𑁯. 𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄

𑀤𑀲𑀸𑀦𑀼𑀲𑁆𑀲𑀢𑀺𑀯𑀺𑀪𑀸𑀕𑁄

𑁧𑁧𑁦𑁦. 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀬𑁄𑀕𑀻, 𑀪𑀸𑀯𑁂𑀦𑁆𑀢𑁄𑀦𑀼𑀲𑁆𑀲𑀢𑀺𑀁 𑀧𑀦;

𑀤𑀲𑀸𑀦𑀼𑀲𑁆𑀲𑀢𑀺𑀪𑁂𑀤𑁂𑀲𑀼, 𑀪𑀸𑀯𑁂𑀬𑁆𑀬𑀜𑁆𑀜𑀢𑀭𑀁 𑀓𑀣𑀁.

𑁧𑁧𑁦𑁧. 𑀅𑀭𑀳𑀁 𑀲𑀼𑀕𑀢𑁄 𑀮𑁄𑀓𑁂, 𑀪𑀕𑀯𑀸 𑀮𑁄𑀓𑀧𑀸𑀭𑀕𑀽;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀯𑀺𑀫𑀼𑀢𑁆𑀢𑀺𑀧𑀭𑀺𑀦𑀸𑀬𑀓𑁄.

𑁧𑁧𑁦𑁨. 𑀚𑁂𑀝𑁆𑀞𑁄 𑀲𑀫𑁆𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄, 𑀲𑁂𑀝𑁆𑀞𑁄 𑀧𑀼𑀭𑀺𑀲𑀲𑀸𑀭𑀣𑀻;

𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀩𑀼𑀤𑁆𑀥𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁧𑁧𑁦𑁩. 𑀲𑀩𑁆𑀩𑀮𑁄𑀓𑀳𑀺𑀢𑁄 𑀩𑀦𑁆𑀥𑀼, 𑀲𑀫𑀢𑁆𑀢𑀭𑀢𑀦𑀸𑀮𑀬𑁄;

𑀲𑀢𑁆𑀢𑀸𑀦𑀫𑀦𑀼𑀓𑀫𑁆𑀧𑀸𑀬, 𑀚𑀸𑀢𑁄 𑀦𑀸𑀣𑁄 𑀲𑀺𑀯𑀁𑀓𑀭𑁄.

𑁧𑁧𑁦𑁪. 𑀘𑀓𑁆𑀔𑀼𑀫𑀸 𑀢𑀺𑀢𑁆𑀣𑀓𑀼𑀲𑀮𑁄, 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄;

𑀫𑀘𑁆𑀘𑀼𑀥𑁂𑀬𑁆𑀬𑀯𑀺𑀫𑁄𑀓𑁆𑀔𑀸𑀬, 𑀧𑀝𑀺𑀧𑀸𑀤𑀬𑀺 𑀧𑀸𑀡𑀺𑀦𑁄.

𑁧𑁧𑁦𑁫. 𑀲𑀢𑁆𑀣𑀯𑀸𑀳𑁄 𑀫𑀳𑀸𑀬𑁄𑀕𑁆𑀕𑁄, 𑀫𑀕𑁆𑀕𑀸𑀫𑀕𑁆𑀕𑀬𑀼𑀥𑀦𑁆𑀥𑀭𑁄;

𑀲𑀺𑀭𑀺𑀲𑀢𑁆𑀣𑀫𑀥𑀺𑀕𑁆𑀕𑀬𑁆𑀳, 𑀯𑀺𑀘𑀭𑀺𑀢𑁆𑀣 𑀫𑀳𑀸𑀧𑀣𑀁,

𑁧𑁧𑁦𑁬. 𑀅𑀦𑁄𑀫𑁄 𑀅𑀲𑀫𑁄 𑀥𑀻𑀭𑁄,

𑀮𑁄𑀓𑀳𑀻𑀢𑀧𑀭𑀓𑁆𑀓𑀫𑁄;

𑀲𑀩𑁆𑀩𑀸𑀓𑀸𑀭𑀯𑀭𑁄𑀧𑁂𑀢𑁄,

𑀅𑀘𑁆𑀙𑁂𑀭𑀩𑁆𑀪𑀼𑀢𑀧𑀼𑀕𑁆𑀕𑀮𑁄.

𑁧𑁧𑁦𑁭. 𑀅𑀢𑁆𑀣𑀪𑀽𑀢𑁄 𑀥𑀫𑁆𑀫𑀪𑀽𑀢𑁄,

𑀩𑁆𑀭𑀳𑁆𑀫𑀪𑀽𑀢𑁄 𑀫𑀳𑀸𑀬𑀲𑁄;

𑀜𑀸𑀡𑀸𑀮𑁄𑀓𑀧𑀭𑀺𑀘𑁆𑀙𑀺𑀦𑁆𑀦-

𑀜𑁂𑀬𑁆𑀬𑀸𑀲𑁂𑀲𑀧𑀭𑀺𑀕𑁆𑀕𑀳𑁄.

