𑁫. 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄

𑀓𑀫𑁆𑀫𑀯𑀺𑀪𑀸𑀕𑁄

𑁩𑁨𑁮. 𑀯𑀺𑀪𑀸𑀕𑀁 𑀧𑀦 𑀓𑀫𑁆𑀫𑀸𑀦𑀁,

𑀧𑀯𑀓𑁆𑀔𑀸𑀫𑀺 𑀇𑀢𑁄 𑀧𑀭𑀁;

𑀓𑀫𑁆𑀫𑀧𑀸𑀓𑀓𑁆𑀭𑀺𑀬𑀸𑀪𑁂𑀤𑁂,

𑀅𑀫𑁄𑀳𑀸𑀬 𑀲𑀫𑀸𑀲𑀢𑁄.

𑁩𑁨𑁯. 𑀓𑀫𑁆𑀫𑀧𑀘𑁆𑀘𑀬𑀓𑀫𑁆𑀫𑀦𑁆𑀢𑀺, 𑀘𑁂𑀢𑀦𑀸𑀯 𑀲𑀫𑀻𑀭𑀺𑀢𑀸;

𑀢𑀢𑁆𑀣𑀸𑀧𑀺 𑀦𑀸𑀦𑀓𑁆𑀔𑀡𑀺𑀓𑀸, 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀯 𑀘𑁂𑀢𑀦𑀸.

𑁩𑁩𑁦. 𑀤𑁂𑀢𑀺 𑀧𑀸𑀓𑀫𑀥𑀺𑀝𑁆𑀞𑀸𑀬, 𑀲𑀫𑁆𑀧𑀬𑀼𑀢𑁆𑀢𑁂 𑀬𑀣𑀸𑀭𑀳𑀁;

𑀓𑀫𑁆𑀫𑀲𑁆𑀲𑀸𑀬𑀽𑀳𑀦𑀝𑁆𑀞𑁂𑀦, 𑀧𑀯𑀢𑁆𑀢𑀢𑁆𑀢𑀸 𑀳𑀺 𑀘𑁂𑀢𑀦𑀸.

𑁩𑁩𑁧. 𑀓𑁆𑀮𑁂𑀲𑀸𑀦𑀼𑀲𑀬𑀲𑀦𑁆𑀢𑀸𑀦𑁂, 𑀧𑀸𑀓𑀥𑀫𑁆𑀫𑀸 𑀳𑀺 𑀚𑀸𑀬𑀭𑁂;

𑀧𑀳𑀻𑀦𑀸𑀦𑀼𑀲𑀬𑀸𑀦𑀁 𑀢𑀼, 𑀓𑁆𑀭𑀺𑀬𑀸𑀫𑀢𑁆𑀢𑀁 𑀧𑀯𑀢𑁆𑀢𑀢𑀺.

𑁩𑁩𑁨. 𑀫𑀽𑀮𑀪𑀸𑀯𑀸 𑀘 𑀲𑀩𑁆𑀩𑁂𑀲𑀁, 𑀢𑀣𑁂𑀯𑀸𑀯𑀚𑁆𑀚𑀦𑀤𑁆𑀯𑀬𑀁;

𑀚𑀦𑀺𑀢𑀸𑀦𑀺 𑀘 𑀓𑀫𑁆𑀫𑁂𑀳𑀺, 𑀯𑀺𑀧𑀸𑀓𑀸𑀦𑀺 𑀧𑀯𑀢𑁆𑀢𑀭𑁂.

𑁩𑁩𑁩. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯, 𑀓𑀫𑁆𑀫𑀁 𑀢𑁂𑀢𑁆𑀢𑀺𑀁𑀲𑀥𑀸 𑀞𑀺𑀢𑀁;

𑀓𑀫𑁆𑀫𑀘𑀢𑀼𑀓𑁆𑀓𑀪𑁂𑀤𑁂𑀳𑀺, 𑀯𑀺𑀪𑀸𑀯𑁂𑀬𑁆𑀬 𑀯𑀺𑀘𑀓𑁆𑀔𑀡𑁄.

𑁩𑁩𑁪. 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀤𑀺𑀓𑀡𑁆𑀳𑀸𑀤𑀺-𑀚𑀦𑀓𑀸𑀤𑀺𑀕𑀭𑀸𑀤𑀺𑀢𑁄;

𑀤𑀺𑀝𑁆𑀞𑀥𑀫𑁆𑀫𑀸𑀤𑀺𑀓𑀸𑀫𑀸𑀤𑀺-𑀪𑁂𑀤𑀸 𑀙𑀥𑀸 𑀬𑀣𑀸𑀓𑁆𑀓𑀫𑀁.

𑁩𑁩𑁫. 𑀬𑀁 𑀧𑀸𑀧𑀁 𑀲𑀼𑀔𑀯𑁄𑀓𑀺𑀡𑁆𑀡𑀁, 𑀅𑀓𑀺𑀘𑁆𑀙𑁂𑀦 𑀓𑀭𑀻𑀬𑀢𑀺;

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀓𑀫𑁆𑀫𑀁, 𑀆𑀬𑀢𑀺𑀁 𑀤𑀼𑀓𑁆𑀔𑀧𑀸𑀓𑀚𑀁.

𑁩𑁩𑁬. 𑀓𑀺𑀘𑁆𑀙𑁂𑀦 𑀤𑀼𑀓𑁆𑀔𑀯𑁄𑀓𑀺𑀡𑁆𑀡𑀁, 𑀬𑀤𑀺 𑀧𑀸𑀧𑀁 𑀓𑀭𑀻𑀬𑀢𑀺;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘 𑀢𑀁 𑀤𑀼𑀓𑁆𑀔𑀁, 𑀆𑀬𑀢𑀺𑀁 𑀤𑀼𑀓𑁆𑀔𑀧𑀸𑀓𑀚𑀁.

𑁩𑁩𑁭. 𑀓𑀺𑀘𑁆𑀙𑁂𑀦 𑀤𑀼𑀓𑁆𑀔𑀯𑁄𑀓𑀺𑀡𑁆𑀡𑀁, 𑀬𑀤𑀺 𑀧𑀼𑀜𑁆𑀜𑀁 𑀓𑀭𑀻𑀬𑀢𑀺;

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀢𑀁 𑀤𑀼𑀓𑁆𑀔𑀁, 𑀆𑀬𑀢𑀺𑀁 𑀲𑀼𑀔𑀧𑀸𑀓𑀚𑀁.

𑁩𑁩𑁮. 𑀬𑀁 𑀧𑀼𑀜𑁆𑀜𑀁 𑀲𑀼𑀔𑀯𑁄𑀓𑀺𑀡𑁆𑀡𑀁, 𑀅𑀓𑀺𑀘𑁆𑀙𑁂𑀦 𑀓𑀭𑀻𑀬𑀢𑀺;

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯, 𑀆𑀬𑀢𑀺𑀁 𑀲𑀼𑀔𑀧𑀸𑀓𑀚𑀁.

𑁩𑁩𑁯. 𑀯𑀺𑀲𑀲𑀁𑀲𑀝𑁆𑀞𑀫𑀥𑀼𑀭𑀁, 𑀲𑀯𑀺𑀲𑀁 𑀢𑀺𑀢𑁆𑀢𑀓𑀁 𑀢𑀣𑀸;

𑀕𑁄𑀫𑀼𑀢𑁆𑀢𑀫𑀥𑀼𑀪𑁂𑀲𑀚𑁆𑀚-𑀫𑀺𑀘𑁆𑀘𑁄𑀧𑀫𑁆𑀫𑀁 𑀬𑀣𑀸𑀓𑁆𑀓𑀫𑀁.

𑁩𑁪𑁦. 𑀲𑀫𑀸𑀤𑀸𑀦𑁂 𑀯𑀺𑀧𑀸𑀓𑁂 𑀘, 𑀲𑀼𑀔𑀤𑀼𑀓𑁆𑀔𑀧𑁆𑀧𑀪𑁂𑀤𑀺𑀢𑀁;

𑀓𑀫𑁆𑀫𑀫𑁂𑀯𑀁 𑀘𑀢𑀼𑀤𑁆𑀥𑀸𑀢𑀺, 𑀧𑀓𑀸𑀲𑁂𑀦𑁆𑀢𑀺 𑀢𑀣𑀸𑀕𑀢𑀸.

𑁩𑁪𑁧. 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀤𑀺, 𑀏𑀓𑀦𑁆𑀢𑀓𑀝𑀼𑀓𑀸𑀯𑀳𑀁;

𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀦𑁆𑀢𑀺, 𑀓𑀫𑁆𑀫𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀓𑀁.

𑁩𑁪𑁨. 𑀧𑀞𑀫𑀚𑁆𑀛𑀸𑀦𑀓𑀫𑁆𑀫𑀸𑀤𑀺, 𑀏𑀓𑀦𑁆𑀢𑁂𑀦 𑀲𑀼𑀔𑀸𑀯𑀳𑀁;

𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺, 𑀓𑀫𑁆𑀫𑀁 𑀲𑀕𑁆𑀕𑀽𑀧𑀧𑀢𑁆𑀢𑀺𑀓𑀁.

𑁩𑁪𑁩. 𑀯𑁄𑀓𑀺𑀡𑁆𑀡𑀓𑀫𑁆𑀫 𑀯𑁄𑀓𑀺𑀡𑁆𑀡-𑀲𑀼𑀔𑀤𑀼𑀓𑁆𑀔𑀽𑀧𑀧𑀢𑁆𑀢𑀺𑀓𑀁;

𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓-𑀯𑀺𑀧𑀸𑀓𑀦𑁆𑀢𑀺 𑀲𑀫𑀻𑀭𑀺𑀢𑀁.

𑁩𑁪𑁪. 𑀅𑀓𑀡𑁆𑀳𑀲𑀼𑀓𑁆𑀓𑀫𑀻𑀭𑁂𑀦𑁆𑀢𑀺, 𑀅𑀓𑀡𑁆𑀳𑀲𑀼𑀓𑁆𑀓𑀧𑀸𑀓𑀤𑀁;

𑀓𑀫𑁆𑀫𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑁂, 𑀕𑀢𑀺𑀓𑀫𑁆𑀫𑀓𑁆𑀔𑀬𑀸𑀯𑀳𑀁.

