(𑁧𑁫) 𑁫. 𑀲𑀫𑀸𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁧𑁬𑁪. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 ‘‘𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀁 𑀧𑀯𑀢𑁆𑀢𑀁, 𑀇𑀢𑁄 𑀧𑀭𑀁 𑀪𑀯𑀗𑁆𑀕𑀁 𑀫𑀚𑁆𑀛𑁂 𑀲𑀫𑀸𑀧𑀢𑁆𑀢𑀻’’𑀢𑀺 𑀏𑀯𑀁 𑀲𑀳 𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀧𑁆𑀧𑀚𑀸𑀦𑀦𑀸 𑀧𑀜𑁆𑀜𑀸 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸. 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸. 𑀧𑀕𑁂𑀯 𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁬𑁫. 𑀤𑀼𑀢𑀺𑀬𑁂 𑀉𑀚𑀼𑀦𑁄 𑀪𑀸𑀯𑁄 𑀅𑀚𑁆𑀚𑀯𑀁, 𑀅𑀚𑀺𑀫𑁆𑀳𑀢𑀸 𑀅𑀓𑀼𑀝𑀺𑀮𑀢𑀸 𑀅𑀯𑀗𑁆𑀓𑀢𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀥𑀫𑁆𑀫𑁂𑀧𑀺 (𑀥. 𑀲. 𑁧𑁩𑁪𑁬) 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀅𑀚𑁆𑀚𑀯𑁄? 𑀬𑀸 𑀅𑀚𑁆𑀚𑀯𑀢𑀸 𑀅𑀚𑀺𑀫𑁆𑀳𑀢𑀸 𑀅𑀓𑀼𑀝𑀺𑀮𑀢𑀸 𑀅𑀯𑀗𑁆𑀓𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀚𑁆𑀚𑀯𑁄’’𑀢𑀺. 𑀅𑀦𑀚𑁆𑀚𑀯𑀜𑁆𑀘 𑀅𑀚𑁆𑀚𑀯𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸, 𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑀢𑀸, 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸𑀢𑀺 𑀳𑀺 𑀢𑀬𑁄 𑀅𑀦𑀚𑁆𑀚𑀯𑀸. 𑀏𑀓𑀘𑁆𑀘𑁄 𑀳𑀺 𑀪𑀺𑀓𑁆𑀔𑀼 𑀧𑀞𑀫𑀯𑀬𑁂 𑀫𑀚𑁆𑀛𑀺𑀫-𑀧𑀘𑁆𑀙𑀺𑀫𑀯𑀬𑁂 𑀘 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀸𑀲𑀼 𑀙𑀲𑀼 𑀘 𑀅𑀕𑁄𑀘𑀭𑁂𑀲𑀼 𑀘𑀭𑀢𑀺, 𑀅𑀬𑀁 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸 𑀦𑀸𑀫, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀧𑀝𑀺𑀧𑀢𑁆𑀢𑀺𑀬𑀸 𑀯𑀗𑁆𑀓𑀪𑀸𑀯𑀢𑁄. 𑀏𑀓𑁄 𑀧𑀞𑀫𑀯𑀬𑁂 𑀧𑀘𑁆𑀙𑀺𑀫𑀯𑀬𑁂 𑀘 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀧𑀼𑀭𑀺𑀫𑀲𑀤𑀺𑀲𑁄, 𑀅𑀬𑀁 𑀘𑀦𑁆𑀤𑀮𑁂𑀔𑀸𑀯𑀗𑁆𑀓𑀢𑀸 𑀦𑀸𑀫, 𑀧𑀝𑀺𑀧𑀢𑁆𑀢𑀺𑀬𑀸 𑀫𑀚𑁆𑀛𑀝𑁆𑀞𑀸𑀦𑁂 𑀯𑀗𑁆𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀏𑀓𑁄 𑀧𑀞𑀫𑀯𑀬𑁂𑀧𑀺 𑀫𑀚𑁆𑀛𑀺𑀫𑀯𑀬𑁂𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀧𑀼𑀭𑀺𑀫𑀲𑀤𑀺𑀲𑁄, 𑀅𑀬𑀁 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸 𑀦𑀸𑀫, 𑀧𑀭𑀺𑀬𑁄𑀲𑀸𑀦𑁂 𑀯𑀗𑁆𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀏𑀓𑁄 𑀲𑀩𑁆𑀩𑀫𑁆𑀧𑁂𑀢𑀁 𑀯𑀗𑁆𑀓𑀢𑀁 𑀧𑀳𑀸𑀬 𑀢𑀻𑀲𑀼 𑀯𑀬𑁂𑀲𑀼 𑀧𑁂𑀲𑀮𑁄 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 𑀬𑁄 𑀲𑁄 𑀉𑀚𑀼𑀪𑀸𑀯𑁄, 𑀇𑀤𑀁 𑀅𑀚𑁆𑀚𑀯𑀁 𑀦𑀸𑀫, 𑀲𑀩𑁆𑀩𑀢𑁆𑀣 𑀉𑀚𑀼𑀪𑀸𑀯𑀲𑀺𑀤𑁆𑀥𑀺𑀢𑁄.