𑁧𑁧𑁦𑁮. 𑀆𑀦𑀼𑀪𑀸𑀯𑀯𑀲𑀺𑀧𑁆𑀧𑀢𑁆𑀢𑁄, 𑀆𑀲𑀪𑀡𑁆𑀟𑀸𑀦𑀦𑀺𑀘𑁆𑀘𑀮𑁄;

𑀫𑀳𑀦𑁆𑀢𑀫𑀭𑀺𑀬𑀸𑀤𑁄𑀬𑀫𑀦𑀦𑁆𑀢𑀕𑀢𑀺𑀕𑁄𑀘𑀭𑁄.

𑁧𑁧𑁦𑁯. 𑀲𑀩𑁆𑀩𑀸 𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑁄;

𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀝𑁆𑀞𑀸𑀦𑁄, 𑀕𑀼𑀡𑀧𑀸𑀭𑀫𑀺𑀧𑀽𑀭𑀓𑁄.

𑁧𑁧𑁧𑁦. 𑀅𑀧𑁆𑀧𑀫𑁂𑀬𑁆𑀬𑁄 𑀫𑀳𑀸𑀦𑀸𑀕𑁄, 𑀫𑀳𑀸𑀯𑀻𑀭𑁄 𑀫𑀳𑀸𑀫𑀼𑀦𑀺;

𑀫𑀳𑁂𑀲𑀻 𑀫𑀳𑀺𑀢𑀸𑀘𑀸𑀭𑁄, 𑀫𑀳𑀸𑀫𑀳𑁄 𑀫𑀳𑀺𑀤𑁆𑀥𑀺𑀓𑁄.

𑁧𑁧𑁧𑁧. 𑀲𑀩𑁆𑀩𑀢𑁆𑀣𑀲𑀺𑀤𑁆𑀥𑀺𑀲𑀜𑁆𑀘𑀸𑀭𑁄, 𑀫𑀳𑁂𑀲𑀻𑀕𑀡𑀧𑀽𑀚𑀺𑀢𑁄;

𑀭𑀸𑀚𑀸𑀥𑀺𑀭𑀸𑀚𑀫𑀳𑀺𑀢𑁄, 𑀤𑁂𑀯𑀩𑁆𑀭𑀳𑁆𑀫𑀸𑀪𑀺𑀯𑀦𑁆𑀤𑀺𑀢𑁄.

𑁧𑁧𑁧𑁨. 𑀅𑀪𑀺𑀪𑀽𑀬 𑀢𑀬𑁄 𑀮𑁄𑀓𑁂, 𑀆𑀤𑀺𑀘𑁆𑀘𑁄𑀯 𑀦𑀪𑀦𑁆𑀢𑀭𑁂;

𑀯𑀺𑀭𑁄𑀘𑀢𑀺 𑀫𑀳𑀸𑀢𑁂𑀚𑁄, 𑀅𑀦𑁆𑀥𑀓𑀸𑀭𑁂 𑀧𑀪𑀗𑁆𑀓𑀭𑁄.

𑁧𑁧𑁧𑁩. 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑁄, 𑀓𑁂𑀢𑀼𑀫𑀸𑀮𑀸𑀳𑀮𑀗𑁆𑀓𑀢𑁄;

𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀸𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀪𑀺𑀢𑁄.

𑁧𑁧𑁧𑁪. 𑀙𑀩𑁆𑀩𑀡𑁆𑀡𑀭𑀁𑀲𑀺𑀮𑀮𑀺𑀢𑁄, 𑀭𑀢𑀦𑀕𑁆𑀖𑀺𑀬𑀲𑀦𑁆𑀦𑀺𑀪𑁄;

𑀲𑀫𑀺𑀤𑁆𑀥𑀺𑀭𑀽𑀧𑀲𑁄𑀪𑀕𑁆𑀕𑁄, 𑀤𑀲𑁆𑀲𑀦𑁂𑀬𑁆𑀬𑀁𑀯 𑀧𑀺𑀡𑁆𑀟𑀺𑀢𑀁.

𑁧𑁧𑁧𑁫. 𑀨𑀼𑀮𑁆𑀮𑀁 𑀧𑀤𑀼𑀫𑀲𑀡𑁆𑀟𑀁𑀯, 𑀓𑀧𑁆𑀧𑀭𑀼𑀓𑁆𑀔𑁄𑀯𑀮𑀗𑁆𑀓𑀢𑁄;

𑀦𑀪𑀁𑀯 𑀢𑀸𑀭𑀓𑀸𑀓𑀺𑀡𑁆𑀡𑀁, 𑀉𑀢𑁆𑀢𑀫𑁄 𑀧𑀝𑀺𑀤𑀺𑀲𑁆𑀲𑀢𑀺.

𑁧𑁧𑁧𑁬. 𑀲𑀢𑁆𑀣𑀼𑀓𑀧𑁆𑀧𑀫𑀳𑀸𑀯𑀻𑀭𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀲𑀩𑁆𑀩𑀮𑁄𑀓𑀫𑀳𑀺𑀤𑁆𑀥𑀸𑀬, 𑀥𑀫𑁆𑀫𑀭𑀸𑀚𑀸 𑀲𑀬𑀁𑀯𑀲𑀻.

𑁧𑁧𑁧𑁭. 𑀦𑀺𑀤𑁆𑀥𑁄𑀢𑀫𑀮𑀘𑀦𑁆𑀤𑁄𑀯, 𑀦𑀓𑁆𑀔𑀢𑁆𑀢𑀧𑀭𑀺𑀯𑀸𑀭𑀺𑀢𑁄;

𑀔𑀢𑁆𑀢𑀲𑀗𑁆𑀖𑀧𑀭𑀺𑀩𑁆𑀬𑀼𑀴𑁆𑀳𑁄, 𑀘𑀓𑁆𑀓𑀯𑀢𑁆𑀢𑀻𑀯 𑀲𑁄𑀪𑀢𑀺.

𑁧𑁧𑁧𑁮. 𑀇𑀘𑁆𑀘𑀸𑀦𑀦𑁆𑀢𑀕𑀼𑀡𑀸𑀓𑀺𑀡𑁆𑀡𑀫𑀲𑁂𑀲𑀫𑀮𑀦𑀺𑀲𑁆𑀲𑀝𑀁;

𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀢𑀸𑀭𑀁, 𑀯𑀺𑀧𑀢𑁆𑀢𑀺𑀯𑀺𑀦𑀺𑀩𑀦𑁆𑀥𑀓𑀁.

𑁧𑁧𑁧𑁯. 𑀤𑀬𑀸𑀧𑀭𑀫𑀳𑁄𑀭𑀢𑁆𑀢𑀁, 𑀪𑀕𑀯𑀦𑁆𑀢𑀫𑀦𑀼𑀲𑁆𑀲𑀭𑀁;

𑀪𑀸𑀯𑁂𑀢𑀺 𑀧𑀜𑁆𑀜𑀯𑀸 𑀬𑁄𑀕𑀻, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀁.

𑁧𑁧𑁨𑁦. 𑀲𑁆𑀯𑀸𑀔𑀸𑀢𑁄 𑀢𑁂𑀦 𑀲𑀤𑁆𑀥𑀫𑁆𑀫𑁄, 𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑀻𑀫𑀢𑀸;

𑀧𑀘𑁆𑀘𑀢𑁆𑀢𑀧𑀝𑀺𑀯𑁂𑀥𑁂𑀦, 𑀧𑀲𑁆𑀲𑀺𑀢𑀩𑁆𑀩𑁄 𑀬𑀣𑀸𑀭𑀳𑀁.

𑁧𑁧𑁨𑁧. 𑀢𑀡𑁆𑀳𑀸𑀤𑀮𑀺𑀤𑁆𑀤𑀦𑀸𑀲𑀸𑀬, 𑀫𑀦𑁄𑀭𑀣𑀲𑀫𑀺𑀤𑁆𑀥𑀺𑀬𑀸;

𑀓𑀸𑀮𑀦𑁆𑀢𑀭𑀫𑀦𑀸𑀕𑀫𑁆𑀫, 𑀧𑀘𑁆𑀘𑀓𑁆𑀔𑀨𑀮𑀤𑀸𑀬𑀓𑁄.

𑁧𑁧𑁨𑁨. 𑀉𑀧𑀦𑀺𑀲𑁆𑀲𑀬𑀯𑀦𑁆𑀢𑀸𑀦𑀁, ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀤𑀲𑁆𑀲𑀺𑀬𑁄;

𑀧𑀘𑁆𑀘𑀢𑁆𑀢𑀫𑁂𑀯 𑀯𑀺𑀜𑁆𑀜𑀽𑀳𑀺, 𑀯𑁂𑀤𑀺𑀢𑀩𑁆𑀩𑁄 𑀲𑀪𑀸𑀯𑀢𑁄.

𑁧𑁧𑁨𑁩. 𑀲𑀩𑁆𑀩𑀸𑀲𑀯𑀲𑀫𑀼𑀕𑁆𑀖𑀸𑀢𑀻, 𑀲𑀼𑀤𑁆𑀥𑁄 𑀲𑁄𑀯𑀢𑁆𑀣𑀺𑀓𑁄 𑀲𑀺𑀯𑁄;

𑀧𑀺𑀳𑀺𑀢𑀸𑀧𑀸𑀬𑀓𑀼𑀫𑁆𑀫𑀕𑁆𑀕𑁄, 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸.

𑁧𑁧𑁨𑁪. 𑀓𑁆𑀮𑁂𑀲𑀲𑀁𑀓𑀝𑀤𑀼𑀕𑁆𑀕𑀫𑁆𑀳𑀸, 𑀤𑀼𑀓𑁆𑀔𑀓𑁆𑀔𑀦𑁆𑀥𑀫𑀳𑀩𑁆𑀪𑀬𑀸;

𑀔𑁂𑀫𑀦𑁆𑀢𑀪𑀽𑀫𑀺𑀁 𑀦𑀺𑀬𑁆𑀬𑀸𑀢𑀺, 𑀅𑀘𑁆𑀘𑀦𑁆𑀢𑀫𑀦𑀼𑀧𑀤𑁆𑀤𑀯𑀁.

𑁧𑁧𑁨𑁫. 𑀧𑀼𑀜𑁆𑀜𑀢𑀺𑀢𑁆𑀣𑀫𑀺𑀤𑀁 𑀦𑀸𑀫, 𑀫𑀗𑁆𑀕𑀮𑀜𑁆𑀘 𑀲𑀺𑀯𑀗𑁆𑀓𑀭𑀁;

𑀳𑀺𑀢𑁄𑀤𑀬𑀲𑀼𑀔𑀸𑀥𑀸𑀦-𑀫𑀫𑀢𑀸𑀳𑀸𑀭𑀫𑀼𑀢𑁆𑀢𑀫𑀁.

