𑁧𑁦. 𑀤𑀲𑀫𑁄 𑀧𑀭𑀺𑀘𑁆𑀙𑁂𑀤𑁄

𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑀯𑀺𑀪𑀸𑀕𑁄

𑁧𑁨𑁯𑁮. 𑀩𑁆𑀬𑀸𑀧𑀸𑀤𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀔𑁂𑀫𑀪𑀸𑀯𑀜𑁆𑀘 𑀔𑀦𑁆𑀢𑀺𑀬𑀁;

𑀅𑀧𑁆𑀧𑀫𑀜𑁆𑀜𑀸 𑀢𑀼 𑀪𑀸𑀯𑁂𑀦𑁆𑀢𑁄, 𑀯𑀺𑀦𑁂𑀬𑁆𑀬 𑀧𑀝𑀺𑀖𑀁 𑀓𑀣𑀁.

𑁧𑁨𑁯𑁯. 𑀘𑁂𑀢𑁄𑀲𑀦𑁆𑀢𑀸𑀧𑀦𑁄 𑀓𑁄𑀥𑁄,

𑀲𑀫𑁆𑀧𑀲𑀸𑀤𑀯𑀺𑀓𑁄𑀧𑀦𑁄;

𑀯𑀺𑀭𑀽𑀧𑀩𑀻𑀪𑀘𑁆𑀙𑀓𑀭𑁄,

𑀫𑀼𑀔𑀯𑀡𑁆𑀡𑀧𑁆𑀧𑀥𑀁𑀲𑀦𑁄.

𑁧𑁩𑁦𑁦. 𑀲𑀻𑀮𑀓𑀸𑀮𑀼𑀲𑁆𑀲𑀺𑀬𑀼𑀧𑁆𑀧𑀸𑀤𑁄, 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀲𑀫𑁆𑀪𑀯𑁄;

𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀤𑁆𑀥𑀁𑀲𑀻, 𑀧𑀝𑀺𑀧𑀢𑁆𑀢𑀺𑀯𑀺𑀩𑀦𑁆𑀥𑀓𑁄.

𑁧𑁩𑁦𑁧. 𑀅𑀧𑀸𑀬𑁂𑀓𑀸𑀬𑀦𑁄 𑀫𑀕𑁆𑀕𑁄, 𑀧𑀸𑀧𑀓𑀡𑁆𑀝𑀓𑀩𑀦𑁆𑀥𑀓𑁄;

𑀥𑀫𑁆𑀫𑀫𑀕𑁆𑀕𑀲𑀫𑀼𑀘𑁆𑀙𑁂𑀤𑀻, 𑀫𑀕𑁆𑀕𑀤𑁆𑀯𑀸𑀭𑀧𑀺𑀥𑀸𑀦𑀓𑁄.

𑁧𑁩𑁦𑁨. 𑀬𑀲𑁄𑀯𑀡𑁆𑀡𑀯𑀺𑀲𑀗𑁆𑀔𑀸𑀭𑁄, 𑀕𑀼𑀡𑀫𑀽𑀮𑀧𑁆𑀧𑀪𑀜𑁆𑀚𑀓𑁄;

𑀤𑀼𑀓𑁆𑀔𑀥𑀫𑁆𑀫𑀲𑀫𑁄𑀥𑀸𑀦𑁄, 𑀩𑁆𑀬𑀲𑀦𑁄𑀧𑀤𑁆𑀤𑀯𑀸𑀓𑀭𑁄.

𑁧𑁩𑁦𑁩. 𑀤𑀼𑀦𑁆𑀦𑀺𑀫𑀺𑀢𑁆𑀢𑀫𑀺𑀤𑀁 𑀚𑀸𑀢𑀁, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀥𑀁𑀲𑀦𑀁;

𑀥𑀽𑀫𑀓𑁂𑀢𑀼𑀲𑀫𑀼𑀧𑁆𑀧𑀸𑀤𑁄, 𑀲𑀩𑁆𑀩𑀮𑁄𑀓𑀯𑀺𑀦𑀸𑀲𑀓𑁄.

𑁧𑁩𑁦𑁪. 𑀲𑀩𑁆𑀩𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁, 𑀅𑀯𑀫𑀗𑁆𑀕𑀮𑀫𑀼𑀝𑁆𑀞𑀺𑀢𑀁;

𑀳𑀺𑀢𑀸𑀭𑀫𑁆𑀪𑀲𑀫𑀼𑀕𑁆𑀖𑀸𑀢𑀻, 𑀅𑀦𑁆𑀢𑀭𑀸𑀬𑀲𑀫𑀸𑀕𑀫𑁄.

𑁧𑁩𑁦𑁫. 𑀲𑀩𑁆𑀩𑀸𑀓𑀸𑀭𑀧𑀝𑀺𑀓𑁆𑀓𑀽𑀮𑀁, 𑀲𑀩𑁆𑀩𑀯𑀺𑀤𑁆𑀤𑁂𑀲𑀓𑀸𑀭𑀡𑀁;

𑀯𑀺𑀧𑀢𑁆𑀢𑀺𑀫𑀼𑀔𑀫𑀼𑀧𑁆𑀧𑀦𑁆𑀦𑀁, 𑀅𑀫𑀺𑀢𑁆𑀢𑀚𑀦𑀧𑀢𑁆𑀣𑀺𑀢𑀁.

