𑁪. 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄

𑀧𑀓𑀺𑀡𑁆𑀡𑀓𑀯𑀺𑀪𑀸𑀕𑁄

𑁨𑁧𑁧. 𑀇𑀢𑁄 𑀧𑀭𑀁 𑀓𑀺𑀘𑁆𑀘𑀢𑁄 𑀘, 𑀤𑁆𑀯𑀸𑀭𑀸𑀮𑀫𑁆𑀩𑀡𑀯𑀢𑁆𑀣𑀼𑀢𑁄;

𑀪𑀽𑀫𑀺𑀧𑀼𑀕𑁆𑀕𑀮𑀢𑁄 𑀞𑀸𑀦𑀸, 𑀚𑀦𑀓𑀸 𑀘 𑀬𑀣𑀸𑀭𑀳𑀁.

𑁨𑁧𑁨. 𑀲𑀗𑁆𑀕𑀳𑁄 𑀘 𑀧𑀯𑀢𑁆𑀢𑀺 𑀘, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀲𑀼;

𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯, 𑀲𑀁𑀔𑀺𑀧𑀺𑀢𑁆𑀯𑀸𑀦 𑀦𑀺𑀬𑁆𑀬𑀢𑁂.

𑁨𑁧𑁩. 𑀭𑀽𑀧𑀸𑀭𑀽𑀧𑀫𑀳𑀸𑀧𑀸𑀓𑀸, 𑀫𑀼𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀘𑀼𑀢𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀺, 𑀘𑀺𑀢𑁆𑀢𑀸𑀦𑁂𑀓𑀽𑀦𑀯𑀻𑀲𑀢𑀺.

𑁨𑁧𑁪. 𑀆𑀯𑀚𑁆𑀚𑀦𑀁 𑀢𑀼 𑀬𑀼𑀕𑀴𑀁, 𑀤𑀲𑁆𑀲𑀦𑀁 𑀲𑀯𑀦𑀁 𑀢𑀣𑀸;

𑀖𑀸𑀬𑀦𑀁 𑀲𑀸𑀬𑀦𑀜𑁆𑀘𑁂𑀯, 𑀨𑀼𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁.

𑁨𑁧𑁫. 𑀢𑀻𑀡𑀺 𑀢𑀻𑀭𑀡𑀘𑀺𑀢𑁆𑀢𑀸𑀦𑀺, 𑀏𑀓𑀁 𑀯𑁄𑀝𑁆𑀞𑀩𑁆𑀩𑀦𑀁 𑀫𑀢𑀁;

𑀧𑀜𑁆𑀘𑀤𑁆𑀯𑀸𑀭𑁂 𑀫𑀦𑁄𑀤𑁆𑀯𑀸𑀭𑁂, 𑀢𑀤𑀸𑀯𑀚𑁆𑀚𑀦𑀦𑀸𑀫𑀓𑀁.

𑁨𑁧𑁬. 𑀧𑀜𑁆𑀘𑀧𑀜𑁆𑀜𑀸𑀲 𑀚𑀯𑀦𑀓𑀺𑀘𑁆𑀘𑀸𑀦𑀻𑀢𑀺 𑀯𑀺𑀦𑀺𑀤𑁆𑀤𑀺𑀲𑁂;

𑀓𑁆𑀭𑀺𑀬𑀸 𑀘𑀸𑀯𑀚𑁆𑀚𑀦𑀁 𑀳𑀺𑀢𑁆𑀯𑀸, 𑀓𑀼𑀲𑀮𑀸𑀓𑀼𑀲𑀮𑀧𑁆𑀨𑀮𑀁.

𑁨𑁧𑁭. 𑀢𑀤𑀸𑀮𑀫𑁆𑀩𑀡𑀘𑀺𑀢𑁆𑀢𑀸𑀦𑀺, 𑀪𑀯𑀦𑁆𑀢𑁂𑀓𑀸𑀤𑀲𑁂𑀯 𑀳𑀺;

𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀅𑀝𑁆𑀞 𑀲𑀦𑁆𑀢𑀻𑀭𑀡𑀢𑁆𑀢𑀬𑀁.

𑁨𑁧𑁮. 𑀧𑀜𑁆𑀘𑀓𑀺𑀘𑁆𑀘𑀦𑁆𑀢𑀺 𑀪𑀸𑀲𑀦𑁆𑀢𑀺, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀘𑀢𑀼𑀓𑀺𑀘𑁆𑀘𑀸 𑀫𑀳𑀸𑀧𑀸𑀓𑀸, 𑀢𑀺𑀓𑀓𑀺𑀘𑁆𑀘𑀸 𑀫𑀳𑀕𑁆𑀕𑀢𑀸.

𑁨𑁧𑁯. 𑀤𑀼𑀓𑀺𑀘𑁆𑀘𑀫𑀺𑀢𑀺 𑀯𑁄𑀝𑁆𑀞𑀩𑁆𑀩𑀁, 𑀲𑀼𑀔𑀢𑀻𑀭𑀡𑀫𑀻𑀭𑀺𑀢𑀁;

𑀧𑀜𑁆𑀘𑀯𑀺𑀜𑁆𑀜𑀸𑀡𑀚𑀯𑀦𑀫𑀦𑁄𑀥𑀸𑀢𑀼𑀢𑁆𑀢𑀺𑀓𑀁 𑀧𑀦.

