𑁧𑁯. 𑀧𑀪𑁂𑀤𑀓𑀣𑀸

𑁭𑁦𑁬. 𑀅𑀝𑁆𑀞𑀯𑀻𑀲𑀯𑀺𑀥𑀫𑁆𑀧𑁂𑀢𑀁, 𑀭𑀽𑀧𑀁 𑀤𑀸𑀦𑀺 𑀬𑀣𑀸𑀭𑀳𑀁;

𑀪𑀽𑀢𑀭𑀽𑀧𑀸𑀤𑀺𑀪𑁂𑀤𑁂𑀳𑀺, 𑀯𑀺𑀪𑀚𑁂𑀬𑁆𑀬 𑀯𑀺𑀘𑀓𑁆𑀔𑀡𑁄.

𑁭𑁦𑁭. 𑀧𑀣𑀯𑀸𑀤𑀺𑀓𑀫𑀺𑀤𑀦𑁆𑀢𑀺, 𑀪𑀽𑀢𑀭𑀽𑀧𑀁 𑀘𑀢𑀼𑀩𑁆𑀩𑀺𑀥𑀁;

𑀉𑀧𑀸𑀤𑀸𑀭𑀽𑀧𑀫𑀜𑁆𑀜𑀁 𑀢𑀼, 𑀘𑀢𑀼𑀯𑀻𑀲𑀢𑀺𑀯𑀺𑀥𑀁 𑀪𑀯𑁂.

𑁭𑁦𑁮. 𑀧𑀜𑁆𑀘𑀯𑀺𑀥𑀫𑁆𑀧𑀺 𑀘𑀓𑁆𑀔𑀸𑀤𑀺𑀭𑀽𑀧𑀫𑀚𑁆𑀛𑀢𑁆𑀢𑀺𑀓𑀁 𑀫𑀢𑀁;

𑀢𑁂𑀯𑀻𑀲𑀢𑀺𑀯𑀺𑀥𑀁 𑀲𑁂𑀲𑀁, 𑀩𑀸𑀳𑀺𑀭𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁦𑁯. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀲𑀢𑁆𑀢 𑀧𑀜𑁆𑀘𑀥𑀸;

𑀧𑀜𑁆𑀘𑀧𑁆𑀧𑀲𑀸𑀤𑀯𑀺𑀲𑀬𑀸, 𑀧𑀜𑁆𑀘𑀸𑀭𑀫𑁆𑀫𑀡𑀦𑀸𑀫𑀓𑀸.

𑁭𑁧𑁦. 𑀏𑀓𑀯𑀻𑀲𑀢𑀺𑀯𑀺𑀥𑀁 𑀲𑁂𑀲𑀁, 𑀥𑀫𑁆𑀫𑀸𑀭𑀫𑁆𑀫𑀡𑀲𑀗𑁆𑀕𑀳𑀁;

𑀫𑀦𑁄𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀁, 𑀫𑀦𑁄𑀤𑁆𑀯𑀸𑀭𑀲𑁆𑀲 𑀕𑁄𑀘𑀭𑀁.

𑁭𑁧𑁧. 𑀧𑀲𑀸𑀤𑀸 𑀯𑀺𑀲𑀬𑀸 𑀘𑁂𑀯, 𑀧𑀜𑁆𑀘𑀓𑀸 𑀤𑁆𑀯𑁂𑀧𑀺 𑀲𑀫𑁆𑀪𑀯𑀸;

𑀤𑁆𑀯𑀸𑀤𑀲𑀸𑀧𑀺 𑀲𑀭𑀽𑀧𑁂𑀦, 𑀤𑀲𑀸𑀬𑀢𑀦𑀥𑀸𑀢𑀼𑀬𑁄.

𑁭𑁧𑁨. 𑀬𑀤𑁂𑀤𑀁 𑀧𑀦 𑀲𑀩𑁆𑀩𑀫𑁆𑀧𑀺, 𑀭𑀽𑀧𑀁 𑀲𑀧𑁆𑀧𑀝𑀺𑀖𑀁 𑀫𑀢𑀁;

𑀢𑀤𑁂𑀯𑁄𑀴𑀸𑀭𑀺𑀓𑀁 𑀦𑀸𑀫, 𑀲𑀦𑁆𑀢𑀺𑀓𑁂𑀢𑀺 𑀧𑀯𑀼𑀘𑁆𑀘𑀢𑀺.

𑁭𑁧𑁩. 𑀲𑁂𑀲𑀫𑀧𑁆𑀧𑀝𑀺𑀖𑀁 𑀦𑀸𑀫, 𑀥𑀫𑁆𑀫𑀸𑀬𑀢𑀦𑀥𑀸𑀢𑀼 𑀘;

𑀲𑀼𑀔𑀼𑀫𑀜𑁆𑀘𑁂𑀯 𑀭𑀽𑀧𑀜𑁆𑀘, 𑀭𑀽𑀧𑀁 𑀲𑁄𑀴𑀲𑀥𑀸 𑀞𑀺𑀢𑀁.

𑁭𑁧𑁪. 𑀙𑀩𑁆𑀩𑀺𑀥𑀸 𑀯𑀢𑁆𑀣𑀼𑀭𑀽𑀧𑀁 𑀢𑀼, 𑀧𑀲𑀸𑀤𑀳𑀤𑀬𑀫𑁆𑀧𑀺 𑀘;

𑀅𑀯𑀢𑁆𑀣𑀼𑀭𑀽𑀧𑀁 𑀲𑁂𑀲𑀁 𑀢𑀼, 𑀤𑁆𑀯𑀸𑀯𑀻𑀲𑀢𑀺𑀯𑀺𑀥𑀁 𑀪𑀯𑁂.

𑁭𑁧𑁫. 𑀧𑀲𑀸𑀤𑀸 𑀘𑁂𑀯 𑀯𑀺𑀜𑁆𑀜𑀢𑁆𑀢𑀺, 𑀤𑁆𑀯𑀸𑀭𑀭𑀽𑀧𑀁 𑀢𑀼 𑀲𑀢𑁆𑀢𑀥𑀸;

𑀲𑁂𑀲𑀁 𑀅𑀤𑁆𑀯𑀸𑀭𑀭𑀽𑀧𑀁 𑀢𑀼, 𑀏𑀓𑀯𑀻𑀲𑀯𑀺𑀥𑀫𑁆𑀧𑀺 𑀘.

𑁭𑁧𑁬. 𑀧𑀲𑀸𑀤𑀸 𑀪𑀸𑀯𑀬𑀼𑀕𑀴𑀁, 𑀚𑀻𑀯𑀺𑀢𑀜𑁆𑀘𑁂𑀢𑀺 𑀅𑀝𑁆𑀞𑀥𑀸;

𑀇𑀦𑁆𑀤𑁆𑀭𑀺𑀬𑀭𑀽𑀧𑀫𑀜𑁆𑀜𑀁 𑀢𑀼, 𑀯𑀻𑀲𑀥𑀸𑀦𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸.

𑁭𑁧𑁭. 𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸, 𑀪𑀽𑀢𑀭𑀽𑀧𑀦𑁆𑀢𑀺 𑀅𑀝𑁆𑀞𑀥𑀸;

𑀅𑀯𑀺𑀦𑀺𑀩𑁆𑀪𑁄𑀕𑀫𑀺𑀢𑀭𑀁, 𑀯𑀺𑀦𑀺𑀩𑁆𑀪𑁄𑀕𑀁 𑀢𑀼 𑀯𑀻𑀲𑀥𑀸.

𑁭𑁧𑁮. 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀸𑀦𑀺, 𑀲𑀤𑁆𑀤𑀯𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀦𑀺 𑀘;

𑀦𑀺𑀧𑁆𑀨𑀦𑁆𑀦𑀁 𑀅𑀝𑁆𑀞𑀸𑀭𑀲𑀥𑀸, 𑀭𑀽𑀧𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀁.

𑁭𑁧𑁯. 𑀧𑀭𑀺𑀘𑁆𑀙𑁂𑀤𑁄 𑀧𑀦𑀸𑀓𑀸𑀲𑁄, 𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀬𑁄;

𑀯𑀺𑀓𑀸𑀭𑀸 𑀮𑀓𑁆𑀔𑀡𑀸 𑀘𑁂𑀯, 𑀭𑀽𑀧𑀲𑁆𑀲𑀼𑀧𑀘𑀬𑀸𑀤𑀬𑁄.

𑁭𑁨𑁦. 𑀤𑀲𑀥𑀸𑀧𑀺 𑀅𑀦𑀺𑀧𑁆𑀨𑀦𑁆𑀦𑀁, 𑀦𑀢𑁆𑀣𑁂𑀢𑀁 𑀧𑀭𑀫𑀢𑁆𑀣𑀢𑁄;

𑀭𑀽𑀧𑀲𑁆𑀲𑁂𑀢𑀦𑁆𑀢𑀺 𑀓𑀢𑁆𑀯𑀸𑀦, 𑀭𑀽𑀧𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺.

𑁭𑁨𑁧. 𑀭𑀽𑀧𑀸𑀬𑀢𑀦𑀫𑁂𑀯𑁂𑀓𑀁, 𑀲𑀦𑀺𑀤𑀲𑁆𑀲𑀦𑀫𑀻𑀭𑀺𑀢𑀁;

𑀅𑀦𑀺𑀤𑀲𑁆𑀲𑀦𑀫𑀜𑁆𑀜𑀁 𑀢𑀼, 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀘.

𑁭𑁨𑁨. 𑀓𑀫𑁆𑀫𑀚𑀁 𑀧𑀦𑀼𑀧𑀸𑀤𑀺𑀦𑁆𑀦𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀧𑀭𑀁;

𑀢𑀺𑀯𑀺𑀥𑀁 𑀘𑀺𑀢𑁆𑀢𑀚𑀜𑁆𑀘𑁂𑀯, 𑀉𑀢𑀼𑀚𑀸𑀳𑀸𑀭𑀚𑀦𑁆𑀢𑀺 𑀘.

𑁭𑁨𑁩. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀢𑁆𑀣𑀽𑀢𑀺, 𑀘𑀓𑁆𑀔𑀼𑀥𑀸𑀢𑀼 𑀧𑀓𑀺𑀢𑁆𑀢𑀺𑀢𑀸;

𑀦 𑀯𑀢𑁆𑀣𑀼 𑀢𑀲𑁆𑀲 𑀲𑁂𑀲𑀁 𑀢𑀼, 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀁 𑀪𑀯𑁂.

𑁭𑁨𑁪. 𑀲𑁄𑀢𑀲𑀫𑁆𑀨𑀲𑁆𑀲𑀯𑀢𑁆𑀣𑀸𑀤𑀺-𑀯𑀲𑀸 𑀘 𑀤𑀼𑀯𑀺𑀥𑀸 𑀢𑀣𑀸;

𑀢𑀺𑀯𑀺𑀥𑀸 𑀘 𑀯𑀺𑀪𑀸𑀯𑁂𑀬𑁆𑀬, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁.

𑁭𑁨𑁫. 𑀲𑀦𑀺𑀤𑀲𑁆𑀲𑀦𑀭𑀽𑀧𑀜𑁆𑀘, 𑀯𑀡𑁆𑀡𑁄 𑀲𑀧𑁆𑀧𑀝𑀺𑀖𑀫𑁆𑀧𑀺 𑀘;

𑀅𑀦𑀺𑀤𑀲𑁆𑀲𑀦𑀫𑀜𑁆𑀜𑀁 𑀢𑀼, 𑀣𑀽𑀮𑀁 𑀲𑀧𑁆𑀧𑀝𑀺𑀖𑀁 𑀪𑀯𑁂.

𑁭𑁨𑁬. 𑀅𑀦𑀺𑀤𑀲𑁆𑀲𑀦𑀭𑀽𑀧𑀜𑁆𑀘, 𑀲𑁂𑀲𑀫𑀧𑁆𑀧𑀝𑀺𑀖𑀫𑁆𑀧𑀺 𑀘;

𑀲𑁄𑀴𑀲𑀸𑀢𑀺 𑀘 𑀲𑀩𑁆𑀩𑀫𑁆𑀧𑀺, 𑀭𑀽𑀧𑀁 𑀢𑀺𑀯𑀺𑀥𑀫𑀼𑀤𑁆𑀤𑀺𑀲𑁂.

𑁭𑁨𑁭. 𑀅𑀧𑀢𑁆𑀢𑀕𑀸𑀳𑀓𑀁 𑀦𑀸𑀫, 𑀘𑀓𑁆𑀔𑀼𑀲𑁄𑀢𑀤𑁆𑀯𑀬𑀁 𑀧𑀦;

𑀲𑀫𑁆𑀧𑀢𑁆𑀢𑀕𑀸𑀳𑀓𑀁 𑀦𑀸𑀫, 𑀖𑀸𑀦𑀸𑀤𑀺𑀢𑁆𑀢𑀬𑀫𑀻𑀭𑀺𑀢𑀁.

𑁭𑁨𑁮. 𑀅𑀕𑀸𑀳𑀓𑀫𑀢𑁄 𑀲𑁂𑀲𑀁, 𑀢𑁂𑀯𑀻𑀲𑀢𑀺𑀯𑀺𑀥𑀁 𑀪𑀯𑁂;

𑀓𑀺𑀜𑁆𑀘𑀺 𑀲𑀸𑀭𑀫𑁆𑀫𑀡𑀁 𑀦𑀸𑀫, 𑀦 𑀕𑀬𑁆𑀳𑀢𑀻𑀢𑀺 𑀲𑀩𑁆𑀩𑀣𑀸.

𑁭𑁨𑁯. 𑀉𑀧𑀸𑀤𑀸 𑀅𑀚𑁆𑀛𑀢𑁆𑀢𑀺𑀓𑀁 𑀭𑀽𑀧𑀁, 𑀉𑀧𑀸𑀤𑀸 𑀩𑀸𑀳𑀺𑀭𑀁 𑀢𑀣𑀸;

𑀦𑁄𑀧𑀸𑀤𑀸 𑀩𑀸𑀳𑀺𑀭𑀜𑁆𑀘𑁂𑀢𑀺, 𑀏𑀯𑀫𑁆𑀧𑀺 𑀢𑀺𑀯𑀺𑀥𑀁 𑀪𑀯𑁂.

𑁭𑁩𑁦. 𑀅𑀚𑁆𑀛𑀢𑁆𑀢𑀺𑀓𑀫𑀼𑀧𑀸𑀤𑀺𑀦𑁆𑀦𑀁, 𑀩𑀸𑀳𑀺𑀭𑀜𑁆𑀘 𑀢𑀣𑀸𑀧𑀭𑀁;

𑀅𑀦𑀼𑀧𑀸𑀤𑀺𑀦𑁆𑀦𑀓𑀜𑁆𑀘𑁂𑀢𑀺, 𑀏𑀯𑀫𑀸𑀤𑀺𑀯𑀲𑀸𑀧𑀺 𑀘.

𑁭𑁩𑁧. 𑀤𑀺𑀝𑁆𑀞𑀁 𑀭𑀽𑀧𑀁 𑀲𑀼𑀢𑀁 𑀲𑀤𑁆𑀤𑁄, 𑀕𑀦𑁆𑀥𑀸𑀤𑀺 𑀢𑀺𑀯𑀺𑀥𑀁 𑀫𑀼𑀢𑀁;

𑀯𑀺𑀜𑁆𑀜𑀸𑀢𑀫𑀜𑁆𑀜𑀯𑀺𑀜𑁆𑀜𑁂𑀬𑁆𑀬𑀁, 𑀫𑀦𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀁.

𑁭𑁩𑁨. 𑀭𑀽𑀧𑀭𑀽𑀧𑀁 𑀧𑀭𑀺𑀘𑁆𑀙𑁂𑀤𑁄, 𑀯𑀺𑀓𑀸𑀭𑁄 𑀮𑀓𑁆𑀔𑀡𑀁 𑀓𑀫𑀸;

𑀅𑀝𑁆𑀞𑀸𑀭𑀲𑁂𑀓𑀓𑀁 𑀧𑀜𑁆𑀘, 𑀘𑀢𑀼𑀓𑁆𑀓𑀦𑁆𑀢𑀺 𑀘 𑀢𑀁 𑀢𑀣𑀸.

𑁭𑁩𑁩. 𑀤𑁆𑀯𑀸𑀭𑀜𑁆𑀘 𑀳𑁄𑀢𑀺 𑀯𑀢𑁆𑀣𑀼 𑀘, 𑀦 𑀯𑀢𑁆𑀣𑀼 𑀤𑁆𑀯𑀸𑀭𑀫𑁂𑀯 𑀢𑀼;

𑀦 𑀤𑁆𑀯𑀸𑀭𑀁 𑀯𑀢𑁆𑀣𑀼𑀫𑁂𑀯𑀸𑀣, 𑀦𑁄𑀪𑀬𑀦𑁆𑀢𑀺 𑀘 𑀦𑀺𑀤𑁆𑀤𑀺𑀲𑁂.

𑁭𑁩𑁪. 𑀉𑀧𑀸𑀤𑀸 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀢𑀣𑀸;

𑀦𑁄𑀧𑀸𑀤𑀸 𑀤𑀼𑀯𑀺𑀥𑀜𑁆𑀘𑁂𑀢𑀺, 𑀘𑀢𑀼𑀤𑁆𑀥𑁂𑀯𑀫𑁆𑀧𑀺 𑀤𑁂𑀲𑀺𑀢𑀁.

𑁭𑁩𑁫. 𑀲𑀧𑁆𑀧𑀝𑀺𑀕𑁆𑀖𑀫𑀼𑀧𑀸𑀤𑀸 𑀘, 𑀭𑀽𑀧𑀫𑀧𑁆𑀧𑀝𑀺𑀖𑀁 𑀢𑀣𑀸;

𑀦𑁄𑀧𑀸𑀤𑀸 𑀤𑀼𑀯𑀺𑀥𑀜𑁆𑀘𑁂𑀢𑀺, 𑀘𑀢𑀼𑀤𑁆𑀥𑀸 𑀏𑀯𑀫𑀸𑀤𑀺𑀢𑁄.

𑁭𑁩𑁬. 𑀏𑀓𑀸𑀤𑀲𑁂𑀓𑀚𑀭𑀽𑀧𑀁, 𑀳𑀤𑀬𑀺𑀦𑁆𑀤𑁆𑀭𑀺𑀬𑀦𑀯𑀓𑀁;

𑀓𑀫𑁆𑀫𑀚𑀁 𑀘𑀺𑀢𑁆𑀢𑀚𑀜𑁆𑀘𑁂𑀯, 𑀢𑀣𑀸 𑀯𑀺𑀜𑁆𑀜𑀢𑁆𑀢𑀺𑀓𑀁 𑀤𑁆𑀯𑀬𑀁.

𑁭𑁩𑁭. 𑀲𑀤𑁆𑀤𑁄 𑀘𑀺𑀢𑁆𑀢𑁄𑀢𑀼𑀚𑁄 𑀢𑀲𑁆𑀫𑀸, 𑀭𑀽𑀧𑀫𑁂𑀓𑀁 𑀤𑁆𑀯𑀺𑀚𑀁 𑀫𑀢𑀁;

𑀘𑀺𑀢𑁆𑀢𑁄𑀢𑀸𑀳𑀸𑀭𑀲𑀫𑁆𑀪𑀽𑀢𑀁, 𑀮𑀳𑀼𑀢𑀸𑀤𑀺𑀢𑁆𑀢𑀬𑀁 𑀢𑀺𑀚𑀁.

𑁭𑁩𑁮. 𑀦𑀯𑀸𑀓𑀸𑀲𑀸𑀯𑀺𑀦𑀺𑀩𑁆𑀪𑁄𑀕𑀸, 𑀓𑀫𑁆𑀫𑀸𑀤𑀺𑀘𑀢𑀼𑀲𑀫𑁆𑀪𑀯𑀸;

𑀅𑀣 𑀮𑀓𑁆𑀔𑀡𑀭𑀽𑀧𑀦𑁆𑀢𑀺, 𑀭𑀽𑀧𑀫𑁂𑀯𑀁 𑀢𑀼 𑀧𑀜𑁆𑀘𑀥𑀸.

𑁭𑁩𑁯. 𑀦𑀯𑀸𑀓𑀸𑀲𑀸𑀯𑀺𑀦𑀺𑀩𑁆𑀪𑁄𑀕𑀸, 𑀦𑀯 𑀯𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀦𑀺 𑀘;

𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀁, 𑀓𑀫𑁆𑀫𑀚𑀁 𑀳𑁄𑀢𑀺 𑀧𑀺𑀡𑁆𑀟𑀺𑀢𑀁.

𑁭𑁪𑁦. 𑀲𑀤𑁆𑀤𑀸𑀓𑀸𑀲𑀸𑀯𑀺𑀦𑀺𑀩𑁆𑀪𑁄𑀕𑀸, 𑀯𑀺𑀜𑁆𑀜𑀢𑁆𑀢𑀺𑀮𑀳𑀼𑀢𑀸𑀤𑀬𑁄;

𑀧𑀜𑁆𑀘𑀤𑀲𑀯𑀺𑀥𑀁 𑀭𑀽𑀧𑀁, 𑀘𑀺𑀢𑁆𑀢𑀲𑀫𑁆𑀪𑀯𑀫𑀼𑀤𑁆𑀤𑀺𑀲𑁂.

𑁭𑁪𑁧. 𑀲𑀤𑁆𑀤𑀸𑀓𑀸𑀲𑀸𑀯𑀺𑀦𑀺𑀩𑁆𑀪𑁄𑀕𑀸, 𑀮𑀳𑀼𑀢𑀸𑀤𑀺𑀢𑁆𑀢𑀬𑀦𑁆𑀢𑀺 𑀘;

𑀉𑀢𑀼𑀲𑀫𑁆𑀪𑀯𑀫𑀻𑀭𑁂𑀦𑁆𑀢𑀺, 𑀭𑀽𑀧𑀁 𑀢𑁂𑀭𑀲𑀥𑀸 𑀞𑀺𑀢𑀁.

𑁭𑁪𑁨. 𑀧𑀭𑀺𑀘𑁆𑀙𑁂𑀤𑀸𑀯𑀺𑀦𑀺𑀩𑁆𑀪𑁄𑀕𑀸, 𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀘;

𑀏𑀯𑀫𑀸𑀳𑀸𑀭𑀚𑀁 𑀦𑀸𑀫, 𑀭𑀽𑀧𑀁 𑀤𑁆𑀯𑀸𑀤𑀲𑀥𑀸 𑀞𑀺𑀢𑀁.

𑁭𑁪𑁩. 𑀚𑀸𑀢𑀺 𑀚𑀭𑀸 𑀘 𑀫𑀭𑀡𑀁, 𑀦 𑀓𑀼𑀢𑁄𑀘𑀺𑀧𑀺 𑀚𑀸𑀬𑀢𑀺;

𑀏𑀯𑀫𑁆𑀧𑀺 𑀧𑀜𑁆𑀘𑀥𑀸 𑀳𑁄𑀢𑀺, 𑀭𑀽𑀧𑀚𑀸𑀢𑀺𑀯𑀺𑀪𑀸𑀕𑀢𑁄.

𑁭𑁪𑁪. 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀁 𑀓𑀫𑁆𑀫𑀁, 𑀓𑀸𑀫𑀭𑀽𑀧𑀯𑀯𑀢𑁆𑀣𑀺𑀢𑀁;

𑀚𑀦𑁂𑀢𑀺 𑀓𑀫𑁆𑀫𑀚𑀁 𑀭𑀽𑀧𑀁, 𑀓𑀸𑀫𑀭𑀽𑀧𑀪𑀯𑀤𑁆𑀯𑀬𑁂.

𑁭𑁪𑁫. 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀸𑀭𑀼𑀧𑁆𑀧-𑀯𑀺𑀧𑀸𑀓𑀸 𑀲𑀩𑁆𑀩𑀲𑀦𑁆𑀥𑀺𑀬𑁄;

𑀘𑀼𑀢𑀺 𑀔𑀻𑀡𑀸𑀲𑀯𑀲𑁆𑀲𑁂𑀢𑀺, 𑀲𑁄𑀴𑀲𑁂𑀢𑁂 𑀯𑀺𑀯𑀚𑁆𑀚𑀬𑁂.

𑁭𑁪𑁬. 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀲𑀸𑀦𑀺, 𑀘𑀺𑀢𑁆𑀢𑀸𑀦𑀺𑀫𑀸𑀦𑀺 𑀲𑀫𑁆𑀪𑀯𑀸;

𑀚𑀦𑁂𑀦𑁆𑀢𑀺 𑀘𑀺𑀢𑁆𑀢𑀚𑀁 𑀭𑀽𑀧𑀁, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁.

𑁭𑁪𑁭. 𑀚𑀦𑁂𑀪𑀺 𑀉𑀢𑀼𑀚𑀁 𑀭𑀽𑀧𑀁, 𑀢𑁂𑀚𑁄𑀥𑀸𑀢𑀼 𑀪𑀯𑀤𑁆𑀯𑀬𑁂;

𑀓𑀸𑀫𑀪𑀽𑀫𑀺𑀬𑀫𑁄𑀚𑀸 𑀢𑀼, 𑀚𑀦𑁂𑀢𑀸𑀳𑀸𑀭𑀚𑀁 𑀢𑀣𑀸.

𑁭𑁪𑁮. 𑀓𑀫𑁆𑀫𑀁 𑀚𑀦𑁂𑀢𑀺 𑀭𑀽𑀧𑀸𑀦𑀺, 𑀅𑀢𑁆𑀢𑀚𑀸𑀦𑀺 𑀔𑀡𑁂 𑀔𑀡𑁂;

𑀘𑀺𑀢𑁆𑀢𑀫𑀼𑀧𑁆𑀧𑀸𑀤𑀓𑀸𑀮𑀫𑁆𑀳𑀺, 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀁 𑀧𑀭𑀁.

𑁭𑁪𑁯. 𑀉𑀢𑀼𑀲𑀫𑁆𑀪𑀯𑀫𑀻𑀭𑁂𑀦𑁆𑀢𑀺, 𑀭𑀽𑀧𑀁 𑀢𑁂𑀭𑀲𑀥𑀸 𑀞𑀺𑀢𑀁;

𑀧𑀭𑀺𑀘𑁆𑀙𑁂𑀤𑀸𑀯𑀺𑀦𑀺𑀩𑁆𑀪𑁄𑀕𑀸, 𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑀺 𑀘.

𑁭𑁫𑁦. 𑀲𑀦𑁆𑀥𑀺𑀬𑀫𑁆𑀧𑀺 𑀓𑀫𑁆𑀫𑀚𑀁 𑀢𑀼, 𑀧𑀯𑀢𑁆𑀢𑁂𑀧𑀺 𑀘 𑀲𑀫𑁆𑀪𑀯𑀸;

𑀚𑀦𑁂𑀢𑀺 𑀭𑀽𑀧𑀁 𑀲𑁂𑀲𑀸𑀦𑀺, 𑀧𑀯𑀢𑁆𑀢𑁂, 𑀦 𑀢𑀼 𑀲𑀦𑁆𑀥𑀺𑀬𑀁.

𑁭𑁫𑁧. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀦𑁆𑀢𑀸𑀦𑁂, 𑀓𑀫𑁆𑀫𑀸𑀤𑀺 𑀢𑀺𑀯𑀺𑀥𑀫𑁆𑀧𑀺 𑀘;

𑀚𑀦𑁂𑀢𑀺 𑀭𑀽𑀧𑀁 𑀫𑀢𑀓𑁂, 𑀩𑀸𑀳𑀺𑀭𑁂 𑀢𑀼 𑀬𑀣𑀸𑀭𑀳𑀁.

𑁭𑁫𑁨. 𑀇𑀢𑀺 𑀓𑀫𑁆𑀫𑀸𑀤𑀬𑁄 𑀭𑀽𑀧𑀁, 𑀚𑀦𑁂𑀦𑁆𑀢𑀺 𑀘 𑀬𑀣𑀸𑀲𑀓𑀁;

𑀲𑁂𑀲𑀸𑀦𑀫𑁆𑀧𑀺 𑀘 𑀭𑀽𑀧𑀸𑀦𑀁, 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀫𑁆𑀪𑀯𑀸.

𑁭𑁫𑁩. 𑀇𑀢𑀺 𑀭𑀽𑀧𑀯𑀺𑀪𑀸𑀕𑀜𑁆𑀘, 𑀚𑀸𑀢𑀺𑀪𑁂𑀤𑀜𑁆𑀘 𑀲𑀫𑁆𑀪𑀯𑀸;

𑀚𑀦𑀓𑀸𑀤𑀺𑀧𑁆𑀧𑀪𑁂𑀤𑀜𑁆𑀘, 𑀭𑀽𑀧𑀸𑀦𑀁 𑀢𑀢𑁆𑀣 𑀤𑀻𑀧𑀬𑁂𑀢𑀺.

𑀇𑀢𑀺 𑀭𑀽𑀧𑀯𑀺𑀪𑀸𑀕𑁂 𑀧𑀪𑁂𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀽𑀦𑀯𑀻𑀲𑀢𑀺𑀫𑁄 𑀧𑀭𑀺𑀘𑁆𑀙𑁂𑀤𑁄.