𑁧𑁧. 𑀏𑀓𑀸𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀯𑀺𑀧𑀲𑁆𑀲𑀦𑀸𑀯𑀺𑀪𑀸𑀕𑁄

𑁧𑁫𑁦𑁬. 𑀤𑁆𑀯𑀺𑀥𑀸 𑀲𑀫𑀼𑀝𑁆𑀞𑀸𑀦𑀥𑀼𑀭𑀸, 𑀢𑀺𑀯𑀺𑀥𑀸 𑀪𑀽𑀫𑀺𑀬𑁄 𑀫𑀢𑀸;

𑀢𑀺𑀯𑀺𑀥𑀸𑀪𑀺𑀦𑀺𑀯𑁂𑀲𑀸 𑀘, 𑀲𑀭𑀻𑀭𑀁 𑀢𑀼 𑀘𑀢𑀼𑀩𑁆𑀩𑀺𑀥𑀁.

𑁧𑁫𑁦𑁭. 𑀢𑀺𑀯𑀺𑀥𑀸 𑀪𑀸𑀯𑀦𑀸 𑀢𑀢𑁆𑀣, 𑀲𑀗𑁆𑀔𑀸𑀭𑁂𑀲𑀼 𑀬𑀣𑀸𑀭𑀳𑀁;

𑀤𑀼𑀯𑀺𑀥𑀸𑀓𑀸𑀭𑀫𑀸𑀭𑀩𑁆𑀪, 𑀦𑀺𑀚𑁆𑀛𑀸𑀬𑀢𑀺 𑀢𑀺𑀮𑀓𑁆𑀔𑀡𑀁.

𑁧𑁫𑁦𑁮. 𑀅𑀝𑁆𑀞𑀸𑀭𑀲𑀸𑀓𑀸𑀭𑀪𑀺𑀦𑁆𑀦𑀸, 𑀤𑀲𑀸𑀯𑀢𑁆𑀣𑀸 𑀯𑀺𑀪𑀸𑀯𑀺𑀢𑀸;

𑀢𑀺𑀥𑀸 𑀯𑀺𑀪𑀸𑀕𑀸 𑀲𑀸𑀥𑁂𑀢𑀺, 𑀯𑀺𑀫𑁄𑀓𑁆𑀔𑀢𑁆𑀢𑀬𑀫𑀼𑀢𑁆𑀢𑀫𑀁.

𑁧𑁫𑁦𑁯. 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀸, 𑀲𑀢𑁆𑀢𑀝𑁆𑀞𑀸𑀭𑀺𑀬𑀧𑀼𑀕𑁆𑀕𑀮𑀸;

𑀓𑁆𑀮𑁂𑀲𑀳𑀸𑀦𑀻 𑀬𑀣𑀸𑀬𑁄𑀕𑀁, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸.

𑁧𑁫𑁧𑁦. 𑀢𑀺𑀯𑀺𑀥𑀸 𑀘 𑀲𑀫𑀸𑀧𑀢𑁆𑀢𑀺, 𑀦𑀺𑀭𑁄𑀥𑀸 𑀘 𑀢𑀣𑀸𑀧𑀭𑀸;

𑀦𑀺𑀲𑁆𑀲𑀦𑁆𑀤𑀨𑀮𑀫𑀺𑀘𑁆𑀘𑀸𑀳𑀼, 𑀢𑀲𑁆𑀲𑀸 𑀲𑀸𑀲𑀦𑀓𑁄𑀯𑀺𑀤𑀸.

𑁧𑁫𑁧𑁧. 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬-𑀫𑀺𑀢𑀺 𑀪𑀸𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀢𑀫𑀺𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀓𑀣𑀁.

𑁧𑁫𑁧𑁨. 𑀪𑀽𑀫𑀺𑀥𑀫𑁆𑀫𑁂 𑀧𑀭𑀺𑀕𑁆𑀕𑀬𑁆𑀳, 𑀯𑀺𑀘𑀺𑀦𑀦𑁆𑀢𑀲𑁆𑀲 𑀬𑁄𑀕𑀺𑀦𑁄;

𑀲𑀢𑀺𑀬𑀸 𑀲𑀫𑀣𑀸 𑀯𑀸𑀣, 𑀲𑀫𑀼𑀝𑁆𑀞𑀸𑀢𑀺 𑀯𑀺𑀧𑀲𑁆𑀲𑀦𑀸.

𑁧𑁫𑁧𑁩. 𑀲𑀪𑀸𑀯𑀧𑀝𑀺𑀯𑁂𑀥𑁂 𑀘, 𑀲𑀤𑁆𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀁;

𑀧𑀜𑁆𑀜𑀸𑀲𑀤𑁆𑀥𑀸𑀤𑁆𑀯𑀬𑀁 𑀢𑀲𑁆𑀲𑀸, 𑀥𑀼𑀭𑀫𑀸𑀳𑀼 𑀥𑀼𑀭𑀦𑁆𑀥𑀭𑀸.

𑁧𑁫𑁧𑁪. 𑀢𑁂𑀪𑀽𑀫𑀓𑀲𑀪𑀸𑀯𑀸𑀦𑀁, 𑀲𑀧𑁆𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄;

𑀜𑀸𑀢𑀧𑀭𑀺𑀜𑁆𑀜𑀸 𑀦𑀸𑀫𑀸𑀬𑀁, 𑀪𑀽𑀫𑀻𑀢𑀺 𑀧𑀞𑀫𑀸 𑀫𑀢𑀸.