𑁨𑁨𑁦. 𑀏𑀓𑀓𑀺𑀘𑁆𑀘𑀸𑀢𑀺 𑀪𑀸𑀲𑀦𑁆𑀢𑀺, 𑀅𑀝𑁆𑀞𑀲𑀝𑁆𑀞𑀺 𑀯𑀺𑀪𑀸𑀯𑀺𑀦𑁄;

𑀇𑀘𑁆𑀘𑁂𑀯𑀁 𑀓𑀺𑀘𑁆𑀘𑀪𑁂𑀤𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀯𑀢𑁆𑀣𑀺𑀢𑀸.

𑁨𑁨𑁧. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀥𑀸𑀢𑀼 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀤𑁆𑀯𑀸𑀭𑀸 𑀪𑀯𑀗𑁆𑀕𑀁 𑀢𑀼, 𑀫𑀦𑁄𑀤𑁆𑀯𑀸𑀭𑀁 𑀧𑀯𑀼𑀘𑁆𑀘𑀢𑀺.

𑁨𑁨𑁨. 𑀖𑀸𑀦𑀸𑀤𑀬𑁄 𑀢𑀬𑁄 𑀭𑀽𑀧𑁂, 𑀧𑀜𑁆𑀘 𑀘𑀓𑁆𑀔𑀸𑀤𑀬𑁄 𑀢𑀣𑀸;

𑀅𑀭𑀽𑀧𑁂 𑀦𑀢𑁆𑀣𑀼𑀪𑀬𑀢𑁆𑀣, 𑀢𑀤𑀸𑀮𑀫𑁆𑀩𑀡𑀫𑀸𑀦𑀲𑀁.

𑁨𑁨𑁩. 𑀙 𑀤𑁆𑀯𑀸𑀭𑀸 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀲𑀢𑁆𑀢 𑀓𑀸𑀫𑀻𑀲𑀼 𑀭𑀽𑀧𑀺𑀲𑀼;

𑀤𑁆𑀯𑀸𑀭𑀢𑁆𑀢𑀬𑀁 𑀙 𑀘𑀺𑀢𑁆𑀢𑀸𑀦𑀺, 𑀫𑀦𑁄𑀤𑁆𑀯𑀸𑀭𑀫𑀭𑀽𑀧𑀺𑀲𑀼.

𑁨𑁨𑁪. 𑀧𑀝𑀺𑀲𑀦𑁆𑀥𑀸𑀤𑀺𑀪𑀽𑀢𑀸 𑀳𑀺, 𑀅𑀯𑀲𑀸𑀦𑁂 𑀘𑀼𑀢𑀺𑀝𑁆𑀞𑀺𑀢𑀸;

𑀫𑀚𑁆𑀛𑁂 𑀪𑀯𑀗𑁆𑀕𑀁 𑀙𑁂𑀢𑁆𑀯𑀸𑀦, 𑀧𑀘𑁆𑀘𑁂𑀓𑀁 𑀯𑀻𑀣𑀺 𑀚𑀸𑀬𑀢𑀺.

𑁨𑁨𑁫. 𑀭𑀽𑀧𑀸𑀤𑀸𑀭𑀫𑁆𑀫𑀡𑁂 𑀘𑀓𑁆𑀔𑀼-𑀧𑀲𑀸𑀤𑀸𑀤𑀺𑀫𑁆𑀳𑀺 𑀖𑀝𑁆𑀝𑀺𑀢𑁂;

𑀆𑀯𑀚𑁆𑀚𑀦𑀸𑀤𑀬𑁄 𑀳𑁄𑀦𑁆𑀢𑀺, 𑀪𑀯𑀗𑁆𑀕𑀤𑁆𑀯𑀺𑀘𑀮𑀸 𑀧𑀭𑀁.

𑁨𑁨𑁬. 𑀧𑀭𑀺𑀡𑀸𑀫𑁂 𑀪𑀯𑀗𑁆𑀕𑀲𑁆𑀲, 𑀆𑀮𑀫𑁆𑀩𑁂 𑀕𑀳𑀡𑀸𑀭𑀳𑁂;

𑀢𑀣𑀸 𑀯𑀻𑀣𑀺 𑀫𑀦𑁄𑀤𑁆𑀯𑀸𑀭𑁂, 𑀬𑀣𑀸𑀲𑀫𑁆𑀪𑀯𑀢𑁄 𑀪𑀯𑁂.

𑁨𑁨𑁭. 𑀆𑀯𑀚𑁆𑀚𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀁, 𑀲𑀫𑁆𑀧𑀝𑀺𑀘𑁆𑀙𑀦𑀢𑀻𑀭𑀡𑀁;

𑀯𑁄𑀝𑁆𑀞𑀩𑁆𑀩𑀓𑀸𑀫𑀚𑀯𑀦𑀁, 𑀢𑀤𑀸𑀮𑀫𑁆𑀩𑀡𑀫𑀸𑀦𑀲𑀁.

𑁨𑁨𑁮. 𑀲𑀢𑁆𑀢𑁂𑀯𑀁 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀢𑀼𑀤𑁆𑀤𑀲;

𑀘𑀢𑀼𑀧𑀜𑁆𑀜𑀸𑀲 𑀯𑀺𑀢𑁆𑀣𑀸𑀭𑀸, 𑀧𑀜𑁆𑀘𑀤𑁆𑀯𑀸𑀭𑁂 𑀬𑀣𑀸𑀭𑀳𑀁.

𑁨𑁨𑁯. 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀪𑀗𑁆𑀕𑀸𑀦𑀁, 𑀯𑀲𑀸 𑀘𑀺𑀢𑁆𑀢𑀓𑁆𑀔𑀡𑀁 𑀢𑀬𑀁;

𑀭𑀽𑀧𑀸𑀦𑀁 𑀞𑀺𑀢𑀺 𑀏𑀓𑀽𑀦-𑀧𑀜𑁆𑀜𑀸𑀲𑀜𑁆𑀘 𑀤𑀼𑀓𑁂 𑀤𑀼𑀓𑀁.