𑀫𑀤𑁆𑀤𑀯𑀦𑁆𑀢𑀺 𑀏𑀢𑁆𑀣 ‘‘𑀮𑀚𑁆𑀚𑀯’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀢𑀢𑁆𑀣 𑀓𑀢𑀫𑁄 𑀮𑀚𑁆𑀚𑀯𑁄? 𑀬𑁄 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦 𑀳𑀺𑀭𑀻𑀬𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀚𑁆𑀚𑀯𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀮𑀚𑁆𑀚𑀺𑀪𑀸𑀯𑁄 𑀮𑀚𑁆𑀚𑀯𑀁 𑀦𑀸𑀫. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑁋 𑀮𑀚𑁆𑀚𑀢𑀻𑀢𑀺 𑀮𑀚𑁆𑀚𑁄, 𑀳𑀺𑀭𑀺𑀫𑀸, 𑀢𑀲𑁆𑀲 𑀪𑀸𑀯𑁄 𑀮𑀚𑁆𑀚𑀯𑀁, 𑀳𑀺𑀭𑀻𑀢𑀺 𑀅𑀢𑁆𑀣𑁄. 𑀮𑀚𑁆𑀚𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀮𑀚𑁆𑀚𑀻 𑀬𑀣𑀸 ‘‘𑀫𑀸𑀮𑀻 𑀫𑀸𑀬𑀻’’𑀢𑀺, 𑀢𑀲𑁆𑀲 𑀪𑀸𑀯𑁄 𑀮𑀚𑁆𑀚𑀺𑀪𑀸𑀯𑁄, 𑀲𑀸 𑀏𑀯 𑀮𑀚𑁆𑀚𑀸.

𑁧𑁬𑁬. 𑀢𑀢𑀺𑀬𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀻𑀢𑀺 𑀏𑀢𑁆𑀣 𑀅𑀥𑀺𑀯𑀸𑀲𑀦𑀁 𑀯𑀼𑀘𑁆𑀘𑀢𑀺 𑀔𑀫𑀦𑀁. 𑀢𑀜𑁆𑀳𑀺 𑀧𑀭𑁂𑀲𑀁 𑀤𑀼𑀓𑁆𑀓𑀝𑀁 𑀤𑀼𑀭𑀼𑀢𑁆𑀢𑀜𑁆𑀘 𑀧𑀝𑀺𑀯𑀺𑀭𑁄𑀥𑀸𑀓𑀭𑀡𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑀦𑀢𑁄 ‘‘𑀅𑀥𑀺𑀯𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀥𑀺𑀯𑀸𑀲𑀦𑀮𑀓𑁆𑀔𑀡𑀸 𑀔𑀦𑁆𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑀼𑀘𑀺𑀲𑀻𑀮𑀢𑀸 𑀲𑁄𑀭𑀘𑁆𑀘𑀁. 𑀲𑀸 𑀳𑀺 𑀲𑁄𑀪𑀦𑀓𑀫𑁆𑀫𑀭𑀢𑀢𑀸. 𑀲𑀼𑀝𑁆𑀞𑀼 𑀯𑀸 𑀧𑀸𑀧𑀢𑁄 𑀑𑀭𑀢𑀪𑀸𑀯𑁄 𑀯𑀺𑀭𑀢𑀢𑀸𑀢𑀺 𑀆𑀳 ‘‘𑀲𑀼𑀭𑀢𑀪𑀸𑀯𑁄’’𑀢𑀺. 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑁂𑀧𑀺 (𑀥. 𑀲. 𑁧𑁩𑁪𑁯) 𑁋

‘‘𑀢𑀢𑁆𑀣 𑀓𑀢𑀫𑀁 𑀲𑁄𑀭𑀘𑁆𑀘𑀁? 𑀬𑁄 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀭𑀘𑁆𑀘𑀁, 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄 𑀲𑁄𑀭𑀘𑁆𑀘’’𑀦𑁆𑀢𑀺 𑁋 𑀆𑀕𑀢𑁄.

