(𑁧𑁧) 𑁧. 𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑀯𑀡𑁆𑀡𑀦𑀸

𑁧𑁧𑁯. 𑀢𑀢𑀺𑀬𑀧𑀡𑁆𑀡𑀸𑀲𑀓𑀲𑁆𑀲 𑀧𑀞𑀫𑁂 𑀤𑀼𑀓𑁆𑀔𑁂𑀦 𑀧𑀚𑀳𑀺𑀢𑀩𑁆𑀩𑀸𑀢𑀺 𑀤𑀼𑀧𑁆𑀧𑀚𑀳𑀸. 𑀤𑀼𑀘𑁆𑀘𑀚𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀺𑀦𑁆𑀦𑀁 𑀆𑀲𑀸𑀦𑀁 𑀤𑀼𑀘𑁆𑀘𑀚𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺 𑀧𑀞𑀫𑀁 𑀢𑀸𑀯 𑀮𑀸𑀪𑀸𑀲𑀸𑀬 𑀤𑀼𑀘𑁆𑀘𑀚𑀪𑀸𑀯𑀁 𑀯𑀺𑀪𑀸𑀯𑁂𑀢𑀺 ‘‘𑀮𑀸𑀪𑀸𑀲𑀸𑀬𑀸’’𑀢𑀺𑀆𑀤𑀺𑀦𑀸. 𑀉𑀪𑀢𑁄𑀩𑁆𑀬𑀽𑀴𑁆𑀳𑀦𑁆𑀢𑀺 𑀬𑀼𑀤𑁆𑀥𑀢𑁆𑀣𑀸𑀬 𑀉𑀪𑀢𑁄 𑀲𑀦𑁆𑀦𑀺𑀧𑀢𑀺𑀢𑀁. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀅𑀦𑀼𑀧𑁆𑀧𑀯𑀺𑀲𑀦𑁆𑀢𑀺. 𑀚𑀻𑀯𑀺𑀢𑀸𑀲𑀸𑀬 𑀤𑀼𑀧𑁆𑀧𑀚𑀳𑀢𑁆𑀢𑀸𑀢𑀺𑀆𑀤𑀺𑀦𑀸 𑀚𑀻𑀯𑀺𑀢𑀸𑀲𑀸𑀬 𑀤𑀼𑀘𑁆𑀘𑀚𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑁧𑁨𑁦. 𑀤𑀼𑀢𑀺𑀬𑁂 𑀤𑀼𑀮𑁆𑀮𑀪𑀸𑀢𑀺 𑀦 𑀲𑀼𑀮𑀪𑀸. 𑀇𑀡𑀁 𑀤𑁂𑀫𑀻𑀢𑀺 𑀲𑀜𑁆𑀜𑀁 𑀓𑀭𑁄𑀢𑀻𑀢𑀺 𑀏𑀯𑀁 𑀲𑀜𑁆𑀜𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀼𑀩𑁆𑀩𑀓𑀸𑀭𑀻𑀢𑀺 𑀧𑀞𑀫𑀁 𑀉𑀧𑀓𑀸𑀭𑀲𑁆𑀲 𑀓𑀸𑀭𑀓𑁄. 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻𑀢𑀺 𑀢𑁂𑀦 𑀓𑀢𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀓𑀸𑀭𑀓𑁄. 𑀢𑁂𑀲𑀼 𑀧𑀼𑀩𑁆𑀩𑀓𑀸𑀭𑀻 ‘𑀇𑀡𑀁 𑀤𑁂𑀫𑀻’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀺, 𑀧𑀘𑁆𑀙𑀸 𑀓𑀸𑀭𑀓𑁄 ‘𑀇𑀡𑀁 𑀚𑀻𑀭𑀸𑀧𑁂𑀫𑀻’𑀢𑀺 𑀲𑀜𑁆𑀜𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀇𑀥 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬𑀁 (𑀧𑀼. 𑀧. 𑀅𑀝𑁆𑀞. 𑁮𑁩) 𑀧𑀦 𑁋

