𑁧𑁨. 𑀭𑀸𑀲𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁪𑁧𑁬. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀓𑀸𑀬𑀸 𑀙, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄;

𑀨𑀲𑁆𑀲𑀸 𑀘𑀓𑁆𑀔𑀸𑀤𑀺𑀲𑀫𑁆𑀨𑀲𑁆𑀲𑀸, 𑀙𑀩𑁆𑀩𑀺𑀥𑀸 𑀲𑀢𑁆𑀢𑀥𑀸𑀧𑀺 𑀘.

𑁪𑁧𑁭. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀻𑀳𑀺, 𑀪𑁂𑀤𑁂𑀳𑀺 𑀧𑀦 𑀯𑁂𑀤𑀦𑀸;

𑀲𑀜𑁆𑀜𑀸 𑀘 𑀘𑁂𑀢𑀦𑀸 𑀘𑁂𑀯, 𑀪𑀺𑀦𑁆𑀦𑀸 𑀙𑀥𑀸 𑀘 𑀲𑀢𑁆𑀢𑀥𑀸.

𑁪𑁧𑁮. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀥𑀫𑁆𑀫𑀸 𑀘, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀆𑀳𑀸𑀭𑀸 𑀘 𑀬𑀣𑀸𑀬𑁄𑀕𑀁, 𑀨𑀲𑁆𑀲𑀧𑀜𑁆𑀘𑀓𑀭𑀸𑀲𑀺𑀬𑀁.

𑁪𑁧𑁯. 𑀲𑀩𑁆𑀩𑁂 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀫𑀧𑀭𑀺𑀕𑁆𑀕𑀳𑁄;

𑀫𑀽𑀮𑀭𑀸𑀲𑀺 𑀘 𑀲𑁄 𑀲𑀩𑁆𑀩-𑀲𑀗𑁆𑀕𑀳𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁪𑁨𑁦. 𑀛𑀸𑀦𑀭𑀸𑀲𑀺𑀫𑁆𑀳𑀺 𑀧𑀜𑁆𑀘𑁂𑀯, 𑀥𑀫𑁆𑀫𑀸 𑀲𑀢𑁆𑀢𑀧𑁆𑀧𑀪𑁂𑀤𑀢𑁄;

𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀩𑀸𑀯𑀻𑀲, 𑀥𑀫𑁆𑀫𑀢𑁄 𑀧𑀦 𑀲𑁄𑀴𑀲.

𑁪𑁨𑁧. 𑀦𑀯 𑀫𑀕𑁆𑀕𑀗𑁆𑀕𑀥𑀫𑁆𑀫𑀸 𑀘, 𑀪𑀺𑀦𑁆𑀦𑀸 𑀤𑁆𑀯𑀸𑀤𑀲𑀥𑀸𑀧𑀺 𑀢𑁂;

𑀙𑀴𑁂𑀯 𑀳𑁂𑀢𑀼𑀬𑁄 𑀢𑀢𑁆𑀣, 𑀤𑁂𑀲𑀺𑀢𑀸 𑀓𑀗𑁆𑀔𑀺𑀢𑀼𑀤𑁆𑀥𑀯𑀸.

𑁪𑁨𑁨. 𑀤𑀲 𑀓𑀫𑁆𑀫𑀧𑀣𑀸 𑀥𑀫𑁆𑀫𑀸, 𑀙𑀴𑁂𑀯 𑀧𑀦 𑀤𑁂𑀲𑀺𑀢𑀸;

𑀲𑁂𑀲𑀸𑀯 𑀤𑀲𑀥𑀫𑁆𑀫𑁂𑀳𑀺, 𑀲𑀫𑀸𑀦𑀸 𑀘𑀢𑀼𑀭𑀸𑀲𑀬𑁄.

𑁪𑁨𑁩. 𑀧𑀜𑁆𑀜𑀸 𑀤𑀲𑀯𑀺𑀥𑀸 𑀢𑀢𑁆𑀣, 𑀯𑁂𑀤𑀦𑀸 𑀦𑀯𑀥𑀸 𑀞𑀺𑀢𑀸;

𑀲𑀫𑀸𑀥𑀺 𑀲𑀢𑁆𑀢𑀥𑀸 𑀳𑁄𑀢𑀺, 𑀯𑀻𑀭𑀺𑀬𑀁 𑀧𑀦 𑀧𑀜𑁆𑀘𑀥𑀸.

𑁪𑁨𑁪. 𑀲𑀢𑀺 𑀪𑀺𑀦𑁆𑀦𑀸 𑀘𑀢𑀼𑀥𑀸𑀯, 𑀯𑀺𑀢𑀓𑁆𑀓𑁄 𑀢𑀺𑀯𑀺𑀥𑁄 𑀫𑀢𑁄;

𑀤𑁆𑀯𑀺𑀥𑀸 𑀘𑀺𑀢𑁆𑀢𑀸𑀤𑀬𑁄 𑀳𑁄𑀦𑁆𑀢𑀺, 𑀤𑀲𑀧𑀜𑁆𑀘𑁂𑀯 𑀲𑀫𑁆𑀪𑀯𑀸.

𑁪𑁨𑁫. 𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀲𑀩𑁆𑀩𑁂𑀧𑀺, 𑀥𑀫𑁆𑀫𑀸 𑀏𑀓𑁂𑀓𑀥𑀸𑀧𑀺 𑀘;

𑀳𑀺𑀢𑁆𑀯𑀸 𑀭𑀽𑀧𑀺𑀦𑁆𑀤𑁆𑀭𑀺𑀬𑀸𑀦𑁂𑀢𑁂, 𑀯𑀺𑀪𑀸𑀕𑀸 𑀅𑀝𑁆𑀞𑀥𑀸 𑀓𑀣𑀁.

𑁪𑁨𑁬. 𑀨𑀲𑁆𑀲𑁄 𑀘 𑀘𑁂𑀢𑀦𑀸 𑀲𑀜𑁆𑀜𑀸, 𑀯𑀺𑀘𑀸𑀭𑁄 𑀧𑀻𑀢𑀺 𑀚𑀻𑀯𑀺𑀢𑀁;

𑀦𑀺𑀭𑀯𑀚𑁆𑀚𑀸 𑀙 𑀬𑀼𑀕𑀴𑀸, 𑀲𑀸𑀯𑀚𑁆𑀚𑀫𑁄𑀳𑀓𑀗𑁆𑀔𑀺𑀢𑀸.

𑁪𑁨𑁭. 𑀬𑁂𑀯𑀸𑀧𑀦𑀓𑀥𑀫𑁆𑀫𑀸 𑀘, 𑀯𑀺𑀭𑀢𑀼𑀤𑁆𑀥𑀘𑁆𑀘𑀯𑀚𑁆𑀚𑀺𑀢𑀸;

𑀤𑁆𑀯𑀸𑀤𑀲𑀸 𑀘𑁂𑀢𑀺 𑀲𑀩𑁆𑀩𑁂𑀧𑀺, 𑀤𑁆𑀯𑀢𑁆𑀢𑀺𑀁𑀲𑀓𑁂𑀓𑀥𑀸 𑀢𑀣𑀸.

𑁪𑁨𑁮. 𑀘𑀺𑀢𑁆𑀢𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀘𑀺𑀢𑁆𑀢𑀁, 𑀲𑀤𑁆𑀥𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀁;

𑀩𑀮𑁂𑀲𑀼 𑀮𑁄𑀓𑀺𑀬𑀸 𑀯𑀼𑀢𑁆𑀢𑀸, 𑀮𑁄𑀓𑀺𑀬𑁂 𑀘 𑀤𑀼𑀓𑀤𑁆𑀯𑀬𑁂.

𑁪𑁨𑁯. 𑀮𑁄𑀪𑀸𑀮𑁄𑀪𑀸𑀤𑀺𑀓𑀸 𑀤𑁆𑀯𑁂 𑀤𑁆𑀯𑁂,

𑀘𑀢𑁆𑀢𑀸𑀭𑁄 𑀳𑁂𑀢𑀼𑀭𑀸𑀲𑀺𑀬𑀁;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘 𑀫𑀕𑁆𑀕𑀗𑁆𑀕𑁂,

𑀧𑀜𑁆𑀘𑀓𑀫𑁆𑀫𑀧𑀣𑁂𑀧𑀺 𑀢𑁂.

𑁪𑁩𑁦. 𑀬𑁂𑀯𑀸𑀧𑀦𑀓𑀭𑀸𑀲𑀺𑀫𑁆𑀳𑀺, 𑀤𑁂𑀲𑀺𑀢𑀸 𑀯𑀺𑀭𑀢𑀼𑀤𑁆𑀥𑀯𑀸;

𑀫𑀕𑁆𑀕𑀳𑁂𑀢𑀽𑀲𑀼 𑀘𑁂𑀯𑁂𑀢𑀺, 𑀤𑁆𑀯𑀺𑀥𑀸 𑀧𑀜𑁆𑀘𑀤𑀲 𑀞𑀺𑀢𑀸.

𑁪𑁩𑁧. 𑀯𑀺𑀢𑀓𑁆𑀓𑁄 𑀛𑀸𑀦𑀫𑀕𑁆𑀕𑁂𑀲𑀼, 𑀢𑀺𑀯𑀺𑀥𑀸 𑀦𑀯𑀥𑀸 𑀧𑀦;

𑀯𑁂𑀤𑀦𑀸 𑀫𑀽𑀮𑀭𑀸𑀲𑀺𑀫𑁆𑀳𑀺, 𑀢𑀣𑀸 𑀛𑀸𑀦𑀺𑀦𑁆𑀤𑁆𑀭𑀺𑀬𑁂𑀲𑀼 𑀘.

𑁪𑁩𑁨. 𑀇𑀦𑁆𑀤𑁆𑀭𑀺𑀬𑀫𑀕𑁆𑀕𑀭𑀸𑀲𑀺𑀫𑁆𑀳𑀺, 𑀩𑀮𑀧𑀺𑀝𑁆𑀞𑀺𑀤𑀼𑀓𑀢𑁆𑀢𑀺𑀓𑁂;

𑀘𑀢𑀼𑀥𑀸 𑀲𑀢𑀺 𑀢𑀢𑁆𑀣𑁂𑀯, 𑀯𑀻𑀭𑀺𑀬𑀫𑁆𑀧𑀺 𑀘 𑀧𑀜𑁆𑀘𑀥𑀸.

𑁪𑁩𑁩. 𑀲𑀫𑀸𑀥𑀺 𑀲𑀢𑁆𑀢𑀥𑀸 𑀯𑀼𑀢𑁆𑀢𑁄, 𑀛𑀸𑀦𑀗𑁆𑀕𑁂𑀲𑀼 𑀘 𑀢𑀢𑁆𑀣 𑀘;

𑀢𑀢𑁆𑀣𑁂𑀯 𑀤𑀲𑀥𑀸 𑀧𑀜𑁆𑀜𑀸, 𑀳𑁂𑀢𑀼𑀓𑀫𑁆𑀫𑀧𑀣𑁂𑀲𑀼 𑀘.

𑁪𑁩𑁪. 𑀤𑀲𑀦𑀯𑀲𑀢𑁆𑀢𑀧𑀜𑁆𑀘𑀘𑀢𑀼𑀢𑀺𑀤𑁆𑀯𑁂𑀓𑀥𑀸 𑀞𑀺𑀢𑀸;

𑀙𑀴𑁂𑀓𑀓𑀸 𑀧𑀜𑁆𑀘𑀤𑀲, 𑀤𑁆𑀯𑀢𑁆𑀢𑀺𑀁𑀲 𑀘 𑀬𑀣𑀸𑀓𑁆𑀓𑀫𑀁.

𑁪𑁩𑁫. 𑀅𑀝𑁆𑀞 𑀯𑀺𑀪𑀸𑀕𑀲𑀗𑁆𑀔𑁂𑀧𑀸, 𑀧𑀤𑀸𑀦𑀺 𑀤𑀲𑀥𑀸 𑀲𑀺𑀬𑀼𑀁;

𑀢𑁂𑀧𑀜𑁆𑀜𑀸𑀲𑁂𑀯 𑀥𑀫𑁆𑀫𑀸 𑀘, 𑀅𑀝𑁆𑀞𑀸𑀭𑀲 𑀘 𑀭𑀸𑀲𑀬𑁄.

𑁪𑁩𑁬. 𑀇𑀢𑀺 𑀥𑀫𑁆𑀫𑀯𑀯𑀢𑁆𑀣𑀸𑀦𑁂, 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀧𑀦;

𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀘𑁆𑀙𑁂𑀤𑁂, 𑀉𑀤𑁆𑀤𑁂𑀲𑀦𑀬𑀲𑀗𑁆𑀕𑀳𑁄.

𑁪𑁩𑁭. 𑀧𑀤𑀸𑀦𑀺 𑀘𑀢𑀼𑀭𑀸𑀲𑀻𑀢𑀺, 𑀤𑁂𑀲𑀺𑀢𑀸𑀦𑀺 𑀲𑀭𑀽𑀧𑀢𑁄;

𑀬𑁂𑀯𑀸𑀧𑀦𑀓𑀦𑀸𑀫𑁂𑀦, 𑀲𑁄𑀴𑀲𑁂𑀯 𑀬𑀣𑀸𑀭𑀳𑀁.

𑁪𑁩𑁮. 𑀢𑀢𑁆𑀣𑀸𑀦𑀺𑀬𑀢𑀦𑀸𑀫𑀸𑀦𑀺, 𑀧𑀤𑀸𑀦𑁂𑀓𑀸𑀤𑀲𑁂𑀯 𑀢𑀼;

𑀯𑀼𑀢𑁆𑀢𑀸𑀦𑁂𑀓𑀽𑀦𑀦𑀯𑀼𑀢𑀺, 𑀦𑀺𑀬𑀢𑀸𑀦𑁂𑀯 𑀲𑀫𑁆𑀪𑀯𑀸.

𑁪𑁩𑁯. 𑀅𑀲𑀫𑁆𑀪𑀺𑀦𑁆𑀦𑀧𑀤𑀸𑀦𑁂𑀢𑁆𑀣, 𑀢𑁂𑀧𑀜𑁆𑀜𑀸𑀲𑁂𑀯 𑀲𑀩𑁆𑀩𑀣𑀸;

𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀼, 𑀯𑀲𑁂𑀦 𑀧𑀭𑀺𑀤𑀻𑀧𑀬𑁂.

𑁪𑁪𑁦. 𑀯𑀺𑀪𑀸𑀕𑀧𑀤𑀥𑀫𑁆𑀫𑀸𑀦𑀁, 𑀯𑀲𑁂𑀦𑁂𑀯𑀁 𑀧𑀓𑀸𑀲𑀺𑀢𑁄;

𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀼, 𑀓𑀫𑀢𑁄 𑀭𑀸𑀲𑀺𑀦𑀺𑀘𑁆𑀙𑀬𑁄𑀢𑀺.

𑀇𑀢𑀺 𑀘𑁂𑀢𑀲𑀺𑀓𑀯𑀺𑀪𑀸𑀕𑁂 𑀭𑀸𑀲𑀺𑀯𑀺𑀦𑀺𑀘𑁆𑀙𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.