𑁧𑁭. 𑀤𑀺𑀝𑁆𑀞𑀺𑀲𑀗𑁆𑀕𑀳𑀓𑀣𑀸

𑁫𑁯𑁩. 𑀬𑁂𑀯𑀸𑀧𑀦𑀓𑀦𑀸𑀫𑁂𑀦, 𑀥𑀫𑁆𑀫𑀸 𑀙𑀦𑁆𑀤𑀸𑀤𑀬𑁄 𑀢𑀣𑀸;

𑀔𑀦𑁆𑀥𑀸𑀤𑀬𑁄 𑀘 𑀓𑁄𑀝𑁆𑀞𑀸𑀲𑀸, 𑀉𑀤𑁆𑀤𑀺𑀝𑁆𑀞𑀸 𑀳𑀺 𑀬𑀣𑀸𑀭𑀳𑀁.

𑁫𑁯𑁪. 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀥𑀫𑁆𑀫𑀸, 𑀯𑀺𑀪𑀢𑁆𑀢𑀸𑀯 𑀬𑀣𑀸𑀭𑀳𑀁;

𑀔𑀦𑁆𑀥𑀸𑀤𑀺𑀭𑀸𑀲𑀬𑁄 𑀯𑀸𑀧𑀺, 𑀯𑀺𑀜𑁆𑀜𑁂𑀬𑁆𑀬𑀸 𑀤𑀸𑀦𑀺 𑀲𑀫𑁆𑀪𑀯𑀸.

𑁫𑁯𑁫. 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸;

𑀲𑀜𑁆𑀜𑀸 𑀘 𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺, 𑀙𑀩𑁆𑀩𑀺𑀥𑀸𑀧𑀺 𑀧𑀓𑀸𑀲𑀺𑀢𑀸.

𑁫𑁯𑁬. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀸𑀫𑁂𑀦, 𑀲𑁂𑀲𑀸 𑀘𑁂𑀢𑀲𑀺𑀓𑀸 𑀫𑀢𑀸;

𑀯𑀼𑀢𑁆𑀢𑀸 𑀯𑀺𑀜𑁆𑀜𑀸𑀡𑀓𑀸𑀬𑀸 𑀙, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀦𑀸𑀫𑀢𑁄.

𑁫𑁯𑁭. 𑀭𑀽𑀧𑀓𑁆𑀔𑀦𑁆𑀥𑁄 𑀧𑀼𑀦𑁂𑀓𑁄𑀯, 𑀲𑀫𑁆𑀧𑀬𑀼𑀢𑁆𑀢𑀸𑀯𑀺𑀬𑁄𑀕𑀺𑀦𑁄;

𑀅𑀭𑀽𑀧𑀺𑀦𑁄 𑀘 𑀘𑀢𑁆𑀢𑀸𑀭𑁄, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀯𑀼𑀘𑁆𑀘𑀭𑁂.

𑁫𑁯𑁮. 𑀫𑀦𑀸𑀬𑀢𑀦𑀦𑀸𑀫𑀁 𑀢𑀼, 𑀘𑀺𑀢𑁆𑀢𑀫𑁂𑀯 𑀢𑀣𑀸𑀧𑀭𑀸;

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀺𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄.

𑁫𑁯𑁯. 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸 𑀥𑀫𑁆𑀫𑀸, 𑀥𑀫𑁆𑀫𑀸𑀬𑀢𑀦𑀲𑀗𑁆𑀕𑀳𑀸;

𑀥𑀫𑁆𑀫𑀥𑀸𑀢𑀽𑀢𑀺 𑀘 𑀯𑀼𑀢𑁆𑀢𑀸, 𑀤𑁆𑀯𑀺𑀧𑀜𑁆𑀜𑀸𑀲𑀸𑀧𑀺 𑀲𑀩𑁆𑀩𑀣𑀸.

𑁬𑁦𑁦. 𑀲𑀼𑀔𑀼𑀫𑀸𑀦𑀺 𑀘 𑀭𑀽𑀧𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘𑁂𑀢𑁆𑀣 𑀕𑀬𑁆𑀳𑀭𑁂;

𑀑𑀴𑀸𑀭𑀺𑀓𑀸𑀦𑀺 𑀭𑀽𑀧𑀸𑀦𑀺, 𑀤𑀲𑀸𑀬𑀢𑀦𑀥𑀸𑀢𑀼𑀬𑁄.

𑁬𑁦𑁧. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀸𑀬𑀢𑀦𑀦𑀸𑀫𑀓𑀸;

𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲-𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀺 𑀘.

𑁬𑁦𑁨. 𑀤𑁆𑀯𑀸𑀤𑀲𑀸𑀬𑀢𑀦𑀸 𑀲𑀩𑁆𑀩𑁂, 𑀳𑁄𑀦𑁆𑀢𑀝𑁆𑀞𑀸𑀭𑀲𑀥𑀸𑀢𑀼𑀬𑁄;

𑀔𑀦𑁆𑀥𑀸 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁, 𑀦𑀢𑁆𑀣𑀺 𑀧𑀡𑁆𑀡𑀢𑁆𑀢𑀺 𑀢𑀻𑀲𑀼𑀧𑀺.

𑁬𑁦𑁩. 𑀆𑀳𑀸𑀭𑀸𑀤𑀺 𑀘 𑀓𑁄𑀝𑁆𑀞𑀸𑀲𑀸, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀯 𑀢𑁂;

𑀇𑀢𑀺 𑀫𑀺𑀲𑁆𑀲𑀓𑀲𑀗𑁆𑀔𑁂𑀧𑁄, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸.

𑁬𑁦𑁪. 𑀤𑁆𑀯𑀸𑀤𑀲𑀸𑀓𑀼𑀲𑀮𑁂𑀲𑁆𑀯𑁂𑀯, 𑀘𑀼𑀤𑁆𑀤𑀲𑀸𑀧𑀺 𑀯𑀯𑀢𑁆𑀣𑀺𑀢𑀸;

𑀬𑁂 𑀲𑀸𑀯𑀚𑁆𑀚𑀸𑀯 𑀢𑁂𑀲𑀫𑁆𑀧𑀺, 𑀲𑀗𑁆𑀕𑀳𑁄 𑀤𑀸𑀦𑀺 𑀦𑀺𑀬𑁆𑀬𑀢𑁂.

𑁬𑁦𑁫. 𑀓𑀸𑀫𑀸𑀲𑀯𑁄 𑀪𑀯𑀸𑀲𑀯𑁄, 𑀤𑀺𑀝𑁆𑀞𑀸𑀯𑀺𑀚𑁆𑀚𑀸𑀲𑀯𑀸𑀢𑀺 𑀘;

𑀘𑀢𑁆𑀢𑀸𑀭𑁄 𑀆𑀲𑀯𑀸 𑀯𑀼𑀢𑁆𑀢𑀸, 𑀢𑀬𑁄 𑀥𑀫𑁆𑀫𑀸 𑀲𑀭𑀽𑀧𑀢𑁄.

𑁬𑁦𑁬. 𑀆𑀲𑀯𑀸 𑀆𑀲𑀯𑀝𑁆𑀞𑁂𑀦,

𑀑𑀖𑀸 𑀯𑀼𑀬𑁆𑀳𑀦𑀢𑁄 𑀢𑀣𑀸;

𑀬𑁄𑀚𑁂𑀦𑁆𑀢𑀻𑀢𑀺 𑀘 𑀬𑁄𑀕𑀸𑀢𑀺,

𑀢𑁂 𑀘𑀢𑁆𑀢𑀸𑀭𑁄 𑀘 𑀤𑁂𑀲𑀺𑀢𑀸.

𑁬𑁦𑁭. 𑀓𑀸𑀫𑀩𑁆𑀪𑀯𑁄 𑀘 𑀧𑀝𑀺𑀖𑁄, 𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄;

𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀪𑀯𑀭𑀸𑀕𑁄 𑀢𑀣𑀸𑀧𑀭𑁄.

𑁬𑁦𑁮. 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀸𑀯𑀺𑀚𑁆𑀚𑀸, 𑀇𑀢𑀺 𑀲𑀁𑀬𑁄𑀚𑀦𑀸 𑀤𑀲;

𑀅𑀝𑁆𑀞 𑀥𑀫𑁆𑀫𑀸 𑀲𑀭𑀽𑀧𑁂𑀦, 𑀅𑀪𑀺𑀥𑀫𑁆𑀫𑁂 𑀧𑀓𑀸𑀲𑀺𑀢𑀸.

𑁬𑁦𑁯. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑀺𑀢𑁆𑀯𑀸, 𑀓𑀢𑁆𑀯𑀸 𑀫𑀸𑀦𑀼𑀤𑁆𑀥𑀯𑀁 𑀢𑀳𑀺𑀁;

𑀪𑀺𑀦𑁆𑀤𑀺𑀢𑁆𑀯𑀸 𑀪𑀯𑀭𑀸𑀕𑀜𑁆𑀘, 𑀭𑀽𑀧𑀸𑀭𑀽𑀧𑀯𑀲𑀸 𑀤𑁆𑀯𑀺𑀥𑀸.

𑁬𑁧𑁦. 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸 𑀘𑁂𑀯, 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀢𑀺 𑀘;

𑀤𑀲 𑀲𑀁𑀬𑁄𑀚𑀦𑀸 𑀯𑀼𑀢𑁆𑀢𑀸, 𑀲𑀼𑀢𑁆𑀢𑁂 𑀲𑀢𑁆𑀢 𑀲𑀭𑀽𑀧𑀢𑁄.

𑁬𑁧𑁧. 𑀕𑀦𑁆𑀣𑀸 𑀥𑀫𑁆𑀫𑀸 𑀘 𑀘𑀢𑁆𑀢𑀸𑀭𑁄, 𑀢𑀬𑁄 𑀥𑀫𑁆𑀫𑀸 𑀲𑀭𑀽𑀧𑀢𑁄;

𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁄 𑀘, 𑀩𑁆𑀬𑀸𑀧𑀸𑀤𑁄 𑀘 𑀧𑀯𑀼𑀘𑁆𑀘𑀢𑀺.

𑁬𑁧𑁨. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀓𑀸𑀬𑀕𑀦𑁆𑀣𑁄 𑀢𑀣𑀸𑀧𑀭𑁄;

𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄, 𑀇𑀢𑀺 𑀤𑀺𑀝𑁆𑀞𑀺 𑀯𑀺𑀪𑁂𑀤𑀺𑀢𑁄.

𑁬𑁧𑁩. 𑀓𑀸𑀫𑀘𑁆𑀙𑀦𑁆𑀤𑁄 𑀘 𑀩𑁆𑀬𑀸𑀧𑀸𑀤𑁄, 𑀣𑀺𑀦𑀫𑀺𑀤𑁆𑀥𑀫𑀣𑀸𑀧𑀭𑀁;

𑀢𑀣𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁, 𑀓𑀗𑁆𑀔𑀸𑀯𑀺𑀚𑁆𑀚𑀸𑀢𑀺 𑀅𑀝𑁆𑀞𑀺𑀫𑁂.

𑁬𑁧𑁪. 𑀥𑀫𑁆𑀫𑀸 𑀦𑀺𑀯𑀭𑀡𑀸 𑀦𑀸𑀫, 𑀙𑀥𑀸 𑀘 𑀧𑀦 𑀤𑁂𑀲𑀺𑀢𑀸;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦𑁂𑀓𑀸𑀯, 𑀧𑀭𑀸𑀫𑀸𑀲𑁄𑀢𑀺 𑀯𑀼𑀘𑁆𑀘𑀢𑀺.

𑁬𑁧𑁫. 𑀉𑀧𑀸𑀤𑀸𑀦𑀸𑀦𑀺 𑀘𑀢𑁆𑀢𑀸𑀭𑀺, 𑀓𑀸𑀫𑀼𑀧𑀸𑀤𑀸𑀤𑀺𑀦𑀸𑀫𑀓𑀸;

𑀤𑀺𑀝𑁆𑀞𑀺𑀲𑀻𑀮𑀩𑁆𑀩𑀢𑀁 𑀅𑀢𑁆𑀢-𑀯𑀸𑀤𑀼𑀧𑀸𑀤𑀸𑀦𑀫𑁂𑀯 𑀘.

𑁬𑁧𑁬. 𑀮𑁄𑀪𑀤𑀺𑀝𑁆𑀞𑀺𑀯𑀲𑀸 𑀤𑁆𑀯𑁂𑀯, 𑀢𑀺𑀯𑀺𑀥𑀸 𑀤𑀺𑀝𑁆𑀞𑀺 𑀤𑁂𑀲𑀺𑀢𑀸;

𑀤𑀺𑀝𑁆𑀞𑀺 𑀲𑀻𑀮𑀩𑁆𑀩𑀢𑀫𑀢𑁆𑀢-𑀯𑀸𑀤𑁄 𑀘𑁂𑀢𑀺 𑀫𑀳𑁂𑀲𑀺𑀦𑀸.

𑁬𑁧𑁭. 𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄;

𑀣𑀺𑀦𑀫𑀼𑀤𑁆𑀥𑀘𑁆𑀘𑀫𑁂𑀯𑀸𑀣,

𑀮𑁄𑀓𑀦𑀸𑀲𑀬𑀼𑀕𑀁 𑀢𑀣𑀸.

𑁬𑁧𑁮. 𑀇𑀢𑁆𑀣𑀁 𑀓𑀺𑀮𑁂𑀲𑀯𑀢𑁆𑀣𑀽𑀦𑀺, 𑀓𑀺𑀮𑁂𑀲𑀸𑀢𑀺 𑀧𑀓𑀸𑀲𑀺𑀢𑀸;

𑀤𑀲𑁂𑀢𑁂 𑀢𑀼 𑀲𑀫𑀸𑀦𑀸𑀯, 𑀧𑀭𑀢𑁄 𑀘 𑀲𑀭𑀽𑀧𑀢𑁄.

𑁬𑁧𑁯. 𑀓𑀸𑀫𑀭𑀸𑀕𑁄 𑀘 𑀧𑀝𑀺𑀖𑁄, 𑀫𑀸𑀦𑁄 𑀤𑀺𑀝𑁆𑀞𑀺 𑀘 𑀲𑀁𑀲𑀬𑁄;

𑀪𑀯𑀭𑀸𑀕𑁄 𑀅𑀯𑀺𑀚𑁆𑀚𑀸𑀢𑀺, 𑀙 𑀲𑀢𑁆𑀢𑀸𑀦𑀼𑀲𑀬𑀸 𑀫𑀢𑀸.

𑁬𑁨𑁦. 𑀕𑀸𑀳𑀸 𑀘 𑀧𑀮𑀺𑀩𑁄𑀥𑀸 𑀘, 𑀧𑀧𑀜𑁆𑀘𑀸 𑀘𑁂𑀯 𑀫𑀜𑁆𑀜𑀦𑀸.

𑀢𑀡𑁆𑀳𑀸 𑀫𑀸𑀦𑁄 𑀘 𑀤𑀺𑀝𑁆𑀞𑀺 𑀘, 𑀤𑀺𑀝𑁆𑀞𑀺 𑀢𑀡𑁆𑀳𑀸 𑀘 𑀦𑀺𑀲𑁆𑀲𑀬𑀸.

𑁬𑁨𑁧. 𑀧𑀭𑀸𑀫𑀸𑀲𑁂𑀓𑀓𑁄 𑀤𑁆𑀯𑁂𑀯, 𑀦𑀺𑀲𑁆𑀲𑀬𑀸 𑀫𑀜𑁆𑀜𑀦𑀸 𑀢𑀬𑁄;

𑀆𑀲𑀯𑁄𑀖𑀬𑁄𑀕𑀕𑀦𑁆𑀣𑀸, 𑀉𑀧𑀸𑀤𑀸𑀦𑀸 𑀘 𑀤𑀼𑀩𑁆𑀩𑀺𑀥𑀸.

𑁬𑁨𑁨. 𑀅𑀝𑁆𑀞 𑀦𑀻𑀯𑀭𑀡𑀸 𑀯𑀼𑀢𑁆𑀢𑀸, 𑀲𑀢𑁆𑀢𑀥𑀸𑀦𑀼𑀲𑀬𑀸 𑀓𑀣𑀸;

𑀲𑀁𑀬𑁄𑀚𑀦𑀸 𑀓𑀺𑀮𑁂𑀲𑀸 𑀘, 𑀤𑀲𑁂𑀯 𑀧𑀭𑀢𑁄 𑀞𑀺𑀢𑀸.

𑁬𑁨𑁩. 𑀏𑀓𑀤𑁆𑀯𑀺𑀢𑀺𑀙𑀲𑀢𑁆𑀢𑀝𑁆𑀞𑀤𑀲𑀓𑀸 𑀢𑀼 𑀬𑀣𑀸𑀭𑀳𑀁;

𑀥𑀫𑁆𑀫𑀸 𑀲𑀭𑀽𑀧𑀢𑁄 𑀳𑁄𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑁂𑀲𑀼 𑀭𑀸𑀲𑀺𑀲𑀼.

𑁬𑁨𑁪. 𑀓𑀸𑀫𑀭𑀸𑀕𑀪𑀯𑀭𑀸𑀕𑀸, 𑀓𑀸𑀫𑀸𑀲𑀯𑀪𑀯𑀸𑀲𑀯𑀸;

𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕, 𑀇𑀢𑀺 𑀮𑁄𑀪𑁄 𑀯𑀺𑀪𑁂𑀤𑀺𑀢𑁄.

𑁬𑁨𑁫. 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄, 𑀤𑀺𑀝𑁆𑀞𑀺 𑀲𑀻𑀮𑀩𑁆𑀩𑀢𑀁 𑀢𑀣𑀸;

𑀅𑀢𑁆𑀢𑀯𑀸𑀤𑁄 𑀧𑀭𑀸𑀫𑀸𑀲𑁄, 𑀇𑀢𑀺 𑀤𑀺𑀝𑁆𑀞𑀺 𑀧𑀯𑀼𑀘𑁆𑀘𑀢𑀺.

𑁬𑁨𑁬. 𑀤𑀺𑀝𑁆𑀞𑀺 𑀧𑀜𑁆𑀘𑀤𑀲𑀯𑀺𑀥𑀸, 𑀮𑁄𑀪𑀝𑁆𑀞𑀸𑀭𑀲𑀥𑀸 𑀢𑀳𑀺𑀁;

𑀲𑁂𑀲𑀸 𑀲𑀧𑀭𑀭𑀸𑀲𑀻𑀳𑀺, 𑀲𑀫𑀸𑀦𑀸 𑀤𑁆𑀯𑀸𑀤𑀲𑀝𑁆𑀞𑀺𑀢𑀸.

𑁬𑁨𑁭. 𑀏𑀓𑀸𑀤𑀲𑀲𑀫𑀼𑀝𑁆𑀞𑀸𑀦𑁂, 𑀤𑀺𑀝𑁆𑀞𑀺𑀮𑁄𑀪𑀸 𑀯𑀯𑀢𑁆𑀣𑀺𑀢𑀸;

𑀅𑀯𑀺𑀚𑁆𑀚𑀸 𑀲𑀢𑁆𑀢𑀲𑀼 𑀯𑀼𑀢𑁆𑀢𑀸, 𑀧𑀝𑀺𑀖𑁄 𑀧𑀦 𑀧𑀜𑁆𑀘𑀲𑀼.

𑁬𑁨𑁮. 𑀫𑀸𑀦𑁄 𑀘 𑀯𑀺𑀘𑀺𑀓𑀺𑀘𑁆𑀙𑀸 𑀘, 𑀘𑀢𑀼𑀝𑁆𑀞𑀸𑀦𑁂𑀲𑀼 𑀉𑀤𑁆𑀥𑀝𑁄;

𑀢𑀻𑀲𑀼 𑀤𑁆𑀯𑀻𑀲𑀼 𑀘 𑀣𑀻𑀦𑀦𑁆𑀢𑀺, 𑀅𑀝𑁆𑀞𑁂𑀢𑁂 𑀲𑀯𑀺𑀪𑀢𑁆𑀢𑀺𑀓𑀸.

𑁬𑁨𑁯. 𑀇𑀲𑁆𑀲𑀸𑀫𑀘𑁆𑀙𑁂𑀭𑀓𑀼𑀓𑁆𑀓𑀼𑀘𑁆𑀘𑀫𑀺𑀤𑁆𑀥𑀮𑁄𑀓𑀯𑀺𑀦𑀸𑀲𑀓𑀸;

𑀙𑀸𑀯𑀺𑀪𑀢𑁆𑀢𑀺𑀓𑀥𑀫𑁆𑀫𑀸𑀢𑀺, 𑀅𑀲𑀫𑁆𑀪𑀺𑀦𑁆𑀦𑀸 𑀘𑀢𑀼𑀤𑁆𑀤𑀲.

𑁬𑁩𑁦. 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕-𑀓𑀸𑀫𑀸𑀲𑀯𑀪𑀯𑀸𑀲𑀯𑀸;

𑀳𑁄𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑁂𑀲𑀼, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸 𑀧𑀦.

𑁬𑁩𑁧. 𑀇𑀢𑀺 𑀲𑀸𑀯𑀚𑁆𑀚𑀲𑀗𑁆𑀔𑁂𑀧𑀁, 𑀜𑀢𑁆𑀯𑀸 𑀧𑀼𑀦 𑀯𑀺𑀘𑀓𑁆𑀔𑀡𑁄;

𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁, 𑀲𑀗𑁆𑀕𑀳𑀫𑁆𑀧𑀺 𑀯𑀺𑀪𑀸𑀯𑀬𑁂.

𑁬𑁩𑁨. 𑀬𑁂𑀲𑀼 𑀲𑀜𑁆𑀜𑀸𑀘𑀺𑀢𑁆𑀢𑀤𑀺𑀝𑁆𑀞𑀺-𑀯𑀺𑀧𑀮𑁆𑀮𑀸𑀲𑀸 𑀬𑀣𑀸𑀓𑁆𑀓𑀫𑀁;

𑀲𑀼𑀪𑀁 𑀲𑀼𑀔𑀁 𑀦𑀺𑀘𑁆𑀘𑀫𑀢𑁆𑀢𑀸, 𑀇𑀢𑀺 𑀤𑁆𑀯𑀸𑀤𑀲𑀥𑀸 𑀞𑀺𑀢𑀸.

𑁬𑁩𑁩. 𑀢𑀢𑁆𑀣 𑀓𑀸𑀬𑁂 𑀯𑁂𑀤𑀦𑀸𑀲𑀼, 𑀘𑀺𑀢𑁆𑀢𑁂 𑀥𑀫𑁆𑀫𑁂𑀲𑀼 𑀘𑀓𑁆𑀓𑀫𑀸;

𑀅𑀲𑀼𑀪𑀁 𑀤𑀼𑀓𑁆𑀔𑀫𑀦𑀺𑀘𑁆𑀘𑀫𑀦𑀢𑁆𑀢𑀸𑀢𑀺 𑀉𑀧𑀝𑁆𑀞𑀺𑀢𑀸.

𑁬𑁩𑁪. 𑀬𑀣𑀸𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑀳𑀸𑀦𑀸𑀬 𑀬𑀣𑀸𑀭𑀳𑀁;

𑀪𑀺𑀦𑁆𑀦𑀸 𑀯𑀺𑀲𑀬𑀓𑀺𑀘𑁆𑀘𑀸𑀦𑀁, 𑀯𑀲𑁂𑀦 𑀧𑀦 𑀲𑀫𑁆𑀪𑀯𑀸.

𑁬𑁩𑁫. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄;

𑀇𑀢𑀺 𑀯𑀼𑀢𑁆𑀢𑀸 𑀧𑀦𑁂𑀓𑀸𑀯, 𑀲𑀫𑁆𑀫𑀸𑀲𑀢𑀺 𑀫𑀳𑁂𑀲𑀺𑀦𑀸.

𑁬𑁩𑁬. 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀧𑀸𑀧𑀧𑀳𑀸𑀦𑀸𑀦𑀼𑀧𑁆𑀧𑀦𑁆𑀦𑀸𑀬 𑀘;

𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀳𑀺 𑀯𑀸, 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀯𑀼𑀤𑁆𑀥𑀺𑀬𑀸.

𑁬𑁩𑁭. 𑀧𑀤𑀳𑀦𑁆𑀢𑀲𑁆𑀲 𑀯𑀸𑀬𑀸𑀫𑁄, 𑀓𑀺𑀘𑁆𑀘𑀸𑀪𑁄𑀕𑀯𑀺𑀪𑀸𑀕𑀢𑁄;

𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄, 𑀇𑀢𑀺 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸.

𑁬𑁩𑁮. 𑀙𑀦𑁆𑀤𑁄 𑀘 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁, 𑀯𑀻𑀫𑀁𑀲𑀸𑀢𑀺 𑀘 𑀢𑀸𑀤𑀺𑀦𑀸;

𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺, 𑀯𑀺𑀪𑀢𑁆𑀢𑀸 𑀘𑀢𑀼𑀭𑀸𑀥𑀺𑀧𑀸.

𑁬𑁩𑁯. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀁, 𑀲𑀢𑀺 𑀘𑁂𑀯 𑀲𑀫𑀸𑀥𑀺 𑀘;

𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀜𑁆𑀘𑁂𑀯, 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑁂.

𑁬𑁪𑁦. 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀝𑁆𑀞𑁂𑀦, 𑀩𑀮𑀝𑁆𑀞𑁂𑀦 𑀩𑀮𑀸𑀦𑀺 𑀘;

𑀇𑀢𑀺 𑀪𑀺𑀦𑁆𑀦𑀸 𑀯𑀺𑀪𑀢𑁆𑀢𑀸 𑀘, 𑀤𑀼𑀯𑀺𑀥𑀸𑀧𑀺 𑀫𑀳𑁂𑀲𑀺𑀦𑀸.

𑁬𑁪𑁧. 𑀲𑀢𑀻 𑀘 𑀥𑀫𑁆𑀫𑀯𑀺𑀘𑀬𑁄, 𑀢𑀣𑀸 𑀯𑀻𑀭𑀺𑀬𑀧𑀻𑀢𑀺𑀬𑁄;

𑀧𑀲𑁆𑀲𑀤𑁆𑀥𑀺 𑀘 𑀲𑀫𑀸𑀥𑀺 𑀘, 𑀉𑀧𑁂𑀓𑁆𑀔𑀸𑀢𑀺 𑀘 𑀢𑀸𑀤𑀺𑀦𑀸.

𑁬𑁪𑁨. 𑀤𑁂𑀲𑀺𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀲𑁆𑀲 𑀲𑀪𑀸𑀯𑀢𑁄;

𑀓𑀸𑀬𑀘𑀺𑀢𑁆𑀢𑀯𑀲𑀸 𑀪𑀺𑀦𑁆𑀦𑀁, 𑀓𑀢𑁆𑀯𑀸 𑀧𑀲𑁆𑀲𑀤𑁆𑀥𑀺𑀫𑁂𑀓𑀓𑀁.

𑁬𑁪𑁩. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀲𑀗𑁆𑀓𑀧𑁆𑀧𑁄, 𑀯𑀸𑀬𑀸𑀫𑁄 𑀯𑀺𑀭𑀢𑀺𑀢𑁆𑀢𑀬𑀁;

𑀲𑀫𑁆𑀫𑀸𑀲𑀢𑀺 𑀲𑀫𑀸𑀥𑀻 𑀘, 𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀢𑁄.

𑁬𑁪𑁪. 𑀇𑀢𑀺 𑀲𑀢𑁆𑀢𑁂𑀯 𑀲𑀗𑁆𑀔𑁂𑀧𑀸, 𑀲𑀢𑁆𑀢𑀢𑀺𑀁𑀲 𑀧𑀪𑁂𑀤𑀢𑁄;

𑀏𑀓𑀁 𑀓𑀢𑁆𑀯𑀸𑀦 𑀧𑀲𑁆𑀲𑀤𑁆𑀥𑀺𑀁, 𑀅𑀲𑀫𑁆𑀪𑀺𑀦𑁆𑀦𑀸 𑀘𑀢𑀼𑀤𑁆𑀤𑀲.

𑁬𑁪𑁫. 𑀦𑀯𑀥𑀸 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁, 𑀙𑀲𑀼 𑀭𑀸𑀲𑀻𑀲𑀼 𑀧𑀜𑁆𑀘𑀲𑀼;

𑀅𑀝𑁆𑀞𑀥𑀸 𑀲𑀢𑀺 𑀲𑁂𑀲𑀸 𑀢𑀼, 𑀲𑀫𑀸𑀦𑀧𑀤𑀭𑀸𑀲𑀺𑀓𑀸.

𑁬𑁪𑁬. 𑀧𑀜𑁆𑀘𑀲𑁆𑀯𑁂𑀯 𑀢𑀼 𑀧𑀜𑁆𑀜𑀸 𑀘, 𑀲𑀫𑀸𑀥𑀺 𑀘𑀢𑀼𑀭𑀸𑀲𑀺𑀓𑁄;

𑀲𑀤𑁆𑀥𑀸 𑀤𑁆𑀯𑀻𑀲𑀼 𑀯𑀺𑀪𑀢𑁆𑀢𑀸𑀢𑀺, 𑀧𑀜𑁆𑀘𑁂𑀢𑁂 𑀲𑀯𑀺𑀪𑀢𑁆𑀢𑀺𑀓𑀸.

𑁬𑁪𑁭. 𑀦𑀯𑀸 𑀯𑀺𑀪𑀢𑁆𑀢𑀺𑀓𑀸 𑀲𑁂𑀲𑀸, 𑀙𑀦𑁆𑀤𑁄 𑀘𑀺𑀢𑁆𑀢𑀫𑀣𑀸𑀧𑀭𑀁;

𑀧𑀻𑀢𑀺 𑀧𑀲𑁆𑀲𑀤𑁆𑀥𑀺𑀧𑁂𑀓𑁆𑀔𑀸 𑀘, 𑀲𑀗𑁆𑀓𑀧𑁆𑀧𑁄 𑀯𑀺𑀭𑀢𑀺𑀢𑁆𑀢𑀬𑀁.

𑁬𑁪𑁮. 𑀇𑀢𑀺 𑀯𑀼𑀢𑁆𑀢𑀦𑀬𑀸 𑀲𑀩𑁆𑀩𑁂, 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑀸;

𑀮𑁄𑀓𑀼𑀢𑁆𑀢𑀭𑁂𑀲𑀼 𑀲𑀫𑁆𑀪𑁄𑀦𑁆𑀢𑀺, 𑀲𑀩𑁆𑀩𑀣𑀸𑀧𑀺 𑀬𑀣𑀸𑀭𑀳𑀁.

𑁬𑁪𑁯. 𑀧𑀼𑀩𑁆𑀩𑀪𑀸𑀕𑁂 𑀬𑀣𑀸𑀬𑁄𑀕𑀁, 𑀮𑁄𑀓𑀺𑀬𑁂𑀲𑀼 𑀘 𑀮𑀩𑁆𑀪𑀭𑁂;

𑀦𑀺𑀩𑁆𑀩𑁂𑀤𑀪𑀸𑀯𑀦𑀸𑀓𑀸𑀮𑁂, 𑀙𑀩𑁆𑀩𑀺𑀲𑀼𑀤𑁆𑀥𑀺𑀧𑀯𑀢𑁆𑀢𑀺𑀬𑀁.

𑁬𑁫𑁦. 𑀇𑀢𑀺 𑀫𑀺𑀲𑁆𑀲𑀓𑀲𑀸𑀯𑀚𑁆𑀚𑀸, 𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀕𑀳𑀸;

𑀬𑁂𑀯𑀸𑀧𑀦𑀓𑀭𑀸𑀲𑀺𑀫𑁆𑀳𑀺, 𑀬𑀣𑀸𑀲𑀫𑁆𑀪𑀯𑀢𑁄 𑀞𑀺𑀢𑀸.

𑁬𑁫𑁧. 𑀓𑀫𑁆𑀫𑀧𑀣𑀸 𑀢𑀼 𑀲𑀫𑁆𑀪𑁄𑀦𑁆𑀢𑀺, 𑀧𑀼𑀜𑁆𑀜𑀸𑀧𑀼𑀜𑁆𑀜𑁂𑀲𑀼 𑀲𑀩𑁆𑀩𑀣𑀸;

𑀅𑀧𑀣𑀸 𑀘 𑀲𑀼𑀘𑀭𑀺𑀢𑀸, 𑀢𑀣𑀸 𑀤𑀼𑀘𑁆𑀘𑀭𑀺𑀢𑀸𑀧𑀺 𑀘.

𑁬𑁫𑁨. 𑀢𑀢𑁆𑀣 𑀓𑀫𑁆𑀫𑀧𑀣𑀝𑁆𑀞𑀸𑀦𑁂, 𑀅𑀦𑀪𑀺𑀚𑁆𑀛𑀸𑀤𑀬𑁄 𑀧𑀦;

𑀉𑀧𑀘𑀸𑀭𑁂𑀦 𑀯𑀼𑀘𑁆𑀘𑀦𑁆𑀢𑀺, 𑀯𑀺𑀧𑀸𑀓𑁂𑀲𑀼 𑀓𑁆𑀭𑀺𑀬𑁂𑀲𑀼 𑀯𑀸𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀤𑀺𑀝𑁆𑀞𑀺𑀲𑀗𑁆𑀕𑀳𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀦𑀺𑀝𑁆𑀞𑀺𑀢𑁄 𑀘 𑀲𑀩𑁆𑀩𑀣𑀸𑀧𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁄.