𑁨𑁫. 𑀯𑀺𑀧𑀲𑁆𑀲𑀦𑀸𑀯𑀼𑀤𑁆𑀥𑀺𑀓𑀣𑀸

𑁯𑁮𑁧. 𑀲𑀻𑀮𑀘𑀺𑀢𑁆𑀢𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀬𑁄;

𑀧𑀢𑁆𑀯𑀸 𑀓𑀮𑀸𑀧𑀢𑁄 𑀢𑀸𑀯, 𑀲𑀫𑁆𑀫𑀲𑁂𑀬𑁆𑀬 𑀢𑀢𑁄 𑀧𑀭𑀁.

𑁯𑁮𑁨. 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀪𑀗𑁆𑀕𑀜𑀸𑀡𑀁 𑀪𑀬𑀜𑀸𑀡𑀁, 𑀢𑀣𑀸𑀤𑀻𑀦𑀯𑀦𑀺𑀩𑁆𑀩𑀺𑀤𑀸.

𑁯𑁮𑁩. 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸;

𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀼𑀮𑁄𑀫𑀫𑀺𑀘𑁆𑀘𑀸𑀦𑀼𑀓𑁆𑀓𑀫𑀢𑁄 𑀞𑀺𑀢𑀸.

𑁯𑁮𑁪. 𑀯𑀺𑀧𑀲𑁆𑀲𑀦𑀸𑀢𑀺 𑀘𑀓𑁆𑀔𑀸𑀢𑀸, 𑀤𑀲𑀜𑀸𑀡𑀧𑀭𑀫𑁆𑀧𑀭𑀸;

𑀮𑀓𑁆𑀔𑀡𑀢𑁆𑀢𑀬𑀫𑀸𑀳𑀘𑁆𑀘, 𑀲𑀗𑁆𑀔𑀸𑀭𑁂𑀲𑀼 𑀧𑀯𑀢𑁆𑀢𑀢𑀺.

𑁯𑁮𑁫. 𑀢𑀲𑁆𑀫𑀸 𑀓𑀮𑀸𑀧𑀢𑁄 𑀢𑀸𑀯, 𑀲𑀫𑁆𑀫𑀲𑁂𑀬𑁆𑀬 𑀢𑀺𑀮𑀓𑁆𑀔𑀡𑀁;

𑀲𑀫𑁆𑀫𑀲𑀺𑀢𑁆𑀯𑀸 𑀅𑀢𑀻𑀢𑀸𑀤𑀺𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄.

𑁯𑁮𑁬. 𑀅𑀦𑀺𑀘𑁆𑀘𑀸 𑀢𑁂 𑀔𑀬𑀝𑁆𑀞𑁂𑀦, 𑀔𑀦𑁆𑀥𑀸 𑀤𑀼𑀓𑁆𑀔𑀸 𑀪𑀬𑀝𑁆𑀞𑀢𑁄;

𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦, 𑀇𑀘𑁆𑀘𑀸𑀪𑀺𑀡𑁆𑀳𑀁 𑀯𑀺𑀘𑀺𑀦𑁆𑀢𑀬𑀁.

𑁯𑁮𑁭. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀦𑁆𑀢𑀲𑁆𑀲, 𑀉𑀧𑀝𑁆𑀞𑀸𑀢𑀺 𑀢𑀺𑀮𑀓𑁆𑀔𑀡𑀁;

𑀲𑀗𑁆𑀔𑀸𑀭𑁂𑀲𑀼 𑀢𑀢𑁄 𑀬𑁄𑀕𑀻, 𑀔𑀡𑀲𑀦𑁆𑀢𑀢𑀺𑀅𑀤𑁆𑀥𑀢𑁄.

𑁯𑁮𑁮. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦 𑀥𑀫𑁆𑀫𑀸𑀦𑀁, 𑀉𑀤𑀬𑀜𑁆𑀘 𑀯𑀬𑀁 𑀢𑀣𑀸;

𑀧𑀜𑁆𑀜𑀸𑀲𑀸𑀓𑀸𑀭𑀪𑁂𑀤𑁂𑀳𑀺, 𑀅𑀦𑀼𑀧𑀲𑁆𑀲𑀢𑀺 𑀢𑀢𑁆𑀣 𑀳𑀺.

𑁯𑁮𑁯. 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀓𑀫𑁆𑀫𑀸𑀦𑀁, 𑀉𑀤𑀬𑀸 𑀘 𑀦𑀺𑀭𑁄𑀥𑀢𑁄;

𑀲𑀫𑀼𑀤𑀬𑀸 𑀦𑀺𑀭𑁄𑀥𑀸 𑀘, 𑀧𑀜𑁆𑀘𑀦𑁆𑀦𑀁 𑀤𑀲𑁆𑀲𑀺𑀢𑀸 𑀢𑀣𑀸.

𑁯𑁯𑁦. 𑀭𑀽𑀧𑀲𑁆𑀲𑀸𑀳𑀸𑀭𑀢𑁄 𑀢𑀺𑀡𑁆𑀡𑀁, 𑀨𑀲𑁆𑀲𑀢𑁄 𑀦𑀸𑀫𑀭𑀽𑀧𑀢𑁄;

𑀯𑀺𑀜𑁆𑀜𑀸𑀡𑀲𑁆𑀲𑁂𑀢𑀺 𑀲𑀩𑁆𑀩𑁂𑀧𑀺, 𑀘𑀢𑁆𑀢𑀸𑀮𑀻𑀲 𑀲𑀫𑀺𑀲𑁆𑀲𑀺𑀢𑀸.

𑁯𑁯𑁧. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀪𑀗𑁆𑀕-

𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀧𑀲𑁆𑀲𑀢𑁄;

𑀔𑀡𑀢𑁄𑀤𑀬𑀢𑁄 𑀘𑁂𑀢𑀺,

𑀲𑀫𑀧𑀜𑁆𑀜𑀸𑀲 𑀳𑁄𑀦𑁆𑀢𑀺 𑀢𑁂.

𑁯𑁯𑁨. 𑀇𑀢𑀺 𑀔𑀦𑁆𑀥𑀫𑀼𑀔𑁂𑀦𑁂𑀢𑁂, 𑀯𑀺𑀪𑀢𑁆𑀢𑀸 𑀉𑀤𑀬𑀩𑁆𑀩𑀬𑀸;

𑀆𑀬𑀢𑀦𑁆𑀦𑀸𑀤𑀺𑀪𑁂𑀤𑁂𑀳𑀺, 𑀬𑁄𑀚𑁂𑀢𑀩𑁆𑀩𑀸 𑀬𑀣𑀸𑀭𑀳𑀁.

𑁯𑁯𑁩. 𑀉𑀤𑀬𑀜𑁆𑀘 𑀯𑀬𑀜𑁆𑀘𑁂𑀯𑀁, 𑀧𑀲𑁆𑀲𑀢𑁄 𑀢𑀲𑁆𑀲 𑀬𑁄𑀕𑀺𑀦𑁄;

𑀯𑀺𑀪𑀽𑀢𑀸 𑀳𑁄𑀦𑁆𑀢𑀺 𑀲𑀗𑁆𑀔𑀸𑀭𑀸, 𑀲𑀫𑀼𑀝𑁆𑀞𑀸𑀢𑀺 𑀢𑀺𑀮𑀓𑁆𑀔𑀡𑀁.

𑁯𑁯𑁪. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀘,

𑀢𑁂 𑀧𑀲𑁆𑀲𑀦𑁆𑀢𑀺 𑀯𑀺𑀲𑁂𑀲𑀢𑁄;

𑀢𑀢𑁄 𑀚𑀸𑀬𑀦𑁆𑀢𑀼𑀧𑀓𑁆𑀮𑁂𑀲𑀸,

𑀤𑀲𑁄𑀧𑀓𑁆𑀮𑁂𑀲𑀯𑀢𑁆𑀣𑀼𑀓𑀸.

𑁯𑁯𑁫. 𑀑𑀪𑀸𑀲𑁄 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺, 𑀅𑀥𑀺𑀫𑁄𑀓𑁆𑀔𑁄 𑀘 𑀧𑀕𑁆𑀕𑀳𑁄;

𑀲𑀼𑀔𑀁 𑀜𑀸𑀡𑀫𑀼𑀧𑀝𑁆𑀞𑀸𑀦𑀁, 𑀉𑀧𑁂𑀓𑁆𑀔𑀸 𑀘 𑀦𑀺𑀓𑀦𑁆𑀢𑀺 𑀘.

𑁯𑁯𑁬. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀢𑀺𑀯𑀺𑀥𑁂𑀧𑀺 𑀢𑁂;

𑀅𑀲𑁆𑀲𑀸𑀤𑁂𑀦𑁆𑀢𑁄 𑀉𑀦𑁆𑀦𑀫𑀦𑁆𑀢𑁄, 𑀫𑀫𑀸𑀬𑀦𑁆𑀢𑁄 𑀓𑀺𑀮𑀺𑀲𑁆𑀲𑀢𑀺.

𑁯𑁯𑁭. 𑀫𑀕𑁆𑀕𑀁 𑀨𑀮𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀧𑀢𑁆𑀢𑁄𑀲𑁆𑀫𑀻𑀢𑀺 𑀅𑀓𑁄𑀯𑀺𑀤𑁄;

𑀯𑁂𑀓𑁆𑀔𑀩𑀼𑀚𑁆𑀛𑀸𑀢𑀺 𑀫𑀜𑁆𑀜𑀦𑁆𑀢𑁄, 𑀧𑀧𑁆𑀧𑁄𑀢𑀺 𑀅𑀥𑀺𑀫𑀸𑀦𑀺𑀓𑁄.

𑁯𑁯𑁮. 𑀫𑀕𑁆𑀕𑀸𑀤𑀬𑁄 𑀦 𑀳𑁄𑀦𑁆𑀢𑁂𑀢𑁂,

𑀢𑀡𑁆𑀳𑀸𑀕𑀸𑀳𑀸𑀤𑀺𑀯𑀢𑁆𑀣𑀼𑀢𑁄;

𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀘𑀼𑀧𑀓𑁆𑀮𑁂𑀲𑀸 𑀧𑀭𑀺𑀧𑀦𑁆𑀣𑀓𑀸.

𑁯𑁯𑁯. 𑀧𑁄𑀭𑀸𑀡𑀫𑁂𑀯 𑀔𑀦𑁆𑀥𑀸𑀦𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀢𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑁄, 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀧𑀘𑁆𑀘𑀬𑁄.

𑁧𑁦𑁦𑁦. 𑀇𑀢𑀺 𑀫𑀕𑁆𑀕𑀁 𑀅𑀫𑀕𑁆𑀕𑀜𑁆𑀘, 𑀯𑀺𑀲𑁄𑀥𑁂𑀦𑁆𑀢𑀲𑁆𑀲 𑀲𑀺𑀚𑁆𑀛𑀢𑀺;

𑀯𑀺𑀲𑀼𑀤𑁆𑀥𑀺 𑀘 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀦𑀸𑀫𑀺𑀓𑀸.

𑁧𑁦𑁦𑁧. 𑀢𑀣𑀸𑀧𑀭𑀸 𑀯𑀺𑀲𑀼𑀤𑁆𑀥𑀻𑀦𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀆𑀤𑀺𑀁 𑀓𑀢𑁆𑀯𑀸 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀦𑀸𑀫𑀺𑀓𑀸.

𑁧𑁦𑁦𑁨. 𑀧𑀘𑁆𑀙𑀸 𑀲𑀁𑀓𑁆𑀮𑁂𑀲𑀯𑀺𑀓𑁆𑀔𑁂𑀧𑀯𑀺𑀲𑀼𑀤𑁆𑀥𑀦𑁆𑀢𑀁 𑀬𑀣𑀸 𑀧𑀼𑀭𑁂;

𑀧𑀝𑀺𑀧𑀚𑁆𑀚𑀢𑀺 𑀫𑁂𑀥𑀸𑀯𑀻, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁.

𑁧𑁦𑁦𑁩. 𑀇𑀢𑀺 𑀔𑁄𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀯𑀻𑀣𑀺𑀬𑀁;

𑀲𑀺𑀓𑁆𑀔𑀦𑁆𑀢𑀲𑁆𑀲𑀸𑀘𑀺𑀭𑁂𑀦𑁂𑀯, 𑀧𑀭𑀺𑀧𑀓𑁆𑀓𑀸 𑀯𑀺𑀧𑀲𑁆𑀲𑀦𑀸.

𑁧𑁦𑁦𑁪. 𑀧𑀳𑀸𑀬𑁄𑀤𑀬𑀯𑁄𑀳𑀸𑀭𑀁, 𑀯𑀬𑀫𑁂𑀯𑀸𑀥𑀺𑀫𑀼𑀘𑁆𑀘𑀢𑁄;

𑀉𑀧𑁆𑀧𑀸𑀤𑀸𑀪𑁄𑀕𑀫𑁄𑀳𑀸𑀬, 𑀪𑀗𑁆𑀕𑀫𑁂𑀯𑀸𑀦𑀼𑀢𑀺𑀝𑁆𑀞𑀢𑀺.

𑁧𑁦𑁦𑁫. 𑀢𑀢𑁄 𑀦𑀺𑀚𑁆𑀛𑀭𑀥𑀸𑀭𑀸𑀯, 𑀕𑀗𑁆𑀕𑀸𑀯𑀸𑀭𑁄𑀤𑀓𑀁 𑀯𑀺𑀬;

𑀪𑀺𑀚𑁆𑀚𑀫𑀸𑀦𑀢𑀺𑀡𑀸𑀦𑀺𑀯, 𑀧𑀝𑀺𑀧𑀚𑁆𑀚𑀸 𑀲𑀺𑀔𑀸 𑀯𑀺𑀬.

𑁧𑁦𑁦𑁬. 𑀧𑀢𑀦𑁆𑀢𑁂 𑀘 𑀯𑀬𑀦𑁆𑀢𑁂 𑀘, 𑀪𑀺𑀚𑁆𑀚𑀦𑁆𑀢𑀺𑀘𑁆𑀘𑁂𑀯 𑀲𑀗𑁆𑀔𑀢𑁂;

𑀧𑀲𑁆𑀲𑀢𑁄 𑀢𑀲𑁆𑀲 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀫𑀻𑀭𑀺𑀢𑀁.

𑁧𑁦𑁦𑁭. 𑀢𑀢𑁄 𑀪𑀬𑀸𑀦𑀼𑀧𑀲𑁆𑀲𑀦𑀸, 𑀲𑀪𑀬𑀸𑀢𑀺 𑀯𑀺𑀧𑀲𑁆𑀲𑀢𑁄;

𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸-𑀜𑀸𑀡𑀁 𑀆𑀤𑀻𑀦𑀯𑀸𑀢𑀺 𑀘.

𑁧𑁦𑁦𑁮. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀘, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀲𑁆𑀲 𑀬𑁄𑀕𑀺𑀦𑁄;

𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁, 𑀢𑀢𑁄 𑀫𑀼𑀘𑁆𑀘𑀺𑀢𑀼𑀫𑀺𑀘𑁆𑀙𑀢𑁄.

𑁧𑁦𑁦𑁯. 𑀦𑀺𑀘𑁆𑀘𑀸 𑀘𑁂 𑀦 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀦 𑀩𑀸𑀥𑁂𑀬𑁆𑀬 𑀲𑀼𑀔𑀸 𑀬𑀤𑀺;

𑀯𑀲𑁂 𑀯𑀢𑁆𑀢𑁂𑀬𑁆𑀬 𑀅𑀢𑁆𑀢𑀸 𑀘𑁂, 𑀢𑀤𑀪𑀸𑀯𑀸 𑀦 𑀢𑁂 𑀢𑀣𑀸.

𑁧𑁦𑁧𑁦. 𑀲𑀼𑀝𑁆𑀞𑀼 𑀫𑀼𑀘𑁆𑀘𑀺𑀢𑀼𑀫𑀺𑀘𑁆𑀘𑁂𑀯𑀁, 𑀧𑀝𑀺𑀧𑀘𑁆𑀘𑀓𑁆𑀔𑀢𑁄 𑀢𑀢𑁄;

𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸-𑀜𑀸𑀡𑀁 𑀚𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁧𑁧. 𑀲𑀸𑀥𑀼𑀓𑀁 𑀧𑀝𑀺𑀲𑀗𑁆𑀔𑀸𑀬, 𑀲𑀗𑁆𑀔𑀸𑀭𑁂𑀲𑀼 𑀢𑀺𑀮𑀓𑁆𑀔𑀡𑀁;

𑀲𑀼𑀧𑀭𑀺𑀜𑁆𑀜𑀸𑀢𑀲𑀗𑁆𑀔𑀸𑀭𑁂, 𑀢𑀣𑁂𑀯 𑀧𑀝𑀺𑀧𑀲𑁆𑀲𑀢𑀺.

𑁧𑁦𑁧𑁨. 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸 𑀘, 𑀲𑀗𑁆𑀔𑀸𑀭𑀸𑀯 𑀦 𑀘𑀸𑀧𑀭𑁄;

𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀻𑀬𑀁 𑀯𑀸, 𑀦𑀸𑀳𑀁 𑀦 𑀢𑀼 𑀫𑀫𑀸𑀢𑀺 𑀘.

𑁧𑁦𑁧𑁩. 𑀢𑀢𑁄𑀯 𑀢𑀢𑁆𑀣 𑀫𑀚𑁆𑀛𑀢𑁆𑀢𑁄, 𑀦𑀦𑁆𑀤𑀺𑀭𑀸𑀕𑀯𑀺𑀦𑀺𑀲𑁆𑀲𑀝𑁄;

𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑁂𑀦, 𑀲𑀗𑁆𑀔𑀸𑀭𑁂𑀲𑁆𑀯𑀚𑁆𑀛𑀼𑀧𑁂𑀓𑁆𑀔𑀢𑀺.

𑁧𑁦𑁧𑁪. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀁, 𑀜𑀸𑀡𑀁 𑀢𑀲𑁆𑀲 𑀇𑀢𑀻𑀭𑀺𑀢𑀁;

𑀢𑀢𑁄 𑀯𑀼𑀝𑁆𑀞𑀸𑀦𑀖𑀝𑀺𑀢𑀁, 𑀅𑀦𑀼𑀮𑁄𑀫𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁦𑁧𑁫. 𑀲𑀼𑀧𑀭𑀺𑀜𑁆𑀜𑀸𑀢𑀲𑀗𑁆𑀔𑀸𑀭𑁂, 𑀲𑀼𑀲𑀫𑁆𑀫𑀝𑁆𑀞𑀢𑀺𑀮𑀓𑁆𑀔𑀡𑁂;

𑀉𑀧𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀲𑁂𑀯, 𑀲𑀺𑀔𑀸𑀧𑀢𑁆𑀢𑀸 𑀯𑀺𑀧𑀲𑁆𑀲𑀦𑀸.

𑁧𑁦𑁧𑁬. 𑀲𑀗𑁆𑀔𑀸𑀭𑀥𑀫𑁆𑀫𑁂 𑀆𑀭𑀩𑁆𑀪, 𑀢𑀸𑀯 𑀓𑀸𑀮𑀁 𑀧𑀯𑀢𑁆𑀢𑀢𑀺;

𑀢𑀻𑀭𑀤𑀲𑁆𑀲𑀻𑀯 𑀲𑀓𑀼𑀡𑁄, 𑀬𑀸𑀯 𑀧𑀸𑀭𑀁 𑀦 𑀧𑀲𑁆𑀲𑀢𑀺.

𑁧𑁦𑁧𑁭. 𑀬𑀤𑀸 𑀧𑀲𑁆𑀲𑀢𑀺 𑀦𑀺𑀩𑁆𑀩𑀸𑀦𑀁, 𑀯𑀼𑀝𑁆𑀞𑀸𑀦𑀕𑀳𑀺𑀢𑀸 𑀢𑀤𑀸;

𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀦𑀸𑀫, 𑀲𑀸𑀦𑀼𑀮𑁄𑀫𑀸 𑀧𑀯𑀼𑀘𑁆𑀘𑀢𑀺.

𑁧𑁦𑁧𑁮. 𑀇𑀢𑀺 𑀤𑁆𑀯𑀻𑀳𑀺 𑀯𑀺𑀲𑀼𑀤𑁆𑀥𑀻𑀳𑀺, 𑀯𑀺𑀲𑀼𑀤𑁆𑀥𑀸𑀬 𑀯𑀺𑀧𑀲𑁆𑀲𑀢𑁄;

𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀤𑀁, 𑀧𑀽𑀭𑁂𑀢𑀻𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀇𑀢𑀺 𑀦𑀺𑀩𑁆𑀩𑀸𑀦𑀯𑀺𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀯𑀼𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.