𑁧𑁮. 𑀲𑀭𑀽𑀧𑀓𑀣𑀸

𑁬𑁫𑁩. 𑀢𑁂𑀧𑀜𑁆𑀜𑀸𑀲 𑀧𑀦𑀺𑀘𑁆𑀘𑁂𑀯𑀁, 𑀦𑀸𑀫𑀥𑀫𑁆𑀫𑀸 𑀧𑀓𑀸𑀲𑀺𑀢𑀸;

𑀅𑀝𑁆𑀞𑀯𑀻𑀲𑀯𑀺𑀥𑀁 𑀤𑀸𑀦𑀺, 𑀭𑀽𑀧𑀁 𑀦𑀸𑀫 𑀓𑀣𑀻𑀬𑀢𑀺.

𑁬𑁫𑁪. 𑀧𑀣𑀯𑀸𑀧𑁄 𑀘 𑀢𑁂𑀚𑁄 𑀘, 𑀯𑀸𑀬𑁄 𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑁄;

𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸, 𑀓𑀸𑀬𑁄𑀢𑀺 𑀧𑀦 𑀧𑀜𑁆𑀘 𑀘.

𑁬𑁫𑁫. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸, 𑀘𑀢𑁆𑀢𑀸𑀭𑁄 𑀘 𑀅𑀣𑀸𑀧𑀭𑀁;

𑀇𑀢𑁆𑀣𑀺𑀧𑀼𑀫𑁆𑀪𑀸𑀯𑀬𑀼𑀕𑀴𑀁, 𑀚𑀻𑀯𑀺𑀢𑀁 𑀳𑀤𑀬𑀫𑁆𑀧𑀺 𑀘.

𑁬𑁫𑁬. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀘𑁂𑀯𑀸𑀣, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀘 𑀤𑁆𑀯𑀬𑀁;

𑀆𑀓𑀸𑀲𑀥𑀸𑀢𑀼 𑀭𑀽𑀧𑀲𑁆𑀲, 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀢𑀲𑁆𑀲.

𑁬𑁫𑁭. 𑀓𑀫𑁆𑀫𑀜𑁆𑀜𑀢𑀸 𑀉𑀧𑀘𑀬𑁄, 𑀲𑀦𑁆𑀢𑀢𑀺 𑀚𑀭𑀢𑀸 𑀧𑀦;

𑀅𑀦𑀺𑀘𑁆𑀘𑀢𑀸 𑀘 𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀢𑀺 𑀲𑀩𑁆𑀩𑀣𑀸.

𑁬𑁫𑁮. 𑀅𑀝𑁆𑀞𑀯𑀻𑀲𑀯𑀺𑀥𑀁 𑀳𑁄𑀢𑀺, 𑀭𑀽𑀧𑀫𑁂𑀢𑀁 𑀲𑀭𑀽𑀧𑀢𑁄;

𑀢𑀲𑁆𑀲 𑀮𑀓𑁆𑀔𑀡𑀪𑁂𑀤𑁂𑀦, 𑀲𑀪𑀸𑀯𑀜𑁆𑀘 𑀯𑀺𑀪𑀸𑀯𑀬𑁂.

𑁬𑁫𑁯. 𑀲𑀦𑁆𑀥𑀸𑀭𑀡𑀁 𑀢𑀼 𑀧𑀣𑀯𑀻𑀥𑀸𑀢𑀼 𑀓𑀓𑁆𑀔𑀴𑀮𑀓𑁆𑀔𑀡𑀸;

𑀆𑀩𑀦𑁆𑀥𑀦𑀫𑀸𑀧𑁄𑀥𑀸𑀢𑀼, 𑀆𑀧𑀕𑁆𑀖𑀭𑀡𑀮𑀓𑁆𑀔𑀡𑀸.

𑁬𑁬𑁦. 𑀧𑀭𑀺𑀧𑀸𑀘𑀦𑀢𑀸 𑀢𑁂𑀚𑁄𑀥𑀸𑀢𑀼 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀸;

𑀲𑀫𑀼𑀤𑀻𑀭𑀡𑀢𑀸 𑀯𑀸𑀬𑁄𑀥𑀸𑀢𑀼 𑀯𑀺𑀢𑁆𑀣𑀫𑁆𑀪𑀮𑀓𑁆𑀔𑀡𑀸.

𑁬𑁬𑁧. 𑀲𑀩𑁆𑀩𑀢𑁆𑀣𑀸𑀯𑀺𑀦𑀺𑀪𑀼𑀢𑁆𑀢𑀸𑀧𑀺, 𑀅𑀲𑀫𑁆𑀫𑀺𑀲𑁆𑀲𑀓𑀮𑀓𑁆𑀔𑀡𑀸;

𑀢𑀁𑀢𑀁𑀪𑀸𑀯𑀲𑀫𑀼𑀲𑁆𑀲𑀦𑁆𑀦𑀲𑀫𑁆𑀪𑀸𑀭𑁂𑀲𑀼𑀧𑀮𑀓𑁆𑀔𑀺𑀢𑀸.

𑁬𑁬𑁨. 𑀅𑀜𑁆𑀜𑀫𑀜𑁆𑀜𑁂𑀦𑀼𑀧𑀢𑁆𑀣𑀤𑁆𑀥𑀸, 𑀲𑁂𑀲𑀭𑀽𑀧𑀲𑁆𑀲 𑀦𑀺𑀲𑁆𑀲𑀬𑀸;

𑀘𑀢𑀼𑀥𑁂𑀯𑀁 𑀓𑀮𑀸𑀧𑁂𑀲𑀼, 𑀫𑀳𑀸𑀪𑀽𑀢𑀸 𑀧𑀯𑀢𑁆𑀢𑀭𑁂.

𑁬𑁬𑁩. 𑀘𑀓𑁆𑀔𑀼 𑀲𑀫𑁆𑀪𑀸𑀭𑀘𑀓𑁆𑀔𑀼𑀫𑁆𑀳𑀺, 𑀲𑀢𑁆𑀢𑀓𑁆𑀔𑀺𑀧𑀝𑀮𑁄𑀘𑀺𑀢𑁂;

𑀓𑀡𑁆𑀳𑀫𑀡𑁆𑀟𑀮𑀫𑀚𑁆𑀛𑀫𑁆𑀳𑀺, 𑀧𑀲𑀸𑀤𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁬𑁬𑁪. 𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀅𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀜𑁆𑀘𑁂𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫𑀁.

𑁬𑁬𑁫. 𑀲𑁄𑀢𑀁 𑀲𑁄𑀢𑀩𑀺𑀮𑀲𑁆𑀲𑀦𑁆𑀢𑁄,

𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀢𑀣𑀸;

𑀅𑀗𑁆𑀕𑀼𑀮𑀺𑀯𑁂𑀥𑀦𑀸𑀓𑀸𑀭𑁂,

𑀧𑀲𑀸𑀤𑁄𑀢𑀺 𑀧𑀓𑀸𑀲𑀺𑀢𑁄.

𑁬𑁬𑁬. 𑀅𑀦𑁆𑀢𑁄 𑀅𑀚𑀧𑀤𑀝𑁆𑀞𑀸𑀦𑁂, 𑀖𑀸𑀦𑀁 𑀖𑀸𑀦𑀩𑀺𑀮𑁂 𑀞𑀺𑀢𑀁;

𑀚𑀺𑀯𑁆𑀳𑀸 𑀚𑀺𑀯𑁆𑀳𑀸𑀬 𑀫𑀚𑁆𑀛𑀫𑁆𑀳𑀺, 𑀉𑀧𑁆𑀧𑀮𑀸𑀓𑀸𑀭𑀲𑀦𑁆𑀦𑀺𑀪𑁂.

𑁬𑁬𑁭. 𑀇𑀘𑁆𑀘𑁂𑀯𑀁 𑀧𑀦 𑀘𑀢𑁆𑀢𑀸𑀭𑁄, 𑀢𑀁𑀢𑀁𑀤𑁂𑀲𑀯𑀯𑀢𑁆𑀣𑀺𑀢𑀸;

𑀓𑀸𑀬𑀧𑁆𑀧𑀲𑀸𑀤𑁄𑀧𑀸𑀤𑀺𑀦𑁆𑀦𑁂, 𑀲𑀩𑁆𑀩𑀓𑁂𑀢𑀺 𑀬𑀣𑀸𑀓𑁆𑀓𑀫𑀁.

𑁬𑁬𑁮. 𑀭𑀽𑀧𑀸𑀤𑁆𑀬𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀸𑀦𑀁 𑀯𑀸 𑀬𑀣𑀸𑀭𑀳𑀁;

𑀤𑀝𑁆𑀞𑀼𑀓𑀸𑀫𑀦𑀺𑀤𑀸𑀦𑀸𑀤𑀺𑀓𑀫𑁆𑀫𑀪𑀽𑀢𑀸𑀦𑀫𑁂𑀯 𑀯𑀸.

𑁬𑁬𑁯. 𑀧𑀲𑀸𑀤𑀮𑀓𑁆𑀔𑀡𑀸 𑀪𑀽𑀢𑀭𑀽𑀧𑀸𑀦𑀁 𑀪𑀽𑀢𑀦𑀺𑀲𑁆𑀲𑀺𑀢𑀸;

𑀓𑀧𑁆𑀧𑀸𑀲𑀧𑀝𑀮𑀲𑁆𑀦𑁂𑀳𑀲𑀦𑁆𑀦𑀺𑀪𑀸𑀢𑀺 𑀘 𑀯𑀡𑁆𑀡𑀺𑀢𑀸.

𑁬𑁭𑁦. 𑀧𑀜𑁆𑀘𑀸𑀧𑀺 𑀚𑀻𑀯𑀺𑀢𑀸𑀭𑀓𑁆𑀔𑀸, 𑀭𑀽𑀧𑀸𑀤𑀺𑀧𑀭𑀺𑀯𑀸𑀭𑀺𑀢𑀸;

𑀥𑀻𑀢𑀭𑀸𑀯 𑀓𑀼𑀫𑀸𑀭𑀸𑀯, 𑀓𑀮𑀸𑀧𑀦𑁆𑀢𑀭𑀯𑀼𑀢𑁆𑀢𑀺𑀦𑁄.

𑁬𑁭𑁧. 𑀭𑀽𑀧𑀁 𑀦𑀺𑀪𑀸𑀲𑁄 𑀪𑀽𑀢𑀸𑀦𑀁, 𑀲𑀤𑁆𑀤𑁄 𑀦𑀺𑀕𑁆𑀖𑁄𑀲𑀦𑀁 𑀢𑀣𑀸;

𑀕𑀦𑁆𑀥𑁄 𑀘 𑀕𑀦𑁆𑀥𑀦𑀁 𑀢𑀢𑁆𑀣, 𑀭𑀲𑁄 𑀘 𑀭𑀲𑀦𑀻𑀬𑀢𑀸.

𑁬𑁭𑁨. 𑀪𑀽𑀢𑀢𑁆𑀢𑀬𑀜𑁆𑀘 𑀨𑁄𑀝𑁆𑀞𑀩𑁆𑀩𑀁, 𑀆𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀁;

𑀲𑀤𑁆𑀤𑁄 𑀅𑀦𑀺𑀬𑀢𑁄 𑀢𑀢𑁆𑀣, 𑀢𑀤𑀜𑁆𑀜𑁂 𑀲𑀳𑀯𑀼𑀢𑁆𑀢𑀺𑀦𑁄.

𑁬𑁭𑁩. 𑀘𑀓𑁆𑀔𑀸𑀤𑀺𑀧𑀝𑀺𑀳𑀦𑀦𑀮𑀓𑁆𑀔𑀡𑀸 𑀢𑀼 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑁂𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀯𑀺𑀲𑀬𑀸 𑀫𑀢𑀸.

𑁬𑁭𑁪. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀦𑀺𑀢𑁆𑀣𑀺𑀢𑁆𑀢𑀁, 𑀇𑀢𑁆𑀣𑀺𑀪𑀸𑀯𑁄𑀢𑀺 𑀤𑁂𑀲𑀺𑀢𑁄;

𑀧𑀼𑀭𑀺𑀲𑀢𑁆𑀢𑀁 𑀢𑀣𑀸𑀪𑀸𑀯𑁄, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬 𑀦𑀸𑀫𑀓𑁄.

𑁬𑁭𑁫. 𑀢𑀁 𑀤𑁆𑀯𑀬𑀁 𑀧𑀦𑀼𑀧𑀸𑀤𑀺𑀦𑁆𑀦𑁂, 𑀓𑀸𑀬𑁂 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺;

𑀓𑀮𑀸𑀧𑀦𑁆𑀢𑀭𑀪𑀺𑀦𑁆𑀦𑀜𑁆𑀘, 𑀪𑀺𑀦𑁆𑀦𑀲𑀦𑁆𑀢𑀸𑀦𑀯𑀢𑁆𑀢𑀺 𑀘.

𑁬𑁭𑁬. 𑀭𑀽𑀧𑀸𑀦𑀁 𑀓𑀫𑁆𑀫𑀚𑀸𑀢𑀸𑀦𑀁, 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑀁;

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀽𑀧𑀦𑁆𑀢𑀺, 𑀆𑀬𑀼 𑀦𑀸𑀫 𑀧𑀯𑀼𑀘𑁆𑀘𑀢𑀺.

𑁬𑁭𑁭. 𑀫𑀦𑁄𑀥𑀸𑀢𑀼𑀬𑀸 𑀘 𑀢𑀣𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸;

𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀯𑀢𑁆𑀣𑀼𑀭𑀽𑀧𑀁 𑀳𑀤𑀬𑀦𑀺𑀲𑁆𑀲𑀺𑀢𑀁.

𑁬𑁭𑁮. 𑀫𑀚𑁆𑀛𑁂 𑀳𑀤𑀬𑀓𑁄𑀲𑀫𑁆𑀳𑀺, 𑀅𑀟𑁆𑀠𑀧𑁆𑀧𑀲𑀢𑀮𑁄𑀳𑀺𑀢𑁂;

𑀪𑀽𑀢𑀭𑀽𑀧𑀫𑀼𑀧𑀸𑀤𑀸𑀬, 𑀘𑀓𑁆𑀔𑀸𑀤𑀺 𑀯𑀺𑀬 𑀯𑀢𑁆𑀢𑀢𑀺.

𑁬𑁭𑁯. 𑀆𑀓𑀸𑀲𑀥𑀸𑀢𑀼 𑀭𑀽𑀧𑀸𑀦𑀁, 𑀧𑀭𑀺𑀘𑁆𑀙𑁂𑀤𑀓𑀮𑀓𑁆𑀔𑀡𑀸;

𑀢𑀁𑀢𑀁𑀭𑀽𑀧𑀓𑀮𑀸𑀧𑀸𑀦𑀁, 𑀧𑀭𑀺𑀬𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

𑁬𑁮𑁦. 𑀘𑀺𑀢𑁆𑀢𑀁 𑀲𑀳𑀚𑀭𑀽𑀧𑀸𑀦𑀁, 𑀓𑀸𑀬𑀲𑁆𑀲 𑀕𑀫𑀦𑀸𑀤𑀺𑀲𑀼;

𑀲𑀦𑁆𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀲𑁆𑀲 𑀢𑀼 𑀧𑀘𑁆𑀘𑀬𑁄.

𑁬𑁮𑁧. 𑀯𑀸𑀬𑁄𑀥𑀸𑀢𑀼𑀯𑀺𑀓𑀸𑀭𑁄𑀬𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀦𑀸𑀫𑀓𑁄;

𑀯𑀸𑀬𑁄𑀥𑀸𑀢𑀸𑀥𑀺𑀓𑀸𑀦𑀁 𑀢𑀼, 𑀪𑀽𑀢𑀸𑀦𑀫𑀺𑀢𑀺 𑀓𑁂𑀘𑀦𑀸.

𑁬𑁮𑁨. 𑀢𑀣𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀦𑁄, 𑀯𑀘𑀻𑀖𑁄𑀲𑀧𑁆𑀧𑀯𑀢𑁆𑀢𑀺𑀬𑀁;

𑀉𑀧𑀸𑀤𑀺𑀦𑁆𑀦𑀭𑀽𑀧𑀓𑀸𑀬𑀖𑀝𑁆𑀝𑀦𑀲𑁆𑀲 𑀢𑀼 𑀧𑀘𑁆𑀘𑀬𑁄.

𑁬𑁮𑁩. 𑀧𑀣𑀯𑀻𑀥𑀸𑀢𑀼𑀯𑀺𑀓𑀸𑀭𑁄𑀬𑀁, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀦𑀸𑀫𑀓𑁄;

𑀧𑀣𑀯𑀻𑀥𑀸𑀢𑀸𑀥𑀺𑀓𑀸𑀦𑀁 𑀢𑀼, 𑀪𑀽𑀢𑀸𑀦𑀫𑀺𑀢𑀺 𑀓𑁂𑀘𑀦𑀸.

𑁬𑁮𑁪. 𑀤𑁆𑀯𑁂𑀧𑀺 𑀓𑀸𑀬𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀪𑀽𑀢𑀸 𑀬𑀣𑀸𑀓𑁆𑀓𑀫𑀁;

𑀢𑁂 𑀧𑀦 𑀖𑀝𑁆𑀝𑀦𑀸𑀳𑁂𑀢𑀼-𑀯𑀺𑀓𑀸𑀭𑀸𑀓𑀸𑀭𑀮𑀓𑁆𑀔𑀡𑀸.

𑁬𑁮𑁫. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀘 𑀯𑀺𑀘𑀺𑀦𑁆𑀢𑀺𑀢𑀁;

𑀲𑀬𑀜𑁆𑀘 𑀯𑀺𑀜𑁆𑀜𑀸𑀬𑀢𑀻𑀢𑀺, 𑀯𑀺𑀜𑁆𑀜𑀢𑁆𑀢𑀻𑀢𑀺 𑀧𑀓𑀺𑀢𑁆𑀢𑀺𑀢𑀸.

𑁬𑁮𑁬. 𑀮𑀳𑀼𑀢𑀸 𑀧𑀦 𑀭𑀽𑀧𑀸𑀦𑀁, 𑀅𑀤𑀦𑁆𑀥𑀸𑀓𑀸𑀭𑀮𑀓𑁆𑀔𑀡𑀸;

𑀫𑀼𑀤𑀼𑀢𑀸𑀧𑀺 𑀘 𑀭𑀽𑀧𑀸𑀦𑀁, 𑀫𑀤𑁆𑀤𑀯𑀸𑀓𑀸𑀭𑀮𑀓𑁆𑀔𑀡𑀸.

𑁬𑁮𑁭. 𑀓𑀫𑁆𑀫𑀜𑁆𑀜𑀢𑀸 𑀘 𑀭𑀽𑀧𑀸𑀦𑀁, 𑀬𑁄𑀕𑁆𑀕𑀢𑀸𑀓𑀸𑀭𑀮𑀓𑁆𑀔𑀡𑀸;

𑀕𑀸𑀭𑀯𑀣𑀤𑁆𑀥𑀢𑀸 𑀬𑁄𑀕𑁆𑀕𑀧𑀝𑀺𑀧𑀓𑁆𑀔𑀸 𑀬𑀣𑀸𑀓𑁆𑀓𑀫𑀁.

𑁬𑁮𑁮. 𑀲𑀧𑁆𑀧𑀸𑀬𑀫𑀼𑀢𑀼𑀫𑀸𑀳𑀸𑀭𑀁, 𑀮𑀪𑀺𑀢𑁆𑀯𑀸 𑀘𑀺𑀢𑁆𑀢𑀲𑀫𑁆𑀧𑀤𑀁;

𑀮𑀳𑀽 𑀫𑀼𑀤𑀼 𑀘 𑀓𑀫𑁆𑀫𑀜𑁆𑀜𑀁, 𑀬𑀤𑀸 𑀭𑀽𑀧𑀁 𑀧𑀯𑀢𑁆𑀢𑀢𑀺.

𑁬𑁮𑁯. 𑀢𑀣𑀸𑀧𑀯𑀢𑁆𑀢𑀭𑀽𑀧𑀲𑁆𑀲, 𑀧𑀯𑀢𑁆𑀢𑀸𑀓𑀸𑀭𑀪𑁂𑀤𑀺𑀢𑀁;

𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑁂𑀢𑀁, 𑀲𑀳𑀯𑀼𑀢𑁆𑀢𑀺 𑀢𑀤𑀸 𑀪𑀯𑁂.

𑁬𑁯𑁦. 𑀲𑀧𑁆𑀧𑀸𑀬𑀁 𑀧𑀝𑀺𑀯𑁂𑀥𑀸𑀬, 𑀧𑀝𑀺𑀧𑀢𑁆𑀢𑀼𑀧𑀓𑀸𑀭𑀺𑀢𑀸;

𑀲𑀸𑀓𑀸𑀭𑀸 𑀭𑀽𑀧𑀲𑀫𑁆𑀧𑀢𑁆𑀢𑀺, 𑀧𑀜𑁆𑀜𑀢𑁆𑀢𑀸𑀯 𑀫𑀳𑁂𑀲𑀺𑀦𑀸.

𑁬𑁯𑁧. 𑀭𑀽𑀧𑀲𑁆𑀲𑁄𑀧𑀘𑀬𑁄 𑀦𑀸𑀫, 𑀭𑀽𑀧𑀲𑁆𑀲𑀸𑀘𑀬𑀮𑀓𑁆𑀔𑀡𑁄;

𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧𑀲𑀦𑁆𑀢𑀢𑀻𑀢𑀺 𑀧𑀓𑀸𑀲𑀺𑀢𑀸.

𑁬𑁯𑁨. 𑀭𑀽𑀧𑀫𑀸𑀘𑀬𑀭𑀽𑀧𑁂𑀦, 𑀚𑀸𑀬𑀢𑀺𑀘𑁆𑀘𑀼𑀧𑀭𑀽𑀧𑀭𑀺;

𑀧𑁂𑀓𑁆𑀔𑀢𑁄𑀧𑀘𑀬𑀸𑀓𑀸𑀭𑀸, 𑀚𑀸𑀢𑀺 𑀕𑀬𑁆𑀳𑀢𑀺 𑀬𑁄𑀕𑀺𑀦𑁄.

𑁬𑁯𑁩. 𑀅𑀦𑀼𑀧𑁆𑀧𑀩𑀦𑁆𑀥𑀸𑀓𑀸𑀭𑁂𑀦, 𑀚𑀸𑀬𑀢𑀻𑀢𑀺 𑀲𑀧𑁂𑀓𑁆𑀔𑀢𑁄;

𑀢𑀤𑀸𑀬𑀁 𑀲𑀦𑁆𑀢𑀢𑀸𑀓𑀸𑀭𑀸, 𑀚𑀸𑀢𑀺 𑀕𑀬𑁆𑀳𑀢𑀺 𑀢𑀲𑁆𑀲 𑀢𑀼.

𑁬𑁯𑁪. 𑀏𑀯𑀫𑀸𑀪𑁄𑀕𑀪𑁂𑀤𑁂𑀦, 𑀚𑀸𑀢𑀺𑀭𑀽𑀧𑀁 𑀤𑁆𑀯𑀺𑀥𑀸 𑀓𑀢𑀁;

𑀅𑀢𑁆𑀢𑀽𑀧𑀮𑀤𑁆𑀥𑀺𑀪𑀸𑀯𑁂𑀦, 𑀚𑀸𑀬𑀦𑁆𑀢𑀁 𑀯𑀸𑀣 𑀓𑁂𑀯𑀮𑀁.

𑁬𑁯𑁫. 𑀭𑀽𑀧𑀁 𑀯𑀺𑀯𑀺𑀢𑁆𑀢𑁄𑀓𑀸𑀲𑀲𑁆𑀲, 𑀧𑀽𑀭𑀓𑀝𑁆𑀞𑁂𑀦 𑀘𑀻𑀬𑀢𑀺;

𑀅𑀪𑀸𑀯𑀸 𑀧𑀼𑀦𑀪𑀸𑀯𑀸𑀬, 𑀧𑀯𑀢𑁆𑀢𑀁 𑀲𑀦𑁆𑀢𑀢𑀻𑀢𑀺 𑀘.

𑁬𑁯𑁬. 𑀏𑀯𑀫𑀸𑀓𑀸𑀭𑀪𑁂𑀤𑀸𑀯, 𑀲𑀩𑁆𑀩𑀸𑀓𑀸𑀭𑀯𑀭𑀸𑀓𑀭𑁄;

𑀚𑀸𑀢𑀺𑀭𑀽𑀧𑀁 𑀤𑁆𑀯𑀺𑀥𑀸𑀓𑀸𑀲𑀺, 𑀚𑀸𑀢𑀺𑀭𑀽𑀧𑀯𑀺𑀭𑁄𑀘𑀦𑁄.

𑁬𑁯𑁭. 𑀚𑀭𑀢𑀸 𑀦𑀯𑀢𑀸𑀳𑀸𑀬𑀸, 𑀭𑀽𑀧𑀸𑀦𑀁 𑀧𑀸𑀓𑀮𑀓𑁆𑀔𑀡𑀸;

𑀅𑀦𑀺𑀘𑁆𑀘𑀢𑀦𑁆𑀢𑀺 𑀫𑀧𑁆𑀧𑀢𑁆𑀢𑀺, 𑀧𑀭𑀺𑀪𑀺𑀚𑁆𑀚𑀦𑀮𑀓𑁆𑀔𑀡𑀸.

𑁬𑁯𑁮. 𑀇𑀢𑀺 𑀮𑀓𑁆𑀔𑀡𑀭𑀽𑀧𑀁 𑀢𑀼, 𑀢𑀺𑀯𑀺𑀥𑀁 𑀪𑀺𑀦𑁆𑀦𑀓𑀸𑀮𑀺𑀓𑀁;

𑀲𑀪𑀸𑀯𑀭𑀽𑀧𑀥𑀫𑁆𑀫𑁂𑀲𑀼, 𑀢𑀁𑀢𑀁𑀓𑀸𑀮𑁄𑀧𑀮𑀓𑁆𑀔𑀺𑀢𑀁.

𑁬𑁯𑁯. 𑀬𑁂𑀦 𑀮𑀓𑁆𑀔𑀻𑀬𑀢𑀺 𑀭𑀽𑀧𑀁, 𑀪𑀺𑀦𑁆𑀦𑀸𑀓𑀸𑀭𑀁 𑀔𑀡𑁂 𑀔𑀡𑁂;

𑀯𑀺𑀧𑀲𑁆𑀲𑀦𑀸𑀦𑀬𑀢𑁆𑀣𑀸𑀬, 𑀢𑀫𑀺𑀘𑁆𑀘𑀸𑀳 𑀢𑀣𑀸𑀕𑀢𑁄.

𑁭𑁦𑁦. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄,

𑀬𑀸𑀧𑁂𑀢𑀩𑁆𑀩𑁄𑀚𑀮𑀓𑁆𑀔𑀡𑁄;

𑀆𑀳𑀸𑀭𑁄 𑀲𑁂𑀦𑁆𑀤𑁆𑀭𑀺𑀬𑀚𑀸𑀢𑁄,

𑀭𑀽𑀧𑀓𑀸𑀬𑀸𑀦𑀼𑀧𑀸𑀮𑀓𑁄.

𑁭𑁦𑁧. 𑀇𑀘𑁆𑀘𑁂𑀯𑀁 𑀲𑀧𑀭𑀺𑀘𑁆𑀙𑁂𑀤𑀸, 𑀲𑀯𑀺𑀓𑀸𑀭𑀸 𑀲𑀮𑀓𑁆𑀔𑀡𑀸;

𑀅𑀓𑀺𑀘𑁆𑀘𑀧𑀝𑀺𑀯𑁂𑀥𑀸𑀬, 𑀤𑀬𑀸𑀧𑀦𑁆𑀦𑁂𑀦 𑀢𑀸𑀤𑀺𑀦𑀸.

𑁭𑁦𑁨. 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀬𑁄𑀕𑀁, 𑀤𑁂𑀲𑀺𑀢𑀸𑀢𑀺 𑀧𑀓𑀸𑀲𑀺𑀢𑀸;

𑀭𑀽𑀧𑀥𑀫𑁆𑀫𑀸 𑀲𑀭𑀽𑀧𑁂𑀦, 𑀅𑀝𑁆𑀞𑀯𑀻𑀲𑀢𑀺 𑀲𑀩𑁆𑀩𑀣𑀸.

𑁭𑁦𑁩. 𑀓𑀢𑁆𑀯𑀸𑀦 𑀚𑀸𑀢𑀺𑀫𑁂𑀓𑀁 𑀢𑀼, 𑀢𑀢𑁆𑀣𑁄𑀧𑀘𑀬𑀲𑀦𑁆𑀢𑀢𑀺𑀁;

𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂.

𑁭𑁦𑁪. 𑀪𑀽𑀢𑀢𑁆𑀢𑀬𑀁 𑀢𑀼 𑀨𑁄𑀝𑁆𑀞𑀩𑁆𑀩𑀁, 𑀓𑀢𑁆𑀯𑀸 𑀙𑀩𑁆𑀩𑀻𑀲𑀥𑀸𑀧𑀺 𑀘;

𑀉𑀪𑀬𑀁 𑀚𑀸𑀢𑀺𑀨𑁄𑀝𑁆𑀞𑀩𑁆𑀩𑀁, 𑀕𑀳𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺.

𑁭𑁦𑁫. 𑀭𑀽𑀧𑀥𑀫𑁆𑀫𑀸𑀦𑀫𑀺𑀘𑁆𑀘𑁂𑀯𑀁, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀲𑀸𑀭𑀤𑁄;

𑀲𑀭𑀽𑀧𑀁 𑀦𑀸𑀫𑀲𑀗𑁆𑀔𑁂𑀧𑀁, 𑀲𑀪𑀸𑀯𑀜𑁆𑀘 𑀲𑀮𑀓𑁆𑀔𑀡𑀦𑁆𑀢𑀺.

𑀇𑀢𑀺 𑀭𑀽𑀧𑀯𑀺𑀪𑀸𑀕𑁂 𑀲𑀭𑀽𑀧𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.