𑁨𑁬. 𑀯𑀼𑀝𑁆𑀞𑀸𑀦𑀯𑀺𑀲𑀼𑀤𑁆𑀥𑀺𑀓𑀣𑀸

𑁧𑁦𑁧𑁯. 𑀢𑀲𑁆𑀲𑁂𑀯𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀲𑀺𑀔𑀸𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀦𑀸𑀫, 𑀬𑀤𑀸 𑀳𑁄𑀢𑀺 𑀢𑀤𑀸 𑀧𑀦.

𑁧𑁦𑁨𑁦. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀕𑁄𑀢𑁆𑀭𑀪𑀼𑀢𑁄 𑀧𑀭𑀁;

𑀫𑀕𑁆𑀕𑁄 𑀢𑀢𑁄 𑀨𑀮𑀁 𑀳𑁄𑀢𑀺, 𑀪𑀯𑀗𑁆𑀕𑀸 𑀧𑀘𑁆𑀘𑀯𑁂𑀓𑁆𑀔𑀡𑀸.

𑁧𑁦𑁨𑁧. 𑀧𑀭𑀺𑀓𑀫𑁆𑀫𑁄𑀧𑀘𑀸𑀭𑀸𑀦𑀼𑀮𑁄𑀫𑀲𑀗𑁆𑀔𑀸𑀢𑀕𑁄𑀘𑀭𑀸;

𑀫𑀕𑁆𑀕𑀲𑁆𑀲𑀸𑀯𑀚𑁆𑀚𑀦𑀁 𑀳𑀼𑀢𑁆𑀯𑀸, 𑀦𑀺𑀩𑁆𑀩𑀸𑀦𑁂 𑀳𑁄𑀢𑀺 𑀕𑁄𑀢𑁆𑀭𑀪𑀼.

𑁧𑁦𑁨𑁨. 𑀘𑀢𑀼𑀢𑁆𑀣𑀁 𑀧𑀜𑁆𑀘𑀫𑀁 𑀯𑀸𑀣, 𑀙𑀝𑁆𑀞𑀁 𑀯𑀸𑀧𑀺 𑀬𑀣𑀸𑀭𑀳𑀁;

𑀅𑀧𑁆𑀧𑁂𑀢𑀺 𑀫𑀕𑁆𑀕𑀚𑀯𑀦𑀁, 𑀦𑀺𑀩𑁆𑀩𑀸𑀦𑁂 𑀲𑀓𑀺𑀫𑁂𑀯 𑀢𑀁.

𑁧𑁦𑁨𑁩. 𑀢𑀢𑁄 𑀨𑀮𑀸𑀦𑀺 𑀢𑀻𑀡𑀺 𑀤𑁆𑀯𑁂, 𑀏𑀓𑀁 𑀯𑀸𑀣 𑀬𑀣𑀸𑀓𑁆𑀓𑀫𑀁;

𑀫𑀕𑁆𑀕𑀸𑀯𑀲𑁂𑀲𑀦𑀺𑀭𑁄𑀥𑀫𑀕𑁆𑀕𑀯𑀼𑀝𑁆𑀞𑀸𑀦𑀯𑀻𑀣𑀺𑀬𑀁.

𑁧𑁦𑁨𑁪. 𑀢𑀢𑁄 𑀪𑀯𑀗𑁆𑀕𑀧𑀸𑀢𑁄𑀯,

𑀢𑀁 𑀙𑁂𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸;

𑀢𑀺𑀲𑁆𑀲𑁄 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺,

𑀬𑀣𑀸𑀬𑁄𑀕𑀁 𑀢𑀣𑀸 𑀳𑀺 𑀘.

𑁧𑁦𑁨𑁫. 𑀫𑀕𑁆𑀕𑀁 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀅𑀯𑀲𑁆𑀲𑀁 𑀧𑀘𑁆𑀘𑀯𑁂𑀓𑁆𑀔𑀢𑀺;

𑀳𑀻𑀦𑁂 𑀓𑀺𑀮𑁂𑀲𑁂 𑀲𑁂𑀲𑁂 𑀘, 𑀧𑀘𑁆𑀘𑀯𑁂𑀓𑁆𑀔𑀢𑀺 𑀯𑀸 𑀦 𑀯𑀸.

𑁧𑁦𑁨𑁬. 𑀢𑀢𑁄 𑀘 𑀧𑀼𑀦 𑀲𑀗𑁆𑀔𑀸𑀭𑁂, 𑀯𑀺𑀧𑀲𑁆𑀲𑀦𑁆𑀢𑁄 𑀬𑀣𑀸 𑀧𑀼𑀭𑁂;

𑀅𑀧𑁆𑀧𑁂𑀢𑀺 𑀅𑀦𑀼𑀧𑀼𑀩𑁆𑀩𑁂𑀦, 𑀲𑁂𑀲𑀫𑀕𑁆𑀕𑀨𑀮𑀸𑀦𑀺 𑀘.

𑁧𑁦𑁨𑁭. 𑀢𑀢𑁆𑀣 𑀯𑀼𑀘𑁆𑀘𑀦𑁆𑀢𑀺 𑀦𑀺𑀩𑁆𑀩𑀸𑀦-𑀨𑀮𑀫𑀕𑁆𑀕𑀯𑀺𑀧𑀲𑁆𑀲𑀦𑀸;

𑀲𑀼𑀜𑁆𑀜𑀢𑀸 𑀘𑀸𑀦𑀺𑀫𑀺𑀢𑁆𑀢𑀸 𑀘, 𑀢𑀣𑀸𑀧𑀡𑀺𑀳𑀺𑀢𑀸𑀦𑀺 𑀘.

𑁧𑁦𑁨𑁮. 𑀲𑀼𑀜𑁆𑀜𑀢𑀸𑀯𑀺𑀧𑀲𑁆𑀲𑀦𑀸𑀤𑀺𑀦𑀸𑀫𑁂𑀦 𑀳𑀺 𑀯𑀺𑀧𑀲𑁆𑀲𑀢𑀺;

𑀯𑀺𑀫𑁄𑀓𑁆𑀔𑀫𑀼𑀔𑀪𑀽𑀢𑀸𑀢𑀺, 𑀢𑀺𑀯𑀺𑀥𑀸 𑀪𑀸𑀚𑀺𑀢𑀸 𑀢𑀣𑀸.

𑁧𑁦𑁨𑁯. 𑀲𑀼𑀜𑁆𑀜𑀢𑀸𑀤𑀺𑀓𑀦𑀸𑀫𑁂𑀦, 𑀯𑀺𑀫𑁄𑀓𑁆𑀔𑀸 𑀢𑀺𑀯𑀺𑀥𑀸 𑀫𑀢𑀸;

𑀦𑀺𑀩𑁆𑀩𑀸𑀦𑀨𑀮𑀫𑀕𑁆𑀕𑀸 𑀘, 𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀬𑁄.

𑁧𑁦𑁩𑁦. 𑀢𑀢𑁆𑀣𑁂𑀯 𑀧𑀞𑀫𑀪𑀽𑀫𑀺𑀁, 𑀧𑀢𑁆𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑁄;

𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀲𑁄, 𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁩𑁧. 𑀧𑀢𑁆𑀢𑁄 𑀤𑀼𑀢𑀺𑀬𑀪𑀽𑀫𑀺𑀜𑁆𑀘, 𑀲𑀓𑀤𑀸𑀕𑀸𑀫𑀺𑀦𑀸𑀫𑀓𑁄;

𑀲𑀓𑀺𑀫𑁂𑀯 𑀇𑀫𑀁 𑀮𑁄𑀓𑀁, 𑀆𑀕𑀦𑁆𑀢𑁆𑀯𑀸 𑀳𑁄𑀢𑀺 𑀫𑀸𑀦𑀼𑀲𑀁.

𑁧𑁦𑁩𑁨. 𑀧𑀢𑁆𑀢𑁄 𑀢𑀢𑀺𑀬𑀪𑀽𑀫𑀺𑀜𑁆𑀘, 𑀅𑀦𑀸𑀕𑀸𑀫𑀻𑀢𑀺 𑀯𑀼𑀘𑁆𑀘𑀢𑀺;

𑀩𑁆𑀭𑀳𑁆𑀫𑀮𑁄𑀓𑀸 𑀅𑀦𑀸𑀕𑀦𑁆𑀢𑁆𑀯𑀸, 𑀇𑀥𑀓𑀸𑀫𑁄𑀧𑀧𑀢𑁆𑀢𑀺𑀬𑀸.

𑁧𑁦𑁩𑁩. 𑀧𑀢𑁆𑀢𑁄 𑀘𑀢𑀼𑀢𑁆𑀣𑀪𑀽𑀫𑀺𑀜𑁆𑀘, 𑀅𑀭𑀳𑀸 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀤𑀼𑀓𑁆𑀔𑀕𑁆𑀕𑀺𑀁, 𑀦𑀺𑀩𑁆𑀩𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁩𑁪. 𑀇𑀢𑀺 𑀫𑀕𑁆𑀕𑀨𑀮𑀝𑁆𑀞𑀸𑀦𑀁, 𑀯𑀲𑀸 𑀅𑀭𑀺𑀬𑀧𑀼𑀕𑁆𑀕𑀮𑀸;

𑀤𑁆𑀯𑀺𑀥𑀸𑀧𑀺 𑀘𑀢𑀼𑀥𑀸 𑀬𑀼𑀕𑁆𑀕𑀸, 𑀅𑀝𑁆𑀞 𑀳𑁄𑀦𑁆𑀢𑀺 𑀯𑀺𑀪𑀸𑀕𑀢𑁄.

𑁧𑁦𑁩𑁫. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢-

𑀯𑀺𑀪𑀸𑀕𑀸𑀤𑀺𑀯𑀲𑀸 𑀧𑀦;

𑀯𑀺𑀪𑀢𑁆𑀢𑀸 𑀳𑁄𑀦𑁆𑀢𑀺 𑀲𑀢𑁆𑀢𑁂𑀢𑁂,

𑀬𑀣𑀸𑀬𑁄𑀕𑀁 𑀢𑀣𑀸 𑀳𑀺 𑀘.

𑁧𑁦𑁩𑁬. 𑀲𑀤𑁆𑀥𑀸𑀥𑀼𑀭𑀲𑁆𑀲𑀸𑀦𑀺𑀘𑁆𑀘𑀢𑁄, 𑀯𑀼𑀝𑁆𑀞𑀸𑀦𑀁 𑀤𑀼𑀓𑁆𑀔𑀢𑁄𑀧𑀺 𑀘;

𑀧𑀜𑁆𑀜𑀸𑀥𑀼𑀭𑀲𑁆𑀲𑀸𑀦𑀢𑁆𑀢𑀢𑁄, 𑀇𑀢𑀺 𑀤𑀻𑀧𑁂𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁧𑁦𑁩𑁭. 𑀲𑀤𑁆𑀥𑀸𑀦𑀼𑀲𑀸𑀭𑀺 𑀆𑀤𑀺𑀫𑁆𑀳𑀺, 𑀫𑀚𑁆𑀛𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀓𑁄;

𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀯, 𑀢𑀲𑁆𑀫𑀸 𑀲𑀤𑁆𑀥𑀸𑀥𑀼𑀭𑁄 𑀲𑀺𑀬𑀸.

𑁧𑁦𑁩𑁮. 𑀥𑀫𑁆𑀫𑀸𑀦𑀼𑀲𑀸𑀭𑀺 𑀆𑀤𑀺𑀫𑁆𑀳𑀺, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀢𑀢𑁄𑀧𑀭𑀺;

𑀅𑀦𑁆𑀢𑁂 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀯, 𑀳𑁄𑀢𑀺 𑀧𑀜𑁆𑀜𑀸𑀥𑀼𑀭𑁄𑀧𑀺 𑀘.

𑁧𑁦𑁩𑁯. 𑀲𑀫𑀣𑀬𑀸𑀦𑀺𑀓𑀸 𑀘𑁂𑀯, 𑀭𑀽𑀧𑀸𑀦𑀼𑀢𑁆𑀢𑀭𑀧𑀸𑀤𑀓𑀸;

𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸 𑀘, 𑀲𑀩𑁆𑀩𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸.

𑁧𑁦𑁪𑁦. 𑀥𑀼𑀭𑀯𑀼𑀝𑁆𑀞𑀸𑀦𑀪𑁂𑀤𑁂𑀦, 𑀳𑁄𑀦𑁆𑀢𑀺 𑀧𑀜𑁆𑀘𑁂𑀯 𑀲𑀩𑁆𑀩𑀣𑀸;

𑀆𑀭𑀼𑀧𑁆𑀧𑀧𑀸𑀤𑀓𑀸 𑀘𑀸𑀧𑀺, 𑀆𑀤𑀺𑀫𑁆𑀳𑀺 𑀤𑀼𑀯𑀺𑀥𑀸 𑀢𑀣𑀸.

𑁧𑁦𑁪𑁧. 𑀙𑀲𑀼 𑀞𑀸𑀦𑁂𑀲𑀼 𑀫𑀚𑁆𑀛𑀓𑁂, 𑀓𑀸𑀬𑀲𑀓𑁆𑀔𑀻𑀢𑀺 𑀪𑀸𑀚𑀺𑀢𑀸;

𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄.

𑁧𑁦𑁪𑁨. 𑀇𑀢𑁆𑀣𑀁 𑀯𑀼𑀢𑁆𑀢𑀬𑀸𑀦𑀥𑀼𑀭-𑀯𑀼𑀝𑁆𑀞𑀸𑀦𑀸𑀦𑀁 𑀯𑀺𑀪𑀸𑀕𑀢𑁄;

𑀫𑀕𑁆𑀕𑀧𑁆𑀨𑀮𑀪𑀽𑀫𑀺𑀬𑁄 𑀘, 𑀲𑀢𑁆𑀢𑀝𑁆𑀞𑀸𑀭𑀺𑀬𑀧𑀼𑀕𑁆𑀕𑀮𑀸.

𑁧𑁦𑁪𑁩. 𑀢𑀢𑁆𑀣 𑀘𑀸𑀦𑀼𑀢𑁆𑀢𑀭𑀜𑀸𑀡𑀁, 𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑀓𑀁;

𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦, 𑀓𑁆𑀮𑁂𑀲𑀸𑀦𑀼𑀲𑀬𑀲𑁄𑀥𑀦𑀁.

𑁧𑁦𑁪𑁪. 𑀘𑀢𑀼𑀫𑀕𑁆𑀕𑀯𑀺𑀪𑀸𑀕𑁂𑀦, 𑀯𑀼𑀝𑁆𑀞𑀸𑀦𑀦𑁆𑀢𑀺 𑀧𑀓𑀺𑀢𑁆𑀢𑀺𑀢𑀁;

𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀦𑀸𑀫 𑀳𑁄𑀢𑀺 𑀢𑀣𑀸𑀧𑀺 𑀘.

𑁧𑁦𑁪𑁫. 𑀫𑀕𑁆𑀕𑁄 𑀘 𑀧𑀭𑀺𑀚𑀸𑀦𑀸𑀢𑀺, 𑀤𑀼𑀓𑁆𑀔𑀁 𑀢𑁂𑀪𑀽𑀫𑀓𑀁 𑀢𑀣𑀸;

𑀬𑀣𑀸𑀬𑁄𑀕𑀁 𑀧𑀚𑀳𑀢𑀺, 𑀢𑀡𑁆𑀳𑀸𑀲𑀫𑀼𑀤𑀬𑀫𑁆𑀧𑀺 𑀘.

𑁧𑁦𑁪𑁬. 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀫𑀕𑁆𑀕𑀲𑀘𑁆𑀘𑀫𑀦𑀼𑀢𑁆𑀢𑀭𑀁;

𑀪𑀸𑀯𑀦𑀸𑀯𑀻𑀣𑀺𑀫𑁄𑀢𑀺𑀡𑁆𑀡𑁄, 𑀪𑀸𑀯𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁪𑁭. 𑀤𑀺𑀝𑁆𑀞𑀺𑀕𑁆𑀕𑀢𑀯𑀺𑀘𑀺𑀓𑀺𑀘𑁆𑀙𑀸-𑀲𑀻𑀮𑀩𑁆𑀩𑀢𑀫𑀲𑁂𑀲𑀢𑁄;

𑀅𑀧𑀸𑀬𑀕𑀫𑀦𑀻𑀬𑀜𑁆𑀘, 𑀭𑀸𑀕𑀤𑁄𑀲𑀸𑀤𑀺𑀓𑀢𑁆𑀢𑀬𑀁.

𑁧𑁦𑁪𑁮. 𑀢𑀤𑁂𑀓𑀝𑁆𑀞𑁂 𑀓𑀺𑀮𑁂𑀲𑁂 𑀘, 𑀲𑀳𑀚𑀸𑀢𑀧𑁆𑀧𑀳𑀸𑀦𑀢𑁄;

𑀧𑀚𑀳𑀸𑀢𑀺 𑀲𑁄𑀢𑀸𑀧𑀢𑁆𑀢𑀺-𑀫𑀕𑁆𑀕𑁄 𑀧𑀞𑀫𑀪𑀽𑀫𑀺𑀓𑁄.

𑁧𑁦𑁪𑁯. 𑀢𑀤𑁂𑀓𑀝𑁆𑀞𑁂 𑀧𑀚𑀳𑀢𑀺, 𑀭𑀸𑀕𑀤𑁄𑀲𑀸𑀤𑀺𑀓𑁂𑀧𑀺 𑀘;

𑀣𑀽𑀮𑁂 𑀢𑀼 𑀲𑀓𑀤𑀸𑀕𑀸𑀫𑀺-𑀫𑀕𑁆𑀕𑁄 𑀤𑀼𑀢𑀺𑀬𑀪𑀽𑀫𑀺𑀓𑁄.

𑁧𑁦𑁫𑁦. 𑀧𑀚𑀳𑀸𑀢𑀺 𑀅𑀦𑀸𑀕𑀸𑀫𑀺-𑀫𑀕𑁆𑀕𑁄 𑀦𑀺𑀭𑀯𑀲𑁂𑀲𑀢𑁄;

𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑁂 𑀘, 𑀢𑀤𑁂𑀓𑀝𑁆𑀞𑁂 𑀘 𑀲𑀫𑁆𑀪𑀯𑀸.

𑁧𑁦𑁫𑁧. 𑀭𑀽𑀧𑀸𑀭𑀽𑀧𑀭𑀸𑀕𑀫𑀸𑀦𑀼-𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀢𑀺 𑀧𑀜𑁆𑀘𑀓𑀁;

𑀅𑀕𑁆𑀕𑀫𑀕𑁆𑀕𑁄 𑀧𑀚𑀳𑀢𑀺, 𑀓𑁆𑀮𑁂𑀲𑁂 𑀲𑁂𑀲𑁂 𑀘 𑀲𑀩𑁆𑀩𑀣𑀸.

𑁧𑁦𑁫𑁨. 𑀇𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀁, 𑀓𑁆𑀮𑁂𑀲𑀓𑁆𑀔𑀬𑀨𑀮𑀸𑀯𑀳𑀁;

𑀫𑀕𑁆𑀕𑀜𑀸𑀡𑀁 𑀧𑀓𑀸𑀲𑁂𑀦𑁆𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀲𑀢𑁆𑀢𑀫𑀁 𑀩𑀼𑀥𑀸.

𑁧𑁦𑁫𑁩. 𑀙𑀩𑁆𑀩𑀺𑀲𑀼𑀤𑁆𑀥𑀺𑀓𑀫𑁂𑀦𑁂𑀯𑀁, 𑀲𑀩𑁆𑀩𑀣𑀸𑀬 𑀯𑀺𑀲𑀼𑀤𑁆𑀥𑀺𑀬𑀸;

𑀲𑀢𑁆𑀢𑀫𑀸𑀬𑀸𑀦𑀼𑀧𑀢𑁆𑀢𑀩𑁆𑀩𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁫𑁪. 𑀓𑁆𑀮𑁂𑀲𑀓𑁆𑀔𑀬𑀓𑀭𑀁 𑀢𑀸𑀡𑀁, 𑀲𑀁𑀲𑀸𑀭𑀸𑀢𑀺𑀓𑁆𑀓𑀫𑀁 𑀧𑀭𑀁;

𑀧𑀸𑀭𑀺𑀫𑀁 𑀢𑀻𑀭𑀫𑀪𑀬𑀁, 𑀲𑀩𑁆𑀩𑀲𑀗𑁆𑀔𑀸𑀭𑀦𑀺𑀲𑁆𑀲𑀝𑀁.

𑁧𑁦𑁫𑁫. 𑀢𑁂𑀦𑀫𑁆𑀫𑀤𑀦𑀺𑀫𑁆𑀫𑀤𑀦𑀁, 𑀧𑀺𑀧𑀸𑀲𑀯𑀺𑀦𑀬𑀸𑀤𑀺𑀦𑀸;

𑀓𑁆𑀮𑁂𑀲𑀲𑀁𑀲𑀸𑀭𑀲𑀗𑁆𑀔𑀸𑀭-𑀧𑀝𑀺𑀧𑀓𑁆𑀔𑀦𑀺𑀤𑀲𑁆𑀲𑀺𑀢𑀁.

𑁧𑁦𑁫𑁬. 𑀅𑀚𑀭𑀸𑀫𑀭𑀫𑀘𑁆𑀘𑀦𑁆𑀢-𑀫𑀦𑀼𑀧𑁆𑀧𑀸𑀤𑀫𑀲𑀗𑁆𑀔𑀢𑀁;

𑀅𑀦𑀼𑀢𑁆𑀢𑀭𑀫𑀲𑀗𑁆𑀔𑀸𑀭𑀁, 𑀅𑀦𑀦𑁆𑀢𑀫𑀢𑀼𑀮𑀜𑁆𑀘 𑀢𑀁.

𑁧𑁦𑁫𑁭. 𑀧𑀭𑀫𑀢𑁆𑀣𑀫𑀦𑁄𑀧𑀫𑁆𑀫𑀁, 𑀲𑀦𑁆𑀢𑀺 𑀅𑀧𑁆𑀧𑀝𑀺𑀫𑀁 𑀲𑀼𑀔𑀁;

𑀦𑀺𑀭𑁄𑀥𑀲𑀘𑁆𑀘 𑀦𑀺𑀩𑁆𑀩𑀸𑀦𑀁, 𑀏𑀓𑀦𑁆𑀢𑀁 𑀅𑀫𑀢𑀁 𑀧𑀤𑀁.

𑁧𑁦𑁫𑁮. 𑀲𑁄𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦-𑀥𑀸𑀢𑀼 𑀘𑁂𑀯 𑀢𑀣𑀸𑀧𑀭𑀸;

𑀅𑀦𑀼𑀧𑀸𑀤𑀺𑀲𑁂𑀲𑀸 𑀘𑁂𑀢𑀺, 𑀤𑀼𑀯𑀺𑀥𑀸 𑀧𑀭𑀺𑀬𑀸𑀬𑀢𑁄.

𑁧𑁦𑁫𑁯. 𑀲𑀼𑀜𑁆𑀜𑀢𑀁 𑀘𑀸𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸𑀧𑀡𑀺𑀳𑀺𑀢𑀦𑁆𑀢𑀺 𑀘;

𑀅𑀢𑁆𑀢𑀸𑀤𑀺𑀕𑀸𑀳𑀸𑀪𑀸𑀯𑁂𑀦, 𑀢𑀺𑀯𑀺𑀥𑀸𑀧𑀺 𑀘 𑀪𑀸𑀚𑀺𑀢𑀁.

𑁧𑁦𑁬𑁦. 𑀓𑁆𑀮𑁂𑀲𑀲𑀁𑀲𑀸𑀭𑀲𑀗𑁆𑀔𑀸𑀭-𑀧𑀘𑁆𑀘𑀦𑀻𑀓𑀯𑀺𑀪𑀸𑀕𑀢𑁄;

𑀪𑀯𑀓𑁆𑀔𑀬𑀸𑀤𑀺𑀪𑁂𑀤𑁂𑀳𑀺, 𑀩𑀳𑀼𑀥𑀸𑀧𑀺 𑀧𑀯𑀼𑀘𑁆𑀘𑀢𑀺.

𑁧𑁦𑁬𑁧. 𑀢𑀤𑁂𑀯𑀫𑀘𑁆𑀘𑀼𑀢𑀁 𑀥𑀫𑁆𑀫𑀁, 𑀮𑁄𑀓𑀼𑀢𑁆𑀢𑀭𑀫𑀓𑀸𑀮𑀺𑀓𑀁;

𑀯𑀸𑀦𑀸𑀪𑀸𑀯𑀸 𑀯𑀸𑀦𑀸𑀢𑀻𑀢𑁄, ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀧𑀓𑀺𑀢𑁆𑀢𑀺𑀢𑀁.

𑀇𑀢𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀕𑁂 𑀯𑀼𑀝𑁆𑀞𑀸𑀦𑀯𑀺𑀲𑀼𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀙𑀩𑁆𑀩𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀩𑁆𑀩𑀣𑀸𑀧𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀕𑁄.