𑁮. 𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲𑁄

𑁪𑁭𑁫. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁂𑀲𑀁, 𑀏𑀢𑁂𑀲𑀁 𑀫𑀸𑀦𑀲𑀁 𑀫𑀬𑀸;

𑀧𑀸𑀝𑀯𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁, 𑀓𑀣𑀻𑀬𑀢𑀺 𑀧𑀓𑀺𑀡𑁆𑀡𑀓𑀁.

𑁪𑁭𑁬. 𑀧𑀦𑁆𑀣𑀫𑀓𑁆𑀓𑀝𑀓𑁄 𑀦𑀸𑀫, 𑀤𑀺𑀲𑀸𑀲𑀼 𑀧𑀦 𑀧𑀜𑁆𑀘𑀲𑀼;

𑀢𑀢𑁆𑀣 𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸, 𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀢𑀺.

𑁪𑁭𑁭. 𑀧𑀞𑀫𑀸𑀬 𑀤𑀺𑀲𑀸𑀬𑁂𑀢𑁆𑀣, 𑀲𑀼𑀢𑁆𑀢𑁂 𑀧𑀦 𑀧𑀲𑀸𑀭𑀺𑀢𑁂;

𑀧𑀸𑀡𑀓𑁂𑀦 𑀧𑀝𑀗𑁆𑀕𑁂𑀦, 𑀖𑀝𑁆𑀝𑀺𑀢𑁂 𑀫𑀓𑁆𑀔𑀺𑀓𑀸𑀬 𑀯𑀸.

𑁪𑁭𑁮. 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀓𑀺𑀜𑁆𑀘𑀺, 𑀘𑀮𑀺𑀢𑁆𑀯𑀸 𑀉𑀡𑁆𑀡𑀦𑀸𑀪𑀺 𑀢𑀼;

𑀕𑀦𑁆𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀬𑀽𑀲𑀁 𑀧𑀺𑀯𑀢𑀺 𑀢𑀲𑁆𑀲 𑀲𑀸.

𑁪𑁭𑁯. 𑀧𑀼𑀦𑀸𑀕𑀦𑁆𑀢𑁆𑀯𑀸𑀦 𑀢𑀢𑁆𑀣𑁂𑀯, 𑀦𑀺𑀧𑀚𑁆𑀚𑀢𑀺 𑀬𑀣𑀸𑀲𑀼𑀔𑀁;

𑀏𑀯𑀫𑁂𑀯 𑀓𑀭𑁄𑀢𑁂𑀯, 𑀤𑀺𑀲𑀸𑀲𑀼 𑀤𑀼𑀢𑀺𑀬𑀸𑀤𑀺𑀲𑀼.

𑁪𑁮𑁦. 𑀧𑀲𑀸𑀤𑀸 𑀧𑀜𑁆𑀘 𑀤𑀝𑁆𑀞𑀩𑁆𑀩𑀸, 𑀲𑀼𑀢𑁆𑀢𑀁 𑀧𑀜𑁆𑀘𑀤𑀺𑀲𑀸𑀲𑁆𑀯𑀺𑀯;

𑀘𑀺𑀢𑁆𑀢𑀁 𑀧𑀦 𑀘 𑀤𑀝𑁆𑀞𑀩𑁆𑀩𑀁, 𑀫𑀚𑁆𑀛𑁂 𑀫𑀓𑁆𑀓𑀝𑀓𑁄 𑀯𑀺𑀬.

𑁪𑁮𑁧. 𑀧𑀸𑀡𑀓𑀸𑀤𑀻𑀳𑀺 𑀲𑀼𑀢𑁆𑀢𑀲𑁆𑀲, 𑀢𑀲𑁆𑀲 𑀲𑀗𑁆𑀖𑀝𑁆𑀝𑀦𑀸 𑀯𑀺𑀬;

𑀧𑀲𑀸𑀤𑀸𑀦𑀁 𑀢𑀼 𑀤𑀝𑁆𑀞𑀩𑁆𑀩𑀸, 𑀖𑀝𑁆𑀝𑀦𑀸𑀭𑀫𑁆𑀫𑀡𑁂𑀦 𑀳𑀺.

𑁪𑁮𑁨. 𑀘𑀮𑀦𑀁 𑀯𑀺𑀬 𑀢𑀁𑀫𑀚𑁆𑀛𑁂, 𑀦𑀺𑀧𑀦𑁆𑀦𑀸𑀬𑀼𑀡𑁆𑀡𑀦𑀸𑀪𑀺𑀬𑀸;

𑀧𑀲𑀸𑀤𑀖𑀝𑁆𑀝𑀦𑀁 𑀢𑀢𑁆𑀣, 𑀕𑀳𑁂𑀢𑁆𑀯𑀸𑀭𑀫𑁆𑀫𑀡𑀁 𑀧𑀦.

