𑁧. 𑀲𑀭𑀽𑀧𑀲𑀗𑁆𑀕𑀳𑀓𑀣𑀸

𑁨. 𑀘𑀺𑀢𑁆𑀢𑀁 𑀘𑁂𑀢𑀲𑀺𑀓𑀁 𑀭𑀽𑀧𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀭𑀼𑀢𑁆𑀢𑀭𑁄;

𑀘𑀢𑀼𑀥𑀸 𑀤𑁂𑀲𑀬𑀻 𑀥𑀫𑁆𑀫𑁂, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁄.

𑁩. 𑀘𑀺𑀢𑁆𑀢𑀫𑁂𑀓𑀽𑀦𑀦𑀯𑀼𑀢𑀺𑀯𑀺𑀥𑀁 𑀢𑀢𑁆𑀣 𑀯𑀺𑀪𑀸𑀯𑀬𑁂;

𑀏𑀓𑀦𑀯𑀼𑀢𑀺𑀯𑀺𑀥𑀁 𑀯𑀸, 𑀏𑀓𑀯𑀻𑀲𑀲𑀢𑀫𑁆𑀧𑀺 𑀯𑀸.

𑁪. 𑀤𑁆𑀯𑁂𑀧𑀜𑁆𑀜𑀸𑀲 𑀲𑀭𑀽𑀧𑁂𑀦, 𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀫𑀢𑀸;

𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑀸 𑀪𑀺𑀦𑁆𑀦𑀸, 𑀲𑀫𑁆𑀧𑀬𑁄𑀕𑀸𑀦𑀼𑀲𑀸𑀭𑀢𑁄.

𑁫. 𑀅𑀝𑁆𑀞𑀯𑀻𑀲𑀯𑀺𑀥𑀁 𑀭𑀽𑀧𑀁, 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀢𑁄;

𑀤𑀼𑀯𑀺𑀥𑀁 𑀭𑀽𑀧𑀭𑀽𑀧𑀁 𑀢𑀼, 𑀅𑀝𑁆𑀞𑀸𑀭𑀲𑀯𑀺𑀥𑀁 𑀪𑀯𑁂.

𑁬. 𑀦𑀺𑀩𑁆𑀩𑀸𑀦𑀁 𑀧𑀦 𑀤𑀻𑀧𑁂𑀦𑁆𑀢𑀺, 𑀅𑀲𑀗𑁆𑀔𑀢𑀫𑀦𑀼𑀢𑁆𑀢𑀭𑀁;

𑀅𑀢𑁆𑀣𑀦𑀸𑀫𑀯𑀲𑀸 𑀤𑁆𑀯𑁂𑀥𑀸, 𑀧𑀜𑁆𑀜𑀢𑁆𑀢𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁭. 𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀯𑀺𑀪𑀸𑀕𑀁 𑀢𑀼 𑀬𑀣𑀸𑀓𑁆𑀓𑀫𑀁;

𑀘𑀢𑀼𑀥𑀸 𑀧𑀭𑀫𑀢𑁆𑀣𑀸𑀦𑀁, 𑀤𑁆𑀯𑀺𑀥𑀸 𑀧𑀜𑁆𑀜𑀢𑁆𑀢𑀺𑀬𑀸 𑀓𑀣𑀁.

𑁮. 𑀓𑀼𑀲𑀮𑀸𑀤𑀺𑀯𑀺𑀪𑀸𑀕𑁂𑀦, 𑀢𑀢𑁆𑀣 𑀘𑀺𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁;

𑀢𑀣𑀸 𑀪𑀽𑀫𑀺𑀯𑀺𑀪𑀸𑀕𑁂𑀦, 𑀓𑀸𑀫𑀪𑀽𑀫𑀸𑀤𑀺𑀢𑁄 𑀓𑀣𑀁.

𑁯. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀣𑀸;

𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑀜𑁆𑀘, 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀪𑁂𑀤𑀺𑀢𑀁.

𑁧𑁦. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑀺𑀢𑀺 𑀪𑀺𑀦𑁆𑀦𑀁 𑀧𑀼𑀦𑀝𑁆𑀞𑀥𑀸;

𑀓𑀸𑀫𑀸𑀯𑀘𑀭𑀓𑀼𑀲𑀮𑀁, 𑀓𑀸𑀫𑁂 𑀲𑀼𑀕𑀢𑀺𑀲𑀸𑀥𑀓𑀁.

