𑁪. 𑀆𑀦𑁂𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀘𑀢𑀼𑀢𑁆𑀣𑁂 𑀲𑀳 𑀩𑁆𑀬𑀬𑀢𑀺 𑀕𑀘𑁆𑀙𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀧𑀯𑀢𑁆𑀢𑀦𑀓𑁄. 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀲𑀳𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀳𑀪𑀸𑀯𑀁 𑀉𑀧𑀧𑀚𑁆𑀚𑀢𑀻’’𑀢𑀺. ‘‘𑀬𑀸𑀯𑀢𑀓𑀁 𑀢𑁂𑀲𑀁 𑀤𑁂𑀯𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀲𑀩𑁆𑀩𑀁 𑀔𑁂𑀧𑁂𑀢𑁆𑀯𑀸 𑀦𑀺𑀭𑀬𑀫𑁆𑀧𑀺 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀅𑀭𑀽𑀧𑀪𑀯𑀢𑁄 𑀘𑀼𑀢𑀲𑁆𑀲 𑀅𑀧𑀸𑀬𑀽𑀧𑀧𑀢𑁆𑀢𑀺 𑀯𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀺𑀤𑀁 𑀯𑀘𑀦’’𑀦𑁆𑀢𑀺 𑀤𑀻𑀧𑁂𑀢𑀺 ‘‘𑀦𑀺𑀭𑀬𑀸𑀤𑀻𑀳𑀺 𑀅𑀯𑀺𑀧𑁆𑀧𑀫𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺𑀦𑀸. 𑀦 𑀳𑀺 𑀢𑀲𑁆𑀲 𑀉𑀧𑀘𑀸𑀭𑀚𑁆𑀛𑀸𑀦𑀢𑁄 𑀩𑀮𑀯𑀢𑀭𑀁 𑀅𑀓𑀼𑀲𑀮𑀁 𑀅𑀢𑁆𑀣𑀻𑀢𑀺. 𑀇𑀫𑀺𑀦𑀸 𑀢𑀢𑁄 𑀘𑀯𑀦𑁆𑀢𑀸𑀦𑀁 𑀉𑀧𑀘𑀸𑀭𑀚𑁆𑀛𑀸𑀦𑀫𑁂𑀯 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀥𑀺𑀓𑀁 𑀧𑀬𑀲𑀢𑀺 𑀧𑀬𑀼𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀲𑀯𑀺𑀲𑁂𑀲𑀁 𑀇𑀢𑀺𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸. 𑀢𑁂𑀦𑀸𑀳 ‘‘𑀅𑀥𑀺𑀓𑀧𑁆𑀧𑀬𑁄𑀕𑁄’’𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀆𑀦𑁂𑀜𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.