𑁩. 𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀆𑀩𑀸𑀥𑀦𑀢𑁄 𑀩𑁆𑀬𑀸𑀩𑀸𑀥𑁄𑀯 𑀩𑁆𑀬𑀸𑀩𑀚𑁆𑀛𑀁, 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀤𑀼𑀓𑁆𑀔𑀁. 𑀲𑀳 𑀩𑁆𑀬𑀸𑀩𑀚𑁆𑀛𑁂𑀦 𑀯𑀢𑁆𑀢𑀢𑀻𑀢𑀺 𑀲𑀩𑁆𑀬𑀸𑀩𑀚𑁆𑀛𑀁. 𑀢𑁂𑀦𑀸𑀳 ‘‘𑀲𑀤𑀼𑀓𑁆𑀔’’𑀦𑁆𑀢𑀺. 𑀘𑁂𑀢𑀦𑀸𑀭𑀸𑀲𑀺𑀦𑁆𑀢𑀺 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀭𑀸𑀲𑀺𑀁. 𑀘𑁂𑀢𑀦𑀁 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 ‘‘𑀭𑀸𑀲𑀺𑀁 𑀓𑀭𑁄𑀢𑀺 𑀧𑀺𑀡𑁆𑀟𑀁 𑀓𑀭𑁄𑀢𑀻’’𑀢𑀺 𑀘 𑀯𑀼𑀢𑁆𑀢𑁄. 𑀲𑀤𑀼𑀓𑁆𑀔𑀦𑁆𑀢𑀺 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀁. 𑀢𑁂𑀦𑀸𑀳 ‘‘𑀲𑀸𑀩𑀸𑀥𑀁 𑀦𑀺𑀭𑀲𑁆𑀲𑀸𑀤’’𑀦𑁆𑀢𑀺. 𑀅𑀢𑁆𑀣𑀻𑀢𑀺 𑀉𑀚𑀼𑀓𑀁 𑀤𑀼𑀓𑁆𑀔𑀯𑁂𑀤𑀦𑀸 𑀦𑀢𑁆𑀣𑀻𑀢𑀺 𑀅𑀯𑀢𑁆𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀦𑀺𑀝𑁆𑀞𑀲𑀪𑀸𑀯𑀢𑁆𑀢𑀸 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀢𑁆𑀢𑀸 𑀘 𑀤𑀼𑀓𑁆𑀔𑀧𑀓𑁆𑀔𑀺𑀓𑀸𑀯 𑀲𑀸 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑀸 𑀇𑀝𑁆𑀞𑀸 𑀦𑀸𑀫 𑀅𑀢𑁆𑀣𑀻, 𑀓𑀼𑀲𑀮𑀯𑀺𑀧𑀸𑀓𑀸 𑀧𑀦 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀢𑀢𑁆𑀣 𑀅𑀧𑁆𑀧𑀸𑀯𑀲𑀭𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑀺𑀭𑀬𑀲𑁆𑀲 𑀤𑀼𑀓𑁆𑀔𑀩𑀳𑀼𑀮𑀢𑁆𑀢𑀸 𑀤𑀼𑀓𑁆𑀔𑀲𑁆𑀲 𑀘 𑀢𑀢𑁆𑀣 𑀩𑀮𑀯𑀢𑀸𑀬 𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀯𑀼𑀢𑁆𑀢𑀁. 𑀉𑀧𑀫𑀁 𑀓𑀢𑁆𑀯𑀸 𑀆𑀳𑀝𑁄 𑀯𑀺𑀲𑁂𑀲𑁄 𑀯𑀺𑀬 𑀲𑀸𑀫𑀜𑁆𑀜𑀲𑁆𑀲 𑀬𑀣𑀸 𑀅𑀬𑁄𑀧𑀺𑀡𑁆𑀟𑀺𑀭𑁄𑀳𑀺𑀦𑁄 𑀯𑀺𑀬 𑀭𑀽𑀧𑀸𑀦𑀦𑁆𑀢𑀺. 𑀧𑀝𑀺𑀪𑀸𑀕𑀉𑀧𑀫𑀸𑀢𑀺 𑀧𑀝𑀺𑀩𑀺𑀫𑁆𑀩𑀉𑀧𑀫𑀸.

𑀢𑁂 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀳𑁂𑀝𑁆𑀞𑀺𑀫𑀩𑁆𑀭𑀳𑁆𑀫𑀮𑁄𑀓𑁂 𑀅𑀕𑁆𑀕𑀳𑁂𑀢𑁆𑀯𑀸. 𑀯𑁄𑀫𑀺𑀲𑁆𑀲𑀓𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑀺𑀫𑀺𑀲𑁆𑀲𑀓𑀲𑀼𑀔𑀤𑀼𑀓𑁆𑀔𑀁 𑀧𑀻𑀢𑀺𑀫𑀺𑀲𑁆𑀲𑀓𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀺 𑀧𑀸𑀧𑀓𑀫𑁆𑀫𑀁. 𑀓𑀫𑁆𑀫𑀲𑀻𑀲𑁂𑀦 𑀨𑀮𑀁 𑀯𑀤𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀅𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑀆𑀕𑀢𑀁, ‘‘𑀅𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻’’𑀢𑀺 𑀧𑀦 𑀯𑀘𑀦𑁂𑀦 𑀮𑁄𑀓𑀼𑀢𑁆𑀢𑀭𑀨𑀲𑁆𑀲𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 ‘‘𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀓𑀣𑀺𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀲𑀗𑁆𑀔𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.