𑁧𑁩. 𑀭𑀸𑀲𑀺𑀬𑁄𑀕𑀓𑀣𑀸

𑁪𑁪𑁧. 𑀇𑀢𑀺 𑀭𑀸𑀲𑀺𑀯𑀻𑀣𑀺𑀁 𑀜𑀢𑁆𑀯𑀸, 𑀮𑀩𑁆𑀪𑀫𑀸𑀦𑀯𑀲𑀸 𑀩𑀼𑀥𑁄;

𑀢𑁂𑀲𑀫𑁂𑀯𑀸𑀣 𑀬𑁄𑀕𑀫𑁆𑀧𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀤𑀻𑀧𑀬𑁂.

𑁪𑁪𑁨. 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑁆𑀲, 𑀧𑀞𑀫𑀤𑁆𑀯𑀬𑀫𑀸𑀦𑀲𑁂;

𑀲𑀩𑁆𑀩𑁂𑀧𑀺 𑀭𑀸𑀲𑀬𑁄 𑀳𑁄𑀦𑁆𑀢𑀺, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁.

𑁪𑁪𑁩. 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀻 𑀘, 𑀛𑀸𑀦𑀧𑀜𑁆𑀘𑀓𑀭𑀸𑀲𑀺 𑀘;

𑀇𑀦𑁆𑀤𑁆𑀭𑀺𑀬𑀝𑁆𑀞𑀓𑀭𑀸𑀲𑀻 𑀘, 𑀫𑀕𑁆𑀕𑀧𑀜𑁆𑀘𑀓𑀭𑀸𑀲𑀺 𑀘.

𑁪𑁪𑁪. 𑀩𑀮𑀲𑀢𑁆𑀢𑀓𑀭𑀸𑀲𑀻 𑀘, 𑀳𑁂𑀢𑀼𑀓𑀫𑁆𑀫𑀧𑀣𑀢𑁆𑀢𑀺𑀓𑀸;

𑀤𑀲𑀸𑀯𑀲𑁂𑀲𑀸 𑀭𑀸𑀲𑀻 𑀘, 𑀮𑁄𑀓𑀧𑀸𑀮𑀤𑀼𑀓𑀸𑀤𑀬𑁄.

𑁪𑁪𑁫. 𑀬𑁂𑀯𑀸𑀧𑀦𑀓𑀦𑀯𑀓𑀁, 𑀦𑀺𑀬𑀢𑀼𑀤𑁆𑀥𑀘𑁆𑀘𑀯𑀚𑁆𑀚𑀺𑀢𑀸;

𑀅𑀧𑁆𑀧𑀫𑀜𑁆𑀜𑀸𑀤𑁆𑀯𑀬𑀜𑁆𑀘𑁂𑀯, 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄𑀢𑀺 𑀘.

𑁪𑁪𑁬. 𑀇𑀢𑀺 𑀲𑀢𑁆𑀢𑀭𑀲𑁂𑀯𑁂𑀢𑁂, 𑀤𑁂𑀲𑀺𑀢𑀸 𑀘 𑀲𑀭𑀽𑀧𑀢𑁄;

𑀬𑁂𑀯𑀸𑀧𑀦𑀓𑀭𑀸𑀲𑀻 𑀘, 𑀮𑀩𑁆𑀪𑀦𑁆𑀢𑀺𑀝𑁆𑀞𑀸𑀭𑀲𑀸𑀧𑀺 𑀘.

𑁪𑁪𑁭. 𑀙𑀧𑁆𑀧𑀜𑁆𑀜𑀸𑀲 𑀧𑀤𑀸𑀦𑁂𑀢𑁆𑀣, 𑀤𑁂𑀲𑀺𑀢𑀸𑀦𑀺 𑀲𑀭𑀽𑀧𑀢𑁄;

𑀥𑀫𑁆𑀫𑀸 𑀧𑀦 𑀲𑀫𑀢𑀺𑀁𑀲, 𑀢𑀢𑁆𑀣 𑀳𑁄𑀦𑁆𑀢𑀺 𑀲𑀭𑀽𑀧𑀢𑁄.

𑁪𑁪𑁮. 𑀢𑀸𑀦𑀺 𑀬𑁂𑀯𑀸𑀧𑀦𑀓𑁂𑀳𑀺, 𑀧𑀜𑁆𑀘𑀲𑀝𑁆𑀞𑀺 𑀧𑀤𑀸𑀦𑀺 𑀘;

𑀥𑀫𑁆𑀫𑀸 𑀘𑁂𑀓𑀽𑀦𑀢𑀸𑀮𑀻𑀲, 𑀪𑀯𑀦𑁆𑀢𑀺 𑀧𑀦 𑀲𑀫𑁆𑀪𑀯𑀸.

𑁪𑁪𑁯. 𑀢𑀢𑁆𑀣 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀘, 𑀤𑁂𑀲𑀺𑀢𑀸 𑀲𑀯𑀺𑀪𑀢𑁆𑀢𑀺𑀓𑀸;

𑀅𑀯𑀲𑁂𑀲𑀸 𑀢𑀼 𑀲𑀩𑁆𑀩𑁂𑀧𑀺, 𑀅𑀯𑀺𑀪𑀢𑁆𑀢𑀺𑀓𑀦𑀸𑀫𑀓𑀸.

𑁪𑁫𑁦. 𑀏𑀓𑀤𑁆𑀯𑀺 𑀘 𑀢𑀺𑀘𑀢𑀼𑀓𑁆𑀓-𑀙𑀲𑀢𑁆𑀢𑀝𑁆𑀞𑀸𑀦𑀺𑀓𑀸 𑀧𑀦;

𑀲𑀢𑁆𑀢𑀯𑀻𑀲 𑀘 𑀲𑀢𑁆𑀢𑁂𑀓𑁄, 𑀤𑁆𑀯𑁂𑀓𑁂𑀓𑁄 𑀘 𑀬𑀣𑀸𑀓𑁆𑀓𑀫𑀁.

𑁪𑁫𑁧. 𑀦𑀺𑀬𑀢𑀸 𑀢𑀼 𑀘𑀢𑀼𑀢𑁆𑀢𑀺𑀁𑀲, 𑀥𑀫𑁆𑀫𑀸𑀯 𑀲𑀳𑀯𑀼𑀢𑁆𑀢𑀺𑀢𑁄;

𑀬𑀣𑀸𑀲𑀫𑁆𑀪𑀯𑀯𑀼𑀢𑁆𑀢𑀺𑀢𑁄, 𑀧𑀜𑁆𑀘𑀥𑀸 𑀦𑀺𑀬𑀢𑀸 𑀓𑀣𑀸.

𑁪𑁫𑁨. 𑀢𑀢𑁆𑀣 𑀘𑀸𑀦𑀺𑀬𑀢𑁂 𑀲𑀩𑁆𑀩𑁂, 𑀕𑀳𑁂𑀢𑁆𑀯𑀸 𑀘 𑀧𑀳𑀸𑀬 𑀘;

𑀧𑀘𑁆𑀘𑁂𑀓𑀜𑁆𑀘 𑀕𑀳𑁂𑀢𑁆𑀯𑀸𑀧𑀺, 𑀲𑀢𑁆𑀢𑀥𑀸 𑀬𑁄𑀚𑀦𑀓𑁆𑀓𑀫𑁄.

𑁪𑁫𑁩. 𑀲𑀓𑀺𑀫𑁂𑀓𑀽𑀦𑀢𑀸𑀮𑀻𑀲, 𑀘𑀢𑀼𑀢𑁆𑀢𑀺𑀁𑀲 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘 𑀬𑁄𑀚𑁂𑀬𑁆𑀬, 𑀧𑀜𑁆𑀘𑀢𑀺𑀁𑀲𑀸𑀢𑀺 𑀧𑀡𑁆𑀟𑀺𑀢𑁄.