𑁩𑁪𑁫. 𑀇𑀢𑀺 𑀯𑀝𑁆𑀝𑀧𑁆𑀧𑀯𑀢𑁆𑀢𑀫𑁆𑀳𑀺, 𑀓𑁆𑀮𑁂𑀲𑀯𑁄𑀤𑀸𑀦𑀪𑁂𑀤𑀺𑀢𑀁;

𑀓𑀫𑁆𑀫𑀓𑁆𑀔𑀬𑁂𑀦 𑀲𑀗𑁆𑀕𑀬𑁆𑀳, 𑀘𑀢𑀼𑀥𑀸 𑀓𑀫𑁆𑀫𑀫𑀻𑀭𑀺𑀢𑀁.

𑁩𑁪𑁬. 𑀚𑀦𑀓𑀜𑁆𑀘𑁂𑀯𑀼𑀧𑀢𑁆𑀣𑀫𑁆𑀪-𑀫𑀼𑀧𑀧𑀻𑀴𑁄𑀧𑀖𑀸𑀢𑀓𑀁;

𑀘𑀢𑀼𑀥𑀸 𑀓𑀺𑀘𑁆𑀘𑀪𑁂𑀤𑁂𑀦, 𑀓𑀫𑁆𑀫𑀫𑁂𑀯𑀁 𑀧𑀯𑀼𑀘𑁆𑀘𑀢𑀺.

𑁩𑁪𑁭. 𑀚𑀦𑁂𑀢𑀺 𑀚𑀦𑀓𑀁 𑀧𑀸𑀓𑀁, 𑀢𑀁 𑀙𑀺𑀦𑁆𑀤𑀢𑀼𑀧𑀧𑀻𑀴𑀓𑀁;

𑀢𑀁 𑀧𑀯𑀢𑁆𑀢𑁂𑀢𑀼𑀧𑀢𑁆𑀣𑀫𑁆𑀪𑀁, 𑀢𑀁 𑀖𑀸𑀢𑁂𑀢𑁄𑀧𑀖𑀸𑀢𑀓𑀁.

𑁩𑁪𑁮. 𑀓𑀭𑁄𑀢𑀺 𑀅𑀢𑁆𑀢𑀦𑁄 𑀧𑀸𑀓-𑀲𑁆𑀲𑀸𑀯𑀓𑀸𑀲𑀦𑁆𑀢𑀺 𑀪𑀸𑀲𑀺𑀢𑀁;

𑀧𑀸𑀓𑀤𑀸𑀬𑀓𑀓𑀫𑁆𑀫𑀁 𑀢𑀼, 𑀬𑀁 𑀓𑀺𑀜𑁆𑀘𑀺 𑀚𑀦𑀓𑀁 𑀪𑀯𑁂.

𑁩𑁪𑁯. 𑀩𑀸𑀥𑀫𑀸𑀦𑀓𑀓𑀫𑁆𑀫𑀁 𑀢𑀼, 𑀢𑀁 𑀧𑀸𑀓𑀫𑀼𑀧𑀧𑀻𑀴𑀓𑀁;

𑀉𑀧𑀖𑀸𑀢𑀓𑀫𑀻𑀭𑁂𑀦𑁆𑀢𑀺, 𑀢𑀤𑀼𑀧𑀘𑁆𑀙𑁂𑀤𑀓𑀁𑀧𑀭𑁂.

𑁩𑁫𑁦. 𑀕𑀭𑀼𑀓𑀸𑀲𑀦𑁆𑀦𑀫𑀸𑀘𑀺𑀡𑁆𑀡𑀁, 𑀓𑀝𑀢𑁆𑀢𑀸𑀓𑀫𑁆𑀫𑀼𑀦𑀸 𑀲𑀳;

𑀓𑀫𑁆𑀫𑀁 𑀘𑀢𑀼𑀩𑁆𑀩𑀺𑀥𑀁 𑀧𑀸𑀓-𑀧𑀭𑀺𑀬𑀸𑀬𑀧𑁆𑀧𑀪𑁂𑀤𑀢𑁄.

𑁩𑁫𑁧. 𑀫𑀳𑀕𑁆𑀕𑀢𑀸𑀦𑀦𑁆𑀢𑀭𑀺𑀬𑀁, 𑀕𑀭𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀢𑀁 𑀘𑀺𑀦𑁆𑀢𑀺𑀢𑀫𑀸𑀲𑀦𑁆𑀦-𑀫𑀸𑀲𑀦𑁆𑀦𑀫𑀭𑀡𑁂𑀦 𑀢𑀼.

𑁩𑁫𑁨. 𑀩𑀸𑀳𑀼𑀮𑁆𑀮𑁂𑀦 𑀲𑀫𑀸𑀘𑀺𑀡𑁆𑀡𑀫𑀸𑀘𑀺𑀡𑁆𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺;

𑀲𑁂𑀲𑀁 𑀧𑀼𑀜𑁆𑀜𑀫𑀧𑀼𑀜𑁆𑀜𑀜𑁆𑀘, 𑀓𑀝𑀢𑁆𑀢𑀸𑀓𑀫𑁆𑀫𑀫𑀻𑀭𑀺𑀢𑀁.

𑁩𑁫𑁩. 𑀤𑀺𑀝𑁆𑀞𑀥𑀫𑁆𑀫𑁂 𑀯𑁂𑀤𑀦𑀻𑀬𑀫𑀼𑀧𑀧𑀚𑁆𑀚𑀸𑀧𑀭𑁂 𑀢𑀣𑀸;

𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀫𑀺𑀢𑀺 𑀘𑀸𑀳𑁄𑀲𑀺𑀓𑀫𑁆𑀫𑀼𑀦𑀸.

𑁩𑁫𑁪. 𑀧𑀸𑀓𑀓𑀸𑀮𑀯𑀲𑁂𑀦𑀸𑀣, 𑀓𑀸𑀮𑀸𑀢𑀻𑀢𑀯𑀲𑁂𑀦 𑀘;

𑀘𑀢𑀼𑀥𑁂𑀯𑀫𑁆𑀧𑀺 𑀅𑀓𑁆𑀔𑀸𑀢𑀁, 𑀓𑀫𑁆𑀫𑀫𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑁩𑁫𑁫. 𑀤𑀺𑀝𑁆𑀞𑀥𑀫𑁆𑀫𑁂 𑀯𑁂𑀤𑀦𑀻𑀬𑀁, 𑀧𑀞𑀫𑀁 𑀚𑀯𑀦𑀁 𑀪𑀯𑁂;

𑀅𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸𑀯, 𑀅𑀲𑀫𑀢𑁆𑀣𑀁 𑀪𑀯𑀦𑁆𑀢𑀭𑁂.

𑁩𑁫𑁬. 𑀯𑁂𑀤𑀦𑀻𑀬𑀁 𑀢𑀼𑀧𑀧𑀚𑁆𑀚𑀧𑀭𑀺𑀬𑁄𑀲𑀸𑀦𑀫𑀻𑀭𑀺𑀢𑀁;

𑀧𑀭𑀺𑀦𑀺𑀝𑁆𑀞𑀺𑀢𑀓𑀫𑁆𑀫𑀢𑁆𑀢𑀸, 𑀯𑀺𑀧𑀘𑁆𑀘𑀢𑀺 𑀅𑀦𑀦𑁆𑀢𑀭𑁂.

𑁩𑁫𑁭. 𑀲𑁂𑀲𑀸𑀦𑀺 𑀯𑁂𑀤𑀦𑀻𑀬𑀸𑀦𑀺, 𑀧𑀭𑀺𑀬𑀸𑀬𑀸𑀧𑀭𑁂 𑀧𑀦;

𑀮𑀤𑁆𑀥𑀸𑀲𑁂𑀯𑀦𑀢𑁄 𑀧𑀸𑀓𑀁, 𑀚𑀦𑁂𑀦𑁆𑀢𑀺 𑀲𑀢𑀺 𑀧𑀘𑁆𑀘𑀬𑁂.

𑁩𑁫𑁮. 𑀯𑀼𑀘𑁆𑀘𑀦𑁆𑀢𑀸𑀳𑁄𑀲𑀺𑀓𑀫𑁆𑀫𑀸𑀦𑀺, 𑀓𑀸𑀮𑀸𑀢𑀻𑀢𑀸𑀦𑀺 𑀲𑀩𑁆𑀩𑀣𑀸;

𑀉𑀘𑁆𑀙𑀺𑀦𑁆𑀦𑀢𑀡𑁆𑀳𑀸𑀫𑀽𑀮𑀸𑀦𑀺, 𑀧𑀘𑁆𑀘𑀬𑀸𑀮𑀸𑀪𑀢𑁄 𑀢𑀣𑀸.

𑁩𑁫𑁯. 𑀘𑀢𑀼𑀥𑀸 𑀧𑀼𑀦 𑀓𑀸𑀫𑀸𑀤𑀺𑀪𑀽𑀫𑀺𑀪𑁂𑀤𑁂𑀦 𑀪𑀸𑀲𑀺𑀢𑀁;

𑀧𑀼𑀜𑁆𑀜𑀸𑀧𑀼𑀜𑁆𑀜𑀯𑀲𑀸 𑀤𑁆𑀯𑁂𑀥𑀸, 𑀓𑀸𑀫𑀸𑀯𑀘𑀭𑀺𑀓𑀁 𑀪𑀯𑁂.

𑁩𑁬𑁦. 𑀅𑀧𑀼𑀜𑁆𑀜𑀁 𑀢𑀢𑁆𑀣 𑀲𑀸𑀯𑀚𑁆𑀚-𑀫𑀦𑀺𑀝𑁆𑀞𑀨𑀮𑀤𑀸𑀬𑀓𑀁;

𑀢𑀁 𑀓𑀫𑁆𑀫𑀨𑀲𑁆𑀲𑀤𑁆𑀯𑀸𑀭𑁂𑀳𑀺, 𑀤𑀼𑀯𑀺𑀥𑀁 𑀲𑀫𑁆𑀧𑀯𑀢𑁆𑀢𑀢𑀺.+

𑁩𑁬𑁧. 𑀓𑀸𑀬𑀤𑁆𑀯𑀸𑀭𑀁 𑀯𑀘𑀻𑀤𑁆𑀯𑀸𑀭𑀁, 𑀫𑀦𑁄𑀤𑁆𑀯𑀸𑀭𑀦𑁆𑀢𑀺 𑀢𑀸𑀤𑀺𑀦𑀸;

𑀓𑀫𑁆𑀫𑀤𑁆𑀯𑀸𑀭𑀢𑁆𑀢𑀬𑀁 𑀯𑀼𑀢𑁆𑀢𑀁, 𑀨𑀲𑁆𑀲𑀤𑁆𑀯𑀸𑀭𑀸 𑀙 𑀤𑀻𑀧𑀺𑀢𑀸.

𑁩𑁬𑁨. 𑀓𑀫𑁆𑀫𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂, 𑀧𑀜𑁆𑀘𑀤𑁆𑀯𑀸𑀭𑀸 𑀲𑀫𑁄𑀳𑀺𑀢𑀸;

𑀨𑀲𑁆𑀲𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑀁, 𑀓𑀫𑁆𑀫𑀤𑁆𑀯𑀸𑀭𑀢𑁆𑀢𑀬𑀁 𑀓𑀢𑀁.

𑁩𑁬𑁩. 𑀢𑀣𑀸 𑀳𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁, 𑀚𑀦𑁂𑀢𑁆𑀯𑀸 𑀚𑀸𑀢𑀘𑁂𑀢𑀦𑀸;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀯𑀘𑀻𑀪𑁂𑀤𑀧𑀯𑀢𑁆𑀢𑀺𑀓𑀸.

𑁩𑁬𑁪. 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑀫𑁆𑀧𑀢𑁆𑀢𑀸, 𑀫𑀦𑁄𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀪𑁂𑀤𑁄𑀬𑀁 𑀧𑀭𑀺𑀬𑀸𑀬𑁂𑀦, 𑀓𑀫𑁆𑀫𑀸𑀦𑀫𑀺𑀢𑀺 𑀤𑀻𑀧𑀺𑀢𑁄.

𑁩𑁬𑁫. 𑀧𑀸𑀡𑀖𑀸𑀢𑀸𑀤𑀺𑀓𑀁 𑀓𑀫𑁆𑀫𑀁, 𑀓𑀸𑀬𑁂 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀢𑁄;

𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁, 𑀫𑀼𑀲𑀸𑀯𑀸𑀤𑀸𑀤𑀺𑀓𑀁 𑀢𑀣𑀸.

𑁩𑁬𑁬. 𑀅𑀪𑀺𑀚𑁆𑀛𑀸𑀤𑀺 𑀫𑀦𑁄𑀓𑀫𑁆𑀫𑀁, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀚𑀸𑀬𑀢𑀺;

𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀲𑁂𑀲𑀸𑀦𑀺, 𑀪𑁂𑀤𑁄𑀬𑀁 𑀧𑀭𑀫𑀢𑁆𑀣𑀢𑁄.

𑁩𑁬𑁭. 𑀨𑀲𑁆𑀲𑀤𑁆𑀯𑀸𑀭𑀫𑀦𑁄𑀤𑁆𑀯𑀸𑀭𑁂, 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀫𑀻𑀭𑀺𑀢𑀁;

𑀧𑀜𑁆𑀘𑀤𑁆𑀯𑀸𑀭𑁂 𑀤𑁆𑀯𑀬𑀁 𑀦𑀢𑁆𑀣𑀺, 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.

𑁩𑁬𑁮. 𑀅𑀓𑁆𑀔𑀦𑁆𑀢𑀺𑀜𑀸𑀡 𑀓𑁄𑀲𑀚𑁆𑀚𑀁, 𑀤𑀼𑀲𑁆𑀲𑀺𑀮𑁆𑀬𑀁 𑀫𑀼𑀝𑁆𑀞𑀲𑀘𑁆𑀘𑀢𑀸;

𑀇𑀘𑁆𑀘𑀸𑀲𑀁𑀯𑀭𑀪𑁂𑀤𑁂𑀦, 𑀅𑀝𑁆𑀞𑀤𑁆𑀯𑀸𑀭𑁂𑀲𑀼 𑀚𑀸𑀬𑀢𑀺.

𑁩𑁬𑁯. 𑀓𑀫𑁆𑀫𑀤𑁆𑀯𑀸𑀭𑀢𑁆𑀢𑀬𑀜𑁆𑀘𑁂𑀯, 𑀧𑀜𑁆𑀘𑀤𑁆𑀯𑀸𑀭𑀸 𑀢𑀣𑀸𑀧𑀭𑁂;

𑀅𑀲𑀁𑀯𑀭𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀅𑀝𑁆𑀞 𑀤𑁆𑀯𑀸𑀭𑀸 𑀧𑀓𑀸𑀲𑀺𑀢𑀸.

𑁩𑁭𑁦. 𑀢𑀢𑁆𑀣 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀁, 𑀧𑀝𑀺𑀲𑀦𑁆𑀥𑀺𑀨𑀮𑀸𑀯𑀳𑀁;

𑀧𑀸𑀡𑀖𑀸𑀢𑀸𑀤𑀺𑀪𑁂𑀤𑁂𑀦, 𑀤𑀲𑀥𑀸 𑀲𑀫𑁆𑀧𑀯𑀢𑁆𑀢𑀢𑀺.

𑁩𑁭𑁧. 𑀧𑀸𑀡𑀸𑀢𑀺𑀧𑀸𑀢𑁄 𑀨𑀭𑀼𑀲𑀁, 𑀩𑁆𑀬𑀸𑀧𑀸𑀤𑁄 𑀘 𑀢𑀣𑀸𑀧𑀭𑁄;

𑀇𑀘𑁆𑀘𑁂𑀯𑀁 𑀢𑀺𑀯𑀺𑀥𑀁 𑀓𑀫𑁆𑀫𑀁, 𑀤𑁄𑀲𑀫𑀽𑀮𑁂𑀳𑀺 𑀚𑀸𑀬𑀢𑀺.

𑁩𑁭𑁨. 𑀫𑀺𑀘𑁆𑀙𑀸𑀘𑀸𑀭𑁄 𑀅𑀪𑀺𑀚𑁆𑀛𑀸 𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀣𑀸𑀧𑀭𑀸;

𑀇𑀘𑁆𑀘𑁂𑀯𑀁 𑀢𑀺𑀯𑀺𑀥𑀁 𑀓𑀫𑁆𑀫𑀁, 𑀮𑁄𑀪𑀫𑀽𑀮𑁂𑀳𑀺 𑀚𑀸𑀬𑀢𑀺.

𑁩𑁭𑁩. 𑀣𑁂𑀬𑁆𑀬𑀸𑀤𑀸𑀦𑀁 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀁 𑀲𑀫𑁆𑀨𑀮𑀸𑀧𑀦𑀁;

𑀓𑀫𑁆𑀫𑀁 𑀘𑀢𑀼𑀩𑁆𑀩𑀺𑀥𑀫𑁆𑀫𑁂𑀢𑀁, 𑀤𑁆𑀯𑀺𑀫𑀽𑀮𑁂𑀳𑀺 𑀧𑀯𑀢𑁆𑀢𑀢𑀺.

𑁩𑁭𑁪. 𑀙𑀦𑁆𑀤𑀸𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀧𑀸𑀧𑀁 𑀓𑀼𑀩𑁆𑀩𑀦𑁆𑀢𑀺 𑀧𑀸𑀡𑀺𑀦𑁄;

𑀢𑀲𑁆𑀫𑀸 𑀙𑀦𑁆𑀤𑀸𑀤𑀺𑀪𑁂𑀤𑁂𑀦, 𑀘𑀢𑁆𑀢𑀸𑀮𑀻𑀲𑀯𑀺𑀥𑀁 𑀪𑀯𑁂.

𑁩𑁭𑁫. 𑀇𑀘𑁆𑀘𑀸𑀧𑀼𑀜𑁆𑀜𑀁 𑀧𑀓𑀸𑀲𑁂𑀦𑁆𑀢𑀺, 𑀘𑀢𑀼𑀭𑀸𑀧𑀸𑀬𑀲𑀸𑀥𑀓𑀁;

𑀅𑀜𑁆𑀜𑀢𑁆𑀣𑀸𑀧𑀺 𑀧𑀯𑀢𑁆𑀢𑀫𑁆𑀳𑀺, 𑀯𑀺𑀧𑀢𑁆𑀢𑀺𑀨𑀮𑀲𑀸𑀥𑀦𑀁.

𑁩𑁭𑁬. 𑀢𑀺𑀯𑀺𑀥𑀁 𑀧𑀦 𑀧𑀼𑀜𑁆𑀜𑀁 𑀢𑀼, 𑀅𑀦𑀯𑀚𑁆𑀚𑀺𑀝𑁆𑀞𑀧𑀸𑀓𑀤𑀁;

𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀘, 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀚𑀸𑀬𑀢𑀺.

𑁩𑁭𑁭. 𑀫𑀳𑀢𑁆𑀢𑀕𑀸𑀭𑀯𑀸 𑀲𑁆𑀦𑁂𑀳𑀸, 𑀤𑀬𑀸 𑀲𑀤𑁆𑀥𑀼𑀧𑀓𑀸𑀭𑀢𑁄;

𑀪𑁄𑀕𑀚𑀻𑀯𑀸𑀪𑀬𑀥𑀫𑁆𑀫𑀁, 𑀤𑀤𑀢𑁄 𑀤𑀸𑀦𑀫𑀻𑀭𑀺𑀢𑀁.

𑁩𑁭𑁮. 𑀧𑀼𑀜𑁆𑀜𑀫𑀸𑀘𑀸𑀭𑀯𑀸𑀭𑀺𑀢𑁆𑀢-𑀯𑀢𑁆𑀢𑀫𑀸𑀭𑀩𑁆𑀪 𑀓𑀼𑀩𑁆𑀩𑀢𑁄;

𑀧𑀸𑀧𑀸 𑀘 𑀯𑀺𑀭𑀫𑀦𑁆𑀢𑀲𑁆𑀲, 𑀳𑁄𑀢𑀺 𑀲𑀻𑀮𑀫𑀬𑀁 𑀢𑀤𑀸.

𑁩𑁭𑁯. 𑀤𑀸𑀦𑀲𑀻𑀮𑀯𑀺𑀦𑀺𑀫𑀼𑀢𑁆𑀢𑀁, 𑀪𑀸𑀯𑀦𑀸𑀢𑀺 𑀧𑀯𑀼𑀘𑁆𑀘𑀢𑀺;

𑀧𑀼𑀜𑁆𑀜𑀁 𑀪𑀸𑀯𑁂𑀦𑁆𑀢𑀺 𑀲𑀦𑁆𑀢𑀸𑀦𑁂, 𑀬𑀲𑁆𑀫𑀸 𑀢𑁂𑀦 𑀳𑀺𑀢𑀸𑀯𑀳𑀁.

𑁩𑁮𑁦. 𑀚𑀦𑁂𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁, 𑀬𑀤𑀸 𑀧𑀼𑀜𑁆𑀜𑀁 𑀓𑀭𑀻𑀬𑀢𑀺;

𑀓𑀸𑀬𑀓𑀫𑁆𑀫𑀁 𑀢𑀤𑀸 𑀳𑁄𑀢𑀺, 𑀤𑀸𑀦𑀁 𑀲𑀻𑀮𑀜𑁆𑀘 𑀪𑀸𑀯𑀦𑀸.

𑁩𑁮𑁧. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀤𑁆𑀥𑀺𑀁, 𑀬𑀤𑀸 𑀧𑀼𑀜𑁆𑀜𑀁 𑀓𑀭𑀻𑀬𑀢𑀺;

𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀁, 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀢𑀁.

𑁩𑁮𑁨. 𑀢𑀁𑀢𑀁𑀤𑁆𑀯𑀸𑀭𑀺𑀓𑀫𑁂𑀯𑀸𑀳𑀼, 𑀢𑀁𑀢𑀁𑀤𑁆𑀯𑀸𑀭𑀺𑀓𑀧𑀸𑀧𑀢𑁄;

𑀯𑀺𑀭𑀫𑀦𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀁, 𑀯𑀺𑀦𑀸 𑀯𑀸 𑀲𑀳 𑀯𑀸 𑀧𑀼𑀦.

𑁩𑁮𑁩. 𑀤𑀸𑀦𑀁 𑀲𑀻𑀮𑀁 𑀪𑀸𑀯𑀦𑀸 𑀘, 𑀯𑁂𑀬𑁆𑀬𑀸𑀯𑀘𑁆𑀘𑀸𑀧𑀘𑀸𑀬𑀦𑀸;

𑀧𑀢𑁆𑀢𑀸𑀦𑀼𑀫𑁄𑀤𑀦𑀸 𑀧𑀢𑁆𑀢𑀺-𑀤𑀸𑀦𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸;

𑀲𑀯𑀦𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫-𑀫𑀺𑀘𑁆𑀘𑁂𑀯𑀁 𑀤𑀲𑀥𑀸 𑀞𑀺𑀢𑀁.

𑁩𑁮𑁪. 𑀓𑀸𑀫𑀧𑀼𑀜𑁆𑀜𑀁 𑀧𑀓𑀸𑀲𑁂𑀦𑁆𑀢𑀺, 𑀓𑀸𑀫𑁂 𑀲𑀼𑀕𑀢𑀺𑀲𑀸𑀥𑀓𑀁;

𑀅𑀜𑁆𑀜𑀢𑁆𑀣𑀸𑀧𑀺 𑀧𑀯𑀢𑁆𑀢𑀫𑁆𑀳𑀺, 𑀲𑀫𑁆𑀧𑀢𑁆𑀢𑀺𑀨𑀮𑀲𑀸𑀥𑀓𑀁.

𑁩𑁮𑁫. 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀪𑁂𑀤𑁂𑀦, 𑀓𑀫𑁆𑀫𑀁 𑀯𑀻𑀲𑀢𑀺𑀥𑀸 𑀞𑀺𑀢𑀁;

𑀓𑀸𑀫𑀸𑀯𑀘𑀭𑀫𑀺𑀘𑁆𑀘𑁂𑀯𑀁, 𑀯𑀺𑀪𑀸𑀯𑁂𑀦𑁆𑀢𑀺 𑀯𑀺𑀪𑀸𑀯𑀺𑀦𑁄.

𑁩𑁮𑁬. 𑀭𑀽𑀧𑀸𑀯𑀘𑀭𑀺𑀓𑀁 𑀓𑀫𑁆𑀫-𑀫𑀧𑁆𑀧𑀦𑀸𑀪𑀸𑀯𑀦𑀸𑀫𑀬𑀁;

𑀓𑀲𑀺𑀡𑀸𑀤𑀺𑀓𑀫𑀸𑀭𑀩𑁆𑀪, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀢𑀺.

𑁩𑁮𑁭. 𑀧𑀣𑀯𑀸𑀧𑁄 𑀘 𑀢𑁂𑀚𑁄 𑀘,

𑀯𑀸𑀬𑁄 𑀦𑀻𑀮𑀜𑁆𑀘 𑀧𑀻𑀢𑀓𑀁;

𑀮𑁄𑀳𑀺𑀢𑁄𑀤𑀸𑀢𑀫𑀸𑀓𑀸𑀲𑀁,

𑀆𑀮𑁄𑀓𑁄𑀢𑀺 𑀯𑀺𑀲𑀸𑀭𑀤𑀸.

𑁩𑁮𑁮. 𑀓𑀲𑀺𑀡𑀸𑀦𑀺 𑀤𑀲𑀻𑀭𑁂𑀦𑁆𑀢𑀺, 𑀆𑀤𑀺𑀓𑀫𑁆𑀫𑀺𑀓𑀬𑁄𑀕𑀺𑀦𑁄;

𑀉𑀤𑁆𑀥𑀼𑀫𑀸𑀢𑀁 𑀯𑀺𑀦𑀻𑀮𑀜𑁆𑀘, 𑀯𑀺𑀧𑀼𑀩𑁆𑀩𑀓𑀁 𑀯𑀺𑀔𑀸𑀤𑀺𑀢𑀁.

𑁩𑁮𑁯. 𑀯𑀺𑀘𑁆𑀙𑀺𑀤𑁆𑀤𑀓𑀜𑁆𑀘 𑀯𑀺𑀓𑁆𑀔𑀺𑀢𑁆𑀢𑀁, 𑀳𑀢𑀯𑀺𑀓𑁆𑀔𑀺𑀢𑁆𑀢𑀮𑁄𑀳𑀺𑀢𑀁;

𑀧𑀼𑀴𑀯𑀁 𑀅𑀝𑁆𑀞𑀺𑀓𑀜𑁆𑀘𑁂𑀢𑀺, 𑀅𑀲𑀼𑀪𑀁 𑀤𑀲𑀥𑀸 𑀞𑀺𑀢𑀁.

𑁩𑁯𑁦. 𑀩𑀼𑀤𑁆𑀥𑁂 𑀥𑀫𑁆𑀫𑁂 𑀘 𑀲𑀗𑁆𑀖𑁂 𑀘, 𑀲𑀻𑀮𑁂 𑀘𑀸𑀕𑁂 𑀘 𑀅𑀢𑁆𑀢𑀦𑁄;

𑀤𑁂𑀯𑀢𑁄𑀧𑀲𑀫𑀸𑀬𑀜𑁆𑀘, 𑀯𑀼𑀢𑁆𑀢𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸.

𑁩𑁯𑁧. 𑀫𑀭𑀡𑁂 𑀲𑀢𑀺 𑀦𑀸𑀫𑁂𑀓𑀸, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺;

𑀆𑀦𑀸𑀧𑀸𑀦𑀲𑀢𑀺𑀘𑁆𑀘𑁂𑀯𑀁, 𑀤𑀲𑀥𑀸𑀦𑀼𑀲𑁆𑀲𑀢𑀻𑀭𑀺𑀢𑀸.

𑁩𑁯𑁨. 𑀫𑁂𑀢𑁆𑀢𑀸 𑀓𑀭𑀼𑀡𑀸 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸 𑀪𑀸𑀯𑀦𑀸𑀢𑀺 𑀘;

𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘, 𑀅𑀧𑁆𑀧𑀫𑀜𑁆𑀜𑀸𑀢𑀺 𑀪𑀸𑀲𑀺𑀢𑀸.

𑁩𑁯𑁩. 𑀆𑀳𑀸𑀭𑁂 𑀢𑀼 𑀧𑀝𑀺𑀓𑁆𑀓𑀽𑀮-𑀲𑀜𑁆𑀜𑁂𑀓𑀸𑀢𑀺 𑀧𑀓𑀸𑀲𑀺𑀢𑀸;

𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀘𑀢𑀼𑀥𑀸𑀢𑀼𑀧𑀭𑀺𑀕𑁆𑀕𑀳𑁄.

𑁩𑁯𑁪. 𑀘𑀢𑁆𑀢𑀸𑀭𑁄𑀭𑀼𑀧𑁆𑀧𑀓𑀸 𑀘𑁂𑀢𑀺, 𑀘𑀢𑁆𑀢𑀸𑀮𑀻𑀲 𑀲𑀫𑀸𑀲𑀢𑁄;

𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀲𑀫𑀣𑁂 𑀪𑀸𑀯𑀦𑀸𑀦𑀬𑁂.

𑁩𑁯𑁫. 𑀆𑀦𑀸𑀧𑀸𑀦𑀜𑁆𑀘 𑀓𑀲𑀺𑀡𑀁, 𑀧𑀜𑁆𑀘𑀓𑀚𑁆𑀛𑀸𑀦𑀺𑀓𑀁 𑀢𑀳𑀺𑀁;

𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀼𑀢𑁆𑀢𑀸, 𑀓𑁄𑀝𑁆𑀞𑀸𑀲𑀸𑀲𑀼𑀪𑀪𑀸𑀯𑀦𑀸.

𑁩𑁯𑁬. 𑀫𑁂𑀢𑁆𑀢𑀸𑀤𑀬𑁄 𑀘𑀢𑀼𑀚𑁆𑀛𑀸𑀦𑀸, 𑀉𑀧𑁂𑀓𑁆𑀔𑀸 𑀧𑀜𑁆𑀘𑀫𑀻 𑀫𑀢𑀸;

𑀆𑀭𑀼𑀧𑁆𑀧𑀸𑀭𑀼𑀧𑁆𑀧𑀓𑀸 𑀲𑁂𑀲𑀸, 𑀉𑀧𑀘𑀸𑀭𑀲𑀫𑀸𑀥𑀺𑀓𑀸.

𑁩𑁯𑁭. 𑀓𑀲𑀺𑀡𑀸𑀲𑀼𑀪𑀓𑁄𑀝𑁆𑀞𑀸𑀲𑁂,

𑀆𑀦𑀸𑀧𑀸𑀦𑁂 𑀘 𑀚𑀸𑀬𑀢𑀺;

𑀧𑀝𑀺𑀪𑀸𑀕𑁄 𑀢𑀫𑀸𑀭𑀩𑁆𑀪,

𑀢𑀢𑁆𑀣 𑀯𑀢𑁆𑀢𑀢𑀺 𑀅𑀧𑁆𑀧𑀦𑀸.

𑁩𑁯𑁮. 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀲𑁂𑀲𑁂𑀲𑀼, 𑀧𑀝𑀺𑀪𑀸𑀕𑁄 𑀦 𑀯𑀺𑀚𑁆𑀚𑀢𑀺;