𑁧𑁬𑁭. 𑀘𑀢𑀼𑀢𑁆𑀣𑁂 𑀲𑀔𑀺𑀮𑁄 𑀯𑀼𑀘𑁆𑀘𑀢𑀺 𑀲𑀡𑁆𑀳𑀯𑀸𑀘𑁄, 𑀢𑀲𑁆𑀲 𑀪𑀸𑀯𑁄 𑀲𑀸𑀔𑀮𑁆𑀬𑀁, 𑀲𑀡𑁆𑀳𑀯𑀸𑀘𑀢𑀸. 𑀢𑁂𑀦𑀸𑀳 ‘‘𑀲𑀡𑁆𑀳𑀯𑀸𑀘𑀸𑀯𑀲𑁂𑀦 𑀲𑀫𑁆𑀫𑁄𑀤𑀫𑀸𑀦𑀪𑀸𑀯𑁄’’𑀢𑀺. 𑀲𑀡𑁆𑀳𑀯𑀸𑀘𑀸𑀯𑀲𑁂𑀦 𑀳𑀺 𑀲𑀫𑁆𑀫𑁄𑀤𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀪𑀸𑀯𑁄 𑀦𑀸𑀫 𑀲𑀡𑁆𑀳𑀯𑀸𑀘𑀢𑀸. 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁩𑁫𑁦) 𑁋

‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬𑀁? 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀧𑀳𑀸𑀬 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺, 𑀬𑀸 𑀢𑀢𑁆𑀣 𑀲𑀡𑁆𑀳𑀯𑀸𑀘𑀢𑀸 𑀲𑀔𑀺𑀮𑀯𑀸𑀘𑀢𑀸 𑀅𑀨𑀭𑀼𑀲𑀯𑀸𑀘𑀢𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀸𑀔𑀮𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀡𑁆𑀟𑀓𑀸𑀢𑀺 𑀲𑀤𑁄𑀲𑁂 𑀲𑀯𑀡𑁂 𑀭𑀼𑀓𑁆𑀔𑁂 𑀦𑀺𑀬𑁆𑀬𑀸𑀲𑀧𑀺𑀡𑁆𑀟𑁄, 𑀅𑀳𑀺𑀘𑁆𑀙𑀢𑁆𑀢𑀸𑀤𑀻𑀦𑀺 𑀯𑀸 𑀉𑀝𑁆𑀞𑀺𑀢𑀸𑀦𑀺 𑀅𑀡𑁆𑀟𑀓𑀸𑀦𑀻𑀢𑀺 𑀯𑀤𑀦𑁆𑀢𑀺, 𑀨𑁂𑀕𑁆𑀕𑀼𑀭𑀼𑀓𑁆𑀔𑀲𑁆𑀲 𑀧𑀦 𑀓𑀼𑀣𑀺𑀢𑀲𑁆𑀲 𑀅𑀡𑁆𑀟𑀸𑀦𑀺 𑀯𑀺𑀬 𑀉𑀝𑁆𑀞𑀺𑀢𑀸 𑀘𑀼𑀡𑁆𑀡𑀧𑀺𑀡𑁆𑀟𑀺𑀬𑁄 𑀯𑀸 𑀕𑀡𑁆𑀞𑀺𑀬𑁄 𑀯𑀸 𑀅𑀡𑁆𑀟𑀓𑀸. 𑀇𑀥 𑀧𑀦 𑀩𑁆𑀬𑀸𑀧𑀚𑁆𑀚𑀦𑀓𑀓𑁆𑀓𑀲𑀸𑀤𑀺𑀲𑀪𑀸𑀯𑀢𑁄 𑀓𑀡𑁆𑀝𑀓𑀧𑁆𑀧𑀝𑀺𑀪𑀸𑀕𑁂𑀦 𑀯𑀸𑀘𑀸 𑀅𑀡𑁆𑀟𑀓𑀸𑀢𑀺 𑀯𑀼𑀢𑁆𑀢𑀸. 𑀧𑀤𑀼𑀫𑀦𑀸𑀴𑀁 𑀯𑀺𑀬 𑀲𑁄𑀢𑀁 𑀖𑀁𑀲𑀬𑀫𑀸𑀦𑀸 𑀧𑀯𑀺𑀲𑀦𑁆𑀢𑀻 𑀓𑀓𑁆𑀓𑀲𑀸 𑀤𑀝𑁆𑀞𑀩𑁆𑀩𑀸. 𑀓𑁄𑀥𑁂𑀦 𑀦𑀺𑀩𑁆𑀩𑀢𑁆𑀢𑀸 𑀢𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸 𑀓𑁄𑀥𑀲𑀸𑀫𑀦𑁆𑀢𑀸. 𑀧𑀼𑀭𑁂 𑀲𑀁𑀯𑀤𑁆𑀥𑀦𑀸𑀭𑀻 𑀧𑁄𑀭𑀻. 𑀲𑀸 𑀯𑀺𑀬 𑀲𑀼𑀓𑀼𑀫𑀸𑀭𑀸 𑀫𑀼𑀤𑀼𑀓𑀸 𑀯𑀸𑀘𑀸 𑀧𑁄𑀭𑀻 𑀯𑀺𑀬𑀸𑀢𑀺 𑀧𑁄𑀭𑀻. 𑀲𑀡𑁆𑀳𑀯𑀸𑀘𑀢𑀸𑀢𑀺𑀆𑀤𑀺𑀦𑀸 𑀢𑀁 𑀯𑀸𑀘𑀁 𑀧𑀯𑀢𑁆𑀢𑀫𑀸𑀦𑀁 𑀤𑀲𑁆𑀲𑁂𑀢𑀺.