𑁪𑁫𑁪. 𑀭𑀸𑀲𑀬𑁄 𑀘 𑀧𑀤𑀸𑀦𑀻𑀥, 𑀥𑀫𑁆𑀫𑀦𑁆𑀢𑀭𑀯𑀺𑀪𑀢𑁆𑀢𑀺𑀬𑁄;

𑀲𑀭𑀽𑀧𑀬𑁂𑀯𑀸𑀧𑀦𑀓𑁂, 𑀦𑀺𑀬𑀢𑀸𑀦𑀺𑀬𑀢𑁂 𑀬𑀣𑀸.

𑁪𑁫𑁫. 𑀬𑁄𑀚𑀦𑀸𑀦𑀬𑀪𑁂𑀤𑀜𑁆𑀘, 𑀕𑀡𑀦𑀸𑀲𑀗𑁆𑀕𑀳𑀝𑁆𑀞𑀺𑀢𑀺;

𑀮𑀩𑁆𑀪𑀫𑀸𑀦𑀸𑀦𑀼𑀫𑀸𑀦𑁂𑀦, 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑀳𑀺𑀁 𑀢𑀳𑀺𑀁.

𑁪𑁫𑁬. 𑀜𑀸𑀡𑀁 𑀜𑀸𑀡𑀯𑀺𑀬𑀼𑀢𑁆𑀢𑀫𑁆𑀳𑀺, 𑀳𑀺𑀢𑁆𑀯𑀸 𑀧𑀻𑀢𑀺𑀁 𑀉𑀧𑁂𑀓𑁆𑀔𑀺𑀢𑁂;

𑀯𑁂𑀤𑀦𑀸 𑀧𑀭𑀺𑀯𑀢𑁆𑀢𑁂𑀦𑁆𑀢𑁄, 𑀓𑀸𑀫𑀧𑀼𑀜𑁆𑀜𑁂 𑀘 𑀲𑁂𑀲𑀓𑁂.

𑁪𑁫𑁭. 𑀫𑀳𑀸𑀓𑁆𑀭𑀺𑀬𑁂 𑀘 𑀬𑁄𑀚𑁂𑀬𑁆𑀬, 𑀧𑀳𑀸𑀬 𑀯𑀺𑀭𑀢𑀺𑀢𑁆𑀢𑀬𑀁;

𑀅𑀧𑁆𑀧𑀫𑀜𑁆𑀜𑀸 𑀘 𑀳𑀺𑀢𑁆𑀯𑀸𑀣, 𑀫𑀳𑀸𑀧𑀸𑀓𑁂 𑀘 𑀬𑁄𑀚𑀬𑁂.

𑁪𑁫𑁮. 𑀢𑀓𑁆𑀓𑀸𑀤𑀺𑀁 𑀓𑀫𑀢𑁄 𑀳𑀺𑀢𑁆𑀯𑀸, 𑀲𑀩𑁆𑀩𑀢𑁆𑀣 𑀯𑀺𑀭𑀢𑀺𑀢𑁆𑀢𑀬𑀁;

𑀧𑀜𑁆𑀘𑀫𑁂 𑀅𑀧𑁆𑀧𑀫𑀜𑁆𑀜𑀸𑀬, 𑀳𑀺𑀢𑁆𑀯𑀸 𑀭𑀽𑀧𑁂 𑀘 𑀬𑁄𑀚𑀬𑁂.

𑁪𑁫𑁯. 𑀳𑀺𑀢𑁆𑀯𑀸𑀧𑁆𑀧𑀫𑀜𑁆𑀜𑀸 𑀬𑁄𑀚𑀬𑁂, 𑀬𑀣𑀸𑀛𑀸𑀦𑀫𑀦𑀼𑀢𑁆𑀢𑀭𑁂;

𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀜𑁆𑀘𑁂𑀯, 𑀕𑀳𑁂𑀢𑁆𑀯𑀸 𑀯𑀺𑀭𑀢𑀺𑀢𑁆𑀢𑀬𑀁.

