𑁯. 𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀲𑀦𑁆𑀥𑀸𑀭𑁂𑀦𑁆𑀢𑀻𑀢𑀺 𑀆𑀘𑀸𑀭𑀲𑀦𑁆𑀥𑀸𑀭𑀡𑀯𑀲𑁂𑀦 𑀥𑀸𑀭𑁂𑀦𑁆𑀢𑀺. 𑀞𑀧𑁂𑀦𑁆𑀢𑀻𑀢𑀺 𑀫𑀭𑀺𑀬𑀸𑀤𑀸𑀬𑀁 𑀞𑀧𑁂𑀦𑁆𑀢𑀺. 𑀭𑀓𑁆𑀔𑀦𑁆𑀢𑀻𑀢𑀺 𑀆𑀘𑀸𑀭𑀲𑀦𑁆𑀥𑀸𑀭𑀡𑁂𑀦 𑀫𑀭𑀺𑀬𑀸𑀤𑀸𑀬𑀁 𑀞𑀧𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀺. 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀯𑀲𑁂𑀦 𑀦 𑀧𑀜𑁆𑀜𑀸𑀬𑁂𑀣𑀸𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀘𑀺𑀢𑁆𑀢𑁂 𑀓𑀭𑀡𑀯𑀲𑁂𑀦 𑀦 𑀧𑀜𑁆𑀜𑀸𑀬𑁂𑀣, 𑀅𑀬𑀫𑀸𑀘𑀸𑀭𑁄 𑀦 𑀮𑀩𑁆𑀪𑁂𑀬𑁆𑀬. 𑀫𑀸𑀢𑀼𑀘𑁆𑀙𑀸𑀢𑀺 𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 𑀫𑀸𑀢𑀼𑀮𑀸𑀦𑀻𑀢𑀺 𑀯𑀸 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀯𑀸 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀯𑀸𑀢𑀺 𑀇𑀫𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀫𑀸𑀢𑀼 𑀪𑀕𑀺𑀦𑀻 𑀫𑀸𑀢𑀼𑀘𑁆𑀙𑀸. 𑀫𑀸𑀢𑀼𑀮𑀪𑀭𑀺𑀬𑀸 𑀫𑀸𑀢𑀼𑀮𑀸𑀦𑀻. 𑀕𑀭𑀽𑀦𑀁 𑀤𑀸𑀭𑀸 𑀫𑀳𑀸𑀧𑀺𑀢𑀼𑀘𑀽𑀴𑀧𑀺𑀢𑀼𑀚𑁂𑀝𑁆𑀞𑀪𑀸𑀢𑀼𑀆𑀤𑀻𑀦𑀁 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀪𑀭𑀺𑀬𑀸. 𑀬𑀣𑀸 𑀅𑀚𑁂𑀴𑀓𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀅𑀚𑁂𑀴𑀓𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸 𑀫𑀸𑀢𑀸𑀢𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀪𑀺𑀦𑁆𑀦𑀫𑀭𑀺𑀬𑀸𑀤𑀸 𑀲𑀩𑁆𑀩𑀢𑁆𑀣 𑀲𑀫𑁆𑀪𑁂𑀤𑁂𑀦 𑀯𑀢𑁆𑀢𑀦𑁆𑀢𑀺, 𑀏𑀯𑀫𑀬𑀁 𑀫𑀦𑀼𑀲𑁆𑀲𑀮𑁄𑀓𑁄 𑀬𑀤𑀺 𑀮𑁄𑀓𑀧𑀸𑀮𑀥𑀫𑁆𑀫𑀸 𑀦 𑀪𑀯𑁂𑀬𑁆𑀬𑀼𑀁, 𑀲𑀩𑁆𑀩𑀢𑁆𑀣 𑀲𑀫𑁆𑀪𑁂𑀤𑁂𑀦 𑀯𑀢𑁆𑀢𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀺𑀫𑁂 𑀮𑁄𑀓𑀧𑀸𑀮𑀓𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀲𑀫𑁆𑀪𑁂𑀤𑁄𑀢𑀺.

𑀘𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.