𑁧𑁩𑁦𑁬. 𑀲𑀧𑀢𑁆𑀢𑀓𑀭𑀡𑀁 𑀖𑁄𑀭𑀁, 𑀲𑀩𑁆𑀩𑀸𑀦𑀢𑁆𑀣𑀯𑀺𑀥𑀸𑀬𑀓𑀁;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑁧𑁩𑁦𑁭. 𑀔𑀼𑀭𑀥𑀸𑀭𑀁 𑀮𑀺𑀳𑀦𑁆𑀢𑀸𑀯, 𑀕𑀺𑀮𑀦𑁆𑀢𑀸𑀯 𑀳𑀼𑀢𑀸𑀲𑀦𑀁;

𑀢𑀺𑀢𑁆𑀢𑀮𑀸𑀩𑀼𑀁𑀯 𑀔𑀸𑀤𑀦𑁆𑀢𑀸, 𑀕𑀡𑁆𑀳𑀦𑁆𑀢𑀸𑀤𑀺𑀢𑁆𑀢𑀫𑀸𑀬𑀼𑀥𑀁.

𑁧𑁩𑁦𑁮. 𑀩𑁆𑀬𑀸𑀧𑀸𑀤𑀫𑀢𑁆𑀢𑀲𑀫𑁆𑀪𑀯-𑀫𑀢𑁆𑀢𑀖𑀜𑁆𑀜𑀸𑀬 𑀓𑁂𑀯𑀮𑀁;

𑀉𑀧𑀮𑀸𑀴𑁂𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀖𑁄𑀭𑀫𑀸𑀲𑀻𑀯𑀺𑀲𑀁 𑀬𑀣𑀸.

𑁧𑁩𑁦𑁯. 𑀤𑁄𑀲𑀢𑁂𑀚𑁂𑀦 𑀭𑀼𑀓𑁆𑀔𑁄𑀯, 𑀲𑀼𑀲𑀺𑀭𑀸𑀭𑀼𑀴𑁆𑀳𑀧𑀸𑀯𑀓𑁄;

𑀅𑀦𑁆𑀢𑁄𑀦𑀼𑀤𑀬𑁆𑀳𑀫𑀸𑀦𑀸𑀧𑀺, 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀯𑀺𑀖𑀸𑀢𑀺𑀦𑁄.

𑁧𑁩𑁧𑁦. 𑀦𑀸𑀯𑀩𑀼𑀚𑁆𑀛𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀘𑁂𑀢𑁄𑀲𑀗𑁆𑀓𑀧𑁆𑀧𑀯𑀸𑀬𑀼𑀦𑀸;

𑀉𑀓𑁆𑀓𑀸𑀫𑀼𑀔𑀸𑀫𑀺𑀯𑀸𑀤𑀺𑀢𑁆𑀢-𑀫𑀼𑀚𑁆𑀚𑀮𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁.

𑁧𑁩𑁧𑁧. 𑀪𑀬𑀫𑀕𑁆𑀕𑀲𑀫𑀸𑀭𑀼𑀴𑁆𑀳𑀸, 𑀔𑁂𑀫𑀫𑀕𑁆𑀕𑀯𑀺𑀭𑁄𑀥𑀺𑀦𑁄;

𑀩𑁆𑀬𑀸𑀧𑀦𑁆𑀦𑀸 𑀓𑀺𑀩𑁆𑀩𑀺𑀲𑀸𑀓𑀺𑀡𑁆𑀡𑀸, 𑀅𑀢𑁆𑀣𑀤𑁆𑀯𑀬𑀯𑀺𑀭𑁄𑀥𑀺𑀦𑁄.

𑁧𑁩𑁧𑁨. 𑀅𑀦𑀸𑀣𑀸 𑀲𑀮𑁆𑀮𑀓𑀸𑀯𑀺𑀤𑁆𑀥𑀸, 𑀯𑀺𑀲𑀝𑁆𑀝𑀸 𑀅𑀦𑀼𑀲𑁄𑀘𑀺𑀦𑁄;

𑀅𑀦𑁆𑀥𑀸 𑀯𑀺𑀬 𑀫𑀺𑀕𑀸𑀭𑀜𑁆𑀜𑁂, 𑀪𑀫𑀦𑁆𑀢𑀺 𑀳𑀢𑀘𑀓𑁆𑀔𑀼𑀓𑀸.

𑁧𑁩𑁧𑁩. 𑀅𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸, 𑀩𑀸𑀮𑀸 𑀓𑁄𑀥𑀯𑀲𑀸𑀦𑀼𑀕𑀸;

𑀔𑀺𑀧𑁆𑀧𑀁 𑀮𑀓𑁆𑀔𑀺𑀁 𑀧𑀭𑀺𑀘𑁆𑀘𑀢𑁆𑀢𑀸, 𑀬𑀲𑁄𑀪𑁄𑀕𑁂𑀳𑀺 𑀥𑀁𑀲𑀭𑁂.

𑁧𑁩𑁧𑁪. 𑀤𑀼𑀧𑁆𑀧𑀝𑀺𑀧𑁆𑀧𑀸𑀤𑀺𑀢𑀸𑀭𑀫𑁆𑀪𑀸, 𑀓𑁄𑀥𑀲𑀗𑁆𑀔𑁄𑀪𑀫𑁄𑀳𑀺𑀢𑀸;

𑀥𑀫𑁆𑀫𑀸𑀫𑀢𑀭𑀲𑀲𑁆𑀲𑀸𑀤𑀁, 𑀦 𑀯𑀺𑀦𑁆𑀤𑀦𑁆𑀢𑀺 𑀅𑀯𑀺𑀤𑁆𑀤𑀲𑀼.

𑁧𑁩𑁧𑁫. 𑀩𑀳𑁆𑀯𑀸𑀤𑀻𑀦𑀯𑀫𑀺𑀘𑁆𑀘𑁂𑀯-𑀫𑀦𑁆𑀢𑁄 𑀩𑁆𑀬𑀸𑀥𑀺𑀫𑀺𑀯𑀼𑀝𑁆𑀞𑀺𑀢𑀁;

𑀚𑀸𑀢𑀸𑀦𑀮𑀫𑀺𑀯𑀼𑀘𑁆𑀙𑀗𑁆𑀕𑁂, 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑀺 𑀤𑀼𑀚𑁆𑀚𑀦𑀸.

𑁧𑁩𑁧𑁬. 𑀘𑁄𑀤𑀬𑀫𑀸𑀦𑀸 𑀤𑀼𑀓𑁆𑀔𑁂𑀳𑀺, 𑀓𑁆𑀮𑁂𑀲𑀸𑀘𑀺𑀡𑁆𑀡𑀫𑀮𑀻𑀫𑀳𑀸;

𑀧𑀸𑀧𑀓𑀫𑁆𑀫𑁂𑀳𑀺 𑀧𑀽𑀭𑁂𑀦𑁆𑀢𑀸, 𑀲𑁂𑀦𑁆𑀢𑀺 𑀫𑀘𑁆𑀘𑀼𑀧𑀣𑁂 𑀘𑀺𑀭𑀁.

𑁧𑁩𑁧𑁭. 𑀢𑀫𑁂𑀯𑀁 𑀧𑀝𑀺𑀲𑀗𑁆𑀔𑀸𑀬, 𑀧𑀝𑀺𑀖𑀁 𑀧𑀦 𑀬𑁄𑀦𑀺𑀲𑁄;

𑀯𑀸𑀴𑀫𑀺𑀕𑀁𑀯 𑀥𑀸𑀯𑀦𑁆𑀢𑀁, 𑀆𑀯𑀺𑀲𑀦𑁆𑀢𑀁𑀯 𑀭𑀓𑁆𑀔𑀲𑀁.

𑁧𑁩𑁧𑁮. 𑀧𑀸𑀯𑀓𑀁𑀯 𑀧𑀭𑀺𑀩𑁆𑀬𑀼𑀴𑁆𑀳𑀁, 𑀪𑀸𑀬𑀫𑀸𑀦𑀲𑁆𑀲 𑀬𑁄𑀕𑀺𑀦𑁄;

𑀲𑁄𑀢𑁆𑀣𑀺𑀪𑀸𑀯𑀸𑀬 𑀔𑁂𑀫𑀦𑁆𑀢-𑀫𑀼𑀧𑀜𑁆𑀜𑀢𑁆𑀢𑀁 𑀫𑀳𑁂𑀲𑀺𑀦𑀸.

𑁧𑁩𑁧𑁯. 𑀫𑀸𑀢𑀸 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁, 𑀔𑀫𑀸 𑀦𑀸𑀫 𑀫𑀳𑀺𑀤𑁆𑀥𑀺𑀓𑀸;

𑀲𑀫𑀧𑁆𑀧𑀯𑀢𑁆𑀢𑀺 𑀲𑀢𑁆𑀢𑁂𑀲𑀼, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀸𑀥𑀺𑀓𑀸.

𑁧𑁩𑁨𑁦. 𑀓𑁄𑀥𑀸𑀦𑀮𑀚𑀮𑀸𑀲𑁂𑀓𑁄,

𑀲𑁄𑀓𑁄𑀧𑀸𑀬𑀸𑀲𑀦𑀸𑀲𑀦𑀁;

𑀆𑀖𑀸𑀢𑀲𑀮𑁆𑀮𑀦𑀺𑀤𑁆𑀥𑀸𑀭𑀻,

𑀉𑀧𑀦𑀸𑀳𑀯𑀺𑀫𑁄𑀘𑀦𑀁.

𑁧𑁩𑁨𑁧. 𑀯𑀡𑁆𑀡𑀓𑀺𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀁, 𑀕𑀼𑀡𑀫𑀽𑀮𑀸𑀪𑀺𑀲𑁂𑀯𑀦𑀁;

𑀅𑀧𑀸𑀭𑀼𑀢𑀫𑀼𑀔𑀁𑀯𑁂𑀢-𑀫𑀢𑁆𑀣𑀤𑁆𑀯𑀬𑀲𑀫𑀺𑀤𑁆𑀥𑀺𑀬𑀸.

𑁧𑁩𑁨𑁨. 𑀯𑀺𑀖𑀸𑀢𑀧𑀭𑀺𑀬𑀸𑀤𑀸𑀦-𑀫𑀸𑀲𑀯𑀸𑀦𑀫𑀲𑁂𑀲𑀢𑁄;

𑀧𑀝𑀺𑀧𑀲𑁆𑀲𑀫𑁆𑀪𑀦𑀁 𑀘𑁂𑀢𑁄-𑀧𑀻𑀢𑀺𑀓𑀭𑀡𑀘𑀦𑁆𑀤𑀦𑀁.

𑁧𑁩𑁨𑁩. 𑀲𑀩𑁆𑀩𑀤𑀼𑀓𑁆𑀔𑀲𑀫𑀼𑀕𑁆𑀖𑀸𑀢𑀺, 𑀲𑀼𑀔𑀼𑀧𑀝𑁆𑀞𑀸𑀦𑀫𑀼𑀢𑁆𑀢𑀫𑀁;

𑀩𑁆𑀬𑀲𑀦𑁄𑀤𑀬𑀯𑀺𑀘𑁆𑀙𑁂𑀤𑁄, 𑀪𑀬𑀪𑁂𑀭𑀯𑀦𑀺𑀕𑁆𑀕𑀫𑁄.

