𑁭. 𑀲𑀢𑁆𑀢𑀫𑁄 𑀧𑀭𑀺𑀘𑁆𑀙𑁂𑀤𑁄

𑀲𑀩𑁆𑀩𑀲𑀗𑁆𑀕𑀳𑀯𑀺𑀪𑀸𑀕𑁄

𑁬𑁧𑁭. 𑀘𑀢𑀼𑀧𑀜𑁆𑀜𑀸𑀲 𑀥𑀫𑁆𑀫𑀸 𑀳𑀺, 𑀦𑀸𑀫𑀦𑀸𑀫𑁂𑀦 𑀪𑀸𑀲𑀺𑀢𑀸;

𑀅𑀝𑁆𑀞𑀸𑀭𑀲𑀯𑀺𑀥𑀸 𑀯𑀼𑀢𑁆𑀢𑀸, 𑀭𑀽𑀧𑀥𑀫𑁆𑀫𑀸𑀢𑀺 𑀲𑀩𑁆𑀩𑀣𑀸.

𑁬𑁧𑁮. 𑀅𑀪𑀺𑀜𑁆𑀜𑁂𑀬𑁆𑀬𑀸 𑀲𑀪𑀸𑀯𑁂𑀦, 𑀤𑁆𑀯𑀸𑀲𑀢𑁆𑀢𑀢𑀺 𑀲𑀫𑀻𑀭𑀺𑀢𑀸;

𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸, 𑀯𑀢𑁆𑀣𑀼𑀥𑀫𑁆𑀫𑀸 𑀲𑀮𑀓𑁆𑀔𑀡𑀸.

𑁬𑁧𑁯. 𑀢𑁂𑀲𑀁 𑀤𑀸𑀦𑀺 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁 𑀦𑀬𑀁;

𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽𑀦𑀁, 𑀳𑀢𑁆𑀣𑀲𑀸𑀭𑀫𑀦𑀼𑀢𑁆𑀢𑀭𑀁.

𑁬𑁨𑁦. 𑀤𑀼𑀓𑀸 𑀢𑀺𑀓𑀸 𑀘 𑀔𑀦𑁆𑀥𑀸𑀬𑀢𑀦𑀢𑁄 𑀥𑀸𑀢𑀼𑀲𑀘𑁆𑀘𑀢𑁄;

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸 𑀘, 𑀧𑀘𑁆𑀘𑀬𑀸 𑀘 𑀲𑀫𑀜𑁆𑀜𑀢𑁄.

𑁬𑁨𑁧. 𑀧𑀘𑁆𑀘𑀬𑁄 𑀏𑀯 𑀦𑀺𑀩𑁆𑀩𑀸𑀦𑀫𑀧𑀘𑁆𑀘𑀬𑀫𑀲𑀗𑁆𑀔𑀢𑀁;

𑀅𑀲𑀗𑁆𑀔𑀸𑀭𑀫𑀦𑀼𑀧𑁆𑀧𑀸𑀤𑀁, 𑀲𑀲𑁆𑀲𑀢𑀁 𑀦𑀺𑀘𑁆𑀘𑀮𑀓𑁆𑀔𑀡𑀁.

𑁬𑁨𑁨. 𑀧𑀘𑁆𑀘𑀬𑀸 𑀘𑁂𑀯 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀢𑀸 𑀘 𑀢𑀢𑁄𑀧𑀭𑁂;

𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀸 𑀘, 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸 𑀢𑀣𑀸.

𑁬𑁨𑁩. 𑀦𑀺𑀩𑁆𑀩𑀸𑀦𑀁 𑀭𑀽𑀧𑀥𑀫𑁆𑀫𑀸 𑀘, 𑀯𑀺𑀧𑁆𑀧𑀬𑀼𑀢𑁆𑀢𑀸𑀯 𑀓𑁂𑀯𑀮𑀁;

𑀆𑀭𑀫𑁆𑀫𑀡𑀸 𑀏𑀯 𑀦𑀸𑀫, 𑀦𑀸𑀮𑀫𑁆𑀩𑀦𑁆𑀢𑀺 𑀳𑀺 𑀓𑀺𑀜𑁆𑀘𑀺𑀧𑀺.

𑁬𑁨𑁪. 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸 𑀘, 𑀏𑀓𑀸𑀮𑀫𑁆𑀩𑀡𑀯𑀢𑁆𑀣𑀼𑀓𑀸;

𑀲𑀁𑀲𑀝𑁆𑀞𑀸 𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀲𑀳𑀚𑀸𑀢𑀸 𑀬𑀣𑀸𑀭𑀳𑀁.

𑁬𑁨𑁫. 𑀅𑀜𑁆𑀜𑀫𑀜𑁆𑀜𑁂𑀦𑀼𑀧𑀢𑁆𑀣𑀤𑁆𑀥𑀸, 𑀲𑀩𑁆𑀩𑀢𑁆𑀣 𑀲𑀳𑀯𑀼𑀢𑁆𑀢𑀺𑀦𑁄;

𑀲𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀸 𑀘, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀫𑀢𑀸.

𑁬𑁨𑁬. 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀻𑀢𑀺, 𑀢𑀢𑁆𑀣 𑀢𑁂𑀪𑀽𑀫𑀓𑀸 𑀫𑀢𑀸;

𑀮𑁄𑀓𑀺𑀬𑀸 𑀧𑀭𑀺𑀬𑀸𑀧𑀦𑁆𑀦𑀸, 𑀯𑀝𑁆𑀝𑀥𑀫𑁆𑀫𑀸 𑀲𑀉𑀢𑁆𑀢𑀭𑀸.

𑁬𑁨𑁭. 𑀲𑀓𑁆𑀓𑀸𑀬𑀥𑀫𑁆𑀫𑀸 𑀲𑀪𑀬𑀸, 𑀢𑀻𑀭𑀫𑁄𑀭𑀺𑀫𑀦𑀸𑀫𑀓𑀁;

𑀲𑀁𑀬𑁄𑀚𑀦𑀺𑀬𑀸 𑀲𑀫𑀮𑀸, 𑀢𑀣𑀸 𑀦𑀻𑀯𑀭𑀡𑀻𑀬𑀓𑀸.

𑁬𑁨𑁮. 𑀲𑀁𑀓𑁆𑀮𑁂𑀲𑀺𑀓𑀸 𑀧𑀭𑀸𑀫𑀝𑁆𑀞𑀸, 𑀉𑀧𑀸𑀤𑀸𑀦𑀻𑀬𑀲𑀸𑀲𑀯𑀸;

𑀑𑀖𑀦𑀻𑀬𑀸 𑀬𑁄𑀕𑀦𑀻𑀬𑀸, 𑀕𑀦𑁆𑀣𑀦𑀻𑀬𑀸𑀢𑀺 𑀪𑀸𑀲𑀺𑀢𑀸.

𑁬𑁨𑁯. 𑀅𑀜𑁆𑀜𑁂 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀯𑀺𑀯𑀝𑁆𑀝𑀸 𑀘𑀸𑀯𑀺𑀧𑀲𑁆𑀲𑀺𑀬𑀸;

𑀮𑁄𑀓𑀼𑀢𑁆𑀢𑀭𑀸𑀦𑀼𑀢𑁆𑀢𑀭𑀸 𑀘, 𑀦𑁄𑀲𑀁𑀬𑁄𑀚𑀦𑀺𑀬𑀸𑀤𑀬𑁄.

𑁬𑁩𑁦. 𑀓𑀫𑁆𑀫𑀚𑀸𑀢𑀸 𑀉𑀧𑀸𑀤𑀺𑀦𑁆𑀦𑀸, 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺 𑀲𑀸𑀲𑀯𑀸;

𑀅𑀦𑀼𑀧𑀸𑀤𑀺𑀦𑁆𑀦𑀓𑀸 𑀦𑀸𑀫, 𑀢𑀢𑁄 𑀲𑁂𑀲𑀸 𑀧𑀯𑀼𑀘𑁆𑀘𑀭𑁂.

𑁬𑁩𑁧. 𑀥𑀫𑁆𑀫𑀸 𑀲𑀧𑁆𑀧𑀝𑀺𑀪𑀸𑀕𑀸𑀢𑀺, 𑀓𑀼𑀲𑀮𑀸𑀓𑀼𑀲𑀮𑀸 𑀫𑀢𑀸;

𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀸𑀢𑀺, 𑀢𑀤𑀜𑁆𑀜𑁂 𑀧𑀭𑀺𑀤𑀻𑀧𑀬𑁂.

𑁬𑁩𑁨. 𑀲𑀭𑀡𑀸 𑀘 𑀧𑀳𑀸𑀢𑀩𑁆𑀩𑀸, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀧𑀦;

𑀢𑀤𑀜𑁆𑀜𑁂 𑀅𑀭𑀡𑀸 𑀦𑀸𑀫, 𑀧𑀳𑀸𑀢𑀩𑁆𑀩𑀸 𑀦 𑀓𑁂𑀳𑀺𑀘𑀺.

𑁬𑁩𑁩. 𑀭𑀽𑀧𑀺𑀦𑁄 𑀭𑀽𑀧𑀥𑀫𑁆𑀫𑀸 𑀘, 𑀦𑀸𑀫𑀥𑀫𑁆𑀫𑀸 𑀅𑀭𑀽𑀧𑀺𑀦𑁄;

𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑁂𑀦, 𑀤𑁆𑀯𑀺𑀥𑀸 𑀪𑁂𑀤𑀁 𑀯𑀺𑀪𑀸𑀯𑀬𑁂.

𑁬𑁩𑁪. 𑀩𑀸𑀮𑀸 𑀥𑀫𑁆𑀫𑀸 𑀢𑀧𑀦𑀻𑀬𑀸, 𑀓𑀡𑁆𑀳𑀸 𑀘 𑀓𑀝𑀼𑀓𑀧𑁆𑀨𑀮𑀸;

𑀅𑀲𑁂𑀯𑀺𑀢𑀩𑁆𑀩𑀸 𑀲𑀸𑀯𑀚𑁆𑀚𑀸, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀫𑀢𑀸.

𑁬𑁩𑁫. 𑀧𑀡𑁆𑀟𑀺𑀢𑀸 𑀘𑀸𑀢𑀧𑀦𑀻𑀬𑀸, 𑀲𑀼𑀓𑁆𑀓𑀸 𑀘 𑀲𑀼𑀔𑀤𑀸𑀬𑀓𑀸;

𑀲𑁂𑀯𑀺𑀢𑀩𑁆𑀩𑀸𑀦𑀯𑀚𑁆𑀚𑀸 𑀘, 𑀓𑀼𑀲𑀮𑀸 𑀏𑀓𑀯𑀻𑀲𑀢𑀺.

𑁬𑁩𑁬. 𑀓𑁆𑀭𑀺𑀬𑀸 𑀯𑀺𑀧𑀸𑀓𑀸 𑀭𑀽𑀧𑀜𑁆𑀘, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀸;

𑀯𑀼𑀢𑁆𑀢𑀸 𑀅𑀩𑁆𑀬𑀸𑀓𑀢𑀸 𑀦𑀸𑀫, 𑀥𑀫𑁆𑀫𑀸 𑀢𑀩𑁆𑀩𑀺𑀧𑀭𑀻𑀢𑀢𑁄.

𑁬𑁩𑁭. 𑀳𑀻𑀦𑀸 𑀥𑀫𑁆𑀫𑀸 𑀧𑀭𑀺𑀢𑁆𑀢𑀸 𑀘, 𑀓𑀸𑀫𑀸𑀯𑀘𑀭𑀪𑀽𑀫𑀺𑀓𑀸;

𑀭𑀽𑀧𑀸𑀭𑀽𑀧𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀫𑀚𑁆𑀛𑀺𑀫𑀸 𑀘 𑀫𑀳𑀕𑁆𑀕𑀢𑀸.

𑁬𑁩𑁮. 𑀅𑀧𑁆𑀧𑀫𑀸𑀡𑀸 𑀧𑀡𑀻𑀢𑀸 𑀘, 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀫𑀢𑀸;

𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑁆𑀮𑁂𑀲𑀺𑀓𑀸, 𑀤𑁆𑀯𑀸𑀤𑀲𑀸𑀓𑀼𑀲𑀮𑀸 𑀢𑀣𑀸.

𑁬𑁩𑁯. 𑀅𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑁆𑀮𑁂𑀲𑀺𑀓𑀸, 𑀥𑀫𑁆𑀫𑀸 𑀢𑁂𑀪𑀽𑀫𑀓𑀸𑀧𑀭𑁂;

𑀅𑀲𑀁𑀓𑁆𑀮𑀺𑀝𑁆𑀞𑀸𑀲𑀁𑀓𑁆𑀮𑁂𑀲𑀺𑀓𑀸, 𑀦𑀯 𑀮𑁄𑀓𑀼𑀢𑁆𑀢𑀭𑀸 𑀲𑀺𑀬𑀼𑀁.

𑁬𑁪𑁦. 𑀯𑀺𑀧𑀸𑀓𑀸 𑀢𑁂 𑀧𑀯𑀼𑀘𑁆𑀘𑀦𑁆𑀢𑀺, 𑀯𑀺𑀧𑀸𑀓𑀸 𑀘𑀢𑀼𑀪𑀽𑀫𑀓𑀸;

𑀯𑀺𑀧𑀸𑀓𑀥𑀫𑁆𑀫𑀸 𑀦𑀸𑀫𑀸𑀢𑀺, 𑀓𑀼𑀲𑀮𑀸𑀓𑀼𑀲𑀮𑀸 𑀫𑀢𑀸.

𑁬𑁪𑁧. 𑀓𑁆𑀭𑀺𑀬𑀸 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀦 𑀧𑀸𑀓𑀁 𑀦 𑀢𑀼 𑀧𑀘𑁆𑀘𑀢𑀺;

𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀯 𑀲𑀸𑀲𑀯𑀸.

𑁬𑁪𑁨. 𑀯𑀼𑀢𑁆𑀢𑀸𑀧𑀘𑀬𑀕𑀸𑀫𑀺𑀦𑁄, 𑀓𑀼𑀲𑀮𑀸𑀦𑀼𑀢𑁆𑀢𑀭𑀸 𑀧𑀦;

𑀓𑁆𑀭𑀺𑀬𑀸 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀧𑀸𑀓𑀸 𑀘𑁄𑀪𑀬𑀯𑀚𑁆𑀚𑀺𑀢𑀸.

𑁬𑁪𑁩. 𑀧𑀞𑀫𑀸𑀦𑀼𑀢𑁆𑀢𑀭𑁄 𑀫𑀕𑁆𑀕𑁄, 𑀤𑀲𑁆𑀲𑀦𑀁 𑀪𑀸𑀯𑀦𑀸𑀧𑀭𑁂;

𑀢𑀤𑀜𑁆𑀜𑁂 𑀤𑁆𑀯𑀬𑀦𑀺𑀫𑁆𑀫𑀼𑀢𑁆𑀢𑀸, 𑀲𑀩𑁆𑀩𑁂𑀧𑀺 𑀧𑀭𑀫𑀢𑁆𑀣𑀢𑁄.

𑁬𑁪𑁪. 𑀲𑀢𑁆𑀢 𑀮𑁄𑀓𑀼𑀢𑁆𑀢𑀭𑀸 𑀳𑁂𑀝𑁆𑀞𑀸, 𑀯𑀼𑀢𑁆𑀢𑀸 𑀲𑁂𑀓𑁆𑀔𑀸𑀢𑀺 𑀢𑀸𑀤𑀺𑀦𑀸;

𑀅𑀭𑀳𑀢𑁆𑀢𑀨𑀮𑀫𑁂𑀯, 𑀅𑀲𑁂𑀓𑁆𑀔𑀦𑁆𑀢𑀺 𑀧𑀓𑀸𑀲𑀺𑀢𑀁.

𑁬𑁪𑁫. 𑀮𑁄𑀓𑀺𑀬𑀸𑀧𑀺 𑀘 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑁄𑀪𑀬𑀯𑀚𑁆𑀚𑀺𑀢𑀸;

𑀏𑀯𑀫𑀸𑀤𑀺𑀧𑁆𑀧𑀓𑀸𑀭𑁂𑀳𑀺, 𑀢𑀺𑀯𑀺𑀥𑀸𑀢𑀺 𑀯𑀺𑀪𑀸𑀯𑀬𑁂.

𑁬𑁪𑁬. 𑀅𑀢𑀻𑀢𑀸𑀦𑀸𑀕𑀢𑀁 𑀭𑀽𑀧𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀣𑀸𑀧𑀭𑀁;

𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸, 𑀲𑀼𑀔𑀼𑀫𑁄𑀴𑀸𑀭𑀺𑀓𑀁 𑀢𑀣𑀸.

𑁬𑁪𑁭. 𑀳𑀻𑀦𑀁 𑀧𑀡𑀻𑀢𑀁 𑀬𑀁 𑀤𑀽𑀭𑁂, 𑀲𑀦𑁆𑀢𑀺𑀓𑁂 𑀯𑀸 𑀢𑀤𑁂𑀓𑀢𑁄;

𑀲𑀩𑁆𑀩𑀁 𑀭𑀽𑀧𑀁 𑀲𑀫𑁄𑀥𑀸𑀬, 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑁬𑁪𑁮. 𑀢𑀣𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀦𑀸𑀫 𑀬𑀸 𑀓𑀸𑀘𑀺 𑀯𑁂𑀤𑀦𑀸;

𑀲𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺 𑀲𑀜𑁆𑀜𑀸 𑀘, 𑀭𑀸𑀲𑀺𑀪𑀸𑀯𑁂𑀦 𑀪𑀸𑀲𑀺𑀢𑀸.

𑁬𑁪𑁯. 𑀯𑀝𑁆𑀝𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀁, 𑀢𑀤𑀲𑁆𑀲𑀸𑀤𑁄𑀧𑀲𑁂𑀯𑀦𑀁;

𑀯𑀺𑀦𑀺𑀪𑀼𑀚𑁆𑀚 𑀦𑀺𑀤𑀲𑁆𑀲𑁂𑀢𑀼𑀁, 𑀔𑀦𑁆𑀥𑀤𑁆𑀯𑀬𑀫𑀼𑀤𑀸𑀳𑀝𑀁.

𑁬𑁫𑁦. 𑀯𑀺𑀯𑀸𑀤𑀫𑀽𑀮𑀲𑀁𑀲𑀸𑀭-𑀓𑀫𑀳𑁂𑀢𑀼𑀦𑀺𑀤𑀲𑁆𑀲𑀦𑀁;

𑀲𑀦𑁆𑀥𑀸𑀬 𑀯𑁂𑀤𑀦𑀸 𑀲𑀜𑁆𑀜𑀸, 𑀓𑀢𑀸 𑀦𑀸𑀦𑀸𑀢𑀺 𑀓𑁂𑀘𑀦.

𑁬𑁫𑁧. 𑀘𑀺𑀢𑁆𑀢𑀲𑀁𑀲𑀝𑁆𑀞𑀥𑀫𑁆𑀫𑀸𑀦𑀁, 𑀘𑁂𑀢𑀦𑀸𑀫𑀼𑀔𑀢𑁄 𑀧𑀦;

𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀸𑀫𑁂𑀦, 𑀥𑀫𑁆𑀫𑀸 𑀘𑁂𑀢𑀲𑀺𑀓𑀸 𑀫𑀢𑀸.

𑁬𑁫𑁨. 𑀲𑀩𑁆𑀩𑀪𑁂𑀤𑀁 𑀢𑀣𑀸 𑀘𑀺𑀢𑁆𑀢𑀁, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥 𑀲𑀫𑁆𑀫𑀢𑀁;

𑀪𑁂𑀤𑀸𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀁, 𑀔𑀦𑁆𑀥𑀲𑀗𑁆𑀕𑀳𑀦𑀺𑀲𑁆𑀲𑀝𑀁.

𑁬𑁫𑁩. 𑀆𑀮𑀫𑁆𑀩𑀦𑀻𑀬𑀪𑀸𑀯𑁂𑀦, 𑀉𑀧𑀸𑀤𑀸𑀦𑁄𑀧𑀓𑀸𑀭𑀢𑁄;

𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺, 𑀮𑁄𑀓𑀼𑀢𑁆𑀢𑀭𑀯𑀺𑀯𑀚𑁆𑀚𑀺𑀢𑀸.

𑁬𑁫𑁪. 𑀬𑀣𑀸 𑀣𑀽𑀮𑀁 𑀳𑀺𑀢𑀢𑁆𑀣𑀸𑀬, 𑀧𑀭𑀺𑀕𑁆𑀕𑀸𑀳𑀓𑀬𑁄𑀕𑀺𑀦𑀁;

𑀥𑀫𑁆𑀫𑀸 𑀢𑁂𑀪𑀽𑀫𑀓𑀸 𑀏𑀓-𑀪𑀽𑀫𑀺𑀪𑀸𑀯𑀸𑀬 𑀤𑁂𑀲𑀺𑀢𑀸.

𑁬𑁫𑁫. 𑀪𑀸𑀚𑀦𑀁 𑀪𑁄𑀚𑀦𑀁 𑀢𑀲𑁆𑀲, 𑀩𑁆𑀬𑀜𑁆𑀚𑀦𑀁 𑀪𑁄𑀚𑀓𑁄 𑀢𑀣𑀸;

𑀪𑀼𑀜𑁆𑀚𑀺𑀢𑀸 𑀘𑀸𑀢𑀺 𑀧𑀜𑁆𑀘𑁂𑀢𑁂, 𑀉𑀧𑀫𑁂𑀦𑁆𑀢𑀺 𑀬𑀣𑀸𑀓𑁆𑀓𑀫𑀁.

𑁬𑁫𑁬. 𑀕𑀺𑀮𑀸𑀦𑀲𑀸𑀮𑀸 𑀕𑁂𑀮𑀜𑁆𑀜𑀁, 𑀅𑀲𑀧𑁆𑀧𑀸𑀬𑁄𑀧𑀲𑁂𑀯𑀦𑀸;

𑀲𑀫𑀼𑀝𑁆𑀞𑀸𑀦𑀁 𑀕𑀺𑀮𑀸𑀦𑁄𑀢𑀺, 𑀉𑀧𑀫𑁂𑀦𑁆𑀢𑀺 𑀘 𑀧𑀡𑁆𑀟𑀺𑀢𑀸.

𑁬𑁫𑁭. 𑀘𑀸𑀭𑀓𑁄 𑀓𑀸𑀭𑀡𑀁 𑀢𑀢𑁆𑀣, 𑀅𑀧𑀭𑀸𑀥𑁄 𑀘 𑀓𑀸𑀭𑀓𑁄;

𑀅𑀧𑀭𑀸𑀥𑀓𑀢𑁄 𑀘𑁄𑀭𑁄, 𑀇𑀢𑀺 𑀘𑁄𑀧𑀫𑀺𑀢𑀸 𑀧𑀼𑀦.

𑁬𑁫𑁮. 𑀦𑀺𑀘𑁆𑀘𑀸𑀥𑀺𑀧𑀻𑀴𑀦𑀝𑁆𑀞𑁂𑀦, 𑀪𑀸𑀭𑀸𑀢𑀺 𑀧𑀭𑀺𑀤𑀻𑀧𑀺𑀢𑀸;

𑀓𑁆𑀮𑁂𑀲𑀤𑀼𑀓𑁆𑀔𑀫𑀼𑀔𑁂𑀦𑁂𑀢𑁂, 𑀔𑀸𑀤𑀓𑀸 𑀘 𑀦𑀺𑀭𑀦𑁆𑀢𑀭𑀁.

𑁬𑁫𑁯. 𑀅𑀦𑀢𑁆𑀣𑀸𑀯𑀳𑀺𑀢𑀸 𑀦𑀺𑀘𑁆𑀘𑀫𑀼𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑁂𑀭𑀺𑀦𑁄;

𑀫𑀘𑁆𑀘𑀼𑀫𑀸𑀭𑀸𑀪𑀺𑀥𑁂𑀬𑁆𑀬𑀢𑁆𑀢𑀸, 𑀯𑀥𑀓𑀸𑀢𑀺 𑀘 𑀪𑀸𑀲𑀺𑀢𑀸.

𑁬𑁬𑁦. 𑀯𑀺𑀫𑀤𑁆𑀤𑀸𑀲𑀳𑀦𑀁 𑀭𑀽𑀧𑀁, 𑀨𑁂𑀡𑀧𑀺𑀡𑁆𑀟𑀁𑀯 𑀤𑀼𑀩𑁆𑀩𑀮𑀁;

𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑁆𑀢𑀸, 𑀯𑁂𑀤𑀦𑀸 𑀩𑀼𑀩𑁆𑀩𑀼𑀴𑀽𑀧𑀫𑀸.

𑁬𑁬𑁧. 𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀯𑀺𑀧𑀮𑁆𑀮𑀸𑀲𑀓𑀪𑀸𑀯𑀢𑁄;

𑀲𑀗𑁆𑀔𑀸𑀭𑀸𑀧𑀺 𑀘 𑀦𑀺𑀲𑁆𑀲𑀸𑀭𑀸, 𑀓𑀤𑀮𑀺𑀓𑁆𑀔𑀦𑁆𑀥𑀲𑀸𑀤𑀺𑀲𑀸.

𑁬𑁬𑁨. 𑀦𑀸𑀦𑀧𑁆𑀧𑀓𑀸𑀭𑀁 𑀘𑀺𑀦𑁆𑀢𑁂𑀦𑁆𑀢𑀁, 𑀦𑀸𑀦𑀸𑀓𑁆𑀮𑁂𑀲𑀯𑀺𑀫𑁄𑀳𑀺𑀢𑀁;

𑀧𑀮𑀫𑁆𑀪𑀢𑀻𑀢𑀺 𑀯𑀺𑀜𑁆𑀜𑀸𑀡𑀁, 𑀫𑀸𑀬𑀸𑀲𑀫𑀫𑀼𑀤𑀻𑀭𑀺𑀢𑀁.

𑁬𑁬𑁩. 𑀇𑀘𑁆𑀘𑁂𑀯𑀁 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀔𑀦𑁆𑀥𑀸 𑀘 𑀓𑁂𑀯𑀮𑀁;

𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀦𑀸𑀫𑁂𑀦, 𑀤𑁂𑀲𑀺𑀢𑀸𑀢𑀺 𑀯𑀺𑀪𑀸𑀯𑀬𑁂.

𑁬𑁬𑁪. 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁;

𑀤𑁆𑀯𑀸𑀭𑀸𑀮𑀫𑁆𑀩𑀡𑀪𑁂𑀤𑁂𑀦, 𑀤𑁆𑀯𑁂𑀥𑀸𑀬𑀢𑀦𑀫𑀻𑀭𑀺𑀢𑀁.

𑁬𑁬𑁫. 𑀘𑀓𑁆𑀔𑀸𑀤𑀚𑁆𑀛𑀢𑁆𑀢𑀺𑀓𑀁 𑀢𑀢𑁆𑀣, 𑀙𑀤𑁆𑀯𑀸𑀭𑀸𑀬𑀢𑀦𑀁 𑀪𑀯𑁂;

𑀩𑀸𑀳𑀺𑀭𑀸𑀬𑀢𑀦𑀁 𑀦𑀸𑀫, 𑀢𑀣𑀸 𑀭𑀽𑀧𑀸𑀤𑀺𑀕𑁄𑀘𑀭𑀁.

𑁬𑁬𑁬. 𑀇𑀢𑀺 𑀯𑀻𑀣𑀺𑀧𑁆𑀧𑀯𑀢𑁆𑀢𑀸𑀦𑀁, 𑀤𑁆𑀯𑀸𑀭𑀸𑀮𑀫𑁆𑀩𑀡𑀲𑀗𑁆𑀕𑀳𑁄;

𑀆𑀕𑀫𑁂 𑀅𑀪𑀺𑀥𑀫𑁆𑀫𑁂 𑀢𑀼, 𑀲𑀩𑁆𑀩𑀣𑀸𑀧𑀺 𑀬𑀣𑀸𑀭𑀳𑀁.

𑁬𑁬𑁭. 𑀢𑀣𑀸𑀳𑀦𑀦𑁆𑀢𑀭𑀸𑀢𑀻𑀢𑁄, 𑀚𑀸𑀬𑀫𑀸𑀦𑀲𑁆𑀲 𑀧𑀘𑁆𑀙𑀢𑁄;

𑀫𑀦𑁄 𑀲𑀩𑁆𑀩𑁄𑀧𑀺 𑀲𑀩𑁆𑀩𑀲𑁆𑀲, 𑀫𑀦𑀲𑁆𑀲𑀸𑀬𑀢𑀦𑀁 𑀪𑀯𑁂.

𑁬𑁬𑁮. 𑀢𑀣𑀸 𑀧𑀼𑀩𑁆𑀩𑀗𑁆𑀕𑀫𑀝𑁆𑀞𑁂𑀦, 𑀲𑀳𑀚𑀸𑀦𑀫𑀭𑀽𑀧𑀺𑀦𑀁;

𑀤𑁆𑀯𑀸𑀭𑀪𑀸𑀯𑁂𑀦 𑀯𑀺𑀜𑁆𑀜𑀸𑀡𑀁, 𑀲𑀩𑁆𑀩𑀫𑀸𑀬𑀢𑀦𑀁 𑀫𑀢𑀁.

𑁬𑁬𑁯. 𑀫𑀦𑀸𑀬𑀢𑀦𑀫𑀺𑀘𑁆𑀘𑁂𑀯𑀁, 𑀧𑀲𑀸𑀤𑀸𑀬𑀢𑀦𑀁 𑀢𑀣𑀸;

𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀫𑁆𑀫𑀸𑀦𑀁, 𑀇𑀢𑀺 𑀙𑀤𑁆𑀥𑀸 𑀯𑀺𑀪𑀸𑀯𑀬𑁂.

𑁬𑁭𑁦. 𑀧𑀜𑁆𑀘𑀧𑁆𑀧𑀲𑀸𑀤𑀯𑀺𑀲𑀬𑀸, 𑀧𑀜𑁆𑀘𑀸𑀬𑀢𑀦𑀲𑀫𑁆𑀫𑀢𑀸;

𑀲𑁂𑀲𑀁 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀁, 𑀲𑀩𑁆𑀩𑁂 𑀘𑁂𑀢𑀲𑀺𑀓𑀸𑀢𑀺 𑀘.

𑁬𑁭𑁧. 𑀏𑀓𑀽𑀦𑀲𑀝𑁆𑀞𑀺𑀥𑀫𑁆𑀫𑀸𑀦𑀁, 𑀥𑀫𑁆𑀫𑀸𑀬𑀢𑀦𑀲𑀗𑁆𑀕𑀳𑁄;

𑀇𑀢𑀺 𑀙𑀤𑁆𑀥𑀸 𑀧𑀓𑀸𑀲𑁂𑀦𑁆𑀢𑀺, 𑀩𑀸𑀳𑀺𑀭𑀸𑀬𑀢𑀦𑀁 𑀩𑀼𑀥𑀸.

𑁬𑁭𑁨. 𑀲𑀼𑀜𑁆𑀜𑀕𑀸𑀫𑁄𑀯 𑀤𑀝𑁆𑀞𑀩𑁆𑀩-𑀫𑀚𑁆𑀛𑀢𑁆𑀢𑀺𑀓𑀫𑀲𑀸𑀭𑀢𑁄;

𑀕𑀸𑀫𑀖𑀸𑀢𑀓𑀘𑁄𑀭𑀸𑀯, 𑀢𑀁 𑀳𑀦𑀦𑁆𑀢𑀁𑀯 𑀩𑀸𑀳𑀺𑀭𑀁.

𑁬𑁭𑁩. 𑀦𑀸𑀫𑀧𑁆𑀧𑀯𑀢𑁆𑀢𑀺𑀫𑀼𑀴𑁆𑀳𑀸𑀦𑀁, 𑀢𑀤𑀼𑀧𑁆𑀧𑀢𑁆𑀢𑀺𑀓𑀓𑀸𑀭𑀡𑀁;

𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀻𑀢𑀺, 𑀯𑀼𑀢𑁆𑀢𑀫𑀺𑀢𑁆𑀣𑀁 𑀫𑀳𑁂𑀲𑀺𑀦𑀸.

𑁬𑁭𑁪. 𑀲𑀫𑀢𑁆𑀢𑀸 𑀪𑀸𑀯𑀫𑀢𑁆𑀢𑁂𑀦, 𑀥𑀸𑀭𑁂𑀦𑁆𑀢𑀻𑀢𑀺 𑀲𑀮𑀓𑁆𑀔𑀡𑀁;

𑀤𑁆𑀯𑀸𑀭𑀸𑀮𑀫𑁆𑀩𑀢𑀤𑀼𑀧𑁆𑀧𑀦𑁆𑀦-𑀧𑀭𑀺𑀬𑀸𑀬𑁂𑀦 𑀪𑁂𑀤𑀺𑀢𑀸.

𑁬𑁭𑁫. 𑀫𑀦𑀸𑀬𑀢𑀦𑀫𑁂𑀢𑁆𑀣𑀸𑀳, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄;

𑀏𑀓𑀸𑀤𑀲 𑀬𑀣𑀸𑀯𑀼𑀢𑁆𑀢𑀸, 𑀇𑀘𑁆𑀘𑀝𑁆𑀞𑀸𑀭𑀲 𑀥𑀸𑀢𑀼𑀬𑁄.

𑁬𑁭𑁬. 𑀅𑀦𑁆𑀢𑀸𑀤𑀺𑀓𑀸 𑀫𑀦𑁄𑀥𑀸𑀢𑀼, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸;

𑀧𑀯𑁂𑀲𑀸𑀧𑀕𑀫𑁂 𑀤𑁆𑀯𑀸𑀭-𑀧𑀭𑀺𑀬𑀸𑀬𑁂𑀦 𑀢𑀺𑀝𑁆𑀞𑀢𑀺.

𑁬𑁭𑁭. 𑀪𑁂𑀭𑀻𑀢𑀮𑀤𑀡𑁆𑀟𑀖𑁄𑀲-𑀲𑀫𑀁 𑀙𑀓𑁆𑀓𑀁 𑀬𑀣𑀸𑀓𑁆𑀓𑀫𑀁;

𑀓𑀝𑁆𑀞𑀸𑀭𑀡𑀺𑀧𑀸𑀯𑀓𑀸𑀤𑀺-𑀲𑀫𑀜𑁆𑀘 𑀢𑀺𑀯𑀺𑀥𑀁 𑀪𑀯𑁂.

𑁬𑁭𑁮. 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘𑁂𑀯, 𑀦𑀺𑀭𑁄𑀥𑁄 𑀘 𑀢𑀣𑀸𑀧𑀭𑁄;

𑀫𑀕𑁆𑀕𑁄 𑀘𑀸𑀢𑀺 𑀘𑀢𑀼𑀤𑁆𑀥𑀸𑀳, 𑀲𑀘𑁆𑀘𑀁 𑀲𑀘𑁆𑀘𑀧𑀭𑀓𑁆𑀓𑀫𑁄.

𑁬𑁭𑁯. 𑀪𑀸𑀭𑁄 𑀘 𑀪𑀸𑀭𑀤𑀸𑀦𑀜𑁆𑀘, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀢𑀣𑀸;

𑀪𑀸𑀭𑀦𑀺𑀓𑁆𑀔𑁂𑀧𑀦𑀽𑀧𑀸𑀬𑁄, 𑀇𑀘𑁆𑀘𑁄𑀧𑀫𑁆𑀫𑀁 𑀬𑀣𑀸𑀓𑁆𑀓𑀫𑀁.

𑁬𑁮𑁦. 𑀭𑁄𑀕𑁄 𑀭𑁄𑀕𑀦𑀺𑀤𑀸𑀦𑀜𑁆𑀘, 𑀭𑁄𑀕𑀯𑀽𑀧𑀲𑀫𑁄 𑀢𑀣𑀸;

𑀭𑁄𑀕𑀪𑁂𑀲𑀚𑁆𑀚𑀫𑀺𑀘𑁆𑀘𑁂𑀯-𑀫𑀼𑀧𑀫𑀸𑀳𑀺 𑀘 𑀤𑀻𑀧𑀺𑀢𑀁.

𑁬𑁮𑁧. 𑀯𑀺𑀲𑀭𑀼𑀓𑁆𑀔𑁄 𑀭𑀼𑀓𑁆𑀔𑀫𑀽𑀮𑀁, 𑀭𑀼𑀓𑁆𑀔𑀘𑁆𑀙𑁂𑀤𑁄 𑀢𑀣𑀸𑀧𑀭𑁄;

𑀭𑀼𑀓𑁆𑀔𑀘𑁆𑀙𑁂𑀤𑀓𑀲𑀢𑁆𑀣𑀦𑁆𑀢𑀺, 𑀘𑀢𑀼𑀥𑁄𑀧𑀫𑀺𑀢𑀁 𑀢𑀣𑀸.

𑁬𑁮𑁨. 𑀢𑀻𑀭𑀫𑁄𑀭𑀺𑀫𑀲𑀗𑁆𑀔𑀸𑀢𑀁, 𑀫𑀳𑁄𑀖𑁄 𑀧𑀸𑀭𑀺𑀫𑀁 𑀢𑀣𑀸;

𑀢𑀤𑀢𑀺𑀓𑁆𑀓𑀫𑀼𑀧𑀸𑀬𑁄𑀢𑀺, 𑀉𑀧𑀫𑁂𑀦𑁆𑀢𑀺 𑀘 𑀢𑀁 𑀩𑀼𑀥𑀸.

𑁬𑁮𑁩. 𑀲𑀘𑁆𑀙𑀺𑀓𑀢𑁆𑀯𑀸𑀦 𑀧𑀘𑁆𑀘𑀓𑁆𑀔-𑀫𑀺𑀘𑁆𑀘𑁄𑀧𑀫𑁆𑀫𑀁 𑀬𑀣𑀸𑀓𑁆𑀓𑀫𑀁;

𑀲𑀫𑀸𑀘𑀺𑀓𑁆𑀔𑀺 𑀯𑀺𑀫𑁄𑀓𑁆𑀔𑀸𑀬, 𑀲𑀘𑁆𑀘𑀁 𑀢𑀘𑁆𑀙𑀦𑀺𑀬𑀸𑀫𑀢𑁄.

𑁬𑁮𑁪. 𑀢𑀣𑀸 𑀳𑀺 𑀤𑀼𑀓𑁆𑀔𑀁 𑀦𑀸𑀩𑀸𑀥𑀁, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀘 𑀩𑀸𑀥𑀓𑀁;

𑀩𑀸𑀥𑀓𑀢𑁆𑀢𑀦𑀺𑀬𑀸𑀫𑁂𑀦, 𑀤𑀼𑀓𑁆𑀔𑀲𑀘𑁆𑀘𑀫𑀺𑀢𑀻𑀭𑀺𑀢𑀁.

𑁬𑁮𑁫. 𑀢𑀁 𑀯𑀺𑀦𑀸 𑀦𑀸𑀜𑁆𑀜𑀢𑁄 𑀤𑀼𑀓𑁆𑀔𑀁, 𑀦 𑀳𑁄𑀢𑀺 𑀦 𑀘 𑀢𑀁 𑀢𑀢𑁄;

𑀤𑀼𑀓𑁆𑀔𑀳𑁂𑀢𑀼𑀦𑀺𑀬𑀸𑀫𑁂𑀦, 𑀲𑀘𑁆𑀘𑀫𑀸𑀳 𑀯𑀺𑀲𑀢𑁆𑀢𑀺𑀓𑀁.

𑁬𑁮𑁬. 𑀦𑀸𑀜𑁆𑀜𑀸 𑀦𑀺𑀩𑁆𑀩𑀸𑀦𑀢𑁄 𑀲𑀦𑁆𑀢𑀺, 𑀦 𑀘 𑀲𑀦𑁆𑀢𑀁 𑀦 𑀢𑀁 𑀬𑀢𑁄;

𑀲𑀦𑁆𑀢𑀪𑀸𑀯𑀦𑀺𑀬𑀸𑀫𑁂𑀦, 𑀦𑀺𑀩𑁆𑀩𑀸𑀦𑀁 𑀲𑀘𑁆𑀘𑀫𑀼𑀢𑁆𑀢𑀫𑀁.

𑁬𑁮𑁭. 𑀦𑀸𑀜𑁆𑀜𑀁 𑀫𑀕𑁆𑀕𑀸𑀘 𑀦𑀺𑀬𑁆𑀬𑀸𑀦𑀁, 𑀅𑀦𑀺𑀬𑁆𑀬𑀸𑀦𑁄 𑀦 𑀘𑀸𑀧𑀺 𑀲𑁄;

𑀢𑀲𑁆𑀫𑀸 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀫𑀕𑁆𑀕𑁄 𑀲𑀘𑁆𑀘𑀦𑁆𑀢𑀺 𑀲𑀫𑁆𑀫𑀢𑁄.

𑁬𑁮𑁮. 𑀇𑀢𑀺 𑀢𑀘𑁆𑀙𑀸𑀯𑀺𑀧𑀮𑁆𑀮𑀸𑀲-𑀪𑀽𑀢𑀪𑀸𑀯𑁄 𑀘𑀢𑀽𑀲𑀼𑀧𑀺;

𑀲𑀘𑁆𑀘𑀝𑁆𑀞𑁄𑀢𑀺 𑀯𑀺𑀦𑀺𑀤𑁆𑀤𑀺𑀝𑁆𑀞𑁄, 𑀤𑀼𑀓𑁆𑀔𑀸𑀤𑀻𑀲𑁆𑀯𑀯𑀺𑀲𑁂𑀲𑀢𑁄.

𑁬𑁮𑁯. 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄 𑀘 𑀪𑀸𑀲𑀺𑀢𑁄;

𑀯𑀺𑀧𑀭𑀻𑀡𑀸𑀫𑀝𑁆𑀞𑁄 𑀘𑀸𑀢𑀺, 𑀤𑀼𑀓𑁆𑀔𑀲𑁆𑀲𑁂𑀯𑀁 𑀘𑀢𑀼𑀩𑁆𑀩𑀺𑀥𑀸.

𑁬𑁯𑁦. 𑀆𑀬𑀽𑀳𑀦𑀸 𑀦𑀺𑀤𑀸𑀦𑀸 𑀘, 𑀲𑀁𑀬𑁄𑀕𑀸 𑀧𑀮𑀺𑀩𑁄𑀥𑀢𑁄;

𑀤𑀼𑀓𑁆𑀔𑀲𑁆𑀲𑀫𑀼𑀤𑀬𑀲𑁆𑀲𑀸𑀧𑀺, 𑀘𑀢𑀼𑀥𑀢𑁆𑀣𑀸 𑀧𑀓𑀸𑀲𑀺𑀢𑀸.