𑁧𑁪. 𑀭𑀸𑀲𑀺𑀲𑀫𑁆𑀪𑀯𑀓𑀣𑀸

𑁪𑁯𑁦. 𑀦𑀯𑁂𑀯 𑀬𑁂𑀯𑀸𑀧𑀦𑀓𑀸, 𑀅𑀝𑁆𑀞𑀸𑀭𑀲 𑀘 𑀭𑀸𑀲𑀬𑁄;

𑀦𑀯𑀪𑀺𑀁𑀲𑀢𑀺𑀲𑀫𑁆𑀪𑀺𑀦𑁆𑀦𑀸, 𑀤𑀲 𑀤𑁆𑀯𑁂 𑀲𑀯𑀺𑀪𑀢𑁆𑀢𑀺𑀓𑀸.

𑁪𑁯𑁧. 𑀏𑀓𑀤𑁆𑀯𑀬𑀢𑀺𑀘𑀢𑀼𑀙𑀲𑀢𑁆𑀢𑀝𑁆𑀞𑀸𑀦𑀸𑀦𑀯𑀚𑁆𑀚𑀓𑁂;

𑀲𑀢𑁆𑀢𑀯𑀻𑀲𑀢𑀺 𑀲𑀢𑁆𑀢𑁂𑀓𑁄, 𑀤𑁆𑀯𑀬𑀫𑁂𑀓𑁄 𑀧𑀼𑀦𑁂𑀓𑀓𑁄.

𑁪𑁯𑁨. 𑀤𑀲𑁂𑀯 𑀬𑁂𑀯𑀸𑀧𑀦𑀓𑀸, 𑀏𑀓𑀸𑀤𑀲 𑀘 𑀭𑀸𑀲𑀬𑁄;

𑀅𑀝𑁆𑀞𑀯𑀻𑀲𑀢𑀺𑀲𑀫𑁆𑀪𑀺𑀦𑁆𑀦𑀸, 𑀤𑀲𑁂𑀯 𑀲𑀯𑀺𑀪𑀢𑁆𑀢𑀺𑀓𑀸.

𑁪𑁯𑁩. 𑀏𑀓𑀤𑁆𑀯𑀬𑀢𑀺𑀘𑀢𑀼𑀓𑁆𑀓𑀙𑀝𑁆𑀞𑀸𑀦𑀦𑀺𑀬𑀢𑀸 𑀧𑀦;

𑀅𑀝𑁆𑀞𑀸𑀭𑀲 𑀘 𑀲𑀢𑁆𑀢𑁂𑀓𑁄, 𑀏𑀓𑁄 𑀘𑁂𑀓𑁄𑀯 𑀧𑀸𑀧𑀓𑁂.

𑁪𑁯𑁪. 𑀤𑁆𑀯𑁂 𑀬𑁂𑀯𑀸𑀧𑀦𑀓𑀸 𑀳𑁄𑀦𑁆𑀢𑀺, 𑀭𑀸𑀲𑀬𑁄 𑀘 𑀘𑀢𑀼𑀩𑁆𑀩𑀺𑀥𑀸;

𑀢𑁂𑀭𑀲𑁂𑀢𑁆𑀣 𑀅𑀲𑀫𑁆𑀪𑀺𑀦𑁆𑀦𑀸, 𑀢𑀬𑁄𑀯 𑀲𑀯𑀺𑀪𑀢𑁆𑀢𑀺𑀓𑀸.

𑁪𑁯𑁫. 𑀏𑀓𑀤𑁆𑀯𑀬𑀢𑀺𑀓𑀝𑁆𑀞𑀸𑀦𑀸, 𑀤𑀲 𑀤𑁆𑀯𑁂𑀓𑁄 𑀅𑀳𑁂𑀢𑀼𑀓𑁂;

𑀇𑀘𑁆𑀘𑀸𑀦𑀯𑀚𑁆𑀚𑀸 𑀲𑀸𑀯𑀚𑁆𑀚𑀸-𑀳𑁂𑀢𑀼𑀓𑁂 𑀬𑁄𑀕𑀦𑀺𑀘𑁆𑀙𑀬𑁄.

𑁪𑁯𑁬. 𑀲𑀢𑁆𑀢𑀸𑀧𑀺 𑀦𑀢𑁆𑀣𑀺 𑀲𑀸𑀯𑀚𑁆𑀚𑁂, 𑀦𑀺𑀭𑀯𑀚𑁆𑀚𑁂 𑀧𑀓𑀸𑀲𑀓𑁄;

𑀅𑀳𑁂𑀢𑀼𑀓𑁂 𑀘 𑀫𑀕𑁆𑀕𑀸𑀤𑀺𑀭𑀸𑀲𑀬𑁄 𑀦𑀢𑁆𑀣𑀺 𑀘𑀼𑀤𑁆𑀤𑀲.

𑁪𑁯𑁭. 𑀅𑀦𑀯𑀚𑁆𑀚𑀸 𑀢𑀼 𑀲𑀸𑀯𑀚𑁆𑀚𑁂, 𑀲𑀸𑀯𑀚𑁆𑀚𑀓𑀸𑀦𑀯𑀚𑁆𑀚𑀓𑁂;

𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀳𑀺 𑀦𑀢𑁆𑀣𑁂𑀯, 𑀦𑀢𑁆𑀣𑁄𑀪𑀬𑀫𑀳𑁂𑀢𑀼𑀓𑁂.

𑁪𑁯𑁮. 𑀲𑀸𑀯𑀚𑁆𑀚𑀸 𑀧𑀦 𑀲𑀸𑀯𑀚𑁆𑀚𑁂, 𑀅𑀦𑀯𑀚𑁆𑀚𑀸𑀦𑀯𑀚𑁆𑀚𑀓𑁂;

𑀕𑀳𑁂𑀢𑀩𑁆𑀩𑀸 𑀢𑀼 𑀲𑀩𑁆𑀩𑀢𑁆𑀣, 𑀲𑀸𑀥𑀸𑀭𑀡𑀸 𑀧𑀓𑀺𑀡𑁆𑀡𑀓𑀸.

𑁪𑁯𑁯. 𑀛𑀸𑀦𑀧𑀜𑁆𑀘𑀓𑀘𑀺𑀢𑁆𑀢𑁂𑀲𑀼, 𑀲𑀢𑁆𑀢𑀲𑀝𑁆𑀞𑀺𑀲𑀼 𑀦𑀺𑀤𑁆𑀤𑀺𑀲𑁂;

𑀛𑀸𑀦𑀗𑁆𑀕𑀬𑁄𑀕𑀪𑁂𑀤𑁂𑀦, 𑀭𑀸𑀲𑀺𑀪𑁂𑀤𑀁 𑀢𑀳𑀺𑀁 𑀢𑀳𑀺𑀁.

𑁫𑁦𑁦. 𑀘𑀢𑀼𑀙𑀓𑁆𑀓𑀸𑀦𑀯𑀚𑁆𑀚𑁂𑀲𑀼, 𑀜𑀸𑀡𑀧𑀻𑀢𑀺𑀓𑀢𑀁 𑀢𑀣𑀸;

𑀘𑀢𑀼𑀯𑀻𑀲 𑀧𑀭𑀺𑀢𑁆𑀢𑁂𑀲𑀼, 𑀘𑀢𑀼𑀥𑀸 𑀪𑁂𑀤𑀫𑀼𑀤𑁆𑀤𑀺𑀲𑁂.

𑁫𑁦𑁧. 𑀲𑀭𑀸𑀕𑀯𑀻𑀢𑀭𑀸𑀕𑀸𑀦𑀁, 𑀅𑀧𑁆𑀧𑀫𑀜𑁆𑀜𑀸𑀧𑀯𑀢𑁆𑀢𑀺𑀬𑀁;

𑀓𑀭𑀼𑀡𑀸𑀫𑀼𑀤𑀺𑀢𑀸 𑀳𑁄𑀦𑁆𑀢𑀺, 𑀓𑀸𑀫𑀧𑀼𑀜𑁆𑀜𑀫𑀳𑀸𑀓𑁆𑀭𑀺𑀬𑁂.

𑁫𑁦𑁨. 𑀉𑀧𑀘𑀸𑀭𑀧𑁆𑀧𑀦𑀸𑀧𑀢𑁆𑀢𑀸, 𑀲𑀼𑀔𑀺𑀢𑀸 𑀲𑀢𑁆𑀢𑀕𑁄𑀘𑀭𑀸;

𑀢𑀲𑁆𑀫𑀸 𑀦 𑀧𑀜𑁆𑀘𑀫𑀸𑀭𑀼𑀧𑁆𑀧𑁂, 𑀫𑀳𑀸𑀧𑀸𑀓𑁂 𑀅𑀦𑀼𑀢𑁆𑀢𑀭𑁂.

𑁫𑁦𑁩. 𑀲𑁄𑀢𑀸𑀧𑀢𑀺𑀢𑀼𑀧𑁂𑀓𑁆𑀔𑀸𑀲𑀼, 𑀧𑀭𑀺𑀓𑀫𑁆𑀫𑀸𑀤𑀺𑀲𑀫𑁆𑀪𑀯𑁂;

𑀛𑀸𑀦𑀸𑀦𑀁 𑀢𑀼𑀮𑁆𑀬𑀧𑀸𑀓𑀢𑁆𑀢𑀸, 𑀢𑀧𑁆𑀧𑀸𑀓𑁂𑀲𑀼 𑀘 𑀮𑀩𑁆𑀪𑀭𑁂.

𑁫𑁦𑁪. 𑀯𑀺𑀭𑀢𑀻 𑀘 𑀲𑀭𑀸𑀕𑀸𑀦𑀁, 𑀯𑀻𑀢𑀺𑀓𑁆𑀓𑀫𑀦𑀲𑀫𑁆𑀪𑀯𑀸;

𑀲𑀫𑁆𑀧𑀢𑁆𑀢𑁂 𑀘 𑀲𑀫𑀸𑀤𑀸𑀦𑁂, 𑀓𑀸𑀫𑀧𑀼𑀜𑁆𑀜𑁂𑀲𑀼 𑀮𑀩𑁆𑀪𑀭𑁂.

𑁫𑁦𑁫. 𑀢𑀁𑀢𑀁𑀤𑁆𑀯𑀸𑀭𑀺𑀓𑀤𑀼𑀲𑁆𑀲𑀺𑀮𑁆𑀬-𑀘𑁂𑀢𑀦𑀼𑀘𑁆𑀙𑁂𑀤𑀓𑀺𑀘𑁆𑀘𑀢𑁄;

𑀫𑀕𑁆𑀕𑁂 𑀘 𑀢𑀼𑀮𑁆𑀬𑀧𑀸𑀓𑀢𑁆𑀢𑀸, 𑀨𑀮𑁂 𑀘 𑀦𑀺𑀬𑀢𑀸 𑀲𑀺𑀬𑀼𑀁.

𑁫𑁦𑁬. 𑀧𑀯𑀢𑁆𑀢𑀸𑀓𑀸𑀭𑀯𑀺𑀲𑀬𑀪𑀺𑀦𑁆𑀦𑀸 𑀧𑀜𑁆𑀘𑀸𑀧𑀺 𑀲𑀫𑁆𑀪𑀯𑀸;

𑀮𑁄𑀓𑀺𑀬𑁂 𑀮𑀩𑁆𑀪𑀫𑀸𑀦𑀸𑀧𑀺, 𑀯𑀺𑀲𑀼𑀁 𑀘𑁂𑀯 𑀲𑀺𑀬𑀼𑀁 𑀦 𑀯𑀸.

𑁫𑁦𑁭. 𑀧𑀸𑀧𑀸 𑀮𑀩𑁆𑀪𑀦𑁆𑀢𑀺 𑀧𑀸𑀧𑁂𑀲𑀼, 𑀲𑀢𑁆𑀢 𑀙𑀓𑁆𑀓𑁂𑀓𑀓𑀸 𑀓𑀫𑀸;

𑀲𑀭𑀽𑀧𑀬𑁂𑀯𑁄𑀪𑀬𑀓𑀸, 𑀦𑀺𑀬𑀢𑀝𑁆𑀞 𑀙𑀴𑁂𑀢𑀭𑁂.

𑁫𑁦𑁮. 𑀲𑀸𑀥𑀸𑀭𑀡𑀸 𑀘 𑀲𑀩𑁆𑀩𑀢𑁆𑀣, 𑀬𑀣𑀸𑀯𑀼𑀢𑁆𑀢𑀸 𑀧𑀓𑀺𑀡𑁆𑀡𑀓𑀸;

𑀢𑀢𑁆𑀣 𑀘𑁂𑀓𑀕𑁆𑀕𑀢𑀸 𑀦𑀢𑁆𑀣𑀺, 𑀇𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀓𑀗𑁆𑀔𑀺𑀢𑁂.

𑁫𑁦𑁯. 𑀙𑀦𑁆𑀤𑀸𑀥𑀺𑀫𑁄𑀓𑁆𑀔𑀸 𑀬𑁂𑀯𑀸𑀧𑀺, 𑀯𑀻𑀲𑁂𑀓𑀸𑀤𑀲𑀯𑀚𑁆𑀚𑀺𑀢𑁂;

𑀉𑀤𑁆𑀥𑀘𑁆𑀘𑀫𑁂𑀓𑀸𑀤𑀲𑀲𑀼, 𑀫𑀚𑁆𑀛𑀢𑁆𑀢𑀫𑀦𑀯𑀚𑁆𑀚𑀓𑁂.

𑁫𑁧𑁦. 𑀲𑀩𑁆𑀩𑀢𑁆𑀣 𑀫𑀦𑀲𑀺𑀓𑀸𑀭𑁄, 𑀢𑀺𑀤𑁆𑀯𑁂𑀓𑀤𑁆𑀯𑀺𑀢𑀺𑀓𑀸𑀧𑀭𑁂;

𑀅𑀝𑁆𑀞𑀝𑁆𑀞𑀯𑀻𑀲𑀘𑀢𑀽𑀲𑀼, 𑀧𑀜𑁆𑀘𑀤𑁆𑀯𑀻𑀲𑀼 𑀬𑀣𑀸𑀓𑁆𑀓𑀫𑀁.

𑁫𑁧𑁧. 𑀲𑀫𑀼𑀤𑀸𑀬𑀯𑀲𑁂𑀦𑁂𑀢𑁆𑀣, 𑀉𑀤𑁆𑀥𑀘𑁆𑀘𑀯𑀺𑀭𑀢𑀺𑀢𑁆𑀢𑀬𑀁;

𑀲𑀯𑀺𑀪𑀢𑁆𑀢𑀺𑀓𑀫𑀜𑁆𑀜𑀢𑁆𑀣, 𑀅𑀯𑀺𑀪𑀢𑁆𑀢𑀺𑀓𑀫𑁂𑀯 𑀢𑀁.

𑁫𑁧𑁨. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀢𑁂𑀦𑁂𑀢𑀁, 𑀯𑀺𑀪𑀢𑁆𑀢𑀺𑀅𑀯𑀺𑀪𑀢𑁆𑀢𑀺𑀓𑀁;

𑀇𑀢𑀺 𑀲𑀸𑀥𑀼 𑀲𑀮𑁆𑀮𑀓𑁆𑀔𑁂𑀬𑁆𑀬, 𑀲𑀫𑁆𑀪𑀯𑀸𑀲𑀫𑁆𑀪𑀯𑀁 𑀩𑀼𑀥𑁄𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀭𑀸𑀲𑀺𑀲𑀫𑁆𑀪𑀯𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀘𑀼𑀤𑁆𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.