𑁧𑁨. 𑀤𑁆𑀯𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀲𑀸𑀯𑀢𑁆𑀣𑀸𑀯𑀺𑀪𑀸𑀕𑁄

𑁧𑁬𑁪𑁨. 𑀇𑀘𑁆𑀘𑀝𑁆𑀞𑀸𑀭𑀲𑀥𑀸 𑀪𑀺𑀦𑁆𑀦𑀸, 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀢𑁄;

𑀮𑀓𑁆𑀔𑀡𑀸𑀓𑀸𑀭𑀪𑁂𑀤𑁂𑀦, 𑀢𑀺𑀯𑀺𑀥𑀸𑀧𑀺 𑀘 𑀪𑀸𑀯𑀦𑀸.

𑁧𑁬𑁪𑁩. 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀪𑀗𑁆𑀕𑁂 𑀜𑀸𑀡𑀁 𑀪𑀬𑁂 𑀜𑀸𑀡𑀁, 𑀜𑀸𑀡𑀫𑀸𑀤𑀻𑀦𑀯𑁂𑀧𑀺 𑀘.

𑁧𑁬𑁪𑁪. 𑀢𑀣𑁂𑀯 𑀦𑀺𑀩𑁆𑀩𑀺𑀤𑀸𑀜𑀸𑀡𑀁, 𑀜𑀸𑀡𑀁 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸;

𑀧𑀝𑀺𑀲𑀗𑁆𑀔𑀸 𑀘 𑀲𑀗𑁆𑀔𑀸𑀭𑀼-𑀧𑁂𑀓𑁆𑀔𑀸𑀜𑀸𑀡𑀸𑀦𑀼𑀮𑁄𑀫𑀓𑀁.

𑁧𑁬𑁪𑁫. 𑀇𑀘𑁆𑀘𑀸𑀯𑀢𑁆𑀣𑀸𑀧𑀪𑁂𑀤𑁂𑀦, 𑀤𑀲𑀥𑀸𑀧𑀺 𑀯𑀺𑀪𑀸𑀯𑀺𑀢𑀸;

𑀲𑀪𑀸𑀕𑀢𑁆𑀣𑀯𑀺𑀲𑁂𑀲𑁂𑀦, 𑀢𑀺𑀥𑀸 𑀲𑀗𑁆𑀕𑀳𑀺𑀢𑀸 𑀧𑀼𑀦.

𑁧𑁬𑁪𑁬. 𑀬𑀣𑀸𑀪𑀽𑀢𑀁 𑀦𑀸𑀫 𑀜𑀸𑀡𑀢𑁆𑀢𑀬𑀁 𑀲𑀫𑁆𑀫𑀲𑀦𑀸𑀤𑀺𑀓𑀁;

𑀪𑀬𑀸𑀤𑀺𑀜𑀸𑀡𑀁 𑀢𑀺𑀯𑀺𑀥𑀁, 𑀦𑀺𑀩𑁆𑀩𑀺𑀤𑀸𑀢𑀺 𑀧𑀯𑀼𑀘𑁆𑀘𑀢𑀺.

𑁧𑁬𑁪𑁭. 𑀢𑀣𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀤𑀺, 𑀯𑀺𑀭𑀸𑀕𑁄𑀯 𑀘𑀢𑀼𑀩𑁆𑀩𑀺𑀥𑀁;

𑀮𑀓𑁆𑀔𑀡𑀢𑁆𑀢𑀬𑀦𑀺𑀚𑁆𑀛𑀸𑀦𑀯𑀲𑁂𑀦 𑀧𑀼𑀦 𑀯𑀼𑀝𑁆𑀞𑀺𑀢𑀸.

𑁧𑁬𑁪𑁮. 𑀲𑀼𑀜𑁆𑀜𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀜𑁆𑀘, 𑀢𑀣𑀸𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀘;

𑀲𑀸𑀥𑁂𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀁, 𑀯𑀺𑀫𑁄𑀓𑁆𑀔𑀢𑁆𑀢𑀬𑀫𑀼𑀢𑁆𑀢𑀫𑀁.

𑁧𑁬𑁪𑁯. 𑀇𑀢𑀺 𑀪𑀸𑀯𑁂𑀢𑀼𑀓𑀸𑀫𑀲𑁆𑀲, 𑀯𑀺𑀪𑀸𑀯𑁂𑀢𑀺 𑀬𑀣𑀸𑀓𑁆𑀓𑀫𑀁;

𑀤𑀲𑀸𑀯𑀢𑁆𑀣𑀸𑀯𑀺𑀪𑀸𑀕𑁂𑀦, 𑀲𑀫𑀸𑀤𑀸𑀬 𑀬𑀣𑀸 𑀓𑀣𑀁.

𑁧𑁬𑁫𑁦. 𑀯𑀺𑀲𑀼𑀤𑁆𑀥𑁄 𑀧𑀞𑀫𑀁 𑀢𑀸𑀯, 𑀲𑀸𑀥𑀼 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸;

𑀉𑀧𑀘𑀸𑀭𑀧𑁆𑀧𑀦𑀸𑀬𑀜𑁆𑀘, 𑀞𑀢𑁆𑀯𑀸 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀁.

𑁧𑁬𑁫𑁧. 𑀲𑀧𑁆𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀬𑁆𑀳, 𑀦𑀸𑀫𑀭𑀽𑀧𑀁 𑀲𑀪𑀸𑀯𑀢𑁄;

𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀁, 𑀧𑀢𑁆𑀯𑀸 𑀲𑀼𑀤𑁆𑀥𑀺𑀁 𑀢𑀢𑁄 𑀧𑀭𑀁.

𑁧𑁬𑁫𑁨. 𑀅𑀢𑀻𑀢𑀸𑀦𑀸𑀕𑀢𑁂 𑀔𑀦𑁆𑀥𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘 𑀲𑀸𑀲𑀯𑁂;

𑀓𑀮𑀸𑀧𑀢𑁄 𑀲𑀫𑁆𑀫𑀲𑀺𑀢𑁆𑀯𑀸, 𑀲𑀫𑁆𑀫𑀲𑁂𑀬𑁆𑀬 𑀢𑀺𑀮𑀓𑁆𑀔𑀡𑀁.

𑁧𑁬𑁫𑁩. 𑀆𑀤𑀸𑀦𑀦𑀺𑀓𑁆𑀔𑁂𑀧𑀦𑀢𑁄,

𑀯𑀬𑁄𑀯𑀼𑀤𑁆𑀥𑀢𑁆𑀣𑀕𑀸𑀫𑀺𑀢𑁄;

𑀆𑀳𑀸𑀭𑀢𑁄𑀧𑀺 𑀉𑀢𑀼𑀢𑁄,

𑀓𑀫𑁆𑀫𑀢𑁄 𑀘𑀸𑀧𑀺 𑀘𑀺𑀢𑁆𑀢𑀢𑁄.

𑁧𑁬𑁫𑁪. 𑀥𑀫𑁆𑀫𑀢𑀸𑀭𑀽𑀧𑀢𑁄 𑀘𑀸𑀧𑀺, 𑀭𑀽𑀧𑀲𑀢𑁆𑀢𑀓𑀢𑁄 𑀦𑀬𑁂;

𑀓𑀮𑀸𑀧𑀢𑁄 𑀬𑀫𑀓𑀢𑁄, 𑀔𑀡𑀺𑀓𑀸 𑀧𑀝𑀺𑀧𑀸𑀝𑀺𑀢𑁄.

𑁧𑁬𑁫𑁫. 𑀤𑀺𑀝𑁆𑀞𑀺𑀫𑀼𑀕𑁆𑀖𑀸𑀝𑀬𑀦𑁆𑀢𑁄 𑀘, 𑀫𑀸𑀦𑀫𑀼𑀕𑁆𑀖𑀸𑀝𑀬𑀁 𑀢𑀣𑀸;

𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑁄, 𑀦𑀸𑀫𑀲𑀢𑁆𑀢𑀓𑀢𑁄 𑀦𑀬𑁂.

𑁧𑁬𑁫𑁬. 𑀦𑀺𑀘𑁆𑀘𑀸 𑀘𑁂 𑀦 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁, 𑀦 𑀩𑀸𑀥𑁂𑀬𑁆𑀬𑀼𑀁 𑀲𑀼𑀔𑀸 𑀬𑀤𑀺;

𑀯𑀲𑁂 𑀯𑀢𑁆𑀢𑁂𑀬𑁆𑀬𑀼𑀫𑀢𑁆𑀢𑀸 𑀘𑁂, 𑀢𑀤𑀪𑀸𑀯𑀸 𑀦 𑀢𑀸𑀤𑀺𑀲𑀸.

𑁧𑁬𑁫𑁭. 𑀲𑀫𑁆𑀪𑀯𑀦𑁆𑀢𑀺 𑀳𑀺 𑀲𑀗𑁆𑀔𑀸𑀭𑀸, 𑀲𑀢𑀺 𑀧𑀘𑁆𑀘𑀬𑀲𑀫𑁆𑀪𑀯𑁂;

𑀢𑀢𑁄 𑀧𑀘𑁆𑀘𑀬𑀦𑀺𑀧𑁆𑀨𑀦𑁆𑀦𑀸, 𑀅𑀯𑀲𑁆𑀲𑀁 𑀪𑁂𑀤𑀕𑀸𑀫𑀺𑀦𑁄.

𑁧𑁬𑁫𑁮. 𑀢𑀤𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀸 𑀦𑀸𑀫 𑀪𑀬𑀝𑁆𑀞𑀢𑁄;

𑀅𑀦𑀢𑁆𑀢𑀸𑀲𑀸𑀭𑀓𑀝𑁆𑀞𑁂𑀦, 𑀲𑀗𑁆𑀔𑀸𑀭𑀸𑀢𑀺 𑀯𑀺𑀪𑀸𑀯𑀬𑀁.

𑁧𑁬𑁫𑁯. 𑀓𑀸𑀮𑁂𑀦 𑀲𑀫𑁆𑀫𑀲𑁂 𑀭𑀽𑀧𑀁, 𑀦𑀸𑀫𑀁 𑀓𑀸𑀮𑁂𑀦 𑀲𑀫𑁆𑀫𑀲𑁂;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀲𑀫𑀸𑀲𑀩𑁆𑀬𑀸𑀲𑀢𑁄 𑀢𑀢𑁄.

𑁧𑁬𑁬𑁦. 𑀬𑀣𑁄𑀧𑀝𑁆𑀞𑀺𑀢𑀪𑁂𑀤𑁂𑀦, 𑀲𑀫𑁆𑀫𑀲𑀦𑁆𑀢𑁄 𑀲𑀫𑀽𑀳𑀢𑁄;

𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀫𑀺𑀢𑀺 𑀪𑀸𑀯𑁂𑀢𑀺 𑀧𑀡𑁆𑀟𑀺𑀢𑁄.

𑁧𑁬𑁬𑁧. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀦𑁆𑀢𑀲𑁆𑀲, 𑀓𑀫𑁆𑀫𑀜𑁆𑀜𑀁 𑀳𑁄𑀢𑀺 𑀫𑀸𑀦𑀲𑀁;

𑀲𑀽𑀧𑀝𑁆𑀞𑀦𑁆𑀢𑀺 𑀘 𑀲𑀗𑁆𑀔𑀸𑀭𑀸, 𑀯𑁄𑀤𑀸𑀬𑀢𑀺 𑀘 𑀪𑀸𑀯𑀦𑀸.

𑁧𑁬𑁬𑁨. 𑀢𑀢𑁄 𑀧𑀭𑀁 𑀯𑀺𑀧𑀲𑁆𑀲𑀦𑁆𑀢𑁄, 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄;

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀪𑀸𑀯𑀸𑀦𑀁, 𑀔𑀦𑁆𑀥𑀸𑀦𑀫𑀼𑀤𑀬𑀩𑁆𑀩𑀬𑀁.

𑁧𑁬𑁬𑁩. 𑀢𑀡𑁆𑀳𑀸𑀲𑀫𑁆𑀫𑁄𑀳𑀓𑀫𑁆𑀫𑁂𑀳𑀺,

𑀔𑀦𑁆𑀥𑀧𑀜𑁆𑀘𑀓𑀲𑀪𑀸𑀯𑁄;

𑀭𑀽𑀧𑀫𑀸𑀳𑀸𑀭𑀢𑁄 𑀳𑁄𑀢𑀺,

𑀨𑀲𑁆𑀲𑀢𑁄 𑀯𑁂𑀤𑀦𑀸𑀤𑀬𑁄.

𑁧𑁬𑁬𑁪. 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀫𑁆𑀳𑀸, 𑀲𑀫𑁆𑀪𑁄𑀢𑀻𑀢𑀺 𑀘 𑀧𑀲𑁆𑀲𑀢𑁄;

𑀢𑀲𑁆𑀲 𑀧𑀘𑁆𑀘𑀬𑀢𑁄 𑀳𑁄𑀢𑀺, 𑀔𑀦𑁆𑀥𑁂𑀲𑀼𑀤𑀬𑀤𑀲𑁆𑀲𑀦𑀁.

𑁧𑁬𑁬𑁫. 𑀢𑀡𑁆𑀳𑀸𑀤𑀻𑀦𑀁 𑀦𑀺𑀭𑁄𑀥𑀸 𑀘,

𑀦𑀺𑀭𑁄𑀥𑁄 𑀳𑁄𑀢𑀺 𑀧𑀲𑁆𑀲𑀢𑁄;

𑀢𑀣𑀸 𑀯𑀻𑀲𑀢𑀺𑀥𑀸 𑀳𑁄𑀢𑀺,

𑀢𑀢𑁆𑀣𑁂𑀯 𑀯𑀬𑀤𑀲𑁆𑀲𑀦𑀁.

𑁧𑁬𑁬𑁬. 𑀦𑀺𑀩𑁆𑀩𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀦 𑀧𑀲𑁆𑀲𑀢𑁄;

𑀔𑀡𑀢𑁄 𑀤𑀲𑀥𑀸 𑀦𑁂𑀲𑀫𑀼𑀤𑀬𑀩𑁆𑀩𑀬𑀤𑀲𑁆𑀲𑀦𑀁.

𑁧𑁬𑁬𑁭. 𑀇𑀢𑁆𑀣𑀁 𑀧𑀜𑁆𑀜𑀸𑀲𑀥𑀸 𑀪𑁂𑀤𑁄,

𑀔𑀦𑁆𑀥𑀸𑀦𑀫𑀼𑀤𑀬𑀩𑁆𑀩𑀬𑁄;

𑀆𑀬𑀢𑀦𑀸𑀤𑀺𑀪𑁂𑀤𑁄𑀧𑀺,

𑀬𑁄𑀚𑁂𑀢𑀩𑁆𑀩𑁄 𑀬𑀣𑀸𑀭𑀳𑀁.

𑁧𑁬𑁬𑁮. 𑀢𑀤𑁂𑀯𑀫𑀦𑀼𑀧𑀲𑁆𑀲𑀦𑁆𑀢𑁄, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀪𑀸𑀯𑁂𑀢𑀺 𑀩𑀳𑀼𑀥𑀸 𑀩𑀼𑀥𑁄.

𑁧𑁬𑁬𑁯. 𑀪𑀸𑀯𑀦𑀸𑀧𑀲𑀼𑀢𑀲𑁆𑀲𑁂𑀯𑀁, 𑀧𑀲𑁆𑀲𑀢𑁄 𑀩𑁄𑀥𑀺𑀧𑀓𑁆𑀔𑀺𑀬𑀸;

𑀧𑀸𑀢𑀼𑀪𑀽𑀢𑀸 𑀧𑀯𑀢𑁆𑀢𑀦𑁆𑀢𑀺, 𑀯𑀺𑀲𑁂𑀲𑁂𑀦 𑀯𑀺𑀲𑀸𑀭𑀤𑀸.

𑁧𑁬𑁭𑁦. 𑀲𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑁂, 𑀢𑀺𑀮𑀓𑁆𑀔𑀡𑀯𑀯𑀢𑁆𑀣𑀺𑀢𑁂;

𑀙𑀦𑁆𑀤𑁄 𑀲𑀸𑀲𑀯𑀲𑀗𑁆𑀔𑀸𑀭𑁂, 𑀲𑀸𑀭𑀤𑀁 𑀧𑀭𑀺𑀬𑁂𑀲𑀢𑀺.

𑁧𑁬𑁭𑁧. 𑀢𑀢𑁆𑀣 𑀧𑀼𑀩𑁆𑀩𑀗𑁆𑀕𑀫𑀁 𑀳𑀼𑀢𑁆𑀯𑀸, 𑀲𑀁𑀧𑀓𑁆𑀔𑀦𑁆𑀤𑀢𑀺 𑀫𑀸𑀦𑀲𑀁;

𑀲𑀗𑁆𑀓𑀧𑁆𑀧𑁄𑀪𑀺𑀦𑀺𑀭𑁄𑀧𑁂𑀢𑀺, 𑀆𑀳𑀭𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁.

𑁧𑁬𑁭𑁨. 𑀬𑀣𑀸𑀯𑀢𑁆𑀣𑀼𑀲𑀪𑀸𑀯𑁂𑀦, 𑀢𑀢𑁄 𑀲𑀤𑁆𑀥𑀸𑀥𑀺𑀫𑀼𑀘𑁆𑀘𑀢𑀺;

𑀲𑀢𑀺 𑀲𑀽𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀧𑀭𑀺𑀕𑁆𑀕𑀬𑁆𑀳 𑀲𑀪𑀸𑀯𑀢𑁄.

𑁧𑁬𑁭𑁩. 𑀧𑀜𑁆𑀜𑀸 𑀲𑀫𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀻, 𑀲𑀫𑀸𑀳𑀘𑁆𑀘 𑀯𑀺𑀧𑀲𑁆𑀲𑀢𑀺;

𑀧𑀕𑁆𑀕𑀳𑁂𑀢𑁆𑀯𑀸𑀦 𑀯𑀸𑀬𑀸𑀫𑁄, 𑀧𑀝𑀺𑀧𑀸𑀤𑁂𑀢𑀺 𑀪𑀸𑀯𑀦𑀁.

𑁧𑁬𑁭𑁪. 𑀢𑀢𑁄 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀦𑀺𑀧𑁆𑀨𑀸𑀤𑀺𑀢𑀫𑀦𑁄𑀭𑀣𑁄;

𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀳𑀼𑀢𑁆𑀯𑀸, 𑀧𑀲𑁆𑀲𑀤𑁆𑀥𑀤𑀭𑀣𑁄 𑀧𑀦.

𑁧𑁬𑁭𑁫. 𑀯𑀺𑀓𑁆𑀔𑁂𑀧𑀼𑀤𑁆𑀥𑀘𑁆𑀘𑀦𑀺𑀢𑁆𑀢𑀺𑀡𑁆𑀡𑁄, 𑀲𑀫𑀸𑀥𑀺𑀬𑀢𑀺 𑀦𑀺𑀘𑁆𑀘𑀮𑁄;

𑀉𑀧𑁂𑀓𑁆𑀔𑀸 𑀪𑀸𑀯𑀦𑀸𑀯𑀻𑀣𑀺𑀁, 𑀅𑀥𑀺𑀝𑁆𑀞𑀸𑀢𑀺 𑀢𑀢𑁄 𑀧𑀭𑀁.

𑁧𑁬𑁭𑁬. 𑀆𑀭𑀼𑀴𑁆𑀳𑀬𑁄𑀕𑁆𑀕𑀸𑀘𑀭𑀺𑀬𑁄, 𑀆𑀚𑀸𑀦𑀻𑀬𑀭𑀣𑁄 𑀯𑀺𑀬;

𑀯𑀸𑀢𑀸𑀪𑀸𑀯𑁂 𑀧𑀤𑀻𑀧𑁄𑀯, 𑀧𑀲𑀦𑁆𑀦𑁂𑀓𑀫𑀼𑀔𑀝𑁆𑀞𑀺𑀢𑀸.

𑁧𑁬𑁭𑁭. 𑀲𑀼𑀔𑀼𑀫𑀸 𑀦𑀺𑀧𑀼𑀡𑀸𑀓𑀸𑀭𑀸, 𑀔𑀼𑀭𑀥𑀸𑀭𑀸𑀕𑀢𑀸 𑀯𑀺𑀬;

𑀕𑀡𑁆𑀳𑀦𑁆𑀢𑀻 𑀪𑀸𑀯𑀦𑀸𑀕𑀩𑁆𑀪𑀁, 𑀧𑀯𑀟𑁆𑀠𑀢𑀺 𑀯𑀺𑀧𑀲𑁆𑀲𑀦𑀸.

𑁧𑁬𑁭𑁮. 𑀲𑀫𑁆𑀧𑀢𑁆𑀢𑀧𑀝𑀺𑀯𑁂𑀥𑀲𑁆𑀲,

𑀢𑀲𑁆𑀲𑁂𑀯𑀁 𑀢𑀁 𑀯𑀺𑀧𑀲𑁆𑀲𑀢𑁄;

𑀚𑀸𑀬𑀢𑁂𑀓𑁄 𑀉𑀧𑀓𑁆𑀮𑁂𑀲𑁄,

𑀤𑀲𑁄𑀧𑀓𑁆𑀮𑁂𑀲𑀯𑀢𑁆𑀣𑀼𑀓𑀸.

𑁧𑁬𑁭𑁯. 𑀑𑀪𑀸𑀲𑁄 𑀧𑀻𑀢𑀺 𑀧𑀲𑁆𑀲𑀤𑁆𑀥𑀺, 𑀅𑀥𑀺𑀫𑁄𑀓𑁆𑀔𑁄 𑀘 𑀧𑀕𑁆𑀕𑀳𑁄;

𑀲𑀼𑀔𑀁 𑀜𑀸𑀡𑀫𑀼𑀧𑀝𑁆𑀞𑀸𑀦𑀫𑀼𑀧𑁂𑀓𑁆𑀔𑀸 𑀘 𑀦𑀺𑀓𑀦𑁆𑀢𑀺 𑀘.

𑁧𑁬𑁮𑁦. 𑀚𑀸𑀢𑁂𑀲𑁆𑀯𑁂𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺, 𑀉𑀴𑀸𑀭𑀁 𑀚𑀸𑀢𑀯𑀺𑀫𑁆𑀳𑀬𑁄;

𑀤𑀺𑀲𑁆𑀯𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸, 𑀯𑁄𑀓𑁆𑀓𑀫𑀺𑀢𑁆𑀯𑀸 𑀢𑀢𑁄 𑀧𑀭𑀁.

𑁧𑁬𑁮𑁧. 𑀢𑀫𑀳𑀁𑀓𑀸𑀭𑀯𑀺𑀓𑁆𑀔𑀺𑀢𑁆𑀢𑁄, 𑀅𑀲𑁆𑀲𑀸𑀤𑁂𑀦𑁆𑀢𑁄 𑀫𑀫𑀸𑀬𑀢𑀺;

𑀳𑁄𑀢𑀸𑀥𑀺𑀫𑀸𑀦𑀺𑀓𑁄 𑀯𑀸𑀣, 𑀫𑀜𑁆𑀜𑀦𑁆𑀢𑁄 𑀢𑀫𑀦𑀼𑀢𑁆𑀢𑀭𑀁.

𑁧𑁬𑁮𑁨. 𑀲𑀺𑀬𑀸 𑀘𑁂𑀯𑀫𑀼𑀧𑀓𑁆𑀮𑀺𑀝𑁆𑀞𑀸, 𑀧𑀢𑀺𑀢𑀸 𑀯𑀸𑀣 𑀪𑀸𑀯𑀦𑀸;

𑀢𑀢𑁆𑀣𑁂𑀯𑀁 𑀧𑀝𑀺𑀲𑀗𑁆𑀔𑀸𑀬, 𑀧𑀝𑀺𑀯𑀺𑀚𑁆𑀛𑀢𑀺 𑀧𑀡𑁆𑀟𑀺𑀢𑁄.

𑁧𑁬𑁮𑁩. 𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑁂𑀳𑀺, 𑀧𑀭𑀺𑀬𑁄𑀕𑀸𑀳𑀳𑁂𑀢𑀼𑀢𑁄;

𑀮𑀓𑁆𑀔𑀡𑀸𑀮𑀫𑁆𑀩𑀡𑀢𑁆𑀢𑀸 𑀘, 𑀮𑁄𑀓𑀺𑀬𑀸𑀬𑀁 𑀯𑀺𑀧𑀲𑁆𑀲𑀦𑀸.

𑁧𑁬𑁮𑁪. 𑀤𑀺𑀝𑁆𑀞𑀺𑀫𑀸𑀦𑀦𑀺𑀓𑀦𑁆𑀢𑀻 𑀘, 𑀓𑀼𑀫𑁆𑀫𑀕𑁆𑀕𑀸 𑀧𑀭𑀺𑀧𑀦𑁆𑀣𑀓𑀸;

𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸 𑀦𑀸𑀫, 𑀯𑀺𑀲𑀼𑀤𑁆𑀥𑀸 𑀘 𑀯𑀺𑀧𑀲𑁆𑀲𑀦𑀸.

𑁧𑁬𑁮𑁫. 𑀲𑀸𑀭𑀣𑀻𑀯 𑀭𑀣𑀁 𑀪𑀦𑁆𑀢𑀫𑀺𑀢𑀺 𑀲𑀗𑁆𑀔𑀸𑀬 𑀲𑀸𑀥𑀼𑀓𑀁;

𑀧𑀯𑀺𑀝𑁆𑀞𑀫𑀕𑁆𑀕𑀁 𑀯𑀺𑀓𑁆𑀔𑀺𑀢𑁆𑀢𑀁, 𑀲𑀫𑁆𑀧𑀸𑀤𑁂𑀢𑀺 𑀬𑀣𑀸 𑀧𑀼𑀭𑁂.

𑁧𑁬𑁮𑁬. 𑀇𑀢𑁆𑀣𑀁 𑀫𑀕𑁆𑀕𑁂 𑀅𑀫𑀕𑁆𑀕𑁂 𑀘, 𑀬𑀸𑀣𑀸𑀯𑀧𑀝𑀺𑀯𑁂𑀥𑀓𑀁;

𑀫𑀕𑁆𑀕𑀸𑀫𑀕𑁆𑀕𑀯𑀺𑀲𑀼𑀤𑁆𑀥𑀻𑀢𑀺, 𑀜𑀸𑀡𑀤𑀲𑁆𑀲𑀦𑀫𑀻𑀭𑀺𑀢𑀁.

𑁧𑁬𑁮𑁭. 𑀘𑁂𑀢𑁄𑀧𑀯𑀢𑁆𑀢𑀦𑀸𑀓𑀸𑀭𑀫𑀺𑀢𑀺 𑀲𑀮𑁆𑀮𑀓𑁆𑀔𑀬𑀁 𑀩𑀼𑀥𑁄;

𑀲𑀸𑀥𑀼𑀓𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄, 𑀲𑀼𑀔𑀼𑀫𑀁 𑀦𑀺𑀧𑀼𑀡𑀁 𑀢𑀢𑁄.

𑁧𑁬𑁮𑁮. 𑀧𑀭𑀺𑀧𑀦𑁆𑀣𑁂 𑀯𑀺𑀫𑁄𑀘𑁂𑀢𑁆𑀯𑀸, 𑀩𑁄𑀥𑁂𑀢𑁆𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑁂;

𑀪𑀸𑀯𑀦𑀁 𑀧𑀝𑀺𑀧𑀸𑀤𑁂𑀦𑁆𑀢𑁄, 𑀧𑀼𑀦𑀤𑁂𑀯𑁄𑀤𑀬𑀩𑁆𑀩𑀬𑀁.

𑁧𑁬𑁮𑁯. 𑀲𑀫𑀥𑀺𑀝𑁆𑀞𑀸𑀬 𑀫𑁂𑀥𑀸𑀯𑀻, 𑀯𑀺𑀧𑀲𑁆𑀲𑀢𑀺 𑀢𑀺𑀮𑀓𑁆𑀔𑀡𑀁;

𑀉𑀤𑀬𑀩𑁆𑀩𑀬𑀜𑀸𑀡𑀦𑁆𑀢𑀺, 𑀢𑀫𑀻𑀭𑁂𑀦𑁆𑀢𑀺 𑀢𑀢𑁄 𑀧𑀭𑀁.

𑁧𑁬𑁯𑁦. 𑀲𑀗𑁆𑀔𑀸𑀭𑀸𑀦𑀁 𑀯𑀺𑀪𑀽𑀢𑀢𑁆𑀢𑀸, 𑀲𑀸𑀓𑀸𑀭𑀸𑀦𑀁 𑀯𑀺𑀲𑁂𑀲𑀢𑁄;

𑀢𑀺𑀮𑀓𑁆𑀔𑀡𑀸𑀦𑀁 𑀤𑀺𑀝𑁆𑀞𑀢𑁆𑀢𑀸, 𑀲𑀗𑁆𑀔𑀸𑀭𑁂𑀲𑀼 𑀲𑀪𑀸𑀯𑀢𑁄.

𑁧𑁬𑁯𑁧. 𑀧𑀭𑀺𑀧𑀦𑁆𑀣𑀸 𑀯𑀺𑀫𑀼𑀢𑁆𑀢𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀺𑀲𑀼𑀤𑁆𑀥𑀺𑀬𑀸;

𑀬𑀣𑀸𑀯𑀻𑀣𑀺𑀧𑁆𑀧𑀯𑀢𑁆𑀢𑀲𑁆𑀲, 𑀧𑀝𑀺𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺𑀬𑀸.

𑁧𑁬𑁯𑁨. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀼𑀢𑀺𑀓𑁆𑀔𑀢𑁆𑀢𑀸, 𑀧𑀭𑀺𑀧𑀓𑁆𑀓𑀸 𑀯𑀺𑀧𑀲𑁆𑀲𑀦𑀸;

𑀉𑀤𑀬𑀫𑁆𑀳𑀸 𑀯𑀺𑀫𑀼𑀘𑁆𑀘𑀺𑀢𑁆𑀯𑀸, 𑀪𑀗𑁆𑀕𑁂 𑀞𑀸𑀢𑀺 𑀬𑀣𑀸 𑀓𑀣𑀁.

𑁧𑁬𑁯𑁩. 𑀉𑀧𑁆𑀧𑀸𑀤𑁄 𑀧𑀘𑁆𑀘𑀬𑀸𑀬𑀢𑁆𑀢𑁄, 𑀥𑀫𑁆𑀫𑀸𑀦𑀫𑀺𑀢𑀺 𑀦𑀺𑀘𑁆𑀙𑀺𑀢𑁂;

𑀦𑀺𑀭𑁄𑀥𑀸𑀦𑀼𑀕𑀢𑀸 𑀚𑀸𑀢𑀺, 𑀲𑀺𑀤𑁆𑀥𑀸𑀯𑀲𑁆𑀲𑀁 𑀦𑀺𑀬𑀸𑀫𑀢𑁄.

𑁧𑁬𑁯𑁪. 𑀢𑀢𑁄𑀤𑀬𑀸𑀯 𑀧𑀝𑁆𑀞𑀸𑀬, 𑀅𑀢𑁆𑀣𑀸𑀬 𑀲𑀽𑀭𑀺𑀬𑁄 𑀯𑀺𑀬;

𑀯𑀺𑀦𑀸𑀲𑀸𑀬 𑀧𑀯𑀢𑁆𑀢𑀦𑁆𑀢𑀸, 𑀯𑀬𑀦𑁆𑀢𑁂𑀯𑀸𑀢𑀺 𑀧𑁂𑀓𑁆𑀔𑀢𑀺.

𑁧𑁬𑁯𑁫. 𑀉𑀤𑀬𑀸𑀪𑁄𑀕𑀫𑁄𑀳𑀸𑀬, 𑀯𑀬𑀦𑁆𑀢𑀺𑀘𑁆𑀘𑁂𑀯 𑀲𑀩𑁆𑀩𑀣𑀸;

𑀪𑁂𑀤𑀲𑁆𑀲𑀪𑀸𑀯𑀫𑀸𑀭𑀩𑁆𑀪, 𑀥𑀫𑁆𑀫𑁂𑀲𑀼 𑀲𑀢𑀺 𑀢𑀺𑀝𑁆𑀞𑀢𑀺.

𑁧𑁬𑁯𑁬. 𑀅𑀢𑀻𑀢𑀸 𑀘 𑀦𑀺𑀭𑀼𑀤𑁆𑀥𑀸𑀯, 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀺𑀦𑀸𑀕𑀢𑀸;

𑀦𑀺𑀭𑀼𑀚𑁆𑀛𑀦𑁆𑀢𑁂𑀯 𑀯𑀢𑁆𑀢𑀦𑁆𑀢𑀸, 𑀇𑀘𑁆𑀘𑁂𑀯𑀫𑀦𑀼𑀧𑀲𑁆𑀲𑀢𑁄.

𑁧𑁬𑁯𑁭. 𑀦𑀺𑀚𑁆𑀛𑀭𑁄𑀯 𑀕𑀺𑀭𑀕𑁆𑀕𑀫𑁆𑀳𑀺, 𑀯𑀸𑀭𑀺𑀯𑁄𑀡𑀢𑀧𑁄𑀓𑁆𑀔𑀭𑁂;

𑀧𑀤𑀻𑀧𑁄 𑀯𑀺𑀬 𑀛𑀸𑀬𑀦𑁆𑀢𑁄, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄.

𑁧𑁬𑁯𑁮. 𑀆𑀢𑀧𑁂 𑀯𑀺𑀬 𑀉𑀲𑁆𑀲𑀸𑀯𑁄, 𑀧𑀭𑀺𑀲𑁆𑀲𑀸𑀯𑁂 𑀚𑀮𑀁 𑀯𑀺𑀬;

𑀫𑀤𑁆𑀤𑀺𑀢𑀁 𑀨𑁂𑀡𑀧𑀺𑀡𑁆𑀟𑀁𑀯, 𑀮𑁄𑀡𑀧𑀺𑀡𑁆𑀟𑀫𑀺𑀯𑁄𑀤𑀓𑁂.

𑁧𑁬𑁯𑁯. 𑀉𑀤𑀓𑁂 𑀤𑀡𑁆𑀟𑀭𑀸𑀚𑀻𑀯, 𑀯𑀺𑀚𑁆𑀚𑀼𑀢𑀸𑀯 𑀯𑀮𑀸𑀳𑀓𑁂;

𑀚𑀮𑀁 𑀢𑀢𑁆𑀢𑀓𑀧𑀸𑀮𑁂𑀯, 𑀲𑀮𑀺𑀮𑁂 𑀯𑀺𑀬 𑀩𑀼𑀩𑁆𑀩𑀼𑀴𑀁.

𑁧𑁭𑁦𑁦. 𑀯𑀸𑀢𑀩𑁆𑀪𑀸𑀳𑀢𑀢𑀽𑀮𑀁𑀯, 𑀢𑀻𑀭𑀁 𑀧𑀢𑁆𑀢𑀸𑀯 𑀯𑀻𑀘𑀺𑀬𑁄;

𑀨𑀮𑀁 𑀩𑀦𑁆𑀥𑀦𑀫𑀼𑀢𑁆𑀢𑀁𑀯, 𑀢𑀺𑀡𑀸𑀦𑀻𑀯 𑀳𑀼𑀢𑀸𑀯𑀳𑁂.

𑁧𑁭𑁦𑁧. 𑀚𑀸𑀬𑀦𑁆𑀢𑀸𑀧𑀺 𑀘 𑀚𑀺𑀬𑁆𑀬𑀦𑁆𑀢𑀸, 𑀫𑀺𑀬𑁆𑀬𑀦𑁆𑀢𑀸 𑀘 𑀦𑀺𑀭𑀦𑁆𑀢𑀭𑀁;

𑀦𑀺𑀭𑁄𑀥𑀸𑀬𑀸𑀪𑀺𑀥𑀸𑀯𑀦𑁆𑀢𑀸, 𑀪𑀗𑁆𑀕𑀸𑀪𑀺𑀫𑀼𑀔𑀧𑀸𑀢𑀺𑀦𑁄.

𑁧𑁭𑁦𑁨. 𑀯𑀺𑀕𑀘𑁆𑀙𑀦𑁆𑀢𑀸𑀯 𑀤𑀺𑀲𑁆𑀲𑀦𑁆𑀢𑀺, 𑀔𑀻𑀬𑀦𑁆𑀢𑀦𑁆𑀢𑀭𑀥𑀸𑀬𑀺𑀦𑁄;

𑀯𑀺𑀤𑁆𑀥𑀁𑀲𑀬𑀦𑁆𑀢𑀸 𑀲𑀗𑁆𑀔𑀸𑀭𑀸, 𑀧𑀢𑀦𑁆𑀢𑀸 𑀘 𑀯𑀺𑀦𑀸𑀲𑀺𑀦𑁄.

𑁧𑁭𑁦𑁩. 𑀪𑀗𑁆𑀕𑀜𑀸𑀡𑀁 𑀢𑀫𑀓𑁆𑀔𑀸𑀢𑀁, 𑀬𑁂𑀦 𑀜𑀸𑀡𑁂𑀦 𑀧𑀲𑁆𑀲𑀢𑁄;

𑀅𑀦𑀺𑀘𑁆𑀘𑀦𑁆𑀢𑀸𑀦𑀼𑀥𑀸𑀯𑀦𑁆𑀢𑀺, 𑀢𑀺𑀯𑀺𑀥𑀸𑀧𑀺 𑀯𑀺𑀧𑀲𑁆𑀲𑀦𑀸.

𑁧𑁭𑁦𑁪. 𑀉𑀤𑀬𑀩𑁆𑀩𑀬𑀪𑀗𑁆𑀕𑁂𑀲𑀼, 𑀧𑀸𑀓𑀝𑀸 𑀳𑀺 𑀅𑀦𑀺𑀘𑁆𑀘𑀢𑀸;

𑀪𑀬𑀸𑀤𑀻𑀦𑀯𑀦𑀺𑀩𑁆𑀩𑁂𑀤𑁂, 𑀤𑀼𑀓𑁆𑀔𑀢𑀸𑀦𑀢𑁆𑀢𑀢𑀸 𑀢𑀢𑁄.

𑁧𑁭𑁦𑁫. 𑀇𑀢𑁆𑀣𑀁 𑀪𑀗𑁆𑀕𑀫𑀥𑀺𑀝𑁆𑀞𑀸𑀬, 𑀧𑀲𑁆𑀲𑀦𑁆𑀢𑀲𑁆𑀲 𑀢𑀺𑀮𑀓𑁆𑀔𑀡𑀁;

𑀲𑀗𑁆𑀔𑀸𑀭𑀸 𑀲𑀪𑀬𑀸 𑀳𑀼𑀢𑁆𑀯𑀸, 𑀲𑀫𑀼𑀧𑀝𑁆𑀞𑀦𑁆𑀢𑀺 𑀬𑁄𑀕𑀺𑀦𑁄.

𑁧𑁭𑁦𑁬. 𑀯𑀸𑀴𑀫𑀺𑀕𑀸𑀦𑀼𑀩𑀤𑁆𑀥𑀸𑀯, 𑀦𑀺𑀫𑁆𑀫𑀼𑀚𑁆𑀚𑀦𑁆𑀢𑀸 𑀯𑀺𑀬𑀡𑁆𑀡𑀯𑁂;

𑀅𑀫𑀦𑀼𑀲𑁆𑀲𑀕𑀳𑀺𑀢𑀸𑀯, 𑀧𑀭𑀺𑀓𑁆𑀔𑀺𑀢𑁆𑀢𑀸𑀯 𑀯𑁂𑀭𑀺𑀳𑀺.

𑁧𑁭𑁦𑁭. 𑀓𑀡𑁆𑀳𑀲𑀧𑁆𑀧𑀲𑀫𑀸𑀮𑀻𑀴𑁆𑀳𑀸, 𑀘𑀡𑁆𑀟𑀳𑀢𑁆𑀣𑀺𑀲𑀫𑀼𑀝𑁆𑀞𑀺𑀢𑀸;

𑀧𑀧𑀸𑀢𑀸𑀯𑀸𑀝𑀧𑀓𑁆𑀔𑀦𑁆𑀢𑀸, 𑀧𑀢𑀦𑁆𑀢𑀸𑀯 𑀳𑀼𑀢𑀸𑀯𑀳𑁂.

𑁧𑁭𑁦𑁮. 𑀯𑀚𑁆𑀛𑀧𑁆𑀧𑀢𑁆𑀢𑀸 𑀫𑀳𑀸𑀘𑁄𑀭𑀸, 𑀙𑀺𑀚𑁆𑀚𑀦𑁆𑀢𑀸 𑀯𑀺𑀬 𑀲𑀻𑀲𑀢𑁄;

𑀲𑀽𑀮𑀫𑀸𑀭𑁄𑀧𑀺𑀬𑀦𑁆𑀢𑀸𑀯, 𑀧𑀩𑁆𑀩𑀢𑁂𑀦𑁄𑀢𑁆𑀣𑀝𑀸 𑀯𑀺𑀬.

𑁧𑁭𑁦𑁯. 𑀚𑀸𑀢𑀺𑀲𑀗𑁆𑀓𑀝𑀧𑀓𑁆𑀔𑀦𑁆𑀢𑀸, 𑀚𑀭𑀸𑀩𑁆𑀬𑀸𑀥𑀺𑀦𑀺𑀧𑀻𑀴𑀺𑀢𑀸;

𑀫𑀭𑀡𑀸𑀲𑀦𑀺𑀲𑀫𑁆𑀫𑀤𑁆𑀤𑀸, 𑀫𑀳𑀸𑀩𑁆𑀬𑀲𑀦𑀪𑀸𑀕𑀺𑀦𑁄.

𑁧𑁭𑁧𑁦. 𑀫𑀘𑁆𑀘𑀼𑀦𑀩𑁆𑀪𑀸𑀳𑀢𑀸 𑀦𑀺𑀘𑁆𑀘𑀁, 𑀤𑀼𑀓𑁆𑀔𑀪𑀸𑀭𑀲𑀫𑁄𑀢𑁆𑀣𑀝𑀸;

𑀲𑁄𑀓𑁄𑀧𑀸𑀬𑀸𑀲𑀦𑀺𑀲𑁆𑀲𑀦𑁆𑀤𑀸, 𑀧𑀭𑀺𑀤𑁂𑀯𑀧𑀭𑀸𑀬𑀡𑀸.