‘‘𑀧𑀼𑀩𑁆𑀩𑀓𑀸𑀭𑀻𑀢𑀺 𑀧𑀞𑀫𑀫𑁂𑀯 𑀓𑀸𑀭𑀓𑁄. 𑀓𑀢𑀯𑁂𑀤𑀻𑀢𑀺 𑀓𑀢𑀁 𑀯𑁂𑀤𑁂𑀢𑀺, 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑁂 𑀅𑀕𑀸𑀭𑀺𑀬𑀸𑀦𑀕𑀸𑀭𑀺𑀬𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀅𑀕𑀸𑀭𑀺𑀓𑁂𑀲𑀼 𑀳𑀺 𑀫𑀸𑀢𑀸𑀧𑀺𑀢𑀭𑁄 𑀧𑀼𑀩𑁆𑀩𑀓𑀸𑀭𑀺𑀦𑁄 𑀦𑀸𑀫, 𑀧𑀼𑀢𑁆𑀢𑀥𑀻𑀢𑀭𑁄 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀢𑁂𑀲𑀁 𑀓𑀼𑀭𑀼𑀫𑀸𑀦𑀸 𑀓𑀢𑀯𑁂𑀤𑀺𑀦𑁄 𑀦𑀸𑀫. 𑀅𑀦𑀕𑀸𑀭𑀺𑀬𑁂𑀲𑀼 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀧𑀼𑀩𑁆𑀩𑀓𑀸𑀭𑀺𑀦𑁄 𑀦𑀸𑀫, 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀧𑀝𑀺𑀚𑀕𑁆𑀕𑀦𑁆𑀢𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀘 𑀢𑁂𑀲𑀁 𑀓𑀼𑀭𑀼𑀫𑀸𑀦𑀸 𑀓𑀢𑀯𑁂𑀤𑀺𑀦𑁄 𑀦𑀸𑀫. 𑀢𑁂𑀲𑀁 𑀆𑀯𑀺𑀪𑀸𑀯𑀢𑁆𑀣𑀸𑀬 𑀉𑀧𑀚𑁆𑀛𑀸𑀬𑀧𑁄𑀲𑀓𑀲𑁄𑀡𑀢𑁆𑀣𑁂𑀭𑀸𑀤𑀻𑀦𑀁 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺.

‘‘𑀅𑀧𑀭𑁄 𑀦𑀬𑁄 𑁋 𑀧𑀭𑁂𑀦 𑀅𑀓𑀢𑁂𑀬𑁂𑀯 𑀉𑀧𑀓𑀸𑀭𑁂 𑀅𑀢𑁆𑀢𑀦𑀺 𑀓𑀢𑀁 𑀉𑀧𑀓𑀸𑀭𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑀸𑀭𑀓𑁄 𑀧𑀼𑀩𑁆𑀩𑀓𑀸𑀭𑀻, 𑀲𑁂𑀬𑁆𑀬𑀣𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀘𑁂𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘. 𑀲𑁄 𑀤𑀼𑀮𑁆𑀮𑀪𑁄 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀪𑀺𑀪𑀽𑀢𑀢𑁆𑀢𑀸. 𑀧𑀭𑁂𑀦 𑀓𑀢𑀲𑁆𑀲 𑀉𑀧𑀓𑀸𑀭𑀲𑁆𑀲 𑀅𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀺𑀁 𑀅𑀢𑁆𑀢𑀦𑀺 𑀓𑀢𑀁 𑀉𑀧𑀓𑀸𑀭𑀁 𑀉𑀧𑀓𑀸𑀭𑀢𑁄 𑀚𑀸𑀦𑀦𑁆𑀢𑁄 𑀯𑁂𑀤𑀺𑀬𑀦𑁆𑀢𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻 𑀲𑁂𑀬𑁆𑀬𑀣𑀸𑀧𑀺 𑀫𑀸𑀢𑀸𑀧𑀺𑀢𑀼𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄. 𑀲𑁄𑀧𑀺 𑀤𑀼𑀮𑁆𑀮𑀪𑁄 𑀲𑀢𑁆𑀢𑀸𑀦𑀁 𑀅𑀯𑀺𑀚𑁆𑀚𑀸𑀪𑀺𑀪𑀽𑀢𑀢𑁆𑀢𑀸. 