀅𑀓𑀢𑁆𑀯𑀸 𑀆𑀭𑀫𑁆𑀪𑀥𑀸𑀢𑀼𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀣𑀺𑀦𑀫𑀺𑀤𑁆𑀥𑀁 𑀦 𑀲𑀼𑀝𑁆𑀞𑀼 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀲𑀫𑀣𑀦𑀺𑀫𑀺𑀢𑁆𑀢𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀦 𑀲𑀫𑀽𑀳𑀢𑀁 𑀓𑀢𑁆𑀯𑀸 𑀅𑀜𑁆𑀜𑁂𑀧𑀺 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑁂 𑀥𑀫𑁆𑀫𑁂 𑀦 𑀲𑀼𑀝𑁆𑀞𑀼 𑀲𑁄𑀥𑁂𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺. 𑀲𑁄 𑀅𑀲𑁄𑀥𑀺𑀢𑀁 𑀆𑀲𑀬𑀁 𑀧𑀯𑀺𑀝𑁆𑀞𑀪𑀫𑀭𑁄 𑀯𑀺𑀬 𑀅𑀲𑀼𑀤𑁆𑀥𑀁 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀭𑀸𑀚𑀸 𑀯𑀺𑀬 𑀘 𑀔𑀺𑀧𑁆𑀧𑀫𑁂𑀯 𑀦𑀺𑀓𑁆𑀔𑀫𑀢𑀺. 𑀬𑁄 𑀧𑀦 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑁂 𑀥𑀫𑁆𑀫𑁂 𑀲𑀼𑀝𑁆𑀞𑀼 𑀯𑀺𑀲𑁄𑀥𑁂𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀲𑁄 𑀲𑀼𑀯𑀺𑀲𑁄𑀥𑀺𑀢𑀁 𑀆𑀲𑀬𑀁 𑀧𑀯𑀺𑀝𑁆𑀞𑀪𑀫𑀭𑁄 𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑀁 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀭𑀸𑀚𑀸 𑀯𑀺𑀬 𑀘 𑀲𑀓𑀮𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀳𑁄𑀢𑀺.

𑀆𑀬𑀫𑀼𑀔𑀸𑀦𑀻𑀢𑀺 𑀦𑀤𑀺𑀢𑀴𑀸𑀓𑀓𑀦𑁆𑀤𑀭𑀧𑀤𑀭𑀸𑀤𑀺𑀢𑁄 𑀆𑀕𑀫𑀦𑀫𑀕𑁆𑀕𑀸. 𑀢𑁂 𑀘 𑀓𑀦𑁆𑀤𑀭𑀸𑀬𑁂𑀯𑀸𑀢𑀺 𑀆𑀳 ‘‘𑀘𑀢𑀲𑁆𑀲𑁄 𑀧𑀯𑀺𑀲𑀦𑀓𑀦𑁆𑀤𑀭𑀸’’𑀢𑀺. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀅𑀧𑀕𑀫𑀦𑀫𑀕𑁆𑀕𑀸. 𑀅𑀧𑁂𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀳𑀺 𑀅𑀧𑀸𑀬𑀸, 𑀢𑁂 𑀏𑀯 𑀫𑀼𑀔𑀸𑀦𑀻𑀢𑀺 𑀅𑀧𑀸𑀬𑀫𑀼𑀔𑀸𑀦𑀺. 𑀢𑀸𑀦𑀺 𑀘 𑀉𑀤𑀓𑀦𑀺𑀓𑁆𑀔𑀫𑀦𑀘𑁆𑀙𑀺𑀤𑁆𑀤𑀸𑀦𑀻𑀢𑀺 𑀆𑀳 ‘‘𑀅𑀧𑀯𑀸𑀳𑀦𑀘𑁆𑀙𑀺𑀤𑁆𑀤𑀸𑀦𑀻’’𑀢𑀺, 𑀅𑀧𑀸𑀬𑀲𑀗𑁆𑀔𑀸𑀢𑀸𑀦𑀺 𑀉𑀤𑀓𑀦𑀺𑀓𑁆𑀔𑀫𑀦𑀘𑁆𑀙𑀺𑀤𑁆𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀫𑁆𑀩𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀦𑀯𑀫𑁂 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑁋

‘‘𑀓𑀢𑀫𑀸 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸? 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀁 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸, 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀲𑁂𑀲𑀪𑀸𑀕𑀺𑀦𑀻 𑀧𑀜𑁆𑀜𑀸. 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁭𑁯𑁯) 𑁋

𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀦𑁆𑀢𑀺 𑀬𑁆𑀯𑀸𑀬𑀁 𑀅𑀧𑁆𑀧𑀕𑀼𑀡𑀲𑁆𑀲 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀢𑀁. 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀢𑀢𑁄 𑀯𑀼𑀝𑁆𑀞𑀺𑀢𑀁 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀫𑀲𑀳𑀕𑀢𑀸 𑀳𑀼𑀢𑁆𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺. 𑀢𑀲𑁆𑀲 𑀓𑀸𑀫𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 ‘‘𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸. 𑀢𑀤𑀦𑀼𑀥𑀫𑁆𑀫𑀢𑀸𑀢𑀺 𑀢𑀤𑀦𑀼𑀭𑀽𑀧𑀲𑀪𑀸𑀯𑀸. 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀇𑀤𑀁 𑀫𑀺𑀘𑁆𑀙𑀸𑀲𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀫𑁆𑀫𑀸𑀲𑀢𑀺𑀁. 𑀬𑀲𑁆𑀲 𑀳𑀺 𑀧𑀞𑀫𑀚𑁆𑀛𑀸𑀦𑀸𑀦𑀼𑀭𑀽𑀧𑀲𑀪𑀸𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀤𑀺𑀲𑁆𑀯𑀸 𑀅𑀲𑁆𑀲𑀸𑀤𑀬𑀫𑀸𑀦𑀸 𑀅𑀪𑀺𑀦𑀦𑁆𑀤𑀫𑀸𑀦𑀸 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀦𑀺𑀓𑀦𑁆𑀢𑀺𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀦𑁂𑀯 𑀳𑀸𑀬𑀢𑀺 𑀦 𑀯𑀟𑁆𑀠𑀢𑀺, 𑀞𑀺𑀢𑀺𑀓𑁄𑀝𑁆𑀞𑀸𑀲𑀺𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀞𑀺𑀢𑀺𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺. 𑀅𑀯𑀺𑀢𑀓𑁆𑀓𑀲𑀳𑀕𑀢𑀸𑀢𑀺 𑀅𑀯𑀺𑀢𑀓𑁆𑀓𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀦𑁆𑀢𑀢𑁄 𑀧𑀡𑀻𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀆𑀭𑀫𑁆𑀫𑀡𑀯𑀲𑁂𑀦 𑀅𑀯𑀺𑀢𑀓𑁆𑀓𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀕𑀼𑀡𑀢𑁄 𑀧𑀞𑀫𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀢𑁆𑀣𑀸𑀬 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺, 𑀢𑀲𑁆𑀲 𑀉𑀧𑀭𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀼𑀧𑀓𑁆𑀔𑀦𑁆𑀤𑀸𑀦𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀯𑀺𑀲𑁂𑀲𑀪𑀽𑀢𑀲𑁆𑀲 𑀤𑀼𑀢𑀺𑀬𑀚𑁆𑀛𑀸𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀢𑀸𑀬 ‘‘𑀯𑀺𑀲𑁂𑀲𑀪𑀸𑀕𑀺𑀦𑀻’’𑀢𑀺 𑀯𑀼𑀢𑁆𑀢𑀸.

𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑀸𑀢𑀺 𑀢𑀁𑀬𑁂𑀯 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀁 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀁 𑀦𑀺𑀩𑁆𑀩𑀺𑀤𑀸𑀲𑀗𑁆𑀔𑀸𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀲𑀳𑀕𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀛𑀸𑀦𑀗𑁆𑀕𑀪𑁂𑀤𑁂 𑀯𑀢𑁆𑀢𑀦𑁆𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑀺 𑀉𑀓𑁆𑀓𑀡𑁆𑀞𑀢𑀺, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀺𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀢𑀼𑀤𑀦𑁆𑀢𑀺 𑀘𑁄𑀤𑁂𑀦𑁆𑀢𑀺. 𑀯𑀺𑀭𑀸𑀕𑀽𑀧𑀲𑀜𑁆𑀳𑀺𑀢𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀉𑀧𑀲𑀁𑀳𑀺𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀲𑀓𑁆𑀓𑀸 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀸𑀢𑀼𑀦𑁆𑀢𑀺 𑀧𑀯𑀢𑁆𑀢𑀺𑀢𑁄 ‘‘𑀯𑀺𑀭𑀸𑀕𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀧𑀺 𑀯𑀺𑀭𑀸𑀕𑀽𑀧𑀲𑀁𑀳𑀺𑀢𑀸 𑀏𑀯 𑀦𑀸𑀫. 𑀢𑀲𑁆𑀲 𑀢𑁂𑀲𑀁 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸𑀦𑀁 𑀯𑀲𑁂𑀦 𑀲𑀸 𑀧𑀞𑀫𑀚𑁆𑀛𑀸𑀦𑀧𑀜𑁆𑀜𑀸 𑀅𑀭𑀺𑀬𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀲𑁆𑀲 𑀧𑀤𑀝𑁆𑀞𑀸𑀦𑀢𑀸𑀬 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀦𑀻’’𑀢𑀺 𑀯𑀼𑀢𑁆𑀢𑀸𑀢𑀺.

𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁦. 𑀤𑀲𑀫𑁂 𑀫𑀳𑀸𑀑𑀓𑀸𑀲𑁂𑀢𑀺 𑀫𑀳𑀦𑁆𑀢𑁂 𑀑𑀓𑀸𑀲𑁂 𑀫𑀳𑀦𑁆𑀢𑀸𑀦𑀺 𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀝𑁆𑀞𑀸𑀦𑀸𑀦𑀺. 𑀬𑁂𑀲𑀼 𑀧𑀢𑀺𑀝𑁆𑀞𑀸𑀧𑀺𑀢𑁄 𑀥𑀫𑁆𑀫𑁄 𑀦𑀺𑀘𑁆𑀙𑀻𑀬𑀢𑀺 𑀅𑀲𑀦𑁆𑀤𑁂𑀳𑀢𑁄. 𑀓𑀸𑀦𑀺 𑀧𑀦 𑀢𑀸𑀦𑀺? 𑀆𑀕𑀫𑀦𑀯𑀺𑀲𑀺𑀝𑁆𑀞𑀸𑀦𑀺 𑀲𑀼𑀢𑁆𑀢𑁄𑀢𑀭𑀡𑀸𑀤𑀻𑀦𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀅𑀧𑀤𑀺𑀲𑀻𑀬𑀦𑁆𑀢𑀻𑀢𑀺 𑀅𑀧𑀤𑁂𑀲𑀸, 𑀫𑀳𑀦𑁆𑀢𑀸 𑀅𑀧𑀤𑁂𑀲𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀧𑀤𑁂𑀲𑀸. ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀓𑁂𑀦𑀘𑀺 𑀆𑀪𑀢𑀲𑁆𑀲 𑀥𑀫𑁆𑀫𑁄𑀢𑀺 𑀯𑀺𑀦𑀺𑀘𑁆𑀙𑀬𑀦𑁂 𑀓𑀸𑀭𑀡𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀢𑀲𑁆𑀲 𑀬𑀣𑀸𑀪𑀢𑀲𑁆𑀲 𑀲𑀼𑀢𑁆𑀢𑁄𑀢𑀭𑀡𑀸𑀤𑀺 𑀏𑀯. 𑀬𑀤𑀺 𑀏𑀯𑀁 𑀓𑀣𑀁 𑀘𑀢𑁆𑀢𑀸𑀭𑁄𑀢𑀺? 𑀬𑀲𑁆𑀫𑀸 𑀥𑀫𑁆𑀫𑀲𑁆𑀲 𑀤𑁆𑀯𑁂 𑀲𑀫𑁆𑀧𑀤𑀸𑀬𑁄 𑀲𑀢𑁆𑀣𑀸 𑀲𑀸𑀯𑀓𑁄 𑀘. 𑀢𑁂𑀲𑀼 𑀲𑀸𑀯𑀓𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀯𑀲𑁂𑀦 𑀢𑀺𑀯𑀺𑀥𑀸. 𑀏𑀯𑀫𑀺𑀫𑀫𑁆𑀳𑀸 𑀫𑀬𑀸𑀬𑀁 𑀥𑀫𑁆𑀫𑁄 𑀧𑀝𑀺𑀕𑁆𑀕𑀳𑀺𑀢𑁄𑀢𑀺 𑀅𑀧𑀤𑀺𑀲𑀺𑀢𑀩𑁆𑀩𑀸𑀦𑀁 𑀪𑁂𑀤𑁂𑀦 𑀘𑀢𑁆𑀢𑀸𑀭𑁄. 𑀢𑁂𑀦𑀸𑀳 ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀼𑀢’’𑀦𑁆𑀢𑀺𑀆𑀤𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑁪.𑁧𑁮) ‘‘𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀩𑀼𑀤𑁆𑀥𑀸𑀧𑀤𑁂𑀲𑁄, 𑀲𑀗𑁆𑀖𑀸𑀧𑀤𑁂𑀲𑁄, 𑀕𑀡𑀸𑀧𑀤𑁂𑀲𑁄, 𑀧𑀼𑀕𑁆𑀕𑀮𑀸𑀧𑀤𑁂𑀲𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸’’𑀢𑀺. 𑀩𑀼𑀤𑁆𑀥𑁄 𑀅𑀧𑀤𑁂𑀲𑁄 𑀏𑀢𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀧𑀤𑁂𑀲𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀤𑀬𑁄…𑀧𑁂… 𑀫𑀳𑀸𑀓𑀸𑀭𑀡𑀸𑀦𑀻’’𑀢𑀺.

𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀕𑀦𑁆𑀣𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀦𑀁 𑀦𑀸𑀫 𑀲𑀯𑀦𑀦𑁆𑀢𑀺 𑀆𑀳 ‘‘𑀦 𑀲𑁄𑀢𑀩𑁆𑀩’’𑀦𑁆𑀢𑀺. 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀧𑀤𑀸𑀦𑀺 𑀘 𑀩𑁆𑀬𑀜𑁆𑀚𑀦𑀸𑀦𑀺 𑀘, 𑀅𑀢𑁆𑀣𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀧𑀤𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀳𑀻𑀢𑀺 𑀧𑀤𑀸𑀦𑀺, 𑀅𑀓𑁆𑀔𑀭𑀸𑀤𑀻𑀦𑀺 𑀩𑁆𑀬𑀜𑁆𑀚𑀦𑀧𑀤𑀸𑀦𑀺. 𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑀸𑀦𑀺, 𑀲𑀗𑁆𑀓𑀸𑀲𑀦𑀸𑀤𑀻𑀦𑀺 𑀅𑀢𑁆𑀣𑀧𑀤𑀸𑀦𑀺. ‘‘𑀅𑀝𑁆𑀞𑀓𑀣𑀸𑀬𑀁 𑀧𑀤𑀲𑀗𑁆𑀔𑀸𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀩𑁆𑀬𑀜𑁆𑀚𑀦𑀧𑀤𑀸𑀦𑁂𑀯 𑀯𑀼𑀢𑁆𑀢𑀸𑀦𑀻’’𑀢𑀺 𑀓𑁂𑀘𑀺. 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸𑀦𑀺, 𑀩𑁆𑀬𑀜𑁆𑀚𑀦𑀧𑀤𑀸𑀦𑀺. 𑀢𑁂𑀳𑀺 𑀩𑁆𑀬𑀜𑁆𑀚𑀺𑀢𑀩𑁆𑀩𑀢𑁄 𑀩𑁆𑀬𑀜𑁆𑀚𑀦𑀸𑀦𑀺, 𑀅𑀢𑁆𑀣𑀧𑀤𑀸𑀦𑀻𑀢𑀺 𑀉𑀪𑀬𑀲𑀗𑁆𑀕𑀳𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑁂𑀦𑀸𑀪𑀢𑀲𑀼𑀢𑁆𑀢𑀲𑁆𑀲 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂. 𑀧𑀸𑀴𑀺 𑀯𑀼𑀢𑁆𑀢𑀸𑀢𑀺 𑀓𑁂𑀯𑀮𑁄 𑀧𑀸𑀴𑀺𑀥𑀫𑁆𑀫𑁄 𑀯𑀼𑀢𑁆𑀢𑁄. 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀦𑀼𑀲𑀦𑁆𑀥𑀺 𑀓𑀣𑀺𑀢𑁄𑀢𑀺 𑀬𑀣𑀸𑀭𑀤𑁆𑀥𑀤𑁂𑀲𑀦𑀸𑀬 𑀉𑀧𑀭𑀺𑀤𑁂𑀲𑀦𑀸𑀬 𑀘 𑀅𑀦𑀼𑀲𑀦𑁆𑀥𑀸𑀦𑀁 𑀓𑀣𑀺𑀢𑀁, 𑀲𑀫𑁆𑀩𑀦𑁆𑀥𑁄 𑀓𑀣𑀺𑀢𑁄. 𑀧𑀼𑀩𑁆𑀩𑀸𑀧𑀭𑀁 𑀓𑀣𑀺𑀢𑀦𑁆𑀢𑀺 𑀧𑀼𑀩𑁆𑀩𑁂𑀦 𑀧𑀭𑀁 𑀅𑀯𑀺𑀭𑀼𑀚𑁆𑀛𑀦𑀜𑁆𑀘𑁂𑀯 𑀯𑀺𑀲𑁂𑀲𑀝𑁆𑀞𑀸𑀦𑀜𑁆𑀘 𑀓𑀣𑀺𑀢𑀁 𑀧𑀓𑀸𑀲𑀺𑀢𑀁. 𑀏𑀯𑀁 𑀧𑀸𑀴𑀺𑀥𑀫𑁆𑀫𑀸𑀤𑀻𑀦𑀺 𑀲𑀫𑁆𑀫𑀤𑁂𑀯 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀳𑀡𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀕𑀳𑁂𑀢𑁆𑀯𑀸’’𑀢𑀺. 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀜𑀸𑀡𑁂𑀦 𑀲𑀼𑀢𑁆𑀢𑁂 𑀑𑀕𑀸𑀳𑁂𑀢𑁆𑀯𑀸 𑀢𑀸𑀭𑁂𑀢𑀩𑁆𑀩𑀸𑀦𑀺. 𑀢𑀁 𑀧𑀦 𑀑𑀕𑀸𑀳𑁂𑀢𑁆𑀯𑀸 𑀢𑀭𑀡𑀁 𑀢𑀢𑁆𑀣 𑀑𑀢𑀭𑀡𑀁 𑀅𑀦𑀼𑀧𑁆𑀧𑀯𑁂𑀲𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀑𑀢𑀭𑀺𑀢𑀩𑁆𑀩𑀸𑀦𑀻’’𑀢𑀺. 𑀲𑀁𑀲𑀦𑁆𑀤𑁂𑀢𑁆𑀯𑀸 𑀤𑀲𑁆𑀲𑀦𑀁 𑀲𑀦𑁆𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀯𑀺𑀦𑀬𑁂 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀻’’𑀢𑀺.

‘‘𑀓𑀺𑀁 𑀧𑀦 𑀢𑀁 𑀲𑀼𑀢𑁆𑀢𑀁, 𑀓𑁄 𑀯𑀸 𑀯𑀺𑀦𑀬𑁄’’𑀢𑀺 𑀯𑀺𑀘𑀸𑀭𑀡𑀸𑀬𑀁 𑀆𑀘𑀭𑀺𑀬𑀸𑀦𑀁 𑀫𑀢𑀺𑀪𑁂𑀤𑀫𑀼𑀔𑁂𑀦 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀦𑀬𑁄𑀢𑀺 𑀯𑀺𑀪𑀗𑁆𑀕𑀧𑀸𑀞𑀫𑀸𑀳. 𑀲𑁄 𑀳𑀺 𑀫𑀸𑀢𑀺𑀓𑀸𑀲𑀜𑁆𑀜𑀺𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑁂 𑀲𑀽𑀘𑀦𑀢𑁄 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀯𑀺𑀯𑀺𑀥𑀦𑀬𑀢𑁆𑀢𑀸 𑀯𑀺𑀲𑀺𑀝𑁆𑀞𑀦𑀬𑀢𑁆𑀢𑀸 𑀘 𑀯𑀺𑀦𑀬𑁄, 𑀔𑀦𑁆𑀥𑀓𑀧𑀸𑀞𑁄. 𑀏𑀯𑀦𑁆𑀢𑀺 𑀏𑀯𑀁 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂𑀲𑀼 𑀯𑀺𑀦𑀬𑀧𑀺𑀝𑀓𑀫𑁆𑀧𑀺 𑀦 𑀧𑀭𑀺𑀬𑀸𑀤𑀺𑀬𑀢𑀺 𑀧𑀭𑀺𑀯𑀸𑀭𑀧𑀸𑀴𑀺𑀬𑀸 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀺 𑀯𑀸 𑀲𑀼𑀢𑁆𑀢𑀁 𑀅𑀢𑁆𑀣𑀲𑀽𑀘𑀦𑀸𑀤𑀺𑀅𑀢𑁆𑀣𑀲𑀫𑁆𑀪𑀯𑀢𑁄. 𑀏𑀯𑀫𑁆𑀧𑀻𑀢𑀺 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀺 𑀲𑀼𑀢𑁆𑀢𑀁, 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄𑀢𑀺 𑀏𑀯𑀁 𑀲𑀼𑀢𑁆𑀢𑀯𑀺𑀦𑀬𑀯𑀺𑀪𑀸𑀕𑁂 𑀯𑀼𑀘𑁆𑀘𑀫𑀸𑀦𑁂𑀧𑀺. 𑀦 𑀢𑀸𑀯 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀦 𑀢𑀸𑀯 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂𑀢𑀺 𑀆𑀳 ‘‘𑀅𑀲𑀼𑀢𑁆𑀢𑀦𑀸𑀫𑀓𑀜𑁆𑀳𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀺 𑀇𑀫𑀁 𑀦𑀸𑀫𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀲𑀗𑁆𑀕𑀻𑀢𑀁 𑀚𑀸𑀢𑀓𑀸𑀤𑀺𑀩𑀼𑀤𑁆𑀥𑀯𑀘𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀦 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺. 𑀲𑀼𑀢𑁆𑀢𑀦𑀺𑀧𑀸𑀢𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀸𑀦𑀺 𑀤𑀻𑀖𑀦𑀺𑀓𑀸𑀬𑀸𑀤𑀬𑁄 𑀯𑀺𑀬 𑀲𑀼𑀢𑁆𑀢𑀦𑁆𑀢𑀺 𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 𑀅𑀲𑀗𑁆𑀕𑀻𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀢𑁆𑀣 𑀚𑀸𑀢𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑀺. 𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀸𑀦𑀁 𑀧𑀦𑁂𑀢𑁆𑀣 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀁, 𑀓𑀺𑀁 𑀯𑀸 𑀏𑀢𑁂𑀦 𑀫𑀕𑁆𑀕𑀦𑁂𑀦. 𑀲𑀩𑁆𑀩𑁄𑀧𑀸𑀬𑀁 𑀯𑀡𑁆𑀡𑀦𑀸𑀦𑀬𑁄 𑀣𑁂𑀭𑀯𑀸𑀤𑀤𑀲𑁆𑀲𑀦𑀫𑀼𑀔𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 𑀏𑀯𑀸𑀢𑀺.

𑀓𑀺𑀁 𑀅𑀢𑁆𑀣𑀻𑀢𑀺 𑀅𑀲𑀼𑀢𑁆𑀢𑀦𑀸𑀫𑀓𑀁 𑀩𑀼𑀤𑁆𑀥𑀯𑀘𑀦𑀁 𑀦𑀢𑁆𑀣𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀲𑀼𑀢𑁆𑀢𑀦𑁆𑀢𑀺 𑀯𑀺𑀦𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 ‘‘𑀦𑀸𑀬𑀫𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄’’𑀢𑀺 𑀧𑀝𑀺𑀲𑁂𑀥𑁂𑀢𑁆𑀯𑀸. 𑀯𑀺𑀦𑁂𑀢𑀺 𑀏𑀢𑁂𑀦 𑀓𑀺𑀮𑁂𑀲𑁂𑀢𑀺 𑀯𑀺𑀦𑀬𑁄, 𑀓𑀺𑀮𑁂𑀲𑀯𑀺𑀦𑀬𑀦𑀽𑀧𑀸𑀬𑁄, 𑀲𑁄 𑀏𑀯 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀯𑀺𑀦𑀬𑁄 𑀧𑀦 𑀓𑀸𑀭𑀡’’𑀦𑁆𑀢𑀺.