𑁧𑁧𑁨𑁬. 𑀅𑀯𑀺𑀚𑁆𑀚𑀸𑀧𑀝𑀮𑀼𑀤𑁆𑀥𑀸𑀭𑀯𑀺𑀚𑁆𑀚𑀸𑀦𑁂𑀢𑁆𑀢𑁄𑀲𑀥𑀁 𑀯𑀭𑀁;

𑀧𑀜𑁆𑀜𑀸𑀥𑀸𑀭𑀫𑀺𑀤𑀁 𑀲𑀢𑁆𑀣𑀁, 𑀓𑁆𑀮𑁂𑀲𑀕𑀡𑁆𑀟𑀧𑁆𑀧𑀪𑁂𑀤𑀓𑀁.

𑁧𑁧𑁨𑁭. 𑀘𑀢𑀼𑀭𑁄𑀖𑀦𑀺𑀫𑀼𑀕𑁆𑀕𑀸𑀦𑀁, 𑀲𑁂𑀢𑀼𑀩𑀦𑁆𑀥𑁄 𑀲𑀫𑀼𑀕𑁆𑀕𑀢𑁄;

𑀪𑀯𑀘𑀸𑀭𑀓𑀭𑀼𑀤𑁆𑀥𑀸𑀦𑀁, 𑀫𑀳𑀸𑀤𑁆𑀯𑀸𑀭𑁄 𑀅𑀧𑀸𑀭𑀼𑀢𑁄.

𑁧𑁧𑁨𑁮. 𑀲𑁄𑀓𑁄𑀧𑀸𑀬𑀸𑀲𑀯𑀺𑀤𑁆𑀥𑀸𑀦𑀁, 𑀧𑀭𑀺𑀤𑁂𑀯𑀲𑀫𑀗𑁆𑀕𑀺𑀦𑀁;

𑀲𑀮𑁆𑀮𑀦𑀻𑀳𑀭𑀡𑁄𑀧𑀸𑀬𑁄, 𑀅𑀘𑁆𑀘𑀦𑁆𑀢𑀲𑀼𑀔𑀫𑀻𑀭𑀺𑀢𑁄.

𑁧𑁧𑁨𑁯. 𑀩𑁆𑀬𑀲𑀦𑁄𑀧𑀤𑁆𑀤𑀯𑀸𑀧𑁂𑀢𑁄, 𑀲𑀁𑀓𑁆𑀮𑁂𑀲𑀫𑀮𑀦𑀺𑀲𑁆𑀲𑀝𑁄;

𑀉𑀚𑀼𑀲𑀫𑁆𑀫𑀢𑁆𑀢𑀦𑀺𑀬𑀢𑁄, 𑀧𑀝𑀺𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺𑀬𑀸.

𑁧𑁧𑁩𑁦. 𑀲𑀼𑀤𑁆𑀥𑀲𑀻𑀮𑀧𑀭𑀺𑀓𑁆𑀔𑀸𑀭𑁄, 𑀲𑀫𑀸𑀥𑀺𑀫𑀬𑀧𑀜𑁆𑀚𑀭𑁄;

𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀘𑀓𑁆𑀓𑀗𑁆𑀕𑁄, 𑀲𑀫𑁆𑀫𑀸𑀯𑀸𑀬𑀸𑀫𑀯𑀸𑀳𑀦𑁄.

𑁧𑁧𑁩𑁧. 𑀲𑀢𑀺𑀲𑀸𑀭𑀣𑀺𑀲𑀁𑀬𑀼𑀢𑁆𑀢𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑁄;

𑀏𑀲 𑀥𑀫𑁆𑀫𑀭𑀣𑁄 𑀬𑀸𑀢𑀺, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁧𑁧𑁩𑁨. 𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀸𑀬, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀬𑀸;

𑀲𑀩𑁆𑀩𑀔𑀦𑁆𑀥𑀯𑀺𑀫𑁄𑀓𑁆𑀔𑀸𑀬, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸.

𑁧𑁧𑁩𑁩. 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀻𑀦𑀁, 𑀤𑀬𑀸𑀧𑀦𑁆𑀦𑁄 𑀫𑀳𑀸𑀫𑀼𑀦𑀺;

𑀥𑀫𑁆𑀫𑀸𑀮𑁄𑀓𑀁 𑀧𑀓𑀸𑀲𑁂𑀲𑀺, 𑀘𑀓𑁆𑀔𑀼𑀫𑀦𑁆𑀢𑀸𑀦𑀫𑀼𑀢𑁆𑀢𑀫𑁄.

𑁧𑁧𑁩𑁪. 𑀬𑀁 𑀥𑀫𑁆𑀫𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀔𑁂𑀫𑀫𑀕𑁆𑀕𑀧𑁆𑀧𑀢𑀺𑀝𑁆𑀞𑀺𑀢𑀸;

𑀧𑀸𑀧𑀓𑀸𑀧𑀕𑀢𑀸 𑀥𑀻𑀭𑀸, 𑀧𑀲𑁆𑀲𑀤𑁆𑀥𑀺𑀤𑀭𑀣𑀸𑀲𑀬𑀸.