𑁧𑁩𑁨𑁪. 𑀘𑁂𑀢𑁄𑀧𑀲𑀸𑀤𑀲𑀦𑁆𑀥𑀸𑀦𑁄, 𑀧𑀸𑀲𑀸𑀤𑀺𑀓𑀨𑀮𑀸𑀯𑀳𑁄;

𑀧𑀯𑀭𑁄 𑀩𑁄𑀥𑀺𑀲𑀫𑁆𑀪𑀸𑀭𑁄, 𑀦𑀭𑀸𑀦𑀭𑀦𑀺𑀲𑁂𑀯𑀺𑀢𑁄.

𑁧𑁩𑁨𑁫. 𑀧𑀸𑀧𑀓𑀦𑁆𑀢𑀸𑀭𑀦𑀺𑀢𑁆𑀣𑀸𑀭𑁄, 𑀘𑀢𑀼𑀭𑀸𑀧𑀸𑀬𑀭𑁄𑀥𑀓𑁄;

𑀤𑁆𑀯𑀸𑀭𑀸𑀯𑀸𑀧𑀼𑀭𑀡𑀜𑁆𑀘𑁂𑀢𑀁, 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

𑁧𑁩𑁨𑁬. 𑀧𑀜𑁆𑀜𑀸𑀲𑀻𑀮𑀲𑀫𑀸𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺𑀯𑀺𑀲𑁄𑀥𑀦𑁄;

𑀧𑀺𑀬𑀗𑁆𑀓𑀭𑁄 𑀲𑁄𑀫𑁆𑀫𑀪𑀸𑀯𑁄, 𑀤𑀼𑀮𑁆𑀮𑀪𑁄 𑀩𑀳𑀼𑀧𑀢𑁆𑀣𑀺𑀢𑁄.

𑁧𑁩𑁨𑁭. 𑀓𑁆𑀮𑁂𑀲𑀲𑀗𑁆𑀔𑁄𑀪𑀯𑀺𑀓𑁆𑀔𑁂𑀧-𑀯𑀺𑀧𑁆𑀨𑀦𑁆𑀤𑀧𑀝𑀺𑀩𑀦𑁆𑀥𑀦𑀁;

𑀢𑀺𑀢𑀺𑀓𑁆𑀔𑀸𑀕𑀼𑀡𑀫𑀓𑁆𑀔𑀸𑀢-𑀫𑀸𑀭𑀓𑁆𑀔𑀯𑀺𑀥𑀺𑀫𑀢𑁆𑀢𑀦𑁄.

𑁧𑁩𑁨𑁮. 𑀯𑀺𑀳𑀺𑀁𑀲𑀸𑀭𑀢𑀺𑀲𑀸𑀭𑀫𑁆𑀪-𑀧𑀝𑀺𑀭𑁄𑀥𑀯𑀺𑀫𑁄𑀘𑀦𑀁;

𑀯𑁂𑀭𑀺𑀓𑀺𑀩𑁆𑀩𑀺𑀲𑀯𑀺𑀤𑁆𑀥𑀁𑀲𑀻, 𑀮𑁄𑀓𑀸𑀦𑀼𑀕𑁆𑀕𑀳𑀓𑀸𑀭𑀡𑀁.

𑁧𑁩𑁨𑁯. 𑀥𑀫𑁆𑀫𑀧𑀚𑁆𑀚𑁄𑀢𑀓𑀭𑀡𑀁, 𑀲𑀁𑀬𑁄𑀕𑀫𑀮𑀲𑁄𑀥𑀦𑀁;

𑀲𑀫𑁆𑀫𑁄𑀳𑀢𑀺𑀫𑀺𑀭𑀼𑀤𑁆𑀥𑀸𑀭𑀺, 𑀲𑀫𑁆𑀧𑀢𑁆𑀢𑀺𑀧𑀝𑀺𑀧𑀸𑀤𑀦𑀁.

𑁧𑁩𑁩𑁦. 𑀇𑀘𑁆𑀘𑀢𑁆𑀢𑀢𑁆𑀣𑀁 𑀧𑀭𑀢𑁆𑀣𑀜𑁆𑀘, 𑀲𑀫𑁆𑀧𑀸𑀤𑁂𑀢𑁆𑀯𑀸 𑀔𑀫𑀸𑀧𑀭𑁄;

𑀲𑀸𑀥𑁂𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺-𑀫𑀺𑀥 𑀘𑁂𑀯 𑀧𑀭𑀢𑁆𑀣 𑀘.

𑁧𑁩𑁩𑁧. 𑀢𑀺𑀢𑀺𑀓𑁆𑀔𑀸𑀕𑀼𑀡𑀲𑀫𑁆𑀧𑀦𑁆𑀦𑁄, 𑀧𑀸𑀡𑀪𑀽𑀢𑀸𑀦𑀼𑀓𑀫𑁆𑀧𑀓𑁄;

𑀅𑀦𑀸𑀓𑀼𑀮𑀺𑀢𑀓𑀫𑁆𑀫𑀦𑁆𑀢𑁄, 𑀲𑁄𑀭𑀢𑁄 𑀲𑀔𑀺𑀮𑁄 𑀲𑀼𑀘𑀺.

𑁧𑁩𑁩𑁨. 𑀦𑀺𑀯𑀸𑀢𑁄 𑀲𑀫𑀺𑀢𑀸𑀘𑀸𑀭𑁄, 𑀲𑀼𑀪𑀕𑁄 𑀧𑀺𑀬𑀤𑀲𑁆𑀲𑀦𑁄;

𑀧𑀝𑀺𑀲𑀗𑁆𑀔𑀸𑀩𑀮𑀧𑁆𑀧𑀢𑁆𑀢𑁄, 𑀥𑀺𑀢𑀺𑀫𑀸 𑀫𑀢𑀺𑀧𑀸𑀝𑀯𑁄.

