𑁯. 𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄

𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄

𑁫𑁬𑁦. 𑀩𑀸𑀢𑁆𑀢𑀺𑀁𑀲 𑀧𑀸𑀓𑀘𑀺𑀢𑁆𑀢𑀸𑀦𑀺, 𑀮𑁄𑀓𑀺𑀓𑀸𑀦𑁂𑀯 𑀬𑀸𑀦𑀺 𑀳𑀺;

𑀏𑀢𑁂𑀲𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼.

𑁫𑁬𑁧. 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀤𑀺𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸;

𑀪𑀯𑀸𑀤𑀻𑀲𑀼 𑀢𑀣𑀸 𑀢𑁂𑀧𑀺, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸.

𑁫𑁬𑁨. 𑀢𑀬𑁄 𑀪𑀯𑀸 𑀘𑀢𑀲𑁆𑀲𑁄 𑀘, 𑀬𑁄𑀦𑀺𑀬𑁄 𑀕𑀢𑀺𑀧𑀜𑁆𑀘𑀓𑀁;

𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀲𑀢𑁆𑀢, 𑀲𑀢𑁆𑀢𑀸𑀯𑀸𑀲𑀸 𑀦𑀯𑁂𑀭𑀺𑀢𑀸.

𑁫𑁬𑁩. 𑀓𑀸𑀫𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭-𑀲𑀜𑁆𑀜𑀺𑀢𑀸 𑀅𑀝𑁆𑀞 𑀘𑁂𑀢𑀦𑀸;

𑀦𑀯𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀧𑀦.

𑁫𑁬𑁪. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀽𑀧-𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀳𑀺 𑀘;

𑀤𑁆𑀯𑁂𑀥𑀸 𑀳𑀺 𑀧𑀘𑁆𑀘𑀬𑀸 𑀢𑁂𑀲𑀁, 𑀪𑀯𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁫. 𑀉𑀧𑁂𑀓𑁆𑀔𑀸𑀲𑀳𑀺𑀢𑀸𑀳𑁂𑀢𑀼-𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸;

𑀯𑀺𑀦𑀸 𑀧𑀭𑀺𑀢𑁆𑀢𑀧𑀸𑀓𑀸𑀦𑀁, 𑀳𑁄𑀦𑁆𑀢𑀺 𑀤𑁆𑀯𑁂𑀥𑀸 𑀧𑀯𑀢𑁆𑀢𑀺𑀬𑀁.

𑁫𑁬𑁬. 𑀢𑀸𑀬𑁂𑀯 𑀘𑁂𑀢𑀦𑀸 𑀭𑀽𑀧-𑀪𑀯𑁂 𑀤𑁆𑀯𑁂𑀥𑀸𑀯 𑀧𑀘𑁆𑀘𑀬𑀸;

𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀪𑀯𑀦𑁆𑀢𑀺 𑀳𑀺 𑀧𑀯𑀢𑁆𑀢𑀺𑀬𑀁.

𑁫𑁬𑁭. 𑀅𑀝𑁆𑀞𑀦𑁆𑀦𑀁 𑀢𑀼 𑀧𑀭𑀺𑀢𑁆𑀢𑀸𑀦𑀁, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀢𑀣𑀸;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁮. 𑀳𑁄𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯, 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑀣𑀸;

𑀲𑁄𑀴𑀲𑀦𑁆𑀦𑀁 𑀯𑀺𑀧𑀸𑀓𑀸𑀦𑀁, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁬𑁯. 𑀭𑀽𑀧𑁂 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸, 𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀧𑀜𑁆𑀘𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀘𑁆𑀘𑀬𑀸 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁦. 𑀳𑁄𑀦𑁆𑀢𑀺𑀫𑀸𑀧𑀼𑀜𑁆𑀜𑀲𑀗𑁆𑀔𑀸𑀭𑀸, 𑀓𑀸𑀫𑁂 𑀤𑀼𑀕𑁆𑀕𑀢𑀺𑀬𑀁 𑀤𑁆𑀯𑀺𑀥𑀸;