𑁨𑁩𑁦. 𑀧𑀭𑀺𑀢𑁆𑀢𑁂𑀢𑀺𑀧𑀭𑀺𑀢𑁆𑀢𑁂 𑀘, 𑀫𑀳𑀦𑁆𑀢𑁂𑀢𑀺𑀫𑀳𑀦𑁆𑀢𑀓𑁂;

𑀯𑁄𑀝𑁆𑀞𑀩𑁆𑀩𑀫𑁄𑀖𑀚𑀯𑀦𑀁, 𑀢𑀤𑀸𑀮𑀫𑁆𑀩𑀦𑁆𑀢𑀺 𑀢𑀁 𑀓𑀫𑀸.

𑁨𑁩𑁧. 𑀆𑀯𑀚𑁆𑀚𑀦𑀜𑁆𑀘 𑀚𑀯𑀦𑀁, 𑀫𑀦𑁄𑀤𑁆𑀯𑀸𑀭𑁂 𑀢𑀼 𑀕𑁄𑀘𑀭𑁂;

𑀯𑀺𑀪𑀽𑀢𑁂 𑀢𑀼 𑀢𑀤𑀸𑀮𑀫𑁆𑀩𑀁, 𑀯𑀺𑀢𑁆𑀣𑀸𑀭𑀸 𑀲𑀢𑁆𑀢𑀲𑀝𑁆𑀞𑀺 𑀢𑁂.

𑁨𑁩𑁨. 𑀓𑀸𑀫𑁂 𑀚𑀯𑀦𑀲𑀢𑁆𑀢𑀸𑀮-𑀫𑁆𑀩𑀡𑀸𑀦𑀁 𑀦𑀺𑀬𑀫𑁂 𑀲𑀢𑀺;

𑀯𑀺𑀪𑀽𑀢𑁂𑀢𑀺𑀫𑀳𑀦𑁆𑀢𑁂 𑀘, 𑀢𑀤𑀸𑀮𑀫𑁆𑀩𑀡𑀫𑀻𑀭𑀺𑀢𑀁.

𑁨𑁩𑁩. 𑀧𑀜𑁆𑀘𑀤𑁆𑀯𑀸𑀭𑁂 𑀫𑀦𑁄𑀥𑀸𑀢𑀼, 𑀧𑀘𑁆𑀘𑁂𑀓𑀫𑁆𑀳𑀺 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀧𑀘𑁆𑀘𑁂𑀓𑀁 𑀢𑀼 𑀧𑀓𑀸𑀲𑀺𑀢𑀁.

𑁨𑁩𑁪. 𑀫𑀦𑁄𑀤𑁆𑀯𑀸𑀭𑁂 𑀢𑀼 𑀚𑀯𑀦𑀁, 𑀫𑀳𑀕𑁆𑀕𑀢𑀫𑀦𑀼𑀢𑁆𑀢𑀭𑀁;

𑀲𑀼𑀔𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀁, 𑀧𑀭𑀺𑀢𑁆𑀢𑀚𑀯𑀦𑀁 𑀙𑀲𑀼.

𑁨𑁩𑁫. 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺, 𑀉𑀧𑁂𑀓𑁆𑀔𑀸𑀢𑀻𑀭𑀡𑀤𑁆𑀯𑀬𑀁;

𑀙𑀲𑀼 𑀤𑁆𑀯𑀸𑀭𑁂𑀲𑀼 𑀚𑀸𑀬𑀦𑁆𑀢𑀺, 𑀯𑀻𑀣𑀺𑀫𑀼𑀢𑁆𑀢𑀸𑀦𑀺 𑀘𑁂𑀓𑀤𑀸.

𑁨𑁩𑁬. 𑀲𑀢𑁆𑀢𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺, 𑀯𑀺𑀧𑀸𑀓𑀸 𑀢𑀼 𑀫𑀳𑀕𑁆𑀕𑀢𑀸;

𑀦𑀯 𑀯𑀻𑀣𑀺𑀯𑀺𑀫𑀼𑀢𑁆𑀢𑀸 𑀘, 𑀤𑀼𑀯𑀺𑀥𑀸𑀧𑀺 𑀤𑀲𑀻𑀭𑀺𑀢𑀸.

𑁨𑁩𑁭. 𑀇𑀘𑁆𑀘𑁂𑀯𑀁 𑀤𑁆𑀯𑀸𑀭𑀪𑁂𑀤𑁂𑀦, 𑀯𑀺𑀪𑀸𑀯𑁂𑀢𑁆𑀯𑀸 𑀢𑀢𑁄 𑀧𑀭𑀁;

𑀜𑁂𑀬𑁆𑀬𑀸 𑀕𑁄𑀘𑀭𑀪𑁂𑀤𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀬𑀣𑀸𑀭𑀳𑀁.

𑁨𑁩𑁮. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀧𑀜𑁆𑀘 𑀕𑁄𑀘𑀭𑀸;

𑀲𑁂𑀲𑀜𑁆𑀘 𑀭𑀽𑀧𑀧𑀜𑁆𑀜𑀢𑁆𑀢𑀺𑀦𑀸𑀫𑀜𑁆𑀘 𑀥𑀫𑁆𑀫𑀕𑁄𑀘𑀭𑀁.