𑁧𑁩𑁩𑁩. 𑀅𑀓𑁆𑀔𑁄𑀪𑁄 𑀅𑀥𑀺𑀯𑀸𑀲𑁂𑀦𑁆𑀢𑁄,

𑀲𑀩𑁆𑀩𑀸𑀦𑀢𑁆𑀣𑁂 𑀧𑀭𑀺𑀲𑁆𑀲𑀬𑁂;

𑀪𑀻𑀫𑀲𑀗𑁆𑀕𑀸𑀫𑀸𑀯𑀘𑀭𑁄,

𑀳𑀢𑁆𑀣𑀺𑀦𑀸𑀕𑁄𑀯 𑀲𑁄𑀪𑀢𑀺.

𑁧𑁩𑁩𑁪. 𑀇𑀢𑁆𑀣𑀁 𑀲𑀫𑀦𑁆𑀢𑀢𑁄 𑀪𑀤𑁆𑀤𑀁, 𑀢𑀺𑀢𑀺𑀓𑁆𑀔𑀁 𑀧𑀘𑁆𑀘𑀯𑁂𑀓𑁆𑀔𑀢𑁄;

𑀧𑀲𑁆𑀲𑀫𑁆𑀪𑁂𑀢𑀺 𑀲𑀫𑀼𑀝𑁆𑀞𑀸𑀬, 𑀔𑀫𑀸 𑀩𑁆𑀬𑀸𑀧𑀸𑀤𑀲𑀫𑁆𑀪𑀫𑀁.

𑁧𑁩𑁩𑁫. 𑀤𑀺𑀩𑁆𑀩𑁄𑀲𑀥𑀫𑀺𑀯𑀸𑀢𑀗𑁆𑀓𑀁, 𑀫𑁂𑀖𑀚𑁆𑀚𑀯𑀁 𑀳𑀼𑀢𑀸𑀲𑀦𑀁;

𑀔𑀺𑀧𑁆𑀧𑀫𑀦𑁆𑀢𑀭𑀥𑀸𑀧𑁂𑀢𑀺, 𑀢𑀺𑀢𑀺𑀓𑁆𑀔𑀸 𑀓𑁄𑀥𑀫𑀢𑁆𑀢𑀦𑁄.

𑁧𑁩𑁩𑁬. 𑀢𑀢𑁄𑀦𑁂𑀓𑀕𑀼𑀡𑁄𑀧𑁂𑀢𑀁, 𑀦𑁂𑀓𑀤𑁄𑀲𑀧𑁆𑀧𑀪𑀜𑁆𑀚𑀦𑀁;

𑀔𑀦𑁆𑀢𑀺𑀥𑀫𑁆𑀫𑀫𑀥𑀺𑀝𑁆𑀞𑀸𑀬, 𑀧𑀲𑀦𑁆𑀦𑀥𑀻𑀭𑀫𑀸𑀦𑀲𑁄.

𑁧𑁩𑁩𑁭. 𑀪𑀸𑀯𑁂𑀬𑁆𑀬 𑀧𑀞𑀫𑀁 𑀢𑀸𑀯, 𑀫𑁂𑀢𑁆𑀢𑀸𑀪𑀸𑀯𑀦𑀫𑀼𑀢𑁆𑀢𑀫𑀁;

𑀅𑀢𑁆𑀢𑀸𑀦𑀫𑀼𑀧𑀫𑀁 𑀓𑀢𑁆𑀯𑀸, 𑀲𑀢𑁆𑀢𑁂𑀲𑀼 𑀳𑀺𑀢𑀯𑀼𑀟𑁆𑀠𑀺𑀬𑀸.

𑁧𑁩𑁩𑁮. 𑀲𑀩𑁆𑀩𑁂 𑀲𑀢𑁆𑀢𑀸 𑀘 𑀧𑀸𑀡𑀸 𑀘, 𑀪𑀽𑀢𑀸 𑀚𑀻𑀯𑀸 𑀘 𑀧𑀼𑀕𑁆𑀕𑀮𑀸;

𑀅𑀩𑁆𑀬𑀸𑀧𑀚𑁆𑀚𑀸 𑀢𑀣𑀸𑀯𑁂𑀭𑀸, 𑀅𑀦𑀻𑀖𑀸 𑀘 𑀲𑀼𑀔𑁂𑀥𑀺𑀦𑁄.

𑁧𑁩𑁩𑁯. 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀪𑁄𑀕𑁂𑀳𑀺, 𑀧𑀯𑀟𑁆𑀠𑀦𑁆𑀢𑀼 𑀬𑀲𑀲𑁆𑀲𑀺𑀦𑁄;

𑀧𑀭𑀺𑀯𑀸𑀭𑀩𑀮𑀧𑁆𑀧𑀢𑁆𑀢𑀸, 𑀪𑀬𑁄𑀧𑀤𑁆𑀤𑀯𑀯𑀚𑁆𑀚𑀺𑀢𑀸.

𑁧𑁩𑁪𑁦. 𑀲𑀔𑀺𑀮𑀸 𑀲𑀼𑀔𑀲𑀫𑁆𑀪𑀸𑀲𑀸, 𑀅𑀜𑁆𑀜𑀫𑀜𑁆𑀜𑀸𑀯𑀺𑀭𑁄𑀥𑀺𑀦𑁄;

𑀫𑁄𑀤𑀦𑁆𑀢𑀼 𑀲𑀼𑀳𑀺𑀢𑀸 𑀲𑀩𑁆𑀩𑁂, 𑀫𑀸 𑀓𑀺𑀜𑁆𑀘𑀺 𑀧𑀸𑀧𑀫𑀸𑀕𑀫𑀸.