𑁪𑁮𑁩. 𑀫𑀦𑁄𑀥𑀸𑀢𑀼𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀫𑀢𑀁;

𑀢𑀲𑁆𑀲𑀸 𑀲𑀼𑀢𑁆𑀢𑀸𑀦𑀼𑀲𑀸𑀭𑀁𑀯, 𑀯𑀻𑀣𑀺𑀘𑀺𑀢𑁆𑀢𑀧𑀯𑀢𑁆𑀢𑀦𑀁.

𑁪𑁮𑁪. 𑀲𑀻𑀲𑁂 𑀧𑀦𑀲𑁆𑀲 𑀯𑀺𑀚𑁆𑀛𑀺𑀢𑁆𑀯𑀸, 𑀬𑀽𑀲𑀧𑀸𑀦𑀁𑀯 𑀘𑁂𑀢𑀲𑁄;

𑀆𑀭𑀫𑁆𑀫𑀡𑁂𑀲𑀼 𑀤𑀝𑁆𑀞𑀩𑁆𑀩𑀁, 𑀚𑀯𑀦𑀲𑁆𑀲 𑀧𑀯𑀢𑁆𑀢𑀦𑀁.

𑁪𑁮𑁫. 𑀧𑀼𑀦𑀸𑀕𑀦𑁆𑀢𑁆𑀯𑀸 𑀬𑀣𑀸 𑀲𑀼𑀢𑁆𑀢-𑀚𑀸𑀮𑀫𑀚𑁆𑀛𑁂 𑀦𑀺𑀧𑀚𑁆𑀚𑀦𑀁;

𑀯𑀢𑁆𑀣𑀼𑀁𑀬𑁂𑀯 𑀘 𑀦𑀺𑀲𑁆𑀲𑀸𑀬, 𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀦𑀁.

𑁪𑁮𑁬. 𑀇𑀤𑀁 𑀢𑀼 𑀧𑀦 𑀑𑀧𑀫𑁆𑀫𑀁, 𑀅𑀢𑁆𑀣𑀁 𑀤𑀻𑀧𑁂𑀢𑀺 𑀓𑀺𑀁 𑀢𑀼 𑀳𑀺;

𑀆𑀭𑀫𑁆𑀫𑀡𑁂𑀦 𑀧𑀞𑀫𑀁, 𑀧𑀲𑀸𑀤𑁂 𑀖𑀝𑁆𑀝𑀺𑀢𑁂 𑀧𑀦.

𑁪𑁮𑁭. 𑀧𑀲𑀸𑀤𑀯𑀢𑁆𑀣𑀼𑀢𑁄 𑀘𑀺𑀢𑁆𑀢𑀸, 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀫𑀦𑁄;

𑀢𑀢𑁄 𑀳𑀺 𑀧𑀞𑀫𑀁𑀬𑁂𑀯, 𑀚𑀸𑀬𑀢𑀻𑀢𑀺 𑀳𑀺 𑀤𑀻𑀧𑀺𑀢𑀁.

𑁪𑁮𑁮. 𑀏𑀓𑁂𑀓𑀸𑀭𑀫𑁆𑀫𑀡𑀁 𑀤𑁆𑀯𑀻𑀲𑀼, 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑀩𑁆𑀩𑀲𑁄;

𑀆𑀕𑀘𑁆𑀙𑀢𑀺 𑀢𑁂𑀦𑀸𑀧𑀸𑀣𑀁, 𑀅𑀬𑀫𑀢𑁆𑀣𑁄𑀧𑀺 𑀤𑀻𑀧𑀺𑀢𑁄.

𑁪𑁮𑁯. 𑀭𑀽𑀧𑀁 𑀘𑀓𑁆𑀔𑀼𑀧𑀲𑀸𑀤𑀫𑁆𑀳𑀺, 𑀖𑀝𑁆𑀝𑀺𑀢𑁆𑀯𑀸 𑀢𑀗𑁆𑀔𑀡𑁂 𑀧𑀦;

𑀫𑀦𑁄𑀤𑁆𑀯𑀸𑀭𑁂 𑀢𑀣𑀸𑀧𑀸𑀣-𑀫𑀸𑀕𑀘𑁆𑀙𑀢𑀺 𑀦𑀺𑀲𑀁𑀲𑀬𑁄.

𑁪𑁯𑁦. 𑀔𑀕𑁄 𑀬𑀣𑀸 𑀳𑀺 𑀭𑀼𑀓𑁆𑀔𑀕𑁆𑀕𑁂, 𑀦𑀺𑀮𑀻𑀬𑀦𑁆𑀢𑁄𑀯 𑀲𑀸𑀔𑀺𑀦𑁄;

𑀲𑀸𑀔𑀁 𑀖𑀝𑁆𑀝𑁂𑀢𑀺 𑀢𑀲𑁆𑀲𑀻𑀥, 𑀙𑀸𑀬𑀸 𑀨𑀭𑀢𑀺 𑀪𑀽𑀫𑀺𑀬𑀁.

𑁪𑁯𑁧. 𑀲𑀸𑀔𑀸𑀬 𑀖𑀝𑁆𑀝𑀦𑀘𑁆𑀙𑀸𑀬𑀸, 𑀨𑀭𑀡𑀸𑀦𑀺 𑀘 𑀲𑀩𑁆𑀩𑀲𑁄;

𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀏𑀓-𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀚𑀸𑀬𑀭𑁂.

𑁪𑁯𑁨. 𑀏𑀯𑀫𑁂𑀯 𑀘 𑀭𑀽𑀧𑀲𑁆𑀲, 𑀧𑀲𑀸𑀤𑀲𑁆𑀲 𑀘 𑀖𑀝𑁆𑀝𑀦𑀁;

𑀪𑀯𑀗𑁆𑀕𑀘𑀮𑀦𑀲𑁆𑀲𑀸𑀧𑀺, 𑀧𑀘𑁆𑀘𑀬𑀢𑁆𑀢𑁂𑀦 𑀅𑀢𑁆𑀣𑀢𑁄.

𑁪𑁯𑁩. 𑀢𑀣𑁂𑀯 𑀘 𑀫𑀦𑁄𑀤𑁆𑀯𑀸𑀭𑁂, 𑀆𑀧𑀸𑀣𑀕𑀫𑀦𑀫𑁆𑀧𑀺 𑀘;

𑀅𑀧𑀼𑀩𑁆𑀩𑀸𑀘𑀭𑀺𑀫𑀁 𑀏𑀓-𑀓𑁆𑀔𑀡𑀲𑁆𑀫𑀺𑀁𑀬𑁂𑀯 𑀳𑁄𑀢𑀺𑀢𑀺.

𑁪𑁯𑁪. 𑀢𑀢𑁄 𑀪𑀯𑀗𑁆𑀕𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀬𑀣𑀸𑀓𑁆𑀓𑀫𑀁;

𑀆𑀯𑀚𑁆𑀚𑀦𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀤𑀲𑁆𑀲𑀦𑁂 𑀲𑀫𑁆𑀧𑀝𑀺𑀘𑁆𑀙𑀦𑁂.

𑁪𑁯𑁫. 𑀲𑀦𑁆𑀢𑀻𑀭𑀡𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀢𑀢𑁄 𑀯𑁄𑀝𑁆𑀞𑀩𑁆𑀩𑀦𑁂𑀧𑀺 𑀘;

𑀓𑀼𑀲𑀮𑀁 𑀚𑀯𑀦𑀁 𑀘𑀺𑀢𑁆𑀢𑀁, 𑀢𑀣𑀸𑀓𑀼𑀲𑀮𑀫𑁂𑀯 𑀯𑀸.

𑁪𑁯𑁬. 𑀏𑀲𑁄 𑀏𑀯 𑀦𑀬𑁄 𑀲𑁄𑀢-𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀯𑀺𑀜𑁆𑀜𑀼𑀦𑀸;

𑀅𑀯𑀺𑀲𑁂𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑁄, 𑀲𑀤𑁆𑀤𑀸𑀤𑀻𑀦𑀁 𑀢𑀼 𑀖𑀝𑁆𑀝𑀦𑁂.

𑁪𑁯𑁭. 𑀤𑁄𑀯𑀸𑀭𑀺𑀓𑁄𑀧𑀫𑀸𑀤𑀻𑀦𑀺, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑁂;

𑀉𑀤𑁆𑀥𑀭𑀺𑀢𑁆𑀯𑀸𑀦 𑀢𑀸𑀦𑁂𑀢𑁆𑀣, 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀯𑀺𑀜𑁆𑀜𑀼𑀦𑀸.

𑁪𑁯𑁮. 𑀅𑀲𑀫𑁆𑀪𑁂𑀤𑁂𑀦 𑀘𑀓𑁆𑀔𑀼𑀲𑁆𑀲, 𑀭𑀽𑀧𑀸𑀧𑀸𑀣𑀕𑀫𑁂𑀦 𑀘;

𑀆𑀮𑁄𑀓𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁪𑁯𑁯. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁦. 𑀅𑀲𑀫𑁆𑀪𑁂𑀤𑁂𑀦 𑀲𑁄𑀢𑀲𑁆𑀲, 𑀲𑀤𑁆𑀤𑀸𑀧𑀸𑀣𑀕𑀫𑁂𑀦 𑀘;

𑀆𑀓𑀸𑀲𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁧. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀲𑁄𑀢𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁨. 𑀅𑀲𑀫𑁆𑀪𑁂𑀤𑁂𑀦 𑀖𑀸𑀦𑀲𑁆𑀲, 𑀕𑀦𑁆𑀥𑀸𑀧𑀸𑀣𑀕𑀫𑁂𑀦 𑀘;

𑀯𑀸𑀬𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁩. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁪. 𑀅𑀲𑀫𑁆𑀪𑁂𑀤𑁂𑀦 𑀚𑀺𑀯𑁆𑀳𑀸𑀬, 𑀭𑀲𑀸𑀧𑀸𑀣𑀕𑀫𑁂𑀦 𑀘;

𑀆𑀧𑁄𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁫. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁬. 𑀅𑀲𑀫𑁆𑀪𑁂𑀤𑁂𑀦 𑀓𑀸𑀬𑀲𑁆𑀲, 𑀨𑁄𑀝𑁆𑀞𑀩𑁆𑀩𑀸𑀧𑀸𑀣𑀲𑀗𑁆𑀕𑀫𑀸;

𑀧𑀣𑀯𑀻𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁭. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀚𑀸𑀬𑀢𑁂 𑀓𑀸𑀬𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀢𑀁 𑀲𑀳.

𑁫𑁦𑁮. 𑀅𑀲𑀫𑁆𑀪𑁂𑀤𑀸 𑀫𑀦𑀲𑁆𑀲𑀸𑀧𑀺, 𑀥𑀫𑁆𑀫𑀸𑀧𑀸𑀣𑀕𑀫𑁂𑀦 𑀘;

𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀧𑀺, 𑀲𑀫𑀦𑀓𑁆𑀓𑀸𑀭𑀳𑁂𑀢𑀼𑀦𑀸.

𑁫𑁦𑁯. 𑀧𑀘𑁆𑀘𑀬𑁂𑀳𑀺 𑀧𑀦𑁂𑀢𑁂𑀳𑀺, 𑀲𑀫𑁂𑀢𑁂𑀳𑀺 𑀘𑀢𑀽𑀳𑀺𑀧𑀺;

𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯𑀁 𑀢𑀼, 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀚𑀸𑀬𑀢𑁂.

𑁫𑁧𑁦. 𑀫𑀦𑁄 𑀪𑀯𑀗𑁆𑀕𑀘𑀺𑀢𑁆𑀢𑀦𑁆𑀢𑀺, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸;

𑀆𑀯𑀚𑁆𑀚𑀦𑀓𑁆𑀭𑀺𑀬𑀸𑀘𑀺𑀢𑁆𑀢𑀁, 𑀲𑀫𑀦𑀓𑁆𑀓𑀸𑀭𑁄𑀢𑀺 𑀲𑀜𑁆𑀜𑀺𑀢𑀁.

𑁫𑁧𑁧. 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁂𑀦𑀸𑀢𑀺, 𑀦𑀸𑀬𑀁 𑀲𑀩𑁆𑀩𑀢𑁆𑀣 𑀕𑀘𑁆𑀙𑀢𑀺;

𑀪𑀯𑀁 𑀢𑀼 𑀧𑀜𑁆𑀘𑀯𑁄𑀓𑀸𑀭𑀁, 𑀲𑀦𑁆𑀥𑀸𑀬 𑀓𑀣𑀺𑀢𑁄 𑀧𑀦.

𑁫𑁧𑁨. 𑀧𑀝𑀺𑀲𑀦𑁆𑀥𑀸𑀤𑀺𑀘𑀺𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑁂𑀓𑀽𑀦𑀯𑀻𑀲𑀢𑀺;

𑀓𑀸𑀫𑁂 𑀤𑀲 𑀘 𑀭𑀽𑀧𑁂𑀲𑀼, 𑀧𑀜𑁆𑀘 𑀘𑀢𑁆𑀢𑀸𑀭𑀺𑀭𑀽𑀧𑀺𑀲𑀼.

𑁫𑁧𑁩. 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸 𑀕𑀢𑀺𑀦𑀺𑀫𑀺𑀢𑁆𑀢𑀓𑀁;

𑀇𑀤𑀁 𑀳𑀺 𑀢𑀺𑀯𑀺𑀥𑀁 𑀢𑁂𑀲𑀁, 𑀆𑀭𑀫𑁆𑀫𑀡𑀫𑀼𑀤𑀻𑀭𑀺𑀢𑀁.

𑁫𑁧𑁪. 𑀓𑀸𑀫𑀸𑀯𑀘𑀭𑀲𑀦𑁆𑀥𑀻𑀦𑀁, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀁 𑀫𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀢𑀻𑀢𑀁 𑀯𑀸, 𑀳𑁄𑀢𑀺 𑀦𑀢𑁆𑀣𑀺 𑀅𑀦𑀸𑀕𑀢𑀁.

𑁫𑁧𑁫. 𑀅𑀝𑁆𑀞𑁂𑀯 𑀘 𑀫𑀳𑀸𑀧𑀸𑀓𑀸, 𑀢𑀻𑀡𑀺 𑀲𑀦𑁆𑀢𑀻𑀭𑀡𑀸𑀦𑀺 𑀘;

𑀏𑀓𑀸𑀤𑀲𑀯𑀺𑀥𑀁 𑀘𑀺𑀢𑁆𑀢𑀁, 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑀁.

𑁫𑁧𑁬. 𑀏𑀓𑀸𑀤𑀲𑀯𑀺𑀥𑁂 𑀘𑀺𑀢𑁆𑀢𑁂, 𑀢𑀤𑀸𑀭𑀫𑁆𑀫𑀡𑀲𑀜𑁆𑀜𑀺𑀢𑁂;

𑀤𑀲 𑀧𑀼𑀜𑁆𑀜𑀯𑀺𑀧𑀸𑀓𑀸𑀦𑀺, 𑀏𑀓𑀁 𑀳𑁄𑀢𑀺 𑀅𑀧𑀼𑀜𑁆𑀜𑀚𑀁.

𑁫𑁧𑁭. 𑀫𑀳𑀸𑀧𑀸𑀓𑀸 𑀦 𑀚𑀸𑀬𑀦𑁆𑀢𑁂, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂;

𑀓𑀸𑀫𑁂 𑀭𑀽𑀧𑁂 𑀪𑀯𑁂 𑀘𑁂𑀯, 𑀳𑁄𑀢𑀺 𑀲𑀦𑁆𑀢𑀻𑀭𑀡𑀢𑁆𑀢𑀬𑀁.

𑁫𑁧𑁮. 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀢𑁆𑀣𑀼𑀦𑀸;

𑀢𑁂𑀲𑀼 𑀘𑀺𑀢𑁆𑀢𑀁 𑀧𑀦𑁂𑀓𑀫𑁆𑀧𑀺, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂.

𑁫𑁧𑁯. 𑀦 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀢𑀺 𑀓𑀤𑀸𑀘𑀺𑀧𑀺;

𑀓𑀲𑁆𑀫𑀸 𑀦 𑀳𑁄𑀢𑀺 𑀘𑁂 𑀢𑀢𑁆𑀣, 𑀩𑀻𑀚𑀲𑁆𑀲𑀸𑀪𑀸𑀯𑀢𑁄 𑀧𑀦.

𑁫𑁨𑁦. 𑀧𑀝𑀺𑀲𑀦𑁆𑀥𑀺𑀩𑀻𑀚𑀁 𑀦𑀢𑁆𑀣𑁂𑀢𑁆𑀣, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀭𑀽𑀧𑀸𑀤𑀺𑀕𑁄𑀘𑀭𑁂 𑀢𑀲𑁆𑀲, 𑀪𑀯𑁂𑀬𑁆𑀬 𑀚𑀦𑀓𑀁 𑀢𑀼 𑀬𑀁.

𑁫𑁨𑁧. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑀸𑀤𑀻𑀦𑀁, 𑀦𑀢𑁆𑀣𑀺𑀢𑀸𑀧𑀚𑁆𑀚𑀢𑀻𑀢𑀺 𑀘𑁂;

𑀦𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀯𑀢𑁆𑀢𑀸𑀦𑀼-𑀪𑀸𑀯𑀢𑁄 𑀘𑀺𑀢𑁆𑀢𑀲𑀫𑁆𑀪𑀯𑁄.

𑁫𑁨𑁨. 𑀏𑀓𑀦𑁆𑀢𑁂𑀦 𑀬𑀣𑀸 𑀘𑁂𑀢𑀁, 𑀢𑀤𑀸𑀭𑀫𑁆𑀫𑀡𑀫𑀸𑀦𑀲𑀁;

𑀦𑀧𑁆𑀧𑀯𑀢𑁆𑀢𑀢𑀺 𑀲𑀩𑁆𑀩𑀫𑁆𑀧𑀺, 𑀭𑀽𑀧𑀸𑀭𑀽𑀧𑀪𑀯𑀤𑁆𑀯𑀬𑁂.

𑁫𑁨𑁩. 𑀅𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀧𑀺, 𑀢𑀤𑁂𑀢𑀁 𑀦𑀸𑀦𑀼𑀩𑀦𑁆𑀥𑀢𑀺;

𑀓𑀲𑁆𑀫𑀸 𑀅𑀚𑀦𑀓𑀢𑁆𑀢𑀸 𑀳𑀺, 𑀚𑀦𑀓𑀲𑁆𑀲𑀸𑀲𑀫𑀸𑀦𑀢𑁄.

𑁫𑁨𑁪. 𑀚𑀦𑀓𑀁 𑀢𑁂𑀦 𑀢𑀼𑀮𑁆𑀬𑀁 𑀯𑀸, 𑀓𑀸𑀫𑀸𑀯𑀘𑀭𑀲𑀜𑁆𑀜𑀺𑀢𑀁;

𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀁 𑀢𑀼, 𑀚𑀯𑀦𑀁 𑀅𑀦𑀼𑀩𑀦𑁆𑀥𑀢𑀺.

𑁫𑁨𑁫. 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀺, 𑀬𑁂 𑀫𑀳𑀕𑁆𑀕𑀢𑀕𑁄𑀘𑀭𑀸;

𑀳𑀼𑀢𑁆𑀯𑀸 𑀯𑀢𑁆𑀢𑀦𑁆𑀢𑀺 𑀢𑁂 𑀘𑀸𑀧𑀺, 𑀇𑀤𑀁 𑀦𑁂𑀯𑀸𑀦𑀼𑀩𑀦𑁆𑀥𑀢𑀺.

𑁫𑁨𑁬. 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀘, 𑀏𑀓𑀦𑁆𑀢𑁂𑀦 𑀧𑀦𑀲𑁆𑀲 𑀳𑀺;

𑀢𑀣𑀸𑀧𑀭𑀺𑀘𑀺𑀢𑀢𑁆𑀢𑀸 𑀘, 𑀦𑀸𑀦𑀼𑀩𑀦𑁆𑀥𑀢𑀺 𑀲𑀩𑁆𑀩𑀤𑀸.

𑁫𑁨𑁭. 𑀓𑀺𑀁 𑀢𑁂𑀦 𑀬𑀼𑀢𑁆𑀢𑀺𑀯𑀸𑀤𑁂𑀦, 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼 𑀳𑀺;

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀏𑀓𑀸𑀤𑀲𑀧𑀺 𑀲𑀩𑁆𑀩𑀲𑁄.

𑁫𑁨𑁮. 𑀦𑀸𑀫𑀕𑁄𑀢𑁆𑀢𑀁 𑀧𑀦𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀘;

𑀢𑀤𑀸𑀭𑀫𑁆𑀫𑀡𑀁 𑀦 𑀕𑀡𑁆𑀳𑀦𑁆𑀢𑀺, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀯𑀸.

𑁫𑁨𑁯. 𑀬𑀤𑀸 𑀧𑀜𑁆𑀜𑀢𑁆𑀢𑀺𑀫𑀸𑀭𑀩𑁆𑀪, 𑀚𑀯𑀦𑁂 𑀚𑀯𑀺𑀢𑁂𑀧𑀺 𑀯𑀸;

𑀢𑀣𑀸 𑀯𑀺𑀧𑀲𑁆𑀲𑀦𑀸𑀬𑀸𑀧𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀘.

𑁫𑁩𑁦. 𑀢𑀤𑀸𑀭𑀫𑁆𑀫𑀡𑀸 𑀦 𑀮𑀩𑁆𑀪𑀦𑁆𑀢𑀺, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀲𑀼𑀧𑀺;

𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀧𑀺, 𑀆𑀭𑀩𑁆𑀪 𑀚𑀯𑀦𑁂 𑀕𑀢𑁂.

𑁫𑁩𑁧. 𑀢𑀣𑀸 𑀫𑀳𑀕𑁆𑀕𑀢𑁂 𑀥𑀫𑁆𑀫𑁂, 𑀆𑀭𑀩𑁆𑀪 𑀚𑀯𑀦𑁂 𑀧𑀦;

𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀺, 𑀆𑀭𑀩𑁆𑀪 𑀚𑀯𑀺𑀢𑁂𑀧𑀺 𑀘.

𑁫𑁩𑁨. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀲𑀩𑁆𑀩𑁂𑀲𑀁, 𑀚𑀯𑀦𑀸𑀦𑀫𑀦𑀦𑁆𑀢𑀭𑀁;

𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀢𑁄.

𑁫𑁩𑁩. 𑀦 𑀯𑀺𑀚𑁆𑀚𑀢𑀺 𑀫𑀦𑁄𑀤𑁆𑀯𑀸𑀭𑁂, 𑀖𑀝𑁆𑀝𑀦𑀸𑀭𑀫𑁆𑀫𑀡𑀲𑁆𑀲 𑀳𑀺;

𑀓𑀣𑀁 𑀪𑀯𑀗𑁆𑀕𑀢𑁄 𑀳𑁄𑀢𑀺, 𑀯𑀼𑀝𑁆𑀞𑀸𑀦𑀁 𑀧𑀦 𑀘𑁂𑀢𑀲𑁄.

𑁫𑁩𑁪. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀆𑀧𑀸𑀣-𑀫𑀸𑀕𑀘𑁆𑀙𑀦𑁆𑀢𑁂𑀯 𑀕𑁄𑀘𑀭𑀸;

𑀖𑀝𑁆𑀝𑀦𑀸𑀬 𑀯𑀺𑀦𑀸 𑀢𑀲𑁆𑀫𑀸, 𑀘𑀺𑀢𑁆𑀢𑀸𑀦𑀁 𑀳𑁄𑀢𑀺 𑀲𑀫𑁆𑀪𑀯𑁄.

𑁫𑁩𑁫. 𑀤𑁆𑀯𑀸𑀤𑀲𑀸𑀧𑀼𑀜𑁆𑀜𑀘𑀺𑀢𑁆𑀢𑀸𑀦𑀁, 𑀯𑀺𑀧𑀸𑀓𑀸 𑀲𑀢𑁆𑀢𑀲𑀢𑁆𑀢𑀢𑀺;

𑀪𑀯𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺, 𑀧𑀸𑀧𑀧𑀸𑀓𑀸 𑀧𑀯𑀢𑁆𑀢𑀺𑀬𑀁.

𑁫𑁩𑁬. 𑀏𑀓𑀸𑀤𑀲𑀯𑀺𑀥𑀸𑀦𑀁 𑀢𑀼, 𑀳𑀺𑀢𑁆𑀯𑀸 𑀉𑀤𑁆𑀥𑀘𑁆𑀘𑀫𑀸𑀦𑀲𑀁;

𑀏𑀓𑀸𑀤𑀲𑀯𑀺𑀥𑀸 𑀘𑁂𑀯, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑁄.

𑁫𑁩𑁭. 𑀓𑁆𑀭𑀺𑀬𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼, 𑀚𑀯𑀦𑀁 𑀦 𑀘 𑀳𑁄𑀢𑀺 𑀬𑀁;

𑀢𑀁 𑀯𑁂 𑀓𑀭𑀡𑀫𑀢𑁆𑀢𑀢𑁆𑀢𑀸, 𑀯𑀸𑀢𑀧𑀼𑀧𑁆𑀨𑀲𑀫𑀁 𑀫𑀢𑀁.

𑁫𑁩𑁮. 𑀚𑀯𑀦𑀢𑁆𑀢𑀁 𑀢𑀼 𑀲𑀫𑁆𑀧𑀢𑁆𑀢𑀁, 𑀓𑀺𑀘𑁆𑀘𑀲𑀸𑀥𑀦𑀢𑁄 𑀧𑀦;

𑀙𑀺𑀦𑁆𑀦𑀫𑀽𑀮𑀲𑁆𑀲 𑀭𑀼𑀓𑁆𑀔𑀲𑁆𑀲, 𑀧𑀼𑀧𑁆𑀨𑀁𑀯 𑀅𑀨𑀮𑀁 𑀲𑀺𑀬𑀸.