𑀥𑀫𑁆𑀫𑁂𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂. 𑀲𑀭𑀸𑀕𑀸𑀬𑀸𑀢𑀺 𑀲𑀭𑀸𑀕𑀪𑀸𑀯𑀸𑀬 𑀓𑀸𑀫𑀭𑀸𑀕𑀪𑀯𑀭𑀸𑀕𑀧𑀭𑀺𑀩𑁆𑀭𑀽𑀳𑀦𑀸𑀬. 𑀲𑀁𑀬𑁄𑀕𑀸𑀬𑀸𑀢𑀺 𑀪𑀯𑀲𑀁𑀬𑁄𑀚𑀦𑀸𑀬. 𑀲𑀉𑀧𑀸𑀤𑀸𑀦𑀸𑀬𑀸𑀢𑀺 𑀘𑀢𑀼𑀭𑀽𑀧𑀸𑀤𑀸𑀦𑀽𑀧𑀲𑀁𑀳𑀺𑀢𑀢𑀸𑀬. 𑀫𑀳𑀺𑀘𑁆𑀙𑀢𑀸𑀬𑀸𑀢𑀺 𑀫𑀳𑀺𑀘𑁆𑀙𑀪𑀸𑀯𑀸𑀬. 𑀅𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀅𑀲𑀦𑁆𑀢𑀼𑀝𑁆𑀞𑀪𑀸𑀯𑀸𑀬. 𑀓𑁄𑀲𑀚𑁆𑀚𑀸𑀬𑀸𑀢𑀺 𑀓𑀼𑀲𑀻𑀢𑀪𑀸𑀯𑀸𑀬. 𑀲𑀗𑁆𑀕𑀡𑀺𑀓𑀸𑀬𑀸𑀢𑀺 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀸𑀬. 𑀆𑀘𑀬𑀸𑀬𑀸𑀢𑀺 𑀢𑀺𑀯𑀺𑀥𑀯𑀝𑁆𑀝𑀸𑀘𑀬𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀲𑀓𑀮𑀯𑀝𑁆𑀝𑀢𑁄 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀯𑀺𑀲𑀁𑀬𑁄𑀕𑀸𑀬𑀸𑀢𑀺 𑀓𑀸𑀫𑀭𑀸𑀕𑀸𑀤𑀻𑀳𑀺 𑀯𑀺𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀅𑀦𑀼𑀧𑀸𑀤𑀸𑀦𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀓𑀫𑁆𑀫𑀪𑀯𑀲𑁆𑀲 𑀅𑀕𑁆𑀕𑀳𑀡𑀸𑀬. 𑀅𑀧𑁆𑀧𑀺𑀘𑁆𑀙𑀢𑀸𑀬𑀸𑀢𑀺 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀲𑀩𑁆𑀩𑀲𑁄 𑀇𑀘𑁆𑀙𑀸𑀬 𑀅𑀧𑀕𑀫𑀸𑀬. 𑀲𑀦𑁆𑀢𑀼𑀝𑁆𑀞𑀺𑀬𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑀼𑀝𑁆𑀞𑀪𑀸𑀯𑀸𑀬. 𑀯𑀻𑀭𑀺𑀬𑀸𑀭𑀫𑁆𑀪𑀸𑀬𑀸𑀢𑀺 𑀓𑀸𑀬𑀺𑀓𑀲𑁆𑀲 𑀘𑁂𑀯 𑀘𑁂𑀢𑀲𑀺𑀓𑀲𑁆𑀲 𑀘 𑀯𑀻𑀭𑀺𑀬𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑁆𑀣𑀸𑀬. 𑀯𑀺𑀯𑁂𑀓𑀸𑀬𑀸𑀢𑀺 𑀧𑀯𑀺𑀯𑀺𑀢𑁆𑀢𑀪𑀸𑀯𑀸𑀬 𑀓𑀸𑀫𑀯𑀺𑀯𑁂𑀓𑀸𑀤𑀺𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀺𑀯𑀺𑀯𑁂𑀓𑀲𑀺𑀤𑁆𑀥𑀺𑀬𑀸. 𑀅𑀧𑀘𑀬𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀯𑀝𑁆𑀝𑀲𑁆𑀲 𑀅𑀧𑀘𑀬𑀦𑀸𑀬, 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀬𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀉𑀕𑁆𑀕𑀳𑀡𑀥𑀸𑀭𑀡𑀧𑀭𑀺𑀧𑀼𑀘𑁆𑀙𑀸𑀫𑀦𑀲𑀺𑀓𑀸𑀭𑀯𑀲𑁂𑀦 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀲𑀭𑀸𑀕𑀸𑀤𑀺𑀪𑀸𑀯𑀧𑀭𑀺𑀯𑀚𑁆𑀚𑀦𑀲𑁆𑀲 𑀓𑀸𑀭𑀡𑀁 𑀳𑀼𑀢𑁆𑀯𑀸 𑀯𑀺𑀭𑀸𑀕𑀸𑀤𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀺, 𑀏𑀓𑀁𑀲𑀢𑁄 𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄 𑀲𑀫𑁆𑀫𑀤𑁂𑀯 𑀅𑀧𑀸𑀬𑀸𑀤𑀻𑀲𑀼 𑀅𑀧𑀢𑀦𑀯𑀲𑁂𑀦 𑀥𑀸𑀭𑀡𑀢𑁄 𑀓𑀺𑀮𑁂𑀲𑀸𑀦𑀁 𑀯𑀺𑀦𑀬𑀦𑀢𑁄 𑀘. 