𑁧𑁩𑁪𑁧. 𑀲𑀤𑁆𑀥𑀸𑀧𑀸𑀫𑁄𑀚𑁆𑀚𑀩𑀳𑀼𑀮𑀸, 𑀤𑀸𑀦𑀲𑀻𑀮𑀫𑀳𑀼𑀲𑁆𑀲𑀯𑀸;

𑀕𑀼𑀡𑀪𑀽𑀲𑀺𑀢𑀲𑀦𑁆𑀢𑀸𑀦𑀸, 𑀆𑀬𑀼𑀁 𑀧𑀸𑀮𑁂𑀦𑁆𑀢𑀦𑀸𑀫𑀬𑀁.

𑁧𑁩𑁪𑁨. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀼𑀭𑁄𑀥𑀸𑀬, 𑀲𑀤𑁆𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸;

𑀆𑀭𑀸𑀥𑁂𑀦𑁆𑀢𑀼 𑀳𑀺𑀢𑁄𑀧𑀸𑀬-𑀫𑀘𑁆𑀘𑀦𑁆𑀢𑀁 𑀲𑀼𑀔𑀲𑀸𑀥𑀦𑀁.

𑁧𑁩𑁪𑁩. 𑀇𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦, 𑀲𑀢𑁆𑀢𑁂𑀲𑀼 𑀳𑀺𑀢𑀫𑀸𑀦𑀲𑀁;

𑀫𑀸𑀢𑀸𑀯 𑀧𑀺𑀬𑀧𑀼𑀢𑁆𑀢𑀫𑁆𑀳𑀺, 𑀧𑀯𑀢𑁆𑀢𑁂𑀬𑁆𑀬 𑀦𑀺𑀭𑀦𑁆𑀢𑀭𑀁.

𑁧𑁩𑁪𑁪. 𑀲𑀺𑀦𑁂𑀳𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄, 𑀩𑁆𑀬𑀸𑀧𑀸𑀤𑀜𑁆𑀘 𑀯𑀺𑀦𑀸𑀲𑀬𑀁;

𑀧𑀭𑀺𑀲𑀼𑀤𑁆𑀥𑁂𑀦 𑀘𑀺𑀢𑁆𑀢𑁂𑀦, 𑀳𑀺𑀢𑀓𑀸𑀫𑁄𑀯 𑀓𑁂𑀯𑀮𑀁.

𑁧𑁩𑁪𑁫. 𑀫𑁂𑀢𑁆𑀢𑀸𑀬 𑀫𑀺𑀢𑁆𑀢𑁂 𑀫𑀚𑁆𑀛𑀢𑁆𑀢𑁂, 𑀯𑁂𑀭𑀺𑀓𑁂 𑀘 𑀬𑀣𑀸𑀓𑁆𑀓𑀫𑀁;

𑀓𑀭𑁄𑀦𑁆𑀢𑁄 𑀲𑀻𑀫𑀲𑀫𑁆𑀪𑁂𑀤𑀁, 𑀅𑀢𑁆𑀢𑀦𑀺 𑀘 𑀲𑀫𑀁 𑀨𑀭𑁂.

𑁧𑁩𑁪𑁬. 𑀆𑀲𑁂𑀯𑀦𑁆𑀢𑀲𑁆𑀲 𑀢𑀲𑁆𑀲𑁂𑀯𑀁, 𑀳𑀺𑀢𑀸𑀪𑁄𑀕𑀲𑀫𑀸𑀳𑀺𑀢𑀁;

𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀫𑀸𑀭𑀩𑁆𑀪, 𑀲𑀫𑀸𑀥𑀺𑀬𑀢𑀺 𑀫𑀸𑀦𑀲𑀁.

𑁧𑁩𑁪𑁭. 𑀢𑀢𑁄 𑀅𑀦𑀻𑀖𑁄 𑀏𑀓𑀕𑁆𑀕𑁄, 𑀉𑀧𑀲𑀦𑁆𑀢𑀫𑀦𑁄𑀭𑀣𑁄;

𑀛𑀸𑀦𑀢𑁆𑀢𑀺𑀓𑀁 𑀘𑀢𑀼𑀓𑁆𑀓𑀁 𑀯𑀸, 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸.

𑁧𑁩𑁪𑁮. 𑀪𑀽𑀫𑀺𑀤𑁂𑀲𑀤𑀺𑀲𑀸𑀲𑀢𑁆𑀢-𑀪𑁂𑀤𑀪𑀺𑀦𑁆𑀦𑁂𑀲𑀼 𑀑𑀥𑀺𑀲𑁄;

𑀬𑀣𑀸𑀲𑀫𑁆𑀪𑀯𑀫𑀧𑁆𑀧𑁂𑀢𑀺, 𑀲𑀩𑁆𑀩𑀲𑀢𑁆𑀢𑁂𑀲𑁆𑀯𑀦𑁄𑀥𑀺𑀲𑁄.

𑁧𑁩𑁪𑁯. 𑀢𑀤𑁂𑀯𑀫𑁂𑀓𑀲𑀢𑁆𑀢𑀫𑁆𑀳𑀺, 𑀧𑀭𑀺𑀘𑁆𑀙𑁂𑀤𑀦𑀺𑀬𑀸𑀫𑀢𑁄;

𑀩𑀳𑀼𑀓𑁂𑀲𑀼 𑀘 𑀲𑀢𑁆𑀢𑁂𑀲𑀼, 𑀲𑀩𑁆𑀩𑁂𑀲𑀼 𑀘 𑀧𑀯𑀢𑁆𑀢𑀢𑀺.

𑁧𑁩𑁫𑁦. 𑀢𑀣𑀸𑀲𑁂𑀯𑀺𑀢𑀲𑀦𑁆𑀢𑀸𑀦𑁄,

𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸;

𑀓𑀭𑀼𑀡𑀸𑀪𑀸𑀯𑀦𑀸𑀬𑁄𑀕-

𑀫𑀸𑀭𑀪𑁂𑀬𑁆𑀬 𑀢𑀢𑁄 𑀧𑀭𑀁.

𑁧𑁩𑁫𑁧. 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀺𑀢𑀸𑀓𑀸𑀭-𑀫𑀸𑀯𑀚𑁆𑀚𑀺𑀢𑁆𑀯𑀸𑀦 𑀬𑁄𑀦𑀺𑀲𑁄;

‘‘𑀅𑀳𑁄 𑀤𑀼𑀓𑁆𑀔𑀸 𑀯𑀺𑀫𑀼𑀘𑁆𑀘𑀦𑁆𑀢𑀼, 𑀲𑀩𑁆𑀩𑁂 𑀲𑀢𑁆𑀢𑀸’’𑀢𑀺 𑀘𑀺𑀦𑁆𑀢𑀬𑀁.

𑁧𑁩𑁫𑁨. 𑀓𑀣𑀁 𑀫𑀸𑀡𑀯𑀓𑁄𑀬𑀜𑁆𑀘, 𑀪𑀬𑀪𑁂𑀭𑀯𑀓𑀫𑁆𑀧𑀺𑀢𑁄;

𑀩𑁆𑀬𑀲𑀦𑁄𑀧𑀤𑁆𑀤𑀯𑀸𑀯𑀺𑀤𑁆𑀥𑁄, 𑀯𑀺𑀧𑁆𑀨𑀦𑁆𑀤𑀢𑀺 𑀯𑀺𑀖𑀸𑀢𑀯𑀸.

𑁧𑁩𑁫𑁩. 𑀢𑀣𑀸 𑀳𑁂𑀢𑁂 𑀯𑀺𑀫𑁄𑀲𑀸𑀬, 𑀧𑀝𑀺𑀧𑀦𑁆𑀦𑀸 𑀯𑀺𑀭𑁄𑀥𑀺𑀦𑁄;

𑀲𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀜𑁆𑀜𑀦𑁆𑀢𑀺, 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸.

𑁧𑁩𑁫𑁪. 𑀅𑀣𑀜𑁆𑀜𑁂 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀢𑁆𑀢𑀺𑀯𑀺𑀦𑀺𑀧𑀸𑀢𑀺𑀓𑀸;

𑀧𑀥𑀼𑀧𑀸𑀬𑀺𑀓𑀲𑀗𑁆𑀓𑀧𑁆𑀧𑀸, 𑀲𑁄𑀓𑁄𑀧𑀸𑀬𑀸𑀲𑀪𑀸𑀕𑀺𑀦𑁄.

𑁧𑁩𑁫𑁫. 𑀅𑀣𑀸𑀧𑀭𑁂 𑀧𑀭𑀸𑀪𑀽𑀢𑀸, 𑀓𑀸𑀫𑀓𑁆𑀮𑁂𑀲𑀯𑀲𑀻𑀓𑀢𑀸;

𑀫𑁄𑀳𑀦𑁆𑀥𑀓𑀸𑀭𑀧𑀓𑁆𑀔𑀦𑁆𑀢𑀸, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁧𑁩𑁫𑁬. 𑀢𑁂 𑀢𑀢𑁆𑀣 𑀓𑀝𑀼𑀓𑀁 𑀖𑁄𑀭𑀫𑀦𑀼𑀪𑁄𑀦𑁆𑀢𑀸 𑀲𑀓𑀁 𑀨𑀮𑀁;

𑀤𑀼𑀓𑁆𑀔𑀲𑀽𑀮𑀲𑀫𑀸𑀯𑀺𑀤𑁆𑀥𑀸, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀭𑁂.

𑁧𑁩𑁫𑁭. 𑀤𑀻𑀖𑀭𑀢𑁆𑀢𑀸𑀥𑀺𑀫𑀼𑀢𑁆𑀢𑀸𑀬, 𑀤𑁂𑀯𑀮𑁄𑀓𑀲𑀫𑀺𑀤𑁆𑀥𑀺𑀬𑀸;

𑀤𑁂𑀯𑀓𑀸𑀬𑀸 𑀯𑀺𑀳𑀸𑀬𑀦𑁆𑀢𑀺, 𑀅𑀓𑀸𑀫𑀸 𑀧𑀭𑀺𑀯𑀢𑁆𑀢𑀺𑀦𑁄.

𑁧𑁩𑁫𑁮. 𑀘𑀺𑀭𑀓𑀸𑀮𑀁 𑀚𑀮𑀺𑀢𑁆𑀯𑀸𑀦, 𑀲𑀽𑀭𑀺𑀬𑁄𑀯 𑀦𑀪𑀦𑁆𑀢𑀭𑁂;

𑀩𑁆𑀭𑀳𑁆𑀫𑀸𑀦𑁄𑀧𑀺 𑀧𑀢𑀦𑁆𑀢𑁂𑀯, 𑀩𑁆𑀭𑀳𑁆𑀫𑀮𑁄𑀓𑀸𑀧𑀭𑀸𑀬𑀡𑀸.

𑁧𑁩𑁫𑁯. 𑀔𑀦𑁆𑀥𑀧𑀜𑁆𑀘𑀓𑀫𑀺𑀘𑁆𑀘𑁂𑀯𑀁, 𑀤𑀼𑀓𑁆𑀔𑀸𑀕𑀸𑀭𑀁 𑀲𑀫𑀼𑀩𑁆𑀩𑀳𑀁;

𑀦𑀸𑀦𑀸𑀕𑀢𑀻𑀲𑀼 𑀯𑀺𑀓𑁆𑀔𑀺𑀢𑁆𑀢𑀁, 𑀧𑀸𑀡𑀚𑀸𑀢𑀁 𑀯𑀺𑀳𑀜𑁆𑀜𑀢𑀺.

𑁧𑁩𑁬𑁦. 𑀅𑀦𑀸𑀣𑀫𑀦𑀬𑀸𑀧𑀦𑁆𑀦𑀁, 𑀧𑀭𑀺𑀳𑀸𑀦𑀺𑀪𑀬𑀸𑀓𑀼𑀮𑀁;

𑀯𑀸𑀢𑀫𑀡𑁆𑀟𑀮𑀺𑀓𑀓𑁆𑀔𑀺𑀢𑁆𑀢𑀧𑀓𑁆𑀔𑀻𑀯 𑀧𑀭𑀺𑀯𑀢𑁆𑀢𑀢𑀺.

𑁧𑁩𑁬𑁧. 𑀇𑀢𑀺 𑀤𑀺𑀲𑁆𑀯𑀸𑀦 𑀲𑀼𑀢𑁆𑀯𑀸 𑀯𑀸, 𑀲𑀫𑁆𑀪𑀸𑀯𑁂𑀢𑁆𑀯𑀸𑀦 𑀯𑀸 𑀧𑀼𑀦;

𑀤𑀼𑀓𑁆𑀔𑀸𑀧𑀕𑀫𑀫𑀺𑀘𑁆𑀙𑀦𑁆𑀢𑁄, 𑀤𑀼𑀓𑁆𑀔𑀸𑀧𑀕𑀫 𑀧𑀢𑁆𑀣𑀬𑀁.

𑁧𑁩𑁬𑁨. 𑀲𑀼𑀔𑀺𑀢𑁂𑀲𑀼 𑀘 𑀫𑁂𑀥𑀸𑀯𑀻, 𑀤𑀼𑀓𑁆𑀔𑀸𑀓𑀸𑀭𑀫𑀦𑀼𑀲𑁆𑀲𑀭𑀁;

𑀧𑀯𑀢𑁆𑀢𑁂𑀬𑁆𑀬 𑀤𑀬𑀸𑀧𑀦𑁆𑀦𑁄, 𑀓𑀭𑀼𑀡𑀸𑀪𑀸𑀯𑀦𑀧𑁆𑀧𑀦𑀁.

𑁧𑁩𑁬𑁩. ‘‘𑀅𑀳𑁄 𑀲𑀢𑁆𑀢𑀸 𑀯𑀺𑀫𑀼𑀘𑁆𑀘𑀦𑁆𑀢𑀼, 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀲𑀩𑁆𑀩𑀣𑀸;

𑀲𑀸𑀥𑀼 𑀲𑀫𑁂𑀦𑁆𑀢𑀼𑀧𑀸𑀬𑀸𑀲𑀸, 𑀲𑁄𑀓𑀸 𑀘 𑀧𑀭𑀺𑀤𑁂𑀯𑀦𑀸.

𑁧𑁩𑁬𑁪. ‘‘𑀔𑀻𑀬𑀦𑁆𑀢𑀼 𑀧𑀸𑀧𑀥𑀫𑁆𑀫𑀸 𑀘, 𑀧𑀲𑁆𑀲𑀫𑁆𑀪𑁂𑀦𑁆𑀢𑀸𑀫𑀬𑀸 𑀢𑀣𑀸;

𑀲𑀁𑀓𑁆𑀮𑁂𑀲𑀸 𑀧𑀮𑀺𑀩𑁄𑀥𑀸 𑀘, 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀼 𑀧𑀸𑀡𑀺𑀦𑀁.

𑁧𑁩𑁬𑁫. ‘‘𑀩𑁆𑀬𑀸𑀧𑀸𑀤𑀸 𑀘 𑀯𑀺𑀳𑀸𑀬𑀦𑁆𑀢𑀼, 𑀯𑀺𑀦𑀺𑀯𑀢𑁆𑀢𑀦𑁆𑀢𑀼𑀧𑀤𑁆𑀤𑀯𑀸;

𑀩𑁆𑀬𑀲𑀦𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀼, 𑀯𑀺𑀕𑀘𑁆𑀙𑀦𑁆𑀢𑀼 𑀯𑀺𑀧𑀢𑁆𑀢𑀺𑀬𑁄.

𑁧𑁩𑁬𑁬. ‘‘𑀯𑀺𑀳𑁂𑀲𑀸 𑀘 𑀯𑀺𑀖𑀸𑀢𑀸 𑀘, 𑀔𑀻𑀬𑀦𑁆𑀢𑀼 𑀪𑀬𑀪𑁂𑀭𑀯𑀸;

𑀧𑀝𑀺𑀓𑁆𑀓𑀫𑀦𑁆𑀢𑀼 𑀯𑀺𑀲𑁆𑀲𑀝𑁆𑀞𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀦𑁆𑀢𑀼 𑀧𑀸𑀡𑀺𑀦𑁄’’.

𑁧𑁩𑁬𑁭. 𑀇𑀘𑁆𑀘𑁂𑀯𑀫𑀦𑀼𑀓𑀫𑁆𑀧𑀦𑁆𑀢𑁄, 𑀲𑀩𑁆𑀩𑀲𑀢𑁆𑀢𑁂𑀧𑀺 𑀲𑀩𑁆𑀩𑀣𑀸;

𑀲𑀩𑁆𑀩𑀤𑀼𑀓𑁆𑀔𑀲𑀫𑀼𑀕𑁆𑀖𑀸𑀢𑀁, 𑀧𑀢𑁆𑀣𑁂𑀦𑁆𑀢𑁄 𑀓𑀭𑀼𑀡𑀸𑀬𑀢𑀺.