𑁬. 𑀙𑀝𑁆𑀞𑁄 𑀧𑀭𑀺𑀘𑁆𑀙𑁂𑀤𑁄

𑀭𑀽𑀧𑀯𑀺𑀪𑀸𑀕𑁄

𑁪𑁮𑁧. 𑀇𑀢𑀺 𑀧𑀜𑁆𑀘𑀧𑀭𑀺𑀘𑁆𑀙𑁂𑀤-𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀣𑀲𑀗𑁆𑀕𑀳𑀁;

𑀦𑀸𑀫𑀥𑀫𑁆𑀫𑀫𑀲𑁂𑀲𑁂𑀦, 𑀯𑀺𑀪𑀸𑀯𑁂𑀢𑁆𑀯𑀸 𑀲𑀪𑀸𑀯𑀢𑁄.

𑁪𑁮𑁨. 𑀲𑀧𑁆𑀧𑀪𑁂𑀤𑀁 𑀧𑀯𑀓𑁆𑀔𑀸𑀫𑀺, 𑀭𑀽𑀧𑀥𑀫𑁆𑀫𑀫𑀺𑀢𑁄 𑀧𑀭𑀁;

𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑁂𑀦, 𑀤𑀼𑀯𑀺𑀥𑀫𑁆𑀧𑀺 𑀧𑀓𑀸𑀲𑀺𑀢𑀁.

𑁪𑁮𑁩. 𑀉𑀤𑁆𑀤𑁂𑀲𑀮𑀓𑁆𑀔𑀡𑀸𑀤𑀻𑀳𑀺, 𑀯𑀺𑀪𑀸𑀕𑀚𑀦𑀓𑀸 𑀢𑀣𑀸;

𑀓𑀮𑀸𑀧𑀼𑀧𑁆𑀧𑀢𑁆𑀢𑀺𑀢𑁄 𑀘𑀸𑀧𑀺, 𑀬𑀣𑀸𑀦𑀼𑀓𑁆𑀓𑀫𑀢𑁄 𑀓𑀣𑀁?

𑁪𑁮𑁪. 𑀭𑀼𑀧𑁆𑀧𑀢𑀻𑀢𑀺 𑀪𑀯𑁂 𑀭𑀽𑀧𑀯𑀺𑀓𑀸𑀭𑀧𑁆𑀧𑀘𑁆𑀘𑀬𑁂𑀲𑀢𑀺;

𑀭𑀽𑀧𑀭𑀽𑀧𑀁 𑀢𑀣𑀸 𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑀢𑁄𑀧𑀭𑀁.

𑁪𑁮𑁫. 𑀪𑀽𑀢𑀭𑀽𑀧𑀁 𑀢𑀼 𑀧𑀣𑀯𑀻, 𑀆𑀧𑁄 𑀢𑁂𑀚𑁄 𑀢𑀣𑀸𑀧𑀭𑁄;

𑀯𑀸𑀬𑁄 𑀘 𑀪𑀯𑀢𑀽𑀧𑀸𑀤𑀸𑀭𑀽𑀧𑀫𑁂𑀢𑁆𑀣𑀸𑀢𑀺 𑀪𑀸𑀲𑀺𑀢𑀁.

𑁪𑁮𑁬. 𑀪𑀽𑀢𑀭𑀽𑀧𑀫𑀼𑀧𑀸𑀤𑀸𑀬, 𑀧𑀯𑀢𑁆𑀢𑀢𑀺 𑀦 𑀘𑀜𑁆𑀜𑀣𑀸;

𑀇𑀘𑁆𑀘𑀼𑀧𑀸𑀤𑀸𑀬𑀭𑀽𑀧𑀦𑁆𑀢𑀺, 𑀭𑀽𑀧𑀁 𑀲𑁂𑀲𑀫𑀼𑀤𑀻𑀭𑀺𑀢𑀁.

𑁪𑁮𑁭. 𑀘𑀓𑁆𑀔𑀼 𑀲𑁄𑀢𑀜𑁆𑀘 𑀖𑀸𑀦𑀜𑁆𑀘, 𑀚𑀺𑀯𑁆𑀳𑀸 𑀓𑀸𑀬𑁄𑀢𑀺 𑀧𑀜𑁆𑀘𑀥𑀸;

𑀧𑀲𑀸𑀤𑀭𑀽𑀧𑀫𑀓𑁆𑀔𑀸𑀢𑀁, 𑀦𑁄𑀧𑀲𑀸𑀤𑀁 𑀧𑀦𑁂𑀢𑀭𑀁.

𑁪𑁮𑁮. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸, 𑀨𑁄𑀝𑁆𑀞𑀩𑁆𑀩𑀫𑀺𑀢𑀺 𑀧𑀜𑁆𑀘𑀥𑀸;

𑀭𑀽𑀧𑀁 𑀧𑀲𑀸𑀤𑀯𑀺𑀲𑀬𑀁, 𑀧𑀲𑀸𑀤𑁄 𑀕𑁄𑀘𑀭𑀁𑀧𑀭𑀁.

𑁪𑁮𑁯. 𑀇𑀢𑁆𑀣𑀢𑁆𑀢𑀁 𑀧𑀼𑀭𑀺𑀲𑀢𑁆𑀢𑀜𑁆𑀘, 𑀪𑀸𑀯𑀭𑀽𑀧𑀫𑀼𑀤𑀻𑀭𑀺𑀢𑀁;

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀽𑀧𑀦𑁆𑀢𑀺, 𑀉𑀧𑀸𑀤𑀺𑀦𑁆𑀦𑀧𑀯𑀢𑁆𑀢𑀺𑀓𑀁.

𑁪𑁯𑁦. 𑀯𑀢𑁆𑀣𑀼𑀭𑀽𑀧𑀁 𑀢𑀼 𑀳𑀤𑀬𑀁, 𑀬𑀁 𑀥𑀸𑀢𑀼𑀤𑁆𑀯𑀬𑀦𑀺𑀲𑁆𑀲𑀬𑀁;

𑀓𑀩𑀴𑀻𑀓𑀸𑀭𑀫𑀸𑀳𑀸𑀭𑀭𑀽𑀧𑀫𑀺𑀘𑁆𑀘𑀸𑀳𑀼 𑀧𑀡𑁆𑀟𑀺𑀢𑀸.

𑁪𑁯𑁧. 𑀭𑀽𑀧𑀥𑀫𑁆𑀫𑀲𑀪𑀸𑀯𑀢𑁆𑀢𑀸, 𑀭𑀽𑀧𑀦𑁆𑀢𑀺 𑀧𑀭𑀺𑀤𑀻𑀧𑀺𑀢𑀁;

𑀇𑀘𑁆𑀘𑁂𑀯𑀫𑀝𑁆𑀞𑀸𑀭𑀲𑀥𑀸, 𑀭𑀽𑀧𑀭𑀽𑀧𑀫𑀼𑀤𑀻𑀭𑀺𑀢𑀁.

𑁪𑁯𑁨. 𑀅𑀦𑀺𑀧𑁆𑀨𑀦𑁆𑀦𑀲𑀪𑀸𑀯𑀢𑁆𑀢𑀸, 𑀭𑀽𑀧𑀸𑀓𑀸𑀭𑁄𑀧𑀮𑀓𑁆𑀔𑀺𑀢𑀁;

𑀅𑀦𑀺𑀧𑁆𑀨𑀦𑁆𑀦𑀁 𑀦𑀸𑀫 𑀭𑀽𑀧𑀁, 𑀤𑀲𑀥𑀸 𑀧𑀭𑀺𑀤𑀻𑀧𑀺𑀢𑀁.

𑁪𑁯𑁩. 𑀭𑀽𑀧𑀧𑁆𑀧𑀭𑀺𑀘𑁆𑀙𑁂𑀤𑀁 𑀭𑀽𑀧𑀫𑀺𑀘𑁆𑀘𑀸𑀓𑀸𑀲𑁄 𑀧𑀓𑀸𑀲𑀺𑀢𑁄;

𑀓𑀸𑀬𑀩𑁆𑀩𑀘𑀻𑀯𑀺𑀜𑁆𑀜𑀢𑁆𑀢𑀺𑀓𑀁, 𑀤𑁆𑀯𑀬𑀁 𑀯𑀺𑀜𑁆𑀜𑀢𑁆𑀢𑀺𑀭𑀽𑀧𑀓𑀁.

𑁪𑁯𑁪. 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫-𑀜𑁆𑀜𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀳;

𑀯𑀺𑀓𑀸𑀭𑀭𑀽𑀧𑀫𑀺𑀘𑁆𑀘𑀸𑀳𑀼, 𑀧𑀜𑁆𑀘𑀥𑀸 𑀘 𑀯𑀺𑀪𑀸𑀯𑀺𑀦𑁄.

𑁪𑁯𑁫. 𑀉𑀧𑀘𑀬𑁄 𑀲𑀦𑁆𑀢𑀢𑀺 𑀘, 𑀚𑀭𑀢𑀸𑀦𑀺𑀘𑁆𑀘𑀢𑀸𑀢𑀺 𑀘;

𑀘𑀢𑀼𑀥𑀸 𑀮𑀓𑁆𑀔𑀡𑀭𑀽𑀧𑀁, 𑀭𑀽𑀧𑀓𑀡𑁆𑀟𑁂 𑀯𑀺𑀪𑀸𑀯𑀺𑀢𑀁.

𑁪𑁯𑁬. 𑀇𑀘𑁆𑀘𑁂𑀯𑀫𑀝𑁆𑀞𑀯𑀻𑀲𑀢𑀺𑀯𑀺𑀥𑀸𑀦𑀺𑀧𑀺 𑀯𑀺𑀘𑀓𑁆𑀔𑀡𑁄;

𑀭𑀽𑀧𑀸𑀦𑀺 𑀮𑀓𑁆𑀔𑀡𑀸𑀤𑀻𑀳𑀺, 𑀯𑀺𑀪𑀸𑀯𑁂𑀬𑁆𑀬 𑀬𑀣𑀸𑀓𑁆𑀓𑀫𑀁.

𑁪𑁯𑁭. 𑀔𑀭𑀢𑀸 𑀧𑀣𑀯𑀻𑀥𑀸𑀢𑀼, 𑀲𑀸𑀬𑀁 𑀓𑀓𑁆𑀔𑀴𑀮𑀓𑁆𑀔𑀡𑀸;

𑀓𑀮𑀸𑀧𑀸𑀥𑀺𑀝𑁆𑀞𑀸𑀦𑀭𑀲𑀸, 𑀧𑀝𑀺𑀕𑁆𑀕𑀸𑀳𑁄𑀢𑀺 𑀕𑀬𑁆𑀳𑀢𑀺.

𑁪𑁯𑁮. 𑀆𑀩𑀦𑁆𑀥𑀦𑀫𑀸𑀧𑁄𑀥𑀸𑀢𑀼, 𑀲𑀸 𑀧𑀕𑁆𑀖𑀭𑀡𑀮𑀓𑁆𑀔𑀡𑀸;

𑀓𑀮𑀸𑀧𑀸𑀩𑀦𑁆𑀥𑀦𑀭𑀲𑀸, 𑀲𑀗𑁆𑀕𑀳𑀢𑁆𑀢𑁂𑀦 𑀕𑀬𑁆𑀳𑀢𑀺.

𑁪𑁯𑁯. 𑀢𑁂𑀚𑀦𑀢𑁆𑀢𑀁 𑀢𑁂𑀚𑁄𑀥𑀸𑀢𑀼, 𑀲𑀸𑀬𑀫𑀼𑀡𑁆𑀳𑀢𑁆𑀢𑀮𑀓𑁆𑀔𑀡𑀸;

𑀧𑀸𑀘𑀦𑀭𑀲𑀸 𑀫𑀤𑁆𑀤𑀯𑀸-𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀕𑀬𑁆𑀳𑀢𑀺.

𑁫𑁦𑁦. 𑀯𑀸𑀬𑁄𑀥𑀸𑀢𑀼 𑀯𑀸𑀬𑀦𑀢𑁆𑀢𑀁, 𑀲𑀸 𑀯𑀺𑀢𑁆𑀣𑀫𑁆𑀪𑀦𑀮𑀓𑁆𑀔𑀡𑀸;

𑀲𑀫𑀻𑀭𑀡𑀭𑀲𑀸𑀪𑀺𑀦𑀺-𑀳𑀸𑀭𑀪𑀸𑀯𑁂𑀦 𑀕𑀬𑁆𑀳𑀢𑀺.

𑁫𑁦𑁧. 𑀲𑀩𑁆𑀩𑀢𑁆𑀣𑀸𑀯𑀺𑀦𑀺𑀪𑀼𑀢𑁆𑀢𑀸𑀧𑀺, 𑀅𑀲𑀫𑁆𑀫𑀺𑀲𑁆𑀲𑀺𑀢𑀮𑀓𑁆𑀔𑀡𑀸;

𑀢𑀁𑀢𑀁𑀪𑀸𑀯𑀲𑀫𑀼𑀲𑁆𑀲𑀦𑁆𑀦𑀲𑀫𑁆𑀪𑀸𑀭𑁂𑀲𑀼𑀧𑀮𑀓𑁆𑀔𑀺𑀢𑀸.

𑁫𑁦𑁨. 𑀅𑀜𑁆𑀜𑀫𑀜𑁆𑀜𑁂𑀦𑀼𑀧𑀢𑁆𑀣𑀤𑁆𑀥𑀸, 𑀲𑁂𑀲𑀭𑀽𑀧𑀲𑁆𑀲 𑀦𑀺𑀲𑁆𑀲𑀬𑀸;

𑀘𑀢𑀼𑀤𑁆𑀥𑁂𑀯𑀁 𑀓𑀮𑀸𑀧𑁂𑀲𑀼, 𑀫𑀳𑀸𑀪𑀽𑀢𑀸 𑀧𑀯𑀢𑁆𑀢𑀭𑁂.

𑁫𑁦𑁩. 𑀘𑀓𑁆𑀔𑀼 𑀲𑀫𑁆𑀪𑀸𑀭𑀘𑀓𑁆𑀔𑀼𑀫𑁆𑀳𑀺, 𑀲𑀢𑁆𑀢𑀓𑁆𑀔𑀺𑀧𑀝𑀮𑁄𑀘𑀺𑀢𑁂;

𑀓𑀡𑁆𑀳𑀫𑀡𑁆𑀟𑀮𑀫𑀚𑁆𑀛𑀫𑁆𑀳𑀺, 𑀧𑀲𑀸𑀤𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁫𑁦𑁪. 𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀅𑀦𑀼𑀧𑀲𑁆𑀲𑀢𑀺;

𑀧𑀭𑀺𑀢𑁆𑀢𑀁 𑀲𑀼𑀔𑀼𑀫𑀁 𑀘𑁂𑀢𑀁, 𑀊𑀓𑀸𑀲𑀺𑀭𑀲𑀫𑀽𑀧𑀫𑀁.

𑁫𑁦𑁫. 𑀲𑁄𑀢𑀁 𑀲𑁄𑀢𑀩𑀺𑀮𑀲𑁆𑀲𑀦𑁆𑀢𑁄,

𑀢𑀫𑁆𑀩𑀮𑁄𑀫𑀸𑀘𑀺𑀢𑁂 𑀢𑀣𑀸;

𑀅𑀗𑁆𑀕𑀼𑀮𑀺𑀯𑁂𑀥𑀦𑀸𑀓𑀸𑀭𑁂,

𑀧𑀲𑀸𑀤𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁫𑁦𑁬. 𑀅𑀦𑁆𑀢𑁄 𑀅𑀚𑀧𑀤𑀝𑁆𑀞𑀸𑀦𑁂, 𑀖𑀸𑀦𑀁 𑀖𑀸𑀦𑀩𑀺𑀮𑁂 𑀞𑀺𑀢𑀁;

𑀚𑀺𑀯𑁆𑀳𑀸 𑀚𑀺𑀯𑁆𑀳𑀸𑀬 𑀫𑀚𑁆𑀛𑀫𑁆𑀳𑀺, 𑀉𑀧𑁆𑀧𑀮𑀸𑀓𑀸𑀭𑀲𑀦𑁆𑀦𑀺𑀪𑁂.

𑁫𑁦𑁭. 𑀇𑀘𑁆𑀘𑁂𑀯𑀁 𑀧𑀦 𑀘𑀢𑁆𑀢𑀸𑀭𑁄, 𑀢𑀁𑀢𑀁𑀤𑁂𑀲𑀯𑀯𑀢𑁆𑀣𑀺𑀢𑀸;

𑀓𑀸𑀬𑀧𑁆𑀧𑀲𑀸𑀤𑁄 𑀓𑀸𑀬𑀫𑁆𑀳𑀺, 𑀉𑀧𑀸𑀤𑀺𑀦𑁆𑀦𑁂𑀢𑀺 𑀧𑀜𑁆𑀘𑀥𑀸.

𑁫𑁦𑁮. 𑀓𑀧𑁆𑀧𑀸𑀲𑀧𑀝𑀮𑀲𑁆𑀦𑁂𑀳-𑀲𑀦𑁆𑀦𑀺𑀪𑀸 𑀪𑀽𑀢𑀦𑀺𑀲𑁆𑀲𑀺𑀢𑀸;

𑀧𑀲𑀸𑀤𑀸 𑀚𑀻𑀯𑀺𑀢𑀸𑀭𑀓𑁆𑀔𑀸, 𑀭𑀽𑀧𑀸𑀤𑀺𑀧𑀭𑀺𑀯𑀸𑀭𑀺𑀢𑀸.

𑁫𑁦𑁯. 𑀥𑀻𑀢𑀸 𑀭𑀸𑀚𑀓𑀼𑀫𑀸𑀭𑀸𑀯, 𑀓𑀮𑀸𑀧𑀦𑁆𑀢𑀭𑀯𑀼𑀢𑁆𑀢𑀺𑀦𑁄;

𑀤𑁆𑀯𑀸𑀭𑀪𑀽𑀢𑀸𑀯 𑀧𑀘𑁆𑀘𑁂𑀓𑀁, 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸.

𑁫𑁧𑁦. 𑀭𑀽𑀧𑀸𑀤𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀸𑀦𑀁 𑀯𑀸 𑀬𑀣𑀸𑀓𑁆𑀓𑀫𑀁;

𑀤𑀝𑁆𑀞𑀼𑀓𑀸𑀫𑀦𑀺𑀤𑀸𑀦𑀸𑀤𑀺𑀓𑀫𑁆𑀫𑀪𑀽𑀢𑀸𑀦𑀫𑁂𑀯 𑀯𑀸.

𑁫𑁧𑁧. 𑀧𑀲𑀸𑀤𑀮𑀓𑁆𑀔𑀡𑀸 𑀭𑀽𑀧𑀸-𑀤𑀸𑀯𑀺𑀜𑁆𑀚𑀦𑀭𑀲𑀸 𑀢𑀣𑀸;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀤𑁆𑀯𑀸𑀭𑀪𑀸𑀯𑁂𑀦 𑀕𑀬𑁆𑀳𑀭𑁂.

𑁫𑁧𑁨. 𑀭𑀽𑀧𑀁 𑀦𑀺𑀪𑀸𑀲𑁄 𑀪𑀽𑀢𑀸𑀦𑀁, 𑀲𑀤𑁆𑀤𑁄 𑀦𑀺𑀕𑁆𑀖𑁄𑀲𑀦𑀁 𑀢𑀣𑀸;

𑀕𑀦𑁆𑀥𑁄𑀯 𑀕𑀦𑁆𑀥𑀦𑀁 𑀢𑀢𑁆𑀣, 𑀭𑀲𑁄 𑀘 𑀭𑀲𑀦𑀻𑀬𑀢𑀸.

𑁫𑁧𑁩. 𑀇𑀘𑁆𑀘𑁂𑀯𑀁 𑀧𑀦 𑀘𑀢𑁆𑀢𑀸𑀭𑁄, 𑀕𑁄𑀘𑀭𑀸 𑀪𑀽𑀢𑀦𑀺𑀲𑁆𑀲𑀺𑀢𑀸;

𑀪𑀽𑀢𑀢𑁆𑀢𑀬𑀜𑁆𑀘 𑀨𑁄𑀝𑁆𑀞𑀩𑁆𑀩𑀫𑀸𑀧𑁄𑀥𑀸𑀢𑀼𑀯𑀺𑀯𑀚𑁆𑀚𑀺𑀢𑀁.

𑁫𑁧𑁪. 𑀲𑀤𑁆𑀤𑁄 𑀅𑀦𑀺𑀬𑀢𑁄 𑀢𑀢𑁆𑀣, 𑀢𑀤𑀜𑁆𑀜𑁄 𑀲𑀳𑀯𑀼𑀢𑁆𑀢𑀺𑀦𑁄;

𑀢𑀁𑀢𑀁𑀲𑀪𑀸𑀯𑀪𑁂𑀤𑁂𑀦, 𑀢𑀁𑀢𑀁𑀤𑁆𑀯𑀸𑀭𑁄𑀧𑀮𑀓𑁆𑀔𑀺𑀢𑁄.

𑁫𑁧𑁫. 𑀧𑀜𑁆𑀘𑁂𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀯𑀺𑀲𑀬𑀸 𑀫𑀢𑀸;

𑀘𑀓𑁆𑀔𑀸𑀤𑀺𑀧𑀝𑀺𑀳𑀦𑀦𑀮𑀓𑁆𑀔𑀡𑀸𑀯 𑀬𑀣𑀸𑀓𑁆𑀓𑀫𑀁.

𑁫𑁧𑁬. 𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀸𑀮𑀫𑁆𑀩𑀪𑀸𑀯𑀭𑀲𑀸 𑀢𑀣𑀸;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀕𑁄𑀘𑀭𑀢𑁆𑀢𑁂𑀦 𑀕𑀬𑁆𑀳𑀭𑁂.

𑁫𑁧𑁭. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀦𑀺𑀢𑁆𑀣𑀢𑁆𑀢𑀫𑀺𑀢𑁆𑀣𑀺𑀪𑀸𑀯𑁄𑀢𑀺 𑀪𑀸𑀲𑀺𑀢𑁄;

𑀧𑀼𑀭𑀺𑀲𑀢𑁆𑀢𑀁 𑀢𑀣𑀸 𑀪𑀸𑀯𑁄, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀦𑀸𑀫𑀓𑁄.

𑁫𑁧𑁮. 𑀢𑀁 𑀤𑁆𑀯𑀬𑀁 𑀧𑀦𑀼𑀧𑀸𑀤𑀺𑀦𑁆𑀦𑀓𑀸𑀬𑁂 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺;

𑀓𑀮𑀸𑀧𑀦𑁆𑀢𑀭𑀪𑀺𑀦𑁆𑀦𑀜𑁆𑀘, 𑀪𑀺𑀦𑁆𑀦𑀲𑀦𑁆𑀢𑀸𑀦𑀯𑀼𑀢𑁆𑀢𑀺 𑀘.

𑁫𑁧𑁯. 𑀯𑀲𑁂 𑀯𑀢𑁆𑀢𑁂𑀢𑀺 𑀮𑀺𑀗𑁆𑀕𑀸𑀦-𑀫𑀺𑀢𑁆𑀣𑀺𑀧𑀼𑀫𑁆𑀪𑀸𑀯𑀮𑀓𑁆𑀔𑀡𑀁;

𑀇𑀢𑁆𑀣𑀻𑀢𑀺 𑀘 𑀧𑀼𑀭𑀺𑀲𑁄𑀢𑀺, 𑀧𑀓𑀸𑀲𑀦𑀭𑀲𑀁 𑀢𑀣𑀸.

𑁫𑁨𑁦. 𑀇𑀢𑁆𑀣𑀻𑀦𑀁 𑀧𑀼𑀭𑀺𑀲𑀸𑀦𑀜𑁆𑀘, 𑀮𑀺𑀗𑁆𑀕𑀲𑁆𑀲 𑀘 𑀬𑀣𑀸𑀓𑁆𑀓𑀫𑀁;

𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦𑀁, 𑀓𑀸𑀭𑀡𑀢𑁆𑀢𑁂𑀦 𑀕𑀬𑁆𑀳𑀢𑀺.

𑁫𑁨𑁧. 𑀲𑀢𑁆𑀢𑀸 𑀫𑀭𑀦𑁆𑀢𑀺 𑀦𑀸𑀲𑁂𑀦, 𑀬𑀲𑁆𑀲 𑀧𑀸𑀡𑀦𑁆𑀢𑀺 𑀯𑀼𑀢𑁆𑀢𑀺𑀬𑀸;

𑀲𑀚𑀻𑀯𑀫𑀢𑀓𑀸𑀬𑀸𑀦𑀁, 𑀪𑁂𑀤𑁄 𑀬𑁂𑀦𑁄𑀧𑀮𑀓𑁆𑀔𑀺𑀢𑁄.

𑁫𑁨𑁨. 𑀢𑀤𑁂𑀢𑀁 𑀓𑀫𑁆𑀫𑀚𑀸𑀢𑀸𑀦-𑀫𑀦𑀼𑀧𑀸𑀮𑀦𑀮𑀓𑁆𑀔𑀡𑀁;

𑀚𑀻𑀯𑀺𑀢𑀁 𑀚𑀻𑀯𑀦𑀭𑀲𑀁, 𑀆𑀬𑀼𑀩𑀤𑁆𑀥𑁄𑀢𑀺 𑀕𑀬𑁆𑀳𑀢𑀺.

𑁫𑁨𑁩. 𑀫𑀦𑁄𑀥𑀸𑀢𑀼𑀬𑀸 𑀘 𑀢𑀣𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸;

𑀦𑀺𑀲𑁆𑀲𑀬𑀮𑀓𑁆𑀔𑀡𑀁 𑀯𑀢𑁆𑀣𑀼-𑀭𑀽𑀧𑀁 𑀳𑀤𑀬𑀲𑀫𑁆𑀫𑀢𑀁.

𑁫𑁨𑁪. 𑀲𑀫𑀸𑀥𑀸𑀦𑀭𑀲𑀁 𑀢𑀸𑀲-𑀫𑀼𑀩𑁆𑀩𑀸𑀳𑀢𑁆𑀢𑁂𑀦 𑀕𑀬𑁆𑀳𑀢𑀺;

𑀬𑀲𑁆𑀫𑀺𑀁 𑀓𑀼𑀧𑁆𑀧𑀺𑀢𑀓𑀸𑀮𑀫𑁆𑀳𑀺, 𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦𑁄.

𑁫𑁨𑁫. 𑀓𑀸𑀬𑁄 𑀬𑀲𑁆𑀲𑀸𑀦𑀼𑀲𑀸𑀭𑁂𑀦, 𑀘𑀺𑀢𑁆𑀢𑀓𑁆𑀔𑁂𑀧𑁂𑀦 𑀔𑀺𑀚𑁆𑀚𑀢𑀺;

𑀬𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀯𑀺𑀜𑁆𑀜𑀸𑀡-𑀲𑁄𑀢𑁄𑀧𑀺 𑀘 𑀦𑀺𑀭𑀼𑀚𑁆𑀛𑀢𑀺.

𑁫𑁨𑁬. 𑀬𑀁 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀸𑀢𑀺, 𑀧𑀝𑀺𑀲𑀦𑁆𑀥𑀺 𑀪𑀯𑀦𑁆𑀢𑀭𑁂;

𑀢𑀤𑁂𑀢𑀁 𑀓𑀫𑁆𑀫𑀲𑀫𑁆𑀪𑀽𑀢𑀁, 𑀧𑀜𑁆𑀘𑀯𑁄𑀓𑀸𑀭𑀪𑀽𑀫𑀺𑀬𑀁.

𑁫𑁨𑁭. 𑀫𑀚𑁆𑀛𑁂 𑀳𑀤𑀬𑀓𑁄𑀲𑀫𑁆𑀳𑀺, 𑀅𑀟𑁆𑀠𑀧𑀲𑀢𑀮𑁄𑀳𑀺𑀢𑁂;

𑀪𑀽𑀢𑀭𑀽𑀧𑀫𑀼𑀧𑀸𑀤𑀸𑀬, 𑀘𑀓𑁆𑀔𑀸𑀤𑀺 𑀯𑀺𑀬 𑀯𑀢𑁆𑀢𑀢𑀺.

𑁫𑁨𑁮. 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀭𑀽𑀧𑀸𑀳𑀭𑀡𑀮𑀓𑁆𑀔𑀡𑁄;

𑀓𑀸𑀬𑀸𑀦𑀼𑀬𑀸𑀧𑀦𑀭𑀲𑁄, 𑀉𑀧𑀢𑁆𑀣𑀫𑁆𑀪𑁄𑀢𑀺 𑀕𑀬𑁆𑀳𑀢𑀺.

𑁫𑁨𑁯. 𑀑𑀚𑀸𑀬 𑀬𑀸𑀬 𑀬𑀸𑀧𑁂𑀦𑁆𑀢𑀺, 𑀆𑀳𑀸𑀭𑀲𑁆𑀦𑁂𑀳𑀲𑀢𑁆𑀢𑀺𑀬𑀸;

𑀧𑀸𑀡𑀺𑀦𑁄 𑀓𑀸𑀫𑀮𑁄𑀓𑀫𑁆𑀳𑀺, 𑀲𑀸𑀬𑀫𑁂𑀯𑀁 𑀧𑀯𑀼𑀘𑁆𑀘𑀢𑀺.

𑁫𑁩𑁦. 𑀆𑀓𑀸𑀲𑀥𑀸𑀢𑀼 𑀭𑀽𑀧𑀸𑀦𑀁, 𑀧𑀭𑀺𑀬𑁄𑀲𑀸𑀦𑀮𑀓𑁆𑀔𑀡𑀸;

𑀧𑀭𑀺𑀘𑁆𑀙𑁂𑀤𑀭𑀲𑀸 𑀭𑀽𑀧𑀫𑀭𑀺𑀬𑀸𑀤𑁄𑀢𑀺 𑀕𑀬𑁆𑀳𑀢𑀺.

𑁫𑁩𑁧. 𑀲𑀮𑀓𑁆𑀔𑀡𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀥𑀫𑁆𑀫𑀧𑀭𑀺𑀕𑁆𑀕𑀳𑁂;

𑀬𑁄𑀕𑀻𑀦𑀫𑀼𑀧𑀓𑀸𑀭𑀸𑀬, 𑀬𑀁 𑀤𑁂𑀲𑁂𑀲𑀺 𑀤𑀬𑀸𑀧𑀭𑁄.

𑁫𑁩𑁨. 𑀧𑀭𑀺𑀘𑁆𑀙𑀺𑀦𑁆𑀦𑀲𑀪𑀸𑀯𑀸𑀦𑀁, 𑀓𑀮𑀸𑀧𑀸𑀦𑀁 𑀬𑀣𑀸𑀭𑀳𑀁;

𑀧𑀭𑀺𑀬𑀦𑁆𑀢𑀸𑀦𑀫𑁂𑀯𑁂𑀲, 𑀢𑀤𑀸𑀓𑀸𑀭𑁄 𑀧𑀯𑀼𑀘𑁆𑀘𑀢𑀺.

𑁫𑁩𑁩. 𑀕𑀫𑀦𑀸𑀤𑀺𑀯𑀘𑀻𑀖𑁄𑀲𑀧𑀯𑀢𑁆𑀢𑀫𑁆𑀳𑀺 𑀬𑀣𑀸𑀓𑁆𑀓𑀫𑀁;

𑀯𑀸𑀬𑁄𑀧𑀣𑀯𑀺𑀥𑀸𑀢𑀽𑀦𑀁, 𑀬𑁄 𑀯𑀺𑀓𑀸𑀭𑁄 𑀲𑀫𑀢𑁆𑀣𑀢𑀸.

𑁫𑁩𑁪. 𑀲𑀳𑀚𑁄𑀧𑀸𑀤𑀺𑀦𑁆𑀦𑀓𑀸𑀦𑀁, 𑀓𑁆𑀭𑀺𑀬𑀸𑀯𑀸𑀘𑀸𑀧𑀯𑀢𑁆𑀢𑀺𑀬𑀸;

𑀯𑀺𑀧𑁆𑀨𑀦𑁆𑀤𑀖𑀝𑁆𑀝𑀦𑀸𑀳𑁂𑀢𑀼, 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀓𑁄.

𑁫𑁩𑁫. 𑀲 𑀯𑀺𑀓𑀸𑀭𑀯𑀺𑀲𑁂𑀲𑁄𑀬𑀁, 𑀯𑀺𑀜𑁆𑀜𑀢𑁆𑀢𑀻𑀢𑀺 𑀧𑀓𑀸𑀲𑀺𑀢𑁄;

𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀘 𑀯𑀺𑀘𑀺𑀦𑁆𑀢𑀺𑀢𑀁.

𑁫𑁩𑁬. 𑀯𑀸𑀬𑁄𑀧𑀣𑀯𑀸𑀥𑀺𑀓𑀸𑀦𑀁, 𑀪𑀽𑀢𑀸𑀦𑀫𑀺𑀢𑀺 𑀓𑁂𑀘𑀦;

𑀧𑀯𑀼𑀢𑁆𑀢𑀸 𑀢𑀸𑀤𑀺𑀦𑀸 𑀓𑀸𑀬-𑀧𑀭𑀺𑀕𑁆𑀕𑀳𑀲𑀼𑀔𑀸𑀬 𑀬𑀸.

𑁫𑁩𑁭. 𑀓𑀸𑀬𑁄 𑀬𑀲𑁆𑀲𑀸𑀦𑀼𑀪𑀸𑀯𑁂𑀦,

𑀲𑀳𑀸𑀪𑁄𑀕𑁄𑀯 𑀔𑀸𑀬𑀢𑀺;

𑀬𑀁 𑀦𑀺𑀭𑁄𑀥𑀸 𑀧𑀭𑀸𑀪𑀽𑀢𑁄,

𑀲𑁂𑀢𑀺 𑀦𑀺𑀘𑁆𑀘𑁂𑀢𑀦𑁄 𑀬𑀣𑀸.

𑁫𑁩𑁮. 𑀮𑁄𑀓𑁂 𑀧𑀧𑀜𑁆𑀘𑀸 𑀯𑀢𑁆𑀢𑀦𑁆𑀢𑀺, 𑀩𑀳𑀼𑀥𑀸 𑀬𑀸𑀬 𑀦𑀺𑀫𑁆𑀫𑀺𑀢𑀸;

𑀓𑀧𑁆𑀧𑁂𑀦𑁆𑀢𑀺 𑀓𑀸𑀬𑀫𑀢𑁆𑀢𑀸𑀦𑀁, 𑀩𑀸𑀮𑀸 𑀬𑀸𑀬 𑀘 𑀯𑀜𑁆𑀘𑀺𑀢𑀸.

𑁫𑁩𑁯. 𑀲𑀸𑀬𑀁 𑀓𑀸𑀬𑀯𑀘𑀻𑀓𑀫𑁆𑀫-𑀤𑁆𑀯𑀸𑀭𑀪𑀸𑀯𑁂𑀦 𑀮𑀓𑁆𑀔𑀺𑀢𑀸;

𑀩𑁆𑀬𑀸𑀧𑀸𑀭𑀖𑀝𑁆𑀝𑀦𑀸𑀳𑁂𑀢𑀼-𑀯𑀺𑀓𑀸𑀭𑀸𑀓𑀸𑀭𑀮𑀓𑁆𑀔𑀡𑀸.

𑁫𑁪𑁦. 𑀓𑀸𑀬𑀯𑀸𑀘𑀸𑀅𑀥𑀺𑀧𑁆𑀧𑀸𑀬-𑀧𑀓𑀸𑀲𑀦𑀭𑀲𑀸 𑀢𑀣𑀸;

𑀓𑀸𑀬𑀯𑀺𑀧𑁆𑀨𑀦𑁆𑀤𑀖𑀝𑁆𑀝𑀦-𑀳𑁂𑀢𑀼𑀪𑀸𑀯𑁂𑀦 𑀕𑀬𑁆𑀳𑀢𑀺.

𑁫𑁪𑁧. 𑀮𑀳𑀼𑀢𑀸 𑀧𑀦 𑀭𑀽𑀧𑀸𑀦𑀁, 𑀅𑀤𑀦𑁆𑀥𑀸𑀓𑀸𑀭𑀮𑀓𑁆𑀔𑀡𑀸;

𑀅𑀯𑀺𑀢𑁆𑀣𑀸𑀦𑀭𑀲𑀸 𑀲𑀮𑁆𑀮-𑀳𑀼𑀓𑀯𑀼𑀢𑁆𑀢𑀻𑀢𑀺 𑀕𑀬𑁆𑀳𑀢𑀺.

𑁫𑁪𑁨. 𑀫𑀼𑀤𑀼𑀢𑀸𑀧𑀺 𑀘 𑀭𑀽𑀧𑀸𑀦𑀁, 𑀓𑀓𑁆𑀔𑀴𑀸𑀪𑀸𑀯𑀮𑀓𑁆𑀔𑀡𑀸;

𑀓𑀺𑀘𑁆𑀘𑀸𑀯𑀺𑀭𑀼𑀚𑁆𑀛𑀦𑀭𑀲𑀸, 𑀅𑀦𑀼𑀓𑀼𑀮𑁆𑀬𑀦𑁆𑀢𑀺 𑀕𑀬𑁆𑀳𑀢𑀺.

𑁫𑁪𑁩. 𑀓𑀫𑁆𑀫𑀜𑁆𑀜𑀢𑀸 𑀘 𑀭𑀽𑀧𑀸𑀦𑀁, 𑀅𑀮𑀁𑀓𑀺𑀘𑁆𑀘𑀲𑁆𑀲 𑀮𑀓𑁆𑀔𑀡𑀸;

𑀧𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀭𑀲𑀸, 𑀬𑁄𑀕𑁆𑀕𑀪𑀸𑀯𑁄𑀢𑀺 𑀕𑀬𑁆𑀳𑀢𑀺.

𑁫𑁪𑁪. 𑀲𑀧𑁆𑀧𑀸𑀬𑀫𑀼𑀢𑀼𑀫𑀸𑀳𑀸𑀭𑀁, 𑀮𑀤𑁆𑀥𑀸 𑀘𑀺𑀢𑁆𑀢𑀫𑀦𑀸𑀫𑀬𑀁;

𑀮𑀳𑀽 𑀫𑀼𑀤𑀼 𑀘 𑀓𑀫𑁆𑀫𑀜𑁆𑀜𑀁, 𑀬𑀤𑀸 𑀭𑀽𑀧𑀁 𑀧𑀯𑀢𑁆𑀢𑀢𑀺.

𑁫𑁪𑁫. 𑀢𑀣𑀸 𑀧𑀯𑀢𑁆𑀢𑀭𑀽𑀧𑀲𑁆𑀲, 𑀧𑀯𑀢𑁆𑀢𑀸𑀓𑀸𑀭𑀪𑁂𑀤𑀺𑀢𑀁;

𑀮𑀳𑀼𑀢𑀸𑀤𑀺𑀢𑁆𑀢𑀬𑀫𑁆𑀧𑁂𑀢𑀁, 𑀲𑀳𑀯𑀼𑀢𑁆𑀢𑀺 𑀢𑀤𑀸 𑀪𑀯𑁂.

𑁫𑁪𑁬. 𑀲𑀧𑁆𑀧𑀸𑀬𑀧𑀝𑀺𑀯𑁂𑀥𑀸𑀬, 𑀧𑀝𑀺𑀧𑀢𑁆𑀢𑀼𑀧𑀓𑀸𑀭𑀺𑀓𑀸;

𑀲𑀸𑀓𑀸𑀭𑀸 𑀭𑀽𑀧𑀲𑀫𑁆𑀧𑀢𑁆𑀢𑀺, 𑀧𑀜𑁆𑀜𑀢𑁆𑀢𑁂𑀯𑀁 𑀫𑀳𑁂𑀲𑀺𑀦𑀸.

𑁫𑁪𑁭. 𑀭𑀽𑀧𑀲𑁆𑀲𑁄𑀧𑀘𑀬𑁄 𑀦𑀸𑀫, 𑀭𑀽𑀧𑀲𑁆𑀲𑀸𑀘𑀬𑀮𑀓𑁆𑀔𑀡𑁄;

𑀭𑀽𑀧𑀼𑀫𑁆𑀫𑀼𑀚𑁆𑀚𑀸𑀧𑀦𑀭𑀲𑁄, 𑀧𑀸𑀭𑀺𑀧𑀽𑀭𑀻𑀢𑀺 𑀕𑀬𑁆𑀳𑀢𑀺.

𑁫𑁪𑁮. 𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀭𑀽𑀧-𑀲𑀦𑁆𑀢𑀢𑀻𑀢𑀺 𑀧𑀓𑀸𑀲𑀺𑀢𑀸;

𑀅𑀦𑀼𑀧𑁆𑀧𑀩𑀦𑁆𑀥𑀦𑀭𑀲𑀸, 𑀅𑀯𑀺𑀘𑁆𑀙𑁂𑀤𑁄𑀢𑀺 𑀕𑀬𑁆𑀳𑀢𑀺.

𑁫𑁪𑁯. 𑀭𑀽𑀧𑀫𑀸𑀘𑀬𑀭𑀽𑀧𑁂𑀦, 𑀚𑀸𑀬𑀢𑀺𑀘𑁆𑀘𑀼𑀧𑀭𑀽𑀧𑀭𑀺;

𑀧𑁂𑀓𑁆𑀔𑀢𑁄𑀧𑀘𑀸𑀬𑀸𑀓𑀸𑀭𑀸, 𑀚𑀸𑀢𑀺 𑀕𑀬𑁆𑀳𑀢𑀺 𑀬𑁄𑀕𑀺𑀦𑀸.

𑁫𑁫𑁦. 𑀅𑀦𑀼𑀧𑁆𑀧𑀩𑀦𑁆𑀥𑀸𑀓𑀸𑀭𑁂𑀦, 𑀚𑀸𑀬𑀢𑀻𑀢𑀺 𑀲𑀫𑁂𑀓𑁆𑀔𑀢𑁄;

𑀢𑀤𑀸𑀬𑀁 𑀲𑀦𑁆𑀢𑀢𑀸𑀓𑀸𑀭𑀸, 𑀲𑀫𑀼𑀧𑀝𑁆𑀞𑀸𑀲𑀺 𑀘𑁂𑀢𑀲𑀺.

𑁫𑁫𑁧. 𑀏𑀯𑀫𑀸𑀪𑁄𑀕𑀪𑁂𑀤𑁂𑀦, 𑀚𑀸𑀢𑀺𑀭𑀽𑀧𑀁 𑀤𑁆𑀯𑀺𑀥𑀸 𑀓𑀢𑀁;

𑀅𑀢𑁆𑀣𑀽𑀧𑀮𑀤𑁆𑀥𑀺𑀪𑀸𑀯𑁂𑀦, 𑀚𑀸𑀬𑀦𑁆𑀢𑀁 𑀯𑀸𑀣 𑀓𑁂𑀯𑀮𑀁.

𑁫𑁫𑁨. 𑀭𑀽𑀧𑀯𑀺𑀯𑀺𑀢𑁆𑀢𑀫𑁄𑀓𑀸𑀲𑀁, 𑀧𑀼𑀭𑀓𑁆𑀔𑀢𑁆𑀢𑁂𑀦 𑀘𑀻𑀬𑀢𑀺;

𑀅𑀪𑀸𑀯𑀸 𑀧𑀦 𑀪𑀸𑀯𑀸𑀬, 𑀧𑀯𑀢𑁆𑀢𑀫𑀺𑀢𑀺 𑀲𑀦𑁆𑀢𑀢𑀺.