𑁨𑁩𑁯. 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀢𑀫𑀸𑀦𑀁, 𑀧𑀜𑁆𑀘𑀸𑀮𑀫𑁆𑀩𑀁 𑀬𑀣𑀸𑀓𑁆𑀓𑀫𑀁;

𑀙𑀸𑀮𑀫𑁆𑀩𑀡𑀁 𑀫𑀦𑁄𑀤𑁆𑀯𑀸𑀭𑁂, 𑀅𑀢𑀻𑀢𑀸𑀦𑀸𑀕𑀢𑀫𑁆𑀧𑀺 𑀘.

𑁨𑁪𑁦. 𑀧𑀜𑁆𑀜𑀢𑁆𑀢𑀸𑀢𑀻𑀢𑀯𑀢𑁆𑀢𑀦𑁆𑀢𑀁, 𑀙𑀤𑁆𑀯𑀸𑀭𑀕𑁆𑀕𑀳𑀺𑀢𑀁 𑀧𑀦;

𑀙𑀴𑀸𑀭𑀫𑁆𑀫𑀡𑀲𑀗𑁆𑀔𑀸𑀢𑀁, 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑁂.

𑁨𑁪𑁧. 𑀦𑀺𑀫𑀺𑀢𑁆𑀢𑀕𑀢𑀺𑀓𑀫𑁆𑀫𑀸𑀦𑀁, 𑀓𑀫𑁆𑀫𑀫𑁂𑀯𑀸𑀣 𑀕𑁄𑀘𑀭𑀁;

𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀘𑀼𑀢𑀺𑀬𑀸𑀯 𑀬𑀣𑀸𑀭𑀳𑀁.

𑁨𑁪𑁨. 𑀧𑀜𑁆𑀘𑀸𑀮𑀫𑁆𑀩𑁂 𑀫𑀦𑁄𑀥𑀸𑀢𑀼, 𑀧𑀘𑁆𑀘𑁂𑀓𑀫𑁆𑀳𑀺 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀧𑀘𑁆𑀘𑁂𑀓𑀁 𑀢𑀼 𑀧𑀓𑀸𑀲𑀺𑀢𑀁.

𑁨𑁪𑁩. 𑀓𑀸𑀫𑀧𑀸𑀓𑀸𑀦𑀺 𑀲𑁂𑀲𑀸𑀦𑀺, 𑀳𑀲𑀦𑀜𑁆𑀘 𑀧𑀭𑀺𑀢𑁆𑀢𑀓𑁂;

𑀜𑀸𑀡𑀳𑀻𑀦𑀸𑀦𑀺𑀧𑀼𑀜𑁆𑀜𑀸𑀦𑀺, 𑀚𑀯𑀦𑀸𑀦𑀺 𑀅𑀦𑀺𑀫𑁆𑀫𑀮𑁂.

𑁨𑁪𑁪. 𑀢𑀺𑀳𑁂𑀢𑀼𑀓𑀸𑀫𑀧𑀼𑀜𑁆𑀜𑀸𑀦𑀺, 𑀧𑀼𑀜𑁆𑀜𑀸𑀪𑀺𑀜𑁆𑀜𑀸 𑀘 𑀮𑁄𑀓𑀺𑀬𑀸;

𑀲𑀩𑁆𑀩𑀸𑀮𑀫𑁆𑀩𑁂 𑀧𑀯𑀢𑁆𑀢𑀦𑁆𑀢𑀺, 𑀅𑀕𑁆𑀕𑀫𑀕𑁆𑀕𑀨𑀮𑀁 𑀯𑀺𑀦𑀸.

𑁨𑁪𑁫. 𑀓𑁆𑀭𑀺𑀬𑀸𑀪𑀺𑀜𑁆𑀜𑀸 𑀘 𑀯𑁄𑀝𑁆𑀞𑀩𑁆𑀩𑀁, 𑀓𑁆𑀭𑀺𑀬𑀸 𑀓𑀸𑀫𑁂 𑀢𑀺𑀳𑁂𑀢𑀼𑀓𑀸;

𑀲𑀩𑁆𑀩𑀸𑀮𑀫𑁆𑀩𑁂 𑀧𑀯𑀢𑁆𑀢𑀦𑁆𑀢𑀺, 𑀦𑀺𑀩𑁆𑀩𑀸𑀦𑁂 𑀦𑀺𑀫𑁆𑀫𑀮𑀸 𑀲𑀺𑀬𑀼𑀁.

𑁨𑁪𑁬. 𑀤𑀼𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘, 𑀆𑀭𑀼𑀧𑁆𑀧𑁂𑀲𑀼 𑀫𑀳𑀕𑁆𑀕𑀢𑁂;

𑀫𑀳𑀕𑁆𑀕𑀢𑀜𑁆𑀜𑁂 𑀯𑁄𑀳𑀸𑀭𑁂, 𑀅𑀬𑀫𑀸𑀮𑀫𑁆𑀩𑀡𑁂 𑀦𑀬𑁄.

𑁨𑁪𑁭. 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸-𑀓𑀸𑀬𑀳𑀤𑀬𑀯𑀢𑁆𑀣𑀼𑀦𑀸;

𑀓𑀸𑀫𑀮𑁄𑀓𑁂 𑀙𑀯𑀢𑁆𑀣𑀽𑀦𑀺, 𑀦𑀺𑀲𑁆𑀲𑀺𑀢𑀸 𑀲𑀢𑁆𑀢 𑀥𑀸𑀢𑀼𑀬𑁄.

𑁨𑁪𑁮. 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀸𑀢𑀽 𑀘, 𑀢𑀸𑀲𑀁 𑀧𑀼𑀩𑁆𑀩𑀸𑀧𑀭𑀢𑁆𑀢𑀬𑀁;

𑀫𑀦𑁄𑀥𑀸𑀢𑀼 𑀢𑀢𑁄 𑀲𑁂𑀲𑀸, 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘.

𑁨𑁪𑁯. 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀭𑀽𑀧𑁂, 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀺𑀢𑀸;

𑀅𑀭𑀽𑀧𑁂 𑀢𑀼 𑀅𑀦𑀺𑀲𑁆𑀲𑀸𑀬, 𑀥𑀸𑀢𑁆𑀯𑁂𑀓𑀸𑀯 𑀧𑀯𑀢𑁆𑀢𑀢𑀺.

𑁨𑁫𑁦. 𑀧𑀜𑁆𑀘𑀧𑁆𑀧𑀲𑀸𑀤𑁂 𑀦𑀺𑀲𑁆𑀲𑀸𑀬, 𑀧𑀘𑁆𑀘𑁂𑀓𑀁 𑀢𑀼 𑀬𑀣𑀸𑀓𑁆𑀓𑀫𑀁;

𑀧𑀜𑁆𑀘𑀯𑀺𑀜𑁆𑀜𑀸𑀡𑀬𑀼𑀕𑀴𑀁, 𑀪𑀯𑀢𑀻𑀢𑀺 𑀧𑀓𑀸𑀲𑀺𑀢𑀁.

𑁨𑁫𑁧. 𑀓𑀸𑀫𑀧𑀸𑀓𑀸𑀦𑀺 𑀲𑁂𑀲𑀸𑀦𑀺, 𑀫𑀕𑁆𑀕𑀸𑀯𑀚𑁆𑀚𑀦𑀫𑀸𑀤𑀺𑀢𑁄;

𑀳𑀲𑀦𑀁 𑀧𑀝𑀺𑀖𑀸𑀭𑀽𑀧𑀸-𑀯𑀘𑀭𑀁 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁.

𑁨𑁫𑁨. 𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀸𑀬, 𑀅𑀦𑀺𑀲𑁆𑀲𑀸𑀬 𑀘 𑀚𑀸𑀬𑀭𑁂;

𑀅𑀦𑀺𑀲𑁆𑀲𑀸𑀬 𑀯𑀺𑀧𑀸𑀓𑀸𑀦𑀺, 𑀆𑀭𑀼𑀧𑁆𑀧𑁂𑀢𑀺 𑀲𑀫𑀻𑀭𑀺𑀢𑀁.

𑁨𑁫𑁩. 𑀇𑀘𑁆𑀘𑁂𑀯𑀁 𑀯𑀢𑁆𑀣𑀼𑀪𑁂𑀤𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸;

𑀢𑀢𑁄 𑀧𑀭𑀁 𑀯𑀺𑀪𑀸𑀯𑁂𑀬𑁆𑀬, 𑀪𑀽𑀫𑀺𑀪𑁂𑀤𑁂𑀦 𑀧𑀡𑁆𑀟𑀺𑀢𑁄.

𑁨𑁫𑁪. 𑀦𑀺𑀭𑀬𑁂 𑀧𑁂𑀢𑀮𑁄𑀓𑁂 𑀘, 𑀢𑀺𑀭𑀘𑁆𑀙𑀸𑀦𑀸𑀲𑀼𑀭𑁂 𑀢𑀣𑀸;

𑀧𑀸𑀧𑀓𑀫𑁆𑀫𑁄𑀧𑀧𑀚𑁆𑀚𑀦𑁆𑀢𑀺, 𑀧𑀸𑀧𑀧𑀸𑀓𑀸𑀬 𑀲𑀦𑁆𑀥𑀺𑀬𑀸.

𑁨𑁫𑁫. 𑀪𑀽𑀫𑀺𑀲𑁆𑀲𑀺𑀢𑁂𑀲𑀼 𑀤𑁂𑀯𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼𑀧𑀺 𑀳𑀻𑀦𑀓𑀸;

𑀅𑀳𑁂𑀢𑀼𑀓𑀸𑀬 𑀚𑀸𑀬𑀦𑁆𑀢𑀺, 𑀧𑀼𑀜𑁆𑀜𑀧𑀸𑀓𑀸𑀬 𑀲𑀦𑁆𑀥𑀺𑀬𑀸.

𑁨𑁫𑁬. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀘, 𑀢𑀸𑀯𑀢𑀺𑀁𑀲𑀸 𑀘 𑀬𑀸𑀫𑀓𑀸;

𑀢𑀼𑀲𑀺𑀢𑀸 𑀘𑁂𑀯 𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀯𑀲𑀯𑀢𑁆𑀢𑀺𑀦𑁄.

𑁨𑁫𑁭. 𑀇𑀘𑁆𑀘𑁂𑀯𑀁 𑀙𑀲𑀼 𑀤𑁂𑀯𑁂𑀲𑀼, 𑀫𑀦𑀼𑀲𑁆𑀲𑁂𑀲𑀼 𑀘 𑀚𑀸𑀬𑀭𑁂;

𑀫𑀳𑀸𑀯𑀺𑀧𑀸𑀓𑀲𑀦𑁆𑀥𑀻𑀳𑀺, 𑀓𑀸𑀫𑀧𑀼𑀜𑁆𑀜𑀓𑀢𑀸 𑀚𑀦𑀸.

𑁨𑁫𑁮. 𑀩𑁆𑀭𑀳𑁆𑀫𑀸𑀦𑀁 𑀧𑀸𑀭𑀺𑀲𑀚𑁆𑀚𑀸 𑀘, 𑀢𑀣𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸;

𑀫𑀳𑀸𑀩𑁆𑀭𑀳𑁆𑀫𑀸 𑀘 𑀚𑀸𑀬𑀦𑁆𑀢𑀺, 𑀧𑀞𑀫𑀚𑁆𑀛𑀸𑀦𑀲𑀦𑁆𑀥𑀺𑀬𑀸.

𑁨𑁫𑁯. 𑀧𑀭𑀺𑀢𑁆𑀢𑀸 𑀅𑀧𑁆𑀧𑀫𑀸𑀡𑀸𑀪𑀸, 𑀚𑀸𑀬𑀦𑁆𑀢𑀸𑀪𑀲𑁆𑀲𑀭𑀸 𑀢𑀣𑀸;

𑀤𑀼𑀢𑀺𑀬𑀚𑁆𑀛𑀸𑀦𑀧𑀸𑀓𑀸𑀬, 𑀢𑀢𑀺𑀬𑀸𑀬 𑀘 𑀲𑀦𑁆𑀥𑀺𑀬𑀸.

𑁨𑁬𑁦. 𑀧𑀭𑀺𑀢𑁆𑀢𑀲𑀼𑀪𑀧𑁆𑀧𑀫𑀸𑀡𑀲𑀼𑀪𑀸 𑀘 𑀲𑀼𑀪𑀓𑀺𑀡𑁆𑀳𑀓𑀸;

𑀘𑀢𑀼𑀢𑁆𑀣𑀸𑀬 𑀢𑀼 𑀚𑀸𑀬𑀦𑁆𑀢𑀺, 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸.

𑁨𑁬𑁧. 𑀯𑁂𑀳𑀧𑁆𑀨𑀮𑀸 𑀅𑀲𑀜𑁆𑀜𑀻 𑀘, 𑀲𑀼𑀤𑁆𑀥𑀸𑀯𑀸𑀲𑀸𑀢𑀺 𑀲𑀢𑁆𑀢𑀲𑀼;

𑀧𑀜𑁆𑀘𑀫𑀸𑀬 𑀘 𑀚𑀸𑀬𑀦𑁆𑀢𑀺, 𑀅𑀲𑀜𑁆𑀜𑀻𑀘𑀺𑀢𑁆𑀢𑀯𑀚𑁆𑀚𑀺𑀢𑀸.

𑁨𑁬𑁨. 𑀅𑀯𑀺𑀳𑀸 𑀘 𑀅𑀢𑀧𑁆𑀧𑀸 𑀘, 𑀲𑀼𑀤𑀲𑁆𑀲𑀸 𑀘 𑀲𑀼𑀤𑀲𑁆𑀲𑀺𑀦𑁄;

𑀅𑀓𑀦𑀺𑀝𑁆𑀞𑀸𑀢𑀺 𑀧𑀜𑁆𑀘𑁂𑀢𑁂, 𑀲𑀼𑀤𑁆𑀥𑀸𑀯𑀸𑀲𑀸 𑀧𑀓𑀸𑀲𑀺𑀢𑀸.

𑁨𑁬𑁩. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀸𑀓𑀸𑀤𑀻𑀳𑀺 𑀬𑀣𑀸𑀓𑁆𑀓𑀫𑀁;

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺𑀓𑀸𑀤𑀻𑀲𑀼 𑀚𑀸𑀬𑀭𑁂.

𑁨𑁬𑁪. 𑀘𑀼𑀢𑀺𑀲𑀦𑁆𑀥𑀺𑀪𑀯𑀗𑁆𑀕𑀸𑀦𑀁, 𑀯𑀲𑀸 𑀧𑀸𑀓𑀸 𑀫𑀳𑀕𑁆𑀕𑀢𑀸;

𑀓𑀸𑀫𑁂 𑀲𑀳𑁂𑀢𑀼𑀓𑀸 𑀧𑀸𑀓𑀸, 𑀢𑀤𑀸𑀮𑀫𑁆𑀩𑀡𑀢𑁄𑀧𑀺 𑀘.

𑁨𑁬𑁫. 𑀬𑀣𑀸𑀯𑀼𑀢𑁆𑀢𑀦𑀺𑀬𑀸𑀫𑁂𑀦, 𑀪𑀽𑀫𑀻𑀲𑁆𑀯𑁂𑀓𑀸𑀯 𑀚𑀸𑀬𑀭𑁂;

𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀩𑁆𑀩𑀢𑁆𑀣, 𑀦 𑀢𑁆𑀯𑁂𑀯𑀸𑀲𑀜𑁆𑀜𑀺𑀦𑁄 𑀫𑀢𑀸.

𑁨𑁬𑁬. 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀥𑀸𑀢𑀼-𑀦𑀺𑀲𑁆𑀲𑀺𑀢𑀁 𑀫𑀸𑀦𑀲𑀁 𑀢𑀣𑀸;

𑀧𑀝𑀺𑀖𑀤𑁆𑀯𑀬𑀫𑀺𑀘𑁆𑀘𑁂𑀯𑀫𑀝𑁆𑀞 𑀳𑁄𑀦𑁆𑀢𑁂𑀯 𑀓𑀸𑀫𑀺𑀲𑀼.

𑁨𑁬𑁭. 𑀘𑀓𑁆𑀔𑀼𑀲𑁄𑀢𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀫𑀦𑁄𑀥𑀸𑀢𑀼 𑀘 𑀢𑀻𑀭𑀡𑀁;

𑀓𑀸𑀫𑀭𑀽𑀧𑁂𑀲𑀼 𑀚𑀸𑀬𑀦𑁆𑀢𑀺, 𑀬𑀣𑀸𑀲𑀫𑁆𑀪𑀯𑀢𑁄 𑀤𑀲.

𑁨𑁬𑁮. 𑀯𑁄𑀝𑁆𑀞𑀩𑁆𑀩𑀓𑀸𑀫𑀧𑀼𑀜𑁆𑀜𑀸𑀦𑀺, 𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀺 𑀤𑀺𑀝𑁆𑀞𑀺𑀬𑀸;

𑀉𑀤𑁆𑀥𑀘𑁆𑀘𑀲𑀳𑀺𑀢𑀜𑁆𑀘𑁂𑀢𑀺, 𑀲𑀩𑁆𑀩𑀢𑁆𑀣𑁂𑀢𑀸𑀦𑀺 𑀘𑀼𑀤𑁆𑀤𑀲.

𑁨𑁬𑁯. 𑀓𑀗𑁆𑀔𑀺𑀢𑀁 𑀤𑀺𑀝𑁆𑀞𑀺𑀬𑀼𑀢𑁆𑀢𑀸𑀦𑀺, 𑀲𑀼𑀤𑁆𑀥𑀸𑀯𑀸𑀲𑀯𑀺𑀯𑀚𑁆𑀚𑀺𑀢𑁂;

𑀲𑀺𑀢𑀜𑁆𑀘 𑀭𑀽𑀧𑀚𑀯𑀦-𑀫𑀸𑀭𑀼𑀧𑁆𑀧𑀸𑀧𑀸𑀬𑀯𑀚𑁆𑀚𑀺𑀢𑁂.

𑁨𑁭𑁦. 𑀓𑀸𑀫𑀓𑁆𑀭𑀺𑀬𑀸 𑀲𑀳𑁂𑀢𑀽 𑀘, 𑀉𑀤𑁆𑀥𑀁 𑀮𑁄𑀓𑀼𑀢𑁆𑀢𑀭𑀢𑁆𑀢𑀬𑀁;

𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀚𑀯𑀦𑀁, 𑀲𑀩𑁆𑀩𑀢𑁆𑀣𑀸𑀧𑀸𑀬𑀯𑀚𑁆𑀚𑀺𑀢𑁂.

𑁨𑁭𑁧. 𑀲𑁂𑀲𑀫𑀸𑀭𑀼𑀧𑁆𑀧𑀚𑀯𑀦𑀁, 𑀳𑀺𑀢𑁆𑀯𑀸𑀧𑀸𑀬𑀁 𑀬𑀣𑀸𑀓𑁆𑀓𑀫𑀁;

𑀉𑀤𑁆𑀥𑀫𑀸𑀭𑀼𑀧𑁆𑀧𑀪𑀽𑀫𑀺𑀜𑁆𑀘, 𑀚𑀸𑀬𑀢𑀻𑀢𑀺 𑀯𑀺𑀪𑀸𑀯𑀬𑁂.

𑁨𑁭𑁨. 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺, 𑀘𑀢𑁆𑀢𑀸𑀭𑀸𑀦𑀼𑀢𑁆𑀢𑀭𑀸𑀦𑀺 𑀢𑀼;

𑀲𑀼𑀤𑁆𑀥𑀸𑀯𑀸𑀲𑀫𑀧𑀸𑀬𑀜𑁆𑀘, 𑀳𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀚𑀸𑀬𑀭𑁂.

𑁨𑁭𑁩. 𑀲𑀼𑀤𑁆𑀥𑀸𑀯𑀸𑀲𑀫𑀧𑀸𑀬𑀜𑁆𑀘, 𑀳𑀺𑀢𑁆𑀯𑀸𑀭𑀽𑀧𑀜𑁆𑀘 𑀲𑀩𑁆𑀩𑀣𑀸;

𑀧𑀞𑀫𑀸𑀦𑀼𑀢𑁆𑀢𑀭𑁄 𑀫𑀕𑁆𑀕𑁄, 𑀲𑁂𑀲𑀝𑁆𑀞𑀸𑀦𑁂𑀲𑀼 𑀚𑀸𑀬𑀢𑀺.

𑁨𑁭𑁪. 𑀲𑀢𑁆𑀢𑀢𑀺𑀁𑀲 𑀅𑀧𑀸𑀬𑁂𑀲𑀼, 𑀓𑀸𑀫𑁂𑀲𑀻𑀢𑀺 𑀧𑀓𑀸𑀲𑀺𑀢𑀸;

𑀧𑀜𑁆𑀘𑀧𑀜𑁆𑀜𑀸𑀲 𑀲𑀼𑀤𑁆𑀥𑁂𑀲𑀼, 𑀭𑀽𑀧𑁂𑀲𑁆𑀯𑁂𑀓𑀽𑀦𑀲𑀢𑁆𑀢𑀢𑀺.

𑁨𑁭𑁫. 𑀙𑀘𑀢𑁆𑀢𑀸𑀮𑀻𑀲 𑀆𑀭𑀼𑀧𑁆𑀧𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀬𑀣𑀸𑀭𑀳𑀁;

𑀇𑀘𑁆𑀘𑁂𑀯𑀁 𑀪𑀽𑀫𑀺𑀪𑁂𑀤𑁂𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀧𑀓𑀸𑀲𑀺𑀢𑀸.

𑁨𑁭𑁬. 𑀢𑀺𑀳𑁂𑀢𑀼𑀲𑀢𑁆𑀢𑁂 𑀲𑀩𑁆𑀩𑀸𑀦𑀺, 𑀤𑁆𑀯𑀺𑀳𑁂𑀢𑀼𑀓𑀸𑀳𑁂𑀢𑀼𑀓𑁂 𑀧𑀦;

𑀧𑀭𑀺𑀢𑁆𑀢𑀸𑀦𑀺 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀜𑀸𑀡𑀧𑀸𑀓𑀓𑁆𑀭𑀺𑀬𑀸𑀚𑀯𑁂.

𑁨𑁭𑁭. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀫𑁆𑀪𑁄𑀦𑁆𑀢𑀺, 𑀤𑀺𑀝𑁆𑀞𑀺𑀬𑀼𑀢𑁆𑀢𑀜𑁆𑀘 𑀓𑀗𑁆𑀔𑀺𑀢𑀁;

𑀲𑁄𑀢𑀸𑀧𑀦𑁆𑀦𑀸𑀤𑀺𑀢𑀺𑀡𑁆𑀡𑀫𑁆𑀧𑀺, 𑀨𑀮𑀁 𑀳𑁄𑀢𑀺 𑀬𑀣𑀸𑀲𑀓𑀁.

𑁨𑁭𑁮. 𑀯𑀻𑀢𑀭𑀸𑀕𑀲𑁆𑀲 𑀚𑀯𑀦𑀁, 𑀓𑁆𑀭𑀺𑀬𑀸 𑀘𑀦𑁆𑀢𑀺𑀫𑀦𑀼𑀢𑁆𑀢𑀭𑀁;

𑀧𑀼𑀣𑀼𑀚𑁆𑀚𑀦𑀸𑀤𑀺𑀢𑀺𑀡𑁆𑀡𑀫𑁆𑀧𑀺, 𑀧𑀝𑀺𑀖𑀁 𑀲𑀫𑀼𑀤𑀻𑀭𑀺𑀢𑀁.

𑁨𑁭𑁯. 𑀚𑀯𑀸 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁, 𑀘𑀢𑀼𑀦𑁆𑀦𑀁 𑀲𑁂𑀲 𑀲𑀸𑀲𑀯𑀸;

𑀲𑀸𑀲𑀯𑀸𑀯𑀚𑁆𑀚𑀧𑀸𑀓𑀸𑀦𑀺, 𑀧𑀜𑁆𑀘𑀦𑁆𑀦𑀫𑀧𑀺 𑀤𑀻𑀧𑀬𑁂.

𑁨𑁮𑁦. 𑀧𑀼𑀣𑀼𑀚𑁆𑀚𑀦𑁂𑀲𑀼 𑀢𑁂𑀲𑀝𑁆𑀞𑀺, 𑀲𑁄𑀢𑀸𑀧𑀦𑁆𑀦𑀸𑀤𑀺𑀓𑀤𑁆𑀯𑀬𑁂;

𑀏𑀓𑀽𑀦𑀲𑀝𑁆𑀞𑀺 𑀘𑀺𑀢𑁆𑀢𑀸𑀦𑀺, 𑀅𑀦𑀸𑀕𑀸𑀫𑀺𑀓𑀧𑀼𑀕𑁆𑀕𑀮𑁂.

𑁨𑁮𑁧. 𑀲𑀢𑁆𑀢𑀧𑀜𑁆𑀜𑀸𑀲 𑀚𑀸𑀬𑀦𑁆𑀢𑀺, 𑀢𑁂𑀧𑀜𑁆𑀜𑀸𑀲 𑀅𑀦𑀸𑀲𑀯𑁂;

𑀫𑀕𑁆𑀕𑀝𑁆𑀞𑁂𑀲𑀼 𑀲𑀓𑁄 𑀫𑀕𑁆𑀕𑁄, 𑀧𑀼𑀕𑁆𑀕𑀮𑁂𑀲𑀼 𑀅𑀬𑀁 𑀦𑀬𑁄.

𑁨𑁮𑁨. 𑀢𑀺𑀳𑁂𑀢𑀼𑀓𑀸𑀫𑀘𑀼𑀢𑀺𑀬𑀸, 𑀲𑀩𑁆𑀩𑀸𑀧𑀺 𑀧𑀝𑀺𑀲𑀦𑁆𑀥𑀺𑀬𑁄;

𑀤𑁆𑀯𑀺𑀳𑁂𑀢𑀸𑀳𑁂𑀢𑀼𑀘𑀼𑀢𑀺𑀬𑀸, 𑀓𑀸𑀫𑀸𑀯𑀘𑀭𑀲𑀦𑁆𑀥𑀺𑀬𑁄.

𑁨𑁮𑁩. 𑀭𑀽𑀧𑀸𑀯𑀘𑀭𑀘𑀼𑀢𑀺𑀬𑀸, 𑀲𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀬𑁄;

𑀆𑀭𑀼𑀧𑁆𑀧𑀸𑀭𑀼𑀧𑁆𑀧𑀘𑀼𑀢𑀺𑀬𑀸, 𑀳𑁂𑀝𑁆𑀞𑀺𑀫𑀸𑀭𑀼𑀧𑁆𑀧𑀯𑀚𑁆𑀚𑀺𑀢𑀸.

𑁨𑁮𑁪. 𑀧𑀝𑀺𑀲𑀦𑁆𑀥𑀺 𑀢𑀣𑀸 𑀓𑀸𑀫𑁂, 𑀢𑀺𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀬𑁄;

𑀪𑀯𑀦𑁆𑀢𑀻𑀢𑀺 𑀘 𑀫𑁂𑀥𑀸𑀯𑀻, 𑀘𑀼𑀢𑀺𑀲𑀦𑁆𑀥𑀺𑀦𑀬𑀁 𑀦𑀬𑁂.