𑁫𑁩𑁯. 𑀧𑀝𑀺𑀘𑁆𑀘 𑀧𑀦 𑀏𑀢𑀲𑁆𑀫𑀸, 𑀨𑀮𑀫𑁂𑀢𑀻𑀢𑀺 𑀧𑀘𑁆𑀘𑀬𑁄;

𑀬𑁄 𑀥𑀫𑁆𑀫𑁄 𑀬𑀲𑁆𑀲 𑀥𑀫𑁆𑀫𑀲𑁆𑀲, 𑀞𑀺𑀢𑀺𑀬𑀼𑀧𑁆𑀧𑀢𑁆𑀢𑀺𑀬𑀸𑀧𑀺 𑀯𑀸.

𑁫𑁪𑁦. 𑀉𑀧𑀓𑀸𑀭𑁄 𑀳𑀺 𑀲𑁄 𑀢𑀲𑁆𑀲, 𑀧𑀘𑁆𑀘𑀬𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀲𑀫𑁆𑀪𑀯𑁄𑀧𑀪𑀯𑁄 𑀳𑁂𑀢𑀼, 𑀓𑀸𑀭𑀡𑀁 𑀧𑀘𑁆𑀘𑀬𑁄 𑀫𑀢𑁄.

𑁫𑁪𑁧. 𑀮𑁄𑀪𑀸𑀤𑀺 𑀧𑀦 𑀬𑁄 𑀥𑀫𑁆𑀫𑁄, 𑀫𑀽𑀮𑀝𑁆𑀞𑁂𑀦𑀼𑀧𑀓𑀸𑀭𑀓𑁄;

𑀳𑁂𑀢𑀽𑀢𑀺 𑀧𑀦 𑀲𑁄 𑀥𑀫𑁆𑀫𑁄, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁫𑁪𑁨. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀢𑀣𑀸𑀮𑁄𑀪𑀸𑀤𑀬𑁄 𑀢𑀬𑁄;

𑀙𑀴𑁂𑀯 𑀳𑁂𑀢𑀼𑀬𑁄 𑀳𑁄𑀦𑁆𑀢𑀺,

𑀚𑀸𑀢𑀺𑀢𑁄 𑀦𑀯𑀥𑀸 𑀲𑀺𑀬𑀼𑀁.

𑁫𑁪𑁩. 𑀥𑀫𑁆𑀫𑀸𑀦𑀁 𑀓𑀼𑀲𑀮𑀸𑀤𑀻𑀦𑀁, 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀯𑀤𑀦𑁆𑀢𑁂𑀯𑀁, 𑀏𑀓𑁂 𑀆𑀘𑀭𑀺𑀬𑀸 𑀧𑀦.

𑁫𑁪𑁪. 𑀏𑀯𑀁 𑀲𑀦𑁆𑀢𑁂 𑀢𑀼 𑀳𑁂𑀢𑀽𑀦𑀁, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀺𑀲𑀼;

𑀳𑁂𑀢𑀼𑀧𑀘𑁆𑀘𑀬𑀢𑀸 𑀦𑁂𑀯, 𑀲𑀫𑁆𑀧𑀚𑁆𑀚𑀢𑀺 𑀓𑀤𑀸𑀘𑀺𑀧𑀺.

𑁫𑁪𑁫. 𑀦 𑀳𑀺 𑀢𑁂 𑀧𑀦 𑀭𑀽𑀧𑀸𑀦𑀁, 𑀲𑀸𑀥𑁂𑀦𑁆𑀢𑀺 𑀓𑀼𑀲𑀮𑀸𑀤𑀺𑀓𑀁;

𑀦 𑀢𑁂𑀲𑀁 𑀧𑀦 𑀭𑀽𑀧𑀸𑀦𑀁, 𑀧𑀘𑁆𑀘𑀬𑀸 𑀦 𑀘 𑀳𑁄𑀦𑁆𑀢𑀺 𑀢𑁂.

𑁫𑁪𑁬. 𑀢𑀲𑁆𑀫𑀸 𑀳𑀺 𑀓𑀼𑀲𑀮𑀸𑀤𑀻𑀦𑀁, 𑀓𑀼𑀲𑀮𑀸𑀤𑀺𑀢𑁆𑀢𑀲𑀸𑀥𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀦 𑀕𑀦𑁆𑀢𑀩𑁆𑀩𑁄, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑁫𑁪𑁭. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲, 𑀲𑀸𑀥𑀦𑁂𑀦𑀼𑀧𑀓𑀸𑀭𑀓𑁄;

𑀫𑀽𑀮𑀝𑁆𑀞𑁄𑀢𑀺 𑀘 𑀳𑁂𑀢𑀽𑀦𑀁, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.