𑁪𑁬𑁦. 𑀛𑀸𑀦𑀸𑀦𑀺 𑀘𑀢𑀼𑀢𑀸𑀮𑀻𑀲, 𑀲𑀼𑀔𑀬𑀼𑀢𑁆𑀢𑀸𑀦𑀺 𑀯𑀢𑁆𑀢𑀭𑁂;

𑀉𑀧𑁂𑀓𑁆𑀔𑀺𑀢𑀸𑀦𑀺 𑀢𑁂𑀯𑀻𑀲, 𑀧𑀜𑁆𑀘𑀫𑀚𑁆𑀛𑀸𑀦𑁂 𑀘 𑀲𑀩𑁆𑀩𑀣𑀸.

𑁪𑁬𑁧. 𑀅𑀧𑁆𑀧𑀫𑀜𑁆𑀜𑀸𑀯𑀺𑀭𑀢𑀺𑀬𑁄, 𑀓𑀸𑀫𑀧𑀼𑀜𑁆𑀜𑁂𑀲𑀼 𑀮𑀩𑁆𑀪𑀭𑁂;

𑀅𑀧𑁆𑀧𑀫𑀜𑁆𑀜𑀸 𑀭𑀽𑀧𑀚𑁆𑀛𑀸𑀦-𑀘𑀢𑀼𑀓𑁆𑀓𑁂 𑀘 𑀫𑀳𑀸𑀓𑁆𑀭𑀺𑀬𑁂.

𑁪𑁬𑁨. 𑀮𑁄𑀓𑀼𑀢𑁆𑀢𑀭𑁂𑀲𑀼 𑀲𑀩𑁆𑀩𑀢𑁆𑀣, 𑀲𑀫𑁆𑀪𑁄𑀢𑀺 𑀯𑀺𑀭𑀢𑀺𑀢𑁆𑀢𑀬𑀁;

𑀦𑀢𑁆𑀣𑀺𑀤𑁆𑀯𑀬𑀫𑁆𑀧𑀺 𑀆𑀭𑀼𑀧𑁆𑀧𑁂, 𑀫𑀳𑀸𑀧𑀸𑀓𑁂 𑀘 𑀧𑀜𑁆𑀘𑀫𑁂.

𑁪𑁬𑁩. 𑀯𑀺𑀢𑀓𑁆𑀓𑀸𑀤𑀺𑀢𑁆𑀢𑀬𑀁 𑀧𑀜𑁆𑀜𑀸, 𑀧𑀜𑁆𑀘 𑀘𑀸𑀦𑀺𑀬𑀢𑀸 𑀘𑀮𑀸;

𑀳𑀸𑀦𑀺𑀩𑀼𑀤𑁆𑀥𑀺𑀯𑀲𑀸 𑀲𑁂𑀲𑀸, 𑀦 𑀘𑀮𑀦𑁆𑀢𑀺 𑀓𑀼𑀤𑀸𑀘𑀦𑀁.

𑁪𑁬𑁪. 𑀩𑀸𑀯𑀻𑀲𑀢𑀺𑀯𑀺𑀥𑁄 𑀘𑁂𑀢𑁆𑀣, 𑀲𑀗𑁆𑀕𑀳𑁄 𑀅𑀦𑀯𑀚𑁆𑀚𑀓𑁂;

𑀤𑁆𑀯𑀬𑀤𑁆𑀯𑀬𑀯𑀲𑀸 𑀘𑁂𑀯, 𑀛𑀸𑀦𑀧𑀜𑁆𑀘𑀓𑀢𑁄𑀧𑀺 𑀘.