𑁧𑁧. 𑀢𑀓𑁆𑀓𑀘𑀸𑀭𑀧𑀻𑀢𑀺𑀲𑀼𑀔-𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀬𑀼𑀢𑀁;

𑀧𑀞𑀫𑀚𑁆𑀛𑀸𑀦𑀓𑀼𑀲𑀮𑀁, 𑀧𑀜𑁆𑀘𑀗𑁆𑀕𑀺𑀓𑀫𑀼𑀤𑀸𑀳𑀝𑀁.

𑁧𑁨. 𑀯𑀺𑀢𑀓𑁆𑀓𑀳𑀻𑀦𑀁 𑀤𑀼𑀢𑀺𑀬𑀁, 𑀛𑀸𑀦𑀁 𑀢𑀼 𑀘𑀢𑀼𑀭𑀗𑁆𑀕𑀺𑀓𑀁;

𑀯𑀺𑀘𑀸𑀭𑀳𑀻𑀦𑀁 𑀢𑀢𑀺𑀬𑀁, 𑀛𑀸𑀦𑀁 𑀧𑀦 𑀢𑀺𑀯𑀗𑁆𑀕𑀺𑀓𑀁.

𑁧𑁩. 𑀧𑀻𑀢𑀺𑀳𑀻𑀦𑀁 𑀘𑀢𑀼𑀢𑁆𑀣𑀜𑁆𑀘, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀼𑀢𑀁;

𑀧𑀜𑁆𑀘𑀫𑀜𑁆𑀘 𑀧𑀓𑀸𑀲𑁂𑀦𑁆𑀢𑀺, 𑀉𑀪𑀬𑀫𑁆𑀧𑀺 𑀤𑀼𑀯𑀗𑁆𑀕𑀺𑀓𑀁.

𑁧𑁪. 𑀏𑀯𑀁 𑀛𑀸𑀦𑀗𑁆𑀕𑀪𑁂𑀤𑁂𑀦, 𑀘𑀺𑀢𑁆𑀢𑀁 𑀧𑀜𑁆𑀘𑀯𑀺𑀥𑀁 𑀪𑀯𑁂;

𑀭𑀽𑀧𑀸𑀯𑀘𑀭𑀓𑀼𑀲𑀮𑀁, 𑀭𑀽𑀧𑀪𑀽𑀫𑀺𑀧𑀯𑀢𑁆𑀢𑀓𑀁.

𑁧𑁫. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁, 𑀓𑀼𑀲𑀮𑀁 𑀧𑀞𑀫𑀁 𑀪𑀯𑁂;

𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀦𑁆𑀢𑀺, 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀢𑀣𑀸.

𑁧𑁬. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀢𑀼, 𑀘𑀢𑀼𑀢𑁆𑀣𑀁 𑀧𑀦 𑀫𑀸𑀦𑀲𑀁;

𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬-𑀢𑀦𑀜𑁆𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀁.

𑁧𑁭. 𑀆𑀭𑀼𑀧𑁆𑀧𑀓𑀼𑀲𑀮𑀁 𑀦𑀸𑀫, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀼𑀢𑀁;

𑀤𑀼𑀯𑀗𑁆𑀕𑀺𑀓𑀫𑀺𑀤𑀁 𑀲𑀩𑁆𑀩𑀁, 𑀆𑀭𑀼𑀧𑁆𑀧𑀪𑀯𑀲𑀸𑀥𑀓𑀁.

𑁧𑁮. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀧𑀞𑀫𑀸𑀦𑀼𑀢𑁆𑀢𑀭𑀁 𑀢𑀣𑀸;

𑀲𑀓𑀤𑀸𑀕𑀸𑀫𑀺 𑀅𑀦𑀸𑀕𑀸𑀫𑀺, 𑀅𑀭𑀳𑀢𑁆𑀢𑀦𑁆𑀢𑀺 𑀲𑀩𑁆𑀩𑀣𑀸.

𑁧𑁯. 𑀘𑀢𑀼𑀥𑀸 𑀫𑀕𑁆𑀕𑀪𑁂𑀤𑁂𑀦, 𑀛𑀸𑀦𑀪𑁂𑀤𑁂𑀦 𑀧𑀜𑁆𑀘𑀥𑀸;

𑀯𑀻𑀲𑀢𑀸𑀧𑀭𑀺𑀬𑀸𑀧𑀦𑁆𑀦𑀓𑀼𑀲𑀮𑀁 𑀤𑁆𑀯𑀬𑀫𑀺𑀲𑁆𑀲𑀺𑀢𑀁.

𑁨𑁦. 𑀇𑀢𑁆𑀣𑀁 𑀪𑀽𑀫𑀺𑀯𑀺𑀪𑀸𑀕𑁂𑀦, 𑀓𑀼𑀲𑀮𑀁 𑀢𑀼 𑀘𑀢𑀼𑀩𑁆𑀩𑀺𑀥𑀁;

𑀏𑀓𑀯𑀻𑀲𑀸𑀧𑀺 𑀩𑀸𑀯𑀻𑀲𑀁, 𑀲𑀢𑁆𑀢𑀢𑀺𑀁𑀲𑀯𑀺𑀥𑀫𑁆𑀧𑀺 𑀯𑀸.

𑁨𑁧. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀣𑀸;

𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀁, 𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀪𑁂𑀤𑀺𑀢𑀁.

𑁨𑁨. 𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑀺𑀢𑀺 𑀪𑀺𑀦𑁆𑀦𑀁 𑀧𑀼𑀦𑀝𑁆𑀞𑀥𑀸;

𑀮𑁄𑀪𑀫𑀽𑀮𑀁 𑀧𑀓𑀸𑀲𑁂𑀦𑁆𑀢𑀺, 𑀮𑁄𑀪𑀫𑁄𑀳𑀤𑁆𑀯𑀺𑀳𑁂𑀢𑀼𑀓𑀁.

𑁨𑁩. 𑀤𑁄𑀫𑀦𑀲𑁆𑀲𑀲𑀳𑀕𑀢𑀁, 𑀧𑀝𑀺𑀖𑁂𑀦 𑀲𑀫𑀸𑀬𑀼𑀢𑀁;

𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭𑀫𑀺𑀢𑀺 𑀪𑀺𑀦𑁆𑀦𑀁 𑀤𑁆𑀯𑀺𑀥𑀸 𑀧𑀦.

𑁨𑁪. 𑀤𑁄𑀲𑀫𑀽𑀮𑀁 𑀧𑀓𑀸𑀲𑁂𑀦𑁆𑀢𑀺, 𑀤𑁄𑀲𑀫𑁄𑀳𑀤𑁆𑀯𑀺𑀳𑁂𑀢𑀼𑀓𑀁;

𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀁, 𑀉𑀤𑁆𑀥𑀘𑁆𑀘𑀲𑀳𑀺𑀢𑀦𑁆𑀢𑀺 𑀘.

𑁨𑁫. 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑀼𑀢𑁆𑀢𑀁, 𑀫𑁄𑀫𑀽𑀳𑀁 𑀤𑀼𑀯𑀺𑀥𑀁 𑀧𑀦;

𑀫𑁄𑀳𑀫𑀽𑀮𑀁 𑀧𑀓𑀸𑀲𑁂𑀦𑁆𑀢𑀺, 𑀫𑁄𑀳𑁂𑀦𑁂𑀯𑁂𑀓𑀳𑁂𑀢𑀼𑀓𑀁.

𑁨𑁬. 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀦𑀸𑀫, 𑀘𑀢𑀼𑀭𑀸𑀧𑀸𑀬𑀲𑀸𑀥𑀓𑀸;

𑀏𑀢𑁂 𑀲𑀼𑀕𑀢𑀺𑀬𑀜𑁆𑀘𑀸𑀧𑀺, 𑀯𑀺𑀧𑀢𑁆𑀢𑀺𑀨𑀮𑀤𑀸𑀬𑀓𑀸.

𑁨𑁭. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀯𑀺𑀜𑁆𑀜𑀸𑀡𑀦𑀸𑀫𑀓𑀸;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀸, 𑀬𑀼𑀕𑀴𑀁 𑀲𑀫𑁆𑀧𑀝𑀺𑀘𑁆𑀙𑀦𑀁.

𑁨𑁮. 𑀲𑀦𑁆𑀢𑀻𑀭𑀡𑀤𑁆𑀯𑀬𑀜𑁆𑀘𑁂𑀯, 𑀉𑀧𑁂𑀓𑁆𑀔𑀸𑀲𑀳𑀺𑀢𑀁 𑀢𑀣𑀸;

𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑁂𑀦𑁂𑀯, 𑀯𑀺𑀧𑀸𑀓𑀸 𑀤𑀼𑀯𑀺𑀥𑀸 𑀞𑀺𑀢𑀸.

𑁨𑁯. 𑀉𑀧𑁂𑀓𑁆𑀔𑀸𑀲𑀳𑀺𑀢𑀸 𑀢𑀢𑁆𑀣, 𑀫𑀸𑀦𑀲𑀸 𑀤𑁆𑀯𑀸𑀤𑀲𑁂𑀭𑀺𑀢𑀸;

𑀓𑀸𑀬𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀲𑀼𑀔𑀤𑀼𑀓𑁆𑀔𑀬𑀼𑀢𑀁 𑀓𑀫𑀸.

