𑁧𑁬. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀣𑀸

𑁫𑁩𑁩. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀥𑀫𑁆𑀫𑀸𑀦𑀁, 𑀇𑀢𑀺 𑀜𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁;

𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀫𑁂𑀯𑀸𑀣, 𑀜𑀸𑀢𑀩𑁆𑀩𑁄 𑀪𑁂𑀤𑀲𑀗𑁆𑀕𑀳𑁄.

𑁫𑁩𑁪. 𑀯𑁂𑀤𑀦𑀸𑀳𑀸𑀭𑀢𑁄 𑀘𑁂𑀯, 𑀳𑁂𑀢𑀸𑀥𑀺𑀧𑀢𑀺𑀢𑁄 𑀢𑀣𑀸;

𑀛𑀸𑀦𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀩𑀮𑀸, 𑀬𑁂𑀯𑀸𑀧𑀦𑀧𑀣𑀸𑀤𑀺𑀢𑁄.

𑁫𑁩𑁫. 𑀢𑀢𑁆𑀣 𑀲𑀼𑀔𑀸 𑀘 𑀤𑀼𑀓𑁆𑀔𑀸 𑀘, 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀘;

𑀢𑀺𑀲𑁆𑀲𑁄 𑀘 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀲𑀫𑁆𑀪𑁄𑀕𑀢𑁆𑀣𑀯𑀺𑀲𑁂𑀲𑀢𑁄.

𑁫𑁩𑁬. 𑀲𑀼𑀔𑀁 𑀤𑀼𑀓𑁆𑀔𑀁 𑀲𑁄𑀫𑀦𑀲𑁆𑀲𑀁, 𑀤𑁄𑀫𑀦𑀲𑁆𑀲𑀫𑀣𑀸𑀧𑀭𑀁;

𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀫𑀺𑀘𑁆𑀘𑁂𑀯𑀁, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀺𑀪𑀸𑀕𑀢𑁄.

𑁫𑁩𑁭. 𑀓𑀸𑀬𑀯𑀺𑀜𑁆𑀜𑀸𑀡𑀬𑀼𑀕𑀴𑁂, 𑀲𑀼𑀔𑀤𑀼𑀓𑁆𑀔𑀸 𑀳𑀺 𑀯𑁂𑀤𑀦𑀸;

𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁, 𑀇𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺 𑀦.

𑁫𑁩𑁮. 𑀅𑀜𑁆𑀜𑀢𑁆𑀣 𑀧𑀦 𑀲𑀩𑁆𑀩𑀢𑁆𑀣, 𑀲𑀼𑀔𑀸 𑀤𑀼𑀓𑁆𑀔𑀸 𑀘 𑀯𑁂𑀤𑀦𑀸;

𑀲𑁄𑀫𑀦𑀲𑁆𑀲𑀁 𑀤𑁄𑀫𑀦𑀲𑁆𑀲𑀁, 𑀇𑀢𑀺 𑀦𑀸𑀫𑀁 𑀮𑀪𑀦𑁆𑀢𑀺 𑀘.

𑁫𑁩𑁯. 𑀅𑀤𑀼𑀓𑁆𑀔𑀺 𑀅𑀲𑀼𑀔𑁄𑀧𑁂𑀓𑁆𑀔𑀸, 𑀫𑀚𑁆𑀛𑀢𑁆𑀢𑀸𑀢𑀺 𑀘 𑀯𑁂𑀤𑀦𑀸;

𑀧𑀜𑁆𑀘𑀧𑀜𑁆𑀜𑀸𑀲𑀘𑀺𑀢𑁆𑀢𑁂𑀲𑀼, 𑀢𑀤𑀜𑁆𑀜𑁂𑀲𑀼 𑀧𑀓𑀸𑀲𑀺𑀢𑀸.

𑁫𑁪𑁦. 𑀲𑀼𑀔𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑀁, 𑀓𑀸𑀬𑀯𑀺𑀜𑁆𑀜𑀸𑀡𑀓𑀤𑁆𑀯𑀬𑀁;

𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑀁, 𑀧𑀝𑀺𑀖𑀤𑁆𑀯𑀬𑀫𑀸𑀦𑀲𑀁.

𑁫𑁪𑁧. 𑀅𑀝𑁆𑀞𑀸𑀭𑀲 𑀧𑀭𑀺𑀢𑁆𑀢𑀸𑀦𑀺, 𑀘𑀢𑀼𑀓𑁆𑀓𑀚𑁆𑀛𑀸𑀦𑀫𑀸𑀤𑀺𑀢𑁄;

𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑀸, 𑀤𑁆𑀯𑀸𑀲𑀝𑁆𑀞𑀺𑀯𑀺𑀥 𑀫𑀸𑀦𑀲𑀸.

