𑁫. 𑀧𑀭𑀺𑀲𑀯𑀕𑁆𑀕𑀯𑀡𑁆𑀡𑀦𑀸

𑁪𑁩. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀉𑀤𑁆𑀥𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬, 𑀅𑀯𑀚𑁆𑀚𑁂 𑀯𑀚𑁆𑀚𑀲𑀜𑁆𑀜𑀺𑀢𑀸𑀬, 𑀯𑀚𑁆𑀚𑁂 𑀅𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀉𑀤𑁆𑀥𑀘𑁆𑀘𑀧𑁆𑀧𑀓𑀢𑀺𑀓𑀸. 𑀬𑁂 𑀳𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑁄 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀓𑀼𑀲𑀮𑀸 𑀲𑀓𑀺𑀜𑁆𑀘𑀦𑀓𑀸𑀭𑀺𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀩𑀳𑀼𑀮𑀸, 𑀢𑁂𑀲𑀁 𑀅𑀦𑀼𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀺. 𑀲𑀸𑀭𑀸𑀪𑀸𑀯𑁂𑀦 𑀢𑀼𑀘𑁆𑀙𑀢𑁆𑀢𑀸 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑁄𑀢𑀺 𑀆𑀳 ‘‘𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸’’𑀢𑀺. 𑀢𑁂𑀦𑀸𑀳 ‘‘𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸’’𑀢𑀺. 𑀫𑀸𑀦𑁄 𑀳𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀢𑀺 𑀲𑀤𑀺𑀲𑁄𑀢𑀺 𑀘 𑀧𑀯𑀢𑁆𑀢𑀺𑀬𑀸 𑀯𑀺𑀲𑁂𑀲𑀢𑁄 𑀢𑀼𑀘𑁆𑀙𑁄. 𑀘𑀸𑀧𑀮𑁆𑀮𑁂𑀦𑀸𑀢𑀺 𑀘𑀧𑀮𑀪𑀸𑀯𑁂𑀦, 𑀢𑀡𑁆𑀳𑀸𑀮𑁄𑀮𑀼𑀧𑁆𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀼𑀔𑀔𑀭𑀸𑀢𑀺 𑀫𑀼𑀔𑁂𑀦 𑀨𑀭𑀼𑀲𑀸, 𑀨𑀭𑀼𑀲𑀯𑀸𑀤𑀺𑀦𑁄𑀢𑀺 𑀅𑀢𑁆𑀣𑁄.

𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀯𑀺𑀲𑁆𑀲𑀝𑀯𑀘𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑀺𑀢𑀸𑀬 𑀅𑀧𑀭𑀺𑀬𑀦𑁆𑀢𑀯𑀘𑀦𑀸. 𑀢𑁂𑀦𑀸𑀳 ‘‘𑀅𑀲𑀁𑀬𑀢𑀯𑀘𑀦𑀸’’𑀢𑀺𑀆𑀤𑀺. 𑀯𑀺𑀲𑁆𑀲𑀝𑁆𑀞𑀲𑀢𑀺𑀦𑁄𑀢𑀺 𑀲𑀢𑀺𑀯𑀺𑀭𑀳𑀺𑀢𑀸. 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀲𑀢𑀺𑀬𑀸 𑀲𑀢𑀺𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀏𑀯𑀁 𑀯𑀼𑀢𑁆𑀢𑀸. 𑀦 𑀲𑀫𑁆𑀧𑀚𑀸𑀦𑀦𑁆𑀢𑀻𑀢𑀺 𑀅𑀲𑀫𑁆𑀧𑀚𑀸𑀦𑀸, 𑀢𑀁𑀬𑁄𑀕𑀦𑀺𑀯𑀢𑁆𑀢𑀺𑀬𑀁 𑀘𑀸𑀬𑀁 𑀅𑀓𑀸𑀭𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁨), 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁭𑁬) 𑀯𑀺𑀬𑀸𑀢𑀺 𑀆𑀳 ‘‘𑀦𑀺𑀧𑁆𑀧𑀜𑁆𑀜𑀸’’𑀢𑀺, 𑀧𑀜𑁆𑀜𑀸𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀉𑀩𑁆𑀪𑀦𑁆𑀢𑀘𑀺𑀢𑁆𑀢𑀸. 𑀲𑀫𑀸𑀥𑀺𑀯𑀺𑀭𑀳𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀉𑀤𑁆𑀥𑀘𑁆𑀘𑁂𑀦 𑀢𑁂𑀲𑀁 𑀲𑀫𑀸𑀥𑀺𑀯𑀺𑀭𑀳𑀸𑀦𑀁 𑀘𑀺𑀢𑁆𑀢𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀭𑀺𑀩𑁆𑀪𑀫𑀢𑀺 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀯𑀦𑀲𑀸𑀔𑀸𑀲𑀼. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀲𑀁𑀯𑀭𑀸𑀪𑀸𑀯𑁂𑀦 𑀕𑀺𑀳𑀺𑀓𑀸𑀮𑁂 𑀯𑀺𑀬 𑀯𑀺𑀯𑀝𑀇𑀦𑁆𑀤𑁆𑀭𑀺𑀬𑀸. 𑀢𑁂𑀦𑀸𑀳 ‘‘𑀧𑀓𑀢𑀺𑀬𑀸 𑀞𑀺𑀢𑁂𑀳𑀻’’𑀢𑀺𑀆𑀤𑀺. 𑀯𑀺𑀯𑀝𑁂𑀳𑀻𑀢𑀺 𑀅𑀲𑀁𑀯𑀼𑀢𑁂𑀳𑀺.

𑁪𑁪. 𑀤𑀼𑀢𑀺𑀬𑁂 𑀪𑀡𑁆𑀟𑀦𑀁 𑀯𑀼𑀘𑁆𑀘𑀢𑀺 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄𑀢𑀺 𑀓𑀮𑀳𑀲𑁆𑀲 𑀳𑁂𑀢𑀼𑀪𑀽𑀢𑀸 𑀧𑀭𑀺𑀪𑀸𑀲𑀸 𑀢𑀁𑀲𑀤𑀺𑀲𑀻 𑀘 𑀅𑀦𑀺𑀝𑁆𑀞𑀓𑀺𑀭𑀺𑀬𑀸 𑀪𑀡𑁆𑀟𑀦𑀁 𑀦𑀸𑀫. 𑀓𑀮𑀳𑀚𑀸𑀢𑀸𑀢𑀺 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀓𑀮𑀳𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀓𑀮𑀳𑀚𑀸𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑀺𑀭𑀼𑀤𑁆𑀥𑀯𑀸𑀤𑀦𑁆𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀭𑀼𑀤𑁆𑀥𑀯𑀸𑀤𑀪𑀽𑀢𑀁 𑀯𑀺𑀯𑀸𑀤𑀁. 𑀫𑀼𑀔𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀬 𑀯𑀸𑀘𑀸 𑀇𑀥 ‘‘𑀫𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀤𑀼𑀩𑁆𑀪𑀸𑀲𑀺𑀢𑀸 𑀯𑀸𑀘𑀸 𑀫𑀼𑀔𑀲𑀢𑁆𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀁 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀦𑁂𑀳𑀺 𑀧𑀓𑀢𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀏𑀓𑀢𑁄 𑀓𑀢𑁆𑀢𑀩𑁆𑀩𑀢𑁆𑀢𑀸 𑀏𑀓𑀓𑀫𑁆𑀫𑀁 𑀦𑀸𑀫. 𑀧𑀜𑁆𑀘𑀯𑀺𑀥𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀏𑀓𑀢𑁄 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸 𑀏𑀓𑀼𑀤𑁆𑀤𑁂𑀲𑁄 𑀦𑀸𑀫. 𑀧𑀜𑁆𑀜𑀢𑁆𑀢𑀁 𑀧𑀦 𑀲𑀺𑀓𑁆𑀔𑀸𑀧𑀤𑀁 𑀲𑀩𑁆𑀩𑁂𑀳𑀺𑀧𑀺 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀳𑀺 𑀲𑀫𑀁 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀲𑀫𑀲𑀺𑀓𑁆𑀔𑀢𑀸 𑀦𑀸𑀫. 𑀧𑀸𑀴𑀺𑀬𑀁 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀬𑀣𑀸 𑀔𑀻𑀭𑀜𑁆𑀘 𑀉𑀤𑀓𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀢𑀺, 𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀓𑀢𑁆𑀢𑀁 𑀯𑀺𑀬 𑀉𑀧𑁂𑀢𑀺. 𑀲𑀢𑀺𑀧𑀺 𑀳𑀺 𑀉𑀪𑀬𑁂𑀲𑀁 𑀓𑀮𑀸𑀧𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑁂𑀤𑁂 𑀧𑀘𑀼𑀭𑀚𑀦𑁂𑀳𑀺 𑀧𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀁 𑀔𑀻𑀭𑁄𑀤𑀓𑀁 𑀲𑀫𑁄𑀤𑀺𑀢𑀁 𑀅𑀘𑁆𑀘𑀦𑁆𑀢𑀫𑁂𑀯 𑀲𑀁𑀲𑀝𑁆𑀞𑀁 𑀯𑀺𑀬 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀲𑀸𑀫𑀕𑁆𑀕𑀺𑀯𑀲𑁂𑀦 𑀏𑀓𑀢𑁆𑀢𑀽𑀧𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀬𑀸𑀢𑀺 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑁂𑀢𑁆𑀢𑀸𑀘𑀓𑁆𑀔𑀽𑀳𑀻𑀢𑀺 𑀫𑁂𑀢𑁆𑀢𑀸𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀑𑀮𑁄𑀓𑀦𑀘𑀓𑁆𑀔𑀽𑀳𑀺. 𑀢𑀸𑀦𑀺 𑀳𑀺 𑀧𑀺𑀬𑀪𑀸𑀯𑀤𑀻𑀧𑀦𑀢𑁄 ‘‘𑀧𑀺𑀬𑀘𑀓𑁆𑀔𑀽𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁪𑁫. 𑀢𑀢𑀺𑀬𑁂 𑀅𑀕𑁆𑀕𑀯𑀢𑀻𑀢𑀺 𑀏𑀢𑁆𑀣 𑀅𑀕𑁆𑀕-𑀲𑀤𑁆𑀤𑁄 𑀉𑀢𑁆𑀢𑀫𑀧𑀭𑀺𑀬𑀸𑀬𑁄, 𑀢𑁂𑀦 𑀯𑀺𑀲𑀺𑀝𑁆𑀞𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀯𑀺𑀲𑀺𑀝𑁆𑀞𑀸𑀬 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀕𑀳𑀡𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀕𑁆𑀕𑀯𑀢𑀻𑀢𑀺 𑀉𑀢𑁆𑀢𑀫𑀧𑀼𑀕𑁆𑀕𑀮𑀯𑀢𑀻’’𑀢𑀺𑀆𑀤𑀺. 𑀅𑀯𑀺𑀕𑀢𑀢𑀡𑁆𑀳𑀢𑀸𑀬 𑀢𑀁 𑀢𑀁 𑀧𑀭𑀺𑀓𑁆𑀔𑀸𑀭𑀚𑀸𑀢𑀁 𑀩𑀳𑀼𑀁 𑀮𑀦𑁆𑀢𑀺 𑀆𑀤𑀺𑀬𑀦𑁆𑀢𑀻𑀢𑀺 𑀩𑀳𑀼𑀮𑀸, 𑀩𑀳𑀼𑀮𑀸 𑀏𑀯 𑀩𑀸𑀳𑀼𑀮𑀺𑀓𑀸 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮; 𑀫. 𑀦𑀺. 𑁧.𑁨𑁪𑁬). 𑀢𑁂 𑀧𑀦 𑀬𑀲𑁆𑀫𑀸 𑀧𑀘𑁆𑀘𑀬𑀩𑀳𑀼𑀪𑀸𑀯𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸’’𑀢𑀺. 𑀲𑀺𑀓𑁆𑀔𑀸𑀬 𑀆𑀤𑀭𑀕𑀸𑀭𑀯𑀸𑀪𑀸𑀯𑀢𑁄 𑀲𑀺𑀣𑀺𑀮𑀁 𑀅𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀲𑀸𑀣𑀮𑀺𑀓𑀸𑀢𑀺 𑀯𑀼𑀢𑁆𑀢𑀁. 𑀲𑀺𑀣𑀺𑀮𑀦𑁆𑀢𑀺 𑀘 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀲𑀺𑀣𑀺𑀮𑀲𑀤𑁆𑀤𑁂𑀦 𑀯𑀸 𑀲𑀫𑀸𑀦𑀢𑁆𑀣𑀲𑁆𑀲 𑀲𑀸𑀣𑀮𑀲𑀤𑁆𑀤𑀲𑁆𑀲 𑀯𑀲𑁂𑀦 𑀲𑀸𑀣𑀮𑀺𑀓𑀸𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀥𑁄𑀕𑀫𑀦𑀝𑁆𑀞𑁂𑀦, 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀺𑀯𑀺𑀯𑁂𑀓𑁂𑀢𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑀸𑀬 𑀉𑀧𑀥𑀺𑀯𑀺𑀯𑀺𑀢𑁆𑀢𑁂. 𑀑𑀭𑁄𑀧𑀺𑀢𑀥𑀼𑀭𑀸𑀢𑀺 𑀉𑀚𑁆𑀛𑀺𑀢𑀼𑀲𑁆𑀲𑀸𑀳𑀸. 𑀤𑀼𑀯𑀺𑀥𑀫𑁆𑀧𑀺 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁.

𑁪𑁬. 𑀘𑀢𑀼𑀢𑁆𑀣𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀅𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁆𑀢𑀓𑀫𑁂𑀯 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀅𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀁 𑀦𑀢𑁆𑀣𑀻𑀢𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀅𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑀣𑀸𑀲𑀪𑀸𑀯𑀢𑁄 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀲𑀭𑀲𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂𑀦 𑀅𑀲𑀫𑁆𑀫𑁄𑀳𑀢𑁄 𑀦𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄 𑀘 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀘𑀸 𑀤𑀼𑀓𑁆𑀔𑀲𑁆𑀲 𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺. 𑀅𑀘𑁆𑀘𑀦𑁆𑀢𑀓𑁆𑀔𑀬𑁄𑀢𑀺 𑀅𑀘𑁆𑀘𑀦𑁆𑀢𑀓𑁆𑀔𑀬𑀦𑀺𑀫𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁. 𑀅𑀲𑀫𑀼𑀧𑁆𑀧𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫 𑀢𑀤𑀼𑀪𑀬𑀫𑁆𑀧𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀢𑁂𑀲𑀁 𑀅𑀲𑀫𑀼𑀧𑁆𑀧𑀢𑁆𑀢𑀺 𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁪𑁭. 𑀧𑀜𑁆𑀘𑀫𑁂 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁂𑀦 ‘‘𑀧𑀭𑀺𑀲𑀸𑀓𑀲𑀝𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀲𑀝𑀧𑀭𑀺𑀲𑀸’’𑀢𑀺𑀆𑀤𑀺. ‘‘𑀓𑀲𑀝𑀧𑀭𑀺𑀲𑀸’’𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀭𑀺𑀲𑀸𑀓𑀲𑀝𑁄’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀲𑀸𑀫𑀡𑁆𑀟𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁪𑁮. 𑀙𑀝𑁆𑀞𑁂 𑀕𑀫𑁆𑀪𑀻𑀭𑀸𑀢𑀺 𑀅𑀕𑀸𑀥𑀸 𑀤𑀼𑀓𑁆𑀔𑁄𑀕𑀸𑀴𑁆𑀳𑀸. 𑀧𑀸𑀴𑀺𑀯𑀲𑁂𑀦𑀸𑀢𑀺 𑀇𑀫𑀺𑀦𑀸 𑀬𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀺𑀲𑀬𑁄 𑀕𑀫𑁆𑀪𑀻𑀭𑀪𑀸𑀯𑁄, 𑀢𑀫𑀸𑀳. 𑀥𑀫𑁆𑀫𑀧𑁆𑀧𑀝𑀺𑀯𑁂𑀥𑀲𑁆𑀲 𑀳𑀺 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀲𑁆𑀲 𑀧𑀸𑀴𑀺𑀬𑀸 𑀤𑀼𑀓𑁆𑀔𑁄𑀕𑀸𑀴𑁆𑀳𑀢𑀸𑀬 𑀕𑀫𑁆𑀪𑀻𑀭𑀪𑀸𑀯𑁄. ‘‘𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸’’𑀢𑀺 𑀯𑀢𑁆𑀯𑀸 ‘‘𑀲𑀮𑁆𑀮𑀲𑀼𑀢𑁆𑀢𑀲𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 ‘‘𑀅𑀦𑀺𑀫𑀺𑀢𑁆𑀢𑀫𑀦𑀜𑁆𑀜𑀸𑀢’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁫𑁭𑁯) 𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀢𑀸𑀬 𑀮𑀩𑁆𑀪𑀦𑀢𑁄. 𑀢𑀣𑀸 𑀳𑀺 𑀢𑀢𑁆𑀣 𑀢𑀸 𑀕𑀸𑀣𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀢𑀺𑀝𑁆𑀞𑀦𑁆𑀢𑀺. 𑀤𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀳𑀺 𑀜𑀸𑀡𑁂𑀦 𑀤𑀼𑀓𑁆𑀔𑁄𑀕𑀸𑀴𑁆𑀳𑀦𑁆𑀢𑀺 𑀓𑀢𑁆𑀯𑀸 ‘‘𑀕𑀫𑁆𑀪𑀻𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑀸𑀧𑀭𑀫𑁆𑀧𑁂𑀢𑁆𑀣 𑀓𑀸𑀲𑀜𑁆𑀘𑀺 𑀕𑀸𑀣𑀸𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀴𑁆𑀳𑀫𑁂𑀯, 𑀢𑀲𑁆𑀫𑀸 𑀢𑀁 ‘‘𑀧𑀸𑀴𑀺𑀯𑀲𑁂𑀦 𑀕𑀫𑁆𑀪𑀻𑀭𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀯 𑀦𑀬𑁂𑀦 ‘‘𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀸’’𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀲𑁆𑀲 (𑀫. 𑀦𑀺. 𑁧.𑁪𑁪𑁯 𑀆𑀤𑀬𑁄) 𑀅𑀢𑁆𑀣𑀯𑀲𑁂𑀦 𑀕𑀫𑁆𑀪𑀻𑀭𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀯. 𑀮𑁄𑀓𑀁 𑀉𑀢𑁆𑀢𑀭𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑁄, 𑀦𑀯𑀯𑀺𑀥𑁄 𑀅𑀧𑁆𑀧𑀫𑀸𑀡𑀥𑀫𑁆𑀫𑁄. 𑀲𑁄 𑀅𑀢𑁆𑀣𑀪𑀽𑀢𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀮𑁄𑀓𑀼𑀢𑁆𑀢𑀭𑀸. 𑀢𑁂𑀦𑀸𑀳 ‘‘𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀤𑀻𑀧𑀓𑀸’’𑀢𑀺.

𑀲𑀢𑁆𑀢𑀲𑀼𑀜𑁆𑀜𑀁 𑀥𑀫𑁆𑀫𑀫𑀢𑁆𑀢𑀫𑁂𑀯𑀸𑀢𑀺 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀲𑀼𑀜𑁆𑀜𑀁 𑀓𑁂𑀯𑀮𑀁 𑀥𑀫𑁆𑀫𑀫𑀢𑁆𑀢𑀫𑁂𑀯. 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀦𑁆𑀢𑀺 𑀮𑀺𑀗𑁆𑀕𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀕𑁆𑀕𑀳𑁂𑀢𑀩𑁆𑀩𑁂 𑀘 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑁂 𑀘𑀸’’𑀢𑀺. 𑀓𑀯𑀺𑀦𑁄 𑀓𑀫𑁆𑀫𑀁 𑀓𑀯𑀺𑀢𑀸. 𑀬𑀁 𑀧𑀦𑀲𑁆𑀲 𑀓𑀫𑁆𑀫𑀁, 𑀢𑀁 𑀢𑁂𑀦 𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀯𑀺𑀢𑀸𑀢𑀺 𑀓𑀯𑀻𑀳𑀺 𑀓𑀢𑀸’’𑀢𑀺. 𑀇𑀢𑀭𑀦𑁆𑀢𑀺 𑀓𑀸𑀯𑁂𑀬𑁆𑀬𑀸𑀢𑀺 𑀧𑀤𑀁, 𑀓𑀸𑀩𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀩𑁆𑀬𑀦𑁆𑀢𑀺 𑀘 𑀓𑀯𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀯𑀺𑀘𑀺𑀢𑁆𑀭𑀅𑀓𑁆𑀔𑀭𑀸𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑀓𑁆𑀔𑀭𑀸 𑀯𑀺𑀜𑁆𑀜𑀸𑀧𑀦𑀻𑀬𑀸. 𑀲𑀸𑀲𑀦𑀢𑁄 𑀩𑀳𑀺𑀪𑀽𑀢𑀸𑀢𑀺 𑀦 𑀲𑀸𑀲𑀦𑀸𑀯𑀘𑀭𑀸. 𑀢𑁂𑀲𑀁 𑀲𑀸𑀯𑀓𑁂𑀳𑀻𑀢𑀺 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀢𑀺 𑀅𑀧𑀜𑁆𑀜𑀸𑀢𑀸𑀦𑀁 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀲𑀸𑀯𑀓𑁂𑀳𑀺. 𑀦 𑀘𑁂𑀯 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀧𑀼𑀘𑁆𑀙𑀦𑁆𑀢𑀻𑀢𑀺 𑀬𑁂 𑀯𑀸𑀘𑁂𑀦𑁆𑀢𑀺, 𑀬𑁂 𑀘 𑀲𑀼𑀡𑀦𑁆𑀢𑀺, 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀢𑁆𑀣𑀸𑀤𑀺𑀁 𑀦𑀧𑁆𑀧𑀝𑀺𑀧𑀼𑀘𑁆𑀙𑀦𑁆𑀢𑀺, 𑀓𑁂𑀯𑀮𑀁 𑀯𑀸𑀘𑀦𑀲𑀯𑀦𑀫𑀢𑁆𑀢𑁂𑀦𑁂𑀯 𑀧𑀭𑀺𑀢𑀼𑀝𑁆𑀞𑀸 𑀳𑁄𑀦𑁆𑀢𑀺. 𑀘𑀸𑀭𑀺𑀓𑀁 𑀦 𑀯𑀺𑀘𑀭𑀦𑁆𑀢𑀻𑀢𑀺 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑀸𑀤𑀺𑀁 𑀚𑀸𑀦𑀦𑁆𑀢𑀸 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬 𑀘𑀸𑀭𑀺𑀓𑀁 𑀦 𑀕𑀘𑁆𑀙𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀢𑀲𑁆𑀲 𑀘 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀢𑁄. 𑀓𑀣𑀁 𑀭𑁄𑀧𑁂𑀢𑀩𑁆𑀩𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀢𑁆𑀣𑁄 𑀦𑀸𑀫 𑀲𑀪𑀸𑀯𑀢𑁄 𑀅𑀦𑀼𑀲𑀦𑁆𑀥𑀺𑀢𑁄 𑀲𑀫𑁆𑀩𑀦𑁆𑀥𑀢𑁄 𑀧𑀼𑀩𑁆𑀩𑀸𑀧𑀭𑀢𑁄 𑀆𑀤𑀺𑀧𑀭𑀺𑀬𑁄𑀲𑀸𑀦𑀢𑁄 𑀘 𑀜𑀸𑀢𑁄 𑀲𑀫𑁆𑀫𑀸𑀜𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑁄 𑀅𑀢𑁆𑀣𑁄’’𑀢𑀺𑀆𑀤𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀦𑁆𑀢𑀺 𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀸𑀤𑀺𑀦𑀸 𑀅𑀦𑀼𑀢𑁆𑀢𑀸𑀦𑀻𑀓𑀢𑀁. 𑀓𑀗𑁆𑀔𑀸𑀬𑀸𑀢𑀺 𑀲𑀁𑀲𑀬𑀲𑁆𑀲.

𑁪𑁯. 𑀲𑀢𑁆𑀢𑀫𑁂 𑀓𑀺𑀮𑁂𑀲𑁂𑀳𑀻 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀢𑀤𑁂𑀯 𑀕𑀭𑀼 𑀕𑀭𑀼𑀓𑀸𑀢𑀩𑁆𑀩𑀁 𑀏𑀢𑁂𑀲𑀁, 𑀦 𑀥𑀫𑁆𑀫𑁄𑀢𑀺 𑀆𑀫𑀺𑀲𑀕𑀭𑀽. 𑀢𑁂𑀦𑀸𑀳 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀮𑀸𑀫𑀓𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑀧𑀭𑀺𑀲𑀸’’𑀢𑀺. 𑀉𑀪𑀢𑁄 𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄. 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑀣𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁄’’𑀢𑀺. 𑀓𑀸𑀬𑁂𑀦𑀸𑀢𑀺 𑀦𑀸𑀫𑀓𑀸𑀬𑁂𑀦. 𑀛𑀸𑀦𑀨𑀲𑁆𑀲𑀁 𑀨𑀼𑀲𑀺𑀢𑁆𑀯𑀸𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀺𑀢𑀁 𑀛𑀸𑀦𑀨𑀲𑁆𑀲𑀁 𑀅𑀥𑀺𑀕𑀫𑀯𑀲𑁂𑀦 𑀨𑀼𑀲𑀺𑀢𑁆𑀯𑀸. 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀬𑀣𑀸 𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻. 𑀦 𑀢𑀼 𑀯𑀺𑀫𑀼𑀢𑁆𑀢𑁄 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀲𑁆𑀲 𑀅𑀦𑁆𑀢𑁄 𑀅𑀦𑀦𑁆𑀢𑀭𑁄 𑀓𑀸𑀮𑁄 𑀤𑀺𑀝𑁆𑀞𑀦𑁆𑀢𑁄, 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀕𑁆𑀕𑀫𑀕𑁆𑀕𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑁂𑀦𑀸𑀳 ‘‘𑀇𑀫𑁂 𑀤𑁆𑀯𑁂𑀧𑀺 𑀙𑀲𑀼 𑀞𑀸𑀦𑁂𑀲𑀼 𑀮𑀩𑁆𑀪𑀦𑁆𑀢𑀻’’𑀢𑀺.

𑀲𑀤𑁆𑀤𑀳𑀦𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀲𑁂𑀓𑁆𑀔𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀙𑀲𑀼 𑀞𑀸𑀦𑁂𑀲𑀽𑀢𑀺 𑀧𑀞𑀫𑀨𑀮𑀢𑁄 𑀧𑀝𑁆𑀞𑀸𑀬 𑀙𑀲𑀼 𑀞𑀸𑀦𑁂𑀲𑀼. 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀧𑀞𑀫𑀫𑀕𑁆𑀕𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺. 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀉𑀪𑁄𑀧𑀺 𑀳𑁂𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀬𑁂𑀯. 𑀇𑀫𑀁 𑀓𑀲𑁆𑀫𑀸 𑀕𑀡𑁆𑀳𑀦𑁆𑀢𑀻𑀢𑀺 𑀏𑀯𑀁 𑀏𑀓𑀦𑁆𑀢𑀧𑀸𑀲𑀁𑀲𑁂𑀲𑀼 𑀅𑀭𑀺𑀬𑁂𑀲𑀼 𑀕𑀬𑁆𑀳𑀫𑀸𑀦𑁂𑀲𑀼 𑀇𑀫𑀁 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑀁 𑀮𑀸𑀫𑀓𑀁 𑀤𑀼𑀲𑁆𑀲𑀻𑀮𑀁 𑀓𑀲𑁆𑀫𑀸 𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑁂𑀲𑀼 𑀲𑀩𑁆𑀩𑀢𑀸 𑀲𑀤𑀺𑀲𑁂𑀲𑀼 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀲𑁂𑀲𑁄 𑀦 𑀧𑀜𑁆𑀜𑀸𑀬𑀢𑀺, 𑀯𑀺𑀲𑀪𑀸𑀕𑁂 𑀧𑀦 𑀲𑀢𑀺 𑀏𑀯 𑀧𑀜𑁆𑀜𑀸𑀬𑀢𑀺 𑀧𑀝𑀪𑀸𑀯𑁂𑀦 𑀯𑀺𑀬 𑀘𑀺𑀢𑁆𑀢𑀧𑀝𑀲𑁆𑀲𑀸𑀢𑀺 𑀆𑀳 ‘‘𑀏𑀓𑀘𑁆𑀘𑁂𑀲𑀼 𑀧𑀦𑀸’’𑀢𑀺𑀆𑀤𑀺. 𑀕𑀦𑁆𑀣𑀺𑀢𑀸𑀢𑀺 𑀅𑀯𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀫𑀼𑀘𑁆𑀙𑀁 𑀲𑀫𑁆𑀫𑁄𑀳𑀁 𑀆𑀧𑀦𑁆𑀦𑀸. 𑀙𑀦𑁆𑀤𑀭𑀸𑀕𑀅𑀧𑀓𑀟𑁆𑀠𑀦𑀸𑀬𑀸𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀅𑀧𑀦𑀬𑀦𑀢𑁆𑀣𑀁. 𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀬𑀸𑀢𑀺 𑀢𑀢𑁄 𑀦𑀺𑀲𑁆𑀲𑀭𑀡𑀸𑀯𑀳𑀸𑀬 𑀧𑀜𑁆𑀜𑀸𑀬 𑀯𑀺𑀭𑀳𑀺𑀢𑀸.

𑀧𑀜𑁆𑀜𑀸𑀥𑀼𑀭𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂𑀦. 𑀅𑀪𑀺𑀦𑀺𑀯𑀺𑀝𑁆𑀞𑁄𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀑𑀢𑀺𑀡𑁆𑀡𑁄. 𑀢𑀲𑁆𑀫𑀺𑀁 𑀔𑀡𑁂𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂. 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀅𑀭𑀺𑀬𑀫𑀕𑁆𑀕𑀲𑁄𑀢𑀲𑁆𑀲 𑀅𑀦𑀼𑀲𑁆𑀲𑀭𑀡𑀢𑁄. 𑀓𑀸𑀬𑀲𑀓𑁆𑀔𑀻 𑀦𑀸𑀫 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀢𑁄. 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀸𑀦𑀁 𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁. 𑀅𑀭𑀽𑀧𑀚𑁆𑀛𑀸𑀦𑁂𑀳𑀺 𑀭𑀽𑀧𑀓𑀸𑀬𑀢𑁄, 𑀅𑀕𑁆𑀕𑀫𑀕𑁆𑀕𑁂𑀦 𑀲𑁂𑀲𑀓𑀸𑀬𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀜𑁆𑀘𑁂𑀢𑀁. 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄, 𑀤𑀺𑀝𑁆𑀞𑀢𑁆𑀢𑀸 𑀯𑀸 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑀢𑁆𑀣 𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀦𑀺𑀭𑁄𑀥𑀲𑁆𑀲 𑀤𑀺𑀝𑁆𑀞𑀢𑁆𑀢𑀸. 𑀛𑀸𑀦𑀨𑀲𑁆𑀲𑀭𑀳𑀺𑀢𑀸𑀬 𑀲𑀸𑀢𑀺𑀲𑀬𑀸𑀬 𑀧𑀜𑁆𑀜𑀸𑀬 𑀏𑀯 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁫𑁦. 𑀅𑀝𑁆𑀞𑀫𑁂 𑀦 𑀲𑀫𑀸𑀢𑀺 𑀯𑀺𑀲𑀫𑀸. 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀯𑀺𑀲𑀫𑀢𑁆𑀢𑀸 𑀢𑀢𑁄 𑀏𑀯 𑀢𑀢𑁆𑀣 𑀧𑀓𑁆𑀔𑀮𑀦𑀁 𑀲𑀼𑀮𑀪𑀦𑁆𑀢𑀺 𑀆𑀳 ‘‘𑀲𑀧𑀓𑁆𑀔𑀮𑀦𑀝𑁆𑀞𑁂𑀦𑀸’’𑀢𑀺. 𑀦𑀺𑀧𑁆𑀧𑀓𑁆𑀔𑀮𑀦𑀝𑁆𑀞𑁂𑀦𑀸𑀢𑀺 𑀧𑀓𑁆𑀔𑀮𑀦𑀸𑀪𑀸𑀯𑁂𑀦. 𑀉𑀤𑁆𑀥𑀫𑁆𑀫𑀸𑀦𑀻𑀢𑀺 𑀥𑀫𑁆𑀫𑀢𑁄 𑀅𑀧𑁂𑀢𑀸𑀦𑀺. 𑀉𑀩𑁆𑀩𑀺𑀦𑀬𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑁫𑁧. 𑀦𑀯𑀫𑁂 𑀅𑀥𑀫𑁆𑀫𑀺𑀓𑀸𑀢𑀺 𑀅𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀦𑀺𑀤𑁆𑀥𑀫𑁆𑀫𑀸’’𑀢𑀺, 𑀥𑀫𑁆𑀫𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑁫𑁨. 𑀤𑀲𑀫𑁂 𑀕𑀡𑁆𑀳𑀦𑁆𑀢𑀻𑀢𑀺 𑀧𑀯𑀢𑁆𑀢𑁂𑀦𑁆𑀢𑀺. 𑀦 𑀘𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀢𑀁 𑀅𑀥𑀺𑀓𑀭𑀡𑀁 𑀬𑀣𑀸 𑀯𑀽𑀧𑀲𑀫𑁆𑀫𑀢𑀺, 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀇𑀢𑀭𑀻𑀢𑀭𑁂 𑀦 𑀲𑀫𑁆𑀫𑀸 𑀚𑀸𑀦𑀸𑀧𑁂𑀦𑁆𑀢𑀺. 𑀲𑀜𑁆𑀜𑀸𑀧𑀦𑀢𑁆𑀣𑀁 𑀲𑀦𑁆𑀦𑀺𑀧𑀸𑀢𑁂 𑀲𑀢𑀺 𑀢𑀢𑁆𑀣 𑀬𑀼𑀢𑁆𑀢𑀧𑀢𑁆𑀢𑀓𑀭𑀡𑁂𑀦 𑀲𑀜𑁆𑀜𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀢𑁂 𑀧𑀦 𑀲𑀜𑁆𑀜𑀸𑀧𑀦𑀢𑁆𑀣𑀁 𑀦 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀦 𑀧𑁂𑀓𑁆𑀔𑀸𑀧𑁂𑀦𑁆𑀢𑀻𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀫𑀜𑁆𑀜𑀁 𑀦 𑀧𑁂𑀓𑁆𑀔𑀸𑀧𑁂𑀦𑁆𑀢𑀺. 𑀅𑀲𑀜𑁆𑀜𑀢𑁆𑀢𑀺𑀬𑁂𑀯 𑀅𑀢𑁆𑀢𑀦𑀸 𑀕𑀳𑀺𑀢𑀧𑀓𑁆𑀔𑀲𑁆𑀲 𑀩𑀮𑀁 𑀏𑀢𑁂𑀲𑀦𑁆𑀢𑀺 𑀅𑀲𑀜𑁆𑀜𑀢𑁆𑀢𑀺𑀩𑀮𑀸. 𑀦 𑀢𑀣𑀸 𑀫𑀦𑁆𑀢𑁂𑀦𑁆𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀆𑀥𑀸𑀦𑀕𑁆𑀕𑀸𑀳𑀺𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀪𑀸𑀯𑁂𑀦 𑀢𑀣𑀸 𑀦 𑀫𑀦𑁆𑀢𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀣𑀸𑀫𑀲𑀸’’𑀢𑀺𑀆𑀤𑀺. 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸.

𑀧𑀭𑀺𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀧𑀡𑁆𑀡𑀸𑀲𑀓𑀁