𑁧𑁧𑁩𑁫. 𑀪𑀯𑀬𑁄𑀕𑀸 𑀯𑀺𑀦𑀺𑀫𑀼𑀢𑁆𑀢𑀸, 𑀧𑀳𑀻𑀦𑀪𑀬𑀪𑁂𑀭𑀯𑀸;

𑀅𑀘𑁆𑀘𑀦𑁆𑀢𑀲𑀼𑀔𑀫𑁂𑀥𑁂𑀦𑁆𑀢𑀺, 𑀲𑁄𑀢𑁆𑀣𑀺𑀧𑀢𑁆𑀢𑀸 𑀫𑀳𑁂𑀲𑀬𑁄.

𑁧𑁧𑁩𑁬. 𑀢𑀫𑁂𑀯𑀫𑀼𑀢𑁆𑀢𑀫𑀁 𑀥𑀫𑁆𑀫𑀁, 𑀘𑀺𑀦𑁆𑀢𑁂𑀦𑁆𑀢𑁄 𑀧𑀦 𑀧𑀡𑁆𑀟𑀺𑀢𑁄;

𑀪𑀸𑀯𑁂𑀢𑀻𑀢𑀺 𑀧𑀓𑀸𑀲𑁂𑀦𑁆𑀢𑀺, 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀁.

𑁧𑁧𑁩𑁭. 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄.

𑁧𑁧𑁩𑁮. 𑀧𑀮𑀸𑀧𑀸𑀧𑀕𑀢𑁄 𑀲𑀼𑀤𑁆𑀥𑁄, 𑀧𑀝𑀺𑀧𑀢𑁆𑀢𑀺𑀧𑀢𑀺𑀝𑁆𑀞𑀺𑀢𑁄;

𑀧𑀭𑀺𑀕𑁆𑀕𑀳𑀺𑀢𑀲𑀤𑁆𑀥𑀫𑁆𑀫𑁄, 𑀲𑀫𑀺𑀤𑁆𑀥𑀺𑀕𑀼𑀡𑀲𑁄𑀪𑀺𑀢𑁄.

𑁧𑁧𑁩𑁯. 𑀧𑀳𑀻𑀦𑀸𑀧𑀸𑀬𑀕𑀫𑀦𑁄, 𑀧𑀸𑀧𑀓𑁆𑀮𑁂𑀲𑀯𑀺𑀦𑀺𑀲𑁆𑀲𑀝𑁄;

𑀧𑀭𑀺𑀧𑀦𑁆𑀣𑀲𑀫𑀼𑀘𑁆𑀙𑁂𑀤𑀻, 𑀪𑀯𑀘𑀸𑀭𑀓𑀪𑁂𑀤𑀓𑁄.

𑁧𑁧𑁪𑁦. 𑀉𑀢𑁆𑀢𑀫𑀤𑀫𑀣𑀧𑁆𑀧𑀢𑁆𑀢𑁄, 𑀲𑀼𑀯𑀺𑀦𑀻𑀢𑁄 𑀫𑀳𑁂𑀲𑀺𑀦𑀸;

𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑁄𑀤𑀸𑀢𑁄, 𑀆𑀚𑀸𑀦𑀻𑀬𑀧𑀣𑁂 𑀞𑀺𑀢𑁄.

𑁧𑁧𑁪𑁧. 𑀲𑀼𑀕𑀢𑁄𑀭𑀲𑀺 𑀲𑀫𑁆𑀪𑀽𑀢𑁄, 𑀲𑀼𑀘𑀺𑀥𑀫𑁆𑀫𑀲𑀺𑀭𑀺𑀦𑁆𑀥𑀭𑁄;

𑀧𑀝𑀺𑀧𑀸𑀤𑀺𑀢𑀲𑀫𑁆𑀧𑀢𑁆𑀢𑁄, 𑀥𑀫𑁆𑀫𑀲𑀸𑀲𑀦𑀲𑁂𑀯𑀺𑀢𑁄.

𑁧𑁧𑁪𑁨. 𑀪𑀬𑀪𑁂𑀭𑀯𑀦𑀺𑀲𑁆𑀲𑀗𑁆𑀕𑁄, 𑀚𑀺𑀦𑀢𑁂𑀚𑀸𑀦𑀼𑀧𑀸𑀮𑀺𑀢𑁄;

𑀫𑁄𑀦𑁂𑀬𑁆𑀬𑀧𑀣𑀲𑀜𑁆𑀘𑀸𑀭𑁄, 𑀲𑀼𑀕𑀢𑁄𑀯𑀸𑀤𑀪𑀸𑀚𑀦𑁄.

𑁧𑁧𑁪𑁩. 𑀅𑀧𑁆𑀧𑀫𑀸𑀤𑀧𑀭𑀺𑀢𑁆𑀢𑀸𑀡𑁄, 𑀲𑀻𑀮𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑁄;

𑀘𑁂𑀢𑁄𑀲𑀫𑀸𑀥𑀺𑀲𑀦𑁆𑀦𑀤𑁆𑀥𑁄, 𑀧𑀜𑁆𑀜𑀸𑀬𑀼𑀥𑀲𑀫𑀼𑀚𑁆𑀚𑀮𑁄.

𑁧𑁧𑁪𑁪. 𑀉𑀚𑀼𑀫𑀕𑁆𑀕𑀫𑀥𑀺𑀝𑁆𑀞𑀸𑀬, 𑀫𑀸𑀭𑀓𑀸𑀬𑀧𑁆𑀧𑀤𑀸𑀮𑀦𑁄;

𑀅𑀧𑀭𑀸𑀚𑀺𑀢𑀲𑀗𑁆𑀕𑀸𑀫𑁄, 𑀮𑀮𑀺𑀢𑁄𑀤𑀸𑀢𑀯𑀺𑀓𑁆𑀓𑀫𑁄.

𑁧𑁧𑁪𑁫. 𑀫𑀘𑁆𑀘𑀼𑀥𑁂𑀬𑁆𑀬𑀫𑀢𑀺𑀓𑁆𑀓𑀦𑁆𑀢𑁄, 𑀩𑁄𑀥𑀺𑀥𑀫𑁆𑀫𑀧𑁆𑀧𑀢𑀺𑀝𑁆𑀞𑀺𑀢𑁄;

𑀙𑀴𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀲𑀫𑀸𑀭𑀸𑀥𑀺𑀢𑀲𑀸𑀲𑀦𑁄.

𑁧𑁧𑁪𑁬. 𑀅𑀦𑀼𑀩𑁄𑀥𑀺𑀫𑀦𑀼𑀧𑁆𑀧𑀢𑁆𑀢𑁄, 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄;

𑀲𑀸𑀫𑀜𑁆𑀜𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁄𑀲𑁂𑀢𑀺 𑀚𑀺𑀦𑀫𑀸𑀦𑀲𑀁.

𑁧𑁧𑁪𑁭. 𑀦𑁂𑀓𑀸𑀓𑀸𑀭𑀯𑀭𑀽𑀧𑁂𑀢𑁄, 𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀨𑀼𑀮𑁆𑀮𑀺𑀢𑁄;

𑀯𑀺𑀧𑀢𑁆𑀢𑀺𑀧𑀣𑀦𑀺𑀢𑁆𑀢𑀺𑀡𑁆𑀡𑁄, 𑀅𑀪𑀺𑀩𑀼𑀤𑁆𑀥𑀺𑀧𑀭𑀸𑀬𑀡𑁄.

𑁧𑁧𑁪𑁮. 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄,

𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀼𑀤𑀼𑀮𑁆𑀮𑀪𑁄;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲,

𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀫𑀦𑀼𑀢𑁆𑀢𑀭𑀁.

𑁧𑁧𑁪𑁯. 𑀬𑀢𑁆𑀣 𑀲𑀼𑀤𑁆𑀥𑀺𑀫𑁆𑀳𑀺 𑀦𑀺𑀤𑁆𑀤𑁄𑀲𑁂, 𑀲𑀤𑁆𑀥𑀸𑀩𑀻𑀚𑀁 𑀧𑀢𑀺𑀝𑁆𑀞𑀺𑀢𑀁;

𑀅𑀘𑁆𑀘𑀦𑁆𑀢𑀁 𑀧𑀭𑀺𑀧𑀸𑀘𑁂𑀢𑀺, 𑀲𑀫𑁆𑀧𑀢𑁆𑀢𑀺𑀨𑀮𑀫𑀼𑀢𑁆𑀢𑀫𑀁.

𑁧𑁧𑁫𑁦. 𑀬𑀁 𑀨𑀮𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸, 𑀯𑀺𑀫𑀼𑀢𑁆𑀢𑀺𑀭𑀲𑀲𑁂𑀯𑀦𑀁;

𑀅𑀘𑁆𑀘𑀦𑁆𑀢𑀲𑀼𑀔𑀺𑀢𑀸 𑀥𑀻𑀭𑀸, 𑀪𑀯𑀦𑁆𑀢𑀺 𑀅𑀚𑀭𑀸𑀫𑀭𑀸.

𑁧𑁧𑁫𑁧. 𑀢𑀁 𑀨𑀮𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸;

𑀪𑀸𑀯𑁂𑀢𑀩𑁆𑀩𑀸 𑀧𑀦𑀺𑀘𑁆𑀘𑁂𑀯𑀫𑀺𑀢𑀺 𑀪𑀸𑀲𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁧𑁧𑁫𑁨. 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁, 𑀧𑀸𑀢𑀺𑀫𑁄𑀓𑁆𑀔𑀫𑀼𑀧𑁄𑀲𑀣𑀁;

𑀘𑀸𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀥𑀼𑀢𑀗𑁆𑀕𑀧𑀭𑀺𑀯𑀸𑀭𑀺𑀢𑀁.

𑁧𑁧𑁫𑁩. 𑀏𑀯𑀫𑁂𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺, 𑀲𑀫𑀸𑀤𑀸𑀬 𑀭𑀳𑁄𑀕𑀢𑁄;

𑀢𑀫𑀸𑀦𑀺𑀲𑀁𑀲𑀁 𑀕𑀼𑀡𑀢𑁄, 𑀨𑀮𑀢𑁄 𑀘 𑀯𑀺𑀘𑀺𑀦𑁆𑀢𑀬𑁂.

𑁧𑁧𑁫𑁪. 𑀆𑀤𑀺 𑀘𑁂𑀢𑀁 𑀧𑀢𑀺𑀝𑁆𑀞𑀸 𑀘, 𑀫𑀼𑀔𑀁 𑀧𑀫𑀼𑀔𑀫𑀼𑀢𑁆𑀢𑀫𑀁;

𑀫𑀽𑀮𑀁 𑀓𑀼𑀲𑀮𑀥𑀫𑁆𑀫𑀸𑀦𑀁, 𑀧𑀪𑀯𑀁 𑀧𑀝𑀺𑀧𑀢𑁆𑀢𑀺𑀬𑀸.

𑁧𑁧𑁫𑁫. 𑀲𑀸𑀲𑀦𑁄𑀢𑀭𑀡𑀤𑁆𑀯𑀸𑀭𑀁, 𑀢𑀺𑀢𑁆𑀣𑀁 𑀲𑀤𑁆𑀥𑀫𑁆𑀫𑀯𑀸𑀧𑀺𑀬𑀸;

𑀧𑀸𑀭𑀺𑀲𑀼𑀤𑁆𑀥𑀺𑀧𑀤𑀝𑁆𑀞𑀸𑀦𑀁, 𑀫𑀕𑁆𑀕𑁄 𑀔𑁂𑀫𑀦𑁆𑀢𑀧𑀸𑀧𑀓𑁄.

𑁧𑁧𑁫𑁬. 𑀲𑀸𑀥𑀼 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀩𑀸𑀳𑀼𑀲𑀘𑁆𑀘𑀯𑀺𑀪𑀽𑀲𑀦𑀁;

𑀅𑀭𑀺𑀬𑀸𑀘𑀸𑀭𑀘𑀸𑀭𑀺𑀢𑁆𑀢-𑀫𑀯𑀡𑁆𑀡𑀫𑀮𑀯𑀚𑁆𑀚𑀦𑀁.

𑁧𑁧𑁫𑁭. 𑀓𑀼𑀮𑀧𑀼𑀢𑁆𑀢𑀅𑀮𑀗𑁆𑀓𑀸𑀭𑁄, 𑀧𑀸𑀧𑀚𑀮𑁆𑀮𑀧𑀯𑀸𑀳𑀦𑀁;

𑀅𑀦𑀧𑀸𑀬𑀺 𑀲𑀼𑀕𑀦𑁆𑀥𑀜𑁆𑀘, 𑀫𑀳𑀸𑀧𑀼𑀭𑀺𑀲𑀲𑁂𑀯𑀺𑀢𑀁.

𑁧𑁧𑁫𑁮. 𑀧𑀘𑁆𑀙𑀸𑀦𑀼𑀢𑀸𑀧𑀳𑀭𑀡𑀁, 𑀧𑀻𑀢𑀺𑀧𑀸𑀫𑁄𑀚𑁆𑀚𑀯𑀟𑁆𑀠𑀦𑀁;

𑀦𑁂𑀓𑁆𑀔𑀫𑁆𑀫𑀪𑀸𑀯𑀦𑁄𑀧𑁂𑀢𑀁, 𑀧𑀩𑁆𑀩𑀚𑁆𑀚𑀸𑀯𑁂𑀲𑀲𑁄𑀪𑀦𑀁.

𑁧𑁧𑁫𑁯. 𑀲𑁄𑀧𑀸𑀦𑀁 𑀲𑀕𑁆𑀕𑀮𑁄𑀓𑀲𑁆𑀲, 𑀤𑀴𑁆𑀳𑀸𑀧𑀸𑀬𑀯𑀺𑀥𑀸𑀦𑀓𑀁;

𑀅𑀦𑀼𑀧𑀤𑁆𑀤𑀯𑀲𑀫𑁆𑀧𑀢𑁆𑀢𑀺, 𑀲𑀫𑀢𑁆𑀣𑀕𑀼𑀡𑀲𑀽𑀤𑀦𑀻.

𑁧𑁧𑁬𑁦. 𑀓𑁆𑀮𑁂𑀲𑀧𑀜𑁆𑀚𑀭𑀯𑀺𑀘𑁆𑀙𑁂𑀤𑀺, 𑀯𑀺𑀧𑀢𑁆𑀢𑀺𑀧𑀣𑀯𑀸𑀭𑀡𑀁;

𑀲𑁄𑀢𑁆𑀣𑀺𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁, 𑀅𑀲𑀸𑀥𑀸𑀭𑀡𑀫𑀗𑁆𑀕𑀮𑀁.

𑁧𑁧𑁬𑁧. ‘‘𑀲𑀼𑀮𑀤𑁆𑀥𑀸 𑀯𑀢 𑀫𑁂 𑀮𑀤𑁆𑀥𑀸, 𑀲𑀤𑁆𑀥𑀸 𑀲𑀼𑀕𑀢𑀲𑀸𑀲𑀦𑁂;

𑀲𑀻𑀮𑀁 𑀫𑁂 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀧𑀭𑀺𑀲𑀼𑀤𑁆𑀥𑀫𑀔𑀡𑁆𑀟𑀺𑀢𑀁.