𑁩𑁦. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀬𑀁 𑀲𑀦𑁆𑀢𑀻𑀭𑀡𑀫𑀸𑀦𑀲𑀁;

𑀢𑀁 𑀧𑀼𑀜𑁆𑀜𑀧𑀸𑀓𑀫𑁂𑀯𑀸𑀳𑀼, 𑀧𑀸𑀧𑀧𑀸𑀓𑀁 𑀦 𑀯𑀺𑀚𑁆𑀚𑀢𑀺.

𑁩𑁧. 𑀧𑀜𑁆𑀘𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭-𑀯𑀲𑁂𑀦 𑀤𑀼𑀯𑀺𑀥𑀁 𑀧𑀦;

𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬𑀼𑀢𑁆𑀢𑀁, 𑀓𑁆𑀭𑀺𑀬𑀸𑀯𑀚𑁆𑀚𑀦𑀦𑀸𑀫𑀓𑀁.

𑁩𑁨. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁, 𑀳𑀲𑀺𑀢𑀼𑀧𑁆𑀧𑀸𑀤𑀫𑀸𑀦𑀲𑀁;

𑀓𑁆𑀭𑀺𑀬𑀸𑀚𑀯𑀦𑀫𑀺𑀘𑁆𑀘𑁂𑀯𑀁, 𑀢𑀺𑀯𑀺𑀥𑀸𑀳𑁂𑀢𑀼𑀓𑀓𑁆𑀭𑀺𑀬𑀸.

𑁩𑁩. 𑀅𑀝𑁆𑀞𑁂𑀯 𑀧𑀼𑀜𑁆𑀜𑀧𑀸𑀓𑀸𑀦𑀺, 𑀧𑀸𑀧𑀧𑀸𑀓𑀸𑀦𑀺 𑀲𑀢𑁆𑀢𑀥𑀸;

𑀓𑁆𑀭𑀺𑀬𑀘𑀺𑀢𑁆𑀢𑀸𑀦𑀺 𑀢𑀻𑀡𑀻𑀢𑀺, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸.

𑁩𑁪. 𑀲𑀧𑀼𑀜𑁆𑀜𑁂𑀳𑀺 𑀲𑀫𑀸𑀦𑀸 𑀘, 𑀫𑀳𑀸𑀧𑀸𑀓𑀫𑀳𑀸𑀓𑁆𑀭𑀺𑀬𑀸;

𑀫𑀳𑀕𑁆𑀕𑀢𑀓𑁆𑀭𑀺𑀬𑀸 𑀧𑀸𑀓𑀸, 𑀨𑀮𑀘𑀺𑀢𑁆𑀢𑀸𑀦𑀺 𑀘 𑀓𑀫𑀸.

𑁩𑁫. 𑀇𑀢𑁆𑀣𑀫𑁂𑀓𑀽𑀦𑀦𑀯𑀼𑀢𑀺-𑀯𑀺𑀥𑀁 𑀘𑀺𑀢𑁆𑀢𑀁 𑀪𑀯𑁂 𑀢𑀣𑀸;

𑀏𑀓𑀦𑀯𑀼𑀢𑀺𑀯𑀺𑀥𑀁 𑀯𑀸, 𑀏𑀓𑀯𑀻𑀲𑀲𑀢𑀫𑁆𑀧𑀺 𑀯𑀸.

𑁩𑁬. 𑀢𑀓𑁆𑀓𑀘𑀸𑀭𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸𑀬𑀼𑀢𑀁;

𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀘𑀺𑀢𑁆𑀢𑀁, 𑀧𑀞𑀫𑀚𑁆𑀛𑀸𑀦𑀺𑀓𑀁 𑀫𑀢𑀁.

𑁩𑁭. 𑀤𑀼𑀢𑀺𑀬𑀁 𑀢𑀓𑁆𑀓𑀢𑁄 𑀳𑀻𑀦𑀁, 𑀢𑀢𑀺𑀬𑀁 𑀢𑀼 𑀯𑀺𑀘𑀸𑀭𑀢𑁄;

𑀘𑀢𑀼𑀢𑁆𑀣𑀁 𑀧𑀻𑀢𑀺𑀢𑁄 𑀳𑀻𑀦𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀬𑀼𑀢𑀁.

𑁩𑁮. 𑀧𑀜𑁆𑀘𑀫𑀦𑁆𑀢𑀺 𑀘 𑀧𑀜𑁆𑀘𑁂𑀢𑁂, 𑀧𑀞𑀫𑀸𑀦𑀼𑀢𑁆𑀢𑀭𑀸 𑀫𑀢𑀸;

𑀤𑀺𑀝𑁆𑀞𑀺𑀓𑀗𑁆𑀔𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀧𑁆𑀧𑀳𑀸𑀬𑀺𑀦𑁄.

𑁩𑁯. 𑀢𑀣𑁂𑀯 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢𑀜𑁆𑀘 𑀧𑀜𑁆𑀘𑀥𑀸;

𑀭𑀸𑀕𑀤𑁄𑀲𑀫𑁄𑀳𑀢𑁆𑀢𑀬𑀢𑀦𑀼𑀢𑁆𑀢𑀓𑀭𑀫𑀻𑀭𑀺𑀢𑀁.

𑁪𑁦. 𑀓𑀸𑀫𑀤𑁄𑀲𑀲𑀫𑀼𑀕𑁆𑀖𑀸𑀢𑀓𑀭𑀁 𑀦𑀺𑀭𑀯𑀲𑁂𑀲𑀢𑁄;

𑀢𑀢𑀺𑀬𑀸𑀦𑀼𑀢𑁆𑀢𑀭𑀜𑁆𑀘𑀸𑀧𑀺, 𑀓𑀼𑀲𑀮𑀁 𑀧𑀜𑁆𑀘𑀥𑀸 𑀢𑀣𑀸.

𑁪𑁧. 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀫𑀸𑀦𑀼𑀤𑁆𑀥𑀘𑁆𑀘𑀸𑀧𑀺 𑀘𑀸𑀧𑀭𑀸;

𑀅𑀯𑀺𑀚𑁆𑀚𑀸 𑀘𑁂𑀢𑀺 𑀧𑀜𑁆𑀘𑀼𑀤𑁆𑀥𑀁𑀪𑀸𑀕𑀺𑀬𑀸𑀦𑀫𑀲𑁂𑀲𑀢𑁄.

𑁪𑁨. 𑀲𑀁𑀬𑁄𑀚𑀦𑀸𑀦𑀁 𑀲𑁂𑀲𑀸𑀦𑀁, 𑀲𑀫𑀼𑀕𑁆𑀖𑀸𑀢𑀓𑀭𑀁 𑀧𑀭𑀁;

𑀘𑀢𑀼𑀢𑁆𑀣𑀸𑀦𑀼𑀢𑁆𑀢𑀭𑀁 𑀫𑀕𑁆𑀕𑀘𑀺𑀢𑁆𑀢𑀁 𑀧𑀜𑁆𑀘𑀯𑀺𑀥𑀦𑁆𑀢𑀺 𑀘.

𑁪𑁩. 𑀘𑀢𑁆𑀢𑀸𑀭𑀺 𑀧𑀜𑁆𑀘𑀓𑀸𑀦𑁂𑀯, 𑀫𑀕𑁆𑀕𑁂𑀲𑀼 𑀘 𑀨𑀮𑁂𑀲𑀼 𑀘;

𑀲𑁂𑀲𑀸𑀦𑀺 𑀘𑁂𑀓𑀸𑀲𑀻𑀢𑀻𑀢𑀺, 𑀏𑀓𑀯𑀻𑀲𑀲𑀢𑀁 𑀪𑀯𑁂.

𑁪𑁪. 𑀮𑁄𑀓𑀼𑀢𑁆𑀢𑀭𑀸𑀦𑀁 𑀅𑀝𑁆𑀞𑀦𑁆𑀦𑀁, 𑀇𑀘𑁆𑀘𑁂𑀯𑀁 𑀧𑀜𑁆𑀘𑀥𑀸 𑀧𑀼𑀦;

𑀛𑀸𑀦𑀗𑁆𑀕𑀫𑀕𑁆𑀕𑀩𑁄𑀚𑁆𑀛𑀗𑁆𑀕-𑀯𑀺𑀪𑀸𑀕𑀸𑀬 𑀬𑀣𑀸𑀭𑀳𑀁.

𑁪𑁫. 𑀧𑀸𑀤𑀓𑀚𑁆𑀛𑀸𑀦𑀫𑀸𑀫𑀝𑁆𑀞𑀛𑀸𑀦𑀁 𑀅𑀚𑁆𑀛𑀸𑀲𑀬𑁄 𑀢𑀣𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀘𑁂𑀯, 𑀦𑀺𑀬𑀸𑀫𑁂𑀢𑀺 𑀯𑀺𑀧𑀲𑁆𑀲𑀦𑀸𑀢𑀺.

𑀇𑀢𑀺 𑀘𑀺𑀢𑁆𑀢𑀯𑀺𑀪𑀸𑀕𑁂 𑀲𑀭𑀽𑀧𑀲𑀗𑁆𑀕𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.