𑁮. 𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀲𑀺𑀡𑀸𑀲𑀼𑀪𑀯𑀺𑀪𑀸𑀕𑁄

𑁮𑁮𑁦. 𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀪𑀸𑀯𑀦𑀸𑀦𑀬𑀫𑀼𑀢𑁆𑀢𑀫𑀁;

𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀬𑁆𑀳, 𑀧𑀝𑀺𑀧𑀚𑁆𑀚𑀺𑀢𑀼𑀫𑀻𑀳𑀢𑁄.

𑁮𑁮𑁧. 𑀪𑀸𑀯𑀦𑀸 𑀤𑀼𑀯𑀺𑀥𑀸 𑀢𑀢𑁆𑀣, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸;

𑀲𑀫𑀣𑁄 𑀤𑀼𑀯𑀺𑀥𑁄 𑀢𑀢𑁆𑀣, 𑀧𑀭𑀺𑀢𑁆𑀢𑁄 𑀘 𑀫𑀳𑀕𑁆𑀕𑀢𑁄.

𑁮𑁮𑁨. 𑀉𑀧𑀘𑀸𑀭𑀫𑀦𑀼𑀧𑁆𑀧𑀢𑁆𑀢𑁄, 𑀧𑀭𑀺𑀢𑁆𑀢𑁄𑀢𑀺 𑀧𑀯𑀼𑀘𑁆𑀘𑀢𑀺;

𑀫𑀳𑀕𑁆𑀕𑀢𑀧𑁆𑀧𑀦𑀸𑀧𑀢𑁆𑀢𑁄, 𑀲𑀫𑀣𑁄 𑀮𑁄𑀓𑀺𑀬𑁄 𑀫𑀢𑁄.

𑁮𑁮𑁩. 𑀓𑀲𑀺𑀡𑀸𑀦𑀺 𑀤𑀲𑀸𑀲𑀼𑀪𑀸, 𑀤𑀲𑀥𑀸𑀦𑀼𑀲𑁆𑀲𑀢𑀻 𑀢𑀣𑀸;

𑀅𑀧𑁆𑀧𑀫𑀜𑁆𑀜𑀸 𑀘 𑀲𑀜𑁆𑀜𑀸 𑀘, 𑀯𑀯𑀢𑁆𑀣𑀸𑀭𑀼𑀧𑁆𑀧𑀓𑀸𑀦𑀺 𑀘.

𑁮𑁮𑁪. 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀢𑀢𑁆𑀣𑀸𑀳𑀼, 𑀘𑀢𑁆𑀢𑀸𑀮𑀻𑀲 𑀯𑀺𑀘𑀓𑁆𑀔𑀡𑀸;

𑀬𑀢𑁆𑀣𑀸𑀦𑀼𑀬𑁄𑀕𑀁 𑀓𑀼𑀩𑁆𑀩𑀦𑁆𑀢𑀸, 𑀪𑀸𑀯𑁂𑀦𑁆𑀢𑀺 𑀲𑀫𑀣𑀤𑁆𑀯𑀬𑀁.

𑁮𑁮𑁫. 𑀢𑀁 𑀧𑀬𑁄𑀕𑀯𑀺𑀲𑀼𑀤𑁆𑀥𑁂𑀦, 𑀧𑀢𑁆𑀯𑀸𑀦𑁄𑀧𑀸𑀬𑀲𑀫𑁆𑀧𑀤𑀁;

𑀅𑀚𑁆𑀛𑀸𑀲𑀬𑀁 𑀯𑀺𑀲𑁄𑀥𑁂𑀢𑁆𑀯𑀸, 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀪𑀸𑀲𑀺𑀢𑀁.

𑁮𑁮𑁬. 𑀓𑀣𑀁 𑀓𑀭𑁄𑀦𑁆𑀢𑁄 𑀘𑀸𑀭𑀺𑀢𑁆𑀢𑀁, 𑀯𑀸𑀭𑀺𑀢𑁆𑀢𑀜𑁆𑀘 𑀯𑀺𑀯𑀚𑁆𑀚𑀺𑀬;

𑀧𑀸𑀢𑀺𑀫𑁄𑀓𑁆𑀔𑀁 𑀲𑀫𑀸𑀤𑀸𑀬, 𑀲𑀤𑁆𑀥𑀸𑀬 𑀧𑀭𑀺𑀧𑀽𑀭𑀬𑁂.

𑁮𑁮𑁭. 𑀧𑀝𑀺𑀲𑀗𑁆𑀔𑀸𑀬 𑀲𑁄𑀥𑁂𑀢𑁆𑀯𑀸, 𑀙𑀤𑁆𑀯𑀸𑀭𑁂𑀲𑀼 𑀫𑀮𑀸𑀲𑀯𑀁;

𑀙𑀴𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑁂𑀥𑀸𑀯𑀻, 𑀲𑀢𑀸𑀭𑀓𑁆𑀔𑁂𑀦 𑀕𑁄𑀧𑀬𑁂.

𑁮𑁮𑁮. 𑀧𑀸𑀧𑀓𑀸𑀚𑀻𑀯𑀦𑀺𑀲𑁆𑀲𑀗𑁆𑀕𑁄, 𑀓𑀼𑀳𑀓𑀸𑀘𑀸𑀭𑀦𑀺𑀲𑁆𑀲𑀝𑁄;

𑀆𑀚𑀻𑀯𑀁 𑀧𑀭𑀺𑀲𑁄𑀥𑁂𑀬𑁆𑀬, 𑀧𑀳𑀺𑀢𑀢𑁆𑀢𑁂𑀝𑁆𑀞𑀺𑀲𑀼𑀤𑁆𑀥𑀺𑀬𑀸.

𑁮𑁮𑁯. 𑀇𑀤𑀫𑀢𑁆𑀣𑀺𑀢𑀫𑀸𑀭𑀩𑁆𑀪, 𑀧𑀝𑀺𑀲𑀗𑁆𑀔𑀸𑀬 𑀬𑁄𑀦𑀺𑀲𑁄;

𑀧𑀜𑁆𑀜𑀯𑀸 𑀲𑀫𑁆𑀧𑀚𑀜𑁆𑀜𑁂𑀦, 𑀧𑀭𑀺𑀪𑀼𑀜𑁆𑀚𑁂𑀬𑁆𑀬 𑀧𑀘𑁆𑀘𑀬𑁂.

𑁮𑁯𑁦. 𑀲𑀁𑀯𑀭𑀁 𑀧𑀸𑀢𑀺𑀫𑁄𑀓𑁆𑀔𑁂 𑀘, 𑀲𑀻𑀮𑀫𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀁;

𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀜𑁆𑀘, 𑀢𑀣𑀸 𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀁.

𑁮𑁯𑁧. 𑀲𑀫𑀸𑀤𑀸𑀬 𑀘𑀢𑀼𑀤𑁆𑀥𑁂𑀯-𑀫𑀥𑀺𑀝𑁆𑀞𑁂𑀬𑁆𑀬 𑀢𑀢𑁄 𑀧𑀭𑀁;

𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀸𑀬, 𑀥𑀼𑀢𑀗𑁆𑀕𑀸𑀦𑀺 𑀬𑀣𑀸𑀭𑀳𑀁.

𑁮𑁯𑁨. 𑀧𑀁𑀲𑀼𑀓𑀽𑀮𑀺𑀓𑀫𑀗𑁆𑀕𑀁 𑀢𑀺-𑀘𑀻𑀯𑀭𑀁 𑀘𑀻𑀯𑀭𑀸𑀬𑀼𑀕𑀁;

𑀧𑀺𑀡𑁆𑀟𑀧𑀸𑀢𑀺𑀓𑀫𑀗𑁆𑀕𑀜𑁆𑀘, 𑀲𑀧𑀤𑀸𑀦𑀺𑀓𑀫𑀼𑀢𑁆𑀢𑀫𑀁.

𑁮𑁯𑁩. 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁, 𑀥𑀼𑀢𑀗𑁆𑀕𑀁 𑀧𑀢𑁆𑀢𑀧𑀺𑀡𑁆𑀟𑀺𑀓𑀁;

𑀏𑀓𑀸𑀲𑀦𑀺𑀓𑀫𑀺𑀘𑁆𑀘𑁂𑀯𑀁, 𑀧𑀜𑁆𑀘𑀥𑀸 𑀪𑁄𑀚𑀦𑁂 𑀞𑀺𑀢𑀁.

𑁮𑁯𑁪. 𑀆𑀭𑀜𑁆𑀜𑀺𑀓𑀁 𑀬𑀣𑀸𑀲𑀦𑁆𑀣-

𑀢𑀺𑀓𑀗𑁆𑀕𑀁 𑀭𑀼𑀓𑁆𑀔𑀫𑀽𑀮𑀺𑀓𑀁;

𑀅𑀩𑁆𑀪𑁄𑀓𑀸𑀲𑀺𑀓𑀲𑁄𑀲𑀸𑀦𑀺-

𑀓𑀗𑁆𑀕𑀸 𑀦𑁂𑀲𑀚𑁆𑀚𑀺𑀓𑀁 𑀢𑀣𑀸.

𑁮𑁯𑁫. 𑀙 𑀲𑁂𑀦𑀸𑀲𑀦𑀫𑀸𑀭𑀩𑁆𑀪, 𑀥𑀼𑀢𑀗𑁆𑀕𑀸𑀦𑀻𑀢𑀺 𑀢𑁂𑀭𑀲;

𑀓𑀧𑁆𑀧𑀺𑀬𑁂𑀧𑀺 𑀘 𑀮𑁄𑀮𑀼𑀧𑁆𑀧-𑀲𑀫𑀸𑀘𑀸𑀭𑀯𑀺𑀫𑀼𑀢𑁆𑀢𑀺𑀬𑀸.

𑁮𑁯𑁬. 𑀲𑀸𑀫𑀻𑀘𑀺𑀧𑀝𑀺𑀧𑀢𑁆𑀢𑀻𑀢𑀺, 𑀓𑀢𑁆𑀯𑀸 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀬𑀸;

𑀧𑀘𑁆𑀘𑀬𑀢𑁆𑀢𑀬𑀫𑀸𑀳𑀘𑁆𑀘, 𑀧𑀜𑁆𑀜𑀢𑁆𑀢𑀸𑀦𑀺 𑀫𑀳𑁂𑀲𑀺𑀦𑀸.

𑁮𑁯𑁭. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁, 𑀥𑀼𑀢𑀗𑁆𑀕𑀧𑀭𑀺𑀯𑀸𑀭𑀺𑀢𑀁;

𑀧𑀽𑀭𑁂𑀢𑁆𑀯𑀸𑀦 𑀯𑀺𑀲𑀼𑀤𑁆𑀥𑁂𑀯𑀁, 𑀧𑀬𑁄𑀕𑀧𑀭𑀺𑀲𑀼𑀤𑁆𑀥𑀺𑀬𑀸.

𑁮𑁯𑁮. 𑀢𑀢𑁄 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑁄, 𑀪𑀸𑀯𑀦𑀸𑀬 𑀯𑀺𑀲𑀸𑀭𑀤𑁄;

𑀉𑀧𑀸𑀬𑀁 𑀧𑀝𑀺𑀧𑀸𑀤𑁂𑀬𑁆𑀬, 𑀧𑀯𑀺𑀯𑁂𑀓𑀭𑀢𑁄 𑀓𑀣𑀁?

𑁮𑁯𑁯. 𑀆𑀯𑀸𑀲𑁄 𑀘 𑀓𑀼𑀮𑀁 𑀮𑀸𑀪𑁄,

𑀕𑀡𑁄 𑀓𑀫𑁆𑀫𑀜𑁆𑀘 𑀧𑀜𑁆𑀘𑀫𑀁;

𑀅𑀤𑁆𑀥𑀸𑀦𑀁 𑀜𑀸𑀢𑀺 𑀆𑀩𑀸𑀥𑁄,

𑀕𑀦𑁆𑀣𑁄 𑀇𑀤𑁆𑀥𑀻𑀢𑀺 𑀢𑁂 𑀤𑀲.

𑁯𑁦𑁦. 𑀙𑁂𑀢𑁆𑀯𑀸𑀦 𑀦𑀺𑀧𑀓𑁄 𑀬𑁄𑀕𑀻,

𑀧𑀮𑀺𑀩𑁄𑀥𑁂 𑀬𑀣𑀸𑀭𑀳𑀁;

𑀦𑀺𑀭𑀸𑀮𑀬𑁄 𑀦𑀺𑀭𑀸𑀭𑀫𑁆𑀪𑁄,

𑀧𑀧𑀜𑁆𑀘𑁄𑀧𑀲𑀫𑁂 𑀭𑀢𑁄.

𑁯𑁦𑁧. 𑀧𑀺𑀬𑀁 𑀕𑀭𑀼𑀁 𑀪𑀸𑀯𑀦𑀺𑀬𑀁, 𑀯𑀢𑁆𑀢𑀸𑀭𑀁 𑀯𑀘𑀦𑀓𑁆𑀔𑀫𑀁;

𑀓𑀢𑁆𑀢𑀸𑀭𑀫𑀢𑀺𑀕𑀫𑁆𑀪𑀻𑀭𑀓𑀣𑀁 𑀞𑀸𑀦𑀦𑀺𑀬𑁄𑀚𑀓𑀁.

𑁯𑁦𑁨. 𑀩𑀳𑀼𑀲𑁆𑀲𑀼𑀢𑀁 𑀕𑀼𑀡𑀯𑀦𑁆𑀢-𑀫𑀸𑀕𑀫𑁆𑀫𑀸𑀘𑀭𑀺𑀬𑀁 𑀩𑀼𑀥𑁄;

𑀔𑀫𑁄 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻, 𑀦𑀺𑀬𑁆𑀬𑀸𑀢𑀢𑁆𑀢𑀼𑀚𑀼 𑀪𑀤𑁆𑀭𑀓𑁄.

𑁯𑁦𑁩. 𑀆𑀭𑀸𑀥𑁂𑀢𑁆𑀯𑀸𑀦 𑀕𑀡𑁆𑀳𑁂𑀬𑁆𑀬, 𑀢𑀁 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁;

𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀓𑁆𑀔𑀺𑀢𑁆𑀯𑀸, 𑀘𑀭𑀺𑀬𑀸𑀭𑀳𑀫𑀢𑁆𑀢𑀦𑁄.

𑁯𑁦𑁪. 𑀭𑀸𑀕𑁄 𑀤𑁄𑀲𑁄 𑀘 𑀫𑁄𑀳𑁄 𑀘,

𑀘𑀭𑀺𑀬𑀸 𑀢𑀻𑀳𑀺 𑀧𑀡𑁆𑀟𑀺𑀢𑀸;

𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀺𑀢𑀓𑁆𑀓𑁂𑀳𑀺,

𑀙𑀩𑁆𑀩𑀺𑀥𑀸 𑀘 𑀯𑀺𑀪𑀸𑀯𑀬𑀼𑀁.

𑁯𑁦𑁫. 𑀭𑀸𑀕𑀼𑀲𑁆𑀲𑀦𑁆𑀦𑀲𑁆𑀲 𑀲𑀧𑁆𑀧𑀸𑀬𑀸, 𑀓𑁄𑀝𑁆𑀞𑀸𑀲𑀸𑀲𑀼𑀪𑀪𑀸𑀯𑀦𑀸;

𑀤𑁄𑀲𑀼𑀲𑁆𑀲𑀦𑁆𑀦𑀲𑁆𑀲𑀧𑁆𑀧𑀫𑀜𑁆𑀜𑀸, 𑀦𑀻𑀮𑀸𑀤𑀺 𑀘 𑀘𑀢𑀼𑀩𑁆𑀩𑀺𑀥𑀸.

𑁯𑁦𑁬. 𑀯𑀺𑀢𑀓𑁆𑀓𑀁 𑀫𑁄𑀳𑀼𑀲𑁆𑀲𑀦𑁆𑀦𑀸𑀦𑀁, 𑀆𑀦𑀸𑀧𑀸𑀦𑀁 𑀧𑀓𑀸𑀲𑀺𑀢𑀁;

𑀙 𑀲𑀤𑁆𑀥𑀸𑀘𑀭𑀺𑀢𑀲𑁆𑀲𑀸𑀳𑀼, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀬𑁄.

𑁯𑁦𑁭. 𑀫𑀭𑀡𑁄𑀧𑀲𑀫𑀸𑀲𑀜𑁆𑀜𑀸𑀯𑀯𑀢𑁆𑀣𑀸𑀦𑀸𑀦𑀺 𑀩𑀼𑀤𑁆𑀥𑀺𑀦𑁄;

𑀲𑁂𑀲𑀸𑀦𑀺 𑀧𑀦 𑀲𑀩𑁆𑀩𑁂𑀲𑀁, 𑀢𑀢𑁆𑀣𑀸𑀧𑀺 𑀓𑀲𑀺𑀡𑀁 𑀩𑀼𑀥𑀸.

𑁯𑁦𑁮. 𑀯𑀺𑀢𑀓𑁆𑀓𑀧𑀓𑀢𑀺𑀓𑀲𑁆𑀲, 𑀧𑀭𑀺𑀢𑁆𑀢𑀁 𑀫𑁄𑀳𑀘𑀸𑀭𑀺𑀦𑁄;

𑀫𑀳𑀦𑁆𑀢𑀫𑀺𑀢𑀺 𑀲𑀧𑁆𑀧𑀸𑀬𑀁, 𑀕𑀳𑁂𑀢𑁆𑀯𑀸𑀦 𑀢𑀢𑁄 𑀧𑀭𑀁.

𑁯𑁦𑁯. 𑀫𑀳𑀸𑀯𑀸𑀲𑀁 𑀦𑀯𑀁 𑀚𑀺𑀡𑁆𑀡𑀁, 𑀧𑀦𑁆𑀣𑀲𑁄𑀡𑁆𑀟𑀺𑀓𑀲𑀦𑁆𑀢𑀺𑀓𑀁;

𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀓𑀺𑀡𑁆𑀡𑀁, 𑀩𑀳𑀼𑀲𑀫𑁆𑀫𑀸𑀦𑀧𑀢𑁆𑀣𑀺𑀢𑀁.

𑁯𑁧𑁦. 𑀲𑀻𑀫𑀦𑁆𑀢𑀤𑀸𑀭𑀼𑀦𑀕𑀭-𑀓𑁆𑀔𑁂𑀢𑁆𑀢𑀧𑀘𑁆𑀘𑀦𑁆𑀢𑀦𑀺𑀲𑁆𑀲𑀺𑀢𑀁;

𑀯𑀺𑀲𑀪𑀸𑀕𑀫𑀲𑀧𑁆𑀧𑀸𑀬𑀁, 𑀧𑀝𑁆𑀝𑀦𑀁 𑀫𑀺𑀢𑁆𑀢𑀤𑀼𑀮𑁆𑀮𑀪𑀁.

𑁯𑁧𑁧. 𑀞𑀸𑀦𑀸𑀦𑀺𑀝𑁆𑀞𑀸𑀭𑀲𑁂𑀢𑀸𑀦𑀺, 𑀧𑀭𑀺𑀯𑀚𑁆𑀚𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀲𑁂𑀯𑁂𑀬𑁆𑀬 𑀪𑀸𑀯𑀦𑀸𑀬𑁄𑀕𑁆𑀕𑀁, 𑀲𑁂𑀦𑀸𑀲𑀦𑀫𑀢𑀦𑁆𑀤𑀺𑀢𑁄.

𑁯𑁧𑁨. 𑀦𑀸𑀢𑀺𑀤𑀽𑀭𑀁 𑀦𑀸𑀘𑁆𑀘𑀸𑀲𑀦𑁆𑀦𑀁, 𑀅𑀧𑁆𑀧𑀲𑀤𑁆𑀤𑀫𑀦𑀸𑀓𑀼𑀮𑀁;

𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀅𑀧𑁆𑀧𑀟𑀁𑀲𑀸𑀦𑀼𑀧𑀤𑁆𑀤𑀯𑀁.

𑁯𑁧𑁩. 𑀅𑀓𑀺𑀘𑁆𑀙𑀧𑀘𑁆𑀘𑀬𑀼𑀧𑁆𑀧𑀸𑀤𑀁, 𑀮𑀚𑁆𑀚𑀻𑀪𑀺𑀓𑁆𑀔𑀼𑀕𑀡𑁄𑀘𑀺𑀢𑀁;

𑀯𑀺𑀯𑁂𑀓𑀝𑁆𑀞𑀸𑀦𑀩𑀳𑀼𑀮𑀁, 𑀩𑀳𑀼𑀲𑁆𑀲𑀼𑀢𑀦𑀺𑀲𑁂𑀯𑀺𑀢𑀁.

𑁯𑁧𑁪. 𑀅𑀧𑁆𑀧𑀪𑀬𑀁 𑀦𑀺𑀭𑀸𑀲𑀗𑁆𑀓𑀁, 𑀅𑀧𑁆𑀧𑀤𑁄𑀲𑀁 𑀫𑀳𑀸𑀕𑀼𑀡𑀁;

𑀯𑀺𑀳𑀸𑀭𑀫𑀦𑀼𑀲𑁂𑀯𑀦𑁆𑀢𑁄, 𑀢𑀢𑁆𑀣 𑀦𑀺𑀲𑁆𑀲𑀗𑁆𑀕𑀘𑁂𑀢𑀲𑀸.

𑁯𑁧𑁫. 𑀢𑀢𑁄 𑀓𑁂𑀲𑀦𑀔𑀘𑁆𑀙𑁂𑀤-𑀭𑀚𑀦𑀸𑀤𑀺𑀫𑀲𑁂𑀲𑀢𑁄;

𑀔𑀼𑀤𑁆𑀤𑀓𑀁 𑀧𑀮𑀺𑀩𑁄𑀥𑀜𑁆𑀘, 𑀙𑀺𑀦𑁆𑀤𑀺𑀢𑁆𑀯𑀸𑀦 𑀬𑀣𑀸𑀭𑀳𑀁.

𑁯𑁧𑁬. 𑀆𑀯𑀸𑀲𑀁 𑀕𑁄𑀘𑀭𑀁 𑀪𑀲𑁆𑀲𑀁, 𑀧𑀼𑀕𑁆𑀕𑀮𑀁 𑀪𑁄𑀚𑀦𑀁 𑀢𑀣𑀸;

𑀯𑀚𑁆𑀚𑁂𑀦𑁆𑀢𑁄𑀢𑀼𑀫𑀲𑀧𑁆𑀧𑀸𑀬𑀁, 𑀇𑀭𑀺𑀬𑀸𑀧𑀣𑀫𑀢𑁆𑀢𑀦𑁄.

𑁯𑁧𑁭. 𑀲𑁂𑀯𑀦𑁆𑀢𑁄 𑀲𑀢𑁆𑀢 𑀲𑀧𑁆𑀧𑀸𑀬𑁂, 𑀢𑁂 𑀏𑀯𑀸𑀢𑀺 𑀧𑀥𑀸𑀦𑀯𑀸;

𑀪𑀸𑀯𑀦𑀽𑀧𑀸𑀬𑀲𑀫𑁆𑀧𑀦𑁆𑀦𑁄, 𑀯𑀽𑀧𑀓𑀝𑁆𑀞𑁄 𑀭𑀳𑁄𑀕𑀢𑁄.

𑁯𑁧𑁮. 𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀧𑀭𑀺𑀬𑀼𑀝𑁆𑀞𑀸𑀦𑀦𑀺𑀩𑁆𑀩𑀺𑀦𑁆𑀤𑁄, 𑀲𑁄𑀥𑁂𑀬𑁆𑀬𑀚𑁆𑀛𑀸𑀲𑀬𑀁 𑀓𑀣𑀁.

𑁯𑁧𑁯. 𑀅𑀧𑁆𑀧𑀲𑁆𑀲𑀸𑀤𑀸 𑀫𑀳𑀸𑀤𑀼𑀓𑁆𑀔𑀸, 𑀓𑀸𑀫𑀸 𑀳𑀺 𑀓𑀝𑀼𑀓𑀧𑁆𑀨𑀮𑀸;

𑀤𑀼𑀲𑁆𑀲𑀁𑀳𑀸𑀭𑀸 𑀤𑀼𑀭𑀸𑀭𑀓𑁆𑀔𑀸, 𑀩𑀳𑁆𑀯𑀸𑀤𑀻𑀦𑀯𑀲𑀡𑁆𑀞𑀺𑀢𑀸.

𑁯𑁨𑁦. 𑀅𑀝𑁆𑀞𑀺𑀓𑀸 𑀔𑀚𑁆𑀚𑀫𑀸𑀦𑀸𑀯, 𑀯𑀺𑀖𑀸𑀢𑀸𑀬 𑀧𑀪𑀺𑀚𑁆𑀚𑀺𑀢𑀸;

𑀕𑀬𑁆𑀳𑀦𑁆𑀢𑀢𑁆𑀢𑀯𑀥𑀸𑀬𑁂𑀢𑁂, 𑀫𑀁𑀲𑀧𑁂𑀲𑀻𑀯 𑀧𑀓𑁆𑀔𑀺𑀪𑀺.

𑁯𑁨𑁧. 𑀧𑀝𑀺𑀯𑀸𑀢𑁂 𑀢𑀺𑀡𑀼𑀓𑁆𑀓𑀸𑀯, 𑀧𑀭𑀺𑀕𑁆𑀕𑀸𑀳𑀓𑀤𑀸𑀳𑀺𑀦𑁄;

𑀅𑀗𑁆𑀕𑀸𑀭𑀓𑀸𑀲𑀼𑀲𑀗𑁆𑀓𑀸𑀲𑀸, 𑀲𑀩𑁆𑀩𑀗𑁆𑀕𑀧𑀭𑀺𑀢𑀸𑀲𑀓𑀸.

𑁯𑁨𑁨. 𑀲𑀼𑀧𑀺𑀦𑁂 𑀧𑀭𑀺𑀪𑀼𑀢𑁆𑀢𑀸𑀯, 𑀦𑀸𑀮𑀁 𑀓𑀲𑁆𑀲𑀘𑀺 𑀢𑀺𑀢𑁆𑀢𑀺𑀬𑀸;

𑀦 𑀢𑀼 𑀓𑀲𑁆𑀲𑀘𑀺 𑀅𑀘𑁆𑀘𑀦𑁆𑀢𑀸, 𑀅𑀮𑀗𑁆𑀓𑀸𑀭𑀸𑀯 𑀬𑀸𑀘𑀺𑀢𑀸.

𑁯𑁨𑁩. 𑀙𑀚𑁆𑀚𑀦𑁆𑀢𑀸 𑀨𑀮𑀭𑀼𑀓𑁆𑀔𑀸𑀯, 𑀧𑀝𑀺𑀧𑀦𑁆𑀦𑀧𑀪𑀜𑁆𑀚𑀺𑀦𑁄;

𑀅𑀲𑀺𑀲𑀽𑀦𑀽𑀧𑀫𑀸 𑀦𑀺𑀘𑁆𑀘-𑀫𑀥𑀺𑀓𑁄𑀝𑁆𑀝𑁂𑀦𑁆𑀢𑀺 𑀧𑀸𑀡𑀺𑀦𑁄.

𑁯𑁨𑁪. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀤𑀴𑁆𑀳𑀁, 𑀢𑀡𑁆𑀳𑀸𑀲𑀮𑁆𑀮𑀸𑀦𑀼𑀯𑁂𑀥𑀺𑀦𑁄;

𑀖𑁄𑀭𑀸𑀦𑀢𑁆𑀣𑀯𑀺𑀲𑀸𑀓𑀺𑀡𑁆𑀡𑀸, 𑀓𑀡𑁆𑀳𑀲𑀧𑁆𑀧𑀲𑀺𑀭𑀽𑀧𑀫𑀸.

𑁯𑁨𑁫. 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀮𑀺𑀝𑁆𑀞𑀸, 𑀲𑀩𑁆𑀩𑀸𑀲𑀁𑀓𑁆𑀮𑁂𑀲𑀯𑀢𑁆𑀣𑀼𑀓𑀸;

𑀕𑀫𑁆𑀫𑀸 𑀘 𑀘𑀧𑀮𑀸 𑀦𑀻𑀘𑀸, 𑀧𑀼𑀣𑀼𑀚𑁆𑀚𑀦𑀫𑀫𑀸𑀬𑀺𑀢𑀸.

𑁯𑁨𑁬. 𑀩𑀳𑀼𑀲𑀸𑀥𑀸𑀭𑀡𑀸 𑀘𑁂𑀢𑁂, 𑀲𑀧𑀢𑁆𑀢𑀚𑀦𑀧𑀢𑁆𑀣𑀺𑀢𑀸;

𑀫𑀳𑁄𑀧𑀤𑁆𑀤𑀯𑀼𑀧𑀬𑀝𑁆𑀞𑀸, 𑀩𑀳𑁆𑀯𑀸𑀬𑀸𑀲𑀸 𑀪𑀬𑀸𑀯𑀳𑀸.

𑁯𑁨𑁭. 𑀫𑀳𑀸𑀭𑀫𑁆𑀪𑀲𑀫𑀸𑀭𑀤𑁆𑀥𑀸, 𑀔𑀺𑀧𑁆𑀧𑀸𑀓𑀸𑀭𑀯𑀺𑀥𑀁𑀲𑀺𑀦𑁄;

𑀲𑁄𑀓𑀲𑀮𑁆𑀮𑀁 𑀧𑀯𑁂𑀲𑁂𑀦𑁆𑀢𑀸, 𑀯𑀺𑀕𑀘𑁆𑀙𑀦𑁆𑀢𑀺 𑀲𑀼𑀯𑁂 𑀲𑀼𑀯𑁂.

𑁯𑁨𑁮. 𑀦𑀸𑀮𑀁 𑀓𑀲𑁆𑀲𑀘𑀺 𑀢𑀸𑀡𑀸𑀬, 𑀦𑀸𑀮𑀫𑀲𑁆𑀲𑀸𑀲𑀦𑀸𑀬 𑀘;

𑀅𑀯𑀺𑀲𑀸𑀲𑀦𑀺𑀬𑀸𑀯𑀲𑁆𑀲𑀁, 𑀓𑀺𑀢𑀯𑀸 𑀫𑀸𑀭𑀓𑀺𑀁𑀓𑀭𑀸.

𑁯𑁨𑁯. 𑀲𑀢𑁆𑀢𑀸𑀦𑀫𑀼𑀧𑀖𑀸𑀢𑀸𑀬, 𑀫𑀥𑀼𑀭𑀸𑀓𑀸𑀭𑀦𑀺𑀫𑁆𑀫𑀺𑀢𑀸;

𑀭𑀓𑁆𑀔𑀲𑀻 𑀯𑀺𑀬 𑀲𑀦𑁆𑀢𑀸𑀦-𑀫𑀸𑀯𑀺𑀲𑀦𑁆𑀢𑀺 𑀫𑀦𑁄𑀳𑀭𑀸.

𑁯𑁩𑁦. 𑀆𑀯𑀺𑀝𑁆𑀞𑀸 𑀬𑁂𑀳𑀺 𑀤𑀼𑀫𑁆𑀫𑁂𑀥𑀸, 𑀩𑁆𑀬𑀲𑀦𑀸𑀳𑀺𑀢𑀲𑀫𑁆𑀪𑀯𑀸;

𑀯𑀺𑀧𑀮𑁆𑀮𑀸𑀲𑀧𑀭𑀸𑀪𑀽𑀢𑀸, 𑀩𑁆𑀬𑀸𑀧𑀚𑁆𑀚𑀦𑁆𑀢𑀸 𑀯𑀺𑀳𑀜𑁆𑀜𑀭𑁂.

𑁯𑁩𑁧. 𑀘𑁂𑀢𑁄𑀲𑀗𑁆𑀓𑀧𑁆𑀧𑀭𑀘𑀺𑀢𑀸, 𑀦𑀦𑁆𑀤𑀺𑀭𑀸𑀕𑁄𑀧𑀲𑁂𑀯𑀦𑀸;

𑀫𑀥𑀼𑀮𑀺𑀢𑁆𑀢𑀸𑀲𑀺𑀥𑀸𑀭𑀸𑀯, 𑀩𑁆𑀬𑀸𑀧𑀸𑀭𑁂𑀦𑁄𑀧𑀲𑁂𑀯𑀺𑀢𑀸.

𑁯𑁩𑁨. 𑀫𑀦𑁄𑀭𑀫𑀲𑀼𑀪𑀸𑀓𑀸𑀭𑀸, 𑀧𑀺𑀬𑀭𑀽𑀧𑁄𑀧𑀮𑀫𑁆𑀪𑀺𑀦𑁄;

𑀫𑀺𑀢𑁆𑀢𑀫𑀼𑀔𑀁 𑀲𑀧𑀢𑁆𑀢𑀸𑀯, 𑀯𑀜𑁆𑀘𑀬𑀦𑁆𑀢𑀺 𑀫𑀳𑀸𑀚𑀦𑀁.

𑁯𑁩𑁩. 𑀯𑀜𑁆𑀘𑀺𑀢𑀸 𑀬𑁂𑀳𑀺 𑀤𑀼𑀫𑁆𑀫𑁂𑀥𑀸, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀥𑀁𑀲𑀺𑀢𑀸;

𑀔𑁂𑀫𑀫𑀕𑁆𑀕𑀸 𑀧𑀭𑀺𑀩𑁆𑀪𑀝𑁆𑀞𑀸, 𑀥𑀸𑀭𑁂𑀦𑁆𑀢𑀺 𑀯𑀥𑀫𑀢𑁆𑀢𑀦𑁄.

𑁯𑁩𑁪. 𑀯𑀺𑀭𑀽𑀧𑀭𑀽𑀧𑀸𑀓𑀸𑀭𑁂𑀦, 𑀦𑀺𑀫𑁆𑀫𑀣𑁂𑀦𑁆𑀢𑀸 𑀧𑀮𑁄𑀪𑀺𑀦𑁄;

𑀅𑀪𑀸𑀯𑀺𑀢𑀸𑀦𑀁 𑀩𑀸𑀮𑀸𑀦𑀁, 𑀫𑀸𑀦𑀲𑀁 𑀦𑀺𑀳𑀦𑀦𑁆𑀢𑀺𑀫𑁂.

𑁯𑁩𑁫. 𑀬𑀢𑁆𑀣 𑀭𑀸𑀕𑀲𑀮𑁆𑀮𑀯𑀺𑀤𑁆𑀥𑀸, 𑀲𑀮𑁆𑀮𑁂𑀦𑁂𑀯 𑀯𑀦𑁂 𑀫𑀺𑀕𑀸;

𑀢𑀢𑁆𑀣 𑀢𑀢𑁆𑀣𑀸𑀦𑀼𑀥𑀸𑀯𑀦𑁆𑀢𑀸, 𑀯𑀺𑀧𑁆𑀨𑀦𑁆𑀤𑀦𑁆𑀢𑀺 𑀦𑀺𑀭𑀦𑁆𑀢𑀭𑀁.

𑁯𑁩𑁬. 𑀫𑀫𑀁𑀓𑀸𑀭𑁂𑀦 𑀯𑀼𑀟𑁆𑀠𑀦𑁆𑀢𑀸, 𑀖𑁄𑀭𑀫𑀸𑀲𑀻𑀯𑀺𑀲𑀁 𑀬𑀣𑀸;

𑀯𑀺𑀲𑁆𑀲𑀝𑁆𑀞𑀸 𑀪𑁄𑀕𑀥𑀫𑁆𑀫𑁂𑀲𑀼, 𑀅𑀲𑁆𑀲𑀸𑀤𑁂𑀦𑁆𑀢𑀺 𑀅𑀯𑀺𑀤𑁆𑀤𑀲𑀼.

𑁯𑁩𑁭. 𑀅𑀦𑀬𑀩𑁆𑀬𑀲𑀦𑀸𑀬𑁂𑀢𑁂, 𑀯𑀲𑀻 𑀓𑀼𑀩𑁆𑀩𑀦𑁆𑀢𑀺 𑀧𑀸𑀡𑀺𑀦𑁄;

𑀯𑀺𑀘𑀺𑀢𑁆𑀢𑀸𑀓𑀸𑀭𑀲𑀡𑁆𑀞𑀸𑀦𑀸, 𑀧𑀺𑀲𑀸𑀘𑀦𑀕𑀭𑀁 𑀬𑀣𑀸.

𑁯𑁩𑁮. 𑀅𑀦𑀢𑁆𑀣𑀸𑀯𑀳𑀺𑀢𑀸 𑀩𑀸𑀮𑀸, 𑀯𑀸𑀕𑀼𑀭𑀁 𑀦𑀸𑀯𑀩𑀼𑀚𑁆𑀛𑀭𑁂;

𑀢𑀢𑁆𑀣𑁂𑀯 𑀧𑀝𑀺𑀯𑀫𑀦𑁆𑀢𑀺, 𑀬𑀣𑀸 𑀳𑀜𑁆𑀜𑀦𑁆𑀢𑀺 𑀫𑀼𑀘𑁆𑀙𑀺𑀢𑀸.

𑁯𑁩𑁯. 𑀲𑀻𑀖𑀯𑀸𑀳𑀻 𑀫𑀳𑁄𑀖𑁄𑀬𑀁, 𑀓𑁆𑀮𑁂𑀲𑀯𑀝𑁆𑀝𑀁 𑀫𑀳𑀩𑁆𑀪𑀬𑁄;

𑀲𑀓𑀡𑁆𑀝𑀓𑀜𑁆𑀘 𑀕𑀳𑀦𑀁, 𑀧𑀗𑁆𑀓𑁄𑀯 𑀤𑀼𑀭𑀢𑀺𑀓𑁆𑀓𑀫𑁄.

𑁯𑁪𑁦. 𑀘𑁂𑀢𑁄𑀲𑀁𑀫𑁄𑀳𑀦𑀝𑁆𑀞𑀸𑀦𑀁, 𑀧𑀫𑀸𑀤𑀧𑀝𑀺𑀲𑀦𑁆𑀥𑀺𑀢𑀁;

𑀑𑀳𑀸𑀭𑀺 𑀲𑀺𑀣𑀺𑀮𑀁 𑀘𑁂𑀢𑀁, 𑀤𑀼𑀧𑁆𑀧𑀫𑀼𑀜𑁆𑀘𑀜𑁆𑀘 𑀩𑀦𑁆𑀥𑀦𑀁.

𑁯𑁪𑁧. 𑀚𑀸𑀮𑀁𑀯 𑀯𑀺𑀢𑁆𑀣𑀢𑀁 𑀮𑁄𑀓𑁂,

𑀫𑀸𑀭𑀧𑀸𑀲𑁄 𑀲𑀫𑁄𑀟𑁆𑀟𑀺𑀢𑁄;

𑀧𑀜𑁆𑀚𑀭𑀁 𑀘𑀸𑀭𑀓𑁄 𑀘𑁂𑀲𑁄,

𑀲𑀢𑁆𑀢𑀸𑀦𑀫𑀦𑀬𑀸𑀯𑀳𑁄.

𑁯𑁪𑁨. 𑀬𑀢𑁆𑀣𑀸𑀦𑀼𑀭𑀸𑀕𑀲𑀫𑁆𑀩𑀤𑁆𑀥𑀸, 𑀧𑀮𑀺𑀕𑀼𑀡𑁆𑀞𑀺𑀢𑀲𑀸𑀬𑀺𑀦𑁄;

𑀫𑀓𑁆𑀓𑀝𑀸𑀮𑁂𑀧𑀩𑀤𑁆𑀥𑀸𑀯, 𑀦𑀺𑀢𑁆𑀣𑀼𑀦𑀦𑁆𑀢𑀺 𑀯𑀺𑀖𑀸𑀢𑀺𑀦𑁄.

𑁯𑁪𑁩. 𑀩𑀴𑀺𑀲𑀁𑀯𑀸𑀫𑀺𑀲𑀘𑁆𑀙𑀦𑁆𑀦𑀁, 𑀲𑀯𑀺𑀲𑀁 𑀯𑀺𑀬 𑀪𑁄𑀚𑀦𑀁;

𑀫𑀺𑀕𑀮𑀼𑀤𑁆𑀤𑀦𑀺𑀯𑀸𑀧𑁄𑀯, 𑀯𑀺𑀦𑀸𑀲𑀸𑀬 𑀲𑀫𑁄𑀟𑁆𑀟𑀺𑀢𑀸.

𑁯𑁪𑁪. 𑀫𑀻𑀦𑀓𑀸 𑀯𑀗𑁆𑀓𑀕𑀺𑀤𑁆𑀥𑀸𑀯, 𑀬𑁂 𑀕𑀺𑀮𑀺𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀸;

𑀖𑁄𑀭𑀁 𑀫𑀘𑁆𑀘𑀼𑀫𑀼𑀔𑀁 𑀧𑀢𑁆𑀯𑀸, 𑀲𑁄𑀘𑀦𑁆𑀢𑀸𑀧𑀸𑀬𑀪𑀸𑀕𑀺𑀦𑁄.

𑁯𑁪𑁫. 𑀧𑀸𑀧𑀓𑁆𑀔𑁂𑀢𑁆𑀢𑀫𑀺𑀤𑀁 𑀞𑀸𑀦𑀁, 𑀫𑀺𑀘𑁆𑀙𑀸𑀮𑁄𑀪𑀦𑀺𑀲𑁂𑀯𑀦𑀁;

𑀤𑀼𑀘𑁆𑀘𑀭𑀻𑀢𑀗𑁆𑀓𑀼𑀭𑀸𑀭𑁄𑀳𑀁, 𑀅𑀧𑀸𑀬𑀨𑀮𑀧𑀽𑀭𑀡𑀁.

𑁯𑁪𑁬. 𑀅𑀚𑁆𑀛𑁄𑀲𑀺𑀢𑀸 𑀧𑀦𑁂𑀢𑁆𑀣 𑀘, 𑀮𑁄𑀪𑀫𑀼𑀘𑁆𑀙𑀸𑀯𑀺𑀤𑀸𑀳𑀺𑀦𑁄;

𑀓𑁄𑀥𑀽𑀧𑀦𑀸𑀳𑀚𑀮𑀺𑀢𑀸, 𑀇𑀲𑁆𑀲𑀸𑀫𑀘𑁆𑀙𑁂𑀭𑀥𑀽𑀧𑀺𑀢𑀸.

𑁯𑁪𑁭. 𑀲𑀸𑀭𑀫𑁆𑀪𑀸𑀬𑀼𑀥𑀲𑀦𑁆𑀦𑀤𑁆𑀥𑀸, 𑀯𑀺𑀧𑁆𑀨𑀼𑀭𑀦𑁆𑀢𑀸 𑀫𑀦𑁄𑀭𑀣𑀸;

𑀆𑀩𑀦𑁆𑀥𑀺𑀘𑁆𑀙𑀸 𑀫𑀳𑀸𑀓𑀘𑁆𑀙𑀸, 𑀞𑀦𑁆𑀢𑀺 𑀮𑁄𑀓𑀯𑀺𑀧𑀢𑁆𑀢𑀺𑀬𑀸.

𑁯𑁪𑁮. 𑀅𑀯𑀚𑁆𑀚𑀁 𑀦𑀢𑁆𑀣𑀺 𑀏𑀢𑁂𑀲-𑀫𑀓𑀢𑁆𑀢𑀩𑁆𑀩𑀁 𑀦 𑀯𑀺𑀚𑁆𑀚𑀢𑀺;

𑀲𑀫𑁆𑀫𑀼𑀝𑁆𑀞𑀲𑀘𑁆𑀘𑀢𑀸 𑀢𑁂𑀲𑀼, 𑀦 𑀧𑀢𑀺𑀝𑁆𑀞𑀸𑀢𑀺 𑀲𑀸𑀥𑀼𑀢𑀸.