𑁧𑁬𑁮. 𑀧𑀜𑁆𑀘𑀫𑁂 ‘‘𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀇𑀥 𑀯𑀼𑀢𑁆𑀢𑀁, 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁪) 𑀧𑀦 ‘‘𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸𑀧𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑁂𑀧𑀺 (𑀯𑀺𑀪. 𑁧𑁮𑁨) ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀳𑀺𑀁𑀲𑀸? 𑀬𑀸 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀳𑀺𑀁𑀲𑀸’’𑀢𑀺 𑀆𑀕𑀢𑀁. 𑀏𑀢𑁆𑀣𑀸𑀧𑀺 𑀳𑀺 𑀬𑀸 𑀓𑀸𑀘𑀺 𑀓𑀭𑀼𑀡𑀸 ‘‘𑀓𑀭𑀼𑀡𑀸’’𑀢𑀺 𑀯𑀼𑀢𑁆𑀢𑀸, 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯.

𑀲𑀼𑀘𑀺𑀲𑀤𑁆𑀤𑀢𑁄 𑀪𑀸𑀯𑁂 𑀬𑀓𑀸𑀭𑀁 𑀇𑀓𑀸𑀭𑀲𑁆𑀲 𑀘 𑀉𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀲𑁄𑀘𑀩𑁆𑀬𑀁 𑀲𑀼𑀘𑀺𑀪𑀸𑀯𑁄’’𑀢𑀺. 𑀏𑀢𑁆𑀣 𑀘 𑀲𑁄𑀘𑀩𑁆𑀬𑀦𑁆𑀢𑀺 𑀲𑀻𑀮𑀯𑀲𑁂𑀦 𑀲𑀼𑀘𑀺𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁪) 𑀧𑀦 ‘‘𑀲𑁄𑀘𑁂𑀬𑁆𑀬𑀦𑁆𑀢𑀺 𑀫𑁂𑀢𑁆𑀢𑀸𑀬 𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀘 𑀯𑀲𑁂𑀦 𑀲𑀼𑀘𑀺𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑁂𑀧𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑁄𑀘𑀩𑁆𑀬𑀁? 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀘𑀩𑁆𑀬’’𑀦𑁆𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀏𑀢𑁆𑀣𑀸𑀧𑀺 𑀳𑀺 ‘‘𑀫𑁂𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀬𑀸 𑀓𑀸𑀘𑀺 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀯.

𑁧𑁬𑁯-𑁧𑁭𑁧. 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁧𑁭𑁨. 𑀦𑀯𑀫𑁂 𑀓𑀸𑀫𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀧𑀺 𑀩𑀮𑀝𑁆𑀞𑁄 𑀏𑀯, 𑀧𑀝𑀺𑀧𑀓𑁆𑀔𑁂𑀳𑀺 𑀧𑀦 𑀅𑀓𑀫𑁆𑀧𑀦𑀻𑀬𑀢𑀁 𑀲𑀸𑀢𑀺𑀲𑀬𑀁 𑀩𑀮𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀼𑀝𑁆𑀞𑀲𑁆𑀲𑀘𑁆𑀘𑁂 𑀅𑀓𑀫𑁆𑀧𑀦𑁂𑀦𑀸’’𑀢𑀺𑀆𑀤𑀺.

𑁧𑁭𑁩. 𑀤𑀲𑀫𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑀲𑀫𑀦𑀢𑁄 𑀲𑀫𑀣𑁄, 𑀲𑀫𑀸𑀥𑀻𑀢𑀺 𑀆𑀳 ‘‘𑀲𑀫𑀣𑁄𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸’’𑀢𑀺. 𑀅𑀦𑀺𑀘𑁆𑀘𑀸𑀤𑀺𑀦𑀸 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀤𑀲𑁆𑀲𑀦𑀢𑁄 𑀧𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸, 𑀧𑀜𑁆𑀜𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀸𑀳𑀓𑀜𑀸𑀡’’𑀦𑁆𑀢𑀺.

𑁧𑁭𑁪. 𑀏𑀓𑀸𑀤𑀲𑀫𑁂 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀲𑀫𑀸𑀤𑀺𑀦𑁆𑀦𑀲𑁆𑀲 𑀲𑀻𑀮𑀲𑁆𑀲 𑀪𑁂𑀤𑀓𑀭𑁄 𑀯𑀻𑀢𑀺𑀓𑁆𑀓𑀫𑁄. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀽𑀲𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻’’𑀢𑀺.

𑁧𑁭𑁫. 𑀤𑁆𑀯𑀸𑀤𑀲𑀫𑁂 𑀲𑀻𑀮𑀲𑀫𑁆𑀧𑀤𑀸𑀢𑀺 𑀲𑀩𑁆𑀩𑀪𑀸𑀕𑀢𑁄 𑀢𑀲𑁆𑀲 𑀅𑀦𑀽𑀦𑀢𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀪𑀸𑀯𑁄 𑀲𑀻𑀮𑀲𑀫𑁆𑀧𑀤𑀸. 𑀧𑀭𑀺𑀧𑀽𑀭𑀡𑀢𑁆𑀣𑁄 𑀳𑁂𑀢𑁆𑀣 𑀲𑀫𑁆𑀧𑀤𑀸𑀲𑀤𑁆𑀤𑁄. 𑀢𑁂𑀦𑁂𑀯𑀸𑀳 ‘‘𑀧𑀭𑀺𑀧𑀼𑀡𑁆𑀡𑀲𑀻𑀮𑀢𑀸’’𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀢𑀺 𑀅𑀢𑁆𑀣𑀺𑀓𑀤𑀺𑀝𑁆𑀞𑀺𑀆𑀤𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀸𑀭𑀺𑀧𑀽𑀭𑀺𑀪𑀸𑀯𑁂𑀦 𑀧𑀯𑀢𑁆𑀢𑀁 𑀜𑀸𑀡𑀁. 𑀢𑀜𑁆𑀘 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑁂𑀦 𑀓𑀫𑁆𑀫𑀲𑁆𑀲𑀓𑀢𑀸’’𑀢𑀺.

𑁧𑁭𑁬. 𑀢𑁂𑀭𑀲𑀫𑁂 𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀲𑀻𑀮𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀉𑀧𑀭𑀺𑀯𑀺𑀲𑀼𑀤𑁆𑀥𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀯𑀺𑀲𑀼𑀤𑁆𑀥𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀯𑀺𑀲𑀼𑀤𑁆𑀥𑀫𑁂𑀯 𑀳𑀺 𑀲𑀻𑀮𑀁 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀻𑀮𑀯𑀺𑀲𑀼𑀤𑁆𑀥𑀻𑀳𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀓𑀁 𑀲𑀻𑀮’’𑀦𑁆𑀢𑀺. 𑀏𑀢𑁆𑀣𑀸𑀧𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀓𑀦𑁆𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀉𑀧𑀭𑀺𑀯𑀺𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀸𑀧𑀓𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁩𑁭𑁨) 𑀧𑀦𑀸𑀬𑀁 ‘‘𑀢𑀢𑁆𑀣 𑀓𑀢𑀫𑀸 𑀲𑀻𑀮𑀯𑀺𑀲𑀼𑀤𑁆𑀥𑀺? 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀻’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑀸.

𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀤𑀲𑁆𑀲𑀦𑀜𑀸𑀡𑀁 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀁 𑀦𑀺𑀩𑁆𑀩𑀸𑀦𑀜𑁆𑀘 𑀧𑀸𑀧𑁂𑀢𑀼𑀁 𑀉𑀧𑀦𑁂𑀢𑀼𑀁 𑀲𑀫𑀢𑁆𑀣𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀸𑀤𑀺 𑀲𑀫𑁆𑀫𑀸𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸…𑀧𑁂… 𑀧𑀜𑁆𑀘𑀯𑀺𑀥𑀸𑀧𑀺 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺. 𑀏𑀢𑁆𑀣𑀸𑀧𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸𑀢𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀤𑀲𑁆𑀲𑀦𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀬 𑀧𑀭𑀫𑀢𑁆𑀣𑀯𑀺𑀲𑀼𑀤𑁆𑀥𑀺𑀬𑀸 𑀘 𑀲𑀫𑁆𑀧𑀸𑀧𑀺𑀓𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁩𑁭𑁩) 𑀧𑀦𑀸𑀬𑀁 ‘‘𑀢𑀢𑁆𑀣 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺? 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁, 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁, 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀇𑀤𑀁 𑀅𑀓𑀼𑀲𑀮𑀓𑀫𑁆𑀫𑀁 𑀦𑁄 𑀲𑀓𑀁, 𑀇𑀤𑀁 𑀧𑀦 𑀓𑀫𑁆𑀫𑀁 𑀲𑀓𑀦𑁆𑀢𑀺 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀓𑀫𑁆𑀫𑀲𑁆𑀲𑀓𑀢𑀚𑀸𑀦𑀦𑀜𑀸𑀡𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁. 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀜𑁆𑀳𑀺 𑀅𑀢𑁆𑀢𑀦𑀸 𑀓𑀢𑀫𑁆𑀧𑀺 𑀧𑀭𑁂𑀦 𑀓𑀢𑀫𑁆𑀧𑀺 𑀦𑁄 𑀲𑀓𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺 𑀅𑀢𑁆𑀣𑀪𑀜𑁆𑀚𑀦𑀢𑁄, 𑀲𑀼𑀘𑀭𑀺𑀢𑀁 𑀲𑀓𑀓𑀫𑁆𑀫𑀁 𑀦𑀸𑀫 𑀅𑀢𑁆𑀣𑀚𑀦𑀦𑀢𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀦 𑀯𑀘𑀻𑀲𑀘𑁆𑀘𑀜𑁆𑀘 𑀅𑀦𑀼𑀮𑁄𑀫𑁂𑀢𑀺, 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘 𑀦 𑀯𑀺𑀮𑁄𑀫𑁂𑀢𑀻𑀢𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀳𑀺 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀁 𑀆𑀭𑀫𑁆𑀪𑀓𑀸𑀮𑁂 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀁 𑀯𑀘𑀻𑀲𑀘𑁆𑀘𑀜𑁆𑀘 𑀅𑀦𑀼𑀮𑁄𑀫𑁂𑀢𑀺, 𑀢𑀣𑁂𑀯 𑀧𑀝𑀺𑀯𑀺𑀚𑁆𑀛𑀦𑀢𑁄 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦 𑀯𑀺𑀮𑁄𑀫𑁂𑀢𑀺 𑀦 𑀯𑀺𑀭𑀸𑀥𑁂𑀢𑀺 𑀏𑀓𑀦𑁆𑀢𑁂𑀦𑁂𑀯 𑀲𑀫𑁆𑀧𑀸𑀧𑀦𑀢𑁄.

𑁧𑁭𑁭. 𑀘𑀼𑀤𑁆𑀤𑀲𑀫𑁂 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀧𑀞𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀼𑀢𑁆𑀢𑀸. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀁. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁪) ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀜𑀸𑀡𑀤𑀲𑁆𑀲𑀦𑀁 𑀓𑀣𑀺𑀢𑀁. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀪𑀽𑀢𑀁 𑀤𑀲𑁆𑀲𑀦𑀁. 𑀢𑁂𑀦 𑀤𑀲𑁆𑀲𑀦𑀫𑀕𑁆𑀕𑀁 𑀯𑀤𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀯𑀻𑀭𑀺𑀬𑀫𑀸𑀳. 𑀅𑀧𑀺𑀘 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀲𑀩𑁆𑀩𑀸𑀧𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀁. 𑀢𑁂𑀦𑁂𑀯 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 ‘‘𑀅𑀧𑀺𑀘 𑀧𑀼𑀭𑀺𑀫𑀧𑀤𑁂𑀦 𑀘𑀢𑀼𑀫𑀕𑁆𑀕𑀜𑀸𑀡𑀁, 𑀧𑀘𑁆𑀙𑀺𑀫𑀧𑀤𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀣 𑀯𑀸 𑀤𑀺𑀝𑁆𑀞𑀻𑀯𑀺𑀲𑀼𑀤𑁆𑀥𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀸𑀤𑀺𑀲𑀗𑁆𑀔𑀸𑀢𑀸 𑀲𑀩𑁆𑀩𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀼𑀢𑁆𑀢𑀸. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄…𑀧𑁂… 𑀲𑀫𑁆𑀫𑀸𑀯𑀸𑀬𑀸𑀫𑁄𑀢𑀺. 𑀅𑀬𑀫𑁂𑀯 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀅𑀪𑀺𑀥𑀫𑁆𑀫𑁂 𑀳𑀺 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄…𑀧𑁂… 𑀲𑀫𑁆𑀫𑀸𑀯𑀸𑀬𑀸𑀫𑁄’’𑀢𑀺 𑀏𑀯𑀫𑀬𑀁 𑀤𑀼𑀓𑁄 𑀯𑀺𑀪𑀢𑁆𑀢𑁄. 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁩𑁭𑁪) ‘‘𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸𑀢𑀺𑀆𑀤𑀻𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀸𑀤𑀻𑀦𑁂𑀯 𑀘𑀢𑁆𑀢𑀸𑀭𑀺 𑀜𑀸𑀡𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. ‘𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀁 𑀯𑀻𑀭𑀺𑀬𑀁 𑀕𑀳𑀺𑀢𑀁 𑀧𑀜𑁆𑀜𑀸𑀬 𑀮𑁄𑀓𑀺𑀬𑀝𑁆𑀞𑀸𑀦𑁂 𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭𑀝𑁆𑀞𑀸𑀦𑁂 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀇𑀥𑀸𑀧𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸 𑀘𑀢𑀼𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀜𑁆𑀘𑀯𑀺𑀥𑀸𑀧𑀺 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀧𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀦𑁆𑀢𑀺 𑀇𑀤𑀁 𑀧𑀦 ‘‘𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀏𑀢𑁆𑀣 𑀘 𑀢𑀁𑀢𑀁𑀪𑀸𑀡𑀓𑀸𑀦𑀁 𑀫𑀢𑀪𑁂𑀤𑁂𑀦𑀸𑀬𑀁 𑀯𑀡𑁆𑀡𑀦𑀸𑀪𑁂𑀤𑁄𑀢𑀺 𑀦 𑀅𑀝𑁆𑀞𑀓𑀣𑀸𑀯𑀘𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀲𑀗𑁆𑀓𑀺𑀢𑀩𑁆𑀩𑁄. 𑀅𑀣 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀜𑁆𑀳𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲𑀸𑀢𑀺 𑀅𑀦𑀼𑀭𑀽𑀧𑀤𑀺𑀝𑁆𑀞𑀺𑀲𑁆𑀲 𑀓𑀮𑁆𑀬𑀸𑀡𑀤𑀺𑀝𑁆𑀞𑀺𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀧𑁆𑀧𑀓𑀸𑀭𑀤𑀺𑀝𑁆𑀞𑀺𑀲𑁆𑀲 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀧𑀥𑀸𑀦𑀸𑀦𑀼𑀭𑀽𑀧𑀤𑀺𑀝𑁆𑀞𑀺𑀲𑁆𑀲 𑀬𑀣𑀸𑀤𑀺𑀝𑁆𑀞𑀺𑀧𑁆𑀧𑀯𑀢𑁆𑀢𑀓𑀺𑀭𑀺𑀬𑀲𑁆𑀲 𑀯𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀁 𑀲𑀁𑀯𑀡𑁆𑀡𑀬𑀦𑁆𑀢𑀺.

𑁧𑁭𑁮. 𑀧𑀦𑁆𑀦𑀭𑀲𑀫𑁂 𑀲𑀫𑀢𑁆𑀢𑀁 𑀢𑀼𑀲𑁆𑀲𑀦𑀁 𑀢𑀺𑀢𑁆𑀢𑀺 𑀲𑀦𑁆𑀢𑀼𑀝𑁆𑀞𑀺, 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑀻𑀢𑀺 𑀅𑀲𑀦𑁆𑀢𑀼𑀝𑁆𑀞𑀺, 𑀅𑀲𑀦𑁆𑀢𑀼𑀝𑁆𑀞𑀺𑀲𑁆𑀲 𑀪𑀸𑀯𑁄 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀢𑀲𑁆𑀲𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑀸𑀬 𑀳𑀺 𑀲𑀫𑀗𑁆𑀕𑀺𑀪𑀽𑀢𑁄 𑀧𑀼𑀕𑁆𑀕𑀮𑁄 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀛𑀸𑀦𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀺, 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀭𑀳𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀢𑀺, ‘‘𑀅𑀮𑀫𑁂𑀢𑁆𑀢𑀸𑀯𑀢𑀸 𑀓𑀢𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀲𑀗𑁆𑀓𑁄𑀘𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 ‘‘𑀅𑀜𑁆𑀜𑀢𑁆𑀭 𑀅𑀭𑀳𑀢𑁆𑀢𑀫𑀕𑁆𑀕𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀦𑁆𑀢𑀼𑀝𑁆𑀞𑀺𑀪𑀸𑀯𑁄’’𑀢𑀺. 𑀢𑀢𑁆𑀭 𑀅𑀜𑁆𑀜𑀢𑁆𑀭 𑀅𑀭𑀳𑀢𑁆𑀢𑀫𑀕𑁆𑀕𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀧𑀢𑁆𑀢𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀝𑀺𑀯𑀸𑀦𑀺𑀢𑀸 𑀘 𑀧𑀥𑀸𑀦𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺 𑀦 𑀯𑀺𑀪𑀢𑁆𑀢𑀁.

𑁧𑁭𑁯. 𑀲𑁄𑀴𑀲𑀫𑁂 𑀫𑀼𑀝𑁆𑀞𑀸 𑀦𑀝𑁆𑀞𑀸 𑀲𑀢𑀺 𑀏𑀢𑀲𑁆𑀲𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺, 𑀢𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀦𑁆𑀢𑀺 𑀆𑀳 ‘‘𑀫𑀼𑀝𑁆𑀞𑀲𑁆𑀲𑀘𑁆𑀘𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑁄’’𑀢𑀺. 𑀫𑀼𑀝𑁆𑀞𑀲𑁆𑀲𑀢𑀺𑀪𑀸𑀯𑁄𑀢𑀺 𑀘 𑀲𑀢𑀺𑀧𑁆𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄, 𑀦 𑀲𑀢𑀺𑀬𑀸 𑀅𑀪𑀸𑀯𑀫𑀢𑁆𑀢𑀁. 𑀅𑀲𑀫𑁆𑀧𑀚𑀜𑁆𑀜𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀅𑀲𑀫𑁆𑀧𑀚𑀜𑁆𑀜𑀁? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁…𑀧𑁂… 𑀅𑀯𑀺𑀚𑁆𑀚𑀸𑀮𑀗𑁆𑀖𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺 (𑀥. 𑀲. 𑁧𑁩𑁫𑁭) 𑀏𑀯𑀁 𑀯𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀬𑁂𑀯. 𑀢𑀣𑀸 𑀳𑀺 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑁄 𑀅𑀯𑀺𑀚𑁆𑀚𑀸 𑀯𑀺𑀚𑁆𑀚𑀸𑀬 𑀧𑀳𑀸𑀢𑀩𑁆𑀩𑀢𑁄, 𑀏𑀯𑀁 𑀲𑀫𑁆𑀧𑀚𑀜𑁆𑀜𑀧𑁆𑀧𑀝𑀺𑀧𑀓𑁆𑀔𑁄 𑀅𑀲𑀫𑁆𑀧𑀚𑀜𑁆𑀜𑀁. 𑀬𑀲𑁆𑀫𑀸 𑀧𑀦 𑀲𑀫𑁆𑀧𑀚𑀜𑁆𑀜𑀧𑁆𑀧𑀝𑀺𑀧𑀓𑁆𑀔𑁂 𑀲𑀢𑀺 𑀢𑀲𑁆𑀲 𑀯𑀲𑁂𑀦 𑀜𑀸𑀡𑀲𑁆𑀲 𑀅𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸𑀡𑀪𑀸𑀯𑁄’’𑀢𑀺.

𑁧𑁮𑁦. 𑀲𑀢𑁆𑀢𑀭𑀲𑀫𑁂 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻𑀢𑀺 𑀉𑀤𑀓𑁂 𑀮𑀸𑀩𑀼 𑀯𑀺𑀬 𑀬𑁂𑀦 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀧𑀺𑀮𑀯𑀺𑀢𑁆𑀯𑀸 𑀯𑀺𑀬 𑀢𑀺𑀝𑁆𑀞𑀢𑀺, 𑀦 𑀑𑀕𑀸𑀳𑀢𑀺, 𑀢𑀁 𑀧𑀺𑀮𑀸𑀧𑀦𑀁. 𑀦 𑀧𑀺𑀮𑀸𑀧𑀦𑀁 𑀅𑀧𑀺𑀮𑀸𑀧𑀦𑀁, 𑀢𑀁 𑀮𑀓𑁆𑀔𑀡𑀁 𑀲𑀪𑀸𑀯𑁄 𑀏𑀢𑀺𑀲𑁆𑀲𑀸𑀢𑀺 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸.

𑀲𑀫𑀸𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀧𑀡𑁆𑀡𑀸𑀲𑀓𑀁 𑀦𑀺𑀝𑁆𑀞𑀺𑀢𑀁.