𑀯𑀺𑀜𑁆𑀜𑀸𑀡𑀲𑁆𑀲 𑀧𑀦𑁂𑀓𑀲𑁆𑀲, 𑀧𑀘𑁆𑀘𑀬𑀸 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁧. 𑀙𑀦𑁆𑀦𑀁 𑀧𑀦 𑀧𑀯𑀢𑁆𑀢𑁂𑀯, 𑀳𑁄𑀦𑁆𑀢𑀺 𑀦𑁄 𑀧𑀝𑀺𑀲𑀦𑁆𑀥𑀺𑀬𑀁;

𑀲𑀢𑁆𑀢𑀦𑁆𑀦𑀫𑁆𑀧𑀺 𑀪𑀯𑀦𑁆𑀢𑁂𑀯, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁨. 𑀓𑀸𑀫𑁂 𑀲𑀼𑀕𑀢𑀺𑀬𑀁 𑀢𑁂𑀲𑀁, 𑀲𑀢𑁆𑀢𑀦𑁆𑀦𑀫𑁆𑀧𑀺 𑀢𑀣𑁂𑀯 𑀘;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁩. 𑀯𑀺𑀜𑁆𑀜𑀸𑀡𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺, 𑀢𑁂𑀲𑀁 𑀭𑀽𑀧𑀪𑀯𑁂 𑀢𑀣𑀸;

𑀧𑀯𑀢𑁆𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁪. 𑀲𑁄 𑀘 𑀓𑀸𑀫𑀪𑀯𑁂𑀦𑀺𑀝𑁆𑀞-𑀭𑀽𑀧𑀸𑀤𑀺𑀉𑀧𑀮𑀤𑁆𑀥𑀺𑀬𑀁;

𑀅𑀦𑀺𑀝𑁆𑀞𑀭𑀽𑀧𑀸𑀤𑀬𑁄 𑀧𑀦, 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀭𑁂.

𑁫𑁭𑁫. 𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄, 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀬𑀁;

𑀘𑀢𑀼𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁭𑁬. 𑀏𑀯𑀁 𑀢𑀸𑀯 𑀪𑀯𑁂𑀲𑁆𑀯𑁂𑀢𑁂, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼;

𑀬𑀣𑀸 𑀘 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀣𑀸 𑀜𑁂𑀬𑁆𑀬𑀸 𑀯𑀺𑀪𑀸𑀯𑀺𑀦𑀸.

𑁫𑁭𑁭. 𑀏𑀲𑁂𑀯 𑀘 𑀦𑀬𑁄 𑀜𑁂𑀬𑁆𑀬𑁄, 𑀬𑁄𑀦𑀺𑀆𑀤𑀻𑀲𑀼 𑀢𑀢𑁆𑀭𑀺𑀤𑀁;

𑀆𑀤𑀺𑀢𑁄 𑀧𑀦 𑀧𑀝𑁆𑀞𑀸𑀬, 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑁫𑁭𑁮. 𑀅𑀯𑀺𑀲𑁂𑀲𑁂𑀦 𑀧𑀼𑀜𑁆𑀜𑀸𑀪𑀺-𑀲𑀗𑁆𑀔𑀸𑀭𑁄 𑀤𑁆𑀯𑀺𑀪𑀯𑁂𑀲𑀼𑀧𑀺;

𑀤𑀢𑁆𑀯𑀸𑀦 𑀧𑀝𑀺𑀲𑀦𑁆𑀥𑀺𑀁 𑀢𑀼, 𑀲𑀩𑁆𑀩𑀧𑀸𑀓𑀁 𑀚𑀦𑁂𑀢𑀺 𑀲𑁄.

𑁫𑁭𑁯. 𑀢𑀣𑀸 𑀘𑀢𑀽𑀲𑀼 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀡𑁆𑀟𑀚𑀸𑀤𑀻𑀲𑀼 𑀬𑁄𑀦𑀺𑀲𑀼;

𑀩𑀳𑀼𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀕𑀢𑀻𑀲𑀼 𑀤𑁆𑀯𑀻𑀲𑀼 𑀏𑀯 𑀘.

𑁫𑁮𑁦. 𑀢𑀣𑀸 𑀦𑀸𑀦𑀢𑁆𑀢𑀓𑀸𑀬𑀸𑀤𑀺-𑀯𑀺𑀜𑁆𑀜𑀸𑀡𑀸𑀦𑀁 𑀞𑀺𑀢𑀻𑀲𑀼𑀧𑀺;

𑀢𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀫𑀺𑀁, 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀩𑁆𑀩𑀺𑀥𑁂.