𑁪𑁬𑁫. 𑀇𑀢𑀺 𑀜𑀢𑁆𑀯𑀸𑀦𑀯𑀚𑁆𑀚𑁂𑀲𑀼, 𑀭𑀸𑀲𑀺𑀲𑀗𑁆𑀕𑀳 𑀲𑀫𑁆𑀪𑀯𑀁;

𑀲𑀸𑀯𑀚𑁆𑀚𑁂𑀲𑀼𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀯𑀺𑀜𑁆𑀜𑀼𑀦𑀸 𑀭𑀸𑀲𑀬𑁄 𑀓𑀣𑀁.

𑁪𑁬𑁬. 𑀮𑁄𑀪𑀫𑀽𑀮𑁂𑀲𑀼 𑀧𑀞𑀫𑁂, 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺 𑀘;

𑀛𑀸𑀦𑀧𑀜𑁆𑀘𑀓𑀭𑀸𑀲𑀻 𑀘, 𑀢𑀣𑁂𑀯𑀺𑀦𑁆𑀤𑁆𑀭𑀺𑀬𑀧𑀜𑁆𑀘𑀓𑀁.

𑁪𑁬𑁭. 𑀫𑀕𑁆𑀕𑀩𑀮𑀘𑀢𑀼𑀓𑁆𑀓𑀜𑁆𑀘, 𑀳𑁂𑀢𑀼𑀓𑀫𑁆𑀫𑀧𑀣𑀤𑀼𑀓𑀸;

𑀮𑁄𑀓𑀦𑀸𑀲𑀓𑀭𑀸𑀲𑀻 𑀘, 𑀲𑀫𑀣𑁄 𑀲𑀫𑀣𑀤𑁆𑀤𑀼𑀓𑀸.

𑁪𑁬𑁮. 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀁 𑀳𑀺𑀢𑁆𑀯𑀸, 𑀬𑁂𑀯𑀸𑀧𑀦𑀓𑀦𑀸𑀫𑀓𑀸;

𑀘𑀢𑁆𑀢𑀸𑀭𑁄 𑀘𑁂𑀢𑀺 𑀮𑀩𑁆𑀪𑀦𑁆𑀢𑀺, 𑀢𑀢𑁆𑀣𑁂𑀓𑀸𑀤𑀲 𑀭𑀸𑀲𑀬𑁄.

𑁪𑁬𑁯. 𑀤𑁆𑀯𑀢𑁆𑀢𑀺𑀁𑀲𑁂𑀯 𑀧𑀤𑀸𑀦𑁂𑀢𑁆𑀣, 𑀤𑁂𑀲𑀺𑀢𑀸𑀦𑀺 𑀲𑀭𑀽𑀧𑀢𑁄;

𑀢𑀸𑀦𑀺 𑀬𑁂𑀯𑀸𑀧𑀦𑀓𑁂𑀳𑀺, 𑀙𑀢𑁆𑀢𑀺𑀁𑀲𑁂𑀯 𑀪𑀯𑀦𑁆𑀢𑀺 𑀘.

𑁪𑁭𑁦. 𑀅𑀲𑀫𑁆𑀪𑀺𑀦𑁆𑀦𑀧𑀤𑀸𑀦𑁂𑀢𑁆𑀣, 𑀲𑀫𑀯𑀻𑀲𑀢𑀺 𑀲𑀫𑁆𑀪𑀯𑀸;

𑀲𑀯𑀺𑀪𑀢𑁆𑀢𑀺𑀓𑀦𑀸𑀫𑀸 𑀘, 𑀦𑀯 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

𑁪𑁭𑁧. 𑀏𑀓𑀤𑁆𑀯𑀬𑀢𑀺𑀘𑀢𑀼𑀓𑁆𑀓-𑀙𑀝𑁆𑀞𑀸𑀦𑀦𑀺𑀬𑀢𑀸 𑀧𑀦;

𑀏𑀓𑀸𑀤𑀲 𑀙𑀴𑁂𑀓𑀸 𑀘, 𑀓𑀫𑁂𑀦𑁂𑀓𑁄 𑀧𑀼𑀦𑁂𑀓𑀓𑁄.