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀑𑀯𑀸𑀤𑀸𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀘 𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀲𑀘𑁆𑀘𑀢𑁆𑀣𑀲𑀽𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀼𑀢𑁆𑀢𑁂𑀢𑀺 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂’’𑀢𑀺. 𑀢𑁂𑀧𑀺𑀝𑀓𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺. 𑀭𑀸𑀕𑀸𑀤𑀺𑀯𑀺𑀦𑀬𑀓𑀸𑀭𑀡𑀁 𑀬𑀣𑀸 𑀢𑁂𑀦 𑀲𑀼𑀢𑁆𑀢𑀧𑀤𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀦𑀬𑁂𑀢𑀺 𑀏𑀢𑀲𑁆𑀫𑀺𑀁 𑀭𑀸𑀕𑀸𑀤𑀺𑀯𑀺𑀦𑀬𑀓𑀸𑀭𑀡𑁂’’𑀢𑀺. 𑀲𑀼𑀢𑁆𑀢𑁂 𑀑𑀢𑀭𑀡𑀜𑁆𑀘𑁂𑀢𑁆𑀣 𑀢𑁂𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸𑀢𑀺 𑀆𑀳 ‘‘𑀲𑀼𑀢𑁆𑀢𑀧𑁆𑀧𑀝𑀺𑀧𑀸𑀝𑀺𑀬𑀸 𑀓𑀢𑁆𑀣𑀘𑀺 𑀅𑀦𑀸𑀕𑀦𑁆𑀢𑁆𑀯𑀸’’𑀢𑀺. 𑀙𑀮𑁆𑀮𑀺𑀁 𑀉𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀭𑁄𑀕𑀲𑁆𑀲 𑀫𑀳𑀢𑁄 𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀉𑀧𑀓𑁆𑀓𑀫𑁂𑀦 𑀙𑀮𑁆𑀮𑀺𑀓𑀸𑀬 𑀲𑀓𑀮𑀺𑀓𑀸𑀬 𑀧𑀧𑀝𑀺𑀓𑀸𑀬 𑀯𑀸 𑀉𑀝𑁆𑀞𑀸𑀧𑀦𑀁 𑀯𑀺𑀬 𑀅𑀭𑁄𑀕𑀲𑁆𑀲 𑀲𑀸𑀲𑀦𑀥𑀫𑁆𑀫𑀲𑁆𑀲 𑀢𑀺𑀝𑁆𑀞𑀢𑁄 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀙𑀮𑁆𑀮𑀺𑀲𑀤𑀺𑀲𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀢𑀸𑀤𑀺𑀤𑁄𑀲𑀁 𑀉𑀝𑁆𑀞𑀧𑁂𑀢𑁆𑀯𑀸 𑀧𑀭𑀺𑀤𑀻𑀧𑁂𑀢𑁆𑀯𑀸. 𑀢𑀸𑀤𑀺𑀲𑀸𑀦𑀺 𑀧𑀦 𑀏𑀓𑀁𑀲𑀢𑁄 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭…𑀧𑁂… 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀭𑀸𑀕𑀸𑀤𑀺𑀯𑀺𑀦𑀬𑁂𑀢𑀺 𑀭𑀸𑀕𑀸𑀤𑀺𑀯𑀺𑀦𑀬𑀦𑀢𑁆𑀣𑁂𑀦 𑀅𑀢𑀤𑀸𑀓𑀸𑀭𑀢𑀸𑀬 𑀅𑀧𑀜𑁆𑀜𑀸𑀬𑀫𑀸𑀦𑀸𑀦𑀺 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀘𑀚𑀺𑀢𑀩𑁆𑀩𑀸𑀦𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑀫𑀳𑀸𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀜𑁆𑀘𑁂𑀢𑀦𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.