𑁫𑁪𑁨. 𑀤𑁆𑀯𑀢𑁆𑀢𑀺𑀁𑀲 𑀘 𑀧𑀭𑀺𑀢𑁆𑀢𑀸𑀦𑀺, 𑀢𑁂𑀯𑀻𑀲 𑀛𑀸𑀦𑀧𑀜𑁆𑀘𑀫𑀸;

𑀳𑁄𑀦𑁆𑀢𑀺𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀬𑀼𑀢𑁆𑀢𑀸, 𑀧𑀜𑁆𑀘𑀧𑀜𑁆𑀜𑀸𑀲 𑀫𑀸𑀦𑀲𑀸.

𑁫𑁪𑁩. 𑀲𑀼𑀔𑀬𑀼𑀢𑁆𑀢𑀸 𑀢𑀼 𑀢𑁂𑀲𑀝𑁆𑀞𑀺, 𑀤𑀼𑀓𑁆𑀔𑀬𑀼𑀢𑁆𑀢𑀸 𑀢𑀬𑁄 𑀢𑀳𑀺𑀁;

𑀅𑀤𑀼𑀓𑁆𑀔𑀫𑀲𑀼𑀔𑀬𑀼𑀢𑁆𑀢𑀸, 𑀧𑀜𑁆𑀘𑀧𑀜𑁆𑀜𑀸𑀲𑀼𑀧𑁂𑀓𑁆𑀔𑀓𑀸.

𑁫𑁪𑁪. 𑀑𑀚𑀝𑁆𑀞𑀫𑀓𑀭𑀽𑀧𑀜𑁆𑀘, 𑀯𑁂𑀤𑀦𑀁 𑀲𑀦𑁆𑀥𑀺𑀫𑀸𑀦𑀲𑀁;

𑀦𑀸𑀫𑀭𑀽𑀧𑀜𑁆𑀘 𑀓𑀫𑀢𑁄, 𑀆𑀳𑀭𑀦𑁆𑀢𑀻𑀢𑀺 𑀤𑁂𑀲𑀺𑀢𑀸.

𑁫𑁪𑁫. 𑀆𑀳𑀸𑀭𑀸 𑀓𑀩𑀴𑀻𑀓𑀸𑀭𑁄, 𑀨𑀲𑁆𑀲𑁄 𑀲𑀜𑁆𑀘𑁂𑀢𑀦𑀸 𑀢𑀣𑀸;

𑀯𑀺𑀜𑁆𑀜𑀸𑀡𑀜𑁆𑀘𑁂𑀢𑀺 𑀘𑀢𑁆𑀢𑀸𑀭𑁄, 𑀉𑀧𑀢𑁆𑀣𑀫𑁆𑀪𑀸 𑀘 𑀲𑀫𑁆𑀪𑀯𑀸.

𑁫𑁪𑁬. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀩𑁆𑀩𑀢𑁆𑀣,

𑀆𑀳𑀸𑀭𑀸𑀭𑀽𑀧𑀺𑀦𑁄 𑀢𑀬𑁄;

𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄,

𑀓𑀸𑀫𑁂 𑀓𑀸𑀬𑀸𑀦𑀼𑀧𑀸𑀮𑀓𑁄.

𑁫𑁪𑁭. 𑀅𑀮𑁄𑀪𑁄 𑀘 𑀅𑀤𑁄𑀲𑁄 𑀘,

𑀅𑀫𑁄𑀳𑁄 𑀘 𑀢𑀣𑀸𑀧𑀭𑁄;

𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀳𑁂𑀢𑀽 𑀥𑀫𑁆𑀫𑀸 𑀙 𑀤𑁂𑀲𑀺𑀢𑀸.

𑁫𑁪𑁮. 𑀓𑀼𑀲𑀮𑀸𑀓𑀼𑀲𑀮𑀸 𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀸𑀢𑀺 𑀘;

𑀦𑀯𑀤𑁆𑀯𑀸𑀤𑀲𑀥𑀸 𑀢𑀢𑁆𑀣, 𑀯𑀺𑀧𑀸𑀓𑀓𑁆𑀭𑀺𑀬𑀪𑁂𑀤𑀢𑁄.

𑁫𑁪𑁯. 𑀤𑀲 𑀧𑀜𑁆𑀘𑀸𑀥𑀺𑀓𑀸 𑀳𑁄𑀦𑁆𑀢𑀺, 𑀪𑀽𑀫𑀺𑀪𑁂𑀤𑀸 𑀢𑀢𑁄 𑀢𑀳𑀺𑀁;

𑀧𑀼𑀜𑁆𑀜𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑀸, 𑀢𑀸𑀮𑀻𑀲 𑀘𑀢𑀼𑀦𑀽𑀦𑀓𑀸.

𑁫𑁫𑁦. 𑀲𑀦𑁆𑀢𑀻𑀭𑀡𑀫𑀦𑁄𑀥𑀸𑀢𑀼-𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀸𑀦𑀲𑁂;

𑀯𑁄𑀝𑁆𑀞𑀩𑁆𑀩𑀦𑁂 𑀘 𑀳𑀲𑀺𑀢𑁂, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺.

𑁫𑁫𑁧. 𑀮𑁄𑀪𑀫𑀽𑀮𑁂𑀲𑀼 𑀮𑁄𑀪𑁄 𑀘,

𑀫𑁄𑀳𑁄 𑀘 𑀧𑀝𑀺𑀖𑀤𑁆𑀯𑀬𑁂;

𑀤𑁄𑀲𑁄 𑀫𑁄𑀳𑁄 𑀘 𑀮𑀩𑁆𑀪𑀦𑁆𑀢𑀺,

𑀫𑁄𑀳𑁄 𑀏𑀓𑁄𑀯 𑀫𑁄𑀫𑀼𑀳𑁂.

𑁫𑁫𑁨. 𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼,

𑀅𑀮𑁄𑀪𑀸𑀤𑀺𑀤𑁆𑀯𑀬𑀁 𑀪𑀯𑁂;

𑀢𑀢𑁄 𑀲𑁂𑀲𑁂𑀲𑀼 𑀲𑀩𑁆𑀩𑀢𑁆𑀣,

𑀅𑀮𑁄𑀪𑀸𑀤𑀺𑀢𑀬𑁄𑀧𑀺 𑀘.

𑁫𑁫𑁩. 𑀢𑀺𑀳𑁂𑀢𑀼𑀓𑀸 𑀲𑀢𑁆𑀢𑀘𑀢𑁆𑀢𑀸-𑀮𑀻𑀲 𑀳𑁄𑀦𑁆𑀢𑀺 𑀤𑁆𑀯𑀺𑀳𑁂𑀢𑀼𑀓𑀸;

𑀩𑀸𑀯𑀻𑀲 𑀤𑁆𑀯𑁂𑀓𑀳𑁂𑀢𑀼𑀓𑀸, 𑀅𑀝𑁆𑀞𑀸𑀭𑀲 𑀅𑀳𑁂𑀢𑀼𑀓𑀸.

𑁫𑁫𑁪. 𑀙𑀦𑁆𑀤𑁄 𑀘𑀺𑀢𑁆𑀢𑀜𑁆𑀘 𑀯𑀻𑀭𑀺𑀬𑀁, 𑀯𑀻𑀫𑀁𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀸;

𑀲𑀳𑀚𑀸𑀢𑀸𑀥𑀺𑀧𑀸 𑀥𑀫𑁆𑀫𑀸, 𑀯𑀼𑀢𑁆𑀢𑀸𑀥𑀺𑀧𑀢𑀬𑁄 𑀲𑀺𑀬𑀼𑀁.

𑁫𑁫𑁫. 𑀬𑀫𑀸𑀮𑀫𑁆𑀩𑀁 𑀕𑀭𑀼𑀁 𑀓𑀢𑁆𑀯𑀸, 𑀦𑀸𑀫𑀥𑀫𑁆𑀫𑀸 𑀧𑀯𑀢𑁆𑀢𑀭𑁂;

𑀆𑀭𑀫𑁆𑀫𑀡𑀸𑀥𑀺𑀧𑀦𑀸𑀫𑁂𑀦, 𑀢𑀤𑀸𑀮𑀫𑁆𑀩𑀡𑀫𑀻𑀭𑀺𑀢𑀁.

𑁫𑁫𑁬. 𑀢𑀺𑀳𑁂𑀢𑀼𑀓𑀚𑀯𑁂𑀲𑁆𑀯𑁂𑀓𑁄, 𑀘𑀢𑀽𑀲𑀼𑀧𑀺 𑀬𑀣𑀸𑀭𑀳𑀁;

𑀤𑁆𑀯𑀺𑀳𑁂𑀢𑀼𑀓𑁂𑀲𑀼 𑀲𑀫𑁆𑀪𑁄𑀢𑀺, 𑀯𑀻𑀫𑀁𑀲𑀸𑀥𑀺𑀧𑀢𑀺𑀁 𑀯𑀺𑀦𑀸.

𑁫𑁫𑁭. 𑀅𑀦𑀼𑀢𑁆𑀢𑀭𑁂 𑀓𑀸𑀫𑀧𑀼𑀜𑁆𑀜𑁂, 𑀢𑀺𑀳𑁂𑀢𑀼𑀓𑀫𑀳𑀸𑀓𑁆𑀭𑀺𑀬𑁂;

𑀮𑁄𑀪𑀫𑀽𑀮𑁂 𑀘 𑀲𑀸𑀯𑀚𑁆𑀚𑁂, 𑀮𑀩𑁆𑀪𑀢𑀸𑀮𑀫𑁆𑀩𑀡𑀸𑀥𑀺𑀧𑁄.

𑁫𑁫𑁮. 𑀢𑀢𑁆𑀣 𑀘𑀸𑀦𑀺𑀬𑀢𑀸 𑀓𑀸𑀫𑁂, 𑀮𑀩𑁆𑀪𑀫𑀸𑀦𑀸𑀧𑀺 𑀮𑀩𑁆𑀪𑀭𑁂;

𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑁂𑀲𑀼, 𑀦𑀺𑀬𑀢𑀸𑀯 𑀬𑀣𑀸𑀭𑀳𑀁.

𑁫𑁫𑁯. 𑀓𑁆𑀭𑀺𑀬𑀸𑀤𑁆𑀯𑀺𑀳𑁂𑀢𑀼𑀧𑀝𑀺𑀖𑁂,

𑀦𑀢𑁆𑀣𑁂𑀯𑀸𑀮𑀫𑁆𑀩𑀡𑀸𑀥𑀺𑀧𑁄;

𑀫𑁄𑀫𑀽𑀳𑀸𑀳𑁂𑀢𑀼𑀓𑁂 𑀧𑀸𑀓𑁂,

𑀮𑁄𑀓𑀺𑀬𑁂 𑀘 𑀦 𑀓𑁄𑀘𑀺𑀧𑀺.

𑁫𑁬𑁦. 𑀉𑀪𑀬𑀸𑀥𑀺𑀧𑀬𑀼𑀢𑁆𑀢𑀸 𑀘, 𑀲𑀳𑀚𑀸𑀥𑀺𑀧𑀬𑁄𑀕𑀺𑀦𑁄;

𑀉𑀪𑀬𑀸𑀦𑀺𑀬𑀢𑀸𑀥𑀺𑀧𑁆𑀧𑀸, 𑀲𑀳𑀚𑀸𑀦𑀺𑀬𑀢𑀸𑀥𑀺𑀧𑀸.

𑁫𑁬𑁧. 𑀉𑀪𑀬𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀧𑀜𑁆𑀘𑀥𑀸 𑀢𑀢𑁆𑀣 𑀫𑀸𑀦𑀲𑀸;

𑀅𑀝𑁆𑀞𑀝𑁆𑀞𑀸𑀭𑀲 𑀯𑀻𑀲𑀁 𑀙, 𑀲𑀢𑁆𑀢𑀢𑀺𑀁𑀲 𑀬𑀣𑀸𑀓𑁆𑀓𑀫𑀁.

𑁫𑁬𑁨. 𑀧𑀜𑁆𑀘𑀸𑀥𑀺𑀧𑀢𑀺𑀬𑁄𑀕𑀸 𑀘, 𑀘𑀢𑀼𑀭𑀸𑀥𑀺𑀧𑀬𑁄𑀕𑀺𑀦𑁄;

𑀢𑀺𑀯𑀺𑀥𑀸𑀥𑀺𑀧𑀬𑀼𑀢𑁆𑀢𑀸 𑀘, 𑀯𑀺𑀫𑀼𑀢𑁆𑀢𑀸𑀧𑀺 𑀘 𑀲𑀩𑁆𑀩𑀣𑀸.

𑁫𑁬𑁩. 𑀲𑁄𑀴𑀲𑀸𑀣 𑀲𑀫𑀢𑁆𑀢𑀺𑀁𑀲, 𑀙𑀴𑁂𑀯𑀸𑀣 𑀬𑀣𑀸𑀓𑁆𑀓𑀫𑀁;

𑀲𑀢𑁆𑀢𑀢𑀺𑀁𑀲𑀢𑀺𑀯𑀺𑀥𑀸𑀢𑀺, 𑀘𑀢𑀼𑀥𑁂𑀯𑀫𑁆𑀧𑀺 𑀦𑀺𑀤𑁆𑀤𑀺𑀲𑁂.

𑁫𑁬𑁪. 𑀯𑀻𑀫𑀁𑀲𑀸𑀥𑀺𑀧𑀬𑀼𑀢𑁆𑀢𑀸 𑀘, 𑀲𑀳𑀚𑀸𑀥𑀺𑀧𑀬𑁄𑀕𑀺𑀦𑁄;

𑀆𑀮𑀫𑁆𑀩𑀸𑀥𑀺𑀧𑀬𑀼𑀢𑁆𑀢𑀸 𑀘, 𑀯𑀺𑀧𑁆𑀧𑀫𑀼𑀢𑁆𑀢𑀸𑀧𑀺 𑀲𑀩𑁆𑀩𑀣𑀸.

𑁫𑁬𑁫. 𑀘𑀢𑀼𑀢𑁆𑀢𑀺𑀁𑀲 𑀤𑁆𑀯𑀺𑀧𑀜𑁆𑀜𑀸𑀲, 𑀅𑀝𑁆𑀞𑀯𑀻𑀲 𑀬𑀣𑀸𑀓𑁆𑀓𑀫𑀁;

𑀲𑀢𑁆𑀢𑀢𑀺𑀁𑀲𑀢𑀺 𑀘𑁂𑀯𑁂𑀢𑀺, 𑀘𑀢𑀼𑀥𑁂𑀯𑀫𑁆𑀧𑀺 𑀦𑀺𑀤𑁆𑀤𑀺𑀲𑁂.

𑁫𑁬𑁬. 𑀲𑀳𑀚𑀸𑀥𑀺𑀧𑀮𑀤𑁆𑀥𑀸 𑀢𑀼, 𑀤𑁆𑀯𑁂𑀧𑀜𑁆𑀜𑀸𑀲𑁂𑀯 𑀲𑀩𑁆𑀩𑀣𑀸;

𑀆𑀮𑀫𑁆𑀩𑀸𑀥𑀺𑀧𑀮𑀤𑁆𑀥𑀸 𑀘, 𑀉𑀪𑀬𑀸𑀥𑀺𑀧𑀮𑀸𑀪𑀺𑀦𑁄.

𑁫𑁬𑁭. 𑀅𑀝𑁆𑀞𑀯𑀻𑀲𑁂𑀯 𑀲𑀩𑁆𑀩𑁂𑀧𑀺, 𑀤𑁆𑀯𑁂𑀧𑀜𑁆𑀜𑀸𑀲𑁂𑀯 𑀲𑀸𑀥𑀺𑀧𑀸;

𑀲𑁂𑀲𑀸 𑀦𑀺𑀭𑀸𑀥𑀺𑀧𑀸 𑀲𑀩𑁆𑀩𑁂, 𑀲𑀢𑁆𑀢𑀢𑀺𑀁𑀲𑀸𑀧𑀺 𑀲𑀩𑁆𑀩𑀣𑀸.

𑁫𑁬𑁮. 𑀯𑁂𑀤𑀦𑀸𑀤𑀺𑀯𑀲𑁂𑀦𑁂𑀯𑀁, 𑀜𑀢𑁆𑀯𑀸 𑀪𑁂𑀤𑀁 𑀘𑀢𑀼𑀩𑁆𑀩𑀺𑀥𑀁;

𑀛𑀸𑀦𑀺𑀦𑁆𑀤𑁆𑀭𑀺𑀬𑀫𑀕𑁆𑀕𑀩𑀮-𑀯𑀲𑁂𑀦𑀸𑀧𑀺 𑀯𑀺𑀪𑀸𑀯𑀬𑁂.

𑁫𑁬𑁯. 𑀯𑀺𑀢𑀓𑁆𑀓𑀳𑁂𑀝𑁆𑀞𑀺𑀫𑀁 𑀛𑀸𑀦𑀁, 𑀫𑀦𑁄𑀧𑀭𑀁 𑀫𑀦𑀺𑀦𑁆𑀤𑁆𑀭𑀺𑀬𑀁;

𑀳𑁂𑀢𑀼𑀧𑀭𑀜𑁆𑀘 𑀫𑀕𑁆𑀕𑀗𑁆𑀕𑀁, 𑀩𑀮𑀁 𑀯𑀻𑀭𑀺𑀬𑀧𑀘𑁆𑀙𑀺𑀫𑀁.

𑁫𑁭𑁦. 𑀅𑀯𑀺𑀢𑀓𑁆𑀓𑁂 𑀧𑀓𑀢𑀺𑀬𑀸, 𑀢𑀲𑁆𑀫𑀸 𑀛𑀸𑀦𑀁 𑀦 𑀯𑀺𑀚𑁆𑀚𑀢𑀺;

𑀅𑀳𑁂𑀢𑀼𑀓𑁂 𑀘 𑀫𑀕𑁆𑀕𑀗𑁆𑀕𑀁, 𑀩𑀮𑀜𑁆𑀘𑀸𑀯𑀻𑀭𑀺𑀬𑁂 𑀬𑀣𑀸.

𑁫𑁭𑁧. 𑀅𑀝𑁆𑀞 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑁂𑀢𑁆𑀣, 𑀅𑀕𑀬𑁆𑀳𑀦𑁆𑀢𑁂𑀯 𑀲𑀩𑁆𑀩𑀣𑀸;

𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀩𑀮𑀝𑁆𑀞𑁂𑀲𑀼, 𑀲𑀫𑀸𑀥𑀺 𑀘 𑀦 𑀓𑀗𑁆𑀔𑀺𑀢𑁂.

𑁫𑁭𑁨. 𑀓𑀸𑀫𑀧𑀼𑀜𑁆𑀜𑁂𑀲𑁆𑀯𑀦𑀺𑀬𑀢𑀸, 𑀯𑀺𑀭𑀢𑀻𑀧𑀺 𑀅𑀦𑀼𑀤𑁆𑀥𑀢𑀸;

𑀧𑀜𑁆𑀜𑀸𑀦𑀼𑀢𑁆𑀢𑀭𑀘𑀺𑀢𑁆𑀢𑁂𑀲𑀼, 𑀇𑀦𑁆𑀤𑁆𑀭𑀺𑀬𑀢𑁆𑀢𑀬𑀪𑀸𑀚𑀺𑀢𑀸.

𑁫𑁭𑁩. 𑀲𑁂𑀲𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀮𑀩𑁆𑀪𑀫𑀸𑀦𑀚𑁆𑀛𑀸𑀦𑀸𑀤𑀺𑀓𑀸;

𑀢𑁂𑀳𑀺 𑀬𑀼𑀢𑁆𑀢𑀸 𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀬𑀣𑀸𑀓𑁆𑀓𑀫𑀁.

𑁫𑁭𑁪. 𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀓𑀸𑀫𑁂, 𑀮𑁄𑀓𑀼𑀢𑁆𑀢𑀭𑀫𑀳𑀕𑁆𑀕𑀢𑁂;

𑀧𑀞𑀫𑀚𑁆𑀛𑀸𑀦𑀘𑀺𑀢𑁆𑀢𑀸 𑀘, 𑀧𑀜𑁆𑀘𑀛𑀸𑀦𑀗𑁆𑀕𑀺𑀓𑀸 𑀫𑀢𑀸.

𑁫𑁭𑁫. 𑀤𑀼𑀓𑁆𑀔𑀼𑀧𑁂𑀓𑁆𑀔𑀸𑀬𑀼𑀢𑁆𑀢𑀸 𑀓𑀸𑀫𑁂, 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀸;

𑀤𑀼𑀢𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀸 𑀘, 𑀘𑀢𑀼𑀛𑀸𑀦𑀗𑁆𑀕𑀺𑀓𑀸 𑀲𑀺𑀬𑀼𑀁.

𑁫𑁭𑁬. 𑀛𑀸𑀦𑀗𑁆𑀕𑀢𑁆𑀢𑀬𑀲𑀁𑀬𑀼𑀢𑁆𑀢𑀸, 𑀢𑀢𑀺𑀬𑀚𑁆𑀛𑀸𑀦𑀫𑀸𑀦𑀲𑀸;

𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀭𑀼𑀧𑁆𑀧𑀸, 𑀛𑀸𑀦𑀗𑁆𑀕𑀤𑁆𑀯𑀬𑀬𑁄𑀕𑀺𑀦𑁄.

𑁫𑁭𑁭. 𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑁂, 𑀛𑀸𑀦𑀗𑁆𑀕𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀇𑀢𑁆𑀣𑀁 𑀛𑀸𑀦𑀸𑀦𑀁 𑀪𑁂𑀤𑁂𑀦, 𑀧𑀜𑁆𑀘𑀥𑀸 𑀫𑀸𑀦𑀲𑀸 𑀞𑀺𑀢𑀸.

𑁫𑁭𑁮. 𑀏𑀓𑀽𑀦𑀢𑀺𑀁𑀲𑀢𑀺 𑀲𑀢𑁆𑀢-𑀢𑀺𑀁𑀲 𑀘𑁂𑀓𑀸𑀤𑀲𑀸𑀧𑀭𑁂;

𑀘𑀢𑀼𑀢𑁆𑀢𑀺𑀁𑀲 𑀤𑀲𑁂𑀯𑀸𑀣, 𑀕𑀡𑀺𑀓𑀸 𑀢𑀼 𑀬𑀣𑀸𑀓𑁆𑀓𑀫𑀁.

𑁫𑁭𑁯. 𑀮𑁄𑀓𑀼𑀢𑁆𑀢𑀭𑁂𑀲𑀼 𑀲𑀩𑁆𑀩𑁂𑀲𑀼, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀯𑀼𑀘𑁆𑀘𑀭𑁂;

𑀢𑀺𑀳𑁂𑀢𑀼𑀓𑁂𑀲𑀼 𑀲𑀩𑁆𑀩𑁂𑀲𑀼, 𑀮𑁄𑀓𑀺𑀬𑁂𑀲𑀼 𑀧𑀦𑀝𑁆𑀞𑀥𑀸.

𑁫𑁮𑁦. 𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼, 𑀲𑀢𑁆𑀢𑀥𑀸𑀯 𑀲𑀫𑀼𑀤𑁆𑀥𑀭𑁂;

𑀲𑀺𑀢𑀯𑁄𑀝𑁆𑀞𑀩𑁆𑀩𑀦𑀸 𑀧𑀼𑀜𑁆𑀜𑁂, 𑀧𑀜𑁆𑀘𑀥𑀸𑀯 𑀧𑀓𑀸𑀲𑀬𑁂.

𑁫𑁮𑁧. 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑁂, 𑀘𑀢𑀼𑀥𑀸𑀯 𑀯𑀺𑀦𑀺𑀤𑁆𑀤𑀺𑀲𑁂;

𑀢𑀻𑀡𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀲𑁂𑀲𑀸𑀳𑁂𑀢𑀼𑀓𑀫𑀸𑀦𑀲𑁂.

𑁫𑁮𑁨. 𑀅𑀝𑁆𑀞 𑀘𑁂𑀓𑀽𑀦𑀢𑀸𑀮𑀻𑀲, 𑀤𑁆𑀯𑀸𑀤𑀲 𑀯𑀸𑀣 𑀢𑁂𑀭𑀲;

𑀏𑀓𑀜𑁆𑀘 𑀲𑁄𑀴𑀲 𑀘𑁂𑀢𑀺, 𑀙𑀩𑁆𑀩𑀺𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄.

𑁫𑁮𑁩. 𑀧𑀞𑀫𑀸𑀦𑀼𑀢𑁆𑀢𑀭𑀁 𑀛𑀸𑀦𑀁, 𑀅𑀝𑁆𑀞𑀫𑀕𑁆𑀕𑀗𑁆𑀕𑀺𑀓𑀁 𑀫𑀢𑀁;

𑀲𑀢𑁆𑀢𑀫𑀕𑁆𑀕𑀗𑁆𑀕𑀺𑀓𑀁 𑀦𑀸𑀫, 𑀲𑁂𑀲𑀁 𑀛𑀸𑀦𑀫𑀦𑀼𑀢𑁆𑀢𑀭𑀁.

𑁫𑁮𑁪. 𑀮𑁄𑀓𑀺𑀬𑀁 𑀧𑀞𑀫𑀁 𑀛𑀸𑀦𑀁, 𑀢𑀣𑀸 𑀓𑀸𑀫𑁂 𑀢𑀺𑀳𑁂𑀢𑀼𑀓𑀁;

𑀧𑀜𑁆𑀘𑀫𑀕𑁆𑀕𑀗𑁆𑀕𑀺𑀓𑀸 𑀦𑀸𑀫, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸.

𑁫𑁮𑁫. 𑀲𑁂𑀲𑀁 𑀫𑀳𑀕𑁆𑀕𑀢𑀁 𑀛𑀸𑀦𑀁, 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀤𑀺𑀝𑁆𑀞𑀺𑀬𑀸;

𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀘𑀢𑀼𑀫𑀕𑁆𑀕𑀗𑁆𑀕𑀺𑀓𑀸 𑀫𑀢𑀸.

𑁫𑁮𑁬. 𑀤𑁄𑀲𑀫𑀽𑀮𑀤𑁆𑀯𑀬𑀜𑁆𑀘𑁂𑀯, 𑀉𑀤𑁆𑀥𑀘𑁆𑀘𑀲𑀳𑀺𑀢𑀁 𑀢𑀣𑀸;

𑀤𑀺𑀝𑁆𑀞𑀺𑀬𑀸 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀫𑀕𑁆𑀕𑀗𑁆𑀕𑀢𑁆𑀢𑀬𑀬𑁄𑀕𑀺𑀦𑁄.

𑁫𑁮𑁭. 𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀧𑀬𑀼𑀢𑁆𑀢𑁄, 𑀯𑀼𑀢𑁆𑀢𑁄 𑀫𑀕𑁆𑀕𑁄 𑀤𑀼𑀯𑀗𑁆𑀕𑀺𑀓𑁄;

𑀅𑀫𑀕𑁆𑀕𑀸𑀳𑁂𑀢𑀼𑀓𑁄 𑀘𑁂𑀢𑀺, 𑀲𑀢𑁆𑀢𑀥𑀸 𑀢𑀢𑁆𑀣 𑀲𑀗𑁆𑀕𑀳𑁄.

𑁫𑁮𑁮. 𑀅𑀝𑁆𑀞 𑀤𑁆𑀯𑀢𑁆𑀢𑀺𑀁𑀲𑀢𑀺 𑀘𑁂𑀯, 𑀤𑀲 𑀧𑀜𑁆𑀘𑀸𑀥𑀺𑀓𑀸𑀧𑀭𑁂;

𑀢𑀸𑀮𑀻𑀲 𑀓𑀫𑀢𑁄 𑀲𑀢𑁆𑀢, 𑀏𑀓𑀜𑁆𑀘𑀝𑁆𑀞𑀤𑀲𑀸𑀧𑀭𑁂.

𑁫𑁮𑁯. 𑀩𑀮𑀸𑀦𑀺 𑀧𑀦 𑀲𑀢𑁆𑀢𑁂𑀯, 𑀲𑀩𑁆𑀩𑀢𑁆𑀣𑀸𑀧𑀺 𑀢𑀺𑀳𑁂𑀢𑀼𑀓𑁂;

𑀜𑀸𑀡𑁂𑀦 𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼, 𑀙 𑀩𑀮𑀸𑀦𑀺 𑀲𑀫𑀼𑀤𑁆𑀤𑀺𑀲𑁂.

𑁫𑁯𑁦. 𑀘𑀢𑀼𑀥𑀸𑀓𑀼𑀲𑀮𑁂 𑀳𑁄𑀦𑁆𑀢𑀺, 𑀢𑀺𑀯𑀺𑀥𑀸 𑀓𑀗𑁆𑀔𑀺𑀢𑁂 𑀧𑀦;

𑀤𑁆𑀯𑀺𑀩𑀮𑀁 𑀲𑀺𑀢𑀯𑁄𑀝𑁆𑀞𑀩𑁆𑀩𑀁, 𑀅𑀩𑀮𑀁 𑀲𑁂𑀲𑀫𑀻𑀭𑀺𑀢𑀁.

𑁫𑁯𑁧. 𑀙𑀩𑁆𑀩𑀺𑀥𑁄 𑀲𑀗𑁆𑀕𑀳𑁄 𑀢𑀢𑁆𑀣, 𑀲𑀢𑁆𑀢𑀢𑀸𑀮𑀻𑀲𑀣𑀸𑀧𑀭𑁂;

𑀤𑁆𑀯𑀸𑀤𑀲𑁂𑀓𑀸𑀤𑀲𑁂𑀓𑀁 𑀤𑁆𑀯𑁂, 𑀲𑁄𑀴𑀲𑁂𑀢𑀺 𑀬𑀣𑀸𑀓𑁆𑀓𑀫𑀁.

𑁫𑁯𑁨. 𑀇𑀢𑁆𑀣𑀁 𑀧𑀜𑁆𑀘 𑀙 𑀲𑀢𑁆𑀢 𑀙-𑀓𑁄𑀝𑁆𑀞𑀸𑀲𑀸 𑀓𑀫𑀢𑁄 𑀞𑀺𑀢𑀸;

𑀘𑀢𑀼𑀯𑀻𑀲𑀢𑀺 𑀲𑀩𑁆𑀩𑁂𑀧𑀺, 𑀛𑀸𑀦𑀗𑁆𑀕𑀸𑀤𑀺𑀯𑀲𑀸 𑀓𑀣𑀸.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.