𑁪𑁭𑁨. 𑀦𑀢𑁆𑀣𑁂𑀯𑀸𑀦𑀺𑀬𑀢𑀸 𑀳𑁂𑀢𑁆𑀣, 𑀬𑁂𑀯𑀸𑀧𑀦𑀓𑀦𑀸𑀫𑀓𑀸;

𑀬𑁄𑀚𑀦𑀸𑀦𑀬𑀪𑁂𑀤𑁄 𑀘, 𑀢𑀲𑁆𑀫𑀸 𑀢𑀢𑁆𑀣 𑀦 𑀯𑀺𑀚𑁆𑀚𑀢𑀺.

𑁪𑁭𑁩. 𑀫𑀸𑀦𑁄 𑀘 𑀣𑀺𑀦𑀫𑀺𑀤𑁆𑀥𑀜𑁆𑀘, 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀢𑀣𑀸;

𑀓𑀼𑀓𑁆𑀓𑀼𑀘𑁆𑀘𑀫𑀺𑀢𑀺 𑀲𑀸𑀯𑀚𑁆𑀚𑁂, 𑀙𑀴𑁂𑀯𑀸𑀦𑀺𑀬𑀢𑀸 𑀫𑀢𑀸.

𑁪𑁭𑁪. 𑀫𑀸𑀦𑁄 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑁂𑀲𑀼, 𑀲𑀲𑀗𑁆𑀔𑀸𑀭𑁂𑀲𑀼 𑀧𑀜𑁆𑀘𑀲𑀼;

𑀣𑀺𑀦𑀫𑀺𑀤𑁆𑀥𑀁 𑀢𑀬𑁄 𑀲𑁂𑀲𑀸, 𑀧𑀝𑀺𑀖𑀤𑁆𑀯𑀬𑀬𑁄𑀕𑀺𑀦𑁄.

𑁪𑁭𑁫. 𑀇𑀘𑁆𑀘𑁂𑀯𑀫𑀝𑁆𑀞 𑀲𑀸𑀯𑀚𑁆𑀚𑀸, 𑀅𑀦𑀯𑀚𑁆𑀚𑀝𑁆𑀞𑀯𑀻𑀲𑀢𑀺;

𑀙𑀢𑁆𑀢𑀺𑀁𑀲 𑀫𑀸𑀦𑀲𑀸 𑀲𑀩𑁆𑀩𑁂, 𑀳𑁄𑀦𑁆𑀢𑀸𑀦𑀺𑀬𑀢𑀬𑁄𑀕𑀺𑀦𑁄.

𑁪𑁭𑁬. 𑀢𑁂𑀳𑀺 𑀬𑀼𑀢𑁆𑀢𑀸 𑀬𑀣𑀸𑀬𑁄𑀕𑀁, 𑀏𑀓𑀤𑁆𑀯𑀺𑀢𑁆𑀢𑀬𑀧𑀜𑁆𑀘𑀳𑀺;

𑀤𑁆𑀯𑁂 𑀤𑁆𑀯𑀸𑀯𑀻𑀲𑀁 𑀢𑀬𑁄 𑀘𑁂𑀯, 𑀦𑀯 𑀘𑀸𑀣 𑀬𑀣𑀸𑀓𑁆𑀓𑀫𑀁.

𑁪𑁭𑁭. 𑀇𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦, 𑀮𑀩𑁆𑀪𑀫𑀸𑀦𑀯𑀲𑀸 𑀧𑀦;

𑀢𑀤𑀜𑁆𑀜𑁂𑀲𑀼𑀧𑀺 𑀬𑁄𑀚𑁂𑀬𑁆𑀬, 𑀲𑀸𑀯𑀚𑁆𑀚𑁂𑀲𑀼 𑀬𑀣𑀸𑀓𑁆𑀓𑀫𑀁.

𑁪𑁭𑁮. 𑀮𑁄𑀪𑀫𑀽𑀮𑁂𑀲𑀼 𑀮𑁄𑀪𑀜𑁆𑀘, 𑀤𑁄𑀲𑀜𑁆𑀘 𑀧𑀝𑀺𑀖𑀤𑁆𑀯𑀬𑁂;

𑀫𑁄𑀳𑀫𑀽𑀮𑁂 𑀓𑀗𑁆𑀔𑀼𑀤𑁆𑀥𑀘𑁆𑀘𑀁, 𑀕𑀳𑁂𑀢𑁆𑀯𑀸 𑀳𑁂𑀢𑀼𑀭𑀸𑀲𑀺𑀬𑀁.

𑁪𑁭𑁯. 𑀤𑀺𑀝𑁆𑀞𑀺𑀁 𑀤𑀺𑀝𑁆𑀞𑀺𑀯𑀺𑀬𑀼𑀢𑁆𑀢𑀫𑁆𑀳𑀺, 𑀳𑀺𑀢𑁆𑀯𑀸 𑀧𑀻𑀢𑀺𑀫𑀼𑀧𑁂𑀓𑁆𑀔𑀺𑀢𑁂;

𑀯𑁂𑀤𑀦𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄, 𑀤𑁄𑀲𑀫𑀽𑀮𑁂 𑀘 𑀧𑀡𑁆𑀟𑀺𑀢𑁄.

𑁪𑁮𑁦. 𑀢𑀣𑀸 𑀓𑀫𑁆𑀫𑀧𑀣𑀁 𑀤𑀺𑀝𑁆𑀞𑀺𑀁,

𑀧𑀻𑀢𑀺𑀁 𑀙𑀦𑁆𑀤𑀜𑁆𑀘 𑀫𑁄𑀫𑀼𑀳𑁂;

𑀓𑀗𑁆𑀔𑀺𑀢𑁂 𑀅𑀥𑀺𑀫𑁄𑀓𑁆𑀔𑀜𑁆𑀘,

𑀳𑀺𑀢𑁆𑀯𑀸 𑀬𑁄𑀚𑁂𑀬𑁆𑀬 𑀭𑀸𑀲𑀬𑁄.

𑁪𑁮𑁧. 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺𑀁 𑀧𑀢𑁆𑀢𑀸𑀲𑀼, 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀧𑀦;

𑀓𑀗𑁆𑀔𑀺𑀢𑁂 𑀧𑀭𑀺𑀳𑀻𑀦𑀸𑀯, 𑀇𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀜𑁆𑀘𑀲𑀼.

𑁪𑁮𑁨. 𑀇𑀢𑀺 𑀤𑁆𑀯𑀸𑀤𑀲𑀥𑀸 𑀜𑀢𑁆𑀯𑀸, 𑀲𑀸𑀯𑀚𑁆𑀚𑁂𑀲𑀼𑀧𑀺 𑀲𑀗𑁆𑀕𑀳𑀁;

𑀅𑀳𑁂𑀢𑀼𑀓𑁂𑀧𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀬𑀣𑀸𑀲𑀫𑁆𑀪𑀯𑀢𑁄 𑀓𑀣𑀁.

𑁪𑁮𑁩. 𑀅𑀝𑁆𑀞𑀸𑀭𑀲𑀸𑀳𑁂𑀢𑀼𑀓𑁂𑀲𑀼, 𑀧𑀜𑁆𑀘𑀯𑀺𑀜𑁆𑀜𑀸𑀡𑀫𑀸𑀦𑀲𑁂;

𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀻 𑀘, 𑀛𑀸𑀦𑀝𑁆𑀞𑀸𑀦𑀤𑀼𑀓𑀁 𑀢𑀣𑀸.

𑁪𑁮𑁪. 𑀇𑀦𑁆𑀤𑁆𑀭𑀺𑀬𑀢𑁆𑀢𑀺𑀓𑀭𑀸𑀲𑀻 𑀘, 𑀬𑁂𑀯𑀸𑀧𑀦𑀓𑀦𑀸𑀫𑀓𑁄;

𑀏𑀓𑁄 𑀫𑀦𑀲𑀺𑀓𑀸𑀭𑁄𑀢𑀺, 𑀘𑀢𑁆𑀢𑀸𑀭𑁄 𑀭𑀸𑀲𑀬𑁄 𑀲𑀺𑀬𑀼𑀁.

𑁪𑁮𑁫. 𑀅𑀲𑀫𑁆𑀪𑀺𑀦𑁆𑀦𑀸 𑀧𑀦𑀝𑁆𑀞𑁂𑀯, 𑀤𑁆𑀯𑁂 𑀢𑀢𑁆𑀣 𑀲𑀯𑀺𑀪𑀢𑁆𑀢𑀺𑀓𑀸;

𑀏𑀓𑀤𑁆𑀯𑀬𑀢𑀺𑀓𑀝𑁆𑀞𑀸𑀦𑀸, 𑀙𑀴𑁂𑀓𑁄 𑀘 𑀧𑀼𑀦𑁂𑀓𑀓𑁄.

𑁪𑁮𑁬. 𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀸𑀳𑁂𑀢𑀼-𑀧𑀝𑀺𑀲𑀦𑁆𑀥𑀺𑀬𑀼𑀕𑁂 𑀧𑀦;

𑀯𑀺𑀢𑀓𑁆𑀓𑁄 𑀘 𑀯𑀺𑀘𑀸𑀭𑁄 𑀘, 𑀅𑀥𑀺𑀓𑀸 𑀛𑀸𑀦𑀭𑀸𑀲𑀺𑀬𑀁.

𑁪𑁮𑁭. 𑀲𑀼𑀔𑀲𑀦𑁆𑀢𑀻𑀭𑀡𑁂 𑀧𑀻𑀢𑀺, 𑀤𑀼𑀢𑀺𑀬𑀸𑀯𑀚𑁆𑀚𑀦𑁂 𑀧𑀦;

𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀜𑁆𑀘, 𑀮𑀩𑁆𑀪𑀢𑀺𑀦𑁆𑀤𑁆𑀭𑀺𑀬𑀭𑀸𑀲𑀺𑀬𑀁.

𑁪𑁮𑁮. 𑀅𑀥𑀺𑀓𑀸 𑀳𑀲𑀺𑀢𑁂 𑀳𑁄𑀦𑁆𑀢𑀺, 𑀧𑀻𑀢𑀺 𑀘 𑀯𑀻𑀭𑀺𑀬𑀸𑀤𑀬𑁄;

𑀬𑁂𑀯𑀸𑀧𑀦𑀸𑀥𑀺𑀫𑁄𑀓𑁆𑀔𑁄 𑀘, 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑁂.

𑁪𑁮𑁯. 𑀇𑀘𑁆𑀘𑀸𑀦𑀯𑀚𑁆𑀚𑁂 𑀩𑀸𑀯𑀻𑀲,

𑀲𑀸𑀯𑀚𑁆𑀚𑁂 𑀤𑁆𑀯𑀸𑀤𑀲𑀸𑀧𑀭𑁂;

𑀬𑁄𑀕𑀸 𑀳𑁂𑀢𑀼𑀫𑁆𑀳𑀺 𑀧𑀜𑁆𑀘𑁂𑀢𑁂,

𑀢𑀸𑀮𑀻𑀲𑁂𑀓𑀽𑀦𑀓𑀸 𑀓𑀣𑀸𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀭𑀸𑀲𑀺𑀬𑁄𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀢𑁂𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.