𑁫𑁮𑁧. 𑀏𑀯𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀪𑀯𑀸𑀤𑀻𑀲𑀼 𑀬𑀣𑀸𑀭𑀳𑀁;

𑀏𑀓𑀯𑀻𑀲𑀢𑀺𑀧𑀸𑀓𑀸𑀦𑀁, 𑀧𑀘𑁆𑀘𑀬𑁄 𑀳𑁄𑀢𑀺 𑀘 𑀤𑁆𑀯𑀺𑀥𑀸.

𑁫𑁮𑁨. 𑀓𑀸𑀫𑁂 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑁄, 𑀪𑀯𑁂 𑀘𑀢𑀽𑀲𑀼 𑀬𑁄𑀦𑀺𑀲𑀼;

𑀢𑀻𑀲𑀼 𑀕𑀢𑀻𑀲𑀼 𑀏𑀓𑀺𑀲𑁆𑀲𑀸, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑀸𑀧𑀺 𑀘.

𑁫𑁮𑁩. 𑀲𑀢𑁆𑀢𑀸𑀯𑀸𑀲𑁂 𑀧𑀦𑁂𑀓𑀲𑁆𑀫𑀺𑀁,

𑀉𑀳𑁄𑀢𑀺 𑀲𑁄 𑀧𑀘𑁆𑀘𑀬𑁄 𑀤𑁆𑀯𑀺𑀥𑀸;

𑀲𑀢𑁆𑀢𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁,

𑀧𑀯𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀁.

𑁫𑁮𑁪. 𑀢𑀣𑁂𑀯𑀸𑀦𑁂𑀜𑁆𑀚𑀲𑀗𑁆𑀔𑀸𑀭𑁄, 𑀏𑀓𑀸𑀭𑀽𑀧𑀪𑀯𑁂 𑀧𑀼𑀦;

𑀏𑀓𑀺𑀲𑁆𑀲𑀸 𑀬𑁄𑀦𑀺𑀬𑀸 𑀘𑁂𑀯, 𑀏𑀓𑀺𑀲𑁆𑀲𑀸 𑀕𑀢𑀺𑀬𑀸𑀧𑀺 𑀘.

𑁫𑁮𑁫. 𑀢𑀻𑀲𑀼 𑀘𑀺𑀢𑁆𑀢𑀝𑁆𑀞𑀺𑀢𑀻𑀲𑁆𑀯𑁂𑀯, 𑀲𑀢𑁆𑀢𑀸𑀯𑀸𑀲𑁂 𑀘𑀢𑀼𑀩𑁆𑀩𑀺𑀥𑁂;

𑀘𑀢𑀼𑀦𑁆𑀦𑀁 𑀧𑀸𑀓𑀘𑀺𑀢𑁆𑀢𑀸𑀦𑀁, 𑀤𑁆𑀯𑁂𑀥𑀸 𑀲𑁄 𑀳𑁄𑀢𑀺 𑀧𑀘𑁆𑀘𑀬𑁄.

𑁫𑁮𑁬. 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀦𑀁, 𑀯𑀲𑁂𑀦𑁂𑀯 𑀪𑀯𑀸𑀤𑀺𑀲𑀼;

𑀯𑀺𑀚𑀸𑀦𑀺𑀢𑀩𑁆𑀩𑀸 𑀲𑀗𑁆𑀔𑀸𑀭𑀸, 𑀬𑀣𑀸 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸.

𑁫𑁮𑁭. 𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁, 𑀲𑀗𑁆𑀓𑀦𑁆𑀢𑀺 𑀧𑀦 𑀯𑀺𑀚𑁆𑀚𑀢𑀺;

𑀲𑀗𑁆𑀓𑀦𑁆𑀢𑀺𑀪𑀸𑀯𑁂 𑀅𑀲𑀢𑀺, 𑀧𑀝𑀺𑀲𑀦𑁆𑀥𑀺 𑀓𑀣𑀁 𑀲𑀺𑀬𑀸.