𑀅𑀧𑀺𑀘 𑀅𑀓𑀸𑀭𑀡𑀯𑀘𑁆𑀙𑀮𑁄 𑀧𑀼𑀩𑁆𑀩𑀓𑀸𑀭𑀻, 𑀲𑀓𑀸𑀭𑀡𑀯𑀘𑁆𑀙𑀮𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. ‘𑀓𑀭𑀺𑀲𑁆𑀲𑀢𑀺 𑀫𑁂’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀓𑀺𑀭𑀺𑀬𑁄 𑀧𑀼𑀩𑁆𑀩𑀓𑀸𑀭𑀻, ‘𑀓𑀭𑀺𑀲𑁆𑀲𑀢𑀺 𑀫𑁂’𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀲𑀸𑀧𑁂𑀓𑁆𑀔𑀓𑀺𑀭𑀺𑀬𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀢𑀫𑁄𑀚𑁄𑀢𑀺𑀧𑀭𑀸𑀬𑀡𑁄 𑀧𑀼𑀩𑁆𑀩𑀓𑀸𑀭𑀻, 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀡𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀤𑁂𑀲𑁂𑀢𑀸 𑀧𑀼𑀩𑁆𑀩𑀓𑀸𑀭𑀻, 𑀧𑀝𑀺𑀧𑀚𑁆𑀚𑀺𑀢𑀸 𑀓𑀢𑀜𑁆𑀜𑀼𑀓𑀢𑀯𑁂𑀤𑀻. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀩𑁆𑀩𑀓𑀸𑀭𑀻, 𑀅𑀭𑀺𑀬𑀲𑀸𑀯𑀓𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑀸𑀭𑀡𑁂𑀦 𑀯𑀺𑀦𑀸 𑀧𑀯𑀢𑁆𑀢𑀳𑀺𑀢𑀘𑀺𑀢𑁆𑀢𑁄 𑀅𑀓𑀸𑀭𑀡𑀯𑀘𑁆𑀙𑀮𑁄. 𑀅𑀦𑀸𑀕𑀢𑀫𑁆𑀳𑀺 𑀧𑀬𑁄𑀚𑀦𑀁 𑀅𑀧𑁂𑀓𑁆𑀔𑀫𑀸𑀦𑁄 ‘‘𑀓𑀭𑀺𑀲𑁆𑀲𑀢𑀺 𑀫𑁂’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂𑀦 𑀧𑀞𑀫𑀁 𑀕𑀳𑀺𑀢𑀁 𑀢𑀸𑀤𑀺𑀲𑀁 𑀓𑀢𑀁 𑀉𑀧𑀸𑀤𑀸𑀬 𑀓𑀢𑀜𑁆𑀜𑀽 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀼𑀩𑁆𑀩𑀓𑀸𑀭𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀭𑀺𑀲𑁆𑀲𑀢𑀺 𑀫𑁂𑀢𑀺 𑀏𑀯𑀫𑀸𑀤𑀺𑀓𑀸𑀭𑀡𑀲𑀸𑀧𑁂𑀓𑁆𑀔𑀓𑀺𑀭𑀺𑀬𑁄 𑀓𑀢𑀜𑁆𑀜𑀼𑀓𑀢𑀯𑁂𑀤𑀻’’𑀢𑀺 𑀯𑀼𑀢𑁆𑀢𑀁. 𑀢𑀫𑁄𑀚𑁄𑀢𑀺𑀧𑀭𑀸𑀬𑀡𑁄 𑀧𑀼𑀜𑁆𑀜𑀨𑀮𑀸𑀦𑀺 𑀅𑀦𑀼𑀧𑀚𑀻𑀯𑀦𑁆𑀢𑁄 𑀏𑀯 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺 ‘‘𑀧𑀼𑀩𑁆𑀩𑀓𑀸𑀭𑀻’’𑀢𑀺 𑀯𑀼𑀢𑁆𑀢𑁄. 𑀧𑀼𑀜𑁆𑀜𑀨𑀮𑀁 𑀉𑀧𑀚𑀻𑀯𑀦𑁆𑀢𑁄 𑀳𑀺 𑀓𑀢𑀜𑁆𑀜𑀼𑀧𑀓𑁆𑀔𑁂 𑀢𑀺𑀝𑁆𑀞𑀢𑀺.

𑁧𑁨𑁧. 𑀢𑀢𑀺𑀬𑁂 𑀢𑀺𑀢𑁆𑀢𑁄𑀢𑀺 𑀲𑀼𑀳𑀺𑀢𑁄 𑀧𑀭𑀺𑀬𑁄𑀲𑀺𑀢𑁄 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑀸𑀬 𑀦𑀺𑀭𑀼𑀲𑁆𑀲𑀼𑀓𑁆𑀓𑁄. 𑀕𑀼𑀡𑀧𑀸𑀭𑀺𑀧𑀽𑀭𑀺𑀬𑀸 𑀳𑀺 𑀧𑀭𑀺𑀧𑀼𑀡𑁆𑀡𑁄 𑀬𑀸𑀯𑀤𑀢𑁆𑀣𑁄 𑀇𑀥 𑀢𑀺𑀢𑁆𑀢𑁄 𑀯𑀼𑀢𑁆𑀢𑁄. 𑀢𑀧𑁆𑀧𑁂𑀢𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀢𑀺𑀢𑁆𑀢𑀺𑀓𑀭𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘 𑀢𑀣𑀸𑀕𑀢𑀲𑀸𑀯𑀓𑁄 𑀘 𑀔𑀻𑀡𑀸𑀲𑀯𑁄 𑀢𑀺𑀢𑁆𑀢𑁄𑀢𑀺 𑀏𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀳𑀺 𑀲𑀬𑀁 𑀢𑀺𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑀁 𑀧𑀦 𑀢𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀳𑀺 𑀥𑀫𑁆𑀫𑀓𑀣𑀸𑀬 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀲𑀸𑀯𑀓𑀸𑀦𑀁 𑀧𑀦 𑀥𑀫𑁆𑀫𑀓𑀣𑀸𑀬 𑀅𑀧𑀭𑀺𑀫𑀸𑀡𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀲𑀫𑀬𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀢𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀦 𑀅𑀢𑁆𑀢𑀦𑁄 𑀯𑀘𑀦𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀯𑀘𑀦𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀲𑁄𑀢𑀼𑀁 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀧𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀦 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀁 𑀥𑀫𑁆𑀫𑀁 𑀓𑀣𑁂𑀢𑀻’’𑀢𑀺 𑀘𑀺𑀢𑁆𑀢𑀻𑀓𑀸𑀭𑀁 𑀓𑀭𑁄𑀢𑀺. 𑀇𑀢𑀺 𑀲𑁄 𑀘𑀺𑀢𑁆𑀢𑀻𑀓𑀸𑀭𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑁄𑀢𑀺. 𑀏𑀯𑀁 𑀢𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀢𑀧𑁆𑀧𑁂𑀢𑀸 𑀦𑀸𑀫. 𑀬𑀣𑀸 𑀳𑀺 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸’’𑀢𑀺 𑀭𑀜𑁆𑀜𑀸 𑀆𑀡𑀢𑁆𑀢𑁂 𑀓𑀺𑀜𑁆𑀘𑀸𑀧𑀺 𑀆𑀦𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀅𑀣 𑀔𑁄 𑀭𑀸𑀚𑀸𑀯 𑀢𑀢𑁆𑀣 𑀤𑀸𑀬𑀓𑁄. 𑀬𑁂𑀳𑀺𑀧𑀺 𑀮𑀤𑁆𑀥𑀁 𑀳𑁄𑀢𑀺, 𑀢𑁂 ‘‘𑀭𑀜𑁆𑀜𑀸 𑀅𑀫𑁆𑀳𑀸𑀓𑀁 𑀞𑀸𑀦𑀦𑁆𑀢𑀭𑀁 𑀤𑀺𑀦𑁆𑀦𑀁, 𑀇𑀲𑁆𑀲𑀭𑀺𑀬𑀯𑀺𑀪𑀯𑁄 𑀤𑀺𑀦𑁆𑀦𑁄’’𑀢𑁆𑀯𑁂𑀯 𑀕𑀡𑁆𑀳𑀦𑁆𑀢𑀺, 𑀦 ‘‘𑀭𑀸𑀚𑀧𑀼𑀭𑀺𑀲𑁂𑀳𑀻’’𑀢𑀺 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑁧𑁨𑁨. 𑀘𑀢𑀼𑀢𑁆𑀣𑁂 𑀤𑀼𑀢𑁆𑀢𑀧𑁆𑀧𑀬𑀸𑀢𑀺 𑀅𑀢𑀧𑁆𑀧𑀬𑀸, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀢𑀧𑁆𑀧𑁂𑀢𑀼𑀁. 𑀬𑁄 𑀳𑀺 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸 𑀜𑀸𑀢𑀺𑀓𑀼𑀮𑀁 𑀯𑀸 𑀦𑀺𑀲𑁆𑀲𑀸𑀬 𑀯𑀲𑀫𑀸𑀦𑁄 𑀘𑀻𑀯𑀭𑁂 𑀚𑀺𑀡𑁆𑀡𑁂 𑀢𑁂𑀳𑀺 𑀤𑀺𑀦𑁆𑀦𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀼𑀦𑀧𑁆𑀧𑀼𑀦𑀁 𑀤𑀺𑀦𑁆𑀦𑀫𑁆𑀧𑀺 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑁂𑀯. 𑀬𑁄 𑀘 𑀢𑁂𑀦𑁂𑀯 𑀦𑀬𑁂𑀦 𑀮𑀤𑁆𑀥𑀁 𑀮𑀤𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀧𑀭𑀲𑁆𑀲 𑀤𑁂𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀮𑀤𑁆𑀥𑀫𑁆𑀧𑀺 𑀢𑀣𑁂𑀯 𑀓𑀭𑁄𑀢𑀺. 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀲𑀓𑀝𑁂𑀳𑀺𑀧𑀺 𑀧𑀘𑁆𑀘𑀬𑁂 𑀉𑀧𑀦𑁂𑀦𑁆𑀢𑁂𑀦 𑀢𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀼𑀢𑁆𑀢𑀧𑁆𑀧𑀬𑀸.

𑁧𑁨𑁩. 𑀧𑀜𑁆𑀘𑀫𑁂 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀅𑀢𑁆𑀢𑀦𑁄 𑀅𑀓𑀢𑁆𑀯𑀸 𑀧𑀭𑀲𑁆𑀲 𑀦 𑀤𑁂𑀢𑀺, 𑀅𑀢𑀺𑀭𑁂𑀓𑁂 𑀧𑀦 𑀲𑀢𑀺 𑀦 𑀦𑀺𑀓𑁆𑀔𑀺𑀧𑀢𑀺, 𑀧𑀭𑀲𑁆𑀲 𑀤𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑀁𑀬𑁂𑀯 𑀧𑀭𑁂𑀲𑀁 𑀦 𑀤𑁂𑀢𑀻’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑁄 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑀓𑀼𑀮𑀸 𑀯𑀸 𑀜𑀸𑀢𑀺𑀓𑀼𑀮𑀸 𑀯𑀸 𑀚𑀺𑀡𑁆𑀡𑀘𑀻𑀯𑀭𑁄 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺 𑀦 𑀦𑀺𑀓𑁆𑀔𑀺𑀧𑀢𑀺, 𑀅𑀕𑁆𑀕𑀴𑀁 𑀤𑀢𑁆𑀯𑀸 𑀧𑀸𑀭𑀼𑀧𑀦𑁆𑀢𑁄𑀧𑀺 𑀧𑀼𑀦𑀧𑀺 𑀤𑀺𑀬𑁆𑀬𑀫𑀸𑀦𑁂 𑀲𑀳𑀲𑀸 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑁄 𑀘 𑀮𑀤𑁆𑀥𑀁 𑀮𑀤𑁆𑀥𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀭𑁂𑀲𑀁 𑀦 𑀤𑁂𑀢𑀺. 𑀇𑀫𑁂 𑀤𑁆𑀯𑁂𑀧𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀢𑀧𑁆𑀧𑁂𑀢𑀼𑀦𑁆𑀢𑀺 𑀲𑀼𑀢𑀧𑁆𑀧𑀬𑀸’’𑀢𑀺.

𑁧𑁨𑁪-𑁧𑁨𑁭. 𑀙𑀝𑁆𑀞𑀲𑀢𑁆𑀢𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀆𑀲𑀸𑀤𑀼𑀧𑁆𑀧𑀚𑀳𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.