𑁧𑁧𑁬𑁨. ‘‘𑀤𑀼𑀮𑁆𑀮𑀪𑁄 𑀯𑀢 𑀫𑁂 𑀮𑀤𑁆𑀥𑁄,

𑀫𑀳𑀸𑀮𑀸𑀪𑁄 𑀅𑀦𑀧𑁆𑀧𑀓𑁄;

𑀬𑁄𑀳𑀫𑀓𑁆𑀔𑀮𑀺𑀢𑀸𑀘𑀸𑀭𑁄,

𑀉𑀧𑀖𑀸𑀢𑀯𑀺𑀯𑀚𑁆𑀚𑀺𑀢𑁄.

𑁧𑁧𑁬𑁩. ‘‘𑀥𑀫𑁆𑀫𑀗𑁆𑀓𑀼𑀭𑀺𑀢𑀲𑀦𑁆𑀢𑀸𑀦𑁄, 𑀫𑀽𑀮𑀚𑀸𑀢𑁄𑀲𑁆𑀫𑀺 𑀲𑀸𑀲𑀦𑁂;

𑀉𑀚𑀼𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄, 𑀧𑀺𑀳𑀺𑀢𑀸 𑀲𑀪𑀬𑀸 𑀤𑀺𑀲𑀸.

𑁧𑁧𑁬𑁪. ‘‘𑀅𑀯𑀜𑁆𑀘𑀸 𑀯𑀢 𑀫𑁂 𑀚𑀸𑀢𑀺, 𑀆𑀭𑀤𑁆𑀥𑀸 𑀔𑀡𑀲𑀫𑁆𑀧𑀤𑀸;

𑀧𑀢𑀺𑀝𑁆𑀞𑀺𑀢𑁄𑀫𑁆𑀳𑀺 𑀲𑀤𑁆𑀥𑀫𑁆𑀫𑁂, 𑀲𑀨𑀮𑀁 𑀫𑀫 𑀚𑀻𑀯𑀺𑀢𑀁’’.

𑁧𑁧𑁬𑁫. 𑀇𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑁂𑀦, 𑀘𑀺𑀦𑁆𑀢𑁂𑀦𑁆𑀢𑁄 𑀕𑀼𑀡𑀫𑀢𑁆𑀢𑀦𑁄;

𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀪𑀸𑀯𑁂𑀢𑀺, 𑀲𑀻𑀮𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀁.

𑁧𑁧𑁬𑁬. 𑀲𑀤𑁆𑀥𑀸𑀬 𑀲𑀻𑀮𑀯𑀦𑁆𑀢𑁂𑀲𑀼, 𑀤𑀢𑁆𑀯𑀸 𑀤𑀸𑀦𑀁 𑀬𑀣𑀸𑀭𑀳𑀁;

𑀦𑀺𑀤𑁆𑀥𑁄𑀢𑀫𑀮𑀫𑀘𑁆𑀙𑁂𑀭𑁄, 𑀯𑀺𑀯𑀺𑀢𑁆𑀢𑁄 𑀢𑀫𑀦𑀼𑀲𑁆𑀲𑀭𑁂.

𑁧𑁧𑁬𑁭. 𑀤𑀸𑀦𑀁 𑀦𑀺𑀥𑀸𑀦𑀫𑀦𑀼𑀕𑀁, 𑀅𑀲𑀸𑀥𑀸𑀭𑀡𑀫𑀼𑀢𑁆𑀢𑀫𑀁;

𑀅𑀯𑀺𑀦𑀸𑀲𑀲𑀼𑀔𑀸𑀥𑀸𑀦𑀁, 𑀅𑀘𑁆𑀘𑀦𑁆𑀢𑀁 𑀲𑀩𑁆𑀩𑀓𑀸𑀫𑀤𑀁.

𑁧𑁧𑁬𑁮. 𑀓𑁄𑀧𑀤𑀸𑀳𑁄𑀧𑀲𑀫𑀦𑀁, 𑀫𑀘𑁆𑀙𑁂𑀭𑀫𑀮𑀲𑁄𑀥𑀦𑀁;

𑀧𑀫𑀸𑀤𑀦𑀺𑀤𑁆𑀤𑀸𑀯𑀼𑀝𑁆𑀞𑀸𑀦𑀁, 𑀮𑁄𑀪𑀧𑀸𑀲𑀯𑀺𑀫𑁄𑀘𑀦𑀁.

𑁧𑁧𑁬𑁯. 𑀘𑁂𑀢𑁄𑀯𑀺𑀓𑀸𑀭𑀤𑀫𑀦𑀁, 𑀫𑀺𑀘𑁆𑀙𑀸𑀫𑀕𑁆𑀕𑀦𑀺𑀯𑀸𑀭𑀡𑀁;

𑀯𑀺𑀢𑁆𑀢𑀺𑀮𑀸𑀪𑀲𑀼𑀔𑀲𑁆𑀲𑀸𑀤𑁄, 𑀯𑀺𑀪𑀯𑁄𑀤𑀬𑀫𑀗𑁆𑀕𑀮𑀁.