𑁧𑁫𑁧𑁫. 𑀓𑀮𑀸𑀧𑀢𑁄 𑀲𑀫𑁆𑀫𑀲𑀦𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀧𑀭𑀺𑀜𑁆𑀜𑀸𑀢𑀻𑀭𑀡𑀸 𑀦𑀸𑀫, 𑀤𑀼𑀢𑀺𑀬𑀸 𑀪𑀽𑀫𑀺 𑀪𑀸𑀲𑀺𑀢𑀸.

𑁧𑁫𑁧𑁬. 𑀧𑀳𑀸𑀦𑀧𑀭𑀺𑀜𑁆𑀜𑀸 𑀪𑀽𑀫𑀺, 𑀢𑀢𑀺𑀬𑀸𑀳𑀼 𑀢𑀢𑁄𑀧𑀭𑀁;

𑀪𑀗𑁆𑀕𑀸𑀤𑀺𑀜𑀸𑀡𑀫𑀺𑀘𑁆𑀘𑁂𑀯𑀁, 𑀢𑀺𑀯𑀺𑀥𑀸 𑀪𑀽𑀫𑀺𑀬𑁄 𑀫𑀢𑀸.

𑁧𑁫𑁧𑁭. 𑀔𑀡𑀲𑀦𑁆𑀢𑀢𑀺𑀅𑀤𑁆𑀥𑀸𑀦-𑀯𑀲𑁂𑀦𑁂𑀢𑁆𑀣 𑀲𑀫𑀻𑀭𑀺𑀢𑀸;

𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀢𑀺𑀯𑀺𑀥𑀸𑀪𑀺𑀦𑀺𑀯𑁂𑀲𑀦𑀸.

𑁧𑁫𑁧𑁮. 𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀸, 𑀫𑀕𑁆𑀕𑀸𑀫𑀕𑁆𑀕𑀧𑀝𑀺𑀧𑁆𑀧𑀤𑀸;

𑀯𑀺𑀲𑀼𑀤𑁆𑀥𑀺𑀬𑁄 𑀘𑀢𑀲𑁆𑀲𑁄𑀧𑀺, 𑀲𑀭𑀻𑀭𑀦𑁆𑀢𑀺 𑀦𑀺𑀤𑀲𑁆𑀲𑀺𑀢𑀸.

𑁧𑁫𑁧𑁯. 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀦𑀁, 𑀧𑀘𑁆𑀘𑀬𑀸𑀓𑀸𑀭𑀦𑀺𑀘𑁆𑀙𑀬𑁄;

𑀓𑀼𑀫𑁆𑀫𑀕𑁆𑀕𑀧𑀭𑀺𑀳𑀸𑀭𑁄 𑀘, 𑀢𑀺𑀮𑀓𑁆𑀔𑀡𑀯𑀺𑀧𑀲𑁆𑀲𑀦𑀸.

𑁧𑁫𑁨𑁦. 𑀇𑀢𑀺 𑀮𑀓𑁆𑀔𑀡𑀪𑀺𑀦𑁆𑀦𑀢𑁆𑀢𑀸, 𑀮𑀩𑁆𑀪𑀦𑁆𑀢𑁂𑀓𑀓𑁆𑀔𑀡𑁂𑀧𑀺 𑀘;

𑀤𑁂𑀲𑀺𑀢𑀸 𑀳𑁂𑀢𑀼𑀪𑀽𑀢𑁂𑀦, 𑀓𑀫𑁂𑀦𑁂𑀯𑀁 𑀯𑀺𑀲𑀼𑀤𑁆𑀥𑀺𑀬𑁄.

𑁧𑁫𑁨𑁧. 𑀲𑀻𑀮𑀩𑁆𑀩𑀺𑀲𑀼𑀤𑁆𑀥𑀺𑀆𑀤𑀻𑀦𑀁, 𑀢𑀣𑀸 𑀲𑀸𑀯 𑀧𑀭𑀫𑁆𑀧𑀭𑀸;

𑀘𑀺𑀢𑁆𑀢𑀩𑁆𑀩𑀺𑀲𑀼𑀤𑁆𑀥𑀺𑀆𑀤𑀻𑀦𑀫𑀢𑁆𑀣𑀸𑀬𑀸𑀢𑀺 𑀧𑀓𑀸𑀲𑀺𑀢𑀸.

𑁧𑁫𑁨𑁨. 𑀤𑀺𑀲𑁆𑀲𑀫𑀸𑀦𑀲𑀪𑀸𑀯𑀸𑀦𑀁, 𑀧𑀲𑁆𑀲𑀦𑁆𑀢𑁄 𑀧𑀘𑁆𑀘𑀬𑀝𑁆𑀞𑀺𑀢𑀺;

𑀧𑀭𑀺𑀧𑀦𑁆𑀣𑀯𑀺𑀫𑀼𑀢𑁆𑀢𑁄 𑀳𑀺, 𑀧𑀝𑀺𑀧𑀸𑀤𑁂𑀢𑀺 𑀪𑀸𑀯𑀦𑀁.

𑁧𑁫𑁨𑁩. 𑀢𑀣𑀸𑀧𑀺 𑀘 𑀯𑀺𑀲𑁂𑀲𑁂𑀦, 𑀧𑀝𑀺𑀧𑀦𑁆𑀦𑀲𑁆𑀲 𑀬𑁄𑀕𑀺𑀦𑁄;

𑀢𑀢𑁆𑀣 𑀢𑀢𑁆𑀣 𑀯𑀺𑀪𑀽𑀢𑀢𑁆𑀢𑀸, 𑀞𑀸𑀦𑀢𑁄 𑀪𑁂𑀤𑀺𑀢𑀸 𑀓𑀣𑀁.

𑁧𑁫𑁨𑁪. 𑀭𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀯𑀸𑀣, 𑀦𑀸𑀫𑀧𑀼𑀩𑁆𑀩𑀗𑁆𑀕𑀫𑀁 𑀢𑀣𑀸;

𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀬𑀣𑀸𑀧𑀸𑀓𑀝𑀥𑀫𑁆𑀫𑀢𑁄.

𑁧𑁫𑁨𑁫. 𑀦𑀸𑀫𑀭𑀽𑀧𑀸𑀤𑀺𑀪𑁂𑀤𑁂𑀦, 𑀪𑀽𑀫𑀺𑀥𑀫𑁆𑀫𑀧𑀭𑀺𑀕𑁆𑀕𑀳𑁄;

𑀯𑀼𑀢𑁆𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺, 𑀅𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀢𑁄.

𑁧𑁫𑁨𑁬. 𑀆𑀳𑀘𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸, 𑀢𑀣𑀸 𑀢𑀩𑁆𑀪𑀸𑀯𑀪𑀸𑀯𑀺𑀦𑁄;

𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀗𑁆𑀔𑀸𑀭𑁂, 𑀧𑀲𑁆𑀲𑀢𑁄 𑀧𑀦 𑀬𑁄𑀦𑀺𑀲𑁄.

𑁧𑁫𑁨𑁭. 𑀧𑀘𑁆𑀘𑀬𑀕𑁆𑀕𑀸𑀳𑀺𑀦𑀻 𑀧𑀜𑁆𑀜𑀸, 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸;

𑀓𑀗𑁆𑀔𑀸 𑀢𑀭𑀦𑁆𑀢𑀺 𑀢𑀸𑀬𑀸𑀢𑀺, 𑀓𑀗𑁆𑀔𑀸𑀯𑀺𑀢𑀭𑀡𑀸 𑀫𑀢𑀸.

𑁧𑁫𑁨𑁮. 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄;

𑀲𑀗𑁆𑀔𑀺𑀧𑀺𑀢𑁆𑀯𑀸 𑀓𑀮𑀸𑀧𑁂𑀦, 𑀲𑀫𑁆𑀫𑀲𑀻𑀬𑀦𑁆𑀢𑀺 𑀲𑀗𑁆𑀔𑀢𑀸.

𑁧𑁫𑁨𑁯. 𑀉𑀧𑁆𑀧𑀸𑀤𑀯𑀬𑀪𑀸𑀯𑁄𑀧𑀺, 𑀮𑀓𑁆𑀔𑀡𑀢𑁆𑀢𑀬𑀲𑀸𑀥𑀓𑁄;

𑀧𑀘𑁆𑀘𑀬𑀸𑀓𑀸𑀭𑀫𑀸𑀭𑀩𑁆𑀪, 𑀮𑀓𑁆𑀔𑀻𑀬𑀢𑀺 𑀯𑀺𑀲𑁂𑀲𑀢𑁄.

𑁧𑁫𑁩𑁦. 𑀢𑀲𑁆𑀫𑀸 𑀲𑀫𑁆𑀫𑀲𑀦𑀜𑀸𑀡𑀁, 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀓𑀗𑁆𑀔𑀸𑀯𑀺𑀢𑀭𑀡𑀸𑀬𑀁 𑀢𑀼, 𑀲𑀗𑁆𑀕𑀬𑁆𑀳𑀢𑀺 𑀯𑀺𑀲𑀼𑀤𑁆𑀥𑀺𑀬𑀁.

𑁧𑁫𑁩𑁧. 𑀢𑀢𑁆𑀣 𑀲𑀁𑀓𑁆𑀮𑁂𑀲𑀯𑀺𑀓𑁆𑀔𑁂𑀧𑀁, 𑀓𑀼𑀫𑁆𑀫𑀕𑁆𑀕𑀁 𑀧𑀭𑀺𑀯𑀚𑁆𑀚𑀢𑁄;

𑀫𑀕𑁆𑀕𑀸𑀫𑀕𑁆𑀕𑀯𑀺𑀲𑀼𑀤𑁆𑀥𑀻𑀢𑀺, 𑀜𑀸𑀡𑀤𑀲𑁆𑀲𑀦𑀫𑀻𑀭𑀺𑀢𑀁.

𑁧𑁫𑁩𑁨. 𑀢𑀢𑁄 𑀓𑀣𑁂𑀦𑁆𑀢𑀺 𑀅𑀓𑁆𑀮𑀺𑀝𑁆𑀞𑀫𑀼𑀤𑀬𑀩𑁆𑀩𑀬𑀤𑀲𑁆𑀲𑀦𑀁;

𑀆𑀤𑀺𑀁 𑀓𑀢𑁆𑀯𑀸 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀲𑀼𑀤𑁆𑀥𑀺𑀬𑀁.

𑁧𑁫𑁩𑁩. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂, 𑀬𑀣𑀸𑀯𑀢𑁆𑀣𑀼𑀯𑀯𑀢𑁆𑀣𑀺𑀢𑁂;

𑀧𑀳𑀸𑀢𑀼𑀫𑀻𑀳𑀫𑀸𑀦𑀸𑀦𑀁, 𑀦𑀺𑀬𑁆𑀬𑀸𑀦𑀧𑀝𑀺𑀧𑀢𑁆𑀢𑀺𑀢𑁄.

𑁧𑁫𑁩𑁪. 𑀉𑀧𑀓𑁆𑀮𑁂𑀲𑀯𑀺𑀲𑀼𑀤𑁆𑀥𑁄 𑀳𑀺, 𑀧𑀼𑀦𑀤𑁂𑀯𑁄𑀤𑀬𑀩𑁆𑀩𑀬𑀁;

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀗𑁆𑀕𑀸𑀤𑀺-𑀜𑀸𑀡𑁂𑀳𑀺 𑀧𑀝𑀺𑀧𑀚𑁆𑀚𑀢𑀺.

𑁧𑁫𑁩𑁫. 𑀢𑀣𑀸 𑀘𑀸𑀪𑀺𑀦𑀯𑀼𑀧𑁆𑀧𑀦𑁆𑀦𑁂, 𑀪𑀺𑀚𑁆𑀚𑀫𑀸𑀦𑁂 𑀯𑀺𑀧𑀲𑁆𑀲𑀢𑁄;

𑀲𑀁𑀯𑁂𑀕𑀓𑀟𑁆𑀠𑀺𑀢𑀁 𑀜𑀸𑀡𑀁, 𑀪𑀗𑁆𑀕𑀸𑀤𑀺𑀫𑀦𑀼𑀢𑀺𑀝𑁆𑀞𑀢𑀺.

𑁧𑁫𑁩𑁬. 𑀢𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸 𑀳𑀺, 𑀲𑀁𑀓𑁆𑀮𑁂𑀲𑀸𑀧𑀸𑀬𑀲𑀫𑁆𑀪𑀯𑀸;

𑀧𑀝𑀺𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀻𑀢𑀺, 𑀦 𑀲𑀗𑁆𑀕𑀬𑁆𑀳𑀢𑀺 𑀪𑀸𑀯𑀦𑀸.

𑁧𑁫𑁩𑁭. 𑀲𑀫𑁆𑀧𑀸𑀤𑁂𑀦𑁆𑀢𑁄 𑀧𑀦𑀺𑀘𑁆𑀘𑁂𑀢𑀸, 𑀘𑀢𑀲𑁆𑀲𑁄𑀧𑀺 𑀯𑀺𑀲𑀼𑀤𑁆𑀥𑀺𑀬𑁄;

𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸𑀦𑀢𑁆𑀢𑀸𑀢𑀺, 𑀪𑀸𑀯𑁂𑀬𑁆𑀬 𑀢𑀺𑀯𑀺𑀥𑀸 𑀓𑀣𑀁.

𑁧𑁫𑁩𑁮. 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸, 𑀚𑀸𑀢𑀸𑀦𑀦𑁆𑀢𑀭𑀪𑁂𑀤𑀺𑀦𑁄;

𑀅𑀦𑀺𑀘𑁆𑀘𑀸 𑀘 𑀧𑀪𑀗𑁆𑀕𑀽 𑀘, 𑀧𑀮𑀼𑀚𑁆𑀚𑀦𑁆𑀢𑀺 𑀘𑀯𑀦𑁆𑀢𑀺 𑀘.

𑁧𑁫𑁩𑁯. 𑀅𑀤𑁆𑀥𑀼𑀯𑀸 𑀘 𑀅𑀲𑀸𑀭𑀸 𑀘, 𑀯𑀺𑀪𑀯𑀸 𑀘 𑀯𑀺𑀦𑀸𑀲𑀺𑀦𑁄;

𑀲𑀗𑁆𑀔𑀢𑀸 𑀯𑀺𑀧𑀭𑀺𑀡𑀸𑀫-𑀥𑀫𑁆𑀫𑀸 𑀇𑀢𑁆𑀢𑀭𑀓𑀸𑀮𑀺𑀓𑀸.

𑁧𑁫𑁪𑁦. 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸, 𑀮𑀳𑀼𑀓𑀸𑀮𑀧𑁆𑀧𑀯𑀢𑁆𑀢𑀺𑀦𑁄;

𑀢𑀸𑀯𑀓𑀸𑀮𑀺𑀓𑀥𑀫𑁆𑀫𑀸 𑀘, 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀓𑀸 𑀢𑀣𑀸.

𑁧𑁫𑁪𑁧. 𑀔𑀡𑀢𑁆𑀢𑀬𑀧𑀭𑀺𑀘𑁆𑀙𑀺𑀦𑁆𑀦𑀸, 𑀧𑀼𑀩𑁆𑀩𑀸𑀧𑀭𑀯𑀺𑀘𑀺𑀢𑁆𑀢𑀓𑀸;

𑀧𑀼𑀭𑀓𑁆𑀔𑀢𑀸 𑀦𑀺𑀭𑁄𑀥𑀲𑁆𑀲, 𑀲𑀲𑁆𑀲𑀢𑀸 𑀦 𑀓𑀼𑀤𑀸𑀘𑀦𑀁.

𑁧𑁫𑁪𑁨. 𑀚𑀸𑀬𑀦𑁆𑀢𑀺 𑀧𑀭𑀺𑀳𑀸𑀦𑀸𑀬, 𑀦 𑀢𑀼 𑀚𑀸𑀬𑀦𑁆𑀢𑀺 𑀯𑀼𑀤𑁆𑀥𑀺𑀬𑀸;

𑀚𑀺𑀬𑁆𑀬𑀫𑀸𑀦𑀸𑀯 𑀢𑀺𑀝𑁆𑀞𑀦𑁆𑀢𑀺, 𑀚𑀺𑀡𑁆𑀡𑀸 𑀪𑀗𑁆𑀕𑀧𑀭𑀸𑀬𑀡𑀸.

𑁧𑁫𑁪𑁩. 𑀅𑀳𑀼𑀢𑁆𑀯𑀸𑀬𑁂𑀯𑀼𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀓𑀼𑀢𑁄𑀘𑀺𑀧𑀺 𑀆𑀕𑀢𑀸;

𑀳𑀼𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀦𑁆𑀢𑀺, 𑀦 𑀢𑀼 𑀓𑀢𑁆𑀣𑀘𑀺 𑀲𑀜𑁆𑀘𑀺𑀢𑀸.

𑁧𑁫𑁪𑁪. 𑀢𑀁 𑀢𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺-𑀫𑀢𑁆𑀢𑀮𑀸𑀪𑀸𑀬 𑀦𑀺𑀲𑁆𑀲𑀺𑀢𑀸;

𑀦𑀺𑀭𑁄𑀥𑀥𑀫𑁆𑀫𑀸 𑀚𑀸𑀬𑀦𑁆𑀢𑀺, 𑀚𑀸𑀢𑀸 𑀩𑁆𑀬𑀦𑁆𑀢𑀺 𑀪𑀯𑀦𑁆𑀢𑀺 𑀢𑁂.

𑁧𑁫𑁪𑁫. 𑀬𑀣𑀸 𑀦𑀤𑀻 𑀧𑀩𑁆𑀩𑀢𑁂𑀬𑁆𑀬𑀸, 𑀬𑀣𑀸 𑀤𑀻𑀧𑀲𑀺𑀔𑀸 𑀢𑀣𑀸;

𑀲𑀻𑀖𑀲𑀻𑀖𑀁 𑀧𑀯𑀢𑁆𑀢𑀦𑁆𑀢𑀸, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺 𑀘.

𑁧𑁫𑁪𑁬. 𑀚𑀸𑀢𑀸 𑀚𑀸𑀢𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀜𑁆𑀜𑁂 𑀅𑀜𑁆𑀜𑁂 𑀢𑀼 𑀚𑀸𑀬𑀭𑁂;

𑀅𑀯𑀻𑀘𑀺 𑀅𑀦𑀼𑀲𑀫𑁆𑀩𑀦𑁆𑀥𑀸, 𑀦 𑀚𑀸𑀦𑀦𑁆𑀢𑀺 𑀯𑀺𑀲𑁂𑀲𑀢𑁄.

𑁧𑁫𑁪𑁭. 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦, 𑀯𑀺𑀧𑀲𑁆𑀲𑀦𑁆𑀢𑁄 𑀯𑀺𑀘𑀓𑁆𑀔𑀡𑁄;

𑀅𑀦𑀺𑀘𑁆𑀘𑀪𑀸𑀯𑀦𑀁 𑀥𑀻𑀭𑁄, 𑀧𑀭𑀺𑀧𑀸𑀘𑁂𑀢𑀺 𑀲𑀸𑀥𑀼𑀓𑀁.

𑁧𑁫𑁪𑁮. 𑀤𑀼𑀓𑁆𑀔𑀸 𑀘 𑀤𑀼𑀓𑁆𑀔𑀯𑀢𑁆𑀣𑀽 𑀘, 𑀅𑀪𑀺𑀡𑁆𑀳𑀧𑀭𑀺𑀧𑀻𑀴𑀺𑀢𑀸;

𑀭𑁄𑀕𑀸 𑀕𑀡𑁆𑀟𑀸 𑀘 𑀲𑀮𑁆𑀮𑀸 𑀘, 𑀅𑀖𑀢𑁄 𑀘 𑀉𑀧𑀤𑁆𑀤𑀯𑀸.

𑁧𑁫𑁪𑁯. 𑀪𑀬𑁄𑀧𑀲𑀕𑁆𑀕𑀸𑀖𑀫𑀽𑀮𑀸,

𑀲𑀸𑀲𑀯𑀸𑀤𑀻𑀦𑀯𑀻𑀢𑀺𑀢𑀸;

𑀅𑀮𑁂𑀡𑀸𑀲𑀭𑀡𑀸𑀢𑀸𑀡𑀸,

𑀯𑀥𑀓𑀸 𑀫𑀸𑀭𑀓𑀸𑀫𑀺𑀲𑀸.

𑁧𑁫𑁫𑁦. 𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀩𑁆𑀬𑀸𑀥𑀺-

𑀲𑁄𑀓𑁄𑀧𑀸𑀬𑀸𑀲𑀪𑀸𑀕𑀺𑀦𑁄;

𑀧𑀭𑀺𑀤𑁂𑀯𑀲𑀪𑀸𑀯𑀸 𑀘,

𑀲𑀁𑀓𑁆𑀮𑁂𑀲𑀸 𑀤𑀼𑀓𑁆𑀔𑀪𑀸𑀕𑀺𑀦𑁄.

𑁧𑁫𑁫𑁧. 𑀚𑁂𑀕𑀼𑀘𑁆𑀙𑀸 𑀧𑀝𑀺𑀓𑀽𑀮𑀸 𑀘, 𑀩𑀻𑀪𑀘𑁆𑀙𑀸 𑀘 𑀯𑀺𑀭𑀽𑀧𑀺𑀦𑁄;

𑀅𑀚𑀜𑁆𑀜𑀸 𑀘𑀧𑀮𑀸 𑀳𑀻𑀦𑀸, 𑀤𑀼𑀕𑁆𑀕𑀦𑁆𑀥𑀸 𑀩𑀸𑀮𑀲𑁂𑀯𑀺𑀢𑀸.

𑁧𑁫𑁫𑁨. 𑀲𑁄𑀓𑀦𑁆𑀢𑀭𑀺𑀓𑀢𑀸𑀦𑀺𑀘𑁆𑀘𑀁, 𑀢𑀡𑁆𑀳𑀸𑀬 𑀓𑀟𑁆𑀠𑀺𑀢𑀸 𑀪𑀼𑀲𑀁;

𑀓𑀧𑀡𑀸 𑀤𑀼𑀕𑁆𑀕𑀢𑀸 𑀤𑀻𑀦𑀸, 𑀯𑀺𑀧𑀦𑁆𑀦𑀸 𑀘 𑀯𑀺𑀖𑀸𑀢𑀺𑀦𑁄.

𑁧𑁫𑁫𑁩. 𑀅𑀢𑁆𑀢𑀮𑀸𑀪𑀁 𑀕𑀯𑁂𑀲𑀦𑁆𑀢𑀺, 𑀢𑀁𑀢𑀁𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀸;

𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑀫𑀘𑁆𑀘𑀦𑁆𑀢𑀁, 𑀚𑀸𑀢𑀸 𑀧𑀼𑀦 𑀯𑀺𑀳𑀜𑁆𑀜𑀭𑁂.

𑁧𑁫𑁫𑁪. 𑀅𑀕𑁆𑀕𑀺𑀓𑀽𑀧𑁂 𑀦𑀺𑀫𑀼𑀕𑁆𑀕𑀸𑀯, 𑀓𑁆𑀮𑁂𑀲𑀲𑀦𑁆𑀢𑀸𑀧𑀪𑀸𑀕𑀺𑀦𑁄;

𑀑𑀯𑀺𑀤𑁆𑀥𑀸 𑀯𑀺𑀬 𑀲𑀢𑁆𑀢𑀻𑀳𑀺, 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀤𑀼𑀓𑁆𑀔𑀺𑀢𑀸.

𑁧𑁫𑁫𑁫. 𑀚𑀸𑀬𑀫𑀸𑀦𑀸 𑀘 𑀚𑀺𑀬𑁆𑀬𑀦𑁆𑀢𑀸, 𑀫𑀺𑀬𑁆𑀬𑀦𑁆𑀢𑀸 𑀘 𑀔𑀡𑁂 𑀔𑀡𑁂;

𑀧𑀲𑀼𑀓𑀸 𑀯𑀺𑀬 𑀦𑀺𑀘𑁆𑀘𑀫𑁆𑀫𑀸, 𑀳𑀜𑁆𑀜𑀦𑁆𑀢𑀺 𑀲𑁂𑀭𑀺𑀓𑀸𑀢𑀼𑀭𑀸.

𑁧𑁫𑁫𑁬. 𑀢𑀺𑀮𑀸𑀦𑀺 𑀢𑀺𑀮𑀬𑀦𑁆𑀢𑁂𑀯, 𑀉𑀘𑁆𑀙𑀼𑀬𑀦𑁆𑀢𑁂𑀯 𑀉𑀘𑁆𑀙𑀼𑀬𑁄;

𑀉𑀤𑀬𑀩𑁆𑀩𑀬𑀸𑀯𑀲𑁆𑀲𑀁 𑀢𑁂, 𑀧𑀻𑀴𑀬𑀦𑁆𑀢𑀺 𑀅𑀪𑀺𑀡𑁆𑀳𑀲𑁄.

𑁧𑁫𑁫𑁭. 𑀫𑀦𑁄𑀭𑀫𑀦𑀯𑀸𑀓𑀸𑀭𑀸, 𑀯𑀺𑀧𑀮𑁆𑀮𑀸𑀲𑀧𑀭𑀺𑀓𑁆𑀔𑀢𑀸;

𑀇𑀭𑀺𑀬𑀸𑀧𑀣𑀲𑀜𑁆𑀙𑀦𑁆𑀦𑀸, 𑀦𑁄𑀧𑀢𑀺𑀝𑁆𑀞𑀦𑁆𑀢𑀺 𑀤𑀼𑀓𑁆𑀔𑀢𑁄.

𑁧𑁫𑁫𑁮. 𑀲𑀗𑁆𑀔𑀸𑀭𑁂𑀲𑀼 𑀧𑀦𑁂𑀢𑁂𑀲𑀼, 𑀯𑁂𑀤𑀦𑀸𑀲𑁆𑀲𑀸𑀤𑀭𑁄𑀥𑀺𑀦𑁄;

𑀲𑀸𑀯 𑀲𑀦𑁆𑀤𑀼𑀮𑀲𑀫𑁆𑀩𑀤𑁆𑀥𑀸, 𑀲𑀫𑁆𑀫𑁄𑀳𑀧𑀭𑀺𑀯𑀸𑀭𑀺𑀢𑀸.

𑁧𑁫𑁫𑁯. ‘‘𑀅𑀤𑀼𑀁 𑀤𑀼𑀓𑁆𑀔𑀫𑀺𑀤𑀁 𑀤𑀼𑀓𑁆𑀔’’-𑀫𑀺𑀢𑀺 𑀲𑀁𑀲𑀸𑀭𑀘𑀸𑀭𑀺𑀦𑁄;

𑀤𑀼𑀓𑁆𑀔𑀳𑁂𑀢𑀼𑀫𑀚𑀸𑀦𑀦𑁆𑀢𑀸, 𑀲𑀫𑁆𑀪𑀫𑀦𑁆𑀢𑀺 𑀅𑀯𑀺𑀤𑁆𑀤𑀲𑀼.

𑁧𑁫𑁬𑁦. 𑀲𑀼𑀔𑀸𑀓𑀸𑀭𑀫𑀧𑀲𑁆𑀲𑀦𑁆𑀢𑀸, 𑀤𑀼𑀓𑁆𑀔𑀪𑀸𑀭𑀦𑀺𑀧𑀻𑀴𑀺𑀢𑀸;

𑀧𑀢𑁆𑀣𑁂𑀦𑁆𑀢𑀺 𑀤𑀼𑀓𑁆𑀔𑀫𑁂𑀯𑀜𑁆𑀜𑀁, 𑀩𑀸𑀮𑀸 𑀩𑁆𑀬𑀲𑀦𑀪𑀸𑀕𑀺𑀦𑁄.

𑁧𑁫𑁬𑁧. 𑀘𑀯𑀦𑁆𑀢𑀸 𑀉𑀧𑀧𑀚𑁆𑀚𑀦𑁆𑀢𑀸, 𑀭𑀼𑀓𑁆𑀔𑀲𑀸𑀔𑀁𑀯 𑀫𑀓𑁆𑀓𑀝𑁄;

𑀤𑀼𑀓𑁆𑀔𑀫𑁂𑀓𑀁 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀕𑀡𑁆𑀳𑀦𑁆𑀢𑀺 𑀘𑀸𑀧𑀭𑀁.

𑁧𑁫𑁬𑁨. 𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺, 𑀢𑀡𑁆𑀳𑀸𑀲𑀮𑁆𑀮𑀲𑀫𑀧𑁆𑀧𑀺𑀢𑀸;

𑀤𑀺𑀝𑁆𑀞𑀺𑀧𑀸𑀲𑀲𑀫𑀼𑀧𑁂𑀢𑀸, 𑀫𑀸𑀦𑀢𑁆𑀣𑀫𑁆𑀪𑀸𑀦𑀼𑀲𑀸𑀬𑀺𑀦𑁄.

𑁧𑁫𑁬𑁩. 𑀢𑀫𑀸𑀓𑀸𑀭𑀁 𑀧𑀦𑀺𑀘𑁆𑀘𑁂𑀯𑀁, 𑀯𑀺𑀧𑀲𑁆𑀲𑀦𑁆𑀢𑁄 𑀯𑀺𑀲𑀸𑀭𑀤𑁄;

𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀁 𑀦𑀸𑀫, 𑀧𑀭𑀺𑀧𑀸𑀘𑁂𑀢𑀺 𑀪𑀸𑀯𑀦𑀁.

𑁧𑁫𑁬𑁪. 𑀥𑀫𑁆𑀫𑀝𑁆𑀞𑀺𑀢𑀺𑀦𑀺𑀬𑀸𑀫𑀸 𑀳𑀺, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀬𑁄;

𑀅𑀦𑀢𑁆𑀢𑀸𑀲𑀲𑁆𑀲𑀢𑀦𑁆𑀢𑀸 𑀘, 𑀈𑀳𑀸𑀪𑁄𑀕𑀯𑀺𑀯𑀚𑁆𑀚𑀺𑀢𑀸.

𑁧𑁫𑁬𑁫. 𑀧𑀬𑁄𑀚𑀦𑀫𑀥𑀺𑀝𑁆𑀞𑀸𑀬, 𑀦 𑀢𑀼 𑀩𑁆𑀬𑀸𑀧𑀸𑀭𑀬𑀦𑁆𑀢𑀺 𑀘;

𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸, 𑀚𑀦𑁂𑀢𑀼𑀁 𑀯𑀸𑀣 𑀚𑀸𑀬𑀺𑀢𑀼𑀁.

𑁧𑁫𑁬𑁬. 𑀢𑀣𑀸𑀧𑀺 𑀳𑁂𑀢𑀼𑀲𑀸𑀫𑀕𑁆𑀕𑀺-𑀲𑀫𑁆𑀪𑀯𑁂 𑀲𑀫𑁆𑀪𑀯𑀦𑁆𑀢𑀺 𑀢𑁂;

𑀢𑀩𑁆𑀪𑀸𑀯𑀪𑀸𑀯𑀺𑀪𑀸𑀯𑁂𑀦, 𑀅𑀜𑁆𑀜𑀫𑀜𑁆𑀜𑀧𑀯𑀢𑁆𑀢𑀺𑀢𑀸.

𑁧𑁫𑁬𑁭. 𑀅𑀚𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀢𑀺 𑀧𑀘𑁆𑀘𑀬𑀲𑀫𑁆𑀪𑀯𑁂;

𑀧𑀘𑁆𑀘𑀬𑀸𑀦𑀫𑀮𑀸𑀪𑁂 𑀢𑀼, 𑀦 𑀚𑀸𑀬𑀦𑁆𑀢𑀺 𑀓𑀼𑀤𑀸𑀘𑀦𑀁.

𑁧𑁫𑁬𑁮. 𑀦 𑀓𑀺𑀜𑁆𑀘𑁂𑀢𑁆𑀣 𑀅𑀧𑁂𑀓𑁆𑀔𑀺𑀢𑁆𑀯𑀸, 𑀲𑀫𑀕𑁆𑀕𑀸 𑀳𑁄𑀦𑁆𑀢𑀺 𑀧𑀘𑁆𑀘𑀬𑀸;

𑀦 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀫𑀕𑁆𑀕𑀸 𑀘 𑀓𑀼𑀤𑀸𑀘𑀦𑀁.

𑁧𑁫𑁬𑁯. 𑀬𑀣𑀸𑀧𑀘𑁆𑀘𑀬𑀮𑀸𑀪𑁂𑀦, 𑀧𑀯𑀢𑁆𑀢𑀦𑁆𑀢𑀺 𑀬𑀣𑀸 𑀢𑀣𑀸;

𑀭𑀓𑁆𑀔𑀺𑀢𑀸 𑀯𑀸 𑀯𑀺𑀥𑀸𑀢𑀸 𑀯𑀸, 𑀦𑀢𑁆𑀣𑀺 𑀅𑀲𑁆𑀲𑀸𑀫𑀺𑀓𑀸 𑀢𑀣𑀸.

𑁧𑁫𑁭𑁦. ‘‘𑀅𑀳𑀁 𑀫𑀫’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀸, 𑀧𑀭𑀺𑀡𑀸𑀫𑁂𑀦𑁆𑀢𑀺 𑀅𑀜𑁆𑀜𑀣𑀸;

𑀯𑀺𑀲𑁆𑀲𑀲𑀦𑁆𑀢𑀸 𑀳𑀭𑀦𑁆𑀢𑁂𑀢𑁂, 𑀧𑀭𑀸𑀪𑀽𑀢𑀸 𑀧𑀮𑀫𑁆𑀪𑀺𑀦𑁄.

𑁧𑁫𑁭𑁧. 𑀭𑀺𑀢𑁆𑀢𑀸 𑀢𑀼𑀘𑁆𑀙𑀸 𑀘 𑀲𑀼𑀜𑁆𑀜𑀸 𑀘, 𑀯𑀺𑀯𑀺𑀢𑁆𑀢𑀸 𑀲𑀸𑀭𑀯𑀚𑁆𑀚𑀺𑀢𑀸;

𑀲𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀸, 𑀥𑀫𑁆𑀫𑀸 𑀦𑀢𑁆𑀣𑁂𑀢𑁆𑀣 𑀧𑀼𑀕𑁆𑀕𑀮𑁄.

𑁧𑁫𑁭𑁨. 𑀚𑀸𑀬𑀫𑀸𑀦𑀸 𑀘 𑀚𑀺𑀬𑁆𑀬𑀦𑁆𑀢𑀸, 𑀫𑀺𑀬𑁆𑀬𑀫𑀸𑀦𑀸 𑀘 𑀲𑀗𑁆𑀔𑀢𑀸;

𑀯𑀺𑀯𑀲𑀸 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀯𑀲𑁄 𑀢𑁂𑀲𑀁 𑀦 𑀓𑀢𑁆𑀣𑀘𑀺.

𑁧𑁫𑁭𑁩. 𑀦 𑀢𑁂𑀲𑀼 𑀓𑀲𑁆𑀲𑀘𑀺𑀲𑁆𑀲𑁂𑀭𑀁, 𑀦 𑀢𑁂𑀲𑀜𑁆𑀘𑀢𑁆𑀣𑀺 𑀓𑀢𑁆𑀣𑀘𑀺;

𑀦 𑀘𑀢𑁆𑀢𑀦𑀻𑀢𑀺 𑀲𑀗𑁆𑀔𑀸𑀭𑀸, 𑀆𑀥𑀺𑀧𑀘𑁆𑀘𑀯𑀺𑀯𑀚𑁆𑀚𑀺𑀢𑀸.

𑁧𑁫𑁭𑁪. 𑀓𑀤𑀮𑀻𑀧𑀢𑁆𑀢𑀯𑀝𑁆𑀝𑀻𑀯, 𑀅𑀜𑁆𑀜𑀫𑀜𑁆𑀜𑀧𑀢𑀺𑀝𑁆𑀞𑀺𑀢𑀸;

𑀲𑀳𑀚𑀸𑀢𑀕𑁆𑀖𑀦𑀻𑀪𑀽𑀢𑀸, 𑀦𑁄𑀧𑀝𑁆𑀞𑀦𑁆𑀢𑀺 𑀅𑀦𑀢𑁆𑀢𑀢𑁄.

𑁧𑁫𑁭𑁫. 𑀅𑀭𑀽𑀧𑀦𑀺𑀲𑁆𑀲𑀺𑀢𑀁 𑀭𑀽𑀧𑀁, 𑀅𑀭𑀽𑀧𑀁 𑀭𑀽𑀧𑀦𑀺𑀲𑁆𑀲𑀺𑀢𑀁;

𑀚𑀘𑁆𑀘𑀦𑁆𑀥𑀧𑀻𑀞𑀲𑀧𑁆𑀧𑀻𑀯, 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀺𑀢𑀁.

𑁧𑁫𑁭𑁬. 𑀬𑀦𑁆𑀢𑀲𑀼𑀢𑁆𑀢𑁂𑀦 𑀬𑀦𑁆𑀢𑀁𑀯, 𑀓𑀸𑀬𑀬𑀦𑁆𑀢𑀁 𑀧𑀯𑀢𑁆𑀢𑀢𑀺;

𑀦𑀸𑀫𑀸𑀯𑀓𑀟𑁆𑀠𑀺𑀢𑀁 𑀢𑀢𑁆𑀣, 𑀦𑀢𑁆𑀣𑀺 𑀅𑀢𑁆𑀢𑀸 𑀲𑀬𑀁𑀯𑀲𑀻.

𑁧𑁫𑁭𑁭. 𑀘𑁂𑀢𑁄𑀯𑀺𑀧𑁆𑀨𑀸𑀭𑀦𑀺𑀧𑁆𑀨𑀦𑁆𑀦𑀸, 𑀯𑀸𑀬𑁄𑀥𑀸𑀢𑀼𑀲𑀫𑀼𑀝𑁆𑀞𑀺𑀢𑀸;

𑀇𑀭𑀺𑀬𑀸𑀧𑀣𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀸 𑀧𑀸𑀮𑀓𑀸 𑀫𑀢𑀸.