𑁫𑁮𑁮. 𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲 𑀲𑀗𑁆𑀓𑀦𑁆𑀢𑀺, 𑀅𑀢𑀻𑀢𑀪𑀯𑀢𑁄 𑀇𑀥;

𑀢𑀢𑁄 𑀳𑁂𑀢𑀼𑀁 𑀯𑀺𑀦𑀸 𑀢𑀲𑁆𑀲, 𑀧𑀸𑀢𑀼𑀪𑀸𑀯𑁄 𑀦 𑀯𑀺𑀚𑁆𑀚𑀢𑀺.

𑁫𑁮𑁯. 𑀲𑀼𑀮𑀤𑁆𑀥𑀧𑀘𑁆𑀘𑀬𑀁 𑀭𑀽𑀧𑀸-𑀭𑀽𑀧𑀫𑀢𑁆𑀢𑀁 𑀢𑀼 𑀚𑀸𑀬𑀢𑀺;

𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯𑀁 𑀢𑀼, 𑀮𑀪𑀺𑀢𑁆𑀯𑀸 𑀧𑀘𑁆𑀘𑀬𑀁 𑀧𑀦.

𑁫𑁯𑁦. 𑀪𑀯𑀦𑁆𑀢𑀭𑀫𑀼𑀧𑁂𑀢𑀻𑀢𑀺, 𑀲𑀫𑀜𑁆𑀜𑀸𑀬 𑀧𑀯𑀼𑀘𑁆𑀘𑀢𑀺;

𑀦 𑀘 𑀲𑀢𑁆𑀢𑁄 𑀦 𑀘 𑀚𑀻𑀯𑁄, 𑀦 𑀅𑀢𑁆𑀢𑀸 𑀯𑀸𑀧𑀺 𑀯𑀺𑀚𑁆𑀚𑀢𑀺.

𑁫𑁯𑁧. 𑀢𑀬𑀺𑀤𑀁 𑀧𑀸𑀓𑀝𑀁 𑀓𑀢𑁆𑀯𑀸, 𑀧𑀝𑀺𑀲𑀦𑁆𑀥𑀺𑀓𑁆𑀓𑀫𑀁 𑀧𑀦;

𑀤𑀲𑁆𑀲𑀬𑀺𑀲𑁆𑀲𑀸𑀫𑀳𑀁 𑀲𑀸𑀥𑀼, 𑀦𑀺𑀩𑁄𑀥𑀣 𑀲𑀼𑀤𑀼𑀩𑁆𑀩𑀼𑀥𑀁.

𑁫𑁯𑁨. 𑀅𑀢𑀻𑀢𑀲𑁆𑀫𑀺𑀁 𑀪𑀯𑁂 𑀢𑀲𑁆𑀲, 𑀆𑀲𑀦𑁆𑀦𑀫𑀭𑀡𑀲𑁆𑀲 𑀳𑀺;

𑀳𑀭𑀺𑀢𑀁 𑀢𑀸𑀮𑀧𑀡𑁆𑀡𑀁𑀯, 𑀧𑀓𑁆𑀔𑀺𑀢𑁆𑀢𑀁 𑀆𑀢𑀧𑁂 𑀧𑀦.

𑁫𑁯𑁩. 𑀲𑀼𑀲𑁆𑀲𑀫𑀸𑀦𑁂 𑀲𑀭𑀻𑀭𑀲𑁆𑀫𑀺𑀁, 𑀦𑀝𑁆𑀞𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀓𑁂;

𑀳𑀤𑀬𑀯𑀢𑁆𑀣𑀼𑀫𑀢𑁆𑀢𑀲𑁆𑀫𑀺𑀁, 𑀞𑀺𑀢𑁂 𑀓𑀸𑀬𑀧𑁆𑀧𑀲𑀸𑀤𑀺𑀓𑁂.

𑁫𑁯𑁪. 𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁, 𑀳𑁄𑀢𑀺 𑀢𑀲𑁆𑀫𑀺𑀁 𑀔𑀡𑁂𑀧𑀺 𑀘;

𑀧𑀼𑀩𑁆𑀩𑀸𑀦𑀼𑀲𑁂𑀯𑀺𑀢𑀁 𑀓𑀫𑁆𑀫𑀁, 𑀧𑀼𑀜𑁆𑀜𑀁 𑀯𑀸𑀧𑀼𑀜𑁆𑀜𑀫𑁂𑀯 𑀯𑀸.

𑁫𑁯𑁫. 𑀓𑀫𑁆𑀫𑀁 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸, 𑀆𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀢𑀺;

𑀏𑀯𑀁 𑀧𑀯𑀢𑁆𑀢𑀫𑀸𑀦𑀁 𑀢𑀁, 𑀯𑀺𑀜𑁆𑀜𑀸𑀡𑀁 𑀮𑀤𑁆𑀥𑀧𑀘𑁆𑀘𑀬𑀁.

𑁫𑁯𑁬. 𑀅𑀯𑀺𑀚𑁆𑀚𑀸𑀬 𑀧𑀝𑀺𑀘𑁆𑀙𑀦𑁆𑀦𑀸-𑀤𑀻𑀦𑀯𑁂 𑀯𑀺𑀲𑀬𑁂 𑀧𑀦;

𑀢𑀡𑁆𑀳𑀸 𑀦𑀫𑁂𑀢𑀺 𑀲𑀗𑁆𑀔𑀸𑀭𑀸, 𑀔𑀺𑀧𑀦𑁆𑀢𑀺 𑀲𑀳𑀚𑀸 𑀧𑀦.

𑁫𑁯𑁭. 𑀦 𑀫𑀻𑀬𑀫𑀸𑀦𑀁 𑀢𑀡𑁆𑀳𑀸𑀬, 𑀢𑀁 𑀲𑀦𑁆𑀢𑀢𑀺𑀯𑀲𑀸 𑀧𑀦;

𑀑𑀭𑀺𑀫𑀸 𑀧𑀦 𑀢𑀻𑀭𑀫𑁆𑀳𑀸, 𑀆𑀮𑀫𑁆𑀩𑀺𑀢𑁆𑀯𑀸𑀦 𑀭𑀚𑁆𑀚𑀼𑀓𑀁.

𑁫𑁯𑁮. 𑀫𑀸𑀢𑀺𑀓𑀸𑀢𑀺𑀓𑁆𑀓𑀫𑁄𑀯𑁂𑀢𑀁, 𑀧𑀼𑀭𑀺𑀫𑀁 𑀚𑀳𑀢𑀺 𑀦𑀺𑀲𑁆𑀲𑀬𑀁;

𑀅𑀧𑀭𑀁 𑀓𑀫𑁆𑀫𑀲𑀫𑁆𑀪𑀽𑀢𑀁, 𑀮𑀫𑁆𑀩𑀺𑀢𑁆𑀯𑀸 𑀯𑀸𑀧𑀺 𑀦𑀺𑀲𑁆𑀲𑀬𑀁.

𑁫𑁯𑁯. 𑀢𑀁 𑀧𑀦𑀸𑀭𑀫𑁆𑀫𑀡𑀸𑀤𑀻𑀳𑀺, 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀢𑀺;

𑀧𑀼𑀭𑀺𑀫𑀁 𑀘𑀯𑀦𑀁 𑀏𑀢𑁆𑀣, 𑀧𑀘𑁆𑀙𑀺𑀫𑀁 𑀧𑀝𑀺𑀲𑀦𑁆𑀥𑀺 𑀢𑀼.

𑁬𑁦𑁦. 𑀢𑀤𑁂𑀢𑀁 𑀦𑀸𑀧𑀺 𑀧𑀼𑀭𑀺𑀫𑀸, 𑀪𑀯𑀢𑁄𑀧𑀺 𑀇𑀥𑀸𑀕𑀢𑀁;

𑀓𑀫𑁆𑀫𑀸𑀤𑀺𑀜𑁆𑀘 𑀯𑀺𑀦𑀸 𑀳𑁂𑀢𑀼𑀁, 𑀧𑀸𑀢𑀼𑀪𑀽𑀢𑀁 𑀦 𑀘𑁂𑀯 𑀢𑀁.

𑁬𑁦𑁧. 𑀏𑀢𑁆𑀣 𑀘𑁂𑀢𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀧𑀼𑀭𑀺𑀫𑀸 𑀪𑀯𑀢𑁄 𑀧𑀦;

𑀇𑀥𑀸𑀦𑀸𑀕𑀫𑀦𑁂𑀢𑀻𑀢-𑀪𑀯𑀳𑁂𑀢𑀽𑀳𑀺 𑀲𑀫𑁆𑀪𑀯𑁂.

𑁬𑁦𑁨. 𑀧𑀝𑀺𑀖𑁄𑀲𑀤𑀻𑀧𑀫𑀼𑀤𑁆𑀤𑀸𑀤𑀻, 𑀪𑀯𑀦𑁆𑀢𑁂𑀢𑁆𑀣 𑀦𑀺𑀤𑀲𑁆𑀲𑀦𑀸;

𑀬𑀣𑀸 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀭, 𑀳𑁄𑀦𑁆𑀢𑀺 𑀲𑀤𑁆𑀤𑀸𑀤𑀺𑀳𑁂𑀢𑀼𑀓𑀸.

𑁬𑁦𑁩. 𑀏𑀯𑀫𑁂𑀯 𑀘 𑀯𑀺𑀜𑁆𑀜𑀸𑀡𑀁, 𑀯𑁂𑀤𑀺𑀢𑀩𑁆𑀩𑀁 𑀯𑀺𑀪𑀸𑀯𑀺𑀦𑀸;

𑀲𑀦𑁆𑀢𑀸𑀦𑀩𑀦𑁆𑀥𑀢𑁄 𑀦𑀢𑁆𑀣𑀺, 𑀏𑀓𑀢𑀸 𑀯𑀸𑀧𑀺 𑀦𑀸𑀦𑀢𑀸.

𑁬𑁦𑁪. 𑀲𑀢𑀺 𑀲𑀦𑁆𑀢𑀸𑀦𑀩𑀦𑁆𑀥𑁂 𑀢𑀼, 𑀏𑀓𑀦𑁆𑀢𑁂𑀦𑁂𑀓𑀢𑀸 𑀲𑀺𑀬𑀸;

𑀔𑀻𑀭𑀢𑁄 𑀤𑀥𑀺𑀲𑀫𑁆𑀪𑀽𑀢𑀁, 𑀦 𑀪𑀯𑁂𑀬𑁆𑀬 𑀓𑀤𑀸𑀘𑀺𑀧𑀺.

𑁬𑁦𑁫. 𑀅𑀣𑀸𑀧𑀺 𑀧𑀦 𑀏𑀓𑀦𑁆𑀢-𑀦𑀸𑀦𑀢𑀸 𑀲𑀸 𑀪𑀯𑁂𑀬𑁆𑀬 𑀘𑁂;

𑀔𑀻𑀭𑀲𑀸𑀫𑀻 𑀦𑀭𑁄 𑀦𑁂𑀯, 𑀤𑀥𑀺𑀲𑀸𑀫𑀻 𑀪𑀯𑁂𑀬𑁆𑀬 𑀲𑁄.

𑁬𑁦𑁬. 𑀢𑀲𑁆𑀫𑀸 𑀏𑀢𑁆𑀣 𑀧𑀦𑁂𑀓𑀦𑁆𑀢-𑀏𑀓𑀢𑀸𑀦𑀸𑀦𑀢𑀸𑀧𑀺 𑀯𑀸;

𑀦 𑀘𑁂𑀯 𑀉𑀧𑀕𑀦𑁆𑀢𑀩𑁆𑀩𑀸, 𑀯𑀺𑀜𑁆𑀜𑀼𑀦𑀸 𑀲𑀫𑀬𑀜𑁆𑀜𑀼𑀦𑀸.

𑁬𑁦𑁭. 𑀦𑀦𑀼 𑀏𑀯𑀫𑀲𑀗𑁆𑀓𑀦𑁆𑀢𑀺-𑀧𑀸𑀢𑀼𑀪𑀸𑀯𑁂 𑀢𑀲𑁆𑀲 𑀲𑀢𑀺;

𑀬𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀢𑁆𑀢-𑀪𑀸𑀯𑁂 𑀔𑀦𑁆𑀥𑀸𑀪𑀺𑀲𑀫𑁆𑀪𑀯𑀸.

𑁬𑁦𑁮. 𑀢𑁂𑀲𑀁 𑀇𑀥 𑀦𑀺𑀭𑀼𑀤𑁆𑀥𑀢𑁆𑀢𑀸, 𑀓𑀫𑁆𑀫𑀲𑁆𑀲 𑀨𑀮𑀳𑁂𑀢𑀼𑀦𑁄;

𑀧𑀭𑀢𑁆𑀣𑀸𑀕𑀫𑀢𑁄 𑀘𑁂𑀯, 𑀇𑀥 𑀢𑀲𑁆𑀲 𑀓𑀢𑀲𑁆𑀲 𑀳𑀺.

𑁬𑁦𑁯. 𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁄 𑀘𑁂𑀯, 𑀓𑀫𑁆𑀫𑀢𑁄 𑀢𑀁 𑀨𑀮𑀁 𑀲𑀺𑀬𑀸;

𑀢𑀲𑁆𑀫𑀸 𑀦 𑀲𑀼𑀦𑁆𑀤𑀭𑀁 𑀏𑀢𑀁, 𑀯𑀺𑀥𑀸𑀦𑀁 𑀲𑀩𑁆𑀩𑀫𑁂𑀯 𑀘.

𑀏𑀢𑁆𑀣𑀸𑀳 𑁋

𑁬𑁧𑁦. 𑀲𑀦𑁆𑀢𑀸𑀦𑁂 𑀬𑀁 𑀨𑀮𑀁 𑀏𑀢𑀁, 𑀦𑀸𑀜𑁆𑀜𑀲𑁆𑀲 𑀦 𑀘 𑀅𑀜𑁆𑀜𑀢𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄.

𑁬𑁧𑁧. 𑀏𑀓𑀲𑁆𑀫𑀺𑀁 𑀧𑀦 𑀲𑀦𑁆𑀢𑀸𑀦𑁂, 𑀯𑀢𑁆𑀢𑀫𑀸𑀦𑀁 𑀨𑀮𑀁 𑀧𑀦;

𑀅𑀜𑁆𑀜𑀲𑁆𑀲𑀸𑀢𑀺𑀧𑀺 𑀯𑀸 𑀦𑁂𑀯, 𑀅𑀜𑁆𑀜𑀢𑁄 𑀯𑀸 𑀦 𑀳𑁄𑀢𑀺 𑀢𑀁.

𑁬𑁧𑁨. 𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀸, 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑁄;

𑀩𑀻𑀚𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑁂, 𑀓𑀢𑁂 𑀢𑀼 𑀫𑀥𑀼𑀆𑀤𑀺𑀦𑀸.

𑁬𑁧𑁩. 𑀢𑀲𑁆𑀲 𑀩𑀻𑀚𑀲𑁆𑀲 𑀲𑀦𑁆𑀢𑀸𑀦𑁂, 𑀧𑀞𑀫𑀁 𑀮𑀤𑁆𑀥𑀧𑀘𑁆𑀘𑀬𑁄;

𑀫𑀥𑀼𑀭𑁄 𑀨𑀮𑀲𑁄 𑀢𑀲𑁆𑀲, 𑀳𑁄𑀢𑀺 𑀓𑀸𑀮𑀦𑁆𑀢𑀭𑁂 𑀧𑀦.

𑁬𑁧𑁪. 𑀦 𑀳𑀺 𑀢𑀸𑀦𑀺 𑀳𑀺 𑀩𑀻𑀚𑀸𑀦𑀺, 𑀅𑀪𑀺𑀲𑀗𑁆𑀔𑀭𑀡𑀫𑁆𑀧𑀺 𑀯𑀸;

𑀧𑀸𑀧𑀼𑀡𑀦𑁆𑀢𑀺 𑀨𑀮𑀝𑁆𑀞𑀸𑀦𑀁, 𑀏𑀯𑀁 𑀜𑁂𑀬𑁆𑀬𑀫𑀺𑀤𑀫𑁆𑀧𑀺 𑀘.

𑁬𑁧𑁫. 𑀩𑀸𑀮𑀓𑀸𑀮𑁂 𑀧𑀬𑀼𑀢𑁆𑀢𑁂𑀦, 𑀯𑀺𑀚𑁆𑀚𑀸𑀲𑀺𑀧𑁆𑀧𑁄𑀲𑀥𑀸𑀤𑀺𑀦𑀸;

𑀤𑀻𑀧𑁂𑀢𑀩𑁆𑀩𑁄 𑀅𑀬𑀁 𑀯𑀼𑀤𑁆𑀥-𑀓𑀸𑀮𑀲𑁆𑀫𑀺𑀁 𑀨𑀮𑀤𑀸𑀬𑀺𑀦𑀸.

𑁬𑁧𑁬. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀁 𑀓𑀫𑁆𑀫𑀁, 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀸 𑀧𑀦;

𑀨𑀮𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀣 𑀯𑀸𑀯𑀺𑀚𑁆𑀚𑀫𑀸𑀦𑀓𑀁.

𑁬𑁧𑁭. 𑀯𑀺𑀚𑁆𑀚𑀫𑀸𑀦𑀁 𑀲𑀘𑁂 𑀳𑁄𑀢𑀺, 𑀢𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂 𑀧𑀦;

𑀪𑀯𑀺𑀢𑀩𑁆𑀩𑀁 𑀯𑀺𑀧𑀸𑀓𑁂𑀦, 𑀲𑀤𑁆𑀥𑀺𑀫𑁂𑀯 𑀘 𑀳𑁂𑀢𑀼𑀦𑀸.

𑁬𑁧𑁮. 𑀅𑀣 𑀯𑀸𑀯𑀺𑀚𑁆𑀚𑀫𑀸𑀦𑀁 𑀢𑀁, 𑀦𑀺𑀭𑀼𑀤𑁆𑀥𑀁 𑀧𑀘𑁆𑀘𑀬𑁄 𑀪𑀯𑁂;

𑀧𑀯𑀢𑁆𑀢𑀺𑀓𑁆𑀔𑀡𑀢𑁄 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀦𑀺𑀘𑁆𑀘𑀨𑀮𑀁 𑀲𑀺𑀬𑀸.

𑀯𑀼𑀘𑁆𑀘𑀢𑁂 𑁋

𑁬𑁧𑁯. 𑀓𑀝𑀢𑁆𑀢𑀸 𑀧𑀘𑁆𑀘𑀬𑁄 𑀓𑀫𑁆𑀫𑀁, 𑀢𑀲𑁆𑀫𑀸 𑀦𑀺𑀘𑁆𑀘𑀨𑀮𑀁 𑀦 𑀘;

𑀧𑀸𑀝𑀺𑀪𑁄𑀕𑀸𑀤𑀺𑀓𑀁 𑀓𑀫𑁆𑀫𑀁, 𑀯𑁂𑀤𑀺𑀢𑀩𑁆𑀩𑀁 𑀦𑀺𑀤𑀲𑁆𑀲𑀦𑀁.

𑁬𑁨𑁦. 𑀓𑀝𑀢𑁆𑀢𑀸𑀬𑁂𑀯 𑀢𑀁 𑀓𑀫𑁆𑀫𑀁, 𑀨𑀮𑀲𑁆𑀲 𑀧𑀦 𑀧𑀘𑁆𑀘𑀬𑁄;

𑀦 𑀘𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀁, 𑀢𑀲𑁆𑀲 𑀯𑀸𑀯𑀺𑀚𑁆𑀚𑀫𑀸𑀦𑀢𑀸.

𑁬𑁨𑁧. 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁄𑀬𑀁, 𑀧𑀭𑀫𑀢𑁆𑀣𑀧𑀓𑀸𑀲𑀦𑁄;

𑀲𑁄𑀢𑀩𑁆𑀩𑁄 𑀧𑀦 𑀲𑁄𑀢𑀽𑀦𑀁, 𑀧𑀻𑀢𑀺𑀩𑀼𑀤𑁆𑀥𑀺𑀯𑀺𑀯𑀟𑁆𑀠𑀦𑁄.

𑀇𑀢𑀺 𑀅𑀪𑀺𑀥𑀫𑁆𑀫𑀸𑀯𑀢𑀸𑀭𑁂 𑀧𑀼𑀜𑁆𑀜𑀯𑀺𑀧𑀸𑀓𑀧𑀘𑁆𑀘𑀬𑀦𑀺𑀤𑁆𑀤𑁂𑀲𑁄